هل تشترى الامل .. ام انه الوهم

[الباشمهندس ياسر]

كنت لسه هقلك الكلام دا

مش اتعلمت؟

يبقي مخسرتش حاجة يابشمهندس ;)

الحمد لله اتعلمت

و فعلا مخسرتش حاجة

يا دوبك بقيت ع الحديده و عربية مريضة ذهنية

و مجموع الفلوس اللى ف ال 3 حساب كلهم لا يتجاوزوا الباكو

كروت الائتمان باكملها مديونة

و استلفت مبلغ كبييييير من واحد صاحبى

و مسافر و انا واخد معايا السجاير من مصر

فعلا انا مخسرتش حاجة خالص

كلها مادياااااااات بس و لله الحمد و المنة

ايه يا باشمهندس ... الموضوع شكله بجد ... خليتنا نقلق عليك

وأنا اللي كنت فاكر الحكايه خسارة بسيطة في باكو ولا اثنين ... والموضوع كان فضفضه

لكن أيا كانت المشكله أو حجم الخسارة ... انت أدها وأدود يا عم ياسر ... والبني آدم هوا اللي بيعمل الفلوس ...واللي عملها أول مره هايعرف يعملها ويعمل أكثر منها كل مره

... واحمد ربنا على المكروه الذي أصابك ... وهو الذي لا يحمد على مكروه سواه

اه و الله يا هندسة الموضوع بجد فعلا

يلا ... الحمد لله على كل حال

ادينا قادرين نقوم و نشتغل و نعمل اكتر م اللى راح ان شاء الله

بس ايه موضوع باكو ولا اتنين ده ... هى دى تبقى خساير

يا هندسة حضرتك لو اخدت المدام و اتعشيتوا بره و عملتوا سهرة لذيذه نوعا ما هتصرف الباكو ده و يمكن فوقيه شوية

يلا .. امنياتى بسهرة ظريفة و يادوبك تصرفلك 500 جنيه بس :lol:

ياباش مهندس ياسر

ماتشتريش الوهم ولاالسمك فى البحر

ضياع الفلوس زعله عمره قصير

احنا اللى بنعمل الفلوس

بنعملها علشان نصرفها او نضيعها فى شيئ مفيد ، ولو ضاعت منا مش لازم نزعل ، لاننا زى ماعملناها حانعمل غيرها

عملنا فلوس كثير وضاع مننا فلوس كثير

المهم ان احنا نتعلم ... ونحمد الله على الصحة والستر دول اهم حاجة

الحمد لله ع الستر و الصحة

نعم الله اكتر من ان تحصى

شكرا على شعورك الطيب

لو عملنا زيارة لأي مريض هنقول الحمد لله الذي عافانا

ولو زعلنا على فلوس راحت يبقى الحمد لله الذي عافانا من مرض كنا ممكن نصرف عليه نفس الفلوس

يبقى لما الفلوس تروح واحنا زي الفل يبقى لازم نشكر الله

والدنيا لازم تعلمك ومحدش بيتعلم ببلاش وكلنا اتعلمنا بفلوس

المهم : اللهم أأجرني في مصيبتي واخلفني خيرا منها .

اللهم اجرنى فى مصيبتى و اخلفنى خيرا منها

اخرج من سلبيات التجربة كلها ايا كانت وركز على القادم ازاي ترجع تعيش ( الوهم ) الي كنت عايشه بس ورجلك على الارض مش طاير في السما ..

فعلا ده اللى بحاول اعمله دلوقتى

يا عم ياسر, اللى يشوف بلاوى الناس تهون عليه بلوته, ومادام انت سليم وبصحتك يبقى ماخسرتش حاجة.

صدقنى الكلام ده عن تجربة شخصية.

أخوك كان على وش أبوبة, يعنى كنت قربت أبقى أب, وكنت سبت الشركة اللى بشتغل فيها عشان أعمل بيزنس خاص, وكنت فى الأيام دى بلعب فى البورصة بمبالغ صغيرة وبخبرة صغيرة على قدى برضه, والحمد لله كنت بكسب كويس -حاجة كده تجيب مصاريف البيت- رغم صغر المبالغ, وفى هوجة المصرية للاتصالات عينى زغللت ونسيت كل اللى قرأته واتعلمته عن البورصة, ورحت داخل بكل اللى معايا على أمل إنى فى خلال أسبوع أو أسبوعين أبيع وأكسب.

وعنها يا معلم الانهيارات ابتدت وكل أسبوع أقول استنى الأسبوع اللى بعده يمكن ربنا ينفخ فى صورتها وأقلل الخساير شوية, مفيش فايدة برضه كل يوم أقل من اللى قبله.

ابتديت أتزنق بقى واحتاج فلوس عشان لسه ماشتغلتش, اضطريت طبعاً أبيع بالخسارة, وكانت الخسارة تقريباً 30%.

كان درس تمنه غالى جداً طبعاً, بس الحمد لله اتعلمت منه ومابقتش أتهور عشان اللى بيتهور بيتعور.

ورغم كل ده الحمد لله ابتديت فى البيزنس بتاعى والحمد لله ماشى كويس. يعنى أى مشكلة مهما كانت مش نهاية العالم, المهم إنك تكون سليم وتقوم تانى وكله يتعوض إن شاء الله.

الأمل هو الحياة يا باشمهندس, أنا شخصياً لو فقدت الأمل يبقى الحياة مالهاش لازمة عندى.

خلى عندك أمل ياباشمهندس وبإذن الله تفتكر الأيام دى وتضحك عليها.

واعلم أنه ما أصابك لم يكن ليخطئك, وما أخطأك لم يكن ليصيبك.

ربنا يعوض علينا و عليك يا هندسة

و الحمد لله انها جات على 30 % ( ياااااااااااااه ... دى نعمة كبيرة انك تحتفظ ب 70 % من راسمالك )

صباحك سعيد يا باشمهندس:

مش عايزة أقولك كلام مكرر و إن الفلوس بتروح و تيجى...و هى دى الحقيقة

بس عايزة أرد و أقول حاجة تانية

ما فيش أى حاجة فى الدنيا تستاهل إنك تزعل عليها...لأن ما فيش حاجة بتدوم...دوام الحال من المحال

تأكد إن الحلو بيخلص و الوحش كمان بيخلص...و الحياة أقصر مما تتخيل

يبقى ألحق أستمتع بيها بدل ما تضيعها فى زعل و ندم...ألحق حسها...ماحدش عارف فيه إيه قدام

طول ماأنت عندك حاجات تشكر عليها ربنا...يبقى ما فيش سبب للزعل...و أكيد علطول نعمه مغرقاك حتى لو نسيت أو مش واخد بالك

الحاجة التانية اللى عايزة أقولها:

لو فعلا فيه حاجة بتزعل...يبقى أنك تفقد حد غالى عليك

مش قصدى الموت...و لكن تفقده معنويا

حد عزيز على قلبك...فجأة يختفى من حياتك لأى سبب...وما فيش فى إيدك أى حيلة

حد قريب منك كنت بترتاحله يضيع ومن غير مقدمات أو أسباب تستوعبها...ساعتها تزعل

كمان حد كنت فاكره حاجة و طلع حاجة تانية خالص و خاب أملك فيه...ساعتها تزعل بجد

الفلوس بتتعوض لكن الناس و الأعزاء عمرهم ما بيتعوضوا !!!

تحياتى

سوسورانى

يا صباح الرقة و النهار اللى زى الورد

و الله يا دوك

بحمد ربنا من كل قلبى انها بتيجى ف الريش دائما

الحمد لله دائما و ابدا

و فعلا نظرة بحب ف عين حد من اهلك تساوى الدنيا و اللى فيها

و يارب لا تجعل مصيبتنا ف ديننا الذى هو عصمة امرنا ... امين

و اخيرا

اللى مش كاره يااااااااااا ناره

و شكرا ع اهتمامكم الفوق الكريم بشوية

[عندى أمل]

بسم الله الرحمن الرحيم

و الصلاة و السلام على رسول الله سيدنا محمد صلى الله عليه و سلم

السلام عليكم و رحمة الله و بركاته

بصراحة مش معقول تكونوا بتتكلموا عن الأمل و أخوكم "عندى أمل " موجود معاكم و ما يشتركش

لازم أدلى بدلوى فى الموضوع

الحمد لله طول عمرى عندى أمل و مش بيأس أبدا

ممكن حد يقول إنى مش واقعى أو عايش فى أحلام اليقظة

طيب و إيه يعنى؟؟؟ ما كل حاجة بتكون بدايتها حلم

من كام شهر بس اكتشفت إن طريقتى فى الأمل غلط

قولوا إزاى؟

لان كان عندى أمل فى نفسى و فى ذكائى و فى إمكانياتى و فى إجتهادى و فى أهلى و فى وسايط أهلى و أقاربى

لكن لقيت إن ده خطأكبير اوى

لازم يكون الأمل فى ربنا سبحانه و تعالى

إسمع يا باشمهندس كلمة من أخوك الصغير

أنا سافرت السعودية فى أخر شهر ديسمبر اللى فات و كان عندى أمل أحقق حاجات كتير بس رجعت مصر من شهر واحد بس و مع ذلك مش زعلان

لان فى اللحظة دى أنا عندى أمل فى ربنا سبحانه و تعالى

و أنا راكب الطيارة لاول مرة فى حياتى و رايح السعودية مش عارف ليه جه فى بالى قصة السيدة هاجر زوجة سيدنا إبراهيم عليه السلام

قبل ما اسافر كانت أمى بتتكلم مع حد من اخواتى عن القصة دى و بتقول إن السيدة هاجر كان "عندها أمل" فى إن ربنا سبحانه و تعالى لن يضيعها أبدا

و انا فى الطيارة فضلت أفكر فى القصة دى و طول إقامتى فى الكام شهر اللى قعدتهم فى السعودية كانت القصة دى تيجى فى بالى و أشوفها من كذا زاوية

يعنى السيدة هاجر زوجة خليل الله سيدنا إبراهيم عليه السلام لما تبقى فى الصحرا لوحدها و معاها ابنها سيدنا إسماعيل عليه السلام و عندها أمل و يقين أن الله سبحانه و تعالى لن يضيعها يبقى المفروض "بالمنطق بتاعنا الايام دى" أنها تقعد معززة مكرمة مستنية الفرج لما يجيى لها على أساس أنها زوجة نبى من أنبياء الله

لكن لا

دى قامت و جريت و اجتهدت و سعت بين تلين فى الصحراء و هى معتمدة و متوكلة على ربنا سبحانه و تعالى

طيب يا ترى كانت متوقعة تلاقى إيه فى الصحرا غير الرمل و الجبال؟؟؟

ومع ذلك ما بطلتش سعى لحد ما جالها الرزق من حيث لا تحتسب

طيب يا ترى السيدة هاجر بعد الجرى و التعب ده ندمت انها سعت و تعبت و قالت يا ريتنى كنت فضلت قاعدة و مستريحة لحد ماكان بئر زمزم هيظر تحت أقدام سيدنا إسماعيل عليه السلام

ربنا سبحانه تعالى أمرنا بالسعى و العمل و بعد كده هيرزقنا سبحانه و تعالى سواء من تفس مكان سعينا او من مكان تانى

أنا لما كنت فى العمرة اتهد حالى فى السعى بين الصفا و المروة و طول السعى كنت باتخيل السيدة هاجر و هى بتجرى و تسعى و أقول لنفسى ا"ازاى السيدة هاجر قدرت تستحمل السعى و الجرى فى الصحرا و الرمل و كان عشان ايه ما كانت ترتاح احسن"

أثناء السعى بين الصفا و المروة دعيت ربنا سبحانه و تعالى انه يخلينى متوكل عليه و عندى يقين به سبحانه و تعالى زى السيدة هاجر و الحمد لله ربنا سبحانه و تعالى استجاب دعوتى

[أحمد سيف]

بس ايه موضوع باكو ولا اتنين ده ... هى دى تبقى خساير

أنا حسب ما أعرف الباكو بقى عشر آلاف جنيه دلوقتي مش ألف .... يعني ميت ورقه بميه ... زي ما البريزه بقت عشره جنيه مش عشر قروش على ايامي

و الحمد لله انها جات على 30 % ( ياااااااااااااه ... دى نعمة كبيرة انك تحتفظ ب 70 % من راسمالك )

فعلا الحمد لله انها جت على 30% ... أنا أعرف ناس خسروا راسمالهم وفوقه شويه

يا ريت حضرتك تشاركنا خبرتك في الموضوع اللي أنا فتحته بعنوان "التعاملات المالية في مصر" ... علشان الغلط الي وقعت فيه غيرك يتجنبه

تم تعديل 26 أبريل 2009 بواسطة أحمد سيف

[الباشمهندس ياسر]

بس ايه موضوع باكو ولا اتنين ده ... هى دى تبقى خساير

أنا حسب ما أعرف الباكو بقى عشر آلاف جنيه دلوقتي مش ألف .... يعني ميت ورقه بميه ... زي ما البريزه بقت عشره جنيه مش عشر قروش على ايامي

يا ريت حضرتك تشاركنا خبرتك في الموضوع اللي أنا فتحته بعنوان "التعاملات المالية في مصر" ... علشان الغلط الي وقعت فيه غيرك يتجنبه

منور الدنيا يا هندسة

انا فهمتك غلط و فهمتك بتتكلم عن الالف و الاتنين

اصل على حسب معلوماتى ان الباكو اللى بيساوى بريزة اللى هى بمائة الف... لفظ يستعمل ف اوساط معينة

معرفش يا استاذنا و الله ان سعادتك واصل اوى كده

مساء الخربشة

بالمناسبة

هو الموضوع راح فين ... كل ما افتحه مش بلاقيه

[أحمد سيف]

صباح الخير يا باشمهندس

الموضوع في باب المغتربين المصريين ... الصفحة الثانية

أنا كنت افتكرت انه اتقفل واتبعث على الأرشيف علشان فيه ناس زعلت منه

وآدي الرابط بتاعه

نتقابل هناك بإذن الله

تم تعديل 27 أبريل 2009 بواسطة أحمد سيف