سؤال مهم في تغيير المهنة من طالب لـ مبرمج كمبيوتر

[ElKing]

السلام عليكم

اثناء بحثي عن بعض المواضيع المتعلقة بالسفر صراحة اعجبت بالموقع وطلبي هو الاتي

انا مبرمج كمبيوتر بالاساس وجاي لي فيزا مبرمج حاسب الي او بمعنى اصح الشركة قالت اي فيزا تناسبك كمهنة ؟ فانا قلت مبرمج حاسب الي

انا ابلغ من العمر 25

والعمل هيكون بالسعودية- جده

معايا دبلوم تجارة ( نصيب :blush2: )

والمهنة حاليا طالب

موقفي بالتجنيد لسة ماشي في ورقه اكيد هاخد رشيد عيلة بس لسة ماخلصتش الاجرائات

سؤالي

هل تغيير المهنة الى

مبرمج حاسب الي بها مشاكل ؟

هل اذا ارسلو العقد على اني مبرمج و انا قدمت ورقي مثلا فني شبكات او حاسب الي فيها مشكلة ؟؟؟

ياريت لو محدش فهم يرد عليا وانا اوضح اصلي بصراحة تعبت من الاسئلة

[ElKing]

اية ياجدعان

مفيش رد ليه ؟

[omardealo]

بص يا برنس لانى مريت بنفس الخطوات بتاعتك (وفى النهاية هتواجهك مشكلة المؤهل زيى ولسه محلتهاش لغاية دلوقت)

بالنسبة لعمل الاوراق اللازمة ما فيها مشاكل

1- بالنسبة لتغيير المهنة فى البطاقة اسرع حاجة هتشترى استمارة بطاقة مستعجلة وتروح تأمنيات الالفى (فى رمسيس) وتاخد عقد العمل معاك ...

هناك هتأمن على نفسك فى شباك العاملين بالخارج وهتدفع 80 دولار وتخليهم يختموا لك على استمارة البطاقة بنفس المهنة الموجودة فى عقد العمل

(لازم عقد العمل يكون موثق من الخارجية السعودية وغرفة التجارة السعودية)

تخلص من التامينات ودى مش هتاخد معاك الا ساعة بالكثير ويمكن اقل ...تروح للسجل المدنى فى العباسية تسلمهم استمارة البطاقة وطلب احاطة دا هتاخده من التامينات (ومش هتحتاج تتصور تانى فى السجل المدنى) وترجع بعد 3 او 4 ايام تستلم البطاقة بالمهنة الجديدة واللى غالبا هتكون كدا بالظبط

(فنى حاسب ألى بالخارج )

2- هتاخد البطاقة وتروح لمكتب الجوازات تطلع جواز وطبعا هيطلع بنفس المهنة اللى فى البطاقة ودا هيكلف تقريبا 120 جنيه ولو مطلع الجواز من الاول هيغيرولك المهنة وتقريبا مش هتدفع حاجة وترجع تستلمه بعد يوم او اتنين

يعنى اسبوع بالظبط هتخلص البطاقة والجواز بالمهنة الجديدة وزى ما شوفت مش هتلاقى اى مشكلة

لكن المشكلة اللى هتواجهك مشكلة المؤهل

وهتلاقى ناس تقولك ينفع لو جبت شهادة دورة تدريبية ومعتمدة فى الحاسب الى

وناس تقولك مينفعش لازم مؤهل حاسب الى سواء معهد او كلية

نفس المشكلة الىل بتواجهنى حاليا ومش عارف اسافر السعودية بسببها لان المهنة فنى صيانة حاسب الى وانا مؤهلى ثانوية عامة

ربنا معاك ولو لقيت حل متنسانيش ودا رقمى لو احتجت تسال على حاجة كلمنى 0125926238 او ابعتلى رسالة خاصة وانا عنيا ليك

وقبل ما تعمل كل دا لازم تشوف حوارك مع التجنيد عشان يتثبت فى الجواز والبطاقة يعنى متعملش اى حاجة الا لما تكون واخد اعفاء او تأجيل

لو خدت اعفاء ان شاء الله مش هتحتاج تصريح سفر ولو تأجيل هتحتاج تصريح سفر ودا ان شاء الله سهل هتطلعه من التجنيد اللى فى جسر السويس قبل ما تسافر

ومتنساش اى مصلحة حكومية تروحها تاخد كل ورقك معاك عشان متروحش ولا تيجى

- مؤهلك

- البطاقة

- التاشيرة او الفيزا

- عقد العمل

- موقفك من التجنيد

تم تعديل 24 أبريل 2009 بواسطة omardealo