الموسيقى الغربية في مصر

[Sherief AbdelWahab]

في مصر كان في وقت ما فيه فرق بتعزف غربي.. سواء اللي بتقدم موسيقى غربية صرفة أو أغاني مصرية في قالب موسيقي غربي .. زي البيتي شاه وطيبة والحب والسلام وحالياً ام تي ام..

شايفينها كانت زمان إزاي ودلوقت إزاي؟

خلص الكلام

[د هشام ابراهيم]

موضوع جميل يا شريف باشا

فرق السبعينات ديه باعتقد انها كانت أداة ساعدت في تطوير الموسيقي الشرقية ..... أعتقد إن عمر خورشيد و هاني مهني كانوا بيلعبوا في فرق من ديه (متهيألي كمان أبن توفيق الحكيم كان في فرقة مماثلة بس مش فاكر اسمها )

لما شفنا بعد كده استخدام الاورج و الجيتار في أغاني عبد الحليم مثلا كانت اضافة ممتازة ..في رأيي الخاص ...و أثرت الالحان دون الاخلال باصالة و روح الموسيقي العربية الشرقية .....أكيد براعة العازفين زاي خورشيد و مهني و الحسيني كان ليها دور كبير

الفرق الحديثة باحس انها مسخ و تقليد "ساذج " للموسيقي الغربية .....مش حاسس انها قدرت تحتفظ بروح و أصالة مزيكتنا و تراثنا .....موقفي منها ....ليه أسمع التقليد الممجوج ...أحسن أسمع الاصل .....

تحياتي يا أفندم

[Sherief AbdelWahab]

لازم نفصل ما بين الفرق الغربية وظاهرة الفرق الغنائية اللي انتشرت في مصر بشكل عام في السبعينات والتمانينات زي المصريين والأصدقاء واللي اتأثر بعضها طبعاً بالفرق الغربية وأشهرها البيتي شاه والحب والسلام والبلاك كوتس..

الغربي الحالي على نوعين .. نوع متمسك بغربيته ودة جمهوره محدود جداً .. ونوع مزيكته غربي لكنه بيحاول تقديم شيء محلي من خلالها ، ودول امتداد لفريق زي "طيبة" مثلاً.. واللي كان بيكتب كلمات أغانيه شاعر هام جداً رغم تجاهله اسمه "عصام عبد الله"..

صادفت محاولات بعض هؤلاء النجاح وبعضها الفشل الذريع ، مثلاً في التسعينات ظهرت محاولة لعمل أغاني راب مصرية ، لكن التصاقها الشديد بالمحتوى الغربي رغم إمكانية تناولها لمواضيع مصرية صرفة ضرب تلك المحاولة في مقتل.. رغم إن طابع الراب المعتمد على الزعيق والهرب من "الميلودي" المصاحب للأغنية التقليدية وسهولة كتابة كلماتها بعيداً عن الأوزان والقوافي والتقليدي من طرق كتابة الأغنية ممكن يكون وسيلة قوية جداً من وسائل التعبير زي ما هو في بلاد كتيرة .. لكن عشق التقليد ما لوش آخر لكن استخدام الدماغ فاني!

وفيه اللي شايف من مقدمي الموسيقى الغربية الحاليين في الآلات والأنماط الغربية سلاح قوي للتعبير فيما تعجز عنه الإيقاعات والقوالب الموسيقية المصرية التقليدية ، ودة اللي قلت عليه يا دكتور هشام فيما يخص "عمر خورشيد" اللي ارتبط اسمه بإدخال الجيتار في الموسيقى الغنائية المصرية التقليدية في ألحان "عبد الوهاب" و "بليغ" ، والأورج اللي ارتبط اسمه بـ"هاني مهنى" ، وحتى الأكورديون لما اتكهرب في أغنيتي "قارئة الفنجان" و "رسالة من تحت الماء" مع العازف والموسيقار الراحل "مختار السيد" ..

وبرضه فيه اللي واخدها عياقة طبقية ، أو ثقافية يترسم بيها على جمهور المثقفين الجدد في ساقية الصاوي ودار الأوبرا..

خلص الكلام