كام سؤال بخصوص السعودية بس محدش يجاوب إلا الناس الكبيــــــــــــرة مش فى السن لأ اللى عندها خبرة

[daar]

أنا مسافر السعودية للعمل محاسب فى تبوك يوم السبت اللى جاى أنا على فكرة لسة متخرج من حوالى سنة ونص بس أنا مبحبش الغربة بس اضطريت أسافر لسببين الأول انى مدفعتش فلوس فى الفيزا جتلى مجدعة يعنى والسبب التانى ان هنا فى مصر بالنسبة لواحد زيي لاعنده فلوس ولا شقة الموضوع صعب شوية وعندى كام سؤال وياريت حد يجاوبنى عليهم

1- هل عملى كمحاسب يفرض عليه أن لا أعمل عمل اخر يعني مينفعش اشتغل الصبح شغلانة وبعد الظهر شغلانة؟

2-بالنسبة للتأقلم وخصوصا في تبوك سهل ولا العملية صعبة ؟

3-أنا مبعرفش أسوق ومعتقدش إنى هتعلم وده لأنى عندى سرعة شديدة فى رد الفعل ومحدش يقولى يعني إيه لأن الموضوع يطول شرحه فما هى كيفية الانتقال بالنسبة لواحد زي حالاتى ؟

4-ربع فرخة وشوربةورز وخضار يعملو كام فى مطعم معقول ؟

5- المياه هل لابد أشترى ميه معدنية ولا ينفع أشرب من مية الحنفية ؟

6-عمل علاقات وخصوصا انى بتخنق لما أحس إنى عايش لوحدى سهل ولا صعب؟

7-طعم العيش زى بتاع مصر ولا لأ

8- أرخص شركة محمول في السعودية

9-أرخص المحلات فى تبوك؟

فى النهاية أسألكم الدعاء لى وتقولوا جميعا اللهم اهدنا واهد بنا واجعلنا سببا لمن اهتدى

[ozoozo]

اخي الفاضل

انا اعرف اجابات معظم اسالتك لكن للاسف عنوان موضوعك مستفز جدا وللاسف انا لا كبير ولا خبره وعلي بعد خطوتين منك هاتلاقي موضوع شامل عن تبوك من الاخ سيد توفيق

[كفايه بقى]

بص ياعم الحج بكل بساطه انا هجاوب على بعض من أسئلتك وستكون اجابتى على شكل نقاط مختصره

*بالنسبه للإتصالات هتلاقى نفس اسعار المكالمات ولكن العروض هى اللى بتختلف من شركه لاخرى ومن فتره لاخرى

*بالنسبه لمياه الشرب لاااااااااااااااااااااااازم مياه معدنيه ومتتخضش لأن المياه المعدنيه هنا رخيصه جدا يعنى مثلا انت بتشترى القاروره 20 لتر بخمسه ريال ودى تكفيك اسبوع شرب وطبيع واخر دلع

*بالنسبه للأكل ممكن الوجبه اللى انت بتتكلم عليها دى تكون ب12 او 15 ريال وبعدين انت اول ماتيجى هنا وتظبط نفسك هتجيب انت خضار ورز وتطبخ انت ؟ هتقوللى مبعرفش هقولك الغربه هتعلمك ودى هتوفرلك جاااااااااااااااااامد جدا جدا وهتاكل اكمل صحى ونضيف يعنى ممكن تصرف فى الشهر 350 ريال وتاكل اكل كويس جدا يعنى لحمه وفراخ وهتبقى العيشه نغنغه (وانا شخصيا بعمل كده)

*بالنسبه للتأقلم هنا فى السعوديه وانا بتكلم عموما مش فى تبوك بس انت اول ماهتيجى هنا لازم هتحس بفراغ شديد وهتحس من الاخر ان انت فى اللا شىء او اللاوجود بس الكلام ده سرعان مابيقل وهتلاقى نفسك اتعودت على العيشه هنا وبقت عاااااااااادى خالص وخصوووووووووووصا لو صاحبت شله كويسه

*بالنسبه لعمل علاقات هنا انت طبعا هتلاقى الكل بينصحك ان المصريين هنا بتوع مصلحتهم وبتوع أسافين والكلام ده فى شىء صحيح بس انت برضه ماتصاحبش اى حد واكيد مادام انت محترم هتصاحب ناس محترمه وهما اللى هيهونوا عليك الغربه ومن الأخر هتخربوها ضحك وهزار وسهر ودلع وهنا الجدع بيبقى جدع اوى والندل ندل اوىىىىىىىىى

*بالنسبه للسواقه هنا فى السعوديه عموما مفيش مواصلات فيه تاكسى بس وهنا بيسموه ليموزين وده اقل حاجه بيبقى ب15 ريال يعنى خراب بيوت بس خد بالك هنا اغلب الشركات المحترمه بتوفرلك وسيلة مواصلات اما سياره لو انت بتسوق او اتوبيس ينقل العاملين اوبتدفعلك تمن الليموزين او يبقى حظك حلو ويكون السكن قريب من الشغل

ولو الكلام ده كله مش موجود انت ممكن تظبت مع حد من الشغل معاك يجيبك ويوديك مقابل مبلغ شهرى

او تتفق مع اى سواق من اللى بيوصلوا المدارس انه يجيبك ويوديك بس خد بالك لازم تاخد بدل انتقالات من الشغل

*بالنسبه لعمل المحاسب هنا غالبا بيبقى 8 ساعات وبتكون دوام واحد او دوامين ولو انت فيزا حره ممكن تشتغل شغل تانى غصب عن التخين

اما لو انت عقد او ناقل كفاله يبقى لو اشتغلت لازم الكفيل ماياخدش خبر يعنى من الاخر محدش يعرف ان انت بتشتغل شغل تانى حتى اصححابك اللى فى الشغل

ونصيحه لوجه الله تعالى متخليش اصحابك الاساسيين (الأنتيم) يبقوا من الشغل لان للاسف هما اللى بيطلع منهم الاسافين يعنى تعاملهم كويس وكل حاجه وضحك وهزار وخروج بس سرك جواك ومحدش يعرفه غيرك اللهم قد بلغت اللهم فاشهد

وفى النهايه اتمنى ان اكون قد اجبت عن بعض استفساراتك اجابه كافيه

ملحـــــــــــــــــوظه:

انا بقالى فى السعوديه بالظبط شهر بالتمام والكمال وقاعد فى الرياض بس انا بما انى جديد مريت بكل اللى انت سألته بالظبط فعشان كده قلت اجاوبك

واهم حاجه زى ماقلتلك ان انت تبقى عارف ان انت اول ماهتيجى هتقول انا ايه اللى جابنى هنا وانا عايز اروح بس تأكد ان انت اول ما تشتغل وتعمل شله حلوه كده وتقبض وتشوف الريالات مش هتبقى عايز تروح مصر تانى

وابقى طمننا عليك اول ماتيجى والحياه حلوه بس نفهمها

[أبو أماني]

1- هل عملى كمحاسب يفرض عليه أن لا أعمل عمل اخر يعني مينفعش اشتغل الصبح شغلانة وبعد الظهر شغلانة؟

قانونا نعم يفرض عليك عدم العمل شغل تاني انما عرفا كتير بيشتغل مشي حالك

4-ربع فرخة وشوربةورز وخضار يعملو كام فى مطعم معقول ؟

ربع الفرخة بروست ب 6 ريال او ب 7 ريال ايضا ربع الفرخة مع رز ب 7 ريال وطبق الإيدام اللى هو الخضار ب 5 ريال الى 10 ريال على حسب المحلات اللى رحتها

5- المياه هل لابد أشترى ميه معدنية ولا ينفع أشرب من مية الحنفية ؟

نعم لابد من شراء مياه صالحة للشرب لأن مية الحنفية لا تصلح وبتجيب امراض والمياة مش غالية 21 لتر ب من 3 الى 5 ريال

8- أرخص شركة محمول في السعودية

زين ثم زين ثم زين مفيش ارخص منهم عندهم دلوقتي عرض اسمه نهاية الاسبوع كل المكالمات اللى بتعملها يوم الخميس والجمعة او حتى الرسائل سواء كانت مكالمات دولية او محلية بيحسبوها يعني لو اتكلمت يوم الخميس ب 20 ريال والجمعة اتكلمت وبعت رسائل ب 20 ريال بيضيفوا الى حسابك يوم السبت 80 ريال يعني ضعف المبلغ اللى اتكلمت به يومي الخميس والجمعة وانت بقى احسب معدل استهلاكك في الاسبوع كم وعليه حاول تضبط اتصالاتك يومي الخميس والجمعة.

أنصحك تغير العنوان لأن حتى الناس الكبيرة هيترددوا وممكن ميردوش عليك لان الجواب بيبان من عنوانه وعنوان موضوعك

جاوبتك على اللى اعرفة مع اني معملتش بشرطك في العنوان لان خبرتي في السعودية 1 سنة فقط

[elfakhrany]

7-طعم العيش زى بتاع مصر ولا لأ

:wub: :wub: :D أكيد فى مصر أحلى

[أسد]

الأخ الفاضل daar

كان يمكنك الحصول على الكثير من المعلومات إذا كنت قد كلفت نفسك دقائق فقط لقراءة عناوين الموضوعات في باب المغتربين أو بعملية بحث بسيطة

إقرأ هنا ..

http://www.egyptiantalks.org/invb/?showtopic=67445

http://www.egyptiantalks.org/invb/?showtopic=70195

http://www.egyptiantalks.org/invb/?showtopic=75555

ملف كامل عن السعودية

ولذلك سنغلق هذا الموضوع