عندك استفسار عن التخدير ؟

[adrianocrespo]

شكرا دكتور هشام علي الاجابه

فعلا افضلهم هو ER

و خصوصا الي الموسم الثامن

و جراي اناتومي حلاوته في تسلسله الدرامي اكتر

اما بقي دكتور هاوس فمش معقول في دكتور كده

بيعرف يشخص حالات نادره جدا بدون اشعه او تحاليل

رجل مبالغ فيه ( علي راي بوحه)

سترونج ميديسن ده مسلسل قديم و مش مشهور

بس الحقيقه الواحد بيتعلم منهم حاجات

و فارق كبير بين الدراما الطبيه عندهم و صوره الطبيب في افلامنا و مسلسلاتنا

اكرر شكري

[د هشام ابراهيم]

يا أفندم العفو ...هاوس عادة بيبقى محور سخرية و تريقة ما بين الأطباء ....طبعا ما فيش دكتور كده أبدا في الحياة الأكلينيكية

جرايز اناتومي صراحة ما باحبوش خالص و ما باقدرش أشوف حلقة علي بعضها أصلا .....معاك حق في إنه دراما أكتر منه دراما طبية

ER كنت متابعه جدا لحد ما الكاست كله أتغير بعديها بطلت أتابعه ..... أخر حلقتين في المسلسل جابوا فيهم كل الأبطال القدام .....سجلتهم بس لسه ما شفتهمش

اللي فعلا تابعته لحد ما خلص و لسه باشوف ال-reruns هو Scrubs

[adrianocrespo]

ER كنت متابعه جدا لحد ما الكاست كله أتغير بعديها بطلت أتابعه ..... أخر حلقتين في المسلسل جابوا فيهم كل الأبطال القدام .....سجلتهم بس لسه ما شفتهمش

الحلقات بوخت بعد دكتور جرين مات

بس نوح وايلي او دكتور كارتر كنت بحبه اوي

و يا تري الحلقتين دول في اي موسم

و موجودين عاليوتيوب؟؟؟؟؟

اكيد تحفه

اللي فعلا تابعته لحد ما خلص و لسه باشوف ال-reruns هو Scrubs biggrin.gif

بشوفه كمان

كوميدي و لذيذ

انا اسف علي خروجي عن سياق الموضوع ..... بس في اسئله عن التخدير حقولها لحضرتك .... انا صيدلي علي فكره و درست ادويه التخدير و كان جزء بايخ شويه ........ بس الصبح بقي عشان المنتخب عكنن علينا

[د هشام ابراهيم]

انا اسف علي خروجي عن سياق الموضوع ..... بس في اسئله عن التخدير حقولها لحضرتك .... انا صيدلي علي فكره و درست ادويه التخدير و كان جزء بايخ شويه ........ بس الصبح بقي عشان المنتخب عكنن علينا

شاكر لحضرتك متابعتك يا دكتور و في انتظار أسئلتك

ER استمر ١٥ موسم الحلقات الاخرانية إتذاعت في كندا من كام أسبوع ..... مسيري أشوفهم إن شاء الله cr((:

[أم رأفت]

السلام عليكم ورحمة الله وبركاته

الأخوة الأفاضل جميعاً

الدكتور هشام الفاضل

بحثت عنكم طويلاً جداً والحمد لله وجدتكم ووجدت من أتمنى من الله أن يريحوا قلبي من مشكلتي التي بلغت بي حد الهاجس.

دكتور هشام أطمع في كرمك وسعة صدرك لسطوري القادمة.

أنا سيدة عمري 35 سنة واعمل صيدلانية في دولة من دول الخليج متزوجة من 9 سنوات وأنعم الله علي بثلاث أطفال حفظهم ربي لي .

مشكلتي حصلت مع الولادة الأخيرة من سنتين ونصف وعلى أساس خلفية الأطباء من ولاداتي السابقة المتعسرة جداً في اول وثاني ولادة قرر الاطباء والاسشارية توليدي بالطلق الصناعي كالمعتاد حيث اني انهيت الاسابيع ال42 كاملة كما في المرات السابقة وبدون اي بوادر للطلق او حتى التوسع وعليه تتعسر ولاداتي وتكون مؤلمة للغاية,وعليه قررت الطبيبة اعطائي حقنة الEPIDURAL حيث قالت لي وبالحرف ولادتك ليست سهلة وستكون طويلة واريد ان اخفف عليك العناء مبكراً وهدا مع بداية الامر وقبل اي توسع في الرحم وانا استغربت الامر لعلمي بضرورة ان يكون الرحم مفتوح من 2-3 سم ومع دلك قلت هي ادرى واحسن لي عشان ما اعيش تجربة قاسية جديدة؟

وما حصل كان اشد ورحمة ربي وسعتني ولله الحمد

ماحصل اني لم اتأثر فعلياً بالمخدر فأعطوني جرعة ثانية خلال فترة بسيطة وبدل ان استفيد منه كاد ان يقتلني حيث حصل معي هبوط حااااد في ضغط الدم مع العلم بأني وطول فترة الحمل اكون من الناس إلي ضغطهم منخفض حوالي 90/50 فتخيلوا معي فقدت الوعي وأعطوني ابرة الادرينالين وقلبوا السرير رأساً على عقب وانقلب المكان لاسعافي والحمد لله ربنا سترواستقر الوضع وبدأت أتقيأ بشكل عجيب واسهال اعزكم الله وارتعش بشدة لا ارادياً ولساعات وفجأة يحصل نزيف وهبوط وهبطت ضربات قلب الجنين وكنت عندا 7 سم!!!!!

وعندها جاءت اخصائة التخدير لا انسى المنظر تحمل الابرة الثالثة تقترح اعطائي جرعة اضافية لاني خلال كل ماوصفته لكم انا اشعر كاملاً بالالم تخيلوا!!!!!!!!!!!!!!!!

والطبية تقول جزاها الله خير انت عايزة تموتيها المريضة تحسست من التخدير وتخيل الصورة انا على وشك الموت والكل يصرخ بسرعة بسرعة وجهاز نبض البيبي يعطي اندار وانا على 7سم بس والبيبي لف راسه وما كان لحظتها في السنتر!!!!!!

قالت لي اسمعي ما فيش وقت انت والبيبي في خطر وما الحقش احولك عملية خاصة عشان البنج وطلعوا برة لاهلي وزوجي قالوا لهم اني تعبانة جدا خليكوا قريب يمكن تحصل حاجة والله فيلم رعب مش ولادة والله والله وانا بحلف ان بعض الممرضات بكوا علي وصارو يقولوا مسكينة شو صار فيها ولولا سرعة الطبيبة كان بنتي اسم الله عليها راحت وولدتني على 7سم انا لغاية اليوم مش عارفة كيف سوت بس الخياطة كانت ابشع والله من لو كانت قيصرية لاني حسيت بكل شكة ابرة فيها .

المهم انا خلاص ولدت لا حس للبيبي ولا حس لي انا وفجأة صارت حرارتي 40 وزيادة وصارت تجيني تشنجات عنيفة المكان اتقلب تاني وجابوا الواح الثلج والله يحطوها علي وانا ولا انا في الدنيا إالي شافوني من اهلي قالوا كنت زرقاء اللون وبس انظر في السما!!!!وكأني ميتة او بموت. :closedeyes:

الطبيبة قالت لي سامحيني لو بعرف حيحصل كدة معاك كان من الاول عملية وتاني لو حصل وحملت بس تعالي عندي وانا اولدك بعملية حرام الي زيك يولد طبيعي مأساة.وخلوني في المستشفى حوالي اسبوع عشان السخونة وماخلوني ارضع البيبي خافوا يكون عدوى مع اني من الاساس باخد الERYTHROMYCIN I.V اول ما ادخل ولادة عندي نوع + لبكتيريا معينة وهادا عادي من اول مرةفاحتمال العدوى مش وارد وسووا لي مزرعة دم طلعت نظيفة

السؤال الان وبعد القصة المريرة شو الي حصل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وشو الي ممكن يحصل لو اخدت الابرة تاني؟

وشو وضعي مع التخدير عامة لو حصل اي طارئ في حياتي العادية؟

وشو اسوي لو حملت تاني ولو ان الموضوع صار نفسياً مرفوض ؟

ملاحظة انا طولي 157 ووزني 52 وعامة لا اتأثر بالادوية المسببة للنعاس على العكس تحصل معي ردة فعل عكسية من اليقظة ولما آخد بنج الاسنان باخد جرعات عالية ويادوب تنفع ومرة فاكرة طبيب اسنان قال الي اخدتيه بنيم جمل وانت على حجمك ووزنك لسة حاسة!!!!!!

هادي عوامل لها علاقة؟

ما خليت موضوع الا قرات عنه وحاولت أسأل بس ما بعرف طبيب تخدير اشفي غليلي بالاسئلة

سامحني على الاطالة بس والله عانيت الكثير وأبحث عن الجواب والراحة علها تكون لديك

وشكراً

[د هشام ابراهيم]

السلام عليكم ورحمة الله وبركاته

الأخوة الأفاضل جميعاً

الدكتور هشام الفاضل

بحثت عنكم طويلاً جداً والحمد لله وجدتكم ووجدت من أتمنى من الله أن يريحوا قلبي من مشكلتي التي بلغت بي حد الهاجس.

دكتور هشام أطمع في كرمك وسعة صدرك لسطوري القادمة.

و عليكم السلام و رحمة الله و بركاته يا سيدتي الفاضلة

أولا أهلا و سهلا بحضرتك و ألف حمد الله علي سلامتك

اجمالا لا استطيع أن ابني فرائض من قصة حضرتك من غير التفاصيل الطبية اللي مفروض تبقى مسجلة في سجلاتك الطبية في المستشفي....... من جانب التخدير و من جانب النساء و الولادة .....خاصة نوع الأدوية اللي حضرتك خدتيها ..... رد فعل الجسم عليها ... تقدم الولادة أو تعثرها بمعني أصح و تفاصيل تانية كتير

انما ممكن أذكر بعض الملاحظات و انصح حضرتك تعملي إيه مستقبلا سواء في حالة الحمل و الولادة أو في حالة التخدير لأي عملية جراحية ......وقانا الله و اياكم

على أساس خلفية الأطباء من ولاداتي السابقة المتعسرة جداً في اول وثاني ولادة قرر الاطباء والاسشارية توليدي بالطلق الصناعي كالمعتاد حيث اني انهيت الاسابيع ال42 كاملة كما في المرات السابقة وبدون اي بوادر للطلق او حتى التوسع وعليه تتعسر ولاداتي وتكون مؤلمة للغاية,وعليه قررت الطبيبة اعطائي حقنة الEPIDURAL حيث قالت لي وبالحرف ولادتك ليست سهلة وستكون طويلة واريد ان اخفف عليك العناء مبكراً وهدا مع بداية الامر وقبل اي توسع في الرحم وانا استغربت الامر لعلمي بضرورة ان يكون الرحم مفتوح من 2-3 سم ومع دلك قلت هي ادرى واحسن لي عشان ما اعيش تجربة قاسية جديدة؟

٤٢ أسبوع كتير قوي ...الكلام ده مفروض كان يحصل مع الأسبوع الأربعين علي الأكثر .....الطلق الصناعي زيه زي أي تدخل طبي ليه فوايده و ليه مضاعفاته و المفروض الاتنين يتشرحوا بالتفصيل

في حالة فشل الطلق الصناعي مفروض البديل هو عملية قيصرية

مش عايز أتعدي علي تخصص تاني لكن ممارستي للتخدير في مستشفيات من أكبر مستشفيات النساء و الولادة سواء في مصر أو اليابان أو كندا تشفعلي

بالنسبة للابيديورال فعلا مفروض ما تبتديش إلا مع بداية التوسع في عنق الرحم انما لو الطلق الصناعي ابتدي من قبل التوسع يبقي الأبيديورال ضروري لأن الطلق الصناعي بيسبب انقباضات قوية للرحم بتسبب الام كتير قوي ما بيستحملوهاش

[د هشام ابراهيم]

ماحصل اني لم اتأثر فعلياً بالمخدر فأعطوني جرعة ثانية خلال فترة بسيطة وبدل ان استفيد منه كاد ان يقتلني حيث حصل معي هبوط حااااد في ضغط الدم مع العلم بأني وطول فترة الحمل اكون من الناس إلي ضغطهم منخفض حوالي 90/50 فتخيلوا معي فقدت الوعي وأعطوني ابرة الادرينالين وقلبوا السرير رأساً على عقب وانقلب المكان لاسعافي والحمد لله ربنا سترواستقر الوضع وبدأت أتقيأ بشكل عجيب واسهال اعزكم الله وارتعش بشدة لا ارادياً ولساعات وفجأة يحصل نزيف وهبوط وهبطت ضربات قلب الجنين وكنت عندا 7 سم!!!!!

وعندها جاءت اخصائة التخدير لا انسى المنظر تحمل الابرة الثالثة تقترح اعطائي جرعة اضافية لاني خلال كل ماوصفته لكم انا اشعر كاملاً بالالم تخيلوا!!!!!!!!!!!!!!!!

الجزء ده من التجربة مش متوافق مع بعضه طبيا

لو الابيديورال شغالة و هي اللي سببت انخفاض ضغط الدم ( أكثر الأثار الجانبية شيوعا من الأبيديورال زاي ما قلت قبل كده ) .....لو شغالة كنت حضرتك ما حستيش بأي ألم

حاجة من اتنين لا إما الابيدورال كانت مش شغالة و في الحالة ديه كل اللي حصل ما لوش علاقة بيها ....خاصة النزيف و الأسهال ...... الاتنين دول ما لهومش علاقة بالابيديورال

لا أما كانت شغالة .....هبوط ضغط الدم و الرعشة و التقيأ من الأثار الجانبية بس ساعتها كان الألم يبقى مش موجود

التفسير صعب زاي ما قلت لحضرتك قبل كده من غير التفاصيل الطبية و بيتراوح من أول مشاكل مع الابيدورال لحد مشاكل مع الولادة و لعدم تكراره حاقول لحضرتك تعملي إيه بالظبط في أخر تعليقي

والطبية تقول جزاها الله خير انت عايزة تموتيها المريضة تحسست من التخدير وتخيل الصورة انا على وشك الموت والكل يصرخ بسرعة بسرعة وجهاز نبض البيبي يعطي اندار وانا على 7سم بس والبيبي لف راسه وما كان لحظتها في السنتر!!!!!!

عفوا سيدتي الفاضلة يعني إيه "المريضة تحسست من التخدير " و "وما كان لحظتها في السنتر"

برضه الجزء ده مش مفهوم أو ما إتوصلش لحضرتك كويس

جرعة الابيدورال الأضافية مش حتموت إلا لو دكتور التخدير مش فاهم هو بيعمل إيه ......و الأبيديورال شغالة بكفاءة زيادة عن اللزوم و أعتقد ده ما كانش الحال مع حضرتك اذا كنتي حاسة بالالم في خلال كل المراحل زاي ما تفضلتي

[د هشام ابراهيم]

قالت لي اسمعي ما فيش وقت انت والبيبي في خطر وما الحقش احولك عملية خاصة عشان البنج وطلعوا برة لاهلي وزوجي قالوا لهم اني تعبانة جدا خليكوا قريب يمكن تحصل حاجة والله فيلم رعب مش ولادة والله والله وانا بحلف ان بعض الممرضات بكوا علي وصارو يقولوا مسكينة شو صار فيها ولولا سرعة الطبيبة كان بنتي اسم الله عليها راحت وولدتني على 7سم انا لغاية اليوم مش عارفة كيف سوت بس الخياطة كانت ابشع والله من لو كانت قيصرية لاني حسيت بكل شكة ابرة فيها .

المهم انا خلاص ولدت لا حس للبيبي ولا حس لي انا وفجأة صارت حرارتي 40 وزيادة وصارت تجيني تشنجات عنيفة المكان اتقلب تاني وجابوا الواح الثلج والله يحطوها علي وانا ولا انا في الدنيا إالي شافوني من اهلي قالوا كنت زرقاء اللون وبس انظر في السما!!!!وكأني ميتة او بموت.

الجزء المظلل باحمر ده ما لوش معني إطلاقا ....في حالة وجود داعي لعملية قيصرية خيار البنج الكلي موجود و ضروري و المريضة بتبقى جاهزة لاجراء العملية في خلال أقل من دقيقة من بدء اعطاء الأدوية الوريدية

برضه في غياب السجلات الطبية حيبقى الموضوع أشبه بالتخمين ..... يا تري فيه عيب في العمود الفقري و الابيديورال ديه كانت Subdural .....هل في أدوية أتاخدت وريد أثناء الولادة خلت حضرتك بالحالة الموصوفة أعلاه ......هل كان فيه حساسية من دواء معين خلي حرارتك ترتفع ...الله أعلم بس حناخد ده في الأعتبار في التوصيات إن شاء الله

بالنسبة للجزء بتاع الولادة عند ٧ سم ديه حاترك التعليق لاطباء النساء

الطبيبة قالت لي سامحيني لو بعرف حيحصل كدة معاك كان من الاول عملية وتاني لو حصل وحملت بس تعالي عندي وانا اولدك بعملية حرام الي زيك يولد طبيعي مأساة.وخلوني في المستشفى حوالي اسبوع عشان السخونة وماخلوني ارضع البيبي خافوا يكون عدوى مع اني من الاساس باخد الERYTHROMYCIN I.V اول ما ادخل ولادة عندي نوع + لبكتيريا معينة وهادا عادي من اول مرةفاحتمال العدوى مش وارد وسووا لي مزرعة دم طلعت نظيفة

في حالة حدوث حمل تاني باذن الله انصح حضرتك تشوفي طبيبة تانية خالص و يا ريت كمان مركز طبي مختلف خالص ...... يفضل مركز طبي متقدم ..... مستشفي جامعي مثلا أو مستشفي كبير متخصص في الولادة حسب البلد اللي حضرتك فيها .....و حاحاول أجاوب علي اسئلة حضرتك في حدود المتوفر من معلومات

عفوا يعني إيه "عندي نوع + لبكتيريا معينة"

سخونة ما بعد الولادة ديه شائعة و قد تكون بسبب عدوي أو أسباب أخري .....بس أكيد حضرتك عارفة إن ده ممكن يحصل مع المضادات الحيوية الوقائية يعني الأريثروميسين ما ينفيش إنه يكون حصل عدوي

[د هشام ابراهيم]

السؤال الان وبعد القصة المريرة شو الي حصل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الله أعلم ...فيه أجزاء كتير مش متوافقة مع بعضها زاي ما قلت لحضرتك ...في غياب السجلات الطبية مجال التخمين مفتوح ...المهم نعمل إيه من أول دلوقت

وشو الي ممكن يحصل لو اخدت الابرة تاني؟

قبل ما تاخدي الأبرة تاني انصح حضرتك تتوجهي لاقرب طبيب تخدير مختص ...زاي ما قلت لحضرتك ...مستشفي جامعي أو مستشفي ولادة كبير متخصص

طبيب التخدير المفروض يسمع القصة كلها و بعدين يجري كشف علي حضرتك خصوصا منطقة الفقرات القطنية .....لاستبعاد إن اللي حصل كان حاجة نادرة إسمها Subdural block .........احتمال تحتاجي تعملي رنين مغناطيسي علي الظهر أو سونار لو التقنية موجودة عند الطبيب ده

في حالة ما اذا كان العمود الفقري و ما حوله سليم ما فيش مانع خالص من اعطائك ابرة في المرة القادمة بشرط إن طبيب التخدير يكون ليه خبرة فيها لتفادي و علاج الأثار الجانبية بصورة أحسن

الحاجة التانية إن طبيب التخدير يتأكد إن ما فيش عند حضرتك حساسية من أي نوع من أدوية التخدير

وشو وضعي مع التخدير عامة لو حصل اي طارئ في حياتي العادية؟

ما أعتقدتش إن التخدير الكلي ممكن يبقى مشكلة لحضرتك بس برضه لازم من الكشف الطبي و احتمال فحوصات معملية

وشو اسوي لو حملت تاني ولو ان الموضوع صار نفسياً مرفوض ؟

فيه بدائل للايبيديورال مذكورة في الموضوع ده سابقا لو الولادة الطبيعية لسه مطلوبة

أعتقد إن لو حصل حمل تاني باذن الرحمن الاسلم هو عملية قيصرية لكن الموضوع ده متروك لطبيب نساء متخصص يحكم فيه

عامة لا اتأثر بالادوية المسببة للنعاس على العكس تحصل معي ردة فعل عكسية من اليقظة ولما آخد بنج الاسنان باخد جرعات عالية ويادوب تنفع ومرة فاكرة طبيب اسنان قال الي اخدتيه بنيم جمل وانت على حجمك ووزنك لسة حاسة!!!!!!

هادي عوامل لها علاقة؟

لا ملهاش علاقة .....لا بالابيديورال و لا التخدير الكلي

اللي ليه علاقة هو وزن و طول حضرتك دول ممكن يأثروا سواء في العمود الفقري أو في عظام الحوض كمان ممكن يأثروا في الجرعة المطلوبة سواء للتخدير النصفي أو الكلي

ما خليت موضوع الا قرات عنه وحاولت أسأل بس ما بعرف طبيب تخدير اشفي غليلي بالاسئلة

سامحني على الاطالة بس والله عانيت الكثير وأبحث عن الجواب والراحة علها تكون لديك وشكراً

العفو يا سيدتي الفاضلة و أتمني لحضرتك خالص الصحة و السعادة

[أم رأفت]

[b]السلام عليكم

د.هشام الفاضل حفظك الله

بداية أشكر تفاعلك معي بالإجابة على كل جزئية من موضوعي جزاك الله خير وجعلها في ميزان اعمالك .

بالنسبة لبعض الأجزاء من الموضوع الغير واضحة فاعدرني فيها لعدم التوضيح ولكني وقتها لم أكن في وضع يسمح لي باستيعاب التفاصيل ولكن كان عندي معرفة عامة لما كان يحدث من كلام الاطباء وقتها لانهم أنفسهم كانوا متوتريييين جداً وحتى لاحقاً وعند محاولاتي للاستفسار بالتفصيل عما حدث لم أجد من استطيع الرجوع إليه بجدية خاصة اني خرجت من المستشفى يعني الامر انتهى .والكل كان يقول المهم انك قمت بالسلامة شو بدك بالتفاصيل انسي انسي :closedeyes:

بعدين في نقطة يمكن اوضحها اكتر اول جرعة من الابرة حسيت ببداية تخدير وتنميل حاجة بسيطة خالص بس ما كان التخدير الكافي يعني اشعر بالخدر من الخارج وكأنه غلاف خارجي غلف الجزء السفلي بينما شعور الالم والطلق وحتى الفحص كان موجود وبشكل تقريباً عادي عشان كده زودتلي الجرعة وبعدها حدث ما حدث وبنفس الصورة كأني مغلفة من الخارج بالتخدير وأشعر بالالم الداخلي عادي .

أما ان البيبي مش سنتر هادا تعبير الدكتورة وقتها والي حصل ان الراس كان وضعه كويس في مكانه وبعدين زي الي لف شوية على حنب فنقص عليه الاكسجين وصار الجهاز يعطي اندار.

اما البكتيريا نوع عندي عادي بعيش مع الام عادي في قناة الولادة ممكن يضر البيبي بس انا نسيت اسمه وهو معاي من اول حمل وهنا عندنا روتين بنعمل مسحة للحوامل لمعرفة الامر عشان ياخدوا المضاد الحيوي في الولادة.

بالنسبة للمادة الفعالة في الايبيديورال انا صراحة لا اعرفها والبعض اخبرني انها غالباً من المورفين .فما رأيك؟؟؟؟؟؟هل هي من المورفين؟؟؟

أشكرك كل الشكر على النصائح القيمة والتي سأعمل بها ان شاء الله واسمح لي بالتواصل معك مستقبلاً للاستفادة من معلوماتك القيمة على الدوام .

ولا يسعني في الختام الا ان احمد الله الدي عافاني مما كنت فيه .

وأحمد الله أني تعرفت اليكم وهداني الله لكم .

[nizza la bella]

تسجيل متابعة قبل الصيد :happy:

[د هشام ابراهيم]

السلام عليكم

د.هشام الفاضل حفظك الله

بداية أشكر تفاعلك معي بالإجابة على كل جزئية من موضوعي جزاك الله خير وجعلها في ميزان اعمالك .

................

العفو سيدتي الفاضلة ....أنا مدرك تماما إن حضرتك أكيد ما كنتيش في حالة تسمحلك بالتركيز و استيعاب كل ما يحدث ....

- واضح من كلام حضرتك إن التخدير ما كانش شغال كويس ...إما فشل في الابيديورال نفسها و ديه وارد حدوثها (نسبتها ١ في ال-٤٠٠ تقريبا ) أو حاجة تانية ليه علاقة بتركيب العمود الفقري ..... ما دمنا مش حنقدر نوصل للسبب الحقيقي دون معرفة التفاصيل الطبية الدقيقة للي حصل يومها يبقى الحل تجنب حدوث نفس التجربة مرة أخري

١- طبيب تخدير أكثر خبرة لضمان فاعلية الابيديورال و علاج مضاعفاتها

٢ - زيارة طبيب تخدير للتأكد من خلو العمود الفقري من أي مشاكل و قد يصل الأمر لاجراء رنين مغناطيسي كما ذكرت أنفا

- بالنسبة للبكتيريا أعتقد إن حضرتك تقصدي انك GBS +ve ..... أكيد حضرتك عارفة إن مفيش دواء فاعليته ١٠٠ ٪ و كون أخدتي مضاد حيوي وقائي لا يمنع من حدوث التهاب بكتيري

- المورفين و مشتقاته و بدائله ممكن يضافوا للمزيج المستخدم في التخدير النصفي انما الأساس عادة هو البنج الموضعي = local anesthetic

و دول برضه أنواع كتير

قليل قوي لما بندي مورفين بس في الابيديورال بس أرجع و أقول الله أعلم إيه تفاصيل تجربة حضرتك بالظبط

- أهلا و سهلا بحضرتك في أي وقت و أنا تحت أمرك في أي إستفسار ....تمنياتي بوافر الصحة و السعادة

[د هشام ابراهيم]

تسجيل متابعة قبل الصيد

يعني كورس تخدير قبل الصيد و كوراس رزع حلل بعديه

سالم و غانم باذن الله يا باشا

[doha]

عندي استفسار بعد اذنك دكتور هشام ولكن اسمح لي الاول ابدي اعجابي الشديد بالموضوع بتاعك وباسلوبك في الطرح والتبسيط للمعلومه .. من زمان وانا من هواة المعلومات الطبية وبحب اقرأ في المجال ده كتير وللامانة فقليلا مايصادفني اسلوب سلسل ومبسط ومعلومات دقيقة زي الي حضرتك بتطرحها هنا فبجد تستحق عليها تهنئة بمثل ماتستحقه من شكر على جهدك فيها .. جزاك الله كل خير ..

ماسبق كان استهلالا لابد منه ..

نيجي بقى للسؤال ..

هو بس حاجه محيراني من فترة وكنت حابه اخذ راي حضرتك فيها ..

لما ولدت بنتي كانت ولادتي طبيعية .. كان في ذراعي ( كانيولا ) ويادوب صعدت على سرير الولاده فالدكتوره حقنت فيها شيء .. انا سالتها هو ده طلق صناعي فضحكت وقالت لاه هو انتي ناقصة ده مخدر .. ودي كانت آخر كلمة سمعتها لاني بعدها لقيت الدنيا بتلف بي ورحت في عالم غريب شفت فيه اشياء مش عارفه هي هلاوس ولا ايه بالظبط المهم اني فقت بعدها لاكتشف اني ولدت خلاص ..

انا كنت فاكره ان كل الولادات كده والناس كلها بتاخذ بنج عادي بس فيما بعد عرفت اني تقريبا الوحيده الي تبنجت لان ناس كتير اعرفها ولدت ومحدش فيهم اخذ بنج .. برضه كنت فاكره ان كل البنج كده لكن المرة الثانيه لما ولدت كانت قيصري بدأت العملية بحقنة وكمامة وفي ثانية واحده لقيتم بيصحوني ويقولوا مبروك ولدتي خلاص مشفتش اي شيء ولا حسيت باي شيء ولا رحت في اي حته من الي رحتهم في الولاده الاولانية ..

فسؤالي لحضرتك ايه بالظبط الي انا اخذته في ولادتي الاولى وليه غبت عن الوعي وحصلت لي هلاوس وليه الناس التانيه مبتاخذش بنج في ولاداتها ؟ مع العلم ان ولادتي الاولى مكانتش متعسرة ولا شيء بل على العكس كانت مفاجئة في بداية الشهر التاسع يعني قبل موعدها بشهر وحجم الجنين كان صغير جدا يعني ولاده عاديه طبيعيه مفيهاش ولله الحمد اي مشاكل .. ايه بقى الي انا اخذته ده وليه ؟

وطبعا ماسبق كان ( استغلالا) لابد منه ..

واعذرني مهو محدش يلاقي ماشاء الله العلم والادب ده وميحاولش ياخذ منهم حته .. جزاك الله كل خير وجعله في ميزان الحسنات ..

[د هشام ابراهيم]

لما ولدت بنتي كانت ولادتي طبيعية .. كان في ذراعي ( كانيولا ) ويادوب صعدت على سرير الولاده فالدكتوره حقنت فيها شيء .. انا سالتها هو ده طلق صناعي فضحكت وقالت لاه هو انتي ناقصة ده مخدر .. ودي كانت آخر كلمة سمعتها لاني بعدها لقيت الدنيا بتلف بي ورحت في عالم غريب شفت فيه اشياء مش عارفه هي هلاوس ولا ايه بالظبط المهم اني فقت بعدها لاكتشف اني ولدت خلاص ..

فسؤالي لحضرتك ايه بالظبط الي انا اخذته في ولادتي الاولى وليه غبت عن الوعي وحصلت لي هلاوس

سيدتي الفاضلة ضحي

أولا شكرا جزيلا علي كلمات التقدير و المديح و أرجو أن أكون فعلا أهلا لها

أكيد تفسيري للاحداث في تجربة حضرتك حيبقى نتيجة ظن و تخمين لاني ما أعرفش التفاصيل الطبية المحيطة انما باجاوب علي قد ما أقدر في حدود وصف حضرتك و خبرتي العملية في مجال تخدير النساء و الولادة

بالنسبة للولادة الاولي

- مصر من الدول القليلة في العالم (إن لم تكن الوحيدة ) اللي بيحصل فيها تخدير كلي ساعة الولادة الطبيعية بالطريقة المتبعة في كثير من المستشفيات اللي عملت بها في مصر ( كلها مستشفيات كبري خاصة أو مستشفيات جامعية )

لاعتبارات كتير ذكرت بعضها في الموضوع ده سابقا التخدير الكلي للسيدة الحامل أقل أمانا من تخدير غير الحامل .... و عليه مفروض ناخد احتياطات و اجراءات معينة لو اضطرينا للتخدير الكلي لسيدة حامل سواء ولادة أو قيصرية أو أي عملية تانية ....للاسف الكلام ده ما كنش بيحصل (أنا بقالي أكتر من ٤ سنين بعيد عن مصر و ما أعرفش الدنيا اتغيرت و لا لأ ) ..... و كنا بنعرض السيدة الحامل لمخاطر عدة لما بنخدرها وقت الولادة من غير الأحتياطات المفروضة

فيه مخدر عام وريدي مخاطره أقل نسبيا و علشان كده كنا بنستخدمه بكثرة في المواقف ديه كمحاولة لتقليل المخاطر

المخدر ده ليه أثار جانبية كتير ( زي ما اتفقنا ما فيش دواء ما لوش أثار جانبية ) أشهرها علي الاطلاق الهلاوس السمعية و البصرية اللي ممكن تحصل بسببه انما بموازنة الفوائد و المضاعفات كنا بنلجأ ليه كحل وسط

أكيد مش ممارسة طبية مثالية انما وسط منظومة متكاملة من التسيب في جميع مجالات الحياة ما أقدرش ألوم حد أو ادعي اني ما كنتش باعمل كده

يتبع

[د هشام ابراهيم]

انا كنت فاكره ان كل الولادات كده والناس كلها بتاخذ بنج عادي بس فيما بعد عرفت اني تقريبا الوحيده الي تبنجت لان ناس كتير اعرفها ولدت ومحدش فيهم اخذ بنج ..

ليه الناس التانيه مبتاخذش بنج في ولاداتها ؟ مع العلم ان ولادتي الاولى مكانتش متعسرة ولا شيء بل على العكس كانت مفاجئة في بداية الشهر التاسع يعني قبل موعدها بشهر وحجم الجنين كان صغير جدا يعني ولاده عاديه طبيعيه مفيهاش ولله الحمد اي مشاكل

ممكن نقسم احتياجات الام أثناء الولادة لمرحلتين ...أول واحدة من بداية حدوث الطلق و سبب الألم بيبقي انقباضات الرحم اللي بمرور الوقت بتكتر في القوة و معدل الحدوث ..... الطلق الصناعي برضه بيعمل انقباضات قوية في الرحم و بتسبب ألم

المرحلة التانية الولادة نفسها و لحد خروج الجنين و المشيمة و ساعات فحص ما بعد الولادة كمان بواسطة الطبيب لو احتاج يعمله

الولادة المبكرة و الجنين الصغير في الحجم مش معناه أبدا إن الولادة أسهل ...المرحلة التانية ..... بالعكس في كتير من الأحوال بتبقى أصعب و كتير جدا أطباء النساء بيحتاجوا يستخدموا جفت ولادة (forceps) أو شفاط فاكيوم و كتير برضه بيحتاجوا يعملوا قطع في قناة الولادة (episiotomy) سواء كده أو كده بيطلبوا تخدير الام و ديه مفهومة شوية لكن برضه فيه احتياطات للتخدير تقلل المخاطرة مفروض تتبع

انما فيه أطباء نساء ....مفروض من علامات الطب و اساتذة كبار جدا .... بيحتاجوا الأم تنام وقت الولادة علشان ما تحسش بأي الام من أي نوع ..... مفروض انهم كده بيوفروا ليها تجربة ولادة مثالية ...... ممارسة خاطئة برضه مفروض تتغير لان في الحقيقة المخاطرة كبيرة .....

لو فيه إبيديورل من الأول زي ما بيحصل بره ما نحتاجش مخاطرة التخدير الكلي في المواقف ديه

في كثير من الأحيان سواء في وجود إبيديورال أو لا الولادة الطبيعية نفسها ما بتبقاش مؤلمة للغاية خصوصا لو الأم ولدت قبل كده .... من المعروف طبعا إن عادة أول ولادة هي أصعب و أطول ولادة .... يعني مع تالت أو رابع ولادة لو كل حاجة طبيعية الأم ممكن ما تحتاجش تخدير من أي نوع سواء أثناء الطلق أو أثناء الولادة .....أرجع و أقول برضه إن الأحساس بالالم بيختلف من شخص لاخر

.....ده ممكن يفسر شوية ليه فيه ناس مع أخدتش تخدير وقت الولادة ....ساعات كمان الناس بتبص علي الآم الولادة انها حاجة طبيعية و مش محتاجة تدخل طبي .... ما عنديش اعتراض علي الكلام ده انما المشكلة الوحيدة لو الام نفسها متألمة انما الناس اللي حواليها شايفين انها بتدلع و مش محتاجة حاجة

الصح إن اتخاذ قرار علاج الالم راجع أساسا للام و الطبيب المعالج

[د هشام ابراهيم]

كنت فاكره ان كل البنج كده لكن المرة الثانيه لما ولدت كانت قيصري بدأت العملية بحقنة وكمامة وفي ثانية واحده لقيتم بيصحوني ويقولوا مبروك ولدتي خلاص مشفتش اي شيء ولا حسيت باي شيء ولا رحت في اي حته من الي رحتهم في الولاده الاولانية ..

لو تخدير العملية القيصرية كلي زي ما متبع في مصر دونا عن بلاد الدنيا بيبقى تخدير كلي فورمال ...يعني بكل الأحتياطات و باستخدام أنبوبة التخدير و أدوية وريدية و غازات التخدير و جهاز التخدير إلخ ....و عادة الدواء الوريدي اللي من اثاره الجانبية الهلوسة ما بنستخدموش في الحالة ديه لانتفاء أي فايدة منه ....الادوية الحديثة الصحيان منها بيبقى سريع و المريض بيستعيد وعيه و ادراكه الكامل بسرعة خصوصا لو العملية ما أخدتش وقت كبير ...عادة القيصرية بتاخد أقل من ساعة .... و ده يفسر اختلاف تجربة حضرتك مع التخدير في المرتين

[د هشام ابراهيم]

طبعا ماسبق كان ( استغلالا) لابد منه ..

واعذرني مهو محدش يلاقي ماشاء الله العلم والادب ده وميحاولش ياخذ منهم حته .. جزاك الله كل خير وجعله في ميزان الحسنات ..

يا أفندم العفو ...أكيد لا استغلال و لا حاجة ....أرجو اني أكون جاوبت علي بعض استفساراتك و لو فيه أي نقطة ما عرفتش أوصلها أرجو انك تتكرمي و تعيدي السؤال فيها

مرة تانية باكرر شكري و امتناني لكلماتك الكريمة

تحياتي و احترامي

[eldeeb]

السلام عليكم

حصل لي حادث مروري منذ ستة اشهر واجريت عملية تثبيت مسمار نخاعي لعظمة الفخذ، المهم دخلت حجرة العمليات الساعة 3 عصرا وخرجت الساعة 11 مساءا

اخبرني الطبيب اني عندي مشكلة نادرة جدا مع البنج Sudden unexplained apnea وقال لي لانعرف ماذا حدث لك، وهذه المشكلة حدثت لي 3 مرات في حجرة العمليات وكان هناك اكثر من استاذ جامعي متخصص في التخدير وقالوا هذا الامر غريب جدا، مع العلم ان التخدير كان نصفي، وكذلك عندما اخذت التخدير النصفي لم يعمل فاعطوا لي منوم، بعدها فقدت الوعي.

مع العلم اني عملت عملية اللوز عندما كنت صغيرا ولم يحدث شيء

فارجوا رأي حضرتك لأني مقبل على عملية خلال الايام القادم

وجزاكم الله خيرا