السفر البري 2009 حديث ومتجدد لهذا العام فقط

[تامر مصطفى]

السلام عليكم ورحمة الله وبركاته

السفر البري رحلة جميلة وممتعه

ولكن تنتهي متعتها عند البحر والعبارة ودخول مصر

ففي ميناء نويبع تجد نفسك مضطر انك تطوف حول المبنى الموجود في منتصف الميناء وكل واحد لازم يدوخك علشان تدفع وانت ساكت وبعدين انا عندي اقتراح جميل ومربح لأهل الميناء وهو انهم يعملوا شباك اول ما تنزل من العبارة تروح تسلم كل اوراقك فيه وتدفع 250 جنيه زيادة عن كل الرسوم ويكون في غرف تأجر غرفة وتدخل تنام فيها وترتاح انت وعيالك من تعب الرحلة وبعد 3 ساعات تروح لشباك تاني تستلم الرخصة واللوحات وهما يخلصوا كل حاجة مع نفسهم.

واذا كا اقتراحي مش كويس يبقى الاقتراح التاني انهم يرتبوا الشبابيك جنب بعض ويبقى التخليص كله في مكان واحد وانهم يخلوا كل الموظفين يشتغلوا في وقت واحد علشان يقللوا من العطلة والتأخير.

في موضوع مهم عايز انبهكم ليه واكيد اغلبكم وقع ضحية ليه.

موضوع عمال اصلاح كاوتش السيارة

المشهد : تدخل بسيارتك اللتي تحمل لوحات جمارك الى محطة بنزين فيمر من جانبك طفل ويبلغك ان "العجلة نايمة" ولو عايز تزود هوا روح لبتاع الكاوتش اللي داخل البنزينة.

طبيعي انك تروح وتطلب زيادة هواء الكاوتش - يستقبلك العامل بشعارات دينية تقنعك انه يعرف ربنا وعمره ما هيغشك - فيبلغك العامل ان الفرده مش بتقبل زيادة يعني فيها اخرام كتير - ويجيب صابون ويحطه على العجلة ويوريك تنفيس الهواء وهنا يخيرك عايز الامريكي اللي هو اي كلام ويفك بعد فترة والا عايز الالماني اللي بيلزق زي الحديد الامريكي سعره 15 والالماني سعره 20 جنيه.

ولأن انت راجل هتسافر بسيارتك وخايف على روحك وارواح اطفالك هتختار الالماني ابو 20 ويبدأ الاخل في استكشاف اخرام والعداد بيعد لغاية ما انت تزهق وتقوله خلاص كفاية يكون حسب عليك حوالي 500 جنيه وانت واقف تتفرج وطبعا هتبتدي تكتشف المفاجآت بعدين.

اول مفاجأة هتكتشفها انك اتنصب عليك بلعبة بيلعبها حاليا جميع عمال الكاوتش في مصر

ثاني مفاجأة هي ان سعر أغلى لحام للكاوتش التيوبلس هو 5 جنيه

ثالث مفاجأة هي ان فردة الكاوتش بتاعتك باظت وبقت عاملة زي المصفة ولازم تغيرها

ارجو ان محدش يقع فريسة للموضوع ده وتعرف انه لازم يفك العجلة من السيارة وميزودش الهوا فيها زيادة عن الطبيعي ويمشيها داخل مياه ولو شفت التنفيس واضح وقتها خليه يلحمها ب5 جنيه فقط

ياريت نقف في وش كل النصابين ونتخذ معاهم مواقف قوية .

[elshafey]

اسعار جدة سفاجا

اولى لوكس ذهاب + اياب 1350 ريال للفرد

اولى عادي 1150 للفرد

السيارة 4 سلندر ذهاب + اياب 1850 ريال

تحياتي

حرام اسعار غالية جدا انا لسة حاجز لزوجتى على الخطوط السعودية(تذكرة 6 شهور) ب 1750 ريال للسفر فى النصف الاول من شهر 6 و صديق لى حجز تذكرة على السعودية (45يوم) 1150 ريال فى شهر 7 نصيحة لو محتاج السيارة ممكن تشحنها لوحدها لسفاجا او السويس ايهم اقرب لك

يا جماعة تذكرة ناس ذهاب يوم وقفة عيد الفطر والعودة في آخر أكتوبر بـ 1150 ريال لإسكندرية

[Nonna]

السلام عليكم

معلش هو موضوع بقاله سنة تقريبا

بس انا قلت استفسر فيه

زوجي حاليا في تبوك و عاوز يجي وقفة عيد الفطر ان شاء الله

يعني يوم 9 سبتمبر 2010 الى القاهرة

في اجازة 10 ايام و راجع السعودية تاني

انا اعرف من والدي بحكم اننا كنا في السعودية قبل كدة ان تبوك قريبة

لميناء ضبا زي القاهرة و اسكندرية كدة

ففكرنا انه ممكن يجي بالعبارة لان مصر للطيران مواعيد الحجز مش مناسباه

و اذا ناسبته بتطلع اما بيزنس او درجة اولى

هل في خطوط طيران تانية غير الخطوط السعودية ومصر للطيران

ممكن يجي عليها و يلحق يحجز فيها اصلا يوم 9 سبتمبر 2010 و عودة يوم 21

سبتمبر 2010 ؟

انا اول مرة اسمع عن ناس و سما

ممكن اعرف دول الواحد يحجز فيهم ازاى في تبوك او الدمام؟

و الاهم بالنسبة للعبارات من ميناء ضبا

يحجز منين؟

و الاسعار ايه؟

و ينفع يحجز ذهاب وعودة برده زي الطيران؟