::: الصدفة تجعل من "قروية" سكوتلاندية أشهر مغنية في العالم :::

[Modest]

.

:unsure: Susan Boyle

صعدت القروية الاسكتلاندية Susan Boyle إلى المسرح بهيئتها الغير مُهندمة و ردودها البسيطة على لجنة تحكيم البرنامج الشهير Britain's Got Talent للدرجة التي جعلتهم هم و المتفرجون يسخرون منها و ظن المحكمون إنهم سيضيعون وقتهم معها خصوصاً عندما اختارت أن تغني أغنية I Dreamt a dream الصعبة و المأخوذة من العرض المسرحي الغنائي "البؤساء Les Miserables".

لم تأبه سوزان بكل هذه السخرية و استهزاء الموجودين بها و فاجأتهم بأداء و صوت أكثر من رائع أبهرت به الجميع لدرجة أن الثلاثة مُحكمين أجمعوا على إعطائها YES بل أن أحدهم قال بالحرف عندما سُئل عن قراره كما ستشاهدون بالفيديو : The biggest Yes I've ever given anybody.

أترككم مع هذا المقطع الذي يستحق المشاهدة :blush2:

http://www.youtube.com/watch?v=9lp0IWv8QZY

( لم استطع وضع الفيديو هنا في الموضوع لإن موقع Youtube قرر منع Embedding هذا الفيديو بالذات في مواقع أخرى .. ربما ليستطيعوا إحصاء عدد المشاهدين و الذي وصل حتى هذه اللحظة إلى 33,273,161 "أي أكثر من 33 مليون مشاهد خلال 9 أيام" )

.

[fatfouta]

ايه ده والله العظيم عيطت كده برضوا يامودى

ده جد ده ولا هظار؟ دى صوتها مش ممكن جميل جدا

لو بتتريق يا موديست هزعل منك والله....... هو كله من البورنيطة دى اللى شغال ترفعها فى كل مكان

بس بجد تسلم ايدك جميلة جدا

ودورى انا بقى جه دلوقتى :hi:

[fatfouta]

عارف يا موديست نسيت اقولك حاجة بجد اللى عاجبنى فيها اوى كمان انها بعد 47 سنه وعاوزة تبقى مغنيه مشهورة

واللى غاظنى بقى الراجل اللى كان بيسالها فى اللجنه ده رخم عليها بطريقة

بس والله برافو عليها

47 وعندها امل مش 17 وعاوزة....

ياللا مش هطول عليك

شايفاك مستنى حاجة يا مودى

لا لا مافيش برانيط خلاص :hi:

فتفوته

[Modest]

ايه ده والله العظيم عيطت كده برضوا يامودى

ده جد ده ولا هظار؟ دى صوتها مش ممكن جميل جدا

لو بتتريق يا موديست هزعل منك والله....... هو كله من البورنيطة دى اللى شغال ترفعها فى كل مكان

بس بجد تسلم ايدك جميلة جدا

ودورى انا بقى جه دلوقتى :lol:

فعلاً الموقف كان مؤثر جداً جداً ... و الدرس المستفاد من تجربة سوزان هو عدم الحكم على أي إنسان من مجرد النظر إلى هيئته أو هندامه.

تأثرت من أكثر من موقف اثناء مشاهدتي للفيديو .. ردودها البسيطة المترددة و المرتبكة في الأول .. سخرية الجميع منها سواء لجنة التحكيم أو المشاهدين .. إنبهار نفس الأشخاص الذين سخروا منها بمجرد سماعهم لصوتها الراااائع ... ثم دعوة لجنة التحكيم لها لتظل على المسرح بعد أن أوشكت على الخروج بعد الأغنية .. و إخبار سايمون لها بانها حصلت على 3 Yes و أخيراً بكائها بعد تركها للمسرح... شيء خيالي :lol:

أما عن الدرس الأهم في الموضوع كله فهو إني حرمت أرفع برانيط في موضوع هاتدخله فتفوتة :hi:

سماح المرة دي .. ماكنتش عارف إنك هاتشوفي الموضوع :lol:

[Modest]

عارف يا موديست نسيت اقولك حاجة بجد اللى عاجبنى فيها اوى كمان انها بعد 47 سنه وعاوزة تبقى مغنيه مشهورة

واللى غاظنى بقى الراجل اللى كان بيسالها فى اللجنه ده رخم عليها بطريقة

بس والله برافو عليها

47 وعندها امل مش 17 وعاوزة....

ياللا مش هطول عليك

شايفاك مستنى حاجة يا مودى

لا لا مافيش برانيط خلاص :lol:

فتفوته

هاتعذري الراجل ده إذا عرفتي إن وظيفته في البرنامج إنه "يغلّس" على المتسابقين mfb:

و زي ما بتقولي عندها 47 سنة و لسه عندها أمل

نفسي نعمل Mohawarat's Got Talent على قدنا كده و نقب على وش الدونيا :lol: .. الـ 47 سنة قرّبت (بالنسبة لي يعني :hi: ) و الوقت بيجري قبل ما أتشهر :lol: .. هيا يعني سوزان أحسن مني في ايه smk:

(من غير برنيطة )

[وليد عبد الخالق]

اخي العزيز بعد التحية والشكر

مشهد درامي نادر وفريد مش بيتكرر غير في الافلام الغنائية

لما الجمهور يسخر من اي موهبة جديدة قبل ما يسمعها

الحقيقة انبهرت جدا لما وقفت امام لجنة التحكيم بثقة وهدوء وتبادل الضحك معهم

ثم بدأت تغني وكان صوتها في منتهي الروعة وفيه انسيابية غريبة جعلتني ادمع

يكفي ان عندها وفاء في ذكري والدتها

اشكرك مرة اخري اخي العزيز

كلمات المقطع اللي غنته سوزان

I dreamed a dream in time gone by, When hope was high and life, worth living. I dreamed that love would never die, I dreamed that God would be forgiving. Then I was young and unafraid, And dreams were made and used and wasted. There was no ransom to be paid, No song unsung, no wine, untasted. But the tigers come at night, With their voices soft as thunder, As they tear your hope apart, And they turn your dream to shame. He slept a summer by my side, He filled my days with endless wonder... He took my childhood in his stride, But he was gone when autumn came! And still I dream he'll come to me, That we will live the years together, But there are dreams that cannot be, And there are storms we cannot weather! I had a dream my life would be So different from this hell I'm living, So different now from what it seemed... Now life has killed the dream I dreamed

[se_ Elsyed]

حرام عليك .. انت فعصت مشاعري يا موديست وضربت قلبي بالشلوت

بجد والله .. شاهدت الموضوع ده من كام يوم ... ومش عايز اقول بكيت عشان عيب الراجل يعيط ( ماما قالت لي كده )

عارف

الاول استغفر الله العظيم افتكرتها منغوليان ومطلعينها يجبروا بخاطرها

وبعدين عرفت انها فلاحه وغلبانه وعلى سجيتها .. لكن عندها صوت فطري فشر ام كلثوم او بتوع الاوبرا

وهي تجمع بين حلاوة الصوت وقوته

وبعدين انت كده غلست عليه وبوظت لي موضوع الاغاني الهابطة اللي فيه ناس بتنهق وهاتسحب الكام زبون اللي حابسهم هناك

بس بجد ... تسلم هالديات ..وموضوع يستحق كلام كتير .. لكن سيبني دلوقت عشان اتفرج عالكليب للمرة العاشرة واعيط

وانا محضر لك مفاجأة ... وعارف انك هاتشكرني ... هانزل لك بكلمات الاغنية دي باللغة الانجليزية .. مصحوبة بترجمة للغة العربية في الشريط تحت

عارف يا بوديس

على النعمة انا بأفكر اخطف رجلي على قرية ابردين البلد في اسكتلندا .. واحود عليك في جده اخدك في ايدي .. وتجيب شنطة الفلوس السونسونيت .. وناخد للبنت دي قد 35 يورو وحتتين جنبه قريش .. ونمضي معاها عقد استحقار .. ونعبي لها شريط قوام قوام وندرمغ به اوروبا يا معلم ( موديست فون للمنتجات الصوتية )

والله بأتكلم جد

وننزل 100 الف نسخه قبل شريط عمرو .. و100 بعد حماقي .. وبيع يا معلم في الزحمة

فكر وأديني ميسد عشان ننفذ يا معلم

[se_ Elsyed]

شكراً يا عم وليد عالواجب ده

انا مش هانزل بالترجمة العربي عشان افتكرت ان فيها جزء مش ولابد وبيتحدث عن بومبه اعطاها لها حبيبها بعد ما وعدها بالجواز ... ما علينا ما علينا ...

[وليد عبد الخالق]

العفو يا استاذ سي السيد

حلوة كلمة ابردين البلد علي كده بأة اسكتلندا فيها الكفر والدوار وكده

بالنسبة للترجمة العربي الجزء اللي بتتكلم عليه حضرتك

مرتبط ارتباط وثيق بالمقطع كله ولا يمكن اقتطاعه حتي لا نخدع الجمهور

وطبعا خير ما فعلت مراعاة لشعور الاخوة والاخوات

[شاب مصري]

مش عارف يا جماعة تقريبا أنا معنديش ذوق .. بس بصراحة المغنية وصوتها والاغنية وكله على بعضه مش عاجبني ولا داخل دماغي بنكلة

هي شئ جديد وفريد بس مش عاجبني .. نهائيا

اصابني استغراب شديد من تعليقات الناس عاليوتيوب .. مش فاهم على ايه ده كله يعني ؟ مغنواتية في منها كتير يا ناس .. كتييييييييييير .

[شاب مصري]

طيب خدوا دي بقى

youtube.com/watch?gl=IN&hl=en-GB&v=SoCuyGclzc4

اغنية لمغنية تركية صوتها رائع واغنية مؤثرة جدا بجد

الاغنية بتتكلم عن حزن ومعاناة أم تركية ذهب ابنها ليقاتل(في الجيش العثماني) في اليمن وصحاريها و رمالها واستشهد هناك بعيدا عن الوطن

ذهب ليحمي الأراضي الاسلامية المقدسة من الانجليز

فوجد أن البريطانيين والعرب قد تحالفوا لاسقاط المسلمين العثمانيين

بعدما خدع الانجليز الشريف حسين (جد جد الملك عبدالله ملك الأردن) ووعدوه بخلافة اسلامية على أنقاض الدولة العثمانية اذا تحالف معهم ضد العثمانيين

وشرب الشريف حسين الخدعة وأعلن ما أسماه (الثورة العربية الكبرى) والجهاد المقدس ضد العثمانيين

وانتهى المر بزمبة كبير للشريف حسين

اترككم مع الاغنية الرائعة

youtube.com/watch?gl=IN&hl=en-GB&v=SoCuyGclzc4

تم تعديل 20 أبريل 2009 بواسطة شاب مصري

[التونسى]

لن اخجل من اعترافى بأننى بكيت بتأثر شديد فى المرتين اللتين شاهدت واستمتعت فيها الى صوت سوزان بويل .. تلك المراءة الفطريه .. التى منحها الله عز وجل صوت إعجازى .. بدون اى تدريبات او تجويد او دراسه .. وتلك هى المعجزة الحقه .. فصوتها ((بيور بيور بيور)) ..

ولعلنى بكيت لاننى تذكرت عظمة الله عز وجل .. وقدرتة التى تجسدت فى صوت تلك الانسانه التى تصنف فى اسكتلندا على انها دميمه ولو انها تتمتع بروح وجاذبيه عجيبه .. وخفة دم ملحوظه خاصة عندما تضحك ..ومع ذلك وهبها الله موهبه قد تجعلها او جعلتها بالفعل من المليونيرات ..

وتذكرت ايضا هذا الحديث القدسى حيث قال جل علاه ((والله لأرزقن من لا حيلة له .. حتى يتعجب اصحاب الحيل)) ولقد راينا اغلبية الحضور ولجنة التحكيم فى حالة سخريه واستهزاء منها ... انقلبت بعد ذلك الى عجب شديد .. ثم اعجاب اشد .. ثم عواصف من التصفيق..والاشاده الهيستيريه

سبحانك ربى تهب من تشاء بغير حساب .. وانت جل علاك على كل شئ قدير

شكرا اخى الفاضل على ذاك الموضوع الذى اصبحت بطلته جديق العالم وبلا مبالغه بين ليلة وضحاها

تم تعديل 20 أبريل 2009 بواسطة التونسى

[Excellence]

على النعمة انا بأفكر اخطف رجلي على قرية ابردين البلد في اسكتلندا .. واحود عليك في جده اخدك في ايدي .. وتجيب شنطة الفلوس السونسونيت .. وناخد للبنت دي قد 35 يورو وحتتين جنبه قريش .. ونمضي معاها عقد استحقار .. ونعبي لها شريط قوام قوام وندرمغ به اوروبا يا معلم ( موديست فون للمنتجات الصوتية )

والله بأتكلم جد

وننزل 100 الف نسخه قبل شريط عمرو .. و100 بعد حماقي .. وبيع يا معلم في الزحمة

فكر وأديني ميسد عشان ننفذ يا معلم

رجلي على رجلك يا معلم... راشق معاكم في المصلحة دي..

معايا مذهب على ابوه.. للسبوبة ال.. أقصد الأغنية ...

جاية منين يا أبلة... جاية من أبردين

أركب المكروباظ... لحد راس التين

اشد تلغراف تحية.. للمعلم سين سين

[se_ Elsyed]

جاية منين يا أبلة... جاية من أبردين

أركب المكروباظ... لحد راس التين

اشد تلغراف تحية.. للمعلم سين سين

الاكس لنس عندنا ... 21 طلقة ناحية موديست يا جدع تحية للخطوة العزيزة دي

طيخ طوخ طوخ

بس مش شايف اننا كده هانقلبها خضرا محمد خضر يا اكس ؟

يعني الوليه صبرت غلب 47 سنة .. وصوت اوبرالي محترم عايز يتصنفر وتبقى قنبلة

يبقى بعد ده كله اخرت صبرها نخليها تغني ماما زمانها جايه جايه من اسكندرية وهييييييييييييييه

حرام عليك .. ده البنت عيشتني في حاله معنوية وفنية عاليه وحاسس اني عبد الحميد حافظ في فيلم الوسادة الفاضية

وزي ما قال اخويا التونسي اللي بأهديله اغنية i dreamt a dream في ليلته وعيد ميلاده وبأقوله .. الهنا والمسا ده من اخوك سين سين ..

زي ما قال فعلاً ... انا سمعت المقطع ييجي عشورميت مره وكل مره جسمي يقشعر والله ... من معاني الكلمات .. ومن صوت البونية اللي انت عايز تشلفط موهبتها

خليك يا اكس لشريط هانعبيه لأمينة بتاعت الحنطور واوعدك هانظر في امرك

موديست ... تعالى شيل اخوك من قدامي عشان فعلاً لغوص في مشاعر الرومانسية التي انتابتني

[Modest]

حيث إن الرجالة كلهم اعترفوا إنهم عيطوا من التأثر يبقى مش أنا الي هاعمل فيها 7 رجالة في بعض و كأني ماتأثرتش .. لأ انا كمان إتأثرت زيكم بالضبط :lol: ... و استروا عليا إلهي يستركم smk:

[Modest]

أخي الفاضل وليد عبد الخالق :lol:

شكراً جزيلاً على مشاركتك القيمة و على كلمات الأغنية .. و أهلاً بك في بيتنا العامر محاورات المصريين.

شاعرنا الجميل التونسى smk:

بالفعل الدروس المستفادة عديدة و أولها التفكر في عظمة الله عز و جل ثم عدم الحُكم على أي إنسان من واقع المظهَر فقط و أيضاً عدم اليأس.

[Modest]

سين سين و إكسلانس .. زملاء القروانة أيام سويسرا (الله لا يعودها ) smk:

على النعمة انا بأفكر اخطف رجلي على قرية ابردين البلد في اسكتلندا .. واحود عليك في جده اخدك في ايدي .. وتجيب شنطة الفلوس السونسونيت .. وناخد للبنت دي قد 35 يورو وحتتين جنبه قريش .. ونمضي معاها عقد استحقار .. ونعبي لها شريط قوام قوام وندرمغ به اوروبا يا معلم ( موديست فون للمنتجات الصوتية )

والله بأتكلم جد

وننزل 100 الف نسخه قبل شريط عمرو .. و100 بعد حماقي .. وبيع يا معلم في الزحمة

فكر وأديني ميسد عشان ننفذ يا معلم

رجلي على رجلك يا معلم... راشق معاكم في المصلحة دي..

معايا مذهب على ابوه.. للسبوبة ال.. أقصد الأغنية ...

جاية منين يا أبلة... جاية من أبردين

أركب المكروباظ... لحد راس التين

اشد تلغراف تحية.. للمعلم سين سين

كلامكم فيه الخولاصة

انا عارف إنكم تملككم اليأس إن حد يكتشفكم لكن بعد موضوع طنط سوزان أظن مالكوش حجة بقى :lol:

يعني بدل ما نمد لبرّة و ندوخ ورا الولية في ابردين و زمانها بقت نجمة و مش هاتعبرنا اساساً ... اهو التمويل موجود في الشنطة السونسونايت و كلمات الأغنية اللي كتبها الشاعر الكبير إكسلانس تقطع القلب cld:

مش ناقص غير نطلع عالبرنامج عدّل .. قلتوا ايه؟ أجهز الساندويتشات و زمزمية المية و نطلع الخميس الجاي؟ cld:

[MoTo]

إيه ده !!!

مش ممكن بجد !

أكتر حاجة خلت جسمي يقشعر ردود الأفعال و النظرة اللي علي الوجوه ساعة ما قالت أول مقطع و سمعوا صوتها !

PERFECT !!!!!!!!!

[se_ Elsyed]

فعلاً يا موديست .. أنان عايز حد يستكشفني

يعني صوتي بجد مقارنة بمعظم مطربي جيلي أعتبر صوت جبلي - زي الماعز الجبلي كده -

أما مقارنة بالحجة سوزان ... فيعتبر صوتي صوت ماعز بس .. من غير جبلي ..

[احمد رضوان]

طيب شوفوا الفيديو كليب الخاص بالإغنية هنا بطريقة روعة فيها معنى الحياة

http://www.youtube.com/watch?v=PTyCH_RG78E...feature=related