فكره ــــ اقتراح

[عبدالمنعم الحسينى]

بعد السلام عليكم ورحمة الله وبركاته

تحياتى لكل المصريين داخل المنتدى (مصرى أو مصرية)

بصراحه يا جماعه من غير ما اطول عليكو معروف ان المصريين ولاد بلد وجدعان لكن فى الغربه انا مش شايف كده خالص ياريت نبدء بأنفسنا نحن ظاهره جميله جدن بلاحظها فى السعودية وهى تجمعات السودانيين والباكستانيين وبصراحه مش بشوف اكتر من اتنين مصريين مع بعض ساعات بنكون فى حديقه واحده ومعديين ورايحين جايين على بعض ومش عارفين هل ده مصرى ولا لاه لكن والله معروف جدن المصرى بملامحه لون النيل فى وجهه والله انا اقتراحى صغير ونشوف الردود والآراء

ليه ما نتواصل كلنا خارج المنتدى مثل تواصلنا بالداخل كل بلد باللى فيها ويبقى فيه تجمعات مصريين للمناقشه والمرح وقضاء وقت يهون الغربه علينا ( الغربه شغل وأكل ونوم ) شىء مؤلم جدن

والسلام عليكم ورحمة الله وبركاته

اخوكم محاسب// عبدالمنعم الحسينى

الرياض حى الملز إشارة النهضة

[السيد توفيق]

انت عايش في بلد مايتكلموش عربي ولا ايه ياعم !!!!!!!!!

ياعمي انت في بلد عربي وليس اوروبي حتى تعمل تجمعات وكلام فاضي وبعدين المصريين بتحصلهم بكل مكان بالسعودية يعني الوضع عادي مايحتاج نعمل تجمعات ولا زي كدا

[abohaya]

انا سمعت عن اتحاد المصريين فى اوروبا و كنت لسة بحاول اكتب موضوع ازاى نعمل اتحاد مصريين فى السعودية و نعرف اراء اهل الخبرة

[حماده عبده]

والله يأخ عبد المنعم أنت شعورك ده جميل جدا ولكن للأسف المصريين فيهم حتة التعالي علي بعض زي مثلا الأخ البيرد ياعم تجمعات أيه وكلام فاضي أيه مع أحترامي ليه بس بجدأنا بحييك علي شعورك الجميل ده ياأستاز عبد المنعم.

[عبدالمنعم الحسينى]

شكراً لكل اللى بيرد على الموضوع وبيقول رأيه

الأخ حماده عبده شكراً على ذوقك فى الكلام اما بخصوص الأخ اللى بيرد بتعالى وكبرياء الله يعطيه العافيه بلغة البلد اللى هو فيها

تحياتى للجميع

[aboyoumna]

اقتراح ممتاز يا اخ عبد المنعم

انا مقيم فى مصر وان شاء الله هسافر السعودية قريب

فعلا التجمعات مطلوبة عشان الواحد مايحسش انه اتغرب وبعد عن اهله

واقتراحك ان التجمع ده يكون من خلال الاعضاء الموجودين بالمنتدى بس يتقابلو خارج المنتدى فى حد ذاته كويس

ليه؟؟؟؟

لان الحمد لله معظم الاعضاء على قدر كبير من الاحترام والجدية والتعاون وده اللى ممكن نفتقده مع مصريين تانيين خارج المنتدى والى ممكن يكونوا بتوع مصلحتهم وبس يعنى لو ليهم مصلحة ياخدو وما يدوش وللأسف فى كتير مصريين بينكرو نفسهم من بعض

ويعملوا انهم مش عارفين بعض

وفيه ناس جدعان جدا زى اللى موجودين ى المنتدى متعاونين وبيقدموا المساعد بإهتمام

اقتراحك ممتاز يا عبد المنعم

[rewsha]

الاخ عبد المنعم الحسيني احييك على الفكره الجميله دي وانا مع ابو يمنى في كل اللي قاله

.ده وياريت تدخل على اللينك ده لان س س كاتب فيه ميعاد تجمع المصريين في الرياض ومكانهم كمانhttp://www.egyptiantalks.org/invb/?showtopic=14991 وده لو دخلت على الصفحه التانيه من المغتربين هاتلاقي موضوع بعنوان يوم التراث المصري بمدينة الرياض .وابقى ادعي لي

[MohamedAbdelrahim]

انا بصراحة لسه حسافر للرياض اول الشهر باذن الله، وكنت متخيل ان فيه رابطة ( او روابط ) قائمة بالفعل للمصريين بالسعودية، وفوجئت انها مجرد فكرة تطرح الان !

بالنسبة للاخ المندهش لتكوين رابطة في بلد عربية هناك بمصر روابط قائمة منذ سنوات بالقاهرة لابناء الجاليات العربية منها السودان واليمن وليبيا، ولها مقرات دائمة وليست مجرد تجمعات في اماكن عامة ( على سبيل المثال لا الحصر : نادي الشباب اليمني - شارع مصدق / الدقي)

وفي حدود معرفتي هناك تلاحم بين ابناء الجاليات العربية الاخرى المقيمين بالسعودية مثل اللبنانيون، ويكون هدفهم هو المساعدة في التغلب على عقبات الغربة، والتآزر في مواجهة المشاكل المشتركة او الفردية، وتثقيف المغتربين الجدد بالقوانين العامة وطبيعة الحياة داخل السعودية (او غيرها)

اتمنى ان نستثمر روح الثورة المصرية في تغيير افكارنا وعاداتنا بالميل الى الانعزال والفردية بخلاف ما تقوم به الاقليات في اي دولة في العالم من اتحاد وتلاحم .. وهو ايضا ييسر كثيرا من الدور الذي تقوم به السفارات

[AbkaReno]

لسه امبارح مراسل المشرف لعمل بعض الالتقائات في الاماكن المفتوحه

لاهل الرياض مثلا

انا معاكم في اي تجمعات تساعد الشباب في تخطى الصعوبات بالغربه

[MohamedAbdelrahim]

لسه امبارح مراسل المشرف لعمل بعض الالتقائات في الاماكن المفتوحه

لاهل الرياض مثلا

انا معاكم في اي تجمعات تساعد الشباب في تخطى الصعوبات بالغربه

لو ممكن تأخروا اللقاء لاول الشهر ان شاء الله حكون معاكم هناك