هوة احنا لية بنحب مصر؟؟؟؟

[مهيب]

الدموع اللى أميرة حابساها .. و كلمات عمنا صلاح جاهين اللى استشهد بيها العصفور الطائر هى جل ما أردته حقا من احياء المواضيع القديمة .. هناك أشياء يكون من الحمق تجاهلها و نسيانها .. ألستم معى فى هذا

مهيب

[محمد عبدالعزيز]

من كام يوم كده كنت باسمع برنامج اسمه "من تسجيلات الهواة" أو "تسجيلات نادرة" مش فاكر بالظبط على إذاعة البرنامج العام والحلقة دى ويالها من حلقة معلقة فى دماغى وعمالة كل شوية تزن فى ودانى!

ليه؟!!!

الحلقة دى أذاعت تسجيل نادر ﻷغنية للست...

تفتكروا أغنية إيه ؟

أيوه

كانت أغنية "مصر التى فى خاطرى"

بس إيه الجديد بقى فى التسجيل ده؟!!!

الجديد إنى أول مرة أسمع الست بتغنى والجمهور بيرد عليها (تقريباً كانت حفلة بعد ثورة ٥٢)

يعنى إيه الجمهور كان بيرد؟!!!

يعنى أول مالست تخلص المقطع اللى بيقول:

بنى الحمااااااااااااااااااااااااااااااااااااا والوطن...... من منكم يحبها مثلى أنا .... مثلى أناااااااااااااااااااااااااااااااااااااااااا

يقوم الجمهور كله يقول فى صوت واحد وقوى لدرجة إن صوت الست بيبقى مش باين ويقول:

نحبهاااااااااااااااا من روحناااااااااااا ..... ونفتدييييييييييييييها بالعزيييييييييييييييييييز اﻷكرم

كنت حاسس ساعتها إنى مش مصدق نفسى, طب الناس دى راحت فين ومختفية ليه؟!!!

ممكن حد يقول دى مجرد أغنية... أيوة بس اللى يسمعها هيتأكد مليون فى المائة إن الناس دى كانت بتحب مصر بجد واﻷغنية دى بتعبر عن حبهم لمصر.

وقعدت بقى أحلم كده يوم ٢٥ مايو 2006 فى الوقفة الاحتجاجية على أحداث الاستفتاء الماضى فى 2005 إنى أمسك ميكروفون (ﻷن صوتى مش بقوة ولا حلاوة صوت الست يعنى) وأقول نفس المقطع:

بنى الحمااااااااااااااااااااااااااااااااااااا والوطن...... من منكم يحبها مثلى أنا .... مثلى أناااااااااااااااااااااااااااااااااااااااااا

والناس كلها بترد ورايا وتقول:

نحبهاااااااااااااااا من روحناااااااااااا ..... ونفتدييييييييييييييها بالعزيييييييييييييييييييز اﻷكرم

نفسى نرجع كلنا نحب مصر بجد بالفعل والكلام والنظرات والهمسات وبكل طريقة

أنا لو كنت مش باحب مصر وسمعت التسجيل ده أكيد كنت هاغير رأيى بس طبعاً فى أسباب تانية كتير غير السبب ده

أهمها إنى فى مصر باحس إنى عايش رغم اﻷزمات وضيق الحال اللى احنا فيه

وفى غيرها باحس إنى ميت رغم توفر وسائل الرفاهية والكماليات والمال وكل وسائل المتعة

وأنا جربت الاتنين وفى اﻵخر فضلت المعاناة فى مصر

بس أنا مش غاوى عذاب ومهانة وذل

أنا فضلت المعاناة وبذل الجهد على أمل ترجع مصر للمصريين

على أمل إن الحال يتصلح وأولادى مايغضبوش منى فى نفسهم إنى ماحافظتش على حقى وحقهم فى الحياة فى بلدنا

على أمل إن الهرم يتعدل وكل واحد ياخد حقه ويؤدى الواجب اللى عليه

على أمل إنى أغير تفكير الناس اللى عايشين حواليا وأخليهم إيجابيين بيعرفوا حقوقهم ويصروا عليها,

بيحافظوا على إخواتهم المواطنين وحقوقهم, مش كل واحد عنده استعداد يموت أخوه بس مايقولش للظالم إنت ظالم

على أمل حاجات كتير حلوة تحصل وحاجات كتير وحشة تنتهى من حياتنا

[yasovinas]

ناس كتير ذهقت وقرفت وطفشت لكن لما يسمع اسم مصر بلده واهله وطفولته وشبابة وبنت الجيران ودفعته في الجيش وكمسري القطار ورمضان البقال وسوق الخضار مصر حاجات كتير قوي حلوة وبرضه مره لكن بنحبها

مصر عامله زي فيلم جميل نشوفه ونحسه وننسجم معاه قوي لكن نمثل فيه للاسف لاء

زي مباراة كورة نشجع ونهتف ونقول للعيبه شوط ؛؛؛ حاسب ؛؛؛ وممكن كمان نشتم اللعيب ونقول له بتعمل ايه يا حمار ؛؛؛ وكمان نسب ونلعن سنسفيل جدود المدرب علشان مش عامل خطه زي اللى في بالنا لكن ننزل نلعب احنا ؛؛؛؛ برضه لاء

زي واحد بيسمع حكاية من واحد وكل شويه يقول له انت غلطان كنت قول له كذا وكذا ولا كنت عملت كذا وكذا ؛؛؛؛؛ لكن يقول هو لاء

[محمود الشاعر]

انا كنت مسافر لدولة خليجية غنية و ناسها بتحب مصر وكنت شغال فى مركز كويس جدا جدا بس اللي رجعني

يمكن يكون كل اللي انتوا قلتوه

يمكن شكل الشوارع بعد المطر ( عيل وبيحب يلعب فى الطين هقول ايه )

صوت جرس الكنيسة اللى جنبنا

صوت الاذان

عيون حببتي اللي تاهت فى الطريق وتهت من بعدها

طعم طبق الفول على العربية الصبح ( فائري هعمل ايه )

صوت النداهة اللى ندهني ودوبني فيها

والله العظيم بحبها بجد مش كلام علشان المنتدي و بان مثقف او وطني ( مش وطني من اياهم )

بحبها حب غريب مش فهمه ومش عاوز أفهمه

بشتاق لها و انا فيها

شوقى لعيونك يا داليا يا غالية مالهوش حدود

بس شوقى لمصر

اكبر

يمكن تكونوا بقيتوا واحد

يمكن تكونوا اتنين معرفش

فعلا معرفش

بحبها ليه

[khedr]

ده مش سؤال

انا مش عارف اكتب حاجه

يعني ايه

ده مش سؤال

ده حكم بالاعدام