إحنا بتوع الاتوبيس - فيلم بوليسي وطني رومانسي أكشن

[فــيــروز]

وخدكوا على قسم النزهة ( وماحدش يسألني أشمعنى قسم النزهة ... يمكن علشان نظيف شوية )

طول عمرك امير يا س.س.

[se_ Elsyed]

أما فى مقدمة الاتوبيس فقد جلس ثلاثة من الركاب يبدو عليهم الوقار واخذوا يتبادلوا اطراف الحديث :

عادل أبو زيد موجهاً إستفسار للسائق : لو سمحت يا أوسطى هو الاتوبيس ده رايح سوق العبور ..

السواق : أيوه ياباشا إن شاء الله ..

عادل أبو زيد : أسكت يا اخناتون يا خويا بيني وبينك أنا سمعت أن فيه عروض أسعار على المانجه فى سوق العبور وقولت أروح أشتريلي قفصين تلاتة للاولاد .

أخناتون : هـــــــــــيه يا بختك أنا الدكتور محرج عليه اكل المانجه علشان الأملاح ..لدرجة قولت أضرب بكلام الدكتور عرض الحائط وأخد الأذن من جدي الشيخ حسن في الحلم وبرضوا رفض وقالي : يا ولد يا أخناتون أسمع كلام الدكتور وكله علشان صحتك يهون ..

د. رجب معلقاً : طبياً أثبتت الدراسات ان المانجو بتؤدي إلى زيادة الاملاح في الجسم خاصة المانجو المصرية ... وده مرض بنسميه عندنا " المانجونيدس " لكن ممكن الأستعاضه عن ذلك بشرب عصير المانجا خاصة لو كان عالريق..

وهنا صحا أحد الركاب من نومه وكان يجلس خلفهم :

كوكو واوا : أيـــــــــه خير من بيجيب سيرة المانجا .... على فكره يا جماعة محسوبكم عنده مزارع مانجا ومستعد أورد لكم الكمية اللي انتوا عايزينها وأدي الكارت بتاعي أهو ... بس أدعوا ربنا يسلم ويبعد عننا دودة القطن ..

عادل أبو زيد بإستغراب : أيه دودة القطن !!!!! ودي أيه علاقتها بالمانجو يا اخ كوكو ؟

من الطرف الأخر يجيبه الطفشان وهو يظبط نظارته الطبية : هناك علاقة وثيقة بين دودة القطن وبين أشجار المانجو .. بس الأول عايز أديلكم فكرة بسيطة عن تاريخ نشأة دودة القطن فى مصر ... هي أولاً موطنها الأصلي دول جنوب شرق آسيا وتتغذى على حشائش السافانا وأشجار الأبنوس ... وزي ما احنا عارفين أن القطن تم إدخال زراعته في عهد محمد علي باشا الكبير ، ولكن لاحظ محمد على أن الفلاحين المصريين أُصيبوا بالكسل منذ أن بدءوا فى زراعة القطن حيث أنهم ينتظروا فترة 6 شهور بدون عمل إلى أن يجنوا المحصول ...

فقرر إستيراد كميات كبيرة من دودة القطن من جزيرة سيلان ( سريلانكا حالياً ) وأمر قوات البشمرجة التابعة له بالنزول إلى الغيطان ليلاً لنشر الدود وبهذا يضمن أن الفلاح هايشتغل فى الأرض غصبٍ عنه ... وحيث أن الدود عندنا صاحب مزاج وساعات بيحب يحلي بعد الأكل فبنلاقيه بيسرح على أشجار الفواكه الآخرى خاصة المانجو والعنب البناتي ...

ويمكن زيارة المواقع التالية لمزيد من المعلومات :

www.Dodah.net

أو

www.Lota3.org/yallah nlem eldodah

[Lighthouse]

حلوة قوي مواقع لم الدودة دي هاهاهاهاهاها

جبار ياسي السيد

اما اشوف دوري ح يطلع ازاي

[Scorpion]

سي السيد.....

ايه يا جدع الحلاوة دي..... ده انت صاروخ يا جدع.....لأ و آل ايه أقنعتوني اني بعرف أكتب كوميدي... أسمح لي يا أبو السيد أقولك فعلآ برافو

من فضلك يا أنسة الغي مواعيدي الأسبوعين الجايين...عايز أتابع مؤتمر مهم في كفر البلاليص

[se_ Elsyed]

المشهد الأخير ( علشان ماحدش يضربني )

وهدأ الاتوبيس من سرعته للوقوف بإحدى المحطات ... وصعدت آحدى الباعة الجائلين وفي يدها جردل مثلجات وتمسك فى اليد الأخرى ببنت صغيرة ذات رثة الثياب وقد حلقت شعرها على الزيرو ودهنته مرهم كبريت ودار بينهم الحديث التالي :

ست أمينة : يالله يا بت يا سعاد أحدفي علبة لبان على حجر كل واحد من الركاب وغتتي عليهم علشان يشتروا عبال ما انا أضرب بنطه هنا .... وصاحت بصوتٍ عالي .... حاجة ساقعه أيوه معانا البارد ... طري على قلبك يا عشطان ... أيوة مين عشطان هنا ..

وكان هناك فتاتان تبدو عليهما علامات الإرتباك والغربة وتجلسان فى أحدى كراسي الاتوبيس اللي مش متنجده وشاورت أحداهما لبائعة المثلجات ..

لايت هاوس : من فضلك يا تنت ممكن اخد درنك ..

ست أمينة : لا والله يا مزمازية ما عنديش ترنك فيه معايا إسباتس وكاكولا ...

لايت هاوس : طب إيديني حضرتك واحد كوكا ... وتناولت الزجاجة وأشارت الى الفتاة الجالسة بجانبها ... تأخدي بوء يا اسمك أيه ؟ ..

زهرة 7 : انا إسمي زهرة سبعه...

لايت هاويس : زهرة زرقا .. عارفها دي بتاعت الغسيل صح ؟ ..

زهره : غسيل أيه ومكوة رجل أيه .. إسمي زهرة 7 .. أصل رقم 7 ده ليه حكاية معايا ... أصلي انا رقم سبعة فى أخواتي واحنا أصلاً أصلاً ساكنين في الحي السابع فى سابع دور .... وكده يعني .. وإنتشي أسمك أيه ؟..

لايت : انا إسمي لايت هاوس

زهره مستغربةً : ليه ؟!!!

لايت : ليه إزاي ؟ِِِ!!! آه أصل الأسم ده ليه حكاية برضوا معايا .. أصل يا ستشي أنا معايا دبلون صنايع قسم كهربا ... وأنا من صغري باحب العب فى اكباس وفيش الكهربا عندنا فى البيت وكنت وانا فى إبتدائي أجيب بنسة الشعر وأدخلها فى الكبس وأفرح قوي لما الكهربا تمسكني ....

زهره : أيوه أيوه ... اتاريكي قاعده منورة الاتوبيس ....أنما قوليلي أشمعنى أحنا الاتنين اللي قاعدين على كراسي مش متنجده فى الاتوبيس ؟

لايت هاوس : أصل التانيين دول ركاب قدام يا ستي فبيقعدوهم على الكراسي المتنجده ... وتلاقي بقى الل بييجي جديد زيينا كده لازم ياخد فترة على ما يترقى ويتنقل على الكراسي النضيفة دي ...... ما تاخدي بؤ ....

زهره : لأ ميرسي انا لسه ضاربة كشري ....

وفي هذه الأثناء كان بائع الحواوشي مازال يدور بالأتوبيس وتقابل مع بائعة الخبز قصدي بائعة المثلجات ودار بينهم هذا الحوار ..

س س : صباحو عسل يا أمونة ....

ست امينة : قشطة يا س س ... أخبارك أيه

س س : تمام ولو إن السوق نايم معايا النهاردة ...

ست أمينة : وانا برضوا .. مش عارفه أيه الحكاية .. الناس مالها مقشفرة كده ليه ... ده انا مابعتش غير قزازة واحده من ساعة ماطلعت .. وحتى الامورة اللي أشترت مني عماله تخمس هي وواحده صاحبتها فى القزازة ...

س س : يالله هانعمل أيه أكل العيش مر يا أمونة ... بقولك أيه انا عازمك النهارد بعد المغرب على قرطاس ترمس في الموقف ...

ست أمينة : ماشي كلامك ... هاجي واجيب معايا البت سعاد ...

س س متذمراً : حـــــــــلو ... وادينا أدبسنا فى تمن قرطاس ترمس زيادة ...

وقابل س س أحدى الركاب فى منتصف الاتوبيس ودار بينهم الحديث التالي :

س س : مـــــــــــين لينوكس .. يخرب بيت دماغك إزيك يــــــــــاه أنت فين ؟ ... بقى لي ييجي سنة ماشوفتكش بتسرح بالعسلية زي زمان ..

لينو : لأ عسلية مين أنا عقبال أملتك سافرت أمريكا ...

س س : الف الف مبروك وبتبيع عسلية هناك برضوا ؟ ...

لينو : لأ عسلية مين يابا أنا طورت نفسي طبعاً وبأبيع لولي بوب دلوقت ...عن أذنك بقى علشان نازل المحطة الجاية عندي ميتينج مع صم فريندز ...

س س ( محدثاً نفسة ) : ميتين وفرنز الله يرحم أيام ما كنت بتجري ورا عربيات الرش ......

وعلى أحدى كراسي الاتوبيس كان هناك أب وقور يجلس بجانب زوجته وأبنته التى تبدو عليها ملامح أجنبية وما إن رأت بائع الحواوشي حتى خاطبت والدها :

البنت : What's that Dad

محمد أبو زيد : this's some kind of Sandwich like Hamburger

البنت : woooow get me one Dad. pls.

أبو زيد : No Baby it's not good and look at this dirty guy who's selling it

البنت فى عناد : pls. dad. pls

( ملحوظة ... الحتة اللي فاتت دي هانبعتها لأنيس عبيد علشان الترجمة )

أبو زيد : ألحقيني يا سيدة البنت شبطانة فى البتاع اللي أسمه الحواوشي المقرف ده ..

سيده : وماله يا محمد هاتلها وهي لما تلاقية مشطشط هاترميه ..

أبو زيد : أمري لله يعني أنتو الاتنين عليه ...... هات يابني رغفين ....

س س : قشطة .. اتفضل يا باشا ..

أبو زيد : حسابك كام ..

س س : خمستشر جنية يا باشا ..

أبو زيد : ليه يا خويا .. انت مش أول ماطلعت عملت فيلم وقولت الرغيف باتنين جنية يبقى حسابك 4 جنية بس ..

س س بغتاته : كل سنة وانت طيب يا باشا علشان خاطر الاموره ربنا يطعمك ما يحرمك و ...

سيده : خلاص يا محمد إديلوا ده الواد شكله غلبان خالص .. يعين ده لو والدته كان عندها إنترنت أكسزز وقرأت موضوعي بتاع " هل نحن أسرة ناجحة " كان زمان حاله أتغير دلوقت ... وعلى الأقل كان أخد الأعدادية ...

أبو زيد : خلاص يا سيده انت هاتديني محاضرة 0 وتمتم محدثاً نفسه .. ادي اللي بنأخده من النت ) ... خد يالا ( حار ونار ) واتفضل بقى أنزل مش عايز أشوف وشك بدل ما اديك ضربة " جوشي جورما "

اجيبك الأرض أنت والصاج بتاعك ده ..

س س : خلاص نازل .. بس بمزاجي ... ده اتوبيس الحكومة ...

اخناتون منتبهاً : حكومه !!!! مين بيجيب سيرة الحكومة ... الله يخرب بيت غراب الخراب رئيس وزرا الحكومة اللي خربها وقعد على تلها .

عادل أبو زيد : أبقى فكرني يا أخ اخناتون لما نوصل أبقى أكتب موضوع عن تفعيل آليات حل مشكلة المواصلات فى ظل زمن العولمة ...

وإلى هنا ووصل الأتوبيس إلى الموقف وقام الركاب بالنزول وصعد غيرهم ... وهكذا تستمر الحياة .... بشر يصلون إلى محطاتهم وآخرون جدد يصعدون بدلاً منهم وهكذا تدور بنا الحياة ( أيه ده الحتة دي قلبت مني دراما )

( موسيقى تصويرية فى الخلفية لأغنية .. يا سواق يا شاطر ودينا القناطر .... يا سواق يا بليد ودينا باب الحديد )

الختام .......

[se_ Elsyed]

متشكر لكم جميعاً .... وأرجو رجاء حار لو أي حد زعلان من أي تعليق خاص به يبعت PM للإدارة ويلغوا الكلام ده من غير أي زعل .....

أما أي حد انا نسيت أذكر أسمه من ضمن الركاب فده مش معناه إني مش بأحبه .. بالعكس أنا بأحضر للجزء التاني من الفيلم وهايكون بعنوان " ميكروباص المفاجأت " ( أيه اللي انا بأعمله ده ؟!!! ده الناس هايفتكروا إني كمساري كده ) وإن شاء الله يكون لهم أدوار جامده فى الفيلم ....

شكر واجب : لكل من ساهم في إنتاج الفيلم ... السيد وزير المواصلات .. السادة ظباط شرطة النقل ... الأخوه النشالين اللي ماثبتوناش فى الاتوبيس وخلونا نصور براحتنا ... السادة رابطة الشياليين - الشيلا - الأخوه الباعة الجائلين وعلى رأسهم هنومه وقناوي وشكر خاص لسائق الأتوبيس الأسطى محروس .

[أسد]

تحياتي ...

فعلاً دمك خفيف بشكل مفاجأة ...

وملامح الشخصيات قريبة ...

تحية لأريحيتك ... وخفة دمك ...

[هشام عبد الوهاب]

هايللللللللللللل يا ابو السيد ..... فعلا ممتعه ودمك زى العسل .

[linux]

س س ( محدثاً نفسة ) : ميتين وفرنز الله يرحم أيام ما كنت بتجري ورا عربيات الرش ......

و لسة و حياتك !!!

من فات قديمه تاه !!

[emmyyy]

سي السيد

انا كنت بدعبس ax: وقعت تحت ايدي الئصه دي tot:: بليز اعملها الجزء التاني بتاع ميكروباز

الحاجات مستخبيه ليه بجد حرام mc:

[kotoz9]

سي السيد

انا كنت بدعبس ax:  وقعت تحت ايدي الئصه دي tot::  بليز اعملها الجزء التاني بتاع ميكروباز  

الحاجات مستخبيه ليه بجد حرام  mc:

ايوة ......عايزين الجزء التانى بتاع المكروباص

[se_ Elsyed]

متشكر جداً يا جماعة على تشجيعكم وإطراءكم وصدقوني والله بأكون مبسوط جداً عندما اشعر بأنني ادخلت السعادة على نفس الزملاء الذين يقرأون تلك الكلمات البسيطة والعفوية ومع أني كنت بأعتبر نفسي فاشل دائماً فيما يخُص التعبير بالكلمات وكنت أُفضل عليها الأفعال لكن الظاهر لسه في فرصة للتعلُم

وصدقوني عندما تنتهي زحمة العمل هاحاول انقل لكم اتوبيسات وميكروباصات احمد حلمي هنا ونقف نلم الكرته على باب الابتسام

[واحد تاني]

والله العظيم انت مشكلة ... :)

خليك جدع بقى واعمل لها جزء تاني ... bv:-