مشكلة بخصوص السكن في منطقة شعبية بالرياض

[ebnzenhom]

السلام عليكم ورحمة الله وبركاتة .. ازيكم يا جماعة ..

بصراحة انا مش عارف اكتب اقول ايه .. انا متضايق جدا جدا وهاين عليا اعيط بجد ومكدبش عليكم انا فعلا بدمع وانا بكتب .. وبصراحة اكتر مش عارف انتم هاتفيدوني ازاي في الموضوع ده بس انا قلت اكتب واتكلم مع حد يمكن ده يريحني مع ان الساعة داخلة على 2.30 صباحا .

انا ساكن مع اهلي في الرياض ولسة جاي اقامة من شهر تقريبا - انا طول عمري عايش هنا اقامة على والدي وبعدين زيارة وبعدين اقامة على كفيل - حاي ادور على شغل كويس واجيب مراتي وبناتي واعيش هنا المهم ساكنين في حتة شعبية شوية في حي اسمة غبيرة في الرياض هوه مايتقالش علية شعبي لان الحتة الشعبية في مقولات المصريين هيه حته فيها جدعان وولاد بلد وناس بتفهم في الاصول الحكاية بدات من حوالي ساعة يعني كانت 1.30 لقيت باب الشارع تخبيط ورزع وناس عمالة تزعق في الشارع المهم العمارة فيها 4 شقق واحنا في الدور الارضي خرجت افتح الباب لقيت جاري في البيت الي مقابل للعمارة اللي ساكن فيها واقف هوه ويجي 3 انفار واقفين وعمالين يزعقوا لان العربيات في الشارع كتير وهما مش لاقيين حتة يركنوا فيها بصراحة انا استغربت لانهم متعودين حتى لو عندهم ضيوف او عربيات كتير بيقفوا في نص الشارع عادي جدا والشارع يقف مش مهم فبسأل واحد فيهم انت عاوز تشيل انهي عربية لاني مش شايف اي عربية ناحيتهم مش بتاعتهم واللي على الجنب بتاع العمارة بتاعتنا عربيتين بتوع جيراني في نفس العمارة المهم لما سألتة قالي انت ليك سيارة في الشارع قلتلة لا انا سيارتي بعيد قالي خلاص مالكش دعوه وقعد يهفلط بكلام طبعا انتو عارفين العنطزة احنا لينا ملك من 30 سنة وانتم .. وانتم .. فاهمين طبعا .. قام واحد من اللي كانوا واقفين طلع العمارة بتاعتنا وخبط على التلات شقق الساعة 1.30 تقريبا او يمكن اكتر شوية ومانزلش فعلا الا والراجل صاحب العربية نزل معاه العربية تلات تربع يعني دينا بالسعودي واقفة جنب البيت ومش مدايقة الشارع لا من بعيد ولا من قريب المهم انا دخلت وتوقعت زي ما انتم متوقعين ان الراجل في بيتة ونايم والساعة 1.30 وبيقوم الساعة 6 يروح شغلة لو اي حد على الاقل هايقولة مش هاشيل العربية لانها واقفة قدام بيتي دي ابسط حاجة اللي مش بسيط بالنسبة لية ان الراجل مسمعتش صوتة خالص خرج من البيت وشغل العربية ومشي بيها وهوه بيتاوب انا واقف وشايفة من الشباك وانا في حالة زهول اكن واحد ضربني بالقلم على وشي لا وكمان ايه سمعت اخينا اللي عاوز يشيل العربية بيقول ايه بعلو صوتة ده انزار وبعد كده هانكسر السيارات الراجل اللي شال العربية ده انا مش عارف هوه شالها ليه هل خايف هل مش خايف ومش عاوز يعمل مشاكل - نسيت اقولكم من الاول الناس دول تجار مخدرات كل شوية تلاقي عربية تيجي تليفون واحد منهم يطلع يديلة اللفة وياخد الفلوس ويمشي اول ما سكنت قلت يمكن اصحابهم بس كل مرة اشوف عربيه جديدة لحد ما تأكدت انها مخدرات لان - انا على طول فاتح الشباك علشان ادخن فمتابع القصة -

بصراحة انا لو مكان الراجل ده هل كنت هاشيل العربية ولا هاينتهي الموضوع بواحد في المستشفى وواحد في السجن ولا ازاي الموقف ده هزني جدا لدرجة اني دمعت لاني تخيلت ان عربيتي هيه اللي واقفة

هل هوه ده التعامل مع الناس ولا هوه ده نتيجة سفرنا من بلدنا ولا ايه انا مش عارف ومش عارف اصلا انا بكتب لية بس انا قلت اتكلم مع حد لاني هانفجر دي ضريبة السفر والغربة ولا ده موقف عادي وانا متأكد ان كل واحد فيكم مر بنفس الموقف ده بشكل او بأخر

مطولش عليكم واقرفكم اكتر من كده انا قلت اناقش الموضوع ده مع حد وليكم جزيل الشكر وربنا يكرم كل واحد في مجالة واتمنى اني ماعيش هنا كتير

[doha]

هون عليك الموضوع مش مستاهل ابدا ..

جارك منزلش شال عربيته عشان هو تحت بل لان الناس الي طلبت منه كده هي الي تحت فعلا .. هو عارف انهم ناس ( لبط ) وممكن لو اعترض يدوله سكينه تجيب معاه من الآخر في ثانية فهو ( اشترى دماغه ) وراح حرك العربية ويادار مادخلك شر ..

انت مكبر الموضوع جدا ومديله اكبر من حجمه وواضح انك بتمر بظروف نفسية سيئة الى حد ما وهي الي مخلياك بتشوف الجانب السلبي من اي موقف يمر عليك وتعظمه بالشكل ده وكانه قضية قوميه مش لاقيه حل ..

توقعت تقول انهم ضربوا الراجل او اهانوه او سحلوه قدام عياله .. ولا شيء من ده الحمد لله حصل كل ماحدث ان ناس ( مش متربية ) اتصرفت مع واحد محترم بطريقة مش محترمه وهو رد عليهم بما تمليه عليه اخلاقه مش اخلاقهم .. عادي جدا وبتحصل هنا او هناك ملهاش علاقه لا بغربه ولا اغتراب ..

روق كده وقوم اتوضى وصلي ركعتين لله ادعي فيهم ان ربنا يفتحها عليك ويخرجك من كل ضيق تقع فيه وان يديلك خير البلد ويكفيك شرها ومتشوفش منها وحش ابدا ..

وعلى فكره غبيرا منطقة معروفه انها ( مش قد كده ابدا )يعني ياريت لو في امكانيه تغير سكنك افضل خاصه وعندك اطفال زي مابتقول وطالما تاكدت ان الجيران تجار مخدرات فالافضل تشوف مكان تاني وربنا يعينك باذن الله ويوفقك للخير ..

رووووق ..

[حماده عبده]

يا طيب ماتزعل نفسك لو طلع العيب من أهل العيب مايبقاش عيب وأهل العيب موجودين في كل مكان في الدنيا

[abohaya]

يا عم روق الموضوع دة منتشر فى جدة فى الاماكن الشعبية الفقيرة وبحكم تواجد افارقة كتير فى هذة الاحياء ما يقدروش يفتحوا بقهم معاهم لانهم بيخافوا منهم لانهم متحدين مع بعض لان اكثرهم عبارة عن عصابات و ايضا بيعجبنى الصعايدة العمال لانهم بيكونوا مع بعض مجموعات كبيرة بجكم دخلهم البسيط لان ليهم هيبتهم فى المكان وعارفين ان الصعيدى ممكن يموت نفسه علشان واحد صعيدى ما يعرفوش وما تحزنش يجوز ان الشخص ده لوحدة و بالعقل مش حيقف لوحده قدام مجموعة حتى لو مش تجار مخدرات لانى اعرف قرايب لى صنايعية كانو واخدين حقهم فى حى مشابة فى جدة بحكم تواجدهم بمجموعة كبيرة فى المكان و انت عارف صحابك دول اجبن خلق اللة و يتشطرش و لاينفش ريشه الا عللى الضعيف ووقت ما يحس ان الى امامه حيديلة على دماغة يسحب ناعم لغاية لما يتمكن منه حتى ولو غدر

[elfakhrany]

بصراحة أنا شايف أن الموضوع بسيط والراجل بيبعد عن المشاكل خصوصا ان فى بلد غريبة يعنى لازم يخاف على نفسه وعلى عيالة ولو نفس الموقف كان حصل فى

مصر كان هيكون رد الفعل مختلف :rolleyes:

تم تعديل 25 أبريل 2009 بواسطة elfakhrany

[se_ Elsyed]

تم تغيير عنوان الموضوع ...

[mama nona]

والدى كان طول عمره فالمملكة وقبل سفرى قال لى كلمة لازم تفهميها كويس فالغربة دى (يا غريب كن اديب )

وده ال عمله جارك .

وبعدين لما تجيب اسرتك بلاش تسكن فحته شعبية

انا ساكنه فوسط البلد ودى كلها تقريبا حت شعبية برده وبقالى سنتين فالعمارة معرفش الشقة ال جنبى مين ساكن فيها

يعنى انت ال بتخلق جو لنفسك تعيش فيه مش المنطقة .

[سكراب]

طيب لماذا لم تبلغ الشرطه على تجار المخدرات ؟!!

[الباحث عن الرزق]

والله اخوانى ان صعيدى ومن وجهه نظرى انا مستحملش اى اهانه او استهزاء وان مريت بتجربه بسبببها واحد رفع عليا قضيه بس الحمد لله من خوفه منى عمل تصالح وتنازل عن القضيه

انا شغال اخصائى موارد بشريه بشركه وفى واحد من الاداره الماليه حب يستعرض عليا استحملتو مره واثنين وثلاثه عشان ان سنى اصغر من سنو يعنى هو اكبر منى بعشر سنين المهم كان اخرى معاه انى رميتو من بالكونه الدور الثانى ومنها هو على المستشفى وان على المركز هههههههههههههههههههههههههه

يعنى انا عن نفسى لا اضحى بكرامتى ولا اخلى حد يستهزاء بيا حتى لو كان مين

[الباحث عن الرزق]

انا القصه الى انا حكتها حصله فى مصر يعنى كنت فى بلدى

ومن وجهه نظرى الخاصه ان كرامه الانسان غير مرتبطه باقليم او بلد معين

وده اسمو استهزاء وافترى وممكن الواحد يتسبب فى مشاكل لو تسرف برجولته بس دى تبقى حكمه ربنا

بس السكوت وانى اقول انا مش عايش مشاكل دول ناس فى العماره يعنى تتوقع منهم اى شى بعد الى حصل وربنا يحفظك

وانت المفروض تسيب السكن ده لكن فرد فى العماره يعنى الى حصل مع جيرانك ممكن يحصل معاك بشكل او باخر

وسعتها لو كرامتك نقحت عليك ممكن تيجى مترحل او مسجون لا قدر الله وسعتها تقول يا رتنى سبت السكن وعشت عيشه هاديه