مرض انفلونزا الخنازير هل يتحول الي وباء عالمي

[اسامة عبد الوهاب]

لو تعاملنا مع الموضوع زي ما تعاملنا مع أنفلونزا الطيور ... يبقى سأكون متشائم وأقول على مصر السلامه وهانشيل جثث بالألوفات كل يوم ..

لإن أنفلونزا الخنازير أشد فتكاً

وما رأيته من 20 عام تقريباً ... يشيب له الولدان ...أفتكرت كل حاجه النهاردة وأنا أتابع هذا الموضوع

- فأنا لي أصدقاء مسيحيين يعملون في مجال تقديم الخدمات الإجتماعية ببعض الجمعيات المسيحية ... ورحت معاهم من باب الفضول وخوض التجارب اللي ساعات بتيجي على دماغي وبأبقى على وشك الموت إلى بعض الأماكن بيقدموا فيها خدماتهم للفقراء - فقراء المسيحيين فقط - ومنها منطقة نقدر نقول في عزبة النخل أو ابعد شوية وهي تابعة لمحافظة القليوبية وهي موطن لجامعي القمامة فقط ... زمان لما كانت موضوع العربيات الكارو وهكذا ... وأقسم بالله مهما وصفت فلن أستطيع أن اصف ما رأيت من اهوال ومناظر يشيب لها شعر الكتكوت .. وكانت تجربة ثرية بس معفنه شويتين تلاته

اولاً مساحات أراضي واسعة جداً ... وكلها مقالب زبالة مفتوحة ...

مئات بل آلاف البشر عايشين هناك في عشش صفيح أو بيوت بسيطة .. وتقريباً كلهم زبالين ...

حيوانات مختلطة ببني ادمين مغلفه بزبالة من كل شكل ولون .... ومناظر ورائحة لا تطاق ... كل ده في تناغم عجيب وغريب وغير مستهجن

وكنت أول مره في حياتي أرى ذلك الحيوان القذر وهو الخنزير .... لكن بصراحة الخنزير اللي بأشوفه في الأفلام الأجنبي .. ده يعتبر عصفور كناريا رقيق بالنسبة لخنازيرنا ... لإن خنزيرنا معفن ومنتن ... وهي ألاف الخنازير سارحة بتاكل زبالة طول اليوم .... والأغرب أعزكم الله أنها تأكل فضلاتها مرة أخرى Recycling يعني :happy: ولا مانع من فضلات الحيوانات الأخرى ....

وهناك رأيت كم مخلفات طبية من دماء وسرنجات وأربطة ملووووووثه وبلاوي .. مجرد النظر إليها تجيب للبني ادم إيدز :unsure: ...

ومع ذلك .... إيه الجمال وإيه راحة البال دي ... ( على فكرة .. اللي متأكد منه مليون الميه إن الوضع لم يتغير حتى الأن ولسه كل حاجه بخيرها هناك )

الأغرب من ذلك ودي نقطة اخيرة عشان ما يتشعبش الموضوع هو كمية الاجانب اللي عايشين هناك كجماعات تنصيرية ومعظمهم ستات لابسين لبس الراهبات الرمادي ده ...

على فكرة فضيحة بيع الأطفال للامريكان والأجانب اللي أكتشفوها من كام يوم دي ... كانت هناك من العيال الفقراء والأيتام .. وخلتني أرجع فلاش باك وأفتكر ..

عايز أقول إن مع الزحف العمراني .. المنطقة دي بقت تقريباً وسط العمار ومليانه بيوت .. وملاصقة تماماً لمحافظة القاهرة يمكن لا تستطيع أن تفصل بين حدود القاهرة وحدود القليبوبية في المنطقة دي بالذات ... وعربيات طول اليوم رايحة جاية شايلة خنازير عشان تندبح وتباع لأكليها من أبناء الطائفة المسيحية .. ولا مانع من وجود كثير من معدومي الضمير بيبيعوها على أنها لحم ضآن أو أبقار ...

ناهيك عن منطقة منشية ناصر المعروفة بأنها معقل جامعي القمامة ...

وطالما قولنا جامعي قمامة يبقى في حظائر خنازير ... وهي مش حظائر بالمعنى الدارج على رأي اخونا أسد لما بيحكي لي ويقولي زرت مزارع أبقار في أسبانيا وكان نفسي أفرش وأنام من كتر النضافة والدلع اللي متدلعاه الأبقار ... زي أبقار الدنمارك اللي بيسمعوهم بيتهوفن وشوبان وعم باخ عشان يدروا لبن صحي ومفيد وبوش ..

وبرضوا منشية ناصر تعتبر في قلب القاهرة ...

على فكرة إكتشفت إننا نحن المغتربين غلابة جداً وبناخد الأمور على اعصابنا واتحدى لو الكاميرا نزلت الشارع .. او أي محاوراتي نزل الشارع دلوقت وسأل الناس : هاتعمل إيه مع المشكلة بتاعت انفلونزا الخنازير : هايجاوبك ويقولك .. يا عم أرحمني وسيبني ألحق الأتوبيس هاتأخر عالشغل ...

منذ ظهور وباء انفلونزا الطيور في مصر يمكن نقول من 4 سنوات وأنا بانزل مصر بانتظام على الأقل مرتين في العام ... وأجد أن الحكومة تتعامل مع الموضوع بمنتهى البرود ... والدنيا ربيع والجو بديع ومحلات الطيور الحيه بالعبيط وماليه الدنيا في كل مكان صحرا أن كان أو بستان ... وفي الأحياء الشعبية عايشين بمبدأ " عشة فراخ لكل مواطن "

ولازم كل مره اسافر الريف عندنا لمدة سويعات اقرأ الفاتحة على قبر والدي وأرجع .... وأنا رايح المقابر بقى اللي تعتبر في أخر البلد وصعب أدخل بالعربية ... فبأمشي أتكعبل في الوز والبط والفراخ اللي بقوا أكتر من الأول وبأبقى مرعوب وأقعد أراقب أي بطه او وزة الشيطان وزها وجالها أنفلونزا والناس يقولوا عليه مجنون أو بيعاين البضاعة الأول وهاييجي بالليل يسلك الطيور دي ...

ولو شاهدنا برامج مصورة وموثقة عن كيفية تعامل مزارع الفراخ مع تلك المأساة ... هانصاب بالوباء من السيرة بس ... فشوفت بعيني عشرات المزراع بيجيبوا صناديق الكتاكيت الصغيرة ويطلقوها على الطرقات السريعة عشان العربيات تمشي تدهوس عليها ... أو بيرموها بخيرها كده في الترع والمصارف ... يا نهار أسود ...

ويرجع يقولك الحكومة بصدد نقل مزارع الخنازير خارج كوردون المساكن ...

موت يا خنزير ... قصدي موت يا حمار ...

يعني كده حلينا المشكلة ...

والخنازير دي هاتعتمد على نفسها في معيشتها إن شاء الله بمبدأ help your self ولا في ناس هايعيشوا معاها يأكلوها ويسمنوها ؟

والناس دي مش ممكن تتصاب وتبقى مش عارفه وواحد منهم ينزل العتبة يشتري جميص ومنطلون وهو حامل للعدوى ويعدي ييجي ألف واحد في الأتوبيس أو الميكروباظ وهو جاي بس ...

الخلاصة ...

هي حكومة غبية كأصحابها ... لإ نها من البداية كانت لازم تتعامل مع الموضوع من وجهة نظري كالتالي :

1- رصد ميزانيات مفتوحة للقضاء على تلك الأمراض الفتاكة ....

2- تعويض المكلومين والخسرانين من مُربي الطيور والخنازير تعويض مغري .. بل أكثر من مغري ...

3 - الرقابة الرقابة الرقابة الصارمة على تنفيذ الشق الطبي والوقائي لإن العملية مش تهريج ... فاكرين موضوع الميلامين اللي خلطوا به الحليب في الصين ؟ ما فيش تهريج إعدام على طول لأي حد متورط في المصيبة دي ...

لكن عشان أجي على الحاجه أم حسين اللي كل اللي حيلته فرختين وأحسرها عليهم وأموتهم وأجول لها : we'r protecting you dear Um Hussein

طبعاً الوليه مش هاتفهم وهاتقول لك : يعني هي جت عليه أنا ؟ طب والله لأدسهم تحت السرير .. وما حدش بيموت ناجص عمر ... دول الفرختين اللي طلعت بيهم من الدنيا يا ناس بعد المرحوم جوزي ما راح في الترحيلة ...

دي حقيقة انا ما بأهرجش .. وتقريباً معظم الأصابات الأخيرة كانت ناتجة عن إن أصحابها مخبيين الفراخ والبط داخل بيوتهم عشان ما حدش يفتن عليهم وشوفت حاجات مخبيينها تحت السرير

إنما تقولي أغاني شعبولا ... وروح هات فارخه مجمدة ماركة doux الفرنسية أحسن لك ...

كل ده تهجيص ...

إنت بتخاطب ناس بسطاء ... مشاكلهم غير مشاكلك ..

مشاكلنا توعوية تقدمية وحدوية منبعجة ومجعلصة ...

هما ما يفهموش الكلام ده ....

هو او هي يفهم إن كيلو اللحمة بـ 45 ج ... يعني مش هايشمها إلا مره أو نص مره في الشهر ... والفرخه أقل فرخه بخمستاشر جنيه .. وبيجيبها يدبحها ويملى الحله شوربه عشان يطبخ علي حسها مرتين تلاتة ...

يبقى لما أجي أحرمه من اللحمة ومن الفراخ ودول ناس بسطاء جداً ... يبقى لما تدن ولما جميع من حواليه يموتوا .. والله ما هايغير اللي في دماغه وهايربي فراخ أو يشتريها حيه غصبٍ عن التخين ...

عيبنا إننا نحاول علاج مشاكل تخص ناس فقراء .. ونحن نجلس في مكاتبنا الفاخرة .. نحتسي شاي الساعة الخامسة مع التشيز كيك ... وندخن الغليون ... زي ماري أنطوانيت بتاعت : وليه ياكلوا عيش ما ياكلوا باتي بان أو ساكلامان او سويس رولز اهو ده بالذات طري وينفع نغمس به الفول ...

وبالتالي المشكلة تتفاقم ... وأدينا أهو فزنا بالمركز الاول في أنفلونزا الطيور وسيرتنا بقت على كل لسان

لمست هنا بالسعودية إجراءات الوقاية من الوباء الذي لم يصل إليهم .. لكنهم لم ينتظروا حتى يصل إليهم ..

كلمة وتلت أبرك من مليون

- منع محلات الطيور الحيه ... خلال مجة قصيرة جداص مهلة للمحلات لتوفيق أوضاعها .. ولا حد بقى يفتح تفليته ولا يربي فراخ فوق السطح في الخباثة ...

- تعويض سخي لمزارع الطيور التي هناك شك أنها أختلطت بطيور مهاجرة مصابة .... وطبعاً شوفت بعض حالات إجرامية عملها العيال الزبالة البنغالية وبقوا يهربوا الفراخ من المزارع دي ويبيعوا الواحده لمحلات الشاورما بريال واحد فقط ... فرخه بريال وأقلب يا معلم ..

وشوفت زملاء لي يعملوا في مجال الأستيراد وهما بينفذوا أوردرات من الحكومة بإستيراد أفران ضخمة تصل درجة الحرارة فيها إلى 1500 درجة عشان يحرقوا فيها الفراخ المشكوك في أمرها - واتمنى إننا نستغل المحارق دي ونجيب قد مليون صهيوني ونزقهم جوه وننساهم شويه -

بالمناسبة ... العملية هيصه عندنا ولا معروف دي مسئولية وزارة الصحة ولا الزراعة .. و سامع أمبارح فقط إن جهاز الشرطة إتدخل في الموضوع لتوعية الناس ....

لوووووووووووللللي ..

يعني بقى عندنا شرطة بتعمل عجين الفلاحة وبتخبز لنا عيش بلدي مفقع ...

وبقى عندنا شرطة تانية غير الأولانية .. عبارة عن فرارجية بيسحلوا أي فرخه تعبر الطريق ...

-----------

نقطة أخيرة .. أستفزني سؤال زميلنا الفاضل مصري أصيل

و إيه العائق عن إتخاذ قرار لحد دلوقت ؟؟

يا عم مصري ...

العملية طالما ما فيهاش سبوبة ... يعني بدلات حضور لجان ... أو صفقة إستكراد وتصدير من بره أو توكيل صري - إكس كلوسف - لآبية جمال أو علاء ... ... يبقى مش هاتلاقي حد متحمس للموضوع

هاضرب لك مثل ... عارف السحابة السودا اللي بلون أيام مبارك ؟

بقى لنا عشر سنوات تقريباً وهنا وفي نفس الميعاد ... نفس البيوت .. نفس السحابه .. كل سنة ... وأتغير عليها ييجي 3 وزرا بيئة - هما بيئة فعلاً - ومع ذلك كل مره تحصل خناقة ... دي مسئولية محافظة القليوبية القريبة من القاهرة ولما الفلاحين بيتخلصوا من قش الأرز اللي عامل زي الهم على القلب على راس كل أرض يقوم الهوا ييجي ويجيبه ناحية القاهرة ؟ ... ولا مسئولية محافظة القاهرة اللي مش عامله جدار عازل وأسلاك شائكه متكهربه عشان هواء القليوبية الملوث ما يجيش عندنا ؟ ... ولا مسئولية وزارة الرزاعة اللي فيها جيوش من المرشدين الرزاعيين اللي نايمين تحت سجرة التوت في الضلة وما بيوعوش الناس دول ؟ .. ولا مسئولية اجهزة السلطة التنفيذية زي الشرطة اللي ما بترميش أي حد يأذي الناس دي في قلب محرقة القش دي ؟

وهيصه يا عم الحج ... والراجل اللي فوق مهييس ومش داري وبيجيله العكاوي كل يوم طازة من سويسرا عشان يعرف يحكمنا ... واللي تحته ماشيين بالمنشطات - اقسم بالله هذه حقيقة وأنا عارف بأقول إيه - وطول اليوم عمال يبلبع مقويات واشياء أخرى عشان يبان إنه شباب وحليوه وأساساً كلهم مِسلمين نِمر من زمان .

ومين اللي بيموت ويتهرس في المفرمة ؟

إحنا يا عم الحج ... عشان ساكتين لهم ..

إنما لو فينا تلاته أربعة راضعين لبن طبيعي مش سيريلاك ونقوم عاملين عمليه فدائية ونجيب قد جوزين فراخ مصابين على تلات خنازير مفلوزين ونحدفهم من فوق سور قصر العروبة .. عشان لما الريس حد من عياله يتعدي ويفرفر قدامه ... ساعتها يحس بألامنا .. يبقى يعرف إن الله حق ...

لكن الراجل قاعد في الحته الناشفة وإحنا اللي بنغرق

وكفاية بقى عشان قرفت ..

بصراحة اجمل حاجة فى موضوعك انك صريح زارجو من المشرفين تثبيت موضوعك ليقرؤة الجميع

اقولك اية بارك اللة فيك

[صعيدي]

تطورات الوباء

ذكرت وزارة الصحة اليابانية أن طالبا عمره سبعة عشر عاما بمدرسة ثانوية في كوبيه غربي اليابان قد تأكدت إصابته بفيروس الإنفلونزا الجديدة بعد اختبار أجراه المعهد القومي للأمراض المعدية يوم السبت.

ومنذ قليل وردت أنباء بظهور حالات جديدة فى مدينة أوساكا المجاورة (حيث أقيم) ولا نعرف بعد الخطوات التالية

نسالكم الدعاء

[pink rose]

تطورات الوباء

ذكرت وزارة الصحة اليابانية أن طالبا عمره سبعة عشر عاما بمدرسة ثانوية في كوبيه غربي اليابان قد تأكدت إصابته بفيروس الإنفلونزا الجديدة بعد اختبار أجراه المعهد القومي للأمراض المعدية يوم السبت.

ومنذ قليل وردت أنباء بظهور حالات جديدة فى مدينة أوساكا المجاورة (حيث أقيم) ولا نعرف بعد الخطوات التالية

نسالكم الدعاء

ربنا يحفظك و يحفظ اسرتك من كل شر

و يحفظ كل اخوانا المغتربين في الاماكن اللي انتشر فيها المرض

اللهم آمين

اللهم عافنا و اعفو عنا

تم تعديل 16 مايو 2009 بواسطة remo

[مصري أصيل]

أعلنت مصادر طبية بمستشفى المطرية في القاهرة مساء الجمعة أن المستشفى استقبل مريضاً مصاباً بارتفاع في درجة الحرارة ورشح وإقياء، وكلها أعراض تشير إلى إصابته بأنفلونزا الخنازير.

وذكرت صحيفة "اليوم السابع" المصرية: إنه بعد الاشتباه في إصابته بأنفلونزا الخنازير، أحاله طبيب الأمراض الباطنية بالمستشفى إلى مستشفى حميات العباسية، وتم إبلاغ قسم المطرية الذي أكد مصدر مسؤول به أن المصاب يعمل بمزرعة خنازير بقرية البارومين مركز أشمون بالمنوفية ويقطن في عزبة النخل بالقاهرة.

وقال المصدر الطبي: إن التحاليل التي أجريت للمريض بمستشفى حميات العباسية كشفت إصابته بمرض "أنفلونزا الخنازير" حيث ظهرت النتائج إيجابية.

وقال مصدر في المعامل المركزية لوزارة الصحة: إنه حتى العاشرة من مساء الجمعة، لم ترد أي حالات إيجابية، وقد تعذر الاتصال بأي مصدر من وزارة الصحة ليؤكد أو ينفي هذا الخبر.

يا تري حد عنده تأكيد علي صحة هذا الخبر ؟؟؟؟؟

[rar]

حد يعرف اذا كان في أي مشاكل للمغتربين اللي نازلين مصر؟ هل مطلوب منهم تحاليل معينة مثلا...

[Alshiekh]

بالفعل تحول مرض أنفلونزا الخنازير الى وباء عالمى يجب الاحتياط له وذلك بعد الاعلان عن ذلك رسميا على لسان المتحدثة باسم منظمة الصحة العالمية مع أحتمال استمرار المرض لعامين

اليكم تفاصيل الخبر من BBC العربية