الأخوة المقيمين بالسعودية

[حماده عبده]

السلام عليكم أرجو من أخوانا في السعودية يفيدونا في أي معلومات عن شركة أسمها ديمه هي تخصصها مواد غذائية يعني مثلا المنتجات بتاعتها شغالة كويس ولا ... المعلومات العندي أنها بتنتج بسكويت وعصير ومنتجات أخري بالله لو في حد من أخوانا بيشتغل مثلا مندوب مبيعات بالمواد الغذائية أكيد بيكون عنده معلومات كافيه ولكم جزيل الشكر

[se_ Elsyed]

كل اللي أعرفه إنها شركة كبيرة لإنتاج المواد الغذائية وكانت " صافولا " شريكه فيها وخرجت

خد موقعهم الألكتروني وأتعرف عليهم أكتر

مجموعة شركات مكه

[elfakhrany]

ديمة شركة كبيرة وبشوف منتجاتها فى كل مكان وياريت تقولنا تفاصيل العرض عشان الأخوة تقدر تساعدك بالمعلومات المتاحة :sad:

[حماده عبده]

والله العرض هو عقد للعمل لدي هذه الشركة بمهنة مندوب مبيعات راتب 1500+عمولة 3% المكتب هنا هاياخد 7000 وتاكيت السفر علية أول مرة وكمان في فترة تدريب في الأول 3 شهور والراتب هايبقي 1000 ريال خلال هذه الفترة وبتبدأ العمولة من تاريخ أستلامي لأي خط حسب خبرتي.أيه رأيكم يا جماعة

[زعلان]

حرام عليك يا ابني صحتك 1500 ريال و حتبقى الف في اول 3 شهور انا ما اعرفش عمولة 3% ده تبقى تقريبا كام بس المرتب ده حتحتاج تستلف قده علشان تلاقي سكن و تصرفه يدوب

انت خبرتك ايه يا حماده ياريت تروح تبص على الموضايع المفتوحة عن السعودية حتفيدك تاخد قرار

[حماده عبده]

السكن عليهم والعمولة 3%في ناس كلمتها هناك قالتلي العمولة حوالي 1500 وكمان في تأمين صحي مكتوب بالعقد وأنا بصراحة دخلي هنا حوالي 1500 ومابوفرش منهم أي حاجة .

[زعلان]

بص طالما دخلك 1500 جنيه يبقى ما انصحكش تروح على المبلغ ده انت خبرتك كام سنة لو خبرتك اكثر من 3 سنين يبقى انت محتاج عرض افضل بكثير من ده يعني على الاقل 3 الاف ريال مرتب + نسبة من المبيعات + سكن ملائم و يليق بك + تذكرة سفر سنوية طيران + تأمين صحي شامل + طبعا حيدوك عربية تبع الشركة شاملة كافة مصاريفها بما فيها البنزين

[elfakhrany]

انا اتصلت لك بأحد مناديب المبيعات بشركة مواد غذائية وحصلت منه على المعلومات دى

1- الراتب الاساسى لمندوب التجزئة اللى بيشتغل على العربية الكبيرة اللى بيسموها هنا ديانا بيكون من 1500 الى 1800 أما مندوب السوبر ماركت أو مندوب الجملة يكون مرتبة الاساسى 2000 ريال

2- تتكفل الشركة بالتامين الصحى والسكن والمواصلات (مندوب التجزئة سيارة كبيرة أو مندوب السوبر ماركت سيارة صغيرة عادية )

3- نظام العمولة بيكون كالتالى 2 % على التحصيل و 1 % على المبيعات وعليه اذا حققت نسبة مبيعات 100 الف ريال ستاخذ 1000 ريال واذا حصلت 100 الف ريال فى نفس الشهر تاخذ عمولة 2000 ريال

4- لك اجازة سنوية مدفوعة الراتب + تذكرة طيران

5- لو انت قادم على الشركة تتكفل الشركة بتذكرة الطيران أو حسب العقد المبرم بينكم

واخبرنى ان شركة ديمة ذات سمعة طيبة وهتكون أسم حلو وخبرة جيدة كبداية لك فى الخليج واى استفسار أنا فى الخدمة

تم تعديل 28 أبريل 2009 بواسطة elfakhrany

[AbkaReno]

توكل علي الله الشركة هنا فروعها كتير وانا ساكن جمب مخزن ليهم والناس كلها مبسوطة زفعلا هو ده الراتب ..

بس حاول تشد حيلك في المبيعات لان اهم من الراتب العمولة..

بالتوفيق يا عزيزي.

[حماده عبده]

أنا بجد والله العظيم مش عارف أشكركم أزاي ربنا يخليكم ويوفقكم ومتشكر جدا للأخ فخراني وأنا هاتوكل علي الله لأن مصر بقي حالها لا يسر عدو ولا حبيب وأكيد طول ما في ناس مصريين حلويين زيكم كدة سي السيد وزعلان وعابقارينو أكيد يعني مش هانحس بغربه .

[زعلان]

ربنا يوفقك عموما و تاخد القرار الاصوب و يسر لك امورك و نشوفك قدام و انت في وضع افضل ان شاء الله

[elfakhrany]

أنا بجد والله العظيم مش عارف أشكركم أزاي ربنا يخليكم ويوفقكم ومتشكر جدا للأخ فخراني وأنا هاتوكل علي الله لأن مصر بقي حالها لا يسر عدو ولا حبيب وأكيد طول ما في ناس مصريين حلويين زيكم كدة سي السيد وزعلان وعابقارينو أكيد يعني مش هانحس بغربه .

لا شكر على واجب ... ولابد دوما أن نتذكر قول المصطفي عليه افضل الصلاة والسلام(كان الله في عون العبد مادام العبد في عون اخيه)صدق رسول الله صلي الله عليه وسلم

وانشاء الله لو جيت واتوزعت على الدمام أو الخبر راسلنى على الخاص...

[Amr Radwan]

ما قلتلناش انت هتيجي علي اي مدينة عشان نعمل معاك الواجب ؟؟ انت عارف المحاوراتية منتشرين في كل المملكة و الحمد لله الناس بتحب بعضها و هتلاقي ناس تخدمك و تقف جمبك في اي وقت ..

عموما انا في جدة .. و ان شاء الله لو جيت عليها او جيت علي اي مدينة تانية و حبيت تعمل عمرة اكيد هتعدي علينا .. تمنياتنا لك بالتوفيق ان شاء الله

[زعلان]

طب ما كنت بنزل السعودية زيارة و لاحد كان بيعبرني

[حماده عبده]

والله جماعة السفر هايكون علي مدينة الرياض أن شاء الله وبعد فترة الثلاثة أشهر الأولي ممكن أتنقل ألي أي فرع للشركه في أي مدينه وممكن أبقي في الرياض علي طول مش عارف ربنا ييسرلنا حالنا جميعا بس أنا دلوقتي في أنتظار التأشيرة ربنا يسهل