سِنجر .. سِنجر

[se_ Elsyed]

آه يا أمة ضحكت من عبطها وهبلها الأُمم ..

والله عيب علينا

وعيب نبقى في القرن الواحد والعشرون وإنترنت وفضائيات يمكن اكتر من الدول اللي مخترعاها ومع ذلك نكون في منتهى الجهل ونؤمن بالشعوذة وتفسير الأحلام اللي بنعلق به مستقبلنا وتخطيطنا ...

وبصراحة بقت فئات كثيرة من المجتمع بتتبع منهج مولانا فريد الأطرش بتاع " أنا كلمه تجيبني وكلمنة توديني "

الموضوع بدأ من كام يوم وماكنتش سمعت عنه قبل كده ... وكنت أجلس مع مجموعة من الأصدقاء اللي فجأة فتحوا موضوع يسألوني فيه : سمعت عن موضوع ماكنيات خياطة سِنجر يابو الأسيان ؟

عارفين الماكينة دي طبعاً ؟

فقلت لهم لأ والله .. أصلي بأشتري هدوم جاهزة :rolleyes: وبصراحة ما بأتعاملش مع مدام شيكوريل الخياطة ...

فقالوا لي شيكوريل إيه وعمر أفندي أيه ... إنت ما بتاكلش كرانشي ؟.

فقلت لأ .. بأقول دوريتوس أو ليز بعض الأحيان ..

فقالوا لي إن الموضوع وما فيه إن هناك شائعة أنتشرت أنتشار النار في الهشيم هنا في السعودية عن إن ماكينات سنجر بتاعت الخياطة خصوصاً القديمة منها جواها زئبق أحمر ..

فقلت حلو ... ماشي .. برضوا هاجيب هدوم جاهزة ومش هافصل .. لإن ممكن الزئبق ييجي على الهدوم ويبقعها

فقالوا ... وإذا بنا نجد يا شيخ س س سعر الماكينة يرتفع من تلاتة تعريفة إلى ميتين ألف ريال حته واحده ..

تخيلوا ؟!!!!!!!!!!!!

ماكينة قديمة يمكن مش شغالة بتتباع كهنة ومرمية في أسواق المستعمل ومش لاقيه اللي يشتريها .. فجأة تبقى بربع مليون ريال ..

وأبتدى شُغل الحلق حوش ... وأصبح هناك هجوم ليلي شبة منظم على محلات الخياطة النسائي بالذات هنا وبيمسوها " مشغل " لسرقة أي ماكينة يلاقوها ... وأصبح هناك طوابير على أسواق المستعمل ... وبقت هيصه يا معلم ...

ما أحزنني وألمني إن تلاقي معظم خُطب صلاة الجمعة عن هذا الموضوع .. والمشايخ بينبحوا صوتهم للتحذير من خطورة تلك الخرافات ...

ونجد عالماً ربانياً .. محبوب من الجميع وهو الشيخ عبد الرحمن السُديس امام وخطيب المسجد الحرام بمكه المكرمة يخصص خطبة الجُمعة أمس للحديث عن الشائعة القذرة لمكائن الخياطة ويُحذر الناس من أنتشار الجهل وتداول مثل تلك الخرافات لمصلحة فئة معينة نصابة .. ( على فكرة ... ناس كتير تعرف الشيخ السُديس على إنه قاريء للقرآن الكريم خصوصاً في صلاة التراويح برمضان .. وما تعرفش إنه صاحب علم غزير وإن إنت لو استمعت لأحد دروسه ستعرف قدر هذا الرجل العلمي واللي بيلف العالم كله لنشر هذا العلم )

ويُقال إنهم يستخرجون الزئبق الأحمر ويصدرونه لروسيا لإستعماله في إطعام الجان اللي بعد كده بيبقى سهل يتسخر ويعمل حركات وينفذ الطلبات .. ما هو واكل وشبعان .. وقال على رأي المثل .. إطعم فم العفريت .. ومن سهر العُلى طلب الليالي ..

وأقعد وأتقنعر وأطلب وأتمنظر ( دي الفيرجن الجديد من شبيك لبيك عبدك وملك إيديك .... )

أنا عن نفسي لو وقع تحت إيدي غن شالله إبرة خياطة ... أول حاجه هاطلبها بصراحة هي إن أشوف أبويا الله يرحمه ... او إن حسني مبارك بنزاح وييجي بداله رئيس محترم ... طبعاً متأكد ساعتها العفريت هايقولي طب تحب تشوف أبوك ولا تروح له بنفسك فوق أسهل ؟

الغريب بقى ... لقيت واحد معرفتي بيكلمني أول أمبارح ويقولي : معايا حته سنجر نضيفة على ابوها يا معلم س س ... وواحد صاحبي أنا مالي إيدي منه معاه 4 حتت ... يعني بنتكلم في خمسة حتت ... ما تخلص لنا السبوبة دي ولك 10 % من التوتال برايس ؟

فقلت له : والله انا قفلت المحل من زمان ... بس المطلوب مني إيه ؟

قال : تشوف لنا زبون سُقع نزحول له الخمس حتت دول .. وهانعمل له تخفيض ونديله الحتة بخمسين باكو بس على اساسا إن إحنا بنربي زبون ... يعني بنتكلم في ربع مليون .. لك فيهم 25 مشفيين يا عم ؟

وهكذا يا سادة ... أصبحت مصائرنا مرتبطة بالجان والزئبق الأحمر .. والزنبقة الفوحلوقية .. وأصبحنا منتظرين عفاريت تيجي تحقق لنا أمالنا ونحن نحتسي النسكافية .

وكل ده راجع مش لقلة التعليم او الثقافة ..

ولكن لحالة التوهان اللي إحنا فيها ومرحلة البلبلة الفكرية اللي موجوده ومنها هوجة الفتاوي من علماء دين قاعدين عالشلت وفاضيين وسايبين بلاوي المجتمع وبيتكلموا عن إرضاع الكبير او جواز زواج البنت في سن الرابعة ..... بدل ما يقوموا سلوك الناس ويوعوهم للقضايا الهامة ويفتحوا عقولهم ...

كذلك حالة التعليم المزرية الموجودة في كل الدول العربية واللي أصبحت جميعاً تهتم بالكم وليس الكيف والجميع اصبح بيتباهى بصعوبة الثانوية العامة وكيفية التوصل إلى طُرق لتكريه الشباب في التعلم والعلم والتعلم .. وبالتالي يتجهوا إلى كرة القدم أو الغناء والرقص .. حيث أن العلم أصبح لا يُكيل إلا بالبتنجان أو كما قال الشاعر راحت عليكي يا دنيا وراح زمن الشهادات وهاكتفي بصدر البيت ومش هاكمله عشان عيب ..

[شاب مصري]

من كام سنة انتشر شلل الأطفال في أفغانستان أو باكستان مش فاكر

والسبب ان القرويين هناك مرضيوش يطعموا عيالهم ضد المرض لان انتشرت اشاعة ان تطعيم شلل الأطفال ما هو الا مؤامرة من الدول الغربية لتعقيم أبناء المسلمين :rolleyes:

وبسبب ده أطفال كتير مطعموش وأصيبوا بشلل الأطفال :happy:

تم تعديل 25 أبريل 2009 بواسطة شاب مصري

[abaomar]

السلام عليكم

الاخوه الكرام جزاكم الله خيرا

.

اخونا الحبيب سين سين جزاك الله خيرا

ما أحزنني وألمني إن تلاقي معظم خُطب صلاة الجمعة عن هذا الموضوع .. والمشايخ بينبحوا صوتهم للتحذير من خطورة تلك الخرافات ...

ونجد عالماً ربانياً .. محبوب من الجميع وهو الشيخ عبد الرحمن السُديس امام وخطيب المسجد الحرام بمكه المكرمة يخصص خطبة الجُمعة أمس للحديث عن الشائعة القذرة لمكائن الخياطة ويُحذر الناس من أنتشار الجهل وتداول مثل تلك الخرافات لمصلحة فئة معينة نصابة .. ( على فكرة ... ناس كتير تعرف الشيخ السُديس على إنه قاريء للقرآن الكريم خصوصاً في صلاة التراويح برمضان .. وما تعرفش إنه صاحب علم غزير وإن إنت لو استمعت لأحد دروسه ستعرف قدر هذا الرجل العلمي واللي بيلف العالم كله لنشر هذا العلم )

. اعتقد انها شئ طيب ان يتواجد رجال العلم الشرعى لتوضيح امور الدين الصحيحه و توعيه الناس من الخرافات التى ذكرتها

لان خطورتها ان تذهب بالدين ... نعم و توقع الانسان فى الشرك و هو لا يدرى و عامه الناس من البسطاء فى حاجه لذلك .

.

وكل ده راجع مش لقلة التعليم او الثقافة ..

ولكن لحالة التوهان اللي إحنا فيها ومرحلة البلبلة الفكرية اللي موجوده ومنها هوجة الفتاوي من علماء دين قاعدين عالشلت وفاضيين وسايبين بلاوي المجتمع وبيتكلموا عن إرضاع الكبير او جواز زواج البنت في سن الرابعة ..... بدل ما يقوموا سلوك الناس ويوعوهم للقضايا الهامة ويفتحوا عقولهم ...

.

نقولها بشكل اوضح سوء التعليم و انعدام الثقافه .

ايضا الهجوم المنتظم و منذ عقود على الدين الاسلامى و محاربه النماذج المعتدله و ترك المجال لاشباه المتعلمين و المتفيقهين

للسيطره على الحياه الثقافيه و التعليم الدينى فانشاء انماطا كما تفضلت يثيرون البلبله اكثر مما يفيدون

و يشغلون الناس بامور استقرت فى وجدان المسلمين منذ عقود كمسأله رضاع الكبير و التى لها وجود فى كتب الفقه

و ليست شئ هلامى يعرفه المتخصصون و بالطبع لكل مقام مقال و ايضا مسأله العقد على الصغيره و غير ذلك

مما يثيره ..اكرر .. يثيره ادعياء الفتنه و راغبى اثاره المواضيع فى الفضائيات و الاعلام لجذب الانتباه و عمل شعبيه لتلك القناه

و الاخرى و رفع نسب المشاهده و بالطبع الاعلانات مستغلين فى ذلك حسن نيه بعض المنتسبين لاهل العلم

الذين ليس لهم خبره الظهور او التعامل الاعلامى فضلا عن بعض الخبثاء ذوى الميول العلمانيه و الليبراليه .

تم تعديل 25 أبريل 2009 بواسطة abaomar

[MoHaMMeD EgYpT]

الكلام علي مين ؟؟ ( علي راي الفنان سعد الصغنن :happy: ) يعني انا مش فاهم هو الكلام مثلا علي الناس اللي بترمي فلوسها علي ماكينات السنجر ولا علي التعليم ولا علي الشيوخ ولا الشهادات ولا ايه بالضبط

و انت من امتي بقيت سلبي للدرجة دي الا بقا لو كنت اتعديت مني :P فين س س بتاع زمان اللي بيقول الدنيا حلوة :rolleyes:

و فعلا الشهادات اليومين دول ما بقتش بتاكل عيش ده الراقصيين و لاعبين الكورة و كل من عمل له كليب بقا غني الا قولي لي يا س س انت اخر كليب من كليباتك ايه ؟؟ علي ما اظن انه كليب سنجر سنجر

تم تعديل 25 أبريل 2009 بواسطة MoHaMMeD EgYpT

[elfakhrany]

أنا معاكم فى المصلحة دى عندى ماكينة سنجر من أيام جدتى الله يرحمها :rolleyes:

[MoHaMMeD EgYpT]

أنا معاكم فى المصلحة دى عندى ماكينة سنجر من أيام جدتى الله يرحمها :rolleyes:

يالا نبدا المزاد بنص افرانك مين يزود ؟؟ :happy:

[بندق أفندى]

وأنا جيرانى عندهم ماكينة سنجر ..

عادى واحد عنده كم ماكينة عاوز يبيعهم ويعمل مصلحة ..

فكرتنى بالنصب اللى بيحصل .. واحد يؤجر كم واحد يروحو يسألو على بضاعة معينة فى عدد من المحلات .. وممكن كمان يسيب عربون .. بعد شوية واحد يروح يعرض نفس البضاعة بفرق سعر عن اللى حكو عنه المشترين .. والطيب الطماع يروح مشترى ويدفع الفلوس ويستلم البضاعة (عشان المشترى ما يعرفش الفرق فى السعر) وبعدين الأخ يتورط فيها بقية عمره .. هو نفس الشئ .. بس باستخدام قناعة معينة للخرافات

[pink rose]

أنا معاكم فى المصلحة دى عندى ماكينة سنجر من أيام جدتى الله يرحمها

انا كمان معاكم

و الحمدلله الماكينة السنجر بتاعتي موجودة و في الحفظ و الصون

اصل جدتي ام بابا الله يرحمها قبل ما تموت قعدت توزع ممتلكاتها على احفادها

و قالتلهم الماكينة السنجر دي حق البت ريمو و زعلت اوي انا وقتها ايه البتاعة الخردة دي لكن قولت في نفسي اهو تبقى ذكرى منها و خلاص و قولت ان شاء الله لما اتجوز و يبقالي بيت احطها في ركن التحف :baby:

لكن الحمدلله ربنا ما حبش يزعلني و طلعت الماكينة ليها زبونها اللي هايدفع دم قلبه فيها عشان العفاريت اشتاتا اشتوت ربنا يجعل كلامنا خفيف عليهم

و اهو تبقى نينة على( رأي الاستاذ عماد حمدي )سابتلي الورث اللي هو

و اخيرا جه اليوم اللي اقدر اغيظ فيه ولاد عماتي بقلب جامد بقى لانهم استلموني تريقة ايامها

الله يرحمك يا نينة اكيد كان قلبها حاسس يا جماعة عشان كده احتفظت بالماكينة دي ليا انا مخصوص اصلي انا بنت ابنها الوحيد بقى الله يرحمها و يحسن اليها و يسكنها فسيح جناته

[elfakhrany]

وعشان سى السيد يبدأ المزاد لازم يشوف الصور دى

مش راضية تترفع الصور بتظهرلى الرسالة دى (عملية إرفاق الملف فشلت, الرجاء مراسلة الإدارة العامة للتأكد من التصاريح والإعدادات الخاصة بالملفات المرفقة, )

تم تعديل 25 أبريل 2009 بواسطة elfakhrany

[بندق أفندى]

طلعت ماكينة بنت عفاريت

[icehearted girl]

ربع مليون ريال مش مبلغ كبير يفندم

أعرف واحد جارنا صرف مليون.... بنفسه لاستخراج الزئبق دا بين الصخور لاطعام الجان ويجيبوله ملايين اخري

واعرف واحد كمان دفع ملايين..لان احد الذين يطلق عليهم شيوخ اعطي له ورقة سوداء...واخبره انها بمائتين دولار أمريكي

ويوجد لديه العديد منها ولكن عليها لعنة من الجان فيجب احضار الزئبق لفك اللعنة وإظهار الدولارات

شفتوا الاعاقة الذهنية؟

انا شايفه ان احنا مجتمع سلبي وفاشل وبالتالي بندور علي النجاح في اللاوجود

في حاجات منمتلكهاش

لان جوانا احساس سلبي اننا عمرنا مهنقدر نعمل حاجة بمجهودنا ولا نحصل عليها الا بالفهلوة والنصب وشغل حلق حوش

[elfakhrany]

وأهم حاجة تحط الموبايل جمب ابرة الماكينة لو الشبكة وقعت يبقى هى دى وش الخير

تم تعديل 25 أبريل 2009 بواسطة elfakhrany

[icehearted girl]

آه يا أمة ضحكت من جهلها الأمم

عايشة مابين صنم وبين هرم

[شاب مصري]

يا ناس يا عسل .. الفنكوش وصل

[ssmaly]

يااستاذ سين سين

ربنا مجعلكش من قطاعين الارزاق

ورزق الهبل على

ارجو تأجيل الموضوع حتى كل واحد عند حته يبعها

كلام جد "

اذا لسه فى دولنا العربية مثل هذى النوعيات من البشر التى تؤمن بالخرفات فنحن نتساهل ما وصلنا اليه من تردى علمى واخلاقى وحتى دينى

والمسؤليه هما تقع على كل واحد مسؤول فى مكانه اذا كان شيخ دين او وزير تعليم او وزير اعلام وكل مسؤول كبير فى مكانه وفى بلده

شيوخ الدين تدعو الى الشعائر وتنسى لب الدين

الدين لا يقوم على الشعائر فقط

فين العمل عبادة عمليا

فين النظافة من الامان عمليا

فين اهمية العلم

فين اذرع فسيلة ولوكنت على قاربت الموت

فين اماطة الاذى عن الطريق

فين الابحاث عن علم الأقتصاد الاسلامى فقط الدعوة الى ان البنوك ربوية فين البديل الاسلامى الصحيح (محدش يقولى البنوك الاسلامية هى فقط اسم ولكن كل معملاتها ربيوية الاالرباح التى تعطيها لك)

الاسلام انتشر فى بلاد بعيدة بدون ان يدخلها الفتح الاسلامى بأبنهار اهل هذة البلاد بتقدم المسلمين واخلاقهم وامانتهم

وليس بأهتمامهم بالشعائر فقط

[eslam elmasre]

الاخ سي السيد

صدقت في قولك وحزنك

لم يجد بعض مدعي العلم سوي تغييب عقول البشر حتي يتيقنوا من انهم يسمعون لهم ودائما في حاجه اليهم فوجدوا من مواد اباحه رضاع الكبير والزواج بالرضيعه والصغيره والتبرك ببول الرسول صلي الله عليه وسلم وجدوا منها مواد قد تجعل الناس ينجذبوا اليهم صامتين مهلليل ومكبرين

جعلوا الدين عباره عن مجموعه من التوافه والمتناقضات واهتموا بظواهر الامور دون التوجه الي علاج الامراض الباطنه والتي ما جاء الدين الا لكي يعالجها ويبترها بترا

جعلو الدين عباره عن غيبيات ما انزل الله بها من سلطان وقالوا ان الجن له سلطان علي البشر ونسوا قول الحق تبارك وتعالي

(إنَّ عِبَادِي لَيْسَ لَكَ عَلَيْهِمْ سُلْطَانٌ إِلاَّ مَنِ اتَّبَعَكَ مِنَ الْغَاوِينَ [الحجر : 42]

ويؤكد ذلك الحق شهاده الشيطان علي نفسه يوم القيامه وذلك ثابت في قول الحق تبارك وتعالي

(وَقَالَ الشَّيْطَانُ لَمَّا قُضِيَ الأَمْرُ إِنَّ اللّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم مَّا أَنَاْ بِمُصْرِخِكُمْ وَمَا أَنتُمْ بِمُصْرِخِيَّ إِنِّي كَفَرْتُ بِمَا أَشْرَكْتُمُونِ مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ [إبراهيم : 22]

ونسوا ان عمل الشيطان لا يتعدي الوسوسه للانسان

وهذا ثابت من قول الحق تبارك وتعالي

فَوَسْوَسَ لَهُمَا الشَّيْطَانُ لِيُبْدِيَ لَهُمَا مَا وُورِيَ عَنْهُمَا مِن سَوْءَاتِهِمَا وَقَالَ مَا نَهَاكُمَا رَبُّكُمَا عَنْ هَـذِهِ الشَّجَرَةِ إِلاَّ أَن تَكُونَا مَلَكَيْنِ أَوْ تَكُونَا مِنَ الْخَالِدِينَ [الأعراف : 20]

َوَسْوَسَ إِلَيْهِ الشَّيْطَانُ قَالَ يَا آدَمُ هَلْ أَدُلُّكَ عَلَى شَجَرَةِ الْخُلْدِ وَمُلْكٍ لَّا يَبْلَى [طه : 120]

والجن لا نستطيع ان نراه باي حال من الاحوال سواء علي صوره جنيه او بشريه ويؤكد هذا القول قول الحق تبارك وتعالي

(........إِنَّهُ يَرَاكُمْ هُوَ وَقَبِيلُهُ مِنْ حَيْثُ لاَ تَرَوْنَهُمْ إِنَّا جَعَلْنَا الشَّيَاطِينَ أَوْلِيَاء لِلَّذِينَ لاَ يُؤْمِنُونَ [الأعراف : 27]

وبعد ذلك نري بعض المضللين الذين يتاجرون بالدين ويرتزقون منه يطلعوا علينا طلعتهم البهيه ويقولون لنا ان الجن له تأثير مادي ومباشر علي البشر ويتمثل في هيئه انسان ويمكنه ان يتحكم في الارزاق والاعمار

قاتلهم الله أني يؤفكون

وانا اقول وسأظل اقول واحارب من هنا وفي بيتي ومكان عملي كل افاك اثيم يسمع ايات الله تتلي عليه ثم يصر مستكبرا كأن لم يسمعها

ويؤمن بخلاف تلك الايات تحت اي بند كان

والسلام عليكم

[nasr-badr]

الحمد لله والصلاة والسلام علي رسول الله وآله وصحبه ومن تبع هداه وبعد ,,,,,,,,,,,,,

الحقيقة عندي تعليق بسيط علي هذا الموضوع فهناك لخبطة لبعض الذين يستخدمون عقولهم ويظنون أنهم أذكياء وأن الجن سيأتي لهم بالثروة ....................

هؤلاء يبحثون عن الزئبق الأحمر كما ورد في موضوع أخينا س س لأنه طعامهم واطعم الجن يستحي العفريت طيب لما كان العفريت ابن الجنية سيأتي له بالثروة والكنوز لماذا هو فشل في إطعام نفسه بنفسه هذا الزئبق يعني هو لا يستطيع أن يخدم نفسه وهم يلجئون إليه ليخدمهم .. !!!

صدق الله " وأنه كان رجال من الإنس يعوذون برجال من الجن فزادوهم رهقا " كان في الجاهلية أنه لو دخل

المسافرون وادي الجن - علي زعمهم - فإنهم يعوذون أي يطلبون جوار أو بمعني أبسط يطلبون الحمايو والعون من كبير الجن حتي يؤمن طريقهم حتي

يجتازوا الوادي فلا يتعرضوا لأذي أحد فكان الجن يزيدوهم خوفا ورعبا وفتنة وهذا الأمر الجديد - من وجهة نظري -

هو هو حيث يلجأ البعض إلي الجن ليأتي له بالثروة أو القوة الجسدية أو يحقق له هدفا في حياته كالزواج أو المسكن وهكذا

فيتلاعب به الجن ويزيده رهقا وخوفا من الغد ليظل يستعيذ به وهو - أي الجن لا يملك من أمر نفسه شيئا ولكن حتي ينسيه بمن

تجب الإستعاذه به وحده لا شريك له قال جل وعلا " قل أعوذ برب الفلق " وقال سبحانه قل أعوذ برب الناس " فسبحان من لا

ينبغي اللجوء إلا إليه وعجبا علي هذه العقول التي تركت الخالق واستعاذت بالمخلوق فهذا يستعيذ بالجن وذاك يستعيذ بالقبر وهذا

يستعيذ بالأولياء وذاك يستعيذ بالسلطة وآخر يستعيذ بماله وآخر وآخر وتاهوا مع أن الطريق واضح .. وضلوا مع أن الهدي جلي

" قال سبحانه "فمن اتبع هداي فلا يضل ولا يشقي " اللهم إنب أبرأ من الثقة إلا بك ومن التوكل إلا عليك ومن الطلب إلا منك ومن

الرضا إلا عنك ومن السؤال إلا إليك ومن الطمع إلا لما في يديك الكريمتين والحمد لله رب العالمين

[eTiger]

يا عم سي السيد سيبهوم يخسروا فلوسهم. والله العالم اللي تصدق الكلام ده تستاهل اللي يجرالها.