مأساة "شعنونة"

[بنت شعنونة]

يا عااااااااااااالم يا هوووووووووووووووه

الست حماة اخويـــــا

اللي هيا مرات عمي... اخو ابويـــــا

ها تجننيييييييي خلالالالالالالاص

كل شوية تحاسبنا على حاجات تفاهات!!

تقولنا عملتوا وعملتوا.. اشي حاجات واشي محتاجات!

دي محاسبانا على حاجات من ايام الساداااااااات!!

احاول افهمها..

بالذوق... بالاشارة .. او حتى بالحركات

يا طنط.. الدنيا خد و هات مش كله كدا هات هات!!!

ابدااااااااااا

اكني بكلم في البلالالالالاط

كل كام يوم الاقيها ملوية!!

مرة ما بتسألوش مرة ما بتتصلوش بيه!!؟

مرة ما بتزوروش ولا تسالوا على عمكم او عليه!!!!

يااااااااربـــــي...!!! اقولها ايه ديه؟؟

اذا كان احنا طول عمرنا في حالنا

لا بنروح ولا بنيجي من يومنا

وهيا خدتنا على عيبنا

عايزانا ليه نغير طباعنا!!!!!!!!

ومع ذلك...... قلنا ماااااااااااشي

بقينا كل اسبوع راكبين او رايحين مشي

نزور و نوجب ونضحك واهو كله ماااااشي

وتلفوناااات ومجاملات فارغة.. وقلنا ما يجراشي

انما كلللللله كووووووووم

وانه عمي يتصل ويقول لأبويا خللي الشعنونة تهني العروسة دا كوم تاني!!!

لا و الأكادا بهنيها ب ايييييييه؟؟

ب سنوية شبكة البييييييه!!!!!

لالالالالالا

ماهوا لالالالازم يكون فيه حدود للدلع

واتكلم مع اخويا واقوله في ايييييه يا دي الجدع!!!

يقولي ها تخسروا ايييييه يعني؟؟ كلمتين حلوين وانتي طول عمرك مجدع

حطيت لساني في بقي وسكت

وقلت عشان اخويا و البنت

نعمل خير ونرمية للست

يمكن ربنا يهديها وتعتقنا مجاملات

مافييييش يومين يا اخونا

الا وكانت سايبلنا البيت وماشيا!!

مع انها كانت جايلنا مجاملة

مالك يا ست... لاوية بوزك ليييييه

اصله كلكم سبتوا البيت.. يبقى اقعد لييييه؟؟

يا ستي جنابك جايه في عيد ميلاد النونو اخو البيه

يعني محدش كان فاضي سعتها.. مش كدا والا اييييه؟؟

وبعدين ما انا قاعدا معاكي اهو.. والا هوا افترى علينا وعلييييه

وفضلت مأموصة يومين

ليه وليه.. لازم نتكلم ونبوس الايدين

والبيه عامل زعلان ويقولي

ها تخربوا عليا!!!

اقوله حماتك ها تخرب بيتيييين!!

وانا جديدة عليا..

اسمع راجل يقول ها تخربوا عليا؟؟

امال الولايا تقول ايييه؟؟؟؟

شوووووروووووا عليا يا خلق هوووووه

الست طيرت البرج اللي فاضل فووووووووق

وقال اييييه

عاملالنا بكرة جلسة تأديب؟؟

انا وبابا و والدة اخويا الحبيب

اولع فيهااااا بقى

والا اسيبها تركب على دماغي

اااااااااااااافففففففففففففففف

[ragab2]

فعلا

حكاية غريبة ياست شعنونة

وعندك حق

وفيه ناس كتير من العينات دى شكاية ومدمنة للشكوى عمال على بطال ويسبقوا فى الشكوى حتى يلفتوا لهم الأنظار ويغطوا تقصيرهم

وعاوزين دايما الناس تبدأ بمجاملتهم أو يسبقوا ويلوموا غيرهم قبل ما بلومهم الغير عملا بالمثل .. كله قبل مايكلك

معلش

عشان الورد نتحمل الشوك ولأجل الأخ الكريم نصبر شويتين

تحياتى

[Salwa]

ياه ياشانا ....هو فيه ناس فاضية كدة ؟؟

سنوية ايييييييييه؟

مش المفروض الحاجات الشخصية البحتة دى يحتفل بيها العريس والعروسة بس ؟؟؟

اوعى تجاملى وانتى ملكيش غرض ....

وحياتك ياشانا افهمى كلامى بالضبط زى ما بقوله ....يعنى لا أكثر ولا أقل ...

اوعى تجاملى على حساب نفسك .....واتعلمى انك طول عمرك تعملى بس اللى انتى شايفاه صح ...

انتى مش صغيرة علشان حد يوجهك ....للواجب....

لو انتى من نفسك عاوزة تروحى للبنت او امها .......حاجة جميلة من وقت للتانى ....بس مش بالاكراه ...

واخوكى لازم يعرف ان دى حياته هو الشخصية ...

هو متجوز البنت .....مش البنت وامها ..

روقى دمك ياشانا ...

هو انتى فاضية للصغائر دى ؟؟؟

سلامى.

[بنت شعنونة]

والله يا ماما سلوى انت ود. رجب كلالالالالالامكم صح جدااااااااا

عشان كدا انا مسكتها امبارح قدام اخويا وبنتها وبابا وعمي واتكلمت معاها بمنتهى الصرررررررررحا عشان اخلص

لآنها كانت استفردت بمرات بابا لوحدها في المنصورة يا حرام وجرحتها بكريقة كلام سخيفة جدا

وانا بقى فشيييييييييت غلي كله معاها لكن بمنتهى الأدب و بضحك وكلام بايين جدا لكن من غير ما تمسك عليا غللللللللطة واحدا

اما نشووووووووووووووف اخرتهااااااااا بقى

ياربي دا احنا اهل عريس نموذجيييييييين جدا

وسايبين الولد على كييييييييييف كيفه يعمل اللي عاوزة

في الشبكة قلنا انتوا نقوا بس واحنا علينا الدفع واتكسفنا حتى ننزل

في القاعة بابا قالها امري تجابي و والله ما شفناها الا يوم الخطوبة

يقووووووووووم بعد كل دا هيا عاوزانا نحشر مناخيرنا في حياتهم ونروح ونيجي ونعمل حماوات!!!!!!!!!!!!

هوا حد لالالالالالالالالالاقي عز كدا!!!!!!!!

[بنت شعنونة]

الولد كبر وقرر يسافر يجيب فلوس

عشان يقدر يفتح بيت ويهني العروس

والحمدلله طلع على قطر واشتغل شغل مدروس

بعدها بكام شهر رجع الولد وقرر يلم شمل النفوس,,,

عاوز اكتب الكتاب يا بابا و اعلي الجواب..

يا ابني لسا بدري على فتح دا الباب!!؟

-ما تقلقش يا والدي.. كله في دماغي بالحساب..

واذا ما اتجوزتش دلوقتي.. امال اتجوز امتى يا شباب؟؟

ماشي يا دي الولد.. نكتب الكتاب

والست حماة اخويا عملة زفة وهوليله

واشي قاعة واشي شوكلاته وغيره وغيره.. بس كانت ليلة جميلة

صحيح الولد كع اللي في جيبه

بس لجل الورد ينسقي العليق.. واهي ليلة..

سافر الولد على وعد بتجهيز الشقة

ولجل ما يثبت حسن النية اشترى اول حتى من الجهاز في الشقة

وتمر ايام وتيجي ايام.. وفجأة

الشغل يطير والفلوس تنصرف والولد يرجع على فيض الكريم

قلب ابويا ها ينفطر عليه.. مش عارف هوا عيان والا سليم

ارجع يا ابني... مالكش الا بيتك واهلك...وان شاء الله تتعدل باذن الكريم

وفجأة

تيجي الست حماة اخويا و تستجوبنا

ها تعملوا ايه في الخيبة ديا يا اخونا؟

العمل ..عمل ربنا يا هانم.. مالناش غيره يصونا

بقولكم اييه.. ابنكم وعدني بالجواز ع الصيف.. اتصرفوا انا ماليش دعوة..

صيف ايه وخريف ايه؟ مش لما يشتغل البيه..

برضه ماليش دعوة!

وهوبا فتحت في الكلام وخرفت تخريف عظيم

اشي اهانات اشي شتايم في الولد اليتيم

واحنا ساكتين عاملنله خاطر قديم

طب والحل

كرامتي اتهانت

وكرامة والدي معاها

و الولد مش عارف ولا سامع

الست حماة اخويا

ناوية اقتلللللللللللللللللهااااااااااااااا واقتل اخوياااااااااااا :angry: :angry:

[Sherief AbdelWahab]

للأسف لدى بعض السادة من الكبار مزاج سادي حبتين ويقلب آخر النهار على مازوكي..

الاسم طوبة والفعل أمشير ، الكلام المعلن دعوات بالاستقرار ، والنوايا أماني بالخراب والدمار.. فيه ناس فعلاً بتكره إن الأمور تمشي على ما يرام ، ومبتديش أي ثقة في قدرة الأطراف على عمل زيجة سليمة..

يفترض بأي اتنين على وش جواز إنهم يكونوا أنضج بشكل كفاية لفتح بيت .. وطالما الأهل وافقوا إذن وجود النضج دة مفترض.. وعليه يجب يكون تدخل الأهل محدود وللضرورة القصوى..

اللي شفتيه هوة اللي احنا بنشوفه ، بس بتغيرات بسيطة..

ربنا يحسن جوازنا وختامنا.. :angry:

خلص الكلام

[عادل أبوزيد]

الفاضلة شعنونة

الموضوع فى باب الشعر و الأدب و لا أدرى هل تتكلمين عن حالة حقيقية أم خيال شعراء ؟

لو الأمر حقيقة فلا مناص من أقدم نصيحة و هى نتيجة خبرة العمر مع الأهل و الجيران و المعارف

فى مسائل الزواج - على الأقل - "ماتلصمهاش" لا أجد كلمة أوضح فى الوصف و المطلوب أكثر من "ماتلصميهاش" ..

بعد كتابتى للعبارة السابقة عن لى أنك أقمتى مدة خارج و بالتالى قد لاتفهمى المقصود بتلك الكلمة العامية

و المعنى ألا تلجئى لتصفية الأمور و حل المشاكل و كل طرف راضى "على مضض" أو متغصب نتيجة الضغط الأدبى أو الإجتماعى أو حتى المادى ... أو أن كل طرف "ماصص ليمونة " و راضى ....

فى هذه الأحوال آنستى الفاضلة نحن فقط نؤجل الصدام الحتمى المنتظر و أحيانا يكون التأجيل لوقت يصعب فيه التراجع - عند وجود أطفال - مثلا

أعرف أسر تعيش معا تحت سقف واحد لأكثر من 20 سنة و العلاقة بينهم رديييييئة و أبعد ما تكون عن المودة و الرحمة.

[G.G]

فى مسائل الزواج - على الأقل - "ماتلصمهاش" لا أجد كلمة أوضح فى الوصف و المطلوب أكثر من "ماتلصميهاش" ..

يااااااااااااااااااااااه,,

هي دي الكلمة اللي بدور عليها من زمان..

قلنا "طناش",,لأ مش طناش

قلنا"سماحة النفس",,لا ليست لهذه الدرجة

قلنا "حسن النية",,لأ برضه!

قلنا "الغفلة",, لأ مش غفلة أوي,,لأن التوجس كان هناك دائما ,,مستقر في القاع..

أد ايه هذه الكلمة بليغة ,,

و أد ايه موجزة,,

keyword يحمل البداية و النهاية و خدمة ما بعد البيع ..

قصدي,, أوجاع ما بعد النهاية !

[هشام الجنيدى]

اهم حاجه ظبط النفس وعدم التهور يا شانا .........

mfb:

[وليد صفوت]

أجمل حاجة يا شانا يا أختى العزيزة انك بتعرفى تصوغى الاحداث بالتفصيل فى هيئة شعرية الى حد كبير ,....

لدرجة انى مكنتش ملاحظ أصلاً ان الموضوع فى باب الأدب و الشعر !!!

ألف تحية لفنانة شانا ... rs: :blink: ;)

[عادل أبوزيد]

فى مسائل الزواج - على الأقل - "ماتلصمهاش" لا أجد كلمة أوضح فى الوصف و المطلوب أكثر من "ماتلصميهاش" ..

يااااااااااااااااااااااه,,

هي دي الكلمة اللي بدور عليها من زمان..

قلنا "طناش",,لأ مش طناش

قلنا"سماحة النفس",,لا ليست لهذه الدرجة

قلنا "حسن النية",,لأ برضه!

قلنا "الغفلة",, لأ مش غفلة أوي,,لأن التوجس كان هناك دائما ,,مستقر في القاع..

أد ايه هذه الكلمة بليغة ,,

و أد ايه موجزة,,

keyword يحمل البداية و النهاية و خدمة ما بعد البيع ..

قصدي,, أوجاع ما بعد النهاية !

الفاضلة جى جى

فى خضم الحياة ... نسيت .. أن أطرى تعبقيبك الراقى هذا ..

لقد شعرت بفرحتك ... فرحتك البكر بكلمة تؤدى معنى بصدق و دقة

لقد كنت حقا فرحة و بصدق و أتصور أن بداخلك فنانة أو شاعرة تتمرد و تبحث عن الهواء ..

نصيحة من القلب ... تكلمى و أكتبى الصدق و الدفء أهم بكثير من الحرفية

[G.G]

نصيحة من القلب ... تكلمى و أكتبى الصدق و الدفء أهم بكثير من الحرفية

بجد هحاول أحطه حلقة في ودني..

لكني متأكدة أني هانساه رغم ذلك..

إن كنت تفتقد الإحساس بصدق كلامي ,,فأنا اعتذر ..

و الله لا اتعمد عدم الصدق و لا اتعمد الحرفية المصطنعة

كل ما في الأمر ,,أن هناك فيلتر ما من تراكمات ما,,

فتحاته ضيقة جدا على كلامي..

لذا ربما يخرج مشوها قليلا ,غير متطابق تماما مع مكنونه..

و لكن,,إن كان يمنع ذلك تواصلي بصدق احيانا ,,

فإنه لا يمنع ابدا استقبالي للكلام الصادق

و إحساسي به ,,

شكرا بجد على النصيحة من القلب ,,اللي وصلتني في القلب :rolleyes:

[بنت شعنونة]

والله يا شريف كلامك صح..

استاذ عادل

للأسف دا واقع مرير عايشاه وانعكس على حياتي الشخصية بشكل سلبي

فكرت كتييييييييييييير جدا بكلمة "ما تلصميهاش"

الكلمة صح اوووووووووي

لكن

في نفس الوقت

غلط اوي!!

صح اوي لو حاجا تخصني انا

وغلط لما تبقى في حاجا تخص غيري

انا مش طايقاها

بس هيا "مجرد" حماة اخويا بالنسبة ليا

يعني المطلوب مني ضحكتين في وشها وشوية مجاملات فارغة ولو على حسابي :( عشان ما "اخربش" على اخويا والا ساعتها ها اكون "ملامة"

مع انها "مجرد" حماة اخويا؟

كيل بمكيالين سخيف

لو غضبت منها يتقال يااااااااااااستي يعني انتي بتشوفيها كل اد ايييه واهي حياااااالله حماة اخوكي او مرات عمك

ولو قصرت في حقها من وجهة نظر الهانم .. يبقى ازااااااااااااي وازااااااااااااااي انتي ها تخربي على اخوكي؟

حاجا تقرف.. ما بقتش عارفا اتصرف براحتي

وماينفعش الصمها

هشام كلمتك في الجون

بس لحد امتى؟

فيولنج لما تبقى موجوع اوي الكلام بيطلع منك ماتعرفش ازاي..