مشكلتك لها حل !!!

[حشيش]

يسر العالم الروحانى (حشيش الحشيش) أن يقدم خدماته المجانية لأعضاء المنتدى فى مجال الإستشارات النفسية والروحية والمساعدة فى حل المشاكل الإجتماعية والعاطفية وتجويز البنات السكه والشباب النص كم بالإستعانة بالنجوم والأبراج وذلك بعد تكريمه فى فرنسا وحصوله على وسام (الترمسه الفضية) من جمعية الأطباء الروحانيين بمدينة بظاظا الساحلية...هذه الخدمة فقط لأعضاء محاورات المصريين...

حشيش

عالم فلكى

[فــيــروز]

طيب ما ترمى بياضك كده و تتنبأ لنا بحاجه على قد ما قسم للحكومه الحاليه و يبقى لك الحلاوه الطحينيه !! معلش مش هنشترى سمك فى ميه

[Lancelot]

...هذه الخدمة فقط لأعضاء محاورات المصريين...

.....و تتنبأ لنا بحاجه على قد ما قسم للحكومه الحاليه ....

تفتكري الحكومة عضو معانا ....

[حشيش]

الأخت العزيزة فيروز...الأخ العزيز لانسلوت

حكومة غراب الخراب منفعش معاهم نجوم ولا أبراج...الشئ المؤكد إن زحل يدور بشكل متعامد على الدكتور عاطف وهذا نذير شؤم (علينا)................

[سونة]

[quote]هذه الخدمة فقط لأعضاء محاورات المصريين...

طالما هندفع اشتراك000 يبقي لازم نستفيد من كل الخدمات

(وش واحدا استئطاعية)

مجال الإستشارات النفسية والروحية والمساعدة فى حل المشاكل الإجتماعية

متهيألي ان مشكلتى تتندرج تحت واحد من التلاتة دول

مشكلتى انى بانسي 3 حاجات بالذات

الاماكن 00000 الاسامى 0000 الوشوش

يعنى مثلا لو واحدة صحبتى كانت معايا في الثانوية وبتكلمنى وبكلمها في التليفون

وبئالي مثلا سنتين مشوفتهاش

وجت زارتنى في مرة 000 أعد اقول مين دي؟ مين دى؟ شوفتها فين؟

ولما افتكرها00000

انسي اسمها

الاسامى كلها داخلة علي بعضها عندى

مرة قابلتنى بنت و بتتعرف بيا

بتقولي اسمى سحر

وانا مصرة أٌقولها رانيا أو داليا

اصل شكلها يدى علي رانيا او سامية حاجة زى كدة

وكل الاسامى عندة با خدها بالشكل ومابتطلعشي ابدا

معلشي ع الرغي

هما اللي قالولي(وش فردوس عبد الحميد)

اتكلمى براحتك

المهم فية حل؟؟؟

[فــيــروز]

تفتكري الحكومة عضو معانا ....

لا طبعا بس كان قصدى نجرب فى حد من بره الاعضاء .. اكيد مش هنجرب فى الاعضاء

حكومة غراب الخراب منفعش معاهم نجوم ولا أبراج...الشئ المؤكد إن زحل يدور بشكل متعامد على الدكتور عاطف وهذا نذير شؤم (علينا)................

يا دكتور حشيش ماتقفلهاش .. غير الميه اللى بتبص فيها طيب يمكن الكريستاله السحريه بتاعتك تجيب قناه احسن ونشوف خبر كويس

يا سونه .. استنى يا ماما اما ناخد البشاره من الدكتور حشيش .. بركاتك ..

[linux]

أنا هأ طوع يا بروفسور حشيش و لازم تعملى خصم علشان أنا أول أستفتاح ...

مشكلتى اللى مش لأيلها حل أن كل جزمى شمال !!

يعنى أشترى جوز الجزم من المحل و كلة سليم ... أول مأخرج و أمشي الاقى الفردتين يقلبوا شمال ..

و حياتك جربت البس صنادل، شباشب، قباقيب، شرابات ... حتى بيادة الجيش قلبت معايا شمال !!

خطيبتى عايزة تفسخ الخطوبة لما عرفت الموضوع ...

مع العلم أني عرضت نفسي على الدكتوور طومسون بتاع فيلم الرز المفلفل و أحمد سالم (أبني!!!) و أكد لى أن السبب مش عضوي.

أنقذني يا بروف

الحيران

ش. م. أ. ل.

كوبرى الليمون - أشتهوت البلد

[se_ Elsyed]

نعتذر عن إنشغال د/ حشيش حيث أنه فى مهمة سرية تتعلق بالأمن القومي لبلدنا ( بيني وبينكم بيقرأ الطالع للدكتور عطوفه ... الراجل قلقان وعايز يعرف هايفلسع فى التعديل الوزاري اللي جاي والا هايفضل قاعد على تلها )

فبالتالي سوف يقوم البروف / س س أخصائي الشعوذة والتنجيم بالإجابة عن إستفسارتكم لحين عودة الدكتور حشيش من رحلته العلاجية ... قصدي من رحلته القومية.

[se_ Elsyed]

المريضة كروساية كتبت

متهيألي ان مشكلتى تتندرج تحت واحد من التلاتة دول

مشكلتى انى بانسي 3 حاجات بالذات

الاماكن 00000 الاسامى 0000 الوشوش

يعنى مثلا  لو  واحدة صحبتى كانت معايا في الثانوية وبتكلمنى وبكلمها في التليفون

وبئالي مثلا سنتين مشوفتهاش

وجت زارتنى في مرة 000 أعد اقول مين دي؟ مين دى؟ شوفتها فين؟

ولما افتكرها00000

انسي اسمها

الاسامى كلها داخلة علي بعضها عندى

مرة قابلتنى بنت  و بتتعرف بيا 

بتقولي  اسمى  سحر

وانا مصرة أٌقولها رانيا أو داليا

اصل شكلها يدى علي رانيا او سامية حاجة زى كدة

وكل الاسامى عندة با خدها بالشكل ومابتطلعشي ابدا

معلشي ع الرغي 

هما اللي قالولي(وش فردوس عبد الحميد)

اتكلمى براحتك

المهم فية حل؟؟؟

أولاً هأحاول دلوقت أقدملك حل لمشكلة الأسامي يا كروساية يا بنتي لأن مشكلتك بنسميها فى علم الروحانيات بمرض " آه منك يا ناسيني " ودي حلها سهل جداً وهو انك ترجعي لذكريات الدراسة والامتحانات وتبرشمي أسامي صحباتك فى ورقة صغيرة وكل ورقة تكتبي فيها أسم صديقتك دي وتعلميها بحاجة مميزة بحيث تتعرفي عليها بسهولة .....

وانا شخصياً وبجد وجديد ... لي صديق أخترع حل عبقري يصلح مع الرجالة وهو أن أي واحد عنده أسمه شوكت أو شكري ... يعني هو بصنعة لطافة شفط واختصر جميع أسماء أصدقاءة في الأسمين دول ... والراجل مش فاضي لسه هايقعد يفتكر ..

وهنا فى السعودية اول ما جيت لقيت حاجة غريبة جداً ... كل الرجالة أسمهم محمد ... آه والله .... يعني ادخل المطعم الأقي الكاشيير بيسألني أيوه يا محمد طلباتك أيه ؟ الأقي الناس بيندهوا بعض بالأسم ده ...كنت بأستغرب جداً الاول ... بعد كده بقيت شغال معاهم على الخط أي حد اندهلوا وأقوله يا محمد ... سعودي ... هندي ... إن شالله من بلاد الواق الواق حتى ...

بذمتكم مش فكره هايلة ...

[حشيش]

مشكلتى انى بانسي 3 حاجات بالذات 

الاماكن 00000 الاسامى 0000 الوشوش

الأخت سونه

مشكلتك ناتجه عن نقص فيتامين د وليس لها خلفية روحانيه أو فلكيه...فنقص هذا الفيتامين يؤدى إلى ضعف فى الذاكرة وتؤخر فى النطق مع لين فى العظام وكساح...انصحك بالتعرض إلى الشمس لمدة 7 ساعات يوميا على الأقل حتى تزول الأعراض...

مشكلتى اللى مش لأيلها حل أن كل جزمى شمال !!

الأخ لينوكس

بفحص مشكلتك تبين إنك من مواليد برج الحوت...وكما تعلم الحوت مالوش رجلين لأنه سمكه...لذلك الجزمة الوحيدة اللى حتنفع معاك هى الزعانف التى يرتديها الغواصين...مددددددددددددددددددددددد

[crossfield]

عندكككككككككككككككك يا سى السيد

مدد على الشيزلونج متضيعش وقت

بقى سونة تقولك عندى مشكلة

و انت تلبسهالى أنا ؟؟؟على العموم أنا كنست عليك السيدة زينب من زمان(من ساعة ما لبستنى تهمة قتل الطفشان) .يالا سلم نفسك لقسم الحالات الحرجة عند الشيخ حشيش

يا ترى الشيخ حشيش عنده علاج لحالة س س دى؟؟؟؟؟

أنا شخصياً أقترح عمل زار و على أعضاء المنتدى المساهمة فى احضار طلبات الأسياااااااااااااااااااااااااد من أول الديك أبو 5 رجلين لحد الوزة اللى فى رقبتها حسنة سودا.مدد يا سياااااااااااااااااد ؛دستور يا مباركين.

[Cleo]

مشكلتى هى عقلى الباطن....

يعنى ممكن أبقى هاموت من التعب و مش قادرة أفتح... أول ما أحط دماغى عالمخدة.... الموتور يشتغل (هو مفوت حبتين و صوته عالى بس لسة شغال) و أقعد أفكر فى أى حاجة و الفكرة تجيب فكرة و الفكرة تجيب فكرة و أبقى هاموت نفسى أقوم الساعة 3 بالليل أستشير حد فى الحاجة اللى بفكر فيها... أو أتخانق مع حد... طبعا كل الناس بتكون نايمة...

أقوم أقعد أفكر إمتى الوقت المناسب بكرة عشان أكلم الناس و أتخانق معاهم أو أستشيرهم....

و أقعد أفكر هاقول الموضوع إزاى و هم ممكن يردوا إزاى و أقع أحضر الرد المضاد....

المعذبة الحائرة - كليو - برج القوس - الدور الخامس و العشرين على يمين الأسانسير

[فــيــروز]

المريضة كروساية كتبت

أولاً هأحاول دلوقت أقدملك حل لمشكلة الأسامي يا كروساية يا بنتي لأن مشكلتك بنسميها فى علم الروحانيات بمرض " آه منك يا ناسيني " ودي حلها سهل جداً وهو انك ترجعي لذكريات الدراسة والامتحانات وتبرشمي أسامي صحباتك فى ورقة صغيرة وكل ورقة تكتبي فيها أسم صديقتك دي وتعلميها بحاجة مميزة بحيث تتعرفي عليها بسهولة .....

اعتقد ان س.س. هو كمان محتاج العلاج اللى سونه بتدور عليه وعلى راى المثل : جببتك يا س.س. تعالجنى لقيتك انت ناسى اكتر منى

فيروز الصياد .. مؤلفة كتاب تعلم الصيد فى الميه العكره

[حشيش]

المعذبة الحائرة كليو

بعد استطلاع النجوم والأبراج اتضح أن عام 2003 ليس عام سعدك وذلك نظرا لدخول زحل فى مدار الجدى وهذا له تأثير سلبى على تفكيرك وانفعالاتك وقد يؤدى بك إلى الجنون أو الصرع...بإختصار السنة دى سنة زرقا عليكى...عام سعدك هو 2123 م... هذا والله أعلم

الأخوات الأعزاء فيروز وكروساية

أحذركم من السخرية بالعالم الفلكى الجليل سي السيد أو العبث بمقدراته...لقد تشرفت بالعمل مع هذا الفلكى النابغ أثناء دراستنا بفرنسا فى سجن الباستيل حيث كان يمضى فترة العقوبة ( قصدى الدراسة) هناك...هذا المصرى البار هو الوحيد الحاصل على وسام (الشمة الأولى) وهو أعلى وسام تمنحه فرنسا لدارس أجنبى بها...لذا لزم التنويه

[Lancelot]

هذا المصرى البار هو الوحيد الحاصل على وسام (الشمة الأولى) وهو أعلى وسام تمنحه فرنسا لدارس أجنبى بها...

فرنسا ديه ... اللي في أوروبا ... و لا اللي في الباطنية ...

عارفها ... خالتي فرنسا ... اللي علي ناصية الشارع اللي جبت منه أخر مرة .... و لو مش عارفها ....

خالتي فرنسا ... قريبا في جميع دور العرض ... عبلة كامل و مني زكي ...

[se_ Elsyed]

أحذركم من السخرية بالعالم الفلكى الجليل سي السيد أو العبث بمقدراته...لقد تشرفت بالعمل مع هذا الفلكى النابغ أثناء دراستنا بفرنسا فى سجن الباستيل حيث كان يمضى فترة العقوبة ( قصدى الدراسة) هناك...هذا المصرى البار هو الوحيد الحاصل على وسام (الشمة الأولى) وهو أعلى وسام تمنحه فرنسا لدارس أجنبى بها...لذا لزم التنويه

سيبهم ..سيبهم يتتريقوا يا دكتور حشيش ... ما هو لا كرامة لنبي في وطنة ... وانا قولتلك الناس دي مابتقدرش .. قولتيلي لأ يا س س دول برضوا ولاد بلدنا .. أي نعم هما مابيدفعوش وعايزين إستشارات سنكحة .. لكن نعمل أيه الواجب الوطني ...

وقولت لك نهاجر لأي دولة من الدول التانية اللي بتقدر العلماء اللي زيينا ...عندك مثلاً بنها ، أبو قرقاص ، صفط اللبن ... كلها دول متقدمة ومحترمة ... قولتلي لأ هي مصر وبس .....

إستلم بقى ياخويا ...

وبعدين يا هوانم ياللي بتضحكوا ...الدكتور لما بييجي يشخص حالة ويوصف علاج .. ما بيهموش الأسامي . .. سونه كروساية أم سحلول حتى .. دي فسافس مابتأثرش على فعالية العلاج ....

[se_ Elsyed]

نداء أخير للدكتور العلامه حشيش المعجباني

" لِم العده وطفي الولعه الناس فاكره الموضوع تريقه .. ومش مقدره مجهوداتك يا عالم يا عبقري "

[Cleo]

عقليتى "الباطنية" بتقوللى إن سى سى و حشيش زمايل فى نفس المجال..... يعنى لو قدرنا نوقع بينهم و "نشعل" روح المنافسة بينهم و "نضرب كرسى" فى الكلوب ممكن يقلبوا على بعض و نقدر ساعنها نستغل الموقف و ناخد ديسكاونتات كوبية منهم هم الاتنين

[se_ Elsyed]

عقليتى "الباطنية" بتقوللى إن سى سى و حشيش زمايل فى نفس المجال..... يعنى لو قدرنا نوقع بينهم و "نشعل" روح المنافسة بينهم و "نضرب كرسى" فى الكلوب ممكن يقلبوا على بعض و نقدر ساعنها نستغل الموقف و ناخد ديسكاونتات كوبية منهم هم الاتنين

هيهات هيهات ... يابنتي ده حتى " الحكومة " معرفيتش توقع بيننا ... كل ده كان " دخان " فى " الهوا " ولأني أنا وحشيش " نفسنا " طويل فمبيهمناش من أي " كبسة " وبعدين خلي باللك إللي خلانا نشتغل شغلانة الروحانيات والشعوذة دي إن بينهم عامل مشترك وهو " الفحم المولع " "والدخان " فمحسناش بفرق كبير بين الشغلانتين...

حشيش .... انا بأعتز بصداقتك يا رفيق الدرب .... سير يا حشيش وانا معاك لحد ماتودينا فى داهية ....

[حشيش]

عقليتى "الباطنية" بتقوللى إن سى سى و حشيش زمايل فى نفس المجال..... يعنى لو قدرنا نوقع بينهم و "نشعل" روح المنافسة بينهم و "نضرب كرسى" فى الكلوب ممكن يقلبوا على بعض و نقدر ساعنها نستغل الموقف و ناخد ديسكاونتات كوبية منهم هم الاتنين

حشيش .... انا بأعتز بصداقتك يا رفيق الدرب .... سير يا حشيش وانا معاك لحد ماتودينا فى داهية ....

ما جمعه السجن...لا يفرقه إلا الموت (من أقوالى المأثورة)