بنك معلومات من خبرات المهاجرين السابقين

[somayasaleh]

اخواني المهاجرين الجدد

لاحظت ان المنتدي مليان بخبرات اعضاء افاضل........ هاجروا فعلا...... مثل

د.شامي....د.تهامي....د،هشام....مدام دعاء ......واخيرا استاذ زوهيري...... من قديم ....الباشمهندس ياسر....

ولكن للاسف هذه المعلومات لا يعرفها غير المتابعين القدامي زي حلاتي،،،،، والتوبيك الواحد ...وصل عدد الصفحات الي اكتر من مائة،،،،،،

لذلك ..... الناس الجداد بيتوهوا علشان يلاقوا المعلومة المهمة.......لذلك

استأذن الاعضاء الافاضل السابق ذكرهم في اقتباس اجزاء مهمة من موضوعاتهم ووضعها في هذا التوبيك....ليصبح بنك معلومات سريع ومختصر وسهل الوصول اليه

ونبدأ بسم الله الرحمن الرحيم

المسموح هو دخول كندا خلال سنة من تاريخ الفحص الطبى ...

مدة صلاحية الفيزا بيكون مكتوب على الفيزا نفسها.

انا قمت بحجز الفنادق عن طريق النت قبل السفر بمدة كافية...لو ان رحلتك واضحة المعالم من دلوقت...أنصحك تحجزى بدرى ....

الأسعار....كله موجود...ممكن الموقعين دول يفيدوكى:

www.booking.com

www.expedia.com

أولا: الطيران

======

هذا الموضوع قتلته بحثا قبل السفر لمدة 3 شهور على النت و من خلال شركات السياحة

وبعدين جاتلى فكرة ثورية و هى ليه الواحد ما يستغلش طول الرحلة و يزور مكان تانى فى الطريق منها يريح شوية و منها خمسة سياحة لأن الرحلات الطويلة دى ما بتتكررش كتير. و كان ان استقر الأمر على الخطوط المغربية وكان خط السير كالأتى:

جدة - كازابلانكا - مدريد - كازابلانكا - مونتريال - جدة.

و على فكرة لما تاخدى DESTINATION فى الطريق ( زى مدريد مثلا) سعر التذكرة مش بيزيد كتير ان لم يكن مش حيزيد خالص فى بعض الشركات.

ما علينا تم التجهيز للرحلة من أخذ التأشيرات للمغرب و أسبانيا قبلها (وده فى حد ذاته موضوع يطول شرحه)

وتم السفر من جدة فحر الخميس 13 مارس وبعد حوالى خمس ساعات و نصف طيران وصلنا الدار البيضاء

و على الفكرة الخطوط المغربية نص نص و يبدو ان المضيفات ما يعرفوش ان فيه ناس فى الكون ما بيتكلموش فرنسى وهم حتى لو اتكلموا عربى ماحدش حيفهم حاجة و تبقى لغة الأشارة هى الحل.

فى الطائرة الى مونتريال طبعا كنا محاطين بناس كتير من الشعب الكندى الشقيق من مختلف الأعمار و الفئات و الملاحظ ان الجميع كانوا ناس فى منتهى اللطف و الترحيب بينا خصوصا لما عرفوا اننا مهاجرين جدد و تنافس الجميع فى ابداء النصح و الحقيقة أعطونا راحة نفسية طوال الرحلة اللى استغرقت حوالى 7 ساعات ونصف. و الجميل ان جزء منهم يكلمنا بالفرنسية و أخرين بالانجليزية بل تبرع بعضهم بتعريف بقية الركاب بينا و كانت مظاهرة ترحيب خففت التوتر الى حد كبير.

و بصيت من الشباك على مدينة مونتريال الجميلة و كانت المفاجأة لما أعلنت المضيفة ان درجة الحرارة بالخارج كانت ناقص 19 . يا للهول.... هذا الرقم لم يمر بى فى أى مرحلة من مراحل حياتى و لا فى أى بلد أوروبى زرته من قبل. المنظر من شباك الطائرة كان تحفة......مساحة بيضاء مهولة من الثلج يتخللها خطوط سوداء رفيعة (عرفت بعضها ان دى الشوارع بعد ما بيشيلوا منها التلج) معلش كنت لسه محدث ثلج و ما عنديش خبرة.

اللاندنج

=================

مع استلام الفيزا علي البسبور بتيجى مجموعة أوراق مكربنة لكل فرد على حدة..

.و يجب مراجعة البيانات المكتوبة فيها وتكون مطابقة لبيانات الباسبور...

و كمان يجب مراجعة بيانات الفيزا المطبوعة فى الباسبور.

وصلنا مطار مونتريال حوالى الساعة 7 مساء . مشينا مستدلين بعلامات الشنط (baggage )

حتى وصلنا صالة الجوازات و كان هناك طابور طويل نظرا لوصول عدة طائرات فى نفس الوقت و لكنه طابور منظم جدا و ينتهى بسرعة.

ولما وصلنا عند ضابط الجوازات كانت لطيفة جدا و رحبت بينا و أخبرتها اننا Perminent resdidents to Canada

وعلى فكرة هما يحبوا هذا الوصف عن وصف ال Immigrants أطلعت على الجوازات بسرعة و راجعت مسمى التأشيرة وشافت وتأكدت من المرافقين وختمت ختم دخول وأرشدتنا الى مكتب خلفها خاص بال immigration........ توجهنا اليه و فيه عدة موظفين من ادارة الهجرة

لابد من استطراد سريع هنا و هو ضرورة وجود عنوان فى كندا (مش مهم فين) أى عنوان لأنه حيطلب منكم عند الوصول و ذلك لتتمكن ادارة الهجرة من ارسال

(Perminent Resident Card) و يعرف اختصارا ب P R Card اليه بعد حوالى 4 اسابيع من عمل ال landing

وهنا كان دور المحامى اللى أعطانى عنوان فى اوتاوا و اعطيته بدورى لموظف الهجرة

الملحوظة الأخرى انه أهم شىء فى حياتك هى مجموعة الأوراق المكربنة اللى حتاخدها عند الحصول على الفيزا.

وهى نسخة لكل فرد من أفراد الأسرة وهى هامة جدا فى انهاء كافة الاجراءات الحكومية بعد ذلك

مثل Social Insurance Number

و كذلك رخصة القيادة و بالتالى يجب الاحتفاظ بها خلال سفرك فى شنطة ايدك لعدم ضياعها و ما تحطهاش فى شنطك خصوصا اذا كنت مسافر على الخطوط المغربية

الملابس المطلوبة

=================

فى مثل حالتى انا كنت حأصل فى الشتاء و ده استلزم الأتى لكل فرد على حدة:

ملابس داخلية من نوع THERMAL وهى عبارة عن بنطلون و فانلة داخلية (منها نوع بكم أو نصف كم )

و هذه تجدها فى السعودية مثلا فى محلات Debenhams او Marks & Spincer وهناك منها أنواع رخيصة صوف أو قطن لكنها تسبب حساسية و احمرار فى الجلد

. و هذه الملابس لبسناها فى الطيارة قبل الهبوط و تقريبا ما تقلعتش الا و احنا مروحين..... هامة جدا للبرد خصوصا للأطفال.

طبعا لا تنسى الكوفيه و غطاء الرأس Ice cap و الجوانتيات ويستحسن تكون جلد أو شمواه لأن الصوف و القماش بيتبلوا بسرعة خصوصا لما الأولاد يمسكو التلج بايديهم.

شرابات صوف مهمة جدا و كذلك الأحذية البوت عشان حوسة بلل الشرابات مع المشى فى التلج و المطر.... وعشان ما تضطرش تشترى شرابات و انت فى اى مشوار....

أكيد طبعا ملابس ثقيلة و ضرورى جدا سويترات مع كابيشون..... اصل انت مش متخيل يعنى ايه ناقص 19 ما علينا.

بالنسبة لموضوع الاكل قد يحتاج الأمر منك الى شوية حاجات تمشى بيهم حالك لأنك فى الأول مش حتبقى عارف أماكن الأكل فين و كمان عشان زنقة المطارات و فترات الانتظار و أعتقد ان العيش التوست و التونة و علب اللانشون و الجبنة قد تكون حل جيد

خلى معاك سكينة بلاستيك

الشنط والوزن والرحلة

===============

.. الرحلة كلها أستغرقت 17 يوم....مش لأن الاجراءات طويلة لكن أنا كنت عاملها سياحة وزرت عدة بلاد.

..لكن أجراءات اللاندينج بتاخد ربع ساعة.

...و الجمرك عشر دقايق....

و SIN عشر دقايق....

وفتح حساب البنك....20 دقيقة.....

ورخصة القيادة ساعة (G1).... و ده للى حصل معايا ممكن يكون أطول أو أقصر من كده مع حد تانى.....

يعنى الموضوع كله يخلص فى يومين

بالنسبة للشنط الحجم مش مهم بقدر الوزن...

.وحسب خطوط الطيران...لكن المهم وزن الشنطة الواحدة ما يزيدش عن 23 كيلو.... و الهاندباج لها قياس معين موجود فى المطارات ...وهو المتعارف عليه.

المدارس

==========

بالنسبة للمدارس.... ماسمعته من أصدقائى اللى زرتهم سواء فى كينجستون أو لندن أونتاريو ان الموضوع و لا أسهل أيا كان مستوى الطفل... أو سنه ...أو لغته.... فالموضوع ميسر حتى لمن جاء فى نصف العام الدراسى

يتم وضعهم فى فصول تتناسب مع أعمارهم وبعد فترة من المتابعة يتم تعديل وضعهم و مناهج دراستهم و كذلك امتحاناتهم بما يتناسب مع امكانياتهم و قدراتهم... و لم يطلب منهم اية شهادات دراسية سابقة...

لكن يجب تحضير شهادات التطعيم.

بالنسبة للمدارس الابتدائى و الاعدادى ما فيش مشكلة .....لكن الاولاد فى Grade 11 & 12 سمعت انهم عند الالتحاق بالجامعة لازم يكونوا عملول ما يسمى بال Volunteer hours ولها نظام معين..

.منها ما يمكن عمله بعد ساعات الدراسة أو فى ال weekends او فى الاجازة الصيفية.....

لمهم عند اللاندينج الأول وجود Main Applicant يعنى مقدم الطلب بنفسه و مش مهم من كانوا مرافقين معاه بس بشرط انهم يعملوا لاندينج قبل مرور سنة على تاريخ الفحص الطبى

====

بالنسبة --للأدوية ...كان معى أدوية و لم يسأل عنها أحد و لم أسمع عن حد اتسأل عليها...ودى معلومات انا عرفتها من أماكن أخرى...الا اذا كانت فيها مواد مخدرة أو مهدئة فيجب الحرص.

اجراءات السن كارد

=================

=خلصت اجراءات الSIN بسرعة .....و كانت اهم التوجيهات من الموظفين لنا بضرورة الاحتفاظ بهذ الرقم فى مكان سرى..... و عدم اظهاره لأى أحد.... حتى لا يستخدم بشكل غير شرعى من أى حد غير صاحبه...

و بلغونا انه سيتم ارسال SIN Cards بعد اسبوع اللى العنوان اللى اعطيناه لهم و بالفعل استلمناه لاحقا بعد أسبوع

وكانت المستندات المطلوبه هى الباسبورات و وورقة ال Proof of Landing اللى قلت لكم عليها قبل كده...

. كانوا الحقيقة ناس لطاف جدا و أعطونا بعض النشرات التعريفية عن بعض الخدمات المتوافرة و التى هى من حق المواطن الكندى...

وانصح فى هذه المناسبة اخوانى بالدخول على هذا الموقع http://www.cic.gc.ca و قراءة الجزء الخاص ب SIN وكيفية التصرف لو ضاع و ازاى تحمى نفسك من المساءلة...

الثلج الابيض وانواعه

==========

طبعا بعد فترة من المشى فى التلج حتاخد خبرة التلج ...

وهى ايه نوع التلج اللى يتمشى عليه بأمان...

وايه النوع اللى بيغرز..

..وايه النوع اللى بيزحلق ....

.وبمناسبة الطقس اكتشفت ان الجسم فعلا بيتعود بعد فترة على البرد .....وان حالة التخشب المبدئية اللى واجهناها فى أول أيام بدأت تزول بالتدريج..

.والدليل على كده عند السفر من مطار مونتريال فى العودة كانت درجة الحرارة صفر و انا لابس قميص و بنطلون فقط.... ومن غبر ال thermal كمان.

طبعا فيه قناة تليفزيونية خاصة بالطقس لكل مدينة كبرى على حدة

... و شغالة 24 ساعة..بس الحقيقة مفيدة جدا بالنسبة لتخطيط يومك...خصوصا لو كنت مسافر على high way ....

و بمناسبة التليفزيون فطبعا معظم البرامج فى مسابقات الهيافة و الأخبار الخفيفة مع وجود بعض البرامج و القنوات الجادة وذات الطابع الأخبارى....

التلج يا سيدى لما يكون شديد البياض و متماسك...تقدر تمشى عليه بس بعيد عن حوافه اللى ساعات بتنهار تحت ثقل رجليك ...وده طبعا يخضع لعوامل أخرى منها وزن سعادتك.

ثانيا: لما يكون شبه التلج المجروش...بيكون قابل للغرز

ثالثا: لما يكون فى مرحلة السيحان و خاصة لما يكون مختلط بشوية طين بيكون لونه رمادى شوية و كأنه مغطى بطبفة من الزجاج...هو ده اللى بيزحلق

بالنسبة لقنوات التلبفزيون انا كنت باتكلم على التليفزيون الكندى و قنواته المتاحة فى البيوت الكندية...الفنادق...الشقق المفروشه...أما السادة العرب و المصريين المقيمين فبامكانهم تركيب طبق استقبال للقنوات العربية وده انا شفته عندهم.

فتح الحساب

==========

جاء الدور على فتح حساب فى البنك...و أخد لنا المحامى موعد علشان ما نروحش ننتظر كتير لأن الموظفة حتقضى معانا شوية وقت لتعريفنا بخدمات البنك و أنواع الحسابات الموجودة ... و تاخذ بياناتنا كاملة .. و بالفعل استقبلتنا انا و زوجتى بترحاب كبير و كانت متعاونة جدا معانا لكونها عرفت اننا كنديين جداد بقالنا يومين فقط... و ... و احنا اخترنا عمل حساب مشترك (joint account) و بالفعل اعطتنا بطاقات الصراف اللى كانت حضرتهم بعد ما أخدنا الموعد...... و ماكانش مطلوب ابدا منا وضع اى فلوس فى الحساب فى هذا الوقت.

رخصة القيادة

============

و بعدها بيوم رحنا الى أحد مكاتب ال Ministry of Transportation لعمل رخصة القيادة G1 و هى كما ذكرت هامة لكونها ID عليها الصورة.....المحامى قال لنا نقول اننا بلا خبرة و لا نستطيع اثبات خبرة السواقة لا فى مصر و لا فى السعودية و عايزين نمتحن G1 اللى هو امتحان نظرى فى الاشارات و معلومات المرور الخاصة باونتاريو (عندهم كتاب بيتباع هناك و يشمل كل المطلوب) و ممكن تنزيل معلوماته من أى موقع مدرسة لتعليم قيادة السيارات بكندا .

المكان شيك

...انا عايز أعمل G1 لو سمحتى.

فين الباسبور ؟ و فين ورقة ال proof of landing ؟

هى: عندك خبرة

انا: (بشىء من الجدية) انا عاوز G1

هى: OK Sir ادفع الرسوم و روح كاونتر رقم 11

دفعنا الرسوم 125 دولار للفرد... وعند كاونتر 11

كشفنا نظر...وطلبت منا ان نتوجه لمكان الامتحان.

اخدنا و رقتين ..واحدة لأمتحان الاشارات ...و التانية الامتحان النظرى.... فى امتحان الاشارات وسقطت فى التانى...ممكن طبعا تعيد الامتحان فى ساعتها بعد ما تدفع 10 دولار...دفعت و رجعت

نجحت فى المرة التانية و ان شاء الله حنبعت لك الرخصة على العنوان بعد 3 - 4 اسابيع

القانون بيسمح بالقيادة في من غير رخصة كندى لمدة ستون يوما.يعنى رخصة مصر صالحة للقيادة لمدة ستون يوما بعد كدة ما تنفعش لازم يكون رخصة كندى.

.امتحان G1امتحان نظري وصعب جدا لواحد بيسوق سيارة انه ماينجحش فيه.عبارة عن 32 سؤال في الاشارات و قواعد المرور مطلوب اجابات صحيحة ل 28 سؤال

.ال ROAD TESTده امتحان القيادة العملي و بيكون في مندوب من ال MTO بيمتحنك.

بعدمابتنجح في النظري ممكن لو معاك مايتبت انك بتسوق عربية من سنتين فقط من حقك تطلب امتحان Gاقل من سنتين بشهر واحد احبارى تتطلب ROAD TEST G2

كان لابد ان أبحث عن سيارة فان أو مينى .... طبعا بهدلة الانتقالات بالمواصلات و أربع عيال و أمهم و 8 شنط بيتبقى مش لطيفة.... و...

.. وكان الحل الوحيد فى رأيه اننا نروح المطار حيث كل مكاتب الايجار موجودة جنب بعض و بكده بتكون الفرصة أكبر....

و أعطيته الرخصة الدولية....

وغاب شوية وجاب السيارة...بونتياك موديل 2007...زى الفل...طبعا أعطانى بعض العدة لأزالة التلج اذا تراكم ..

سألت نديم قبل ما أتحرك بالسيارة أذا كان ممكن استئجار GPS Navigator عشان التوهان فقال ان ما عندهمش.....طبغا أنا كنت فى مخططى للرحلة ان يكون معى هذا الجهاز لسهولة التنقل بين المدن....فكان شراء Navigator جديد أمر لا مفر منه....

استلمت السيارة...وقعدت حوالى 10 دقايق على بال ما أتعرف على أماكن الحاجات....

كم بعض المشاهدات و الملاحظات...على موضوع المرور و محطات البنزين.... و الباركينج.... و السيارات.

- أولا: اذا كنت ناوى تستأجر سيارة فى كندا خصوصا لو انت فى أول زيارة مثلا لعمل اللاندينج فالنصيحة انك لا تستأجر فى أول كام يوم ...لحد ما تأخد خبرة الحياة بنفسك و تعرف الشوارع و تشوف تصرفات السائقين... و احترام المشاة...وا حترام اشارات المرور و علاماته... وكمان تفهم موضوع الباركينج (أه يا جيبى).

- ثانيا: الأفضل طبعا انك تعمل الحجز بتاعك عن طريق النت قبل ما تيجى بكام يوم...وده طبعا يستلزم انك تكون محضر خطة جيدة التوقيت لتحركاتك داخل كندا...طبعا الحجز عن طريق النت أرخص...ويضمن لك نوع السيارة اللى انت عاوزها.

- ثالثا: حاول و انت بتحجز تشوف شركة بتأجر GPS Navigator.... طبعا جهاز مالهوش حل و لازم يكون معاك...انا شخصيا لولاه لكانت الرحلة كلها حتبقى فى الضياع و كان حيبقى صعب جدا نعمل السيناريو اللى كنت مخطط له....مع توفير الوقت و المجهود و راحة البال.

رابعا: لو معاك أطفال صغار أو رضع...ماتنساش تحجز كرسى أطفال يناسب سنهم...أو وزنهم...حسب تعليمات المرور...مافيش طفل يقعد على حجر أمه...أو يدفس جنب اخواته...أو يفضل طليق فى العربية بدون حزام....

خامسا: لازم يكون عدد مقاعد السيارة مناسب لعدد الركاب....و اعمل حسابك فى مكان للشنط.

سادسا: محطات البنزين بيكون مكتوب عليها يافطة كبيرة اما Full Service او Self Service ...الأولى يعنى الخدمة كاملة...يعنى سيادتك خليك مكانك و حيجيلك العامل و يمون السيارة....و يحاسبك... و لو أعطيته بقشيش...بيفرح جدا...ولو ما حصلش مش حيشتمك ولا يضربك...ما تخفش....و غالبا هذا العامل بيكون جالس فى حجرة صغيرة مستخبى من البرد و لما يشوفك حييجى لوحده.....

النوع الثانى و هو الخدمة الذاتية...يعنى أخدم نفسك بنفسك يا حلاوة....و ده اللى فيه الكلام....سعادتك حتقف بالسيارة امام مضخة البنزين...(أعتقد دى حاجة سهلة)...و خلى بالك من الرقم اللى مكتوب على المضخة...عشان تعرف و انت بتحاسب كنت فى مضخة رقم كام.... و طبعا خد بالك تقف صح يعنى يمين أو يسار المضخة حسب مكان التانك ...(دى كمان سهلة)...لاحظ كمان ان الموتور يكون مش شغال أثناء تعبئة البنزين...

سابعا: أوعى تقف امام مضخة السولار.... الا اذا كان معاك عربية نقل.....

ثامنا: حتلاقى زراير كتير و عدادات والوان...ما تتخضش...طلع خرطوم البنزين...و اضغط على اللون الأبيض اللى مكتوب عليه Regular ...وعبى يا باشا.....طبعا احسن لك تملا Full Tank كل مرة علشان تقلل عدد المرات طبعا انت مراقب من الشخص اللى جالس بداخل المحطة بدائرة تليفزيونية ..(و قبلها طبعا مراقب من ربنا).... خلصت...أدخل المحطة....قول له رقم المضخة...حاسب و اتوكل على الله.

بعض المضخات بيكون فيها مكان لقبول ال Credit Card و استعماله سهل...بس ما فيش داعى تحرج نفسك.

تاسعا: ماكينات الانتظار بتكون على الرصيف بجوار المكان المسموح بالانتظار فيه...و يجب عليك قراءة ما هو مكتوب على العمود اللى على نفس الرصيف حيث تجد المواعيد المتاحة للأنتظار المجانى...و أبو فلوس...يعنى مثلا قد تجد ان أبو فلوس بيكون من بعد الساعة 8 مساء و حتى السادسة صباحا...و بذلك يكون ما بين ذلك بفلوس...

عاشرا: ماكينة الانتظار نفسها مكتوب عليها تعريفة الأنتظار...مثلا الدولار يعطيك 20 دقيقة انتظار...والدولارين 40 دقيقة و هكذا ...احسب مشوارك قد ايه...ويبدأ العداد فى العد التنازلى.

حداشرا : يعدى رجل المرور على الماكينة ولو لقاها صفرت...يعنى كتبت كده: 00:00 تبقى وقعتك سودة لو اتقفشت....و يروح عاطيك واحد تيكيت غرامة.

اثنا عاشرا : لو ما لحقتش مكان تركن فيه بالليل...عليك بأى باركينج Overnight و ده بياخد له حوالى 12 دولار ...(حسب المكان)

13 شرا طبعا كل المولات و أماكن الترفيه جنبها أماكن انتظار.... و لو معاك Navigator... ما فيش أى مشكله ...حيدلك على المكان.

أنا قلت فى الحلقة السابقة انى لا أفضل ايجار سيارة من المطار عند النزول لأول مرة...أحسن تاخدلك تاكسى ...وبعد كام يوم استأجر سيارة...وده أحسن من الناحية (المعنوية) و (النفساوية كمان) عشان تاخد خبرة المكان أولا...

كتشفت ان فيه حوالى 2 مليون نوع من ال Navigators...

لأنواع النافيجاتور الكويسة اللى شفتها...أهم 3 أنواع هم: Garmin - Magillan - Tom Tom وأحسنهم هو Garmin

الاسعار بتفرق حسب الامكانيات و حجم الشاشة... وعدد البلاد الى خرائطها موجودة...و الباقى ممكن تنزله من على النت

الأسعار تبدا من 200 $ ال 600 $ للأنواع المعقولة....

أخيرا اخترت نوع معقول من اللى بينطق اسم الشارع.

أنا:...لو سمحت يا Navigator عاوزين نروح Shopping Centers

Navigator: حدد ...بتاع ايه ؟ كمبيوتر...ملابس...مجوهرات.....الخ ؟

أنا: ملابس

Navigator: امرك يا باشا....اتفضل لستة بكل الاماكن (على فكرة الاماكن مترتبة تصاعديا حسب بعدها عن مكانى الحالى)..

ولد يا Navigator....كينجستون لو سمحت....حاضر يا باشا.....نسيت أقولكم ان ال Navigator كمان بيعطيك الوقت التقريبى للوصول و ذلك حسب اختيارك ان كنت تفضل تضبطه انه يوصلك بأقصر وقت أو أقصر مسافة....(قلة أدب)... حتى لو سيادتك دخلت تمون بنزين أو تشرب قهوة على الطريق...فورا يراجع حساباته و يعطيك التوقيت الجديد لرحلتك..

لمهم ساعتنين وشوية ولقيت الولد ال Navigator بيقول لى حمدا لله على السلامة ...انت امام بيت صاحبك

كينجستون (واحد يوم) و بعدها تورونتو (خمسة يوم) و خلالهم رحنا لندن أونتاريو (واحد يوم)...و شلالات نياجرا (واحد يوم)...وعدنا الى أوتاوا (واحد يوم)...وبعدين مطار مونتريال...كازابلانكا (واحد يوم)..

كينجستون مدينة ليست كبيرة و يغلب عليها الهدوء الشديد...فيها ايرلنديين كتير...و العرب نسبتهم ليست كبيرة... ولكنها تتميز بوجود مستشفى جامعى قوى.

هذا عنوان على النت يفيدك بكل المعلومات عن المدارس :-

http://www.settlement.org/site/ED/elementary.asp

وهذا الموقع يفيد كل كل مهاجر جديد بمعلومات قيمه عن كل شيء قبل السفر الى كندا :-

http://www.settlement.org

شراء البيت والتأسيس

=============

سألت صديقى على بيته و كيف اشتراه...و كذلك تأثيث البيت...

وقال ان موضوع شراء البيت مش بيتم فى الشهور الأولى طبعا..

.سيادتك تشرف و تختار المدينة...

و الحى اللى حابب تسكن فيه...وطبعا بيحكمك فى كده مدارس الاولاد و مكان عملك...

واذا تراءى لك ان الأمور مستقرة بتبدأ فى البحث عن شراء منزل حسب امكانياتك....و تروح البنك...و يستحسن يكون معاك مقدم معقول عشان تقلل الأقساط وقيمة الفائدة اللى بتكون على 25 سنة مثلا أو حسب ما تختار.

تأثيث البيت مش مشكلة ...لو حابب أثاث جديد موجود ...وحتى المستعمل بتكون حالته جيدة... العثور عليه سهل من الاعلانات أو النشرات و الجرائد المجانية المنتشرة على ناصية كل شارع فى المدن الكبيرة.... و يمكن كمان انتظار ما يسمى بال Garage Sale كل سبت و أحد بيكون فيه حاجات حلوة....

مدينة لندن

=======

المدينة جميلة و هادئة ...وفيها كل شىء بعيدا عن صخب تورونتو...والعرب موجودين كتير ولهم نشاط ملحوظ.... مدرسة اسلامية يوم الأحد..... و هناك مجالات لأعمال تطوعية كئيرة من بازارات و غيرها....

..وجوب متابعة الاولاد بشكل مكثف ......تأثير المجتمع المحيط بهم عليهم..... و اللى احيانا بيكون أقوى تأثيرا من التوجيهات المنزلية....

الحياة الكندية....و البداية كانت وجبة ما بين الفطار و الغدا و عملتها لنا على الطريقة الكندية....طبق فيه انواع من الجبن...معاه خضار شبه الكرنبيت و خس و كرفس.....

قعدنا فى حوارات مستمرة حتى الساعة خمسة....اتغدينا...و كانت قد أعدت فى جدول الزيارة جولة ميدانية فى المدينة عشان نشوف كل شىء بنفسنا....و عشان تقنعنا ان يكون مستقرنا معاهم..

واضح طبعا انها مدينة كبيرة مقارنة بكينجستون ..لكنها طبعا أصغر من تورونتو...

مدارس الأولاد ابتدائى و ثانوى....و مركز المدينة.... و اخذناجولة و اسعة فى جامعة وسترن اونتاريو...... ذات المساحة الشاسعة

شلالات نياجرا

======

WOOOOOOW ....دى كانت الكلمة اللى قالها جميع أعضاء البعثة فى نفس واحد....منظر مفاجىء بديع....سبحان الخلاق العظيم...

المنظر كان بيدفعنى انى اسيب السيارة فى أى مكان و انزل بسرعة أشوف الموضوع عن قرب.....باركينج بسرعة يا ولد يا نافيجاتور...و فعلا مشينا شوية بمحاذاة الشلالات...و فى الأخر على اليمين كان فيه باركينج مهول...

كميات المياه المهولة اللى بتصب فى الشلالات كانت عاملة 2 قوس قزح من الشرق للغرب و كمان كانت بتعمل شابورة مياه ..تطلع فوق رؤوس المتفرجين...و بعدين تنزل عليهم رخات ميه ساقعة منعشة.... و المدام كانت مصرة انه مطر...مع ان السماء ما فيهاش و لا سحابة...

واحد من أشهر محلات القهوة...Tim Horton... وهو موجود فى انحاء كندا بكثرة مملة...يعنى بين كل Tim Horton و Tim Horton يوجد محل Tim Horton .... حتشرب يعنى حتشرب...حتى على الHigh Way موجود فى كل الاستراحات و ميزته انه أرخص من Starbucks .... وأعتقد انه مش يهودى.

=============================

ده كان بعض من المعلومات المهمة جدا جدا لاستاذنا الكبير الدكتور الشامي

وان شاء الله ....سوف اكمل السرد بعد إذن الدكتور الشامي طبعا ..... قريبا.... وكذلك تلخيص خبرات باقي الاعضاء الافاضل السابق ذكرهم

وربنا يجعل كل معلومة يستفيد بها اي شخص.... في ميزان حسنات كاتبها

تحياتي

[bermawy]

الف شكر لحضرتك على المجهود الرائع دة وجعله في ميزان حسناتك ان شاء الله وجزاك الله كل خير

[elmadysm]

موضوع رائع جدا

ارجو من الدكتور تهامى تثبيت الموضوع

و ارجو من الاعضاء عدم الدخول لكتابة شكر او تعقيب الا اذا كان اضافة للموضوع الاصلى

و بكده نكون بدانا فى مرحلة اعادة تنظيم المنتدى

وربنا يبارك فيكى يا سمية

[hamoudi]

شاكرين مجهودك وفكرة ممتازة

واذا امكن تجيب ميزانية العيش فى تورنتو والخاصه بالمهندس ياسر لانى دورت عليها مالقتهاش وانا شايف انها مهم جدا

[somayasaleh]

من موضوع وخبرة .......اخونا المشرف الدكتور تهامي

الخطوط البريطانية (British Airways): ودي بئى ركبناها في بداية رحلتنا إلي كندا لأول مرة (من مطار القاهرة لمطار هيثرو في لندن يوم 9 سبتمبر ، وف العودة من لندن للقاهرة يوم 1 أكتوبر).

محترمة مووت ، يكفي إنك بتدخل بنفسك ع الويب سايت بتاعهم ، وتحجز بنفسك الكرسي اللي على مزاجك (بس تحديد الكرسي بيكون قبل ميعاد الطيارة بـــ 24 ساعة ، وتطبع البوردنج پاس من ع الويب سايت بنفسك ، وتحدد كمان الوجبات اللي تحبها)! والأكل بتاعهم والتعامل ، قمة الاحترام!

ويمكن دي الوحيدة – حسب ما شفت – هيه والفرنسية ؛ اللي بيدُّولك غطاء للعين (عشان لو عايز تنام ، والإضاءة حواليك مش مريّحاك ، ساعات بيسموها Sleep Mask أو Eye Shade).ة

ولاّ واحنا داخلين على لندن بأه ؛ إحساس مختلف ، لأ والمناظر م الطيارة دي جو تاني ! بصراحة ، لندن دي كان ليها إحساس تاني خالص!

وداخل المطار وانتا مستني ميعاد طيارتك هتلاقي حواليك كباين تليفون بالعملة أو بالكريديت كارد.؛ نتصل نطمن أهالينا ف مصر إننا وصلنا نص السكة بسلام ؛ وأفوجأ بعدين يا ريس بإن الدقيقة بحوالي 3 أو 4 استرليني! بس آهي تنجز المصلحة.

وانا راجع بأه أول مرة من كندا للندن ، واحنا نازلين على لندن (نازلين بالفعل ، لأن الطيارة بتستقر على ارتفاع 10 كم تقريباً ، وعند الاستعداد للهبوط بتبدأ واحده واحده النزول) ، عرفت همّه ليه سمُّوها مدينة الضباب! طايرين في السحاب من ارتفاع 7كم وحتى 3 كم! والمسافة دي كلها سحاب! ومش محتاج أئوللك إن الطيران خلال السحاب ده قمة المرمطة!

بتلاقي الطيارة عمَّالة تتمخمط بيك زي ما تكون ماشي على مدقّ صحراوي ، ورجرجة وإللت أدب!

ولما نزلنا لندن ، ضباب وشبُّورة يا ريس في عز الضُهر! وفضل الوضع كده بتاع 5 ساعات (مدة الترانزيت) لغايت ما مشينا من المطار واخدين طريقنا لمصر!

والعكس تماماً أشوفة واحنا داخلين القاهرة ، الجو الصحو ، والدنيا الرايقة (عكس ما الناس كانو بيئولولي ؛ إنك هتعرف إنك داخل ع القاهرة مع رؤية السحابة السودة إيّاها)!

خطوط الفرنسية (Air France) ودي على فكرة اتحدت مع الخطوط الملكية الهولندية (KLM).

===============

ودي أخدتها وانا رايح كندا تاني مرة من مطار القاهرة إلى مطار شارل دي جول في پاريس (فبراير 2008). كان الإقلاع من المطار القديم (حسب خطوط الطيران) الساعة 2 صباحاً ، و وصلت فرنسا الساعة 6 صباحاً (5 ساعات – لاحظ فرق التوقيت).

واحب ائول لك إن ده كان أسوأ وقت ممكن توصل المطار فيه - بغض النظر إنك بتوصل بالليل ، وما بتشوفش البلد من فوء ، ودي كان نفسي أشوفها بصراحة ؛ باريس مدينة الفن والجمال (رغم إن هند بتئول عليها عرّة!) - معظم المحلات ف الديوتي فري زوون كانت قافلة! والمطار فاضييييي ، وأُدّامك 5 ساعات ترانزيت على ميعاد طيارة إير كندا

واللي لفت نظري برضه الفطار بتاعهم ، جميل جداً جداً. أول مرة ألائي فطار بالطعامة دي! البيض الأومليت والعيش والزبدة والجبنة ، وسوسيس على ما أذكر ، وفروت سالاد.

بس م الواضح إن الشنط اتبهدلت واتمرمَطِت ف الترانزيت في فرنسا. الموقف ده عقّدني من الإير فرانس بصراحة!

الطيران السويسري (Swiss International Airlines) ،

==============================

ودي اللي أخدتها تاني مرة في عودتي من زيوريخ للقاهرة (9 مارس).

ودي كانت مرحلة ترانزيتية ما بين الجو اللي تحت الصفر في تورونتو ، والجو الحار جاف صيفاً ف القاهرة (درجة الحرارة تسعة وعشرين على ما أذكر)! وكانت الحرارة في زيوريخ 11 درجة مئوية.

المناظر من الجو للمنطقة واحنا داخلين على زيوريخ رهيبة. الجبال كلها أخضر × أخضر (زي كندا ف الصيف – ما تنساش إني سايب كندا أبيض × أبيض ، والشجر ما عليهوش ورأ خالص) ، والقرى اللي ف حضن الجبال وبيوتها المثلثة الكلاسيك دي ، والأنهار اللي ماشية بينهم ، والمناطق الزراعية... مناظر تشرح القلب ، وتحس إنك ضارب أمبولين فاليام

والترانزيت بتاعنا في مطار زيوريخ كان أكتر من ساعة ونُص ، لكن طيَّارة إير كندا إتأخرت ساعة على ما طلعت من تورونتو (من 7:15 م – 8:30 م) ، فبئى الترانزيت نُص ساعة!

الطيارة كانت عادية (أصدي عادية مقارنةً بالخطوط الكندية والبريطانية طبعاً). وكنت طبعاً حاجز الوجبة بتاعتي والكرسي اللي جمب الشباك من ع النت.

طيران الكندي (Air Canada)

=================

، وده أخدته ف المرتين اللي رحت فيهم على كندا (من لندن لتورونتو والعكس مع العودة ، ومن باريس لتورونتو والعودة من تورونتو لزيوريخ).

طياراتهم جميلة بصراحة ، والشاشات ططش سكرين ، وتشكيلة أغاني وأفلام من كل العالم ، وتحت الشاشة فيه فيشة كهربا (110 فولت طبعاً) ، لو عاوز تشحن الموبايل مثلاً أو اللاپتوپ. وتلاحظ كل شوية ، المضيفات يعدوا عليك ، تحب تشرب حاجة ، مخبوزات ، نأنآت خفيفة... بيزغّطوا فيك م الآخر!

وف أول مرة كنت رايح كندا ، لما الطيارة هبطت في مطار پيرسون في تورونتو ، و

طبعاً ، مش محتاج أقول لك إني وانا باعمل تشيك إن ع الويب سايت بتاع إير كندا ، لقيتهم كاتبين إن فيه تأخير ساعة (قبل ميعاد الطيارة بحوالي 5-6 ساعات)! ولما اتصلنا بالمطار عشان نتأكد لقيناها متسجلة ع الخدمة الصوتية ؛ بيطلب منك تدخل رقم الرحلة ع التليفون ، ويرد عليك بتفاصيل الرحلة ، وقال لنا نفس الكلام عن تأخير ميعاد الإقلاع! إشي خيال يا ناس!!

أحكيلك بأه عن الحجز للسفر...

============

في أول مرة رحت لشركة سياحة في وسط البلد في شارع طلعت حرب اسمها Spring Tours ، وحجزنا وَن واي تيكيت لهند وانا راوند تيكيت.

طبعاً عملنا سيرك ، ولفينا على معظم شركات السياحة ف وسط البلد ، عشان نلحق السفر يكون قبل يوم 13 سبتمبر (أول رمضان) وإلا هنصوم 6 ساعات زيادة عن اللي قاعد ف البلد!

والحجز طبعاً عملته قبل السفر بأكتر من شهر ونُص ؛ محدش يضمن الظروف. بالإضافة إنو موسم عودة للناس ، والبركة في البكور. هند اتكلفت خمس تلاف وشوية ، وانا (7.126 جنيه)!

أول ما وصلنا كندا ، سمعنا نصيحة الواد أحمد الديب برضه عشان نتفادى الـــ Jet Lag ، اللي هيه لخبطة البيولوچيك كلوك ، نتيجة فرق التوقيت بين مصر وكندا ، ورغم إننا نمنا متأخر (تبعاً لنصيحة ديبو) ؛ برضه فضلنا متلخبطين لمدة 3 تيَّام! نمنا بدري ، نمنا متأخر ، بنصحى واحدة اتنين بالليل! ماهو الوقت كده 8 – 9 ص في مصر! وبعد التلات تيام ، بدأ الإيقاع اليومي (السيركاديان ريثم) بتاعنا ينسجم مع الإيقاع الكندي!

تاني مرة ؛ كنت مظبّط كل حاجة من بدري بنفسي ومع نفسي ، وانا موجود ف البريمة ف وسط الميَّه! موقع إكسپيديا الأستاذ بتاع مايكروسوفت.

========

وطبعاً أعدت أعمل مقارنات بين الموقع الأساسي (الأمريكي) والموقع الكندي. وكما توقعت ؛ هتلاقي نفس الرحلة على إكسپيديا الكندي أغلى م الأمريكي! يبئى طز ف الكندي! هوه انا هندي يا عم الحاج؟ إنتماء آه ، بس مش عبط هيه!

وف النهاية حجزت التذكرة بتاعتي راوند تريب ، وكلفتني بالظبط ($ 843.50) ،

اتحسبوا عليا ف الكريديت (4.689 جنيه)! والمُلاحَظ ، إن الأسعار بتختلف من يوم للتاني ،

ومن خطوط طيران للتانية.

وطبعاً حجزتها قبلها بشهر (حجزتها 7 يناير ، والسفر كان 10 فبراير).

وكنت ناوي أحجز السفر يوم 9 فبراير ، أقل سعر كان 925 دولار ،

فيه فرء بتاع 50 دولار بين الموقع الأمريكي والكندي! بالإضافة إن البنك (كريدي أجريكول اللي مطلّع الفيزا بتاعتي منه) كان هيحسبلي سعر الدولار الكندي أعلى بكتير من الأمريكي

وطبعاً كالمعتاد بتحدد نوع الوجبة اللي انتا عاوزها (إخترتها أنا طبعاً Halal أو Muslim meal) ،

واحب أئول لك إن الخطوط الوحيدة اللي لقيتها بتصيع عليا هيه إير كندا!

البهوات عملوهالي فيچيتيريان (نباتي) ؛ إنتا مش خايف م اللحمة وم الفراخ ؛ ومش عاوز تاخد حاجة مخالفة للشريعة؟ طب اتفضل بأه وجبة نباتي حلال مِيّة × المِيّة! إعترض بأه!

أولت يا ريتني خدتها أسماك! ع الأئل الأكل كان هيبئاله طعم!

اللذيذ ، إن الناس اللي بيطلبو وجبة مخصوص (زي حالاتي) ، بتلائي المضيفة جايّالي بوجبتي (الاسبيشيال) قبل ما تبدأ توزيع الوجبات ع الركاب!

و وجبتي مطبوع عليها إسمي ورقم الكرسي ونوع الوجبة. دي ميزة إنك تحجز وجبتك أونلاين

الخلاصة إنو من الآن فصاعداً ، هيه الإكسپيدي

ا ، وانسى شركات السياحة تماماً!

بتدخل وتنئّي وتألّب ف البضاعة وتختار اللي على مزاجك

، وأرخص ، ومرتاح ع الكرسي بتاعك ،

وبتطبع الـــ Itinerary بتاعك ،...... والـــ Boarding Pass .....بعد ما بتنئي الكرسي اللي يعجبك .....، والأكلة اللي تعجبك....... هتعوز إيه تاني؟ خِلصِت بأه!

التذكرة أم 843.5 دولار كانت على الإير فرانس (طبعاً الترانزيت في باريس)

، وناخد إير كندا من باريس لتورونتو.

وف العودة ، إير كندا من تورونتو لزيوريخ

، وسويس إير من زيوريخ للقاهرة!

وزي ما قلتلك... اليوم اللي قبله كانت بحوالي 925 دولار!........ بناقص يوم!

وعلى خطوط أليتاليا كانت أغلى في نفس اليوم! كانت بحوالي 950 دولار!

مانا قلت ، مش كل الخطوط ، ومش كل الأيام ، ولا كل المواسم!

نيجي للمهم ... دخولنا على كندا:

===============

أولاً واحنا داخلين مطار پيرسون في تورونتو

وتقعد انتا ع السير المتحرك ده زمن عشان توصل لمنطئة الجوازات ، بس إيه بأه ، أُمم! طوابير (اللي راجع من أجازة الصيف ، واللي راجع عشان الدراسة هتبدأ ، واللي جاي مهاجر زي حالاتنا ، وغيره) ، وعندك يمكن خمستاشر شباك ، والغريب إن كل واحد ما بياخدش دقيقة ع الشباك ، عشان كده ما طوّلناش!

. وانتا ف الطيارة ، وقبل ما بتوصل تورونتو المحطة ، بيوزعو علي الركاب ورقة كده عشان بيانات الجمارك ، بتكتب فيها بقالك أد إيه بره كندا ( كل ما زادت مدة غيابك عن البلد ، كل ما زادت الكمية المسموحالك تشيلها معاك من السجاير والخمور والهدايا) ، وإن كان معاك ف الشنط بتاعتك ، حاجات م اللي محتاجة شوية بريكوشنز (نباتات ، منتجات ألبان ، مجوهرات ، فلوس كاش ، ... إلخ). أول مرة قلنا إن معاناش حاجة من دي خالص.

بعد كده دخلنا على قسم الهجرة ف المطار ، برضه طابور طويل ، بس الحركة فيه مش بسرعة طابور الجوازات.

بنت في الجوازات .....فضلت معانا لما خلَّصِت لنا ورأنا وهيه اللي جت صوَّرِتْنا ديچيتال ، ، وبعدين الجملة المتوقعة (ويلكَم تو يور نيو كَنتري)!

بعد كده عدينا على واحدة....، وبعدين إدتنا الأوراق اللي هنتقدم بيها للحصول على رقم الضمان الاجتماعي (Social Insurance Number, or SIN number) ، ولستة بعناوين وأرقام الجهات الحكومية اللي ممكن نحتاجها فيما بعد.

نزلنا بعد كده، نستلم الشنط بتاعتنا (4 شنط زي الهم ع الألب ، وشنطتين هاند باج) ،

وبعدين عدينا ع الجمارك... طبعاً كالمعتاد ؛

ولا شنطة م الـــ 4 اتفتحت ولا جه في بالها حتى تسألنا إنتو جايبين معاكو إيه!

الغريب إن الراجل اللي ع الكاونتر اللي جمبنا طلعت عين أهله ؛ 4 ظباط جمارك اتسلو عليه يا ريس ، وفتحو شنطته وفلّوها حتة حتة

اللي ممنوع من منتجات الألبان؟ ...أي حاجة بيطلع منها سوائل! يعني ( بتـــ Oozes)! المفروض تكون جافة أو معلبة.

اللحوم ومنتجاتها طبعاً ممنوع!

البذور ممنوع!

تاني مرة رحت فيها على كندا...

============

لقيت - طبعاً كله ع الإكسبيديا -..... إن إير فرانس اليوم ده بـــ (845 دولار) ،..... وكانت تذكرة أليتاليا فوق الألف دولار!

وف تاني مرة دي ... كتبت ف الكارت إياه اللي بنستلمه ع الطيارة إن معايا منتجات ألبان.

ولما سألني الراجل بتاع الجوازات ف المطار إيه منتجات الألبان اللي معاك؟ .......أولتله 4 كيلو جبنة رومي (Romano cheese)! ذاتس ات؟ ييس ذاتس اول! وشكراً!

بسطرمة ولب أسمر! طبعاً منتجات اللحوم إنسى! وكمان بسطرمة ... إنسى خالص!

دا الكلب ف المطار هيجيبها وهوه نايم! واللب قلت هاقعد أشرح لهم إنو تسالي ، ومش بذور نباتات يا جماعة ، و وجع قلب! إشتريت دماغي بصراحة.

حاجة افتكرتها استغربت منها وضايقتني بصراحة! المطار الوحيد اللي شفته بيعملها ، أو البلد الوحيدة اللي بتعملها ، كندا...

وانتا ف المطار ، بتحتاج تروللي تحط عليه شنطك عشان تطلع بيها بره المطار. في الدنيا كلها (حسب ما شفت وما سمعت) ، دي من ضمن الخدمات المجانية المقدمة في المطار

. هناك في تورونتو ، هتلاقي الترولليهات محطوطين في طابوووور طويل ، وعشان تطلّع لك واحد من أول الصف ؛ لازم تحط 2 دولار ف الماكينة عشان تسحب لك تروللي

، أو تستعمل الكريديت كارد! حتة سافلة بصراحة ، ومالهاش لزوم!

ورحت استلمت الشنط ، وطالع ع البوابة اللي بادخُل بعدها شمال على منطقة الجمارك ،

وريت الراجل الأوراق اللي معايا ..... ، ألائي الراجل يقوللي (استريت آهيد) ، أعدّيها؟ طبعاً لأ! أسأله (مش المفروض أعدي ع الجمارك الأول؟)

، يرد (استريت آهيد سير) ، أسأل تاني (نو كاستَمز نيديد؟)! يرد (سير ... يو كان جو آوت!)

كان آخري وزن الشنطة 23 كجم (الأوفر إياه بتاع 32 كجم ده كان انتهى ، ولو دخلت ف الشريحة اللي بعدها – 23 إلى 32 كجم ، هتدفع 50 يورو!).

وزن الشنطة الفاضية أصلاً كان حوالي 6 كجم

اللذيذ إني ما نشفتش أوي أول ما خرجت من المطار ، مع إني خارج بقميص خفيف ، وبالعكس خالص ؛ عجبتني لسعة البرد دي.

المهم ، على ما حوّلنا الشنط جوّه العربية ، كان ابتدا الشغل ! بدأت أحس بوجع ، وبدأ يزيد بجد في أطراف صوابعي ... Pain بجد! لدرجة ... شوية كمان ، وما كنتش هاقدر أحركهم! وما صدقت ركبت العربية ؛ شغل التدفئة ، بدأت أحس بصوابعي تاني! بس سيبك انتا ... كنت مستمتع موووووت!

بالنسبة لمبدأ حجز البيت اللي هنؤعد فيه في تورونتو

========================

حتة موقع زُبَد... Craig's List ... وده يا أستاذنا موقع له شعبية كبيرة جداً سواء في أمريكا أو في كندا

، أو ف العالم كله (مصر موجودة برضه). وفيه عليه لينكات لكل حاجة! وبيع وشرا لكل حاجة تتخيلها!

طبعاً اللي كان يهمنا الـــ Rooms مش الشقق الكاملة.

وطبعاً بالاستعانة بجوجل إيرث ؛ تقدر تعرف فين أماكن الشقق والبيوت اللي موجودة ف الإعلان ؛ وتفاضل ما بينها.

وكان تركيزي في البحث عن القرب من الداون تاون ؛

بالقرب من جامعة تورونتو.

وكنت مرة هاموت أنا وهند على شقة في فيكتوريان هاوس ، والشهر كله بـــ 700 دولار. وصور الشقة ومكانها مالهاش حل

! ألاقي البيه يقوللي سيبك منها! يا احمد المكان كويس ، وقريب من وسط البلد ، وسعره حلو! سيبك منها ، المنطقة مش أد كده ، ومش هترتاح ف البيت وما تتخدعش بالصور! هاقول إيه؟ حاضر يا احمد بيه!

وفضلنا كده ، لغاية ما غيرنا تفكيرنا للجست هاوسز (Guest Houses) ، واخترنا واحد ، وإيه رأيك يا احمد افندي ... راح مشوار وتفحص المكان ، ودخل الشقة واتفرج على نظامها من جوه مع صاحبتها ، ورد علينا ... مش بطال! ياااااه ... أخيراً!

ا فكرنا برضه في الأماكن أو البيوت اللي بتقدم خدمة المبيت والإفطار.

هيه بصراحة كانت فكرة دمها خفيف ؛

بس أسعارها هيه اللي مش خفيفة خالص! ممكن تاخد فكرة عنها برضه...

مش هتخسّر! والموقع ده بيديلك معلومات عن الجست هاوسز والبد آند بريكفاست كمان في تورونتو.

والقاعدة عموماً ... كل ما تبعد عن الداون تاون ؛ الأسعار بتقل. وكل ما بتحجز مدة أطول ؛ الريت بيقل. وما تقلقش ... المواصلات العامة هناك رائعة.

الجست هاوس ده يا سيدي زي البنسيون ، .

الرومز بقى -- دي بتاخد انتا أوضة في شقة. مثلاً ، طالبة مغتربة مأجرة شقة أوضتين ، وبتدفع لها 1000 دولار ف الشهر

، والميزانية مخرّمة معاها. تنزل إعلان إنها طالبة حد ياخد الأوضة التانية ، والنص بالنص ف المصاريف.

وتشيل هيه (صاحبة الشقة) الميّه والكهربا (بيسموها الهايدرو) والنت والتليفون مثلاً.

وفيه منهم اللي بيشترط (بنات فقط) ، وفيه اللي بتدور على واحدة عشرية تكون ليها أخت وصديقة ، يروحو السينما ويتفسحوا مع بعض مثلاً ، وفيه اللي طالبة الخصوصية.

يمكن الجيست هاوس يعتبر أرحم شوية من النقطة دي ، آهو حاجة زي الفندق.

المفروض إن الحجوزات دي كلها فترة مؤقتة (بحد أقصى شهر)

على ما ترستق أوضاعك هناك ، وتنقل على شقتك اللي هتستقر فيها. والمفروض برضه ، إن في الفترة دي هتكون انتا ومراتك دايماً بتلفوا مع بعض تنجزوا ف المشاوير دي! أو على الأقل ، ده اللي حصل معايا.

ولو انتا في المطبخ بتحضر أكلك ، محدش هيدخل المطبخ أصلاً لغاية ما تخلّص.

ولو باب الحمام مقفول ، محدش هيروح ويخبّط عليه أصلاً

! ومحدش بيحاول يفتح حوارات معاك أكتر من ابتسامة وصباح الخير صباح النور ، وكل واحد على أوضته! إحنا اللي كنا بنفتّح الحوارات!

ونفترض مثلاً إن مراتك قاعدة ف البيت لوحدها ، ومعاها ف البيت ده ذئب بشري (من بتوع كندا) ، لو قالتله لأ يا ديب ما تاكلنيش ؛ ........هيقول لها حاضر مش واكلك! بكل بساطة!

ولو اشتكت إنه تحرش بيها ، ولو حتى بكلمة ليها معنيين ، ضيّع نفسه! وهيه مُصدّقة ، ومش محتاجة إثبات! يثبت هوه بقى إنه ما حصلش! قل لي هيثبتها ازاي دي!

خلّي بالك من حاجة ... اللي بيغلط غلطة في كندا بيضيع ، وبتتسجّل على سمعته (الكريديت كولليكشن) ، وكله موجود في الهاند أوفرز ، ما تستعجلش على رزقك.

خلاصة الكلام ، آخر حاجة ممكن تفكر فيها هيه إنك تخاف على مراتك من تعدي حد عليها ، أو حتى إنه يتمحك فيها!

.. البيت اللي كنا حاجزينه يا ريس إسمه Elma Guest house Hostel ،

، فيه 4 أُوَض ، إحنا حجزنا أوضة لمدة شهر بـــ 550 دولار كندي.

طبعاً هند ظبطت الحجز والاتفاقات مع إيمي (صاحبة الشقة) بالنت وبالتليفون ، وطبعاً أحمد هوه اللي راح دفع لنا 100 دولار ديپوزيت ، ودفعنا الباقي لما وصلنا.

وإيمي على فكرة (صاحبة الشقة) ممكن تيجي تستقبلك من المطار بعربيتها ، وتكلفة المشوار ده 40 دولار.

بس بالنسبالنا ليه تدفع أكتر ، لما ممكن ما تدفعش خالص؟!

إيمي أول ما وصلنا طلبت تبص بصة ع الباسبورتات بتاعتنا (مش أكتر من البصة!) ، وطلبت باقي الفلوس (كان أحمد راح دفع لها 100 دولار عربون بس ، وكنا حاجزينها شهر كامل بـــ 550 دولار).

الشقة دي يا سيدي موجودة في منطقة اسمها سكاربرو (Scarborough)

ودي موجودة في شرق تورونتو ، وعشان توصل منها لمنطقة وسط البلد ، يا دوب هتعدي الشارع ، تاخد أتوبيس 190 أو 85 اللي هيوصلك لمحطة دون ميلز (Don Mills Subway Station) ، وتاخد منها المترو يا ريّس غرباً لمحطة شيپَرد (Sheppard) وتبدل تاخد الخط التاني جنوباً زي مانتا عاوز بأه.

ده أساساً (الخط التاني ، أو خط المترو القديم ، زي المرج – حلوان بتاعنا) ماشي تحت شارع يَانج (Yonge street) ،أطول شارع ف العالم

(بيتنطق زي ما بتنطق كلمة young بمعنى شاب)، واللي قاسم تورونتو نُصّين شرق وغرب ، ومعظم المناطق المهمة هتلائيها بتتمحور حواليه. وممكن تتفرج على خريطة مترو تورونتو وتمتع عينيك ، وعلى فكرة ، شقتنا الجديدة تحت حرف الـــ N بتاع تورونتو مُباشَرتَن! نتكلم عليها كمان شوية.

وكنت مش مستريّح بصراحة لموضوع الأكل اللي كله في تلاجة مشتركة دي! لكن سبحان الله... محدش بيلمس حاجة مش بتاعته ؛ وكل واحد حاطط حاجتة في ناحية وعارفها! ومن منطلق إننا شعب مصري – من بلد الخير والعز – كنا محتلّين نص التلاجة على تلات تربع الفريزر!

وبرضه طبعاً ما تقدرش تتفسح بره أوضتك على مزاجك سيادتك! كنت لازم ألبس اليونيفورم كامل قبل ما اعتب باب الأوضة! وهند ماسكاني تريقة... بقى سيادتك مكسوف؟ ما تروح تشوف البت الأوكرانية اللي مقضياها اليوم كله بالشورت!

بس تيجي بأه للحاجات اللي تخنؤ ف الشقة دي ؛

لما تلاقي إنكو بتتخانئو على حمام واحد ، لدرجِت إني عودت الـ ... متجيش غير فترة الضُهرية أو العصرية لما مبيكونش فيه حد ف البيت ،

عشان آخد راحتي! دانا أساساً باحب آخد راحتي أوي ف الحمام ، وأحلى مكان نقرا فيه الجرايد ، فما بالك بأه بحمامات كندا؟ مش عشان حلوة ؛ لأ عشان مؤرِفة!

العالم دول ما بيعترفوش بحاجة اسمها شطاف! لو عاوز تركّب شطاف ممكن تعمل أوردر بواحد ، هيكلفك 100 دولار وتركيبه هيكلفك 50 دولار!

ماهو مش شطاف وماسورة وخلاص؟ ده بيديه ؛ يعني جهاز بيتركّب يا ريس ، وفيه الميَّه بتطلع بـــ 3 سرعات وزرار يظبط درجة حرارة الميَّه وزرار للتنظيف الذاتي للشطاف نفسه! وممكن تاخدلك فكرة م الويب سايت بتاعه أو بتاع الراجل اللي بيبيعه في تورونتو.

وعلى فكرة ، يُستحسن إنك ما تجيبش سيرة للــ لاند لورد (صاحب الشقة أو العمارة) أو الأپارتمنت مانيدچر إنك هتركّبه ، الناس دي ما بتحبش إنك تلعب ف السباكة ،

عشان ممكن يحصل ليكيدچ والميَّه تسأَّط على جارك اللي تحت ، وتبئى مشكلة! يعني م الآخر تخليها ف السكرتة! وطبعاً ،

على فكرة ، اتكلف 210 دولار (جاب معاه ماسورة ليّ مرنة ، ومحبسين ركِّبهم ؛ احتياطي لو حصلت منه مشكلة تقدر تفصل المياه عنه لوحده ، بدل ما تفصل المياه عن الشقة كلها) ، وهند لسه مركباه من كام يوم

(10/1/2008) على الرغم من إننا واصلين كندا 9/9/2007! كسل يا سيدي

.. رُحنا على سكاربرو تاون سنتر عشان نطلّع السِن نَمبر (SIN)

...... بتُؤف في طابور عشان تقدم ورأك ، وبعد كده بتؤعُد زي الباشا تستنى دورك .....، وحواليك مكتبة فيها تشكيلة كتب على مجلات تسلي نفسك الكام دئيئة اللي آعدهم!....

بعد شوية بيجيلك الموظف اللي هيتعامل معاك ويخلّص معاك الإجراءات.

خدت منى الپاسپور وفحص تحت لمبة بنفسجي (تتأكد إن الفيزا مش مضروبة)

، وملينا أپليكيشن مع بعض ،

وبتكتب فيها العنوان اللي تحب يبعتولك الكارت عليه.

وادتني ورقة رسمي (ممكن التعامل بيها) فيها السِن نمبر بتاعي على ما يتعمل كارت السن نمبر

، ويتبعتلي بالبوسطة بعد أسبوع. وفعلاً بعد 5 تيام ، وصلنا الكارتين على عنوان احمد الديب.

الرقم ده يا سيدي بيوصل لكل حاجة عنك. بيُطلَب منك وانتا بتعمل أي حاجة رسمية هناك

؛ زي مثلاً وانتا بتقدم على شغل ،

وانتا طالب شركة التليفونات (روچرز مثلاً) تدخل لك النت ف البيت

، وانتا بتمضي عقد إيجار الشقة بيطلبوه منك. وبواسطته بيعرفوا كل حاجة عنك (بيسألوا على سُمعتك )...

فيه حاجة هناك اسمها الكريديت بيرو Credit Bureau ،

ودي مؤسسة حكومية بتحتفظ بفايل عن كل مواطن أومقيم ف البلد آخر سبع سنين. ي

عني لو عملت مشكلة ؛ هتفضل لازءة ف أفاك السبع سنين الجايين! مثال... لو جيت عملت مشكلة ، ما دفعتش إيجار آخر شهرين مثلاً ، ومشيت ، ورحت ولاية تانية ، ورحت تسكن في شقة هناك. الراجل قبل ما يأجّر لك هياخد رقم السن بتاعك .......، ويتصل بالكريديت بيرو ،.... ويستعلم عنك. هيردوا عليه إنك نصاب وأونطجي ، وزوّغت من المالك القديم من غير ما تدفع آخر شهرين. ساعتها هيرفض إنه يأجّر لك. وكذلك الحال في أي تعامل مالي (سداد كريديت كارد ، دفع فاتورة كهربا أو تليفون أو غيره!)

مش متأكد هل هيه بتسجل عليك لو عملت خناقة في الشارع مثلاً أو تحرشت بواحدة زميلتك في الشغل ، ولا هيه خاصّة بالتعاملات المالية بس!

الخلاصة إن اللي بيغلط غلطة بيشوف الذل بعدها

؛ ما هو لا هيلاقي حد يسكّنه ولا يوصّل له خط تليفون ، ولا كهربا ولا غاز ، ولا هيلاقي شغل محترم! هيتمرمط! وعشان كده ، تلاقي الناس كلها ماشية هناك جمب الحيطة! كل واحد بيخاف على نفسه ؛

لسن نامبر كان في التاون سنتر

===============

، وده بيكون مجمّع حكومي بيقدم خدمات الجنسية والإقامة وغيرها.

والبي آر ، كان في المطار حضرتك.

ولو جيت تجدده (لو ضاع منك مثلاً ، أو جيت تجدده بعد مرور 5 سنوات بدون حصولك ع الجنسية)

فبتبعت جواب إلي سيرفيس أونتاريو ، .....وهمه بيردو عليك بالأبليكيشن ، تملاها ، وتبعتهالهم بجواب ، ومعاه شيك مقبول الدفع Certified Check ، أو Money Order بمبلغ 50 دولار.

وهمه بيبعتولك البي آر الجديد بالبوسطة على بيتك.

Service Ontario دي هيه المكان اللي بتقدم فيه على رخصة القيادة وكارت التأمين الصحي وكذلك تجديد البي آر زي ما قلتلك.

#143

Advanced Member

المجموعة: مشرف باب

المشاركات: 1186

التسجيل: 17-April 08

البلد: Mansoura, Al-Khobar, Toronto

رقم العضوية: 22029

، طلعنا على بنك TD CanadaTrust ؛

=====================

عشان نفتح لنا حساب هناك.

والحساب اتعمل (حساب مشترك) واحنا قاعدين مع مندوبة خدمة العملاء ،

واستلمنا كارتين الصراف الآلي ، واحنا قاعدين.

والحساب اشتغل (فيه حساب توفير وحساب شيكات) ، واحنا قاعدين.

وطلبنا نعمل 2 كريديت كارد ، دي بقى مش واحنا قاعدين!........ دي عملناها متأخر شوية ؛ بعد ما الفلوس وصلت من مصر!

ولما رحنا نعملها ، قدمت لنا طلب ، ومن منطلق إننا جداد ع البلد ومالناش كريديت (سمعة) فيها ؛

فكان لازم نشتري شهادتين استثمار (مدتها 3 سنين) ونجمدها ، وبضمان الشهادة طلعنا كارتين فيزا. اتبعتولنا ع البيت بعد 3-4 تيام.

سألناهم لو ممكن يسحبولنا الشيك الدولي من CIBC للحساب بتاعنا ، قالو مفيش مشكلة ، بس هياخد بتاع 3-4 تيام علي ما نبعت لهم ويردوا علينا. قلنالهم طيب شكراً مش عاوزين. رحنا عدينا الشارع فرع لبنك CIBC ، عشان نفتح حساب ، ونصرف عليه الشيك بتاعنا اللي صادر من البنك الأهلي المصري. قالولنا روحوا الفرع الرئيسي في داون تاون.

ورحنا ، وطلبنا الشيك يتصرف ، ويتم تحويله على حسابنا في تي دي. الراجل هناك قعد يلت ويعجن معانا ، ويجيلنا يمين شمال يقنع فينا إننا نفتح حساب عندهم. اتكسفنا منه بصراحة ... ماشي يا عم ، نفتح حساب. ومن منطلق إني باحب تي دي أكتر (ما تعرفش منين ، بس ارتياح نفسي وخلاص ، وفيما بعد لقينا إنه بيقدم خدمة أكتر للعملا بتوعه – بيفتح مثلاً من 8 ص حتى 8 م! وناوي يزودها كمان!) ، سِبت هند تفتح حساب لنفسها فيه ، ويتم إيداع قيمة الشيك فيه.

بس فعلاً كان موضوع زبالة... الشيك فيها 15 يوم عمل (يعني 3 أسابيع) على ما نخاطب مصر ، ويردوا علينا! هيه دايماً كده... أي حاجة فيها مصر ، لازم تعد أيام ع الفاضي! مسكت هند طبعاً زلّيتها ؛ لأني قلتلها ناخدهم كاش معانا م الأول ، وهيه عملتلي ناصحة! وممكن الفلوس تتسرق ، وممكن تحصل لنا مشاكل! فيلم هابط! وكل ما نتزنق ف الفلوس أو نتصل باحمد (إلحقنا يا احمد) أقول لها (مش لو كنا أخدنا الفلوس معانا ؛ كان زماننا متدلّعين ، ومش عارفين نعمل بالفلوس إيه؟!)

والنتيجة ، قعدنا نصرف من الألف دولار الكاش اللي معانا (اللي راح تلات ترباعهم في أول يومين لينا ف كندا) ،

وبعد كده نقلت على الماستر كارد بتاع HSBC بتاعي في مصر

، وبعد كده ......تلات تلاف دولار (ألف دولار للاپتوپ ، والشهرين المقدم بتوع الشقة اللي استقرينا فيها بعدين (first & last month))، لغاية الفلوس ما وصلت!

رحنا سحبنا 8 تلاف دولار خبطة واحدة ،، وظبّطنا أمورنا! يعني تقدر تقول باختصار كده صرفنا في الـــ 3 أسابيع الأولى لينا ف البلد حوالي 10 تلاف دولار!!!

والكريديت ليك ف البلد دي (بالنسبة للبنوك) ؛ يعتمد بالدرجة الكبرى على كروت الائتمان ، ومدى التزامك بدفع فواتيرك في مواعيدها. ورصيدك الائتماني (سمعتك يعني) بتبنيها بطول مدة التزامك في سداد فواتيرك في موعدها. ويزيد أكتر بامتلاكك لعقار مثلاً.

ومع ازدياد الكريديت بتاعك تقدر تاخد مورجيدچ (Mortgage loan) ،

ودي تقدر تقول كده حاجة زي التمويل العقاري.

البنك بيديلك مبلغ تسدده على 15-20 سنة مثلاً ، وتقدر تشتري بيه بيت (أو شقة). وممكن بعد سنة ولا اتنين سعر البيت يزيد ، تقوم تبيعه ،

وتسدد باقي المبلغ للبنك ، وفرق السعر تضربه في جيبك! وتاخد مورجيدچ تاني (كده من حقك تطلب مبلغ أكبر بكتير من المرة اللي قبلها) ،

وبكده تقدر تجيب رأس المال لأي مشروع تحب تعمله... أولاً ، بناء كريديت!

نيجي لتدويرنا عن الشقة ...

==============

كنا بنعتمد في البداية على الإعلانات في الجرايد (من أبو بلاش)

، أو شركات السماسرة (خصوصاً إن ف العمارة اللي جمبنا – أيام إيلما جِست هاوس – كان فيه شركة من دول).

لكن بعد كام يوم ؛ لقينا إن أحسن حاجة إنك تروح المنطقة اللي تحب تسكن فيها ، وتدخل على أي العمارة ، وتتصل بالإنتركَم اللي تحت بالسوبر انتندنت (مندوبة الشركة اللي ماسكة إدارة العمارة) ، وتسألها على شقق فاضية.

وبصفة عامة ؛ العمارة اللي فيها شقق فاضية بتلاقيهم حاطّين إعلان أمام المبنى ،

برضه تدخل ع السوبر انتندنت وتستفسر منها ؛ وتاخدك تفرجك ع الشقة ، وتعرف منها كل التفاصيل. ولو قررت خلاص إنك عاوز الشقة ؛ بتديلك أپليكيشن تملاها ببياناتك ، وطبعاً السِن نَمبر ، وهمه بعد كام يوم هيردوا عليك ، ولو أوكيه ؛ تروح تمضي عقد الشقة ، وتدفع شهرين من الإيجار (الشهر الأول – مقدماً يعني – والشهر الأخير – بمعنى آخر شهر ليك ف الشقة أبل ما تسيبها مش هتدفعه).

ومفيش طبعاً قصة شهر ولا شهرين التأمين السافلة اللي بنعملها ف مصر! مانتا اللي هتبوّظُه هتصلحه قبل ما تمشي! مفيش حاجة اسمها تخلع وتدبّسُه في الإصلاحات (ما تنساش الكريديت بيرو)!

البداية كانت ف العمارة اللي جمبنا في سكاربرو. دخلنالهم ؛ وإدونا عنوان شقة في الداون تاون (وسط البلد يعني) ، وكانت في كينج ويست (حتة قريبة جداً م الـــ Harbour-front ؛ قريبة من شاطئ البحيرة يعني). رحنالها ، وقابلنا السوبرانتندنت ؛ ست عجوووووووووزة موووووووت ، وتشوف الدلع اللي مدلعاه لنفسها ، وحاطّالي روچ ومانيكير وباديكير أحمر! الله يرحمك يا تيته! وشفنا الشقة ، كانت مش بطالة ، ومفروشة موكيت ، ولسه مدهونة. وكان إيجارها في حدود الــ 900 دولار. ما كناش عاوزين نعدي الألف دولار في الشهر. المهم أخدنا من الست أپليكيشن ، وقلنالها هنملاها ونجيبهالك.

وعدينا على عمارة تانية ف المنطقة دي برضه (كينج ستريت ويست). واحنا رايحين لها ؛ شفنا ناس فارشين ملاية ولا بطانية ع الأرض ، وبيبيعوا حاجات قديمة من عندهم (عجلة بايظة – أطباق قديمة – أجهزة مستعملة قديمة) ؛ حاجات تحس إنك ممكن تشيلها كلها على بعض بـــ 10 دولار ولا حاجة! قلت حلاوة... البيت باين من عنوانه!

شوية كمان لمحت سوبر ماركت (Hasty Market) وده كنت باسمع عنه من زمان ؛ البت كارولين كانت ماسكة فرعين منه في هاميلتون (هاحكيلك عليها بعدين). قلت لازم أصوره ؛ دا حاجة من ريحة الحبايب. ألاقي قاعد جمبه واحد ما تعرفش شحات ولا هوملِيس (Homeless)! بس الملاحظ إنه كان عنده لطف شوية ؛ وعمال يكلّم نفسه! طبعاً طلّعته من كادر الصورة! ولمحت كذا واحد زيه كده قاعدين ف الشارع في المنطقة! شحاتين وروبابيكيا؟ ربنا يستر ع اللي جاي!

رحنا ع العمارة التانية دي (كنا جبنا عنوانها وتليفونها من جورنال من أبو بلاش دول ). الناس اللي مقابلينّا ف الشارع شكلهم مش اللي هوه بصراحة! طبعاً كلنا ولاد تسعة ، ما قلتش حاجة! بس فيه ناس تشوفهم تحس إنهم ولاد ناس ، وناس تانية تقلّق من مناظرهم! قلت عادي يابو سعد... ما تاخدش بالمناظر... يعني انتا اللي شكلك ابن باشا؟!

ندخل العمارة ، نيجي نستدعي الأسانسير ، الزرار ما بيشتغلش! وناس كانوا ف الطرقة آلولنا إنه عطلان ؛ خدوا التاني. واحنا واقفين نستنى التاني على ما ييجي ؛ نلمح ورقة ملزوقة بتحذر من إن تكرار اللعب في الزرار بتاع إنذار الحريق هيؤدي للعقوبات الجنائية وكده! وجمبها ورقة بتطلب من الناس اللي يرمي الزبالة يحطها في داخل صندوق النفايات ؛ مش جمبه ع الأرض! أنا وهند بصينا لبعض ، وبصراحة كنا اتقفلنا من العمارة والمنطئة كلها ، وكنا على شعرة! إيه يا عم مستوى الناس اللي ساكنين هنا دول؟!

واحنا واقفين لسه مستنيين الأسانسير ... بووووووووم! أبص جمبي ف الطرقة ... الوش الزجاج اللي بيغطي لمبتين نيون ف السقف وقع ع الأرض واتدغدغ ميت حتة! ماهي ناقصة رعب أصلها! ساعتها بأه قلت لهند بالحرف (That's it!)... واخدتها وخرجنا م العمارة ، ومن المنطقة كلها!

رحنا بعد كده على الناحية التانية (الـــ East) ، وافكرك تاني ؛ البلد مقسومة إيست و ويست بـــ يانج ستريت.

- في شيربورن ستريت ، و إيتون سنتر على آخر الشارع.:........الشارع ده شارع البروستيتيوتس!

. إيه رأيك في شارع چارفيس؟ ........."ده شارع الجايز Gays"!

ودي كانت منطقة يانج آند إجلنتون.

فيما بعد بقى بدأنا نكتشف إن منطقة يانج آند إجلنتون دي من أحلى الأماكن في تورونتو... تعتبر ف الميد تاون (ربع ساعة بالصابواي وتكون ف الداون تاون). بخلاف إن المنطقة نفسها هادية ، وراقية

، وفيها - تقريباً - كل حاجة ممكن تحتاجها. حتى هند لما كانت ف الشغل ويسألوها زمايلها ساكنة فين ، وتقول لهم يانج آند إجلنتون ؛ تسمع الـــ واااااو ... دي حتة تحفة! يا بختك! وهيه نفسها – هند – يوم بعد يوم ؛ ومع اللف في كافة نواحي تورونتو ، بيتأكد لها إننا أحسنّا الاختيار.

نفس الموضوع بالنسبة للسكن في أي مكان...... فيه عندك مثلاً المنطقة المحيطة بجامعة تورونتو (University of Toronto, U of T) ،

اللي هيه في سپاداينا (China Town) أو الحي الصيني. ممكن هناك تشتري حاجات كتير وهدايا ومستلزمات الكمبيوتر ؛ وأسعارها رخيصة جداً.

لكن ما يتسكنش فيها. فيها تجارة المخدرات ، والهومليس. والنصيحة دي أحمد اللي قالهالي.

وعندك كمان چين آند فِينش (Jane and Finch West) حتة هادية وكل حاجة...

بس أوعى تفكّر فيها! هند اللي قالتلي ع المعلومة دي. كانت رايحة هناك عشان كانت شركتها عاملة بانكويت (وليمة – حفلة غدا) هناك. بتحكيلي عن الأشكال اللي نازلة معاها م الأتوبيس هناك

، والناس اللي ساكنة هناك... تجمع غير طبيعي من السود! حست إنها توريست وهيه هناك! جوّ لبش!

بتقوللي فيه سود تحس إنهم ولاد ناس ومحترمين ، وفيه سود تحس بالإجرام على وشُّهم! وعرفِت بعدها إن المنطقة دي من أخطر الأماكن في تورونتو ، وإن البوليس كل فترة بيعمل زي حملة تفتيش هناك ع الأسلحة!

وفيه واحد مصري كندي مع هند ف الشغل حالياً. الراجل ده بيحكيلها إن واحد صاحبه كان سكن في المنطقة بتاعت چارفيس وشيربورن وتشيرش

(الـــ 3 شوارع متوازيين ، وموازيين ليانج ستريت شرقاً ف الداون تاون)

. وكان رايح يعدي عليه ، وتاه شوية ف العنوان. لقى أوفيسَر (بوليس) جاي يسأله انتا رايح فين ، وبتعمل إيه هنا؟! رد عليه ، وقال له : جاي أزور واحد صاحبي ساكن هنا بس تايه ف العنوان.

آل له أوكيه سير. مش الطبيعي إن حد يتكلم معاك أصلاً! تلاقي كان فيه مشاكل ساعتها أكيد!

يجي بأه للشقة اللي حجزناها في الميد تاون..

وبتبص على يانج ستريت. وتحتنا على طول فرع لـــ تيم هورتونز (Tim Hortons) أشهر كافي شوپ ف كند

والمنطئة تحفة ، هادية جداً وراقية ، وخطوتين بينك وبين كل حاجة تحتاجها ؛ خطوتين شمالاً تلاقي فيوتشر شوپ (حاجة كده زي كمبيو مي في مصر) فيه كل حاجات الكمبيوتر (وهوه اللي اشترينا منه اللاپتوپ لهند) ،

وسيديهات وأجهزة إلكترونية وكهربائية وخلافه.

خطوتين شرقاً العمارة رقم 66 برود واي اللي أحمد ساكن فيها (بيننا وبينه 4 عمارات). تعدي الشارع ؛ فرع رئيسي من فروع البوسطة ، وهوه مبنى حكومي لخدمات الهجرة والجنسية في نفس الوأت.

خطوتين جنوباً ......هتلاقي ميدان أو تقاطع (يانج آند إجلنتون)

، فيه بأه فرعين لبنك TD Canada Trust وبنك CIBC ودول أشهر بنكين في كندا

، وهمه اللي فتحنا فيهم حساباتنا ، وكمان بنك RBC وبنك HSBC. وف التقاطع ده (يانج آند إجلنتون) فيه محطة مترو رئيسية تحت الميدان ، ومعاها محطة أتوبيس (برضه تحت الأرض)

، ومنها بتدخل لمول تجاري تحت الأرض ، واخد الأدوار الأرضية ودورين تلاتة تحت الأرض من مجموعة العمارات الموجوده بالميدان ده ، والمسافات اللي بينها ، وفيه بأه كل حاجة تتخيلها

؛ محل إسمه H.M.V. وده بتاع اسطوانات أغاني وأفلام وبس لكن على مساحة محترمة!

وجمبه محل لمستلزمات الحيوانات الأليفة ؛ قطط وكلاب وأرانب وفيران وعصافير وسمك وحرباية وحشرات غريبة!

وكل أنواع المطاعم (إضافة للي فوء الأرض ف التقاطع) ، وسوبر ماركت قد نُص كارفور كده (دومينيون) ، ومحلات لبس ، وأجهزة كهربائية وإلكترونية، وسينما ، ومحل ضخم متخصص للعب الأطفال ، ومكتبة ضخمة دورين تشتري منها الكتب والمجلات ،

وفرع من فروع كارلتون كاردس (كروت التهاني) لو بتاخد بالك من الماركة دي. م الآخر ، مش هتحس إنو ناءصاك حاجة ف المنطقة دي!

وبرضه جمب البيت (3 دقايق مشي) فيه فرع محترم من فروع (Toronto Public Library) ، المكتبة كبيرة موووت ، وفيها جناح للكمبيوتر والإنترنت ، وممكن تستلف منها الكتب وترجّعها بعد شهر باين ، وممكن تجدد الاستعارة تاني. كل المطلوب إنك تعمل كارنيه من عندهم ببلااااااااش

والشقة نفسها لزيزة ؛ حندوءة (وَن بد روم أپارتمنت) بس واسعة فعلاً ،

وفيها كم غير طبيعي م الكلوزيتس (الدواليب اللي ف الحيطة يعني) ،

والأرضيات باركيه (هارد وود فلور) ، والحيطان اللي ما بين الأُوَض عبارة عن خشب مش طوب (ولاحظت إن ده من أساليبهم في الإنشاءات هنا على فكرة) ،

وطبعاً أساسي وحدات وأدراج وضلف المطبخ - تلاجة – غسالة أطباق – بوتاجاز كهربا ، والمية السخنة طبعاً بتيجي من سنترال صابلاي

. آه طبعاً نظام التدفئة (والتكييف) ماشي دوران ع الأرض تحت الواجهة الإزاز ماسك الشقة كلها ، ممكن مسلاً تشغله نص ساعة وتفصله ؛ تفضل الشقة دافية لتاني يوم (العزل هنا تحفة – سواء للحرارة أو للصوت) ،

وبرضه التكييف موجود (پري إنستولد Pre-Installed يعني)! وليك لوكر (مساحة للتخزين) تحت في البيزمنت (البدروم) تسع زي ما تقول كده 4 غسالات فول أوتوماتيك ، ممكن تخزّن فيهم الكراكيب بتاعتك ، وليها فريم حديد بقفل.

من غير ما تتكلم ، المانيدچر يعمل تشيك ع الشقة ، وما عجبهوش النجف اللي موجود ، فقرر يغيره ، عشان احنا جينا جُداد ومن حقنا نلاقي النجف جديد ، وغيَّر حاجات ف السباكة والدش والحنفيات! مش محتاج طبعاً إني أئول لك إنو ف نفس اليوم اللي البنت اللي أبلنا سابت الشقة ، جه الپينتر ودهن الشقة كلها ، تاني يوم تروح تلاقي الدنيا مختلفة تماماً ، والسوبر انتندنت ظبَّطت الشقة واتنضفت صح! الدنيا هناك ماشية صح الصح زي ما الكتاب بيئول!

بالنسبة لنظام الشقق

==========

: العمارة اللي احنا فيها (مبنى من 4 أدوار – Low-Rise Building) تحت إدارة وملك لشركة اسمها ترانس جلوب ، هيه المسئولة عن كل حاجة ، ويمثلها الأپارتمنت مانيدچر ، هوه اللي بيمضيلك ع العقد ، وليها مندوب ف العمارة هوه السوبرانتندنت ، هوه المسئول عن متابعة أحوال العمارة ، وتلقي شكاوي السكان ، ومتابعة تنفيذها ، وتجميع الإيجار وما إلى ذلك.

وف المقابل الشركة طبعاً بتديلُه مرتب وشقة ببلاش في نفس العمارة يسكن فيها ، شاملة كل اليوتيليتيز (متطلبات الإقامة – أنظر البند القادم). والسوبر انتندنت عندنا واحدة م المجر اسمها سيلفيا ، حتّت سكرة. بنت طعمة وحليوة وبتتكلم انجليزي بسرعة غير طبيعية (زي نشوى مصطفى كده)! جوزها مُبرمِج كمبيوتر وعندها ولد وبنت ، ومتعاونة لأقصى درجة وخدومة برضه وفريندلي مووت.

وبالنسبة للعقد هنا يا سيدي ، فانتا بتمضي عقد لمدة سنة ، ويمتد بعد كده شهر بشهر ، ولو سيبته قبل انتهاء السنة ، فانتا مُلزَم تدفع باقي الأقساط! وقبل ما تمشي ؛ لازم تبلَّغ قبلها بشهرين (two months notice) ، وكل سنة بيعاد النظر في الرِنت أو الإيجار الشهري بتاع الشقة (اللي هوه 1.075 دولار).

طبعاً الإيجار بيختلف تبعاً لموقع الشقة ، من منطئة لمنطئة ، وعلى حسب حجم الشقة واليوتيليتيز المتضَمَّنة ف العأد! وف المتوسط – كما قالت لنا سيلفيا – الزيادة من 3 – 4 % كل سنة!

وطبعاً ، الزيادة دي مش بعبط ، لآ دي بتكون محسوبة ؛ حسب الارتفاع المعتاد في الأسعار ، وطبعاً الشقة معاك طالما هتدفع الإيجار اللي الشركة طالباه ، وما حصلش منك مشاكل تخليهم يئولوا بجيرانها! وعلى فكرة ؛ ترانس جلوب بعتوا لهند إخطار بالزيادة في الإيجار الشهري بدءأ من السنة الجديدة (أكتوبر 2008) ، وإن الإيجار هيزيد 15 دولار (1.5 %) أنا بصراحة اتنقطت! يعني الإيجار هيبقى 1.090 دولار. طب ما يخلوه 1.100 دولار ونخلص ، ويبقى رقم صحيح!

وبالمناسبة ، ما بيرضوش ياخدوا الفلوس كاش ؛ لازم بشيك! يقولولك التعامل الكاش فيه قلق ؛ ولما كل شقة هتاخد منها فوق الألف دولار ؛ يبقى كل شهر هتروح السوبر انتندنت للشركة شايلة فوق الـــ 30 ألف دولار؟! مجازفة طبعاً!

نفس الموضوع ده حسينا بيه لما رحنا نسحب الـــ 8 تلاف دولار من CIBC ، والواد قال لنا ده مبلغ كبير. في المبالغ الكبيرة كلمونا قبلها ولو بالتليفون نعدهم ونحضرهم لكم على جمب!

! الواد بتاع البنك عمال يقول لنا خلو بالكو ، وحرّصوا وانتو شايلينه! واحمد الديب برضه عمال يقول لنا خبوا الفلوس! محدش بيمشي بمبلغ زي ده! والغريب إني أنا وهند ما كانش في دماغنا الإحساس ده أساساً ، وعادي ولا كإننا ماسكين في إيدينا خمسة جنيه! يمكن عشان احنا كنا لسّه جايين من مصر ؛ اللي ما بقاش فيها أي شيئ له طعم ولا معنى ولا قيمة!

وطبعاً – مع ترانس جلوب - لازم تملا أپليكيشن ببياناتك ، ومعاها أي پرووف إنك ليك دخل يكفي إنك تدفع الإيجار (زي ما تيجي تقسط عربية ؛ هيئولولك هات ما يثبت قدرتك على الدفع).

وف حالتي أنا رحت عملت داونلود للپاي رول سليپ بتاع الشهر اللي فات (أغسطس) من سانتافي من ع الكارير كونّكت (الويب سايت بتاع سنتافي). وفيه الپوزيشن والمرتب وإيميل وتليفون الپاي رول سنتر بتاعنا في مانيلا (لو حبو يتصلوا يستفسروا!). وطبعاً ،

بياخدو شوية وقت يستفسروا عنك من الكريديت بيرو (بالـــ SIN Number) ، يشوفوا لو ليك سوابق في الدفع ، ولا راجل محترم وملتزم.

نيجي بأه لمتطلبات الإقامة

============

(أمينيتيز أو يوتيليتيز): عندك المياه ، ودي بتكون إنكلودِد ف الرِنت. عندك الميَّه السُخنة اللي جايّه من سنترال صابلاي ، برضه إنكلودد ف الرِنت. بعد كده عندك الهايدرو (اللي هيه الكهربا يعني) طبعاً على حساب جنابك ، في حدود 35 دولار ف الشهر

بعد كده عندك الجاز (الغاز يعني) وده بيستخدم ف التدفئة ف الشتا أحياناً (في حالتنا احنا الشقة تدفئتها كهربا).

و لو عاوز تليفون ف البيت طبعاً انتا اللي هتقدم عليه ، وهتحاسب على فاتورته طبعاً. وبرضه لو عاوز تشترك في تليفزيون الكيبُل ، مع نفسك

، والأسعار بتبدأ من 33 لـــ 96 دولار ف الشهر حسب الپاكيدچ اللي انتا واخدها.

لو معاك عربية ومحتاج مكان للپاركنج بتاعها بتدفع لها مصاريف شهرية (في حالتنا حوالي 120 دولار ف الشهر أو 5 دولار ف اليوم ؛

يمكن عشان احنا عمارتنا ما فيهاش جراچ خاص بيها ، فبتروح جراچ العمارة اللي جمبنا ، محدش هيتكلم طالما انتا دافع! وف نفس الوقت همه حاطّين يافطة بتقول إنو فيه أماكن للپاركنج).

عاوز تقدم ع النت عندك ف البيت برضه براحتك وانتا اللي بتدفع (41 دولار في حالتنا مع روچرز ، وبيدخل لك كابل نت – مالوش علاقة بالتليفون – بسرعة 7 ميجابِت بالراوتر بتاعه (مش الـــ 2 ميجا بِت اللي ف الشركة – پريسيچن – اللي كنت حاسس إنها أصيَع سرعة على مستوى العالم ؛

وهند اشترت له راوتر وايرلِس بـــ 22 دولار عشان اللاپتوب وهيه ع السرير مسلاً! ...إضافة لـــ 4 فتحات للتوصيل بكمبيوتر عادي مثلاً. وعلى فكرة ، ....هند لسه مجربة الداونلود الوايَرليس ؛ وسرعة الداونلود 834 كيلوبايت ف الثانية ، جوجل إيرث اللي حجمه 12.7 ميجابايت نزل في 18 ثانية! والفيلم من دول اللي من 700-900 ميجا بايت بياخد معاها 15-20 دقيقة!

والداونلود كان مفتوح ، بس تأريباً من شهرين أو تلاتة (مارس أو أبريل اللي فاتو) بئى المسموح لك 64 جيجا بايت داونلود ف الشهر ، والجيجا الزيادة بدولار ونص باين أو باتنين دولار! معلش بأه ، آهو الواحد يلم إيده شوية ف الداونلود ، ويخليه أد المسئولية شوية!

الماچيك چاك ،

======

...... وده حاجة كده بحجم الفلاش ديسك (أكبر منه حاجة بسيطة ، بس أصغر من البتاعة بتاعت موبينيل اللي اشتريتها انتا مؤخراً) ، وبيتوصل بالكمبيوتر USB ، وطبعاً يكون الكمبيوتر واصل نت (يستحسن DSL) ، وفيه فتحة توصل فيها الچاك العادي بتاع التليفون (وعدة تليفون عادية خالص). وترفع السماعة يا ريس ، وتطلب أي رقم في كندا أو أمريكا ببلااااااش. البتاع ده اشتريته بـــ 45 دولار

، شامل اشتراك أول سنة ، وبعد كده كل سنة بـــ 20 دولار. واشتريت منه 3 ؛ واحد لماما عشان تبقى تكلمني هناك ، والتاني ليا ف السعودية عشان أبقى أكلم هند (مع إن التليفون الدولي موجود بصراحة ، ومن ابو بلاش ) ممكن استخدمه وانا في مصر بأه ، والتالت لهند في كندا عشان المكالمات اللونج ديستانس! وشحنته على فيليپ (الـــ STC بتاعنا ع البريمة) الأمريكاني وساكن في لويزيانا (ماهو السايت ده ما بيبعتش غير لأمريكا فقط مع الأسف ) ، وفيليپ جابهم لي معاه ع البريمة ف السعودية. تخيل... دلوقتي بقوا بيبعتوا لكندا كمان؟! لسه مكتشف الموضوع ده حالاً (5 أغسطس 2008 ، 9:30 م)!

ولو ما ليكش سكة في أمريكا ممكن تعمل الحركة المجرمة اللي هند كانت عملتها أيام الخطوبة... الهانم اكتشفت حركة مجرمة مع أرامكس ، بتدفع حوالي 30 دولار (مرة واحدة ف العمر) ، وبيعملولك عنوان عليهم في أمريكا (نيو يورك تقريباً) ، وعليه عنوان إضافي على فرعهم في إنجلترا (لندن على ما أعتقد). ولو حبيت تشتري حاجة من ع النت – م المواقع الكتيييييير اللي مش بتبيع غير لأمريكا مثلاً.

هتكتب العنوان بتاعك ع العنوان بتاعهم ، وهمه هينقلوهولك من فرعهم في أمريكا لفرعهم في مصر ، وطبعاً بتحاسبهم على تكلفة الشحن من هناك لباب بيتك.

طبعاً الهانم عملت الكلام ده عشان مزاجها قال لها تشتري اطقم السرير من ع النت ، أسعار أقل ، وجودة أعلى ، واللي اشتريناه بـــ 80 ولاّ 120 دولار شفناه في كاربت سيتي بـــ 1700 جنيه ، وكان الاختيار محدود ، وذوقه بلدي بصراحة! وكانت المشكلة إن أمازون حاجته غاليه بس بيشحن لمصر ، ودومستيكيشن حاجته رخيصة لكن الشحن لأمريكا بس. ومن هنا كان لازم نتصرف

ا خطين موبايل ليا ولهند (بيسموه Cell Phone أو Wireless ، كلمة موبايل دي ما بنسمعهاش خالص)

=============

؛ دفعنا تأمين 50 دولار لكل خط وبتاخدهم بعد 6 شهور (بس عشان احنا جُداد ع البلد ؛ غير كده المفروض ما بتدفعش ولا مليم ؛ أصدي ولا سنت!)

خدنا إيه تاني بأه؟ خدنا موبايلين سوني إريكسون ومعاهم جهاز آي پود پلاير (بيتوصل بالآي پود ميوزيك بلاير ، أو بالكمبيوتر أو التليفزيون مثلاً ، وفيه راديو وساعة ومنبّه ، وتمنه كان 180 دولار ساعتها) وكل ده ببلاش! ولمدة 3 شهور المكالمات المحلية ببلاش! ما احنا ماضيين كونتراكت 3 سنين مع روچرز ؛ يبئى المفروض لينا مميزات! الحاجة الوحيدة اللي مش كويسة هيه إنو مش من حقنا نشغل خدمة الدولي ع الموبايل عشان احنا لسه جداد ف البلد ، ممكن بعد 6 شهور من التعامل المنتظم معاهم ،

بعد ما يكون ليك كريديت كويس (تكون بنيت سُمعة كويسة يعني) حسب كلام الراجل ف سورس ستورز اللي اشترينا منه الموبايلات. (بس تسدَّأ إن الدولي اشتغل لوحده بعد 3 شهور؟! والــ 50 دولار التأمين رجعو برضه بعد 3 شهور) وعندك كذا پلان تختار بينهم ، وممكن تغير من پلان للتانية في أي وأت ، وبالتليفون (ودي كانت متاحة برضه للأمانة مع فودافون مصر)!

شوية ملاحظات على نظام الموبايلات هنا.

====================

.. فيه هنا نظامين يا ريس ؛ الأول الـــ Pay as you go وده زي الكارت عندنا ،

والتاني الاشتراك الشهري اللي بيجيلك فاتورة شهرية ع البيت ،

وهوه ده النظام اللي احنا اشتركنا فيه ، أساسي الفاتورة 35 دولار ، زود عليها 10 دولار عشان أنليميتيد كول ريسيفنج (ماهو اللي بيستقبل مكالمة بيدفع برضه ف المعتاد زيه زي اللي بيتصل) ، و20 دولار للكوميونيكيت فاليو پاك عشان الفويس ميل وألفين وخُمسُميت رسالة قصيرة وألف رسالة مالتيميديا شهرياً ، وإظهار بيانات المتصل (الرقم والإسم ، يعني بيظهرلك ع الشاشة إسمه المسجل في شبكة الاتصالات)، وإنترنت أكسيس مفتوح (فلات ريت يعني – براوزنج وداونلود مفتوح) ، ورسالة بالأرقام اللي كلمتك وانتا مش مُتاح ، و7 دولار عشان الإنترناشيونال لونج ديستانس سيفَر (يخفَّض سعر الدقيقة الدولي مثلاً مصر من 115 سنت لـــ 29 سنت). يعني بتاع 75 دولار أساسي بخلاف مكالماتك. بس عيشة يا عم الحاج! أنا كنت باتفرج ع اليوتيوب ع الموبايل! فُجْر بأه!

وأسعار المكالمات : الدقيقة المحلي بـــ 35 سنت (مجاناً من 9م : 8ص والويك إند سبت وحد طول اليوم)، واللونج ديستانس (خارج مدينتك ، في حالتنا تورونتو الكبرى أو الـــ GTA ؛ سواء هاميلتون اللي بينك وبينها 80 كم ، أو الولايات اللي بينك وبينها 5 تلاف كم ، أو حتى أمريكا) بـــ 30 سنت (تخيل!) والدولي زي ما قلتلك ليه الأسعار الريجيولار ، أو الأسعار المخفضة بعد إشتراكنا في باقة تخفيض أسعار الدولي (أُم 7 دولار) ، اللي وصَّلِت الدقيقة لمصر لـــ 29 سنت! ما تستغربش! هوه ده النظام هنا!

طبعاً أنا قلتلك إننا خدنا أول 3 شهور عرض الـــ فري لوكال كولز (الأرقام المحلية في تورونتو سواء موبايل أو بيت). عاوز أقول لك إني لقيت واحدة من خدمة عملاء روچرز بتتصل بيا بعد 4 شهور من بداية اشتراكي معاهم تسألني (تحب تاخد 3 شهور كمان فري لوكال كولز؟) أولتلها يا سلام؟ أحب أوي! وقد كان يا معلم!

وفيه هنا أنواع كروت دولي بالعبيط يا ريس ، النوع اللي باستخدمه باشتريه بـــ 2.25 دولار (قيمته 2.5) بيديلك حوالي 40 دئيئة لمصر (الدئيئة وائفة عليك بـــ 5.6 سنت يعني 30 إرش) ، يعني أنا أكلمك من كندا أرخص ما مراتك تكلمك م البيت في مصر!

وبالنسبة للرومنج (خدمة التجوال الدولي) ، دي بتشتغل أوتوماتيك سعاتّك ، ومش لازم تأكتيفيتها كل مرة تيجي تغادر البلاد زي فودافون مصر! أول بس انتا ما تدخل نطاق البلد ؛ بتلائيه شبط لوحده مع أي شبكة يلائيها ، ويبعتلك رسالة ترحيب بوصولك البلد دي ، وبيئول لك الأسعار بتاعة المكالمات وخدمة العملاء بتكون مجاناً… مثلاً أول ما وصل مصر آم ضارب صحوبية مع شبكة أم نبيل مع الأسف! وخط الچوال بتاع السعودية برضه فيه نفس النظام ، وفودافون برضه نفس الحركة بس لازم تشغل الخدمة أبل ما تمشي م البلد!

وانا ف فرنسا ، أولت أبص لي بصّة على سعر التحويل ما بين الدولار الكندي واليورو. هيه النت ع الموبايل كانت سريعة بصراحة ، وكل اللي فتحته كان موقع تحويل العملة وبس على كده (يعني بتاع 200 – 300 كيلو بايت) ، ألائي روچرز الحرامي حاسبهالي ف الفاتورة بـــ 22 دولار وشوية!

إكتشفت حتة صياعة عاملينها بتوع روچرز ... البهوات الأسعار اللي معلنين عنها دي بخلاف سعر المكالمة العادية! يعني سعر الدقيقة لمصر 29 سنت (+30 سنت) يعني الدقيقة بـــ 59 سنت! والمكالمات اللونج ديستانس أم 30 سنت (زود عليها 30 سنت) تبقى الدقيقة بـــ 60 سنت! والكروت اللي بتشتريها للدولي فيها أرقام لوكال لمعظم المدن الكبيرة ؛ بالإضافة لأرقام مجانية ( اللي بتبدأ بـــ800). لو اتصلت بالرقم المجاني ، بيتخصم من الدقايق اللي بيديهالك الكارت!

يبئى الخلاصة ؛ بقدر الإمكان استخدم تليفون البيت واطلب الأرقام اللوكال (مجاناً) ؛ عشان تستخدم الكروت في عمل المكالمات الدولية.

التليفون بتاع البيت ركبناه

=============

، وبندفع له 30 دولار شهرياً ، وطبعاً المكالمات المحلية مجاناً (موبايل أو بيت) ، وليك 500 دقيقة مجاناً شهرياً لونج ديستانس (يعني خارج تورونتو الكبرى والولايات الكندية التانية (خارج أونتاريو) وأمريكا). وليك خاصيتين مجانا (إخترنا احنا البريد الصوتي وإظهار رقم وإسم المتصل). ولو هتتكلم لونج ديستانس لتليفون بيت أو موبايل تبع روچرز أو فايدو (شركة إتصالات تانية إندمجت مع روچرز) ، هتبئى المكالمة ببلاش!

ومن تليفون البيت تقدر تتصل دولي ، من غير ما تقدم طلب ، ولا تدفع فلوس تأمين في السنترال (زي ما المصرية للإتصالات وفودافون بيعملوا) ، ولا الهجص ده كله!

المهم ، الدقيقة لمصر من البيت هتكلفك 1.75 دولار ، أو 29 سنت لو شغلت خدمة All World Plan (إشتراكها بيكلفك دولار واحد ف الشهر). خلّي بالك ، الـــ 29 سنت دول ما بيتضافش عليهم أي حاجة تانية (مش زي صياعة الموبايل)!

الكيبُل (التليفزيوني) اشتركنا فيه ،

================

والپاكيدچ اللي اخترناها بتلاتة وخمسين دولار شهرياً ، بتديك متين وشوية قنوات (من ضمنهم الـــ ART America القناة الوحيدة العربي!) ، وكما تتوقع من أبو سعد ، موصل الكيبُل ع اللاپتوپ بتاع هند ، بواسطة تي في تيونر خارجي (أكبر شوية من الفلاش ديسك ، اشتريناه بحاجة وستين دولار) ، وعيش حياتك ديچيتال يا ريس

المهم يا باشا ، بإمكانك في أي لحظة بالتليفون تضيف باقات أو قنوات أو تلغيها. وعندك القنوات كتيييير

، وفيه عندك الاسپيشيالتي شانيلز (الأسرة ، أفلام ، رياضية ، مالتي كالشرال ، والسكس طبعاً ) والقناة الواحدة باتنين دولار ونُص ف الشهر ،

وتقل مع زيادة العدد (توصل لأقل من دولار للقناة ؛ لو أخدت 30 قناة بتدفع لهم 28 دولار).

والبنت بتاعة خدمة العملاء بتاعة روچرز آلتلنا إنها هتدينا كل القنوات الاسپيشيالتي (ماعدا الـــ Adult Programs سعادتك طبعاً ... فاهم دماغك أنا ) ببلاش لمدة 3 شهور

، ولو تحب تكمل ؛ ممكن تحدد اللي انتا عاوزه منهم ، وتدفع اشتراكه.

واللذيذ بأه ، فيه قنوات أون ديماند ؛ يعني سعادتك تدخل عليها ، وتنقى الفيلم اللي على مزاجك ، والقناة تعرضهولك ، ويجيلك سعر الفيلم ع الفاتورة اللي جاية ، أو تدفع بالكريديت كارد! إشي خيال يا ناس!

وبالنسبة للقنوات المحلّية ، اللي بتستقبلها بالإيريال العادي ده... لما كنا عند إيمي ف الجيست هاوس ، كان التليفزيون اللي عندنا ف الأوضة مافيهوش غيرهم ، واللي كانو شغّالين 4 قنوات (أعتقد يمكن فيه غيرهم أكيد ، بس ما كانش فينا دماغ ندور أو حتى نسأل!).

من ضمن القنوات المحلّية دي قناة لزيزة مووووت –

نفسي نلائي زيها في مصر (بخلاف النشرة المرورية بتاعت نجوم إف إم) – دي يا سيدي فيها بانَر (شريط) أخبار بس أعرض شوية من بتاع الجزيرة ، وبيجيب الأخبار اللوكال لتورونتو ، ولقطات متغيرة من كاميرات المرور (كاميرات تليفزيونية على مُختلَف الطرق في كندا ، والسريعة منها بشكل خاص) ، تبين لك حالة الطرق حوالين تورونتو ، ومناطق الزحمة والاختناق المروري ، عشان تعمل حسابك وانتا خارج م البيت. وعلى جمب حالة الجو الحالية والمُتوَقَّعة اليوم والأسبوع القادم (يعني لو بتخطط لرحلة مثلاً) ؛ من درجة الحرارة ونسبة الرطوبة ومدى الرؤية ف الشبورة صباحاً وخلافه.

وعلى ما أذكر كان فيه قناة خفيفة ، كنا نحب دايماً نشوف عليها الكاميرا الخفية بتاعتهم (من الكيبك) اللي اسمها GAGS ، بتيجي منها حلقات ع النايل سات مش فاكر في أنهي قناة.

طريقة تستقبل بيها القنوات العربي ، وبتكلفك حوالي 150 دولار عشان تركّبها (مرة واحدة بس). بتجيب دِش صغير ، وجهاز زي ريسيفر أو ديكودر كده يجيبلك القنوات العربية ؛ هوه مش هيجيبلك كل القنوات المتاحة ع النايل سات ، بس أهم القنوات هتكون موجودة. وطبعاً لازم تستأذن المانيدچر قبل ما تركّبه في البلكونة! ومفيش حاجة اسمها تركّبه ع السطح! دي اسمها عشوائية! حتى بص كده على جوجل إيرث ، تلاقي أسطُح البيوت ملحوسة ؛ مش بس نضيفة!

وكبديل مؤقت ليّا وانا هناك ؛ لقيت إنك ممكن تتابع أخبار النايل تي في ع النت (مش عارف اللينك مش شغال ليه اليومين دول). وبرضه فيه موقع بيبث لايف شويّت قنوات عربي ، وموقع تاني جايبلك تجميعة قنوات من حول العالم. طبعاً مع سرعة النت بتاعة روچرز ، يبقى معاك التلافازيون شغال لووووز ع اللاپتوپ ، ومونّسك وانتا شغال يا ريس ، وبلغة الضاد والصاد والحه والخه كمان

بنشتري الموبيليا من كينيدي رود...

حكيلك عن فيوتشر شوب ، وده يا سيدي حاجة زي كمبيو مي في القاهرة

=========================

زي سوبر ماركت كبير لكل مستلزمات الكمبيوتر ، وفيه برضه أجهزة كهربائية والكترونية وديفيديهات أفلام وجيمز وكده برضه. وبينه وبين البيت رُبع دقيقة مشي ؛ يا دوب أعدي الشارع!

رحنا يا سيدي نشتري لهند لاپتوپ منه...

نرجع تاني لموضوع شرا اللاپتوپ...

بدأنا نقارن بين التوشيبات والسونيهات والديللات والإتشپيهات (طبعاً الإيسَر كان إكسكلودِد تماماً من البحث عشان هند متعقدة منّه في شغلها في مصر!).

نلاقي البنت اللي ماسكة الجناح ده (إسمها Marvi بالمناسبة ، بنت هندية أو باكستانية مسلمة وجوزها اسمه محمد ، عشان كده فرحت أوي لما عرفت إن أسماءنا هند ومحمد ).

عندي ليكو فكرة... إيه رأيكم تاخدو لاپتوپ توشيبا ؛ واحد اشتراه امبارح ، ورجّعه في نفس اليوم ، والجهاز زي الفل ومفيهوش ولا كلمة ، وهادّيكو عليه ضمان 3 سنين مجاناً (مش سنة) ، وهاعمل لكم خصم 300 دولار.

طبعاً عنينا فنجلت ، و وداننا طرطقت ، وهند عمّالة تهزّلي في راسها وتزغد فيّا (نظام إلحقها قبل ما تعقل!)... وانا بأه ... بس أصله يا مارفي مستعمل ، وبرضه الواحد عاوز يفرح كده وهوه بيقشّر السيلوفان من عليه... ! واحمد الديب هيتنقط مني (هتدفع ف السيلوفان 300 دولار؟!)...

طبعاً هيه الطبخة كانت مستويّة جاهزة ، والأسلوب المصري المرقّع ده مالهومش فيه! لكن آلتلي ، طيب هاديلكم معاه شنطة هدية (بتاع 50 $)! وانا (شنطة إيه بس ، مش الفكرة... ما هو أصل ...) طيب ومعاكم 14 يوم ، لو ما عجبكوش اللاپتوپ في أي وأت تعالو رجّعوه تاني ، وخدو فلوسكو كاملة ، (With no questions) ، يعني محدش هيسألك عاوز ترجّعه ليه!

ساعتها بأه أولت لنفسي : أكتر من كده يبقى افترا الصراحة! ماشي يا مارفي ، كده عدّاكي العيب وأزَح! (Fair enough)...

وكان فيه عرض إنك مع اللاپتوپ من حقك تشتري پرينتر إتش پي (All-in-One) بـ 20 دولار! عشرين دولار ويبقى عندك پرنتر وسكانر وماكينة تصوير ... دي مش جايّة حتى تمن الكارتريدچ الواحد!

النكتة بأه إن سعر الكابل اليو إس بي بتاع الپرينتر كان بـ 30 دولار!

طبعاً أحمد آللي إوعى تجيبه من هنا... وبعد يومين لئيته اشتراهولنا بدولار واحد من Wal-Mart تأريباً

على فكرة... أنا زلّيت مارفي كل ما اسألها على حاجة وتقوللي سعرها ، أقول لها دا إيه الأسعار الزبالة دي... دبي تكسب ، دبي أرخص ، دبي أحسن! والبنت تتكسف ؛ وتقوللي معلش الأسعار هنا كده!

مع إن المعاملة في دبي – للأمانة – لا بالرقي ، ولا بالضمانات والدلع ده خالص ، ولا بتاخد حاجة بخصم عشان خدت حاجة تانية. وفصال مع الهنود اللي هناك

. طيب أنا عاوز نسخة ويندوز ، والدرايفات بتاعة اللاپتوپ يا مارفي. آلتلي ممكن تعمل باك اپ من ع الهارد بتاعه ، والدرايفات ممكن تجيبها من ع النت. هوه ده اللي المفروض بيحصل بصراحة

، لكن أنا بقى اتصدمت (حركات بأه مانتا فاهم!)... إزاي يعني يا مارفي؟! يعني لو الجهاز دلوقتي حالاً حصل له حاجة قبل ما انزّل الدرايفات من ع النت ، أعمل إيه انا بقى؟! أروح أأجّر من سايبر يعني عشان أنزل درايفاته؟! وطبعاً البنت الغلبانة آلتلي طيب أنا عندي باك اپ للسوفتوير بتاعه ، ودرايفاته منزّلاهم من ع النت (عشان عندها واحد أخو بتاعنا ده) ، بس ما تجيبش سيرة هنا (ممنوع الكلام ده ، وحركات القرصنة بتاعتنا دي) ، وخد تليفوني ، وابقى اتصل بيّا ، وانا هاعمل لك نسخة م الديفيديهات دي ، وبكره هاجيبهالك معايا ، واسلّمهالك بره الفيوتشر شوپ (تقولشي بنتاجر في حشيش؟!)

ميرسي يا مارفي

وتاني مرّة أجيب اللاپتوپ للدياسطي...

قعدت لفّيت على كام فرع لفيوتشر شوپ. وجبت للدياسطي المواصفات ، وبعتّله اللينكات ع الماسينچر ؛ عجبه توشيبا بـ 850 دولار. يا دياسطي ، فيه أبو ألف دولار ده مالوش حل! لأ أنا عاوز أبو 850! يا دياسطي شاور نفسك ؛ مش كل يوم بتجيب لاپتوپ! يا عم أنا مش عاوز غير ده! أقعد أتحايل عليه... يا دياسطي أنا مستحرم البتاع التاني ده ، فكر يابني كويّس! مفيش فايدة. هند نفسها اتفقعت منّي ؛ عايزك تجيبله حاجة ، خلاص هوه حر ، سيبه هوه اللي يختار. قلتلها لو ده واحد ما يهمنيش أمره يبقى خلاص هوه حر ، بس انا باجيب حاجة لاخويا ، يبقى أكيد هاكون بافكر أجيب له أحسن صفقة ، مش بس اللي هوه عاوزه! تقوللي ما يمكن ظروف المادّيات معاه مش ولا بد ؛ يبقى ما تغلّسش ، انتا عملت اللي عليك ونصحته ، والقرار الأخير هوه اللي خده خلاص. إتكتمت!

تاني يوم شفت جهاز تحفة وبـ 900 دولار! أجيبه ولاّ ما اجيبوش؟ قعدت أتصل بيه من موبايلي لما زهقت ؛ ربع ساعة وجرس والبيه ما بيردّش ، وانا أساساً قايل له إني الساعة كذا بالظبط هاشتريلك اللاپتوپ ، موبايلك لازم يكون متاح ، عشان أتصل بيك لو فيه حاجة ، ومتّفقين على كده! ورايح جاي على فيوتشر شوپ ، وسنو ستورم شغالة ؛ وتلج نازل على دماغي ، وف الآخر بعد ما مرارتي اتفقعت ؛ خلاص... بلاها التفكير ؛ هوه مش عاوز التوشيبا أبو 850؟عنينا يا عم الدياسطي... و جبته!

ولما جه البيه أونلاين بعدها بكام ساعة ؛ بيسالني خير فيه حاجة؟ قلتله خلاص جبتلك اللي انتا عاوزه ، وباعمل داونلود للبرامج الـــ Essentials بتاعت أبو سعد (مانتا عارفها)... بس قلت لازم احرأ دمُّه ع الجهاز التاني! وقلتله ع المواصفات بتاعت التاني (إتش پي ، پروسيسور أسرع ، رامات أكبر ، هارد أكبر ، قارئ بصمة ، الواي فاي N). قاللي إنتا بتهرّج؟ ما جبتوش ليه؟!!! إتفضّل يا عم!

نزلت أرجّعهوله... لو سمحتو مش عاوز ده ، وعاوز أبدله وآخد الإتشپي ده ، رحنا للخبير الفني بتاع الصيانة اللي هناك ، فحصه شوية ، واتأكد إن مفيهوش حاجة بايظة ، وسألني عاوز ترجّعه ليه؟ مش عاجبني الأداء بتاعه. من ناحية إيه؟ السرعة حضرتك ، وأنا جاي هابدّله بالجهاز التاني ده. آللي بس ده أحسن ، والسرعة مش هتفرق ، السرعة المهم فيها الپروسيسور والرامات مش حجم الهارد. أولتله م الآخر أنا مش عاوزه ، وعاوز آخد التاني بداله ، فيها مشكلة؟ آللي أبداً ، بس لو بتدور على رأيي ؛ توشيبا يكسب. قلتله شكراً!

ودفعت الفرق ، وأخدت ضمان ع الجهاز التاني (سنة) ، وبرضه ... الـــ 14 يوم إيّاهم لو حبيت أرجّعة تاني وآخد فلوسي!

الغريب إني بالحركة السافلة دي غرمتهم بتاع 200 دولار أقل واجب مالهومش زمب فيها غير إن الدياسطي بيه بيتدلّع! ماهو الجهاز خلاص هيتباع خارج الكرتونة ؛ ما بقاش جديد خلاص! ولو حبيت أرجّع الجهاز التاني برضه غلاسة ، هارجّعه! النظام كده!

موقف نص كم حصل هناك (برضه نقول اللي لينا واللي علينا)...

كنت اشتريت كذا جزمة من Winners ف الداون تاون (سكوتشيا پلازا) ، وبعد أسبوع استخدام ، واحدة منهم حصل فيها فك خياطة! والتانية مع ساعة لبس واحدة كان الكعب بتاعها ناشف جداً ؛ بقيت ماشي أزُك ف الشارع! رحت بالـــ 2 أرجّعهم! جات مديرة الفرع ؛ وآلتلي اللي فك خياطة ده هيرجع ، لكن التاني ده إنتا اخترت المقاس اللي مش مناسب ليك ، دي غلطتك انتا ، واحنا مش مسئولين عنها. اللي فكت خياطة المصنع هياخدها ، ومش هنتدبّس فيها ، لكن التانية دي مش غلطة المصنع ، وبالتالي ما ينفعش نرجّعهاله. ثانياً إنتا لبستها ومشيت بيها وبالتالي ما ينفعش نعرضها للبيع و واحد تاني يشتريها ، وهيه غلطتك إنك اخترت الجزمة غير المناسبة! طيب وهاعرف ازاي إنها مش مناسبة غير لما اجربها ، دانا مشيت بيها أقل من كيلو! آلتلي كنت البسها واتمشى بيها جوه البيت!

ولما رجعت بخيبتي البيت ، طبعاً هند استلمتني! الخايب اللي الناس بتدحك عليه وتأرطسه! واللي مش عارف حقوقه! وقالتلي دي بتهرّج بسلامتها ، وكان ممكن تخوّفها ،

وقول لها عاوز ورقة رسمي بخط إيدك إنك ترفضي ترجّعي الجزمة!

وممكن تودّيها في داهية بالورأة دي. القانون هناك واضح ؛ من حقك ترجّع أي حاجة تشتريها – حتى لو استخدمتها – في خلال الـــ 14 يوم التالية للشراء ، وبدون إبداء الأسباب (No Questions)

، بشرط يكون معاك إيصال الشراء. غير كده من حقك تشتكيهم! هاقول إيه بس؟ راجل جاي من مصر ... م العالم التالت ، ومش واخدين على كده!

==============================

كفاية كده النهارده

ولنا لقاء اخر وحاقة ممتعة من معلومات نشرفنا الدكتور تهامي

فاصل وسنعود باذن الله

[newcomer]

مجهود رائع....ربنا يجعلة فى ميزان حسناتك

ان شاء الله

بس ممكن طلب... لو هاتقل على حضرتك

تكبرى الفونت شويه كمان....

[الأهلاوي الأصيل]

مدام سمية...او باشمهندسة سمية (أكيد بتحبي اللقب ده أكتر) بجد مجهود راااااااائع وجميل جدا

[MZohairy]

فعلا موضوع قيم جدا

الميزه الكبيره فيه انه يعتبر ملخص لمئات الصفحات في مختلف المواضيع المتنتوره في مليون حته

كملي يا سميه هانم و كتر خيرك

[safar]

جزاك الله خيراً أخت سمية ، بس الرجاء عدم نسيان تغيير لون البنط للعنوان وتكبيره إن أمكن ، حتى يتم قراءة المتصفح للذي محتاجة ولا يضطر يقرأ كل حاجة حتى يصل للذي يريد.

مع تحياتي

[masri]

بسم الله ماشاء الله على المجهود اللى بجد اكثر من رائع

ربنا يعوض تعبك ياباشمهندسة

و الحقيقة انى ب اناشد مشرفى المنتدى الكرام و الافاضل بتثبيت هذا التوبيك (لانه حقيقى التعب اللى اتبذل فيه واضح زى الشمس)

[torontoz]

الفكره قديمة وكثير من الاعضاء طالبوا بها.واعتقد ان الفاضل سكوربيون كان من اوائل من نفذوا هذه الفكرة عمليا

http://www.egyptiantalks.org/invb/?showtopic=65967

في هذا التوبيك...اعتقد ان العضوة الفاضلة - سميه صالح ضيعت وقتها علي الفاضي..

[د هشام ابراهيم]

اخواني المهاجرين الجدد

لاحظت ان المنتدي مليان بخبرات اعضاء افاضل........ هاجروا فعلا...... مثل

د.شامي....د.تهامي....د،هشام....مدام دعاء ......واخيرا استاذ زوهيري...... من قديم ....الباشمهندس ياسر....

و......

استأذن الاعضاء الافاضل السابق ذكرهم في اقتباس اجزاء مهمة من موضوعاتهم ووضعها في هذا التوبيك....ليصبح بنك معلومات سريع ومختصر وسهل الوصول اليه

................

تحياتي

يا أفندم العفو ....كتر ألف خيرك انك حطيتي إسمي وسط الفطاحل دول .....طبعا يا باشمهندس تقدري تقتبسي ما شئت من أي موضوع للعبد لله و يا ريت فعلا موضوع حضرتك يتثبت لعموم الفائدة

جزاك الله كل خير يا أفندم علي وقتك و مجهودك و أدبك الجم

ربنا يتقبل من الجميع و يهدينا إلي سواء السبيل

[ahmed_saleh]

انا لازم اقول كتر الف خيرك و ربنا يجعله في ميزان حسناتك ياريت تكملي الملخص العظيم ده... جزاك الله خير

[ebregi]

الأخت الفاضلة صاحبة هذه الفكرة التي بدأت بخبرتها

جزاك الله كل خير لأن الله في عون العبد مادام العبد في عون أخيه

فعن عبدالله بن عمر ما أن رسول الله قال :( أحب الناس إلى الله أنفعهم ، وأحب الأعمال إلى الله عز وجل سرور تدخله على مسلم ، أو تكشف عنه كربة ، أو تقضي عنه دينا ، أو تطرد عنه جوعا ولأن أمشي مع أخي المسلم في حاجة أحب إليّ من أن اعتكف في المسجد شهرا ومن كف غضبه ستر الله عورته ومن كظم غيظا ولو شاء أن يمضيه أمضاه ملأ الله قلبه رضا يوم القيامة ومن مشى مع أخيه المسلم في حاجته حتى يثبتها له أثبت الله تعالى قدمه يوم تزل الأقدام وإن سوء الخلق ليفسد العمل كما يفسد الخل العسل )

رواه الطبراني في الكبير وابن أبي الدنيا وحسنه الألباني في السلسلة الصحيحة .

عموما مرة أخرى جزاك الله كل خير على نيتك و التي أحسبها إن شاء الله خالصة لوجهة و لخدمة أشقاءك المهاجرين الجدد

أو الذين لديهم النية إن شاء الله لدخول معترك الهجرة و أني لأرى في هذا المنتدى من الشخصيات الطيبة التي تدخل

السرور والإطمئنان الى قلبي و الأكيد الى قلوب الإخوة الذين يتصفحون هذا المنتدى و تحياتي للجميع و دعواتي

لك ولأسرتك بالتيسير إن شاء الله و لجميع الأخوة بتحقيق مايرجون من الدنيا و الآخرة و شكرا و آسف للإطالة

[mohamedadel]

بسم الله ماشاء الله ....

شغل يستحق الأشادة بجد ...ومجهود على ما أعتقد انه كبير جدا تستحقي الشكر عليه ...

وهنا يجب تقديم الشكر والعرفان لكل الأستاذه أصحاب المواضيع الأصليه ...

فجزاكم الله جميعا خير الجزاء ...

..

تم تعديل 24 أبريل 2009 بواسطة mohamedadel

[somayasaleh]

السادة الاعضاء الافاضل

تاخذ شوية معلومات قيمة من تجربة دكتورنا الفاضل هشام

- قرار الهجرة قرار شخصي بحت ... لابد أن يتخذه المرء وفقا لما يراه و القرار في حد ذاته قد يكون صحيحا و لكن ما يترتب عليه من تجارب قد تكلل بالنجاح أو بالفشل لا قدر الله

- من الأفضل دائما استقصاء المعلومات و البحث عن الأمور بدلا من المجازفة .... كما أشرت سابقا أنا صادفت بعض التأخير في مشواري في كندا و جزء كبير من الأسباب ترجع لجهلي بطبيعة الأمور و ميل بعض من قابلتهم من المصريين إلي اخفاء الحقائق

- أول فترة في الهجرة دائما ما تكون صعبة .... في جميع النواحي ... الصبر و الجلد و وجود شريكة حياه متفهمة و مساندة تسهل الأمور إلي حد بعيد

- التأقلم مع الحياة الجديدة يتطلب وقتا كبيرا .... في بعض الأحيان العمر كله .....ليس المطلوب التصبغ الكامل بالشخصية الجديدة و لكن المطلوب هو التفهم و التأقلم مع الحفاظ على الدين أولا و الهوية ثانيا ....

نبدأ الحكاية

=======

شاء السميع العليم إن الموافقة على طلب الشغل تيجي الاول قبل الموافقة على الهجرة ..

. رحت للسفارة الكندية أطلع فيزا دخول لكندا علشان ابتدي شغل الموظف المصري الكشر رفض ..

.. قالي ما أقدرش أديلك فيزا work permit و أنت مقدم على طلب هجرة ....

قلت خلص مشوا طلب الهجرة .... قال ما ينفعش لسه ما خلصناهوش ...

حل مشكلة السفاره جه من كندا .... مكتب ال PGME في جامعة تورنتو اتصل بالسفارة و خلص الموضوع .... و الحكاية خلصت على خير ..

. قرروا انهم يسرعوا طلب الهجرة و جيت كندا في يونيو 2005 كمهاجر و أنا و المدام

لينا عقد عمل من أول يوليو ك Fellows في مستشفيتين في تورونتو

اول صدمة كانت الحرارة ... أنا كنت فاكر إن الطيارة نزلت غلط في المكسيك من كتر ما الدنيا حر و رطوبة ... التصور إن كندا بلد برد .... تورنتو بالذات صيفها حر فعلا

تاني صدمة كانت الطوابير على ظابط الجوازات مطار بيرسون أصلا مش مبهر خالص و كبير قوي على الفاضي و بعد رحلة غاية في الأرهاق (KLM بعد ترانزيت في أمستردام )

ما كانتش ناقصة طبور طوييييييل كده

ظابط الجوازات كان محترم جدا بس ظابط الهجرة كان مشكلة ... الأخ من أصل هندي و لكنته تقيلة جدا و ما كنتش فاهم منه كلمة ....

بعد جهد جهيد و سؤال مضحك منه (اذا كنت ما بتفهمش انجليزي ممكن أكلمك فرنساوي ...و طبعا الفرنساوي بتاعه أصلا أضيع من الأنجليزي )

الموضوع خلص و لقيت نفسي في الشارع بادور على تاكسي و ديه كمان صدمة ....

التاكسي ليه نظام و دور و أماكن محددة و لو معاكم شنط كتير ذي أي مصري أصيل يبقى لازم فان .

من صدمة إلي صدمة .... الفندق اللي حجزت فيه على النت طلع في ال-Boys Village

و طلع إن 2005 ده العيد ال-25 و لا الخمسين و لا هباب الطين بتاع استعراض مثلي الجنس ال-Pride parade ...

و ناس جاية من أنحاء العالم كله علشان يشاركوا و يساندوا اقرانهم في كندا

طبعا مناظر ما أنزل الله بها من سلطان و أشكال يندي لها الجبين و أنا و المدام نازلين في قلب الأحداث ....

احنا قولنا ما لناش عيش في البلد ديه و لازم نرجع ...

. بعد تفكير عقلاني اكتشفنا إن المجتمع ده من قيمه تقبل الاخر مهما كان و الحرية الشخصية ما دامت لم تتعدي على المصلحة العامة و التسامح مع الآخر ....

ده كله حيضمن لينا شخصيا العيش في كندا من غير ما حد يتعرض لينا و لا لديانتنا و لا معتقداتنا و لا عاداتنا

الصدمة التالية بقي كانت الشغل

رحت أقابل رئيسي المباشر في الشغل و هو من أصل برازيلي و ساعدني جدا و لحد النهارده افضاله علي

الراجل قعد المقابلة كلها يحذر في من اللي حيحصلي و من ناس معينة و من الفترة الاولي الأختبارية اللي ممكن تنتهي على انهم ينهوا عقدي لو ما أثبتش اني على المستوى المطلوب

( الفترة ديه بتقعد حوالي 3 شهور و بتبقى فتره عصيبة جدا لانك كل يوم تحت أشراف و ملاحظة و اللي بيراقبك بيبقى "breathing down your neck" ذي ما بيقولوا

خلصت المقابلة مع الدكتور البرازيلي و رجعت البيت و أنا هايب الموقف ..

. طبعا أول كام أسبوع ده لا كان فيه تلفزيون و لا نت و لا تليفون ... لا فاهمين نظام المواصلات و لا ألاكل و لا التسوق .....أصعب وقت فعلا

الشقة كنت طلبتها بمواصفات معينة من سمسار برضه عن طريق النت ... جابلي 4 شقق فيهم كل اللي أن طالبه و اداني معاد في تورنتو اختار واحدة منهم

(كل ده خلص في مصر على النت قبل ما أجي )

ابتديت أعرف حاجات مهمة ... أقرب جامع ... جزار حلال ...بقال بيبيع جبنة رومي.......

الغلطة بقى اني فوت ميعاد أول أمتحان و ديه أخرت مشواري حوالي 6 شهور ....ال-MCCEE .... أو اختصارا ال-EE evaluating exam ...

.و ده أمتحان أولي يخضع له كل الأطباء المتخرجين خارج كندا و يعتبر أول خطوة في سكة المعادلة ... الأمتحان على هيئة MCQs .... ورقتين من 9 إلي 4 على ما أتذكر بينهما ساعة راحة ....

الأمتحان في جميع مجالات الطب ....مصدر المذاكرة الأساسي Toronto Notes

و الاهم حل الأسئلة .... فيه اسئلة موجودة على النت .... فيه اسئلة بتتباع في محلات التصوير اللي حوالين الجامعة (جامعة تورونتو ) .... و فيه اسئلة مع ناس...

. و منهم أعضاء الجالية المصرية بس دول ايدك منهم و القبر..... مش حيدوك الاسئلة لغرض ما في نفوسهم.... ما علينا .....

نفس الكلام ده ينطبق على ال-MCCQ1 أو اختصارا ال-qualifying exam بس ده بقى بتحله على شاشة كمبيوتر و كل عدد معين من الأجابات بتدوس enter و ما بتقدرش ترجع لاجاباتك تاني

الفرق الاساسي برضه إن ال-EE أمتحان للمغتربين و المهاجرين و دول منهم كتير مش مستعدين كفاية للامتحان فسهل نسبيا النجاح فيه أما ال-Q1 أمتحان لكل طلبة الطب في كندا ....

و دول وحوش بجد ....أغلبهم داخل الطب بقرض محترم من البنك و متغرب أو متغربة عن أهلهم و ما عندهمش أي استعداد يضيعوا دقيقة من حياتهم ....

.ده سبب من أسباب إن ال-Q1 صعب النجاح فيه .... فيه ناس بتعدي من أول مرة ...مش مستحيل يعني بس العبد لله ما نجحش غير تاني مرة و ديه أخرتني سنة بحالها و التأخير ده كان بسبب الجهة المسئولة عن

استيعاب الأطباء المهجرين ال-IMG المعروفة حاليا باسم CEHPEA

. من الممكن العمل كطبيب في إحدي المستشفيات الكندية في وظيفة " fellow" حتي الحصول على المعادلة ثم البورد ....

تلك الوظيفة متاحة في بعض المستشفيات لبعض التخصصات و تخضع للتنافس بين الطلبات المقدمة ..... ما عليكم سوي البحث عنها كما فعلت أنا ....

google مثلا Surgery+ fellowship + Toronto أو Orthopedics + fellowship+ Vancouver و هكذا

لن تخسروا شيئا و تذكروا

You miss 100 % of the shots you don't take

وظيفة fellow تلك محدودة بعدد سنين معينة ( 3 في أونتاريو ) و تختلف من مكان لاخر و من مستشفي لاخر .... كطبيب تخدير الوظيفة تلك كانت كافية جدا للصرف و الانفاق طول اقامتي في كندا .

. المعادلة الكندية 3 أجزاء ....أول خطوتين امتحانين MCQ أولا ال-MCCEE يليه ال-MCCQ1 و قد أشرت اليهما سابقا .

.اسئلة الأمتحان موجودة على النت في موقع ال-MCC .ca ....

الأسئلة التي أشرت إليها انها تباع في بعض المكتبات حول الجامعة موجودة كاوراق مطبوعة و يصل عددها للمئات .

.الخطوة التالثة ال-MCCQ2 و هو أمتحان عملي و شفوي على مرضي تخيليين ...بمعني أن المريض في الواقع ممثل محترف لديه سيناريو محفوظ و محدد للرد و التصرف ....

توجد العديد من البرامج و الهيئات التي تعد لهذا الأمتحان منها ما هو مجاني و منها ما هو بمقابل مادي

. قبل الانتهاء من المعادلة يمكن التقدم إلي برنامج التنسيق للنيابات الكندية CaRMS ( بعد النجاح في ال-EE )

و لكن قد لا تحصل على التخصص المرجو و عليه تلك الطريقة أفضل للاطباء الشبان الذين لم يقطعوا شوطا كبيرا في مجال تخصصهم و لا يرغبون في تخصص بعينه

أنا ارتكبت عدة غلطات كانت كفيلة بتأخيري حتي الان و أحصرها في الآتي :

1- تأخرت في التقديم لامتحان ال-EE حتي فاتتني فرصة التقدم إلي ال-IMG أول سنة (دورة التقدم إلي ال-IMG مرة واحدة فقط كل سنة )

النصيحة : التقديم باسرع ما يمكن و الحصول على ال-EE مبكرا ....الأفضل قبل القدوم إلي كندا ... خصوصا إن الامتحان يعقد خارج كندا في عدة بلاد

2- السنة التالية زادت شروط التقديم و أصبحت تضم ضرورة النجاح في ال-Q1 .... لم يحالفني التوفيق في النجاح في هذا الامتحان أول مرة مما أخرني سنة أخري

النصيحة : الأستعداد جيدا لهذا الامتحان لانه صعب بالفعل خصوصا لمن مضي على تخرجه السنين و السنين كما إن مشكلته الأساسية التنافس المباشر مع الطلبة الكنديين المستعدين جيدا له ... أيضا مهارة التعامل مع جهاز الكمبيوتر قد تكون مشكلة مع البعض .... الورقة الثانية من هذا الاختبار عبارة عن اسئلة قصيرة مما قد يشكل تحدي آخر

3- مدفوعا بالتأخيرات السابقة و بعد النجاح في ال-Q1 قررت التقدم لمستوي الاستشاري فقط و استبعدت التقدم إلي مستوى نائب .... المنافسة كانت شرسة جدا .... من أصل حوالي أربعين متقدم 16 فقط اجتازوا الامتحان التحريري إلي الشفوى ... منهم 12 فقط (كنت واحد منهم ) تم دعوتهم إلي مقابلة شخصية ....3 فقط تم قبولهم (لم أكن منهم ...و الحمد لله على كل حال )

النصيحة .... المرونة و التواضع و التقديم في كافة المستويات لعل و عسي .... في الواقع القبول في برنامج النيابة قد يكون عسيرا على نفس من هم على شاكلتي و لكنه في الحقيقة يؤمن لك مكان داخل السيستم و يوفر لك فرصة أفضل لاجتياز إمتحان الكلية الملكية

الحقيقة المرة أيضا أن شهاداتنا المحلية (العبد لله حاصل على الدكتوراه من القاهرة ) و خبراتنا لا تعني ابدا فرصة أفضل لك عن الاخرين فلا يغرك شيطان الكبر و التعالي و أعمل ما في وسعك

4 - قدمت السنة الحالية في ال-CEHPEA لكافة المستويات كما قدمت في ال-CaRMS و في انتظار النتيجة النهائية إن شاء الله

كندا دولة تابعة للتاج البريطاني ....قبل كندا كان اسمها British North America... من أكثر الدول المتقدمة عالميا ... أي لستة لاحسن الدول في أي مجال حتلاقي فيها كندا ...

اقتصاد رعاية صحية تعليم إلخ ... تتكون من 10 مقاطعات بالاضافة إلي المناطق الشمالية ... توزيع السكان في كندا بيفكرني شوية بمصر ...

في مصر الناس قاعدة حوالين نهر النيل و الكثافة بتقل لما نتجه بعيد عن النيل ... مصر حاجة و سبعين مليون منهم بتاع 20 مليون في القاهرة الكبري ...

كندا أغلب الناس ساكنة في الجنوب قرب الحدود مع أمريكا و الكثافة بتقل كلما اتجهنا شمالا .... كندا حاجة و تلاتين مليون منهم فوق ال-3 مليون في تورنتو اللي حابتدي أتكلم عليها

المقاطعات الشرقية أو تعرف أحيانا بمقاطعات الأطلنطي

1- Newfoundland and Labrador

2- New Brunswick

3- Nova Scotia

4- Prince Edward Island

ديه مقاطعات فيها عجز شديد في الأطباء في جميع التخصصات بالذات طب الأسرة و الطريق فيهم أسهل نسبيا من بقية المقاطعات انما عيبهم الأساسي الطقس القاسي في الشتاء

تورنتو مدينة عجيبة و متميزة جدا ... يمكن أهم ما يميز تورنتو انها مش بتاعة حد ...الحكاية ديه بتفرق مع المهاجر الجديد قوي ..... يعني تمشي في شينا تاون تقول ديه حتة من الصين و أهلها كلهم بلديات شنجهاي

ربع ساعة ماشي تلاقي نفسك في الحي الكوري .... نهائي كاس العالم بين ايطاليا و البرتغال تقول المشجعين اللي موجودين في الحي الايطالي و البرتغالي دول مستوردين رأسا من روما و لشبونة ....و هكذا ....

تمشي في شارع لورنس في سكاربورو تضرب سندوتش شاورمة شامي و تشتري بقالتك من محل البقالة العربي .... عسل أسود و طحينة حلواني و عصير بست .....و اللي غاوي ممكن يقعد على أي قهوة يشرب شيشة ....

لو تسمع الناس اللي في الشارع بيتكلموا قليل ما تلاقي حد بيتكلم انجليزي كله بيتكلم لغته .... تركب تاكسي لو السواق مش من شبه القارة الهندية أنا شخصيا باقلق

التوليفة ديه موجودة في نيويورك بس تورنتو أهدي و انضف و آمن ( معدلات الجريمة في تورنتو في ارتفاع للاسف بس ما زالت آمنة إلي حد كبير و لا تقارن مثلا لا بنيويورك و لا القاهرة )

أظرف حاجة إن كتير من الأفلام الامريكاني بتتصور في تورنتو على انها نيويورك .... طبعا بيغيروا نمر العربيات اللي في المشهد و يجيبوا كام صندوق بريد عليه علامة نيويورك و يرموا على الأرض شوية زبالة محترمين علشان تبان انها نيويورك

تورنتو في الحقيقة بتتكون من كذا مدينة ... زي القاهرة الكبري كده ما هي قاهرة و جيزة و قليوبية (و دلوقتي كمان 6 أكتوبر و حلوان ) ..

.. تورنتو بتتكون من أربع أقسام كبار ...Peel و York و Durham و Halton كل واحدة من دول بتنقسم لمدن صغيرة

زي سكاربورو و ميسيسوجا و إتوبيكو و أوكفيل و نورث يورك و تورونتو نفسها اللي بنقول عليها وسط البلد

الحياة في تورنتو سهلة إلي حد كبير بمعني أن الخدمات متوفرة و على مستوى من جيد إلي جيد جدا إلي ممتاز ...

. في رأيي الشخصي الأهم على الاطلاق هما التعليم و الصحة ....

ميزة كبيرة من مزايا كندا إن التعليم و الصحة على أعلي مستوى و الخدمة مجانية تماما

و تفصيلا مثلا خدمة البريد ممتازة و تستطيع أن تعتمد عليها تماما في ايصال أي مستندات إلي أي مكان في العالم و في وقت معلوم .....

المواصلات متوفرة و رخيصة إلي حد كبير و لو إن شبكة مترو الأنفاق تحتاج إلي تطوير .....

.... أنا أقارن بين تورونتو و المدن التي زرتها باريس ... طوكيو .... برلين .... مونتريال ..... إلخ

خدمات الشرطة و الأسعاف و المطافي على أعلي مستوى ....

أنا شخصيا تعرضت لتجربة مريرة كدت أن افقد فيها شريكة حياتي بعد أزمة صحية عنيفة لولا فضل الله و سرعة استجابة الأسعاف ...

عندما اتصلت ب-911 (زي 122 عندنا كده ) كان المسعفين داخل شقتي بعد أقل من دقيقيتين و ذهبنا إلي المستشفي في أقل من 10 دقائق ....

لكم أن تتخيلوا امتناني و تقديري خصوصا اني كنت في حالة لا يعلمها إلا الله و نسيت تماما اني طبيب و فقدت القدرة على التصرف أو التفكير

رغم تعرضي لهذا الموقف كطبيب بصورة متكررة و كم انقذت أرواح باذن الله و فضله قبل هذه المحنة

المطافي لا تتواني علي الذهاب فورا لأي بلاغ أو انذار حريق ...

. دأب بعض قاطني العقار الذي أسكن فيه على قلي بطاطس في أوقات غريبة ليلا و نهارا ....

و في كل مرة عندما يزيد الدخان داخل شقتهم يفتحوا باب الشقة لتنطلق صفارات الأنذار في ارجاء العمارة كلها (27 دور .... كل دور 20 شقة ) و لم تتقاعس المطافي مرة عن المجيء ....

و في زمن قياسي للتحقق من الأنذار حتي يكتشفوا إنه انذار كاذب و يعودوا من حيث أتوا

الشرطة شعارها To serve and protect و هو شعار على حق ..

. أفراد الشرطة في غاية الأحترام مع الجميع و لكنهم و في غاية الصرامة مع الخارجين على القانون حتي لو كانت مخالفة مرورية ....

بالطبع المخالفات البسيطة يتغاضوا عنها .... مثلا كنت مرة أقود سيارة مأجرة في احدي ضواحي تورنتو و لم انتبه إن السرعة القصوي في الطريق كانت 60 كم / ساعة ....

تعديت السرعة المقررة (كنت لسه طالع من طريق سريع و ماشي على 84 كم /س ) عندما انشقت الأرض على عربية دورية خلفي ..

. طبعا في هذه الحالة يجب أن أقف تماما على جانب الطريق و لا اتحرك من السيارة .... يقوم الشرطي بالكشف على نمرة السيارة بالكمبيوتر الموجود في سيارته ثم يتوجه إليك....في حالتي دار هذا الحديث بالانجليزية طبعا

- مساء الخير سيدي هكذا تحدث ...

- رديت عليه مساء الخير أيها السيد الظابط هل تعديت السرعة المقررة ...

- نعم كانت سرعتك 84 كم / س في طريق 60 .....

- أسف جدا لم انتبه إلي اللافتة .....

- هل هذه سيارتك (هو يعلم تماما مكنون السيارة كلها )

- لا يا سيدي هي سيارة مؤجرة من هيرتز ....

- أوراق السيارة و التأمين و رخصتك من فضلك .....

أخذهم ثم ذهب إلي سيارته للكشف عليهم و عاد بعد عدة دقائق .... حسنا لا يوجد لك مخالفات سابقة سوي مخالفة ركن في الممنوع ( حقيقة ....مهاجر مصري بقى حنعمل إيه ) و لكنك كنت مسرعا اليوم، أنا أريد مساعدتك و لذلك ساقيد المخالفة علي إن سرعتك 64 كم /س حتي لا تتعرض لخصم نقاط من رصيدك و مخالفة كبيرة ....أنا أسف جدا (الظابط يتأسف لي ؟!!!)

- لا داعي للاسف يا حضرة الظابط أنا شاكر لك جدا و ممتن لك حقا ....Have a nice day

حابتدي برضه بالتعليم و الصحة

===============

التعليم الحكومي من أفضل ما يمكن و كمان فيه مدارس خاصة بس باهظة الزمن و ملهاش لازمة في رأيي .... المشكلة تكمن في التربية مش التعليم ....

طبعا احنا كشرقيين مسلمين أو مسيحيين معتقداتنا و تقاليدنا قد تصطدم (الحقيقة مش قد هي فعلا حتصطدم ) مع القيم الغربية و ديه يمكن أكبر مشكلة ممكن تواجه المهاجر مع عائلته

الحل في أيدينا .... مجهود مضاعف لا يكل و لا يمل و تركيز دائم على التربية الدينية الصحيحة ... الحقيقة برضه الكلام ده بقى لازم جدا في الزمن ده سواء كنا في كندا أو في مصر أو في الخليج ....

.. حكاية العادات و التقاليد ديه فيه منها مفيد و فيه منها مضر ..... الأهم الدين و أعتقد اني كده كده لازم نبذل مجهود مضاعف للحفاظ عليه وسط المغريات العديدة الموجودة دلوقت سواء كانوا في كندا أو في مصر

مثال ناس مصريين إتعرفنا عليهم هنا .... الأب و الأم مهندسين و قاعدين في ميسيسوجا مهاجرين من أكتر من 30 سنة و ليهم أبن و أبنة موليدين هنا ..

..الأم قعدت من الشغل بعد كل ولادة 5 سنين علشان تاخد بالها من الاطفال و إيه اللي بيشوفوه و بيتعلموه ....

دروس قرآن أسبوعية و دروس لغة عربية و دروس اضافية في البيت كمان .... النتيجة ولاد زي الفل عارفين ربنا كويس قوي و صلاة و صوم و التزام ...

. الهدف من القصة ديه مش إن كل الولاد حيطلعوا كده لأ ...الهدف إن الوالدين عليهم مسئولية كبيرة جدا خاصة في العصر الحالي

نيجي للصحة ....

=========

الرعاية الصحية في كندا من أفضل ما يكون و مجانية لكن المشكلة في تأخير تقديم بعض الخدمات الغير طارئة ...

. يعني مثلا أنا حكيتلكم على الموقف بتاع عربية الأسعاف ده ....الحالات الطارئة ما فيهاش هزار و لها الأولوية انما الحالات غير الطارئة ممكن يبقى فيها تأخير ....

مثلا عملية تغيير مفصل ممكن تتأخر 6 شهور لأن العملية بالدور ( ما تنسوش انها مجانية ) علشان تاخد ميعاد من دكتور العائلة علشان الكشف الدوري السنوي ممكن تتأخر كام أسبوع ...

-. لو رجلك أتجزعت و رحت الطوارئ ممكن تقعد 3 - 4 ساعات علي بال ما حد يشوفك .... الحال ده ممكن ما يعجبش ناس و ممكن يعجب ناس ...

. أنا عن نفسي شايف إن نظام الرعاية الصحية الشامل المجاني ما ينفعش يبقى احسن من كده و لو إن الحكومة الكندية مش موافقة على الكلام ده و بتحاول تحسن الخدمة و تقصر قوائم الأنتظار

نيجي للطقس ...

=======

. كندا برد ما فيش كلام .... لكن تورنتو من أحسن الأماكن في كندا جوا ....

فانكوفر درجات الحرارة فيها أحسن من تورنتو صيفا و شتاء انما مطر مستمر و الشمس بتطلع قليل أصلا ....

اصدقاء فاضلين لي من لبنان طلعوا من تورونتو لفانكوفر و ما قدروش يستحملوا هناك و راجعين تورنتو إن شاء الله على أول السنة

جو تورنتو مميز جدا .... فاكرين كتب الأطفال المصورة عن الفصول أو أوبريت الربيع بتاع فريد الأطرش

الربيع بديع و درجات حرارة معتدلة و الشجر اللي كان عاري تماما من الورق في الشتا و شكله مات خالص بامر الله سبحانه يرجع يتغطي كاملا تاني و الورود و الأزهار تفتح في كل حتة

الصيف حار و رطوبة و الشمس ساطعة و الناس مخففين الهدوم و طالعين على الشواطئ أو الكورنيش ساعة العصاري و المغرب

الخريف بارد نوعا و الشجر بيغير ألوان ورقه لاصفر و أحمر و بني و على أخر الخريف الورق كله يقع على الارض و يبقي لعبة للرياح تاخده و تجيبه

البرد قارص و تلج و جليد ... الحرارة ممكن تنزل لناقص أربعين بس العادي بيبقى ناقص 15 أو عشرين بال-windcill

ديه حاجة تانية حبتها في كندا .... الحرارة بتتقال قيمة و احساس ...

. مثلا في مصر يقولوا الحرارة 35 تنزل الشارع تقول مش ممكن تكون 35 ديه مش أقل من 45 ....35 ديه بتتاخد في مطار القاهرة باين تحت ظروف جوية معينة

انما احساس الناس في ميدان العتبة مثلا لا علاقة له بالحرارة ديه .... رطوبة و رياح و عوامل تانية بترسي على حرارة معينة ....

. في الصيف الدرجة بتتقاس بال-Humidex و في الشتا بال Wind chill

الحقيقة برضه إن الدنيا هنا مصممة لجو الشتا و الحكومة ما بتكلش عن الخدمة .....

الدنيا كلها هنا مكيفة تكييف مركزي و حياه ال-Indoors قوية جدا لدرجة انك لو عايز ممكن ما تخرجش الشارع أصلا في الشتا و لو خرجت يبقى لاقل وقت ممكن .....

طبعا لبس الشتا لازم يكون محترم جدا و عازل للحرارة تماما ..... طبعا أستحمال الحرارة بيختلف من شخص لاخر ....

الحاجة التانية بالذات في تورنتو البلدية ما بتونش في الشتا كاسحات الجليد شغالة الله ينور .... التلج بيتشال باسرع ما يمكن ...

. الطرق و الكباري اللي بتتبهدل جامد من الملح و الجليد كل شوية يرصفوهم مرارا و تكرارا ....

مصل الأنفلونزا ببلاش في كل حتة للي عايز .... تحذيرات الأرصاد الجوية بتتغير كذا مرة في اليوم ....

يعني لو توقعوا الحرارة تبقى 15 و حصلت حاجة تخلي التوقع يتغير و يبقى 14 حتشوفه قدامك في التلفزيون و تسمعه في الراديو و تقراه على النت

اما على الحجاب

---------------

فلا تأثير إطلاقا منه على الاقل في أونتاريو ... كما ذكرت سابقا خبرتي كلها في العمل كانت في تورنتو حتي الآن ...

في جميع المستشفيات التي عملت أنا أو زوجتي بها كان يوجد محجبات و لم أسمع بأي مضايقة من أي نوع في أي مستشفي ...

. قد يطلب منك تغيير الطرحة أو الايشارب اذا ما تعاملت مع مريض بمرض معدي أو اذا ما طلب منك الدخول إلي منطقة معقمة كالعمليات مثلا لكن لا تأثير لحجابك على اختيارك لوظيفة ما ....

نيجي لمصاريف المعيشة في تورنتو ..

================

.. طبعا تورنتو هي أغلي مدينة في كندا في كل الأحصائيات في كل المجالات فاي حتة تانية المصاريف حتبقى أقل ... بس ساعات و في وظائف معينة الدخل كمان بيبقى أقل

أكبر جزء في المصاريف هو السكن سواء ايجار أو رهن أو قسط .... طبعا يفضل الأول الأيجار لحد ما الأمور توضح ... أنا عن نفسي مأجر من يوليو 2005 الحقيقة لو رجع بي الزمن كنت يمكن أخد قرار مختلف انما ظروفي إن كل سنة بابقي أملي اني اجتاز أمتحان و أخش السيستم لكن ما كانش فيه توفيق

زميل لي من جامعة القاهرة ... مدرس بالجامعة برضه بس أصغر مني بسنة هاجر من مصر بقاله سنة و نصف ... ده بقى قرر إنه يقتني بيت بنظام الرهن العقاري بعد 6 شهور من وصوله و فعلا عمل كده

الفكرة إن الأيجار فلوس رايحة لكن الاقتناء كل مليم ....قصدي سنت بتدفعه بيقعد في تمن البيت ...

نرجع لمرجوعنا ايجار شقة في وسط تورنتو حجرة نوم واحدة و رسبشن ممكن يكون في متوسط 1500 دولار في الشهر ... تطلع أو تنزل حسب المكان و امكانيات العمارة و موقعها من الخدمات .... مترو ..مراكز تسوق ...إلخ .... كل ما بعدت عن وسط البلد الرقم ده في الأغلب الأعم بينزل

الحجرة الأضافية ممكن تزود الأيجار 300 400 دولار .... أغلب الناس الجديدة اللي عندها أطفال بتفضل تبعد شوية عن وسط البلد لكذا سبب

أولا الأيجار أقل .... بتمن ايجار شقة في وسط تورونتو ممكن تأجر شقة أكبر أو حتي بيت

ثانيا الضواحي أفضل لتربية الأطفال .... المدارس أحسن و نوعية الناس اللي ساكنة أحسن و المناظر المؤذية اللي ممكن تبقى في الشارع أقل كتير

طبعا تبرز مشكلة المواصلات لذلك يفضل لو حتسكن بعيد عن وسط البلد تبقى قريب على قد ما تقدر من محطة مترو ... و ده موجود بكثرة الحقيقة و فيه عمارات كتير متوصلة بانفاق تحت الأرض توصلك لمحطة المترو مباشرة من غير ما تطلع للشارع ( في الشتا ديه ميزة كبيرة )

ما دام جينا للمواصلات نجيب بقية تفاصيلها ... زاي ما قلت قبل كده مقارنة بمدن تانية كتير زاي باريس مثلا مواصلات تورنتو محتاجة تطوير ... انما هي مش بطالة ... فيه شبكة مترو و اوتوبيس و ترام (street car) و اسعارها معقولة جدا و مواعيدها مظبوطة ..... يوم ما بيحصل مشكلة بسبب الجو أو أي عطل أو اضراب أو أي سبب الموضوع بيبقى متذاع على الراديو و التلفزيون و التأخير عن الشغل بيبقى متوقع و ما حدش بيلومك عليه

بالنسبة لاقتناء سيارة خاصة سعر السيارات أرخص من مثيلاتهم في مصر مثلا ... انما المصاريف الدورية كتير ... صيانة و تأمين و مصاريف ركن خصوصا في وسط البلد إلخ .... أغلب الوقت مش حتحتاج العربية غير في الويك اند علشان التسوق .... أنا قضيت أول كام شهر من غير سواقة خالص و كانت ماشية بعد كده سنة و شوية بأجر عربية في الويك اند اللي محتاج فيه عربية و دمتم

على ذكر التسوق تورنتو من أكبر المراكز الاقتصادية في العالم و كمان مليانة أسواق متعددة و منها كتير ليها طبيعى اثنية ... يعني ممكن قوي تلاقي مطعم تركي جنبه معرض سجاد ايراني جنبه بقال طلياني جنبه عطار صيني و هكذا .... مراكز التسوق العملاقة موجودة بكثرة طبعا و فيه منها كتير مصمم برضه انك ما تخرجش للشارع من محطة المترو

مصاريف الأكل و اللبس و ما شابه لا تقارن بمصاريف السكن ... لو قلنا انك حتصرف نصف مرتبك على السكن و النص على الباقي يبقى الدنيا أخر رحرحة .... مثلا حتأجر شقة ب-1500 دولار و تصرف أنت و مراتك 1500 كمان يبقى أنت كده عايش كويس أوي .... كل طفل طبعا بييجي بمصاريفه الأضافية .... مستريح 500 دولار لكل طفل أكتر أو أقل حسب التساهيل ... مرتب نايب التخدير في سنة أولي نيابة 45 ألف دولار في ألسنة .... غير التسهيلات و الخصومات اللي بياخدها تبع الجامعة و اتحاد النواب و ما يوازي نقابة الأطباء (CMA)

طبعا المصاريف ديه تقربية و مش ملزمة و الناس بتختلف في طريقة صرفها انما أكيد الأطباء من أعلي الدخول في كندا و مرتب نايب حتي كافي كبداية

محلات الجزارة و البقالة و مطاعم الأكل الحلال موجودة .... عادة بتنقسم لقسمين ... محلات مملوكة لعرب أو لغير عرب ... باكستان و هنود و افغان الخ .....الحاجات الرفيعة اللي ساعات بتفرق مع الواحد موجودة برضه ...أنا حكاية الجبنة الرومي ديه كانت عاملة لي أزمة لحد ما لقيتها ....

أكبر منطقتين فيهم نسبة عرب هما ميسيسوجا و سكاربورو ... طبيعى قوي تلاقي يفط المحلات مكتوبة بالعربي و الناس اللي فيها ما بيتكلموش غير عربي

-----------------------------

كندا لا تعترف باي شهادات من خارجها و لابد من المعادلة ...

لكن شهادة من دولة محترمة زاي الولايات المتحدة أو المملكة المتحدة إلخ ... بتفرق كتير ... بتعمل Fast tracking زي ما بيقولوا هنا ...

. للخبر اليقين من الأفضل مراسلة الكلية الملكية .rcpsc.medical.org حضرتك تقولي أسم الجامعة المانحة للدرجة و منهج الدراسة و هما يردوا حتختصر قد إيه في الطريق

بالنسبة للمدارس فالتعليم في كندا من أحسن ما يمكن و في خلال بضع شهور تلقوا العيال حالهم اتبدل و لسانهم قلب انجليزي و تفكيرهم أتغير ....

طبعا من المهم أن الوالدين يتابعوا الأولاد يوميا و يخلوا بالهم من الأفكار اللي ممكن تتسرب ليهم ... طبعا العملية مش سهلة لكن الأمر يستحق

كقاعدة عامة أي وظيفة في كندا حتعيشك معقول بس مش شرط انك تبقى مرتاح

... الحقيقة مندوبي شركات الأدوية اللي بحتك بيهم بيبقوا عادة من فئة المديرين ..... لطبيعة المستشفي مش علشان خاطر العبد لله طبعا ..

. بس أنا لي زميل طبيب مصري يعمل كمندوب في شركة أدوية إلي جانب عمله ك research fellow و أعتقد إنه مبسوط من الشغل في وظيفتين .

.. أعتقد إن وظيفة واحدة من دول مش كفاية لو فيه مصاريف اضافية ....لو معاك عائلة أو بتصرف علي هواية زي زميلي ده مثلا

تعاملت مع جزار هندي مسلم في تورنتو و كان معقول (لقاطني تورونتو هو إسمه اقبال في ثورن كليف بارك )

... الأخوة الهنود و الباكستانيين بيقطعوا اللحمة قطع صغيرة جدا .... لازم تبقى واقف على أيديهم علشان تاخد اللي أنت عايزه .... عادة كنت باعمل كده لما كنت باشتري لحمة عادي منهم ....

لحد ما غيرتهم و بقيت اتعامل مع جزار لبناني في سكاربورو

السنة ديه كانت أول مرة أصلي العيد في سانت كاترين و الحمد الله قلبي انشرح لما سمعت التكبير من المصلين ... كافة الأعراق و الأعمار ....حاجة تفرح فعلا ....

على فكرة بعد الأخ الفاضل اللي كان جانبي ما حضني في طريقي إلي الخارج كان 2 أو 3 أخوة تانيين حضنوني و هنئوني بالعيد ...

. طبعا أنا لا أعرفهم و لا هم يعرفوني و لكنها مشاعر أخوية خالصة ....علي بال ما وصلت العربية كانت عينيا بتدمع فعلا

أنا في كندا من صيف 2005 تورنتو تحديدا .

في تورنتو، بالذات وسط البلد و الطرق السريعة ، البلدية ما بتستناش على تلج ....التلج ينزل من هنا و تلاقي كاسحات التلج ما بتونش تشيل التلج من على الطريق و الأرصفة .

أنا كنت في منطقة نياجارا الأسبوع اللي فات كله .... سانت كاترين و ويلاند و نياجرا أون ذا لايك .... برضه البلديات ما بتسكتش ...

أنا كنت فاكر الموضوع تورنتو و بس لكن الحقيقة لا .... طبعا الشوارع الداخلية الكاسحات ما بترحهاش لكن الشوارع الرئيسية و كل الطرق السريعة كبيرة و صغيرة و حوالين المسشفيات و المنشأت المهمة

الكاسحات ما بطلتش نهار و ليل و حتي في السبت و الأحد .... مش عارف ليه مجرد إن الناس شايفة شغلها بيفرحني

لحقيقة النقطة ديه بالذات تستاهل أني أكررها ... بعد ما المدام حركت العربية.....بعد الحادثة......

كلمت البوليس و بعدين كلمتني ما فيش دقيقتين و عربية البوليس كانت جنبها و على أهبة الأستعداد لمساعدتها ....

و لا كلمة عن رخصة و لا بطاقة و لا أي حاجة .... السؤالين اللي أتسألوا أنت كويسة ؟ ... محتاجة أي مساعدة ؟ ...

. و لما أتأكدوا انها بخير سابوها تمشي و طلبوا بادب الأبلاغ عن الحادثة في مركز البوليس في خلال 24 ساعة .... مركز البوليس ده شغال 24 ساعة كل يوم طول الأسبوع ... علي بال ما رحنا كانت بعد الساعة 5 و ما كانش فيه غير 2 ظباط نبطشيين .... قمة الأدب و الأحترام و كمان تعاطف كامل و دعوات بالسلامة

وقت الحادثة حصلت كذا حادثة في نفس الوقت و بقية الطريق كان فيه كام حادثة تانية ....

كل موقع فيه عربية بوليس على الأقل زائد عربية تانية أو عربية اسعاف أو مطافيء أو ونش بيجر عربية .... الكلام ده كله الساعة 7 الصبح و الشمس أصلا لسه ما طلعتش

الدرس المستفاد

=========

ما فيش كبير على السواقة على التلج خصوصا التلج الأسود ده

(طبقة من التلج الرفيع بتبقى فوق الأسفلت فما بتبنش من على بعد و بتبقى زلقة لابعد درجة )

الاخوة الأفاضل كانوا اتكلموا في الموضوع ده قبل كده خاصة الأخين الفاضلين د تهامي و د الشامي ....

أحب بس أضيف لو لا مفر من السواقة على التلج لازم توخي أقصي درجات الحذر .... و السرعة ما تزدش على 70 80 كم /س بالكتير ....يا ريت أقل حتي ....

.العربية لازم تكون مناسبة للسواقة على التلج ..... عربية تقيلة وزنا و موتور قوي و فيها ABS و EBD و TC و AWD و لازم لازم عجل مجهز للقيادة على الجليد = winter tires .....

هي ديه المشكلة مع النوع ده من التلج ال-Black ice ...

. الجليد الأبيض ده ممكن التعامل معاه (بحرص طبعا ) لكن مشكلة البلاك ده أنه على خوانة فجأة تلاقي نفسك فقدت السيطرة على العربية ...

اللي ممكن يتعمل لو حد قدر يركز هو فصل الحركة عن الموتور ... وضع الفتيس في المور لو العربية مانويل أو نيوترال لو أوتوماتيك ...

طبعا لو قدرت تفكر في اللحظات ديه

طبعا كل ده أخذ بالسباب انما أولا و أخيرا رحمة ربنا و ستره

بناء على تجربتي الشخصية يفضل التسريع بتقديم طلب الهجرة ..

. القوانين و اللوائح بتتغير بسرعة و عادة إلي الأصعب ... و حسب اعتقادي الوقت ما بين التقديم و القبول ممكن يطول ....

في حالتي أنا وجود عقد عمل سرع بالقبول لطلب الهجرة انما كانت مشكلة كبيرة و ما تحلتش غير بتدخل جامعة تورونتو في الموضوع

فيه اتنين زمايلي أعرفهم جم الأول على عقد عمل و لما شافوا الحياة على طبيعيتها و عجبتهم قدموا على الهجرة ....

في الحالة ديه بتقدم من خارج كندا ( زمايلي دول قدموا من بافالو في أمريكا باعتبارها قريبة ....

واحد مصري و الموضوع خد حوالي سنتين ما بين التقديم و القبول و التاني باكستاني و ده الطلب أتأخر و اضطر يسافر باكستان لأن عقده خلص و كان لسه ما جالوش رد )

لويك اند بيبقى أساسا للراحة

=============

و شغل البيت و للتسوق و التزاور و الفسحة بشرط ما حدش فينا يبقى نبطشي ....

بعد بحث و تغيير كذا مرة تسوقنا الأساسي للاطعمة من سكاربورو ... لورنس افنيو ده ...محل إسمه أرز و جزارة اسمها الغدير ...

. كل حاجة عايزينها بتبقى هناك .... الزيارة التانية الاساسية بتبقى لجامع ...

. فيه جامع جنب البيت حوالي 5 دقايق مشي باصلي فيه بعض الفرائض كلما سنحت الظروف

لكن أنا بحب أصلي في جامع ISNA اللي في ميسيسوجا قرب أوكفيل (صورته موجودة في نفس الموضوع ده )....

مش عارف ليه لكن عادة بحب أصلي في جامع ليه مئذنة .... المشوار حوالي 30 كم من مكان ما أنا موجود لكن باحس براحة نفسية عجيبة لما باروح هناك ...

. أكتر 3 حاجات فرقت معايا جدا في تجربة كندا ديه .... الجامع ده .... رخصة القيادة ... و الجبنة الرومي في أرز

استخدمت المترو كتير لكن صراحة ما باحبوش .... أنا باقارنه بمترو باريس و مترو طوكيو ....

دول كانوا وهم في رأيي .... مترو تورنتو كويس مش وحش لا يقارن طبعا بالقاهرة انما لو طلعت رخصة قيادة تأجير عربية أحسن طبعا ....

المترو معقول نضيف و مواعيده مظبوطة لكن ما بستخدموش كتير خاصة اني مش بحتاجه للشغل .... لو الجو وحش قوي باخد تاكسي من قدام البيت و بياخد بتاع 6 دولار بالبقشيش

لو عندي مشوار لحتة جنب محطة مترو بيبقى المترو اختيار هايل خصوصا لو المشوار بعيد أو ما فيش أماكن ركن و اختارت وقت بعيد عن ساعات الذروة

بالنسبة لل-Wii بقى فده الخطوة القادمة ان شاء الله ..... لكن لازم الأول طبعا أمهد للمدام و اقنعها .... و بعدين ألاقي Console لانه شحيييح شوية و بيتخطف أول باول ..

.. يا سلام بقى لو عرفت أجيب واحد في ال-Boxing day ده بيبقى يوم 26 ديسمبر و الأكازيونات بتبقى غير طبيعية يوميها ...

. يفضل بقى رفع اللياقة البدنية علشان كتير من الألعاب بتطلبها

-----------------------------------------------------------

ده كانت معلومات مفيدة وقيمة جدا جدا...... ولنا عودة ان شاء الله

[د هشام ابراهيم]

جزاك الله كل خير يا سيدتي الفاضلة ......أنا نفسي مش فاكر كل الحاجات اللي قلتها ديه .....يا رب تفيد حد .....أما حضرتك فادعو الله أن يتقبل منك مجهودك و يثيبك علي وقتك و تعبك خير الثواب

[arora]

مجهود مشكور فعلا يا اختنا سمية

بس ماتنسيش تكلمينا عن كيفية تحويل الاموال الى كندا وازاى نحولها والبنوك التى تقوم بذلك

والامور المالية دى برضه

الله يعوضك عن تعبك بكل خير

[somayasaleh]

معلومات مفيدة من خبرة مدام دعاء

النهاردة حلقة استخراج الاوراق الرسمية

=================

هناك 3 انواع من الكروت :

1- كارت تحقيق الشخصية ( pr ) واكيد كلكم عارفينه لانه زى البطاقة الشخصية وده قالولنا فى المطار انهم هايبعتوه لنا بعد 5 اسابيع يعنى لسة ماستلمناهوش

2- كارت التامين الاجتماعى ( NAS)

3- كارت التامين الصحى ويسمى فى كيبيك ( solie ) ( الشمس )

طبعا نظرا لوجود الاولاد و الطقس غير مستقر فكان صعب جدا اننا نتحرك كلنا علشان نخلص الاوراق دى

فكنت انا انزل مرة وجوزى ينزل مرة علشان كده الحاجات دى خلصت على مراحل

انا اتحركت الاول علشان اعمل كارت التامينات الاجتماعية وحسب ما سمعنا ان الكارت ده بيكون للزوج والزوجة فقط ومافيش للاولاد

وبعد ماوصلت المكان المطلوب اكتشفت بالصدفة ان فيه كمان للاولاد تامينات اجتماعية وحمدت ربنا ان انا كانت معايا اوراقهم وباسبوراتهم كلهم

طبعا كل الناس على المنتدى قالوا ان الحاجات دى بتخلص فى عشر دقائق على الاكثر بس فى حالتنا طبعا الوضع مختلف نظرا لعدد افراد الاسرة وبدات اقابل بكم كبير من الدهشة من الموظفات ( يااااااه 6 افراد مرة واحدة )

المهم عملت الكروت لى والاولاد بس وجوزى كان فى مرحلة لاحقة

والموضوع مش معقد يادوب الموظفة بتشوف الاوراق ( اللاندينج بيبر - والسى اس كيو - والباسبورات ) وبتدخل البيانات على الكمبيوتر وخلاص

وبيكون للكارت ده رقم سرى المفروض ماحدش يعرفه لان من خلال الرقم ده الحكومة بتبعت منحة الاطفال او اى مساعدات مادية تانية من الحكومة

وكمان ليه كلمة سر بتكون عبارة عن اسم العائلة الخاص بوالدة صاحب الكارت ( يعنى كلمة السر بتاعتى هى اسم العائلة الخاص بوالدتى )

وبعد كده الموظفة قالت لى هانبعت لكم الكروت فى خلال 3 اسابيع والحقيقة وصلوا فى البريد بعد حوالى 10 ايام

اما بخصوص كارت التامين الصحى فده كان كوميدى شوية

لان الموظفة برضه استغربت ان عندى 4 اطفال ( وده خلاص بقى عادى معايا )

لكن كمان مع كل اسم تسالنى ده ذكر ولا انثى حتى اسم زوجى وبعد كده قالت لى سامحينى لان الاسماء غريبة علىة واول مرة اتعامل مع اسامى عربية

وكارت التامين الصحى لازم له صورة فبعد ما خلصت ادخال البيانات قولت لها انا معايا صور جاهزة قالت لى ماينفعش لازم تتصورى هنا ( 8 دولار ) فروحت علشان تصورنى فدار الحوار ده :

هى : يالا بقى اقلعى الايشارب

انا : لا هاتصور بيه

هى : ( باستغراب شديد ) معقول هاتتصورى وانتى لابسة الايشارب ؟؟

انا : ايوة مافيش مشكلة

هى : هو الموضوع خاص بالدين ؟

انا : ايوة

هى : اوكيه اقفى هنا وابتسمى

وبس خلاص وقالوا لنا هانبعته لكم بعد حوالى 4 اسابيع وهايبتدى العمل بيه فى اول شهر يونيو

وكده خلصت مرحلة استخراج الاوراق الرسمية

عدد افراد الاسرة مهم جدا فى تحديد عدد الغرف فى الشقة ( يعنى احنا مثلا 6 افراد وصاحب العمارة اللى احنا فيها ماكانش عايز ياجر لنا الشقة علشان عددناكبير والشقة غرفتين وصالة ولما جه عندنا وشاف ان الاولاد اعمارهم صغيرة جدا وافق بالعافية )

- دايما الكهرباء على المستاجر

- مافيش هنا غاز كله كهرباء

- اما الماء الساخن والتدفئة فى الغالب بتكون مشمولة فى الايجار ( لكن فيه شقق ايضا بتقولك المية السخنة عليك )

- اما موضوع الاسعار فده متفاوت جدا ( يعنى على حسب راى الشخصى الشقة الغرفتين وصالة تبدا من 700 وانت طالع - والشقة 3 غرف وصالة تبدا من 800 وانت طالع )

الحقيقة هو ليس معهد للغات هو مكتب لمساعدة المهاجرين غير حكومى ويقدم كورسات مجانا للغة الفرنسية للمهاجرين الجدد

المدرسة اللى بتدرس لنا من كيبيك واول مرة تدرس فى المركز ده بس بقالها 17 سنة فى تدريس اللغة الفرنسية فى جامعة لافال وCEGIP STE FOY

ودة مكان كمان لتعليم اللغة الفرنسية للكورسات الحكومية

المهم هى سيدة متفهمة وودودة جدا وواضح انها شاطرة جدا فى مجالها

اما بالنسبة للجنسيات فانا معايا فى الكلاس بتاعى الجنسيات الاتية :

( مصر - اليابان - الصين - اسبانيا - شيلى - كولومبيا - كوبا - الاكوادور - المغرب - استراليا )

وممكن تتعلم طبعا لغات تانية غير اللغة الفرنسية من خلال التواصل مع كل هذه الجنسيات

فاصل وسنعود بأذن الله

تم تعديل 24 أبريل 2009 بواسطة somayasaleh

[ايناس احمد]

مجهود أكتر من رائع يامدام سميه

انتى عارفه اننا بنحب الملخصات كلنا بس والله فكره جميله ومجهود خرافى

احنا متابعينك واصلى ياأختى الفاضله وجزاكى الله الف خير