الغيرة النسائية

[fatfouta]

اذيكو يا جماعة

كنت عاوزة اتكلم مع الستات فى موضوع اما الرجاله بقى فاللى عاوز يشارك يتفضل بس من غير مايقول ايوه اهى فرصة

ليه يا ستات بيبقى فيه غيرة بيننا من بعض بمعنى انى لما كنت بشتغل كانت فيه حاجة بنسميها النفسنة يعنى دى عندها حاجة فى نفسها مضايقاها من دى وكده يعنى

النفسنه دى او الغيرة كانت دايما تحصل وعلى الاغلبية مع الستات بين بعضهم وبعض ومش هقول الرجالة لا لكن ساعات كانت بتحصل برضو بس هما بيعرفوا يداروا الموضوع ده ......بس بقول بتحصل بينهم برضو

الموضوع ده كان بيقابلنى كتير والله مع مثلا واحدة تبقى معايا فى الشغل وتبقى عاملة نفسها صاحبة واحدة تانية وتقعد تقولها صباح الخير يا حبيبتى يا روحى ومش عارف ايه واول ماتمشى تروح تقول اووف يا ساتر ايه اللى هى عاملاه ده وايه اللى هى لابساه ده

واللى يجنن بقى انهم كانوا كل يوم الصبح يسلموا على بعض ويبوسوا بعض ولازم البوسة من هنا ومن هنا......... ال يعنى وحشين بعض اوى

انا افتكرت الموضوع ده لما كنت امبارح فى احد المولات وبعدين قابلت بالصدفة البحتة مديرتى فى الشغل واول ماشافتنى سلمت عليا بحرارة واذيك ومش معقول انتى هنا من امتى وكده اونا قولت فى نفسى دى الدنيا ضيقة يا جدعان

الست دى ياجماعة كان فيها حاجة غريبة اوى مع انها كانت مديرتنا لكن كانت بتغير مننا ولو لقت واحدة فينا لابسة حاجة شيك تقعد تبص من غير ماتقدر تدارى نظراتها

وحصلمعايا وبينى وبينها حاجات كتير وضحتلى انها منفسنة بس انا كنت بقول يا ستى خديها على اد عقلها وخلاص واهى مديرتك يعنى مش هتقدرى تعاديها

كانت دايما تقعد تبص بنظرات من تحت لتحت كده على كل حاجة وعلى معاملة الناس ليا والله لدرجة انها مرة قلتلى ومن غير ماتاخد بالها من كلامها هو انتى بتخلى الناس يحبوكى اذاى ....... قلت فى نفسى يا ساتييير عارفة لو ماكنتيش مديرتى

المهم انا لما قابلتها برضو ماحرمتنيش من كلامها ذى ايه الوكلام بقى اللى يحرق الدم اللى قالته ذى

ايه ده دول ولادك ؟ هو انتى لحقتى

هو فين جوزك عاوزة اشوفه...... لانه كان واقف بعيد عننا واحنا بنتكلم

طيب عاوزين نزور بعض بقى عشان اشوفك ساكنة فين وكده

الست بتكلم علنى ومش واخدة بالها من كلامها خالص انه كله تجريح

غاظتنى جدااا بصراحة والله قلت فى نفسى بعد مامشيت هو انا ليه مارديتش عليها وسكتت كده ذى الهبلة .. وكمان ماحنا دلوقتى لا بيننا شغل ولا اى حاجة يعنى حضرتك لسه برضو مضايقة نفسك منى

وعشان كده افتكرت برضو ناس كتير تيجى تحكى تقول ده مش عارفة مين مضايقة منى فى الشغل او فى المدرسة او ممكن تبقى جارة او او او

بس فى الاخر يعنى ليه بيحصل كده

ليه انا لما اشوف حاجة حلوة على واحدة ذيى محاولش اقلدها وابقى كويسة ذيها ولا احاول احسد واغير واحقد

بالعكس الغيرة كويسة لانها بتحفذ الواحد انه يقلد الكويس لكن لو اتقلبت لحقد ده يبقى صعب اوى اوى

معلش طولت عليكوا

فتفوته

[الباشمهندس ياسر]

ماسمهاش الغيرة يا فتفوتة

لان الغيرة تبقى ان البنت تغير على ولد و العكس

انما هنا اسمها التباغض و العياذ بالله

و هى منتشرة اوى ف البنات و برده موجوده فى الولاد بس بنسبة اقل

عموما

حافظى على الاذكار و ربنا يسترها عليكى من عنيهم و نفسياتهم السودة لآن شكل نجمك خفيف زى حالاتى

[بركة]

فتفوتة العزيزة أنت دايما كده بتيجي على الأوتار الحساسة سبحان الله

قبل ما أعلق على موضوعك أحب أضيف حاجة بردو مضايقاني جدا في الستات المصريات ولم

أجدها هنا في السعودية كتير زي عندنا في مصر......

ألا وهي إهمال المرأة لنفسها حبتين في البيت ( بالذات بعد الجواز ) وانتقاد الاخريات والغيرة منهن لو كانوا أحسن

يعني بالبلدي كده " لا منه ولا كفاية شره " وده شئ كنت نفسي أناقشة معاكم هنا وأهي جت الفرصة

الموضوع حقيقي أبعاده كتير منها النفسي ومنها الاجتماعي ومنها الديني ومنها الثقافي وأحب أناقش جزئية

مهمة وفي رأيي أنها أولى بالنقاش من غيرها ألا وهي مقولة سمعتها من دكتور إبراهيم الفقي:

ضعف تقدير الذات وأرى أنها لب الغيرة بصراحة

فلو احنا اتربينا على عزة النفس و فهمنا لانفسنا وأن كل إنسان في الدنيا

مميز بمميزات خاصة به وحده وأن به جمالا ما وأن ما لديه رزق يجب أن يشكر الله عليه......

وبنظرة أعمق فإن ضعف تقدير الذات هذا لن يخرج بنا من دائرة الاعتدال والإتزان فحسب

بل إنه سيؤدي بالكثيرات الى محاولة لفت الأنظار

والتي تتبعها الفتيات لتعويض ذلك الضعف بطرق غير مقبولة منها

" التعري والاباحية الزائدة والتصرفات التي لا يقبلها الدين ولا المجتمع كله"

وكل هذا ما هو إلا غيرة وحب لفت النظر + ثقافة أن الجمال والمال وإظهارهم هو سر الجاذبية والتميز

ربنا يهدي الجميع........

عن أنس بن مالك رضي الله عنه خادم رسول الله صلى الله عليه وسلم قال :

( لايؤمن أحدكم حتى يحب لأخيه ما يحب لنفسه ) ، رواه البخاري و مسلم .

تم تعديل 28 أبريل 2009 بواسطة بركة

[doudy]

[size="4"]صباح الفل يا فتفوتة

ايه المواضيع الجامدة دى

فعلا معاكى حق الغيرة اة النفسنة انا بلاحظها اكتر بين الستات

اكتر من الرجالة مش عارفة ليه.

و عرفتها اول مرة من ايام ثانوية عامة تبقى البنت صاحبتك و حبيبتك

و تخبى انها ذاكرت و تقول ماذاكرتش و ما ليش نفس اذاكر

و هى اللهم لا حسد مولعاها مذاكرة

و كمان فى الكلية البنت ماتديش زمايلها البنات محاضرة فايتاهم ابدا

عارفة اما يفوتنى محاضرة البنات يفضلوا يقولوا لسة ما بيضتهاش

خدى عندك كدة لاخر الترم فاضطر اطلبها من اى زميل ولد

و الشغل كمان و الجارات وهه هقولك ايه كيدهن عظيم بس احنا منهم برضه

و الواحد مش بيشوف نفسه و هوة بينفسن يلا دنيا

دودى

[جويرية]

ده برضو من الاسباب المهمة عشان نقول الست مكانها بيتها ، لأن المرأة زي الطفل لا يحب التعامل مع الغرباء

و الواحدة اما تكون دايرة الناس اللي بتتعامل معاهم هما اهلها بس فبكدة حيقل جدا موضوع الغيرة ده ، او برضو مش حيروح خالص بس الاهل يه صلة رحم بينهم فده برضو بيخلي الناس افضل خلقا غير مع الغرباء

[لولا]

ده برضو من الاسباب المهمة عشان نقول الست مكانها بيتها ، لأن المرأة زي الطفل لا يحب التعامل مع الغرباء

:blink: :blink: :blink:

ايوووووون انا طول عمرى اقول الست مكانها اوضتها ,, قصدى بيتها :unsure:

جوجو فى اغنيه حلوه اسمها الدنيا زى المرجيحه حلوه قوى ابقي اسمعيها..

بصى بتقول ايه :

الدنيا زى المرجيحه يوم تحت و فوق..

وانا ماشي بتمرجح فيها من تحت .. لفوق..لفوووق .. لفوووووق ... لفوووووووووق

مساء الجماااااال :shutup:

لولا

تم تعديل 28 أكتوبر 2011 بواسطة لولا

[elzahraa]

موضوعك مميز يا فتفوتة و احب ابتدي ردي بكلمة للعبقري محمد عفيفي الله يرحمة

وفقاً لقانون الغابة يجب على كل حيوان يقابل الآخر أن يقتله، أما وفقاً لقانون المدنية فيجب أن يقبله أولاً.

و بداية كدة حوضح حاجة انا كنت في مجال لمدة 6 سنوات النساء فيه عملة نادرة فعلا و كانت معظم تعاملاتي مع رجال

عايزة اقولك ان النفسنة موجودة و الغيرة موجودة و الزمبئة موجودة و لا كأن اعوذ بالله حاخد رزق حد فيهم !!!! لغاية ما طهقت و بعدت عن المجال

يعني المشكلة بشرية اكتر منها نسائية زي ما كنت انا نفسي فاكرة قبل ما تعملاتي ما النساء تقل و كونا بنحسها من النساء لان معظم تعاملنا معاهم

و الرجال عموما اقل حساسية من النساء فما بيعرفوش يحسو النفسنة زينا كدة فجايز دا سبب انو يبان انو بين الستات اكتر

دا بالنسبة لنفسنة الدراسة و المذاكرة و الشغل و اللي بعض الاعمال الرجال منفسنين اكتر من الستات فيها عشان الشغل اهم بالنسبة لهم مننا و سبب الموضوع عموما انانية و عدم الايمان بتقسيم الارزاق

بالنسبة بقى لنفسنة اللبس و الشكل و العيال و الكلام دا ففي لوم على الست و لوم على المجتمع اللي حكم على المرأة المتزوجة ان يصبح زوجها و انوثتها كل حياتها !!!! فتلاقي فعلا مديرة بتغير من موظفة و لا سفيرة بتغير من غفيرة !!!! و حل النقطة دي الست تطلع نفسها من الكلكيعة دي و تحس بنفسها ككيان كامل الزواج و المظهر جزء منه و ليس كله و دا كمان حيريح الرجل بدل الحصار اللي مفروض عليه و ساعتها تحس انها مختلفة و متقلدش كل واحدة تشوفها

و ارجع لجملة محمد عفيفي و اقول لازم التحضر يتغلل و ميبقاش طبقة بس و تفضل النفوس زي ما هى

و شكرا لك على الموضوع يا قمر

تم تعديل 28 أكتوبر 2011 بواسطة elzahraa