مش عارف أعمل اية ...... أفيدوني

[piro]

السلام عليكم ورحمة الله وبركاته

يا جماعة انا عندي مشكلة اني مش بستلم راتب من الشغل بقالي أكثرمن ستة أشهر

وكلمت الكفيل كتير ومفيش فايدة ومش عارف اعمل اية

قالي اشتغل بره عند أي حد لغاية ما ينتهي عقدك وتروح بلدك

وانا دلوقت أشتغلت برة في شركة تانية بس طالبين نقل كفالة ومش عارف اعمل اية وهو مش موافق خالص حاولت معاه ومفيش فايدة وحاليا أغلق جواله وما بيرد عليا خالص وانا في موقف زي الزفت مش عارف أعمل اية

أنا معايا الباسبور بتاعي وفي ناس قالتلي ممكن تنقل كفالتك بفلوس او بأي طريقة طالما معاك الباسبور بس انا خايف ممكن هو بعد كدة لما يعرف يقدر يعمل حاجة ولا اية ممكن يطعن بالتزوير أو اي حاجة

أفيدوني انا مش عارف أعمل اية وجزاكم الله كل خير

[elfakhrany]

اخى العزيز ...

أول حاجة تعمل شكوى فى مكتب العمل وهتاخد حقك بس أوعى يكون كفيلك خلاك تمضى على انك استلمت راتب السنة كامل

ومنصحكش انك تمشى فى طريق حاجة غير قانونية أو تدخل فى دوامة التزوير عشان متعرضش نفسك للمساءلة القانونية

وانصحك انك تحاول توصل للكفيل وتتفاوض معاه على نقل الكفالة مقابل جزء من الراتب المتأخر أو يعطيك راتبك المتأخر ويعملك خروج نهائى ولو عندك فرصة تانية ممكن

تاخد منهم ورق الفيزا وترجع على الشركة الجديدة وربنا هيكرمك انشاء الله ... المهم انك تدعى كتيرررررررررررررر

[HassanAboali]

الله يعينك عليه

وكان استاذ سي السيد تقريبا قال ممكن تبعت له جواب مسجل وأظن القانون يسمح بأنك تنقل كفالة بدون الرجوع للكفيل إن لم تستلم راتبك لثلاثة شهور وإن شاء الله يشوف موضوعك الاستاذ ويفيدك أكتر

[السيد توفيق]

اعتقد ان النظام لو صاحب العمل مادفع رواتب ثلاث شهور بيتم منع المؤسسة من الاستقدام ونقل خدمات الموظفين دون موافقة صاحب المؤسسة عن طريق الامارة

[piro]

السلام عليكم ورحمة الله وبركاتة

يا جماعة والله مش عارف اشكركم ازاي على إهتمامكم وردكم عليا

بس في إستفسار لو انا اشتكيت في مكتب العمل القضية كم ستأخذ من الوقت تقريباً

جزاكم لله كل خير

[غريب الخبر]

السلام عليكم ورحمة الله وبركاتة

يا جماعة والله مش عارف اشكركم ازاي على إهتمامكم وردكم عليا

بس في إستفسار لو انا اشتكيت في مكتب العمل القضية كم ستأخذ من الوقت تقريباً

جزاكم لله كل خير

انت الان موقفك قوى جدا جدا لان اكتر حاجة تخليك تنقل كفالة اجبارى هو التاخر فى دفع الراتب اكثر من ثلاث شهور .بس ده لو القانون هيطبق صح وتمشى فى طريق مكتب العمل وده بياخد وقت طويل شويه .نصيحتى لك مشوار اخير لكفيلك وقابله بالغافية لان موقفه ضعيف وقوله الشغل الجديد طالب نقل الكفالة وده شرط اساسى لانك لو اشتغلت زى ما قالك كفيلك فى اى مكان ممكن يبلغ هروب لانه واضح انه معندوش دم . يبقى لازم تحاول تانى معاه بجدية وان رفض لا تترد فى الذهاب لمكتب العمل لان اسرع حاجة بيحلها مكتب العمل هى الراوتب المتاخرة . لا تفكر بتاتا فى عمل شئ غير قانونى فالوضع حاليا غاية فى الصعوبة ولا تستمع للاخرين.

وفقك الله ودمت بخير