MZohairy يغزو كندا - شكر و امتنان لبعض اخواني في المحاورات

[Nassarlink]

اشكر اعضاء المنتدى الرواد فى الهجره على تعبهم وقعدتهم قدام شاشه الكمبيوتر لتخفيف قلقنا فى موضوع الهجره والمعادلات وخلافه

لكن اللى مالهوش اصحاب فى كندا حتى الان ومكانش بيفكر قبل كده فى الهجره الا لما شاف المنتدى بتاعكم

واللى زيه زي د محمد الشامى بس مالهوش معارف فى كندا حيشتغل هناك ايه

يعنى دكتور اشعه زى د الشامى ناوى يشتغل ايه هناك

كل مصر عايزه تهاجر وتشتغل بس صعب جدا ان الواحد يهاجر ويقعد عاطل

الواحد على الرغم من انه بيشتغل دلوقت دكتور لكن انا عندى قناعه ان العمل مش عيب مهما كان نوعه بس يكون حلال وغير مهين جسديا الواحد برضه اصبح عضمه كبيره

ولولا العيال الصغيره اللى فى رقبته مكانش يفكر فى حل لتعليمهم وعيشتهم فى مكان يحترم ادميتهم

وكلنا عارف ان الواحد فى بلده اللى اتولد فيه ليس له كرامه وعارف مقدما انه لو مكانشى لينا كرامه فى كندا فده مش عيب كندا ولكن عيب اللى رمانا على المر وهو الامر منه

وعلى فكره هو مش مر والا حاجه (بشروط)

اهم حاجه فى الغربه انك تلاقى شغل صح والا لا

واكتر ناس مفتوحه ليهم الهجره هى الاطباء ولكن اصعب ناس فى العمل هم الاطباء برضه لانهم لن يعملوا الا بعد المعادله ولن يحصلوا على المعادله الا بعد طول عذاب والا ايه

كلنا عارفين يا د ايهاب ان كندا مش الجنه

واننا علشان نشتغل هنتعب كتير

سواء كنت دكتور او مهندس او حتي مبيض محاره

لازم تحصل علي الترخيص وتزاول المهنه

لكن الفرق الاساسي بين كندا ومصر

انك بتكون هناك عارف انت بتعمل ايه ليه

فهمتني يا د ايهاب

محمد

[ehabtaher]

انا فاهم

ماهو فى السعوديه برضه علشان تشتغل لا زم يبقى معاك ترخيص وتخش امتحان

بس فى كندا

علشان تاخد الترخيص لازم شهاداتك تبقى متعادله

وعلشتم تتعادل خبرتك وشهاداتك يبقى لازم تمتحن

وعلشان تمتحن لازم تذاكر وتدخل الامتحان ودى كلها حاجات بتاخد وقت طيب حاتقعد فى كندا من غير شغل

فى استراليا او حتى السعوديه بتشتغل اثناء مانت بتحضر وتذاكر للامتحان وبتقبض مرتب تصرف بيه على نفسك

لكن فى كندا بيقولوا لك لا ماينفعش تشتغل الا لما نصدق انك اتخرجت من كليه الطب وبعدين ماعرفش نظام التخصص بعد كده حايعملوا فيه ايه

انا عايز دكتور يرد عليا من اللى سافروا كندا ويقول لى راح هناك واشتغل ايه الفتره اللى قاعدها هناك لحد ماياخد الجنسيه

هل حايستحملها بالطول او بالعرض ويسوق تاكسى او يشتغل ممرض لحد مايقعد السنتين المطلوبين منه لتجديد الاقامه او الحصول على الجنسيه وبعدين يرجع يشتغل فى الخليج بس ومعاه الباسبور الكندى

والا ايه

[Nassarlink]

زوهيري باشا انت فين من زمان

مشغول ولا ايه