ارجو الافاده فى موضوع شراء الفيزة الحرة

[abu bakr]

انا عايز اشرى فيزا هى هتبقه عله المدينه يعنى وكنت عايز اعرف حاجه انا الفيزة الهشتريها مكتوب فيها عامل وانا معايه بكليريوس نظم ومعلومات اداريه كونت عايز اعرف انا لما اروح هل من السهل انى الئى شغل بسهوله انا متخرج دفعه 2008 ومعنديش خبرة مشتغلتش قبل كدا وكنت عايز اعرف انا لما اوسق الشهاده بتاعتى من الخارجيه سهل النا لما اروح هناك اغير ها فى البسبور لما اشتغل وهل متوسط المرتبات لواحد زى لو انشاء الله هشتغل فى المدينه هتبقه فى حدود كام وايه الوظايف الممكن اشتغلها هناك الموضوع هناك سهل يعنى ولا صعب ولا ايه ارجو الافاده يريت

وجزاكم الله خير

[أحمد سيف]

خليني أقولك نكته الأول وبعدين ندخل في الموضوع

مره اصطادوا أسد من الغابه وودوه حديقة حيوانات في السعودية فالأسد اتبسط وقال خلاص هاكل لحمه كل يوم دي بلد غنيه بقى ... في أول يوم جابوله موز ... قال مش مشكله يمكن اللحمه اتأخرت ... ثاني يوم جابوله برضه موز قال يمكن غلطوا المره دي ... ثالث مره جابوله موز فقال مابدهاش نروح نشوف ايه الحكايه ... راح اشتكى قالوله ماينفعش نجيبلك لحمه لإنك دخلت السعوديه بفيزا قرد.

بمعنى ثاني اللي بيحدد وضعك في السعودية المهنة اللي مكتوبالك في الفيزا مش شهادتك.

حاجه مهمة لازم تعرفها يا أخ أبو بكر إن مافيش حاجه اسمها فيزا حره ... انت رايح على كفيل ومش هاتعرف تشتغل ولا تسافر ولا تقضي أي مصلحة في حياتك من غير موافقته

ثانيا لو حبيت تشتغل في أي مكان ثاني هايكون وضعك غير قانوني وممكن كفيلك يبلغ عنك هروب وتتحبس وتدفع غرامة كبيرة وتترحل ... ده إذا لقيت شغل أساسا لإن اولاد البلد نسبة البطالة بينهم عاليه ... وواحد حديث التخرج بدون خبره زيك وضعه أصعب

طبعا ماتتوقعش تشتغل في وظيفة عاليه ولا حتى متوسطة ... الوظايف دي محجوزة لاولاد البلد والأجانب أصحاب الخبرة المقيمين بشكل قانوني ... غالبا هاتشتغل في الوظيفة اللي مكتوبالك في الفيزا يعني عامل وهاتتساوى بواحد ساقط إعداديه جاي على نفس نوع الفيزا.

وبعد خمس سنين هاتلاقي نفسك لسه شغال عامل ونسيت الكلمتين اللي درستهم في الكلية وتعبان ومش عارف تجيب عيلتك والكفيل عمال يذل فيك وماحوشتش عشرتلاف جنيه على بعض وزمايلك اللي سبتهم في مصر وضعهم أحسن كثير منك .

نصيحة خليك في مصر وابتدي هناك من الأول في مكان صغير خذلك شوية خبره واتعلم والفلوس اللي هاتصرفها على الفيزا خذلك بيها كام دورة كمبيوتر ولا ادفعهم لحد يشغلك في شركة كبيرة على الأقل تحط اسمها في ال سي في بتاعك. ولما تآخذ خبره وتعمل علاقات ويبقى يجيلك عقد عمل محترم في السعودية ابقى اتوكل على الله وتعال اشتغل هنا. غير كده تبقى العملية خسرانه.

تم تعديل 15 أبريل 2009 بواسطة أحمد سيف

[doha]

بما اننا دخلنا قبلك في دوامة الفيزا الحرة دي فاحب افيدك بخبرتي البسيطه فيها ..

اولا زي ماقال لك الاخ احمد سيف مفيش حاجه اسمها فيزا حرة الحكايه ومافيها ان الفيزة دي في السعوديه زي رخصة السلاح كده في مصر .. يعني مش اي حد بيصرحوا له بحمل سلاح غير وفق شروط معينة لازم تكون منطبقة عليه .. طيب في ناس منطبق عليها الشروط بس مش محتاجه السلاح في الحالة دي بتعمل ايه؟ بتطلع السلاح وتديه لحد محتاجه بس معهوش رخصة او ميقدرش يطلع رخصة ..

الفيزا الحرة نفس الشيء ناس منطبق عليها شروط استقدام حد او احضار موظفين لداخل البلد بس مش محتاجين الموظفين دول فيعملوا ايه يروحوا يجيبوا ناس زي حالاتك ويقولوا لهم اشتغلوا في اي مهنة هنا عند اي حد محتاج وظفين بس ميقدرش يجيبهم من بلدهم لعدم توافر الشروط لديه وفي المقابل هو بياخذ منك مبلغ كبير ثمن للفيزا او ثمن لادخالك البلد وبرضه بياخذ منك مبلغ كل سنة مقابل ماهو سايبك ( تسترزق )

لغايه كده الكلام جميل لكن ايه الوحش بقى ..

اولا ان الكفيل الي دخلك البلد ده واخد العملية من البدايه تجارة يعني هو جايبك مش لسواد عيونك وانما للمبلغ الي هيطلع له من وراك وطبعا طالما انت داخل البلد فهو مش من حقه يجيب غيرك لغايه ماتمشي .. فبعض ضعاف النفوس بيلجأوا لحركه نص كم وهي ان بعد دخول الشخص البلد يبلغوا عنه هروب عشان يسمح لهم باستقدام شخص غيره .. وهنا بقى ضرورة ان الي يرسل لك الفيزا يكون حد مضمون او حتى الواسطه الي بينكم تكون مضمونه عشان متلاقيش نفسك دخلت البلد ودفعت واترحلت بعدها بشويه لاقدر الله ..

ده غير ان ممكن الشخص يوهمك ان عنده فيزا وياخذ الفلوس وآدي وش الضيف ..

بالنسبة لك وبما انك بتفكر تشتري فيزا فاهم حاجه بعد حكايه المصداقية في الشخص الي هتتعامل معاه ودي بصراحه مفيش مخلوق يقدر يضمنهالك فاحسن مافيها الاستخاره طبعا قبل ماتآمن حد على فلوسك .. اهم حاجه بعد كده هي ان يكون لك حد قريبك في المكان الي رايح له .. ويكون قريبك ده مسؤول عنك بمعنى الكلمه ..يعني هتسكن وتاكل وتشرب عنده لغايه ماربنا يفرجها .. يعني مش مثلا ابن خالة ابن عمة والدك وتروح له لاه .. شوف مثلا يكون والدك هناك او اختك مثلا او اخوك كده .. حد قريب اوي ويكون مستعد يتحملك فترة بلا مشاكل ليك او ليه .. لان موضوع البحث عن عمل ده حظوظ ومحدش عارف هتنتظر قد ايه لغايه ماتلاقي شغل خاصه وايجارات المساكن هناك غاليه جدا فلو اضفتها لثمن الفيزا ومصاريف السفر ووو هتلاقي مش باقي لك شيء ده اذا اشتغلت فمابالك لو تاخر الشغل ..

لو انت شخص ( بتلعب بالبيضة والحجر ) وبتعرف تطلع القرش من بق الاسد ولا من الصخر معرفش بيقولوها ازاي .. لو انت الشخص ده اشتري فيزا حرة لان الشغل في السعوديه بالكوم لكن عاوز حد ( حرك ) يعني لو ميفرقش معاك تشتغل في التجاره او تمرمط نفسك هنا وهناك يبقى هتعمل قرش كويس في فترة وجيزه وهتبقى مفيده لك اويا لفيزا الحرة لان مش هتربطك بدوام معين .. يعني دي ممناسبة اوي لشخص بيعرف ( يلقط رزقه ) من يومين وم شمال .. اما لو انت مش من النوع ده وبتحب شغل المكاتب وماشابه فصيحة طالما معندكش خبرة فاحسن حاجه بدال ماتدفع فلوس لفيزا حرة قدم اوراقك في مكاتب الاستقدام واطلع على وظيفة احسن .. اقعد لك سنتين تلاته استفيد خبرة كويسه بعدين ابقى اشتري فيزا براحتك ودور بكيفك .. صحيح المكاتب احيانا بتعرض رواتب متدنية بس مهو لو حسبت تكاليف الفيزا وتكاليف بقائك كام شهر بدون شغل هتلاقيها محصلة بعضها في الآخر .

برضه عشان الكلام يكون سليم اكتر فبعيد وأؤكد عليك بالاستخاره اكتر من مرة وعلى فكره عن نفسي لو انعرض علي شغل في مصر بنفس الفلوس الي اشتري بيها فيزا حرة كنت اخترت شغل مصر ولو حتى الراتب نص نص ..

تم تعديل 15 أبريل 2009 بواسطة doha

[wayfarerr]

اخي الكريم

اخوك موجود في المدينة بقالي خمس شهور

المدينة المنورة من اصعب الاماكن في المملكة اللي ممكن تلاقي فيها شغل لان كل الناس بتيجي عاوزة تقعد هنا في المدينة

لذلك الرواتب هنا في المدينة متدنية جدا جدا وفرص الشغل قليلة جدا

انا مش بعقدك بس هو ده الواقع بجد

انا جيت هنا المدينة بفيزا حره وحفيييت لحد مالقيت شغل وبراتب تعبان

والله مش بعقد الامور لك اخي الكريم

بس هو ده الواقع في المدينة المنورة

هي بلد جميلة بلد الرسول صلى الله عليه وسلم والعيشه فيها حلوة وغير اي مكان في الدنيا

وانت ليك حرية الاختيار

[غريب الخبر]

اخي الكريم

اخوك موجود في المدينة بقالي خمس شهور

المدينة المنورة من اصعب الاماكن في المملكة اللي ممكن تلاقي فيها شغل لان كل الناس بتيجي عاوزة تقعد هنا في المدينة

لذلك الرواتب هنا في المدينة متدنية جدا جدا وفرص الشغل قليلة جدا

انا مش بعقدك بس هو ده الواقع بجد

انا جيت هنا المدينة بفيزا حره وحفيييت لحد مالقيت شغل وبراتب تعبان

والله مش بعقد الامور لك اخي الكريم

بس هو ده الواقع في المدينة المنورة

هي بلد جميلة بلد الرسول صلى الله عليه وسلم والعيشه فيها حلوة وغير اي مكان في الدنيا

وانت ليك حرية الاختيار

[/quote

كلام مضبوط . وده تمن قعدتك واستقرارك فى المدينة .

[elfakhrany]

الفيزا الحرة مشروع فاشل لأى خريج جديد بدون خبرة وفى ظل الأزمة الأقتصادية معظم الشركات هنا موقفة التوظيف ولو فى فرصة عمل بيتقدملها بدل 5 الأول يتقدم

50 لنفس الوظيفة حاليا وطبعا فيهم ناس من أصحاب الخبرة وكمان الوقت المناسب هنا للبحث عن وظيفة من شهر 11 ميلادى يعنى عشان تكون فى الصورة لو نويت

تيجى أعمل حسابك انك ممكن تقعد لحد شهر 11 لحد ماتجصل وظيفة تكون مناسبة وممكن تقضى الفترة دى فى اى وظيفة مثل بائع فى محل ... والله المستعان,,,

[HassanAboali]

ما شاء الله الاخوة الافاضل شرحو بالتفصيل وأوكد لا توجد فيزا حرا وانتى ونصيبك في الشغل مش سهل أول لما تيجي تلاقي شغل لازم تحدد قبل لما تيجي على شغل معين مش تيجي وتبحث والافضل استني شوية بمصر وخد خبرة وتعالي على فيزا محترمة أو حتى على شغل محترم

[doha]

الفيزا الحرة مشروع فاشل لأى خريج جديد بدون خبرة وفى ظل الأزمة الأقتصادية معظم الشركات هنا موقفة التوظيف ولو فى فرصة عمل بيتقدملها بدل 5 الأول يتقدم

50 لنفس الوظيفة حاليا وطبعا فيهم ناس من أصحاب الخبرة وكمان الوقت المناسب هنا للبحث عن وظيفة من شهر 11 ميلادى يعنى عشان تكون فى الصورة لو نويت

تيجى أعمل حسابك انك ممكن تقعد لحد شهر 11 لحد ماتجصل وظيفة تكون مناسبة وممكن تقضى الفترة دى فى اى وظيفة مثل بائع فى محل ... والله المستعان,,,

كلامك شكله منطقي ..

بس بعد اذنك ايه السبب في ان انسب وقت للبحث عن عمل هو شهر 11 ؟ هل عشان تقفيل الميزانية مثلا في 12 ؟ وايه علاقه ده بده ؟ ولا في سبب تاني . .

ياريت تنورنا لان لو المعلومه دي صحيحه تبقى في غايه الاهمية ..

[حماده عبده]

أخي مافيش حد بيطلع أول مرة السعودية بيطلع بفيزا حرة حضرتك زي ما الأخوة الأفاضل نصحوك بأنك تشوف عقد عمل عن طريق أي مكتب قدم سي في بتاعك في كذا مكتب وأن شاء الله ربنا يوفقك وتطلع وتاخد خبرة وبعدين تفكر في موضوع الحرة ده وربنا يوفقك أن شاءالله