في خطوة هي الأولي خليجياً . البحرين تلغي نظام الكفيل

[nightmare]

في خطوة هي الأولي خليجيا..البحرين تلغي نظام الكفيل

مجيد العلوي وزير العمل البحريني

دبي - محيط:

في خطوة هي الأولى خليجيا، أعلنت البحرين رسميا إلغاء نظام الكفيل للعمالة الوافدة العاملة في البلاد والمقدر عددها رسميا بنصف مليون عامل، يشكلون نصف سكان البحرين والبالغ عددهم مليون نسمة، وابتداء من أغسطس القادم سيكون بإمكان العامل الأجنبي الانتقال إلى صاحب عمل آخر دون موافقة صاحب العمل الأساسي.

وأكد رئيس مجلس إدارة هيئة تنظيم سوق العمل وزير العمل الدكتور مجيد العلوي أن هذا القرار يضع البحرين ضمن الدول المتقدمة دوليا في التعامل مع عمالتها الأجنبية, كما سيكون له إيجابيات واسعة علي سوق العمل أهمها رفع الرواتب للعمالة المواطنة والوافدة معا، بالإضافة إلى القضاء على ظاهرة العمالة السائبة ومعالجتها جذريا.

وحول إذا كانت هناك خطوة خليجية مشابهة، قال العلوي في اتصال هاتفي مع صحيفة الشرق الأوسط: "بالفعل عرضنا تجربتنا على الدول الخليجية من خلال مجلس التعاون، ووجدنا إعجابا بالفكرة، لكن يبقى القرار خاصا بكل دولة على حدة".

وأوضح أن القانون كان قد صدر عام 2006، إلا أنه تأخر بسبب رفض رجال الأعمال له, وخلال الأعوام الثلاثة الماضية تواصلت المشاورات بين رجال الأعمال والحكومة، حتى تم التصويت في مجلس إدارة تنظيم سوق العمل.

ورفض الوزير البحريني القول بأن سبب اصدار القانون جاء نتيجة ضغوط خارجية تنادي بإلغاء نظام الكفيل، وقال: "لا يوجد أي ضغط خارجي ولا حتى لشعره على حكومة البحرين، بل إنه مبادرة من هيئة سوق تنظيم العمل لخلق بيئة عمل ممتازة".

ونظام الكفيل أسلوب متبع في بعض من الدول العربية وبخاصة الخليجية لتأمين استقدام العمالة الوافدة من الخارج، وبموجبه تُقيد حرية تنقل المكفول خارج البلد والحرية في العمل لدى أي جهة أخرى إلا بموافقة الكفيل. وفيما ترى الدول التي تطبق هذا النظام أنه يضمن حقوق العمال وأصحاب العمل، يشكو بعض العاملين من السلطات التي يتمتع بها الكفيل.

ووفقا للقانون الجديد سيكون للعامل الأجنبي- دون موافقة صاحب العمل- حق الانتقال للعمل لدى صاحب عمل آخر دون الإخلال بالحقوق المقررة لصاحب العمل، وسيطبق القانون على القطاعين الخاص والعام، ووفق ضوابط تضمن حقوق كل من أصحاب الأعمال والعمال في آن واحد، بحيث يمكن للعامل الأجنبي الانتقال بعد إعطائه لصاحب عمله إخطارا برغبته في الانتقال مع مهلة ثلاثة أشهر.

وهنا قال العلوي: "نعمل حاليا على تحديد سقف أعلى للعمالة الوافدة بالبحرين، بحيث لا يتجاوز حجم العمالة الوافدة السقف المحدد بأي شكل من الأشكال، خصوصا مع ارتفاع الوافدين إلى نحو نصف مليون بالبلاد، وتم تكليف هيئة تنظيم سوق العمل بإعداد دراسة حول هذا الموضوع سيتم اتخاذ قرار بشأنه في حينه".

وأضاف أن الأهداف الثلاثة الأساسية المتوخاة من تسهيل عملية انتقال العمالة الوافدة تتمثل في تأكيد على التزام البحرين بمعايير حقوق الإنسان في مجال سوق العمل، توفير بيئة عمل أفضل، والإسهام في تعزيز دور الرسوم الهادف إلى خفض فجوة التكلفة بين العمالة البحرينية والوافدة.

واستبعد العلوي أن يكون للقرار أي سلبيات جوهرية على السوق قائلا: "لقد أثبتت التجربة أنه لا سلبيات على السوق المحلية بهذا القرار، إذ انتقل أكثر من 3800 عامل أجنبي بين أصحاب العمل خلال العام الماضي 2008، ولم تحدث أي مشكلات".

المصدر .. شبكة محيط الإخبارية

http://www.moheet.com/show_news.aspx?nid=252767&pg=1

الف مبروك للمصريين في البحرين وارجو ان يكون هذا القرار فيه الخير لهم جميعاً وادعوا الله عز وجل أن يتم تعميم هذه الخطوة في باقي دول الخليج العربي

تم تعديل 5 مايو 2009 بواسطة nightmare

[كفايه بقى]

بصراحه موضوع جامد جدا وعقبال مانسمع عن الغاء نظام الكفيل فى المملكه عن قريب ان شاء الله ولو ان المصريين من غير كفيل هيخربوها

فعلا إذا كان المصريين بالكفيل وكل حاجه ومحدش بيقدر عليهم فما بالكم لو تم الغاء الكفيل يبقى هنقول يارحمن يارحيم على السعوديه

[elfakhrany]

خطوة جيدة جدا للأمام و يضع باقى دول الخليج فى مأزق حيث ستتطالب العمالة بالغاء نظام الكفيل رسميا مثل البحرين و أيضا اهتمام أكبر بحقوق الانسان فى الشرق الأوسط

[se_ Elsyed]

بصراحه موضوع جامد جدا وعقبال مانسمع عن الغاء نظام الكفيل فى المملكه عن قريب ان شاء الله ولو ان المصريين من غير كفيل هيخربوها

فعلا إذا كان المصريين بالكفيل وكل حاجه ومحدش بيقدر عليهم فما بالكم لو تم الغاء الكفيل يبقى هنقول يارحمن يارحيم على السعوديه

المصريين هايخربوها !!!!!!!!!!!!

ده على أساس إن حضرتك يوغسلافي أو من كوالالمبور ؟

يا أخي إتقي الله .....

وإذا كنت غير مصري .. يبقى أنت جيت المكان الغلط ... لإن إسمنا محاورات المصريين .. وبالتالي أي مصري بنشيله على راسنا من فوق طالما مؤدب .. أما لو أساء الأدب يبقى سنضطر للفظه خارج المكان لإنه لا يلزمنا ...

أما إذا كنت للأسف مصري .. أو مازلت تُعتبر مصري ولم تحصل على الجنسية السعودية مثلاً طالما أنت هنا في السعودية .. يبقى أكيد في حاجه غلط عندك ... لإن لو كده يبقى فعلاً إنت أول واحد هايخربها ... مانت مصري بقى من المخربين ...

آه قبل ما أنسى ... لو كنت مصري .. حاول تقعد مع أي سعوديين ... بدون إختيار ... عينه عشوائية ... وقول الكلام ده ... إن المصريين أول ناس هايخربوها لو إتلغى نظام الكفيل ... وشوف النتايج عليك إنت شخصياً .... وشوف هايحترموك .. ولا ...... هاتشوف بنفسك ولا دي ...

[محمد افندى]

الف مبروك لكل العاملين بالبحرين وربنا يوفق الجميع ويا ريت بقية الدول تحذو نفس الحذو مثل البحرين

[nightmare]

بالراحة على الراجل شوية يا سي السيد .. اعتقد انه خانه التعبير بس .. او كان يقصد ان معظمنا ولله الحمد واخد حقوقه او ما بيسكتش علي حقه والا حاجة

وكلنا عارفين ان المنتدي هنا بيتنا الثاني وبنتعز جميعا بمصريتنا .

خد دي بقي وما تزعلش نفسك

[se_ Elsyed]

بالراحة على الراجل شوية يا سي السيد .. اعتقد انه خانه التعبير بس .. او كان يقصد ان معظمنا ولله الحمد واخد حقوقه او ما بيسكتش علي حقه والا حاجة

وكلنا عارفين ان المنتدي هنا بيتنا الثاني وبنتعز جميعا بمصريتنا .

خد دي بقي وما تزعلش نفسك

حاضر بالراحه أهو ... بس تفتكر لو واحد مصري - وإن كنت أشك - دخل قال على مصر " بنت الجذمة " زي ما عمل الأخ كفايه بقى وأخد إنذار مستحق عشان الجُملة دي ,,,,, يبقى بالرحة برضوا وأحط أعصابي في لوح تلج وادفنها .... ؟

يا أخي اللي زهقان من مصر ومش عجباه .. عنده النت واسع ... يروح يشتم في حته تانية ... عند محاورات اليهود مثلاً ... هناك سيجد متسع وناس تسمعه وتحترمه ومش بعيد تعرض عليه يشتغل جاسوس ...

ولا التطاول على بلدك ده يا جماعة يعتبر من ضمن التعبير عن الرأي في ظل الإنبعاج البؤري للتنمية الفكرية الوطنية ؟

[عنبو]

ظل الإنبعاج البؤري للتنمية الفكرية الوطنية

ايه الكلام الكبير ده

[taymour]

معتقدش العضو قصده أي اهانة و لكن قصده فعلا كم المصريين اللي حيروحوا للسعودية حيزيد و لكن بنظرة أبعد لتوابع الغاء الكفيل ستجد ان أليات السوق حتفرز الصالح و المؤهل من العمالة ليستمر و ستعلي مرتبات العاملين... عموما لا أعتقد أن نظام الكفيل سيلغي في بقية دول الخليج لأنه بيزنس كبير يقتات منه كثير من المواطنين و أما بالنسبة للبحرين فمقدرش أقول للأسف غير "شكرا يا أمريكا!".

[nightmare]

عموما لا أعتقد أن نظام الكفيل سيلغي في بقية دول الخليج لأنه بيزنس كبير يقتات منه كثير من المواطنين و أما بالنسبة للبحرين فمقدرش أقول للأسف غير "شكرا يا أمريكا!".

طب الجزء الأول واحنا متأكدين منه يا عم تيمور انه فعلاً بيزنس كبير وكثير من المواطنيين الخليجيين بيعتبروه مصدر رزقهم الوحيد

بس الجزء الثاني اللى انا مش فاهمه صراحة يعني ايه للأسف شكراً يا أمريكا دي

[عطر الجنة]

هم طبعا مشكورين فى البحرين لاتخاذهم القرار ده

لكن بقية الدول العربية نظام الكفيل فيهم بيختلف

لكن اكثرهم قساوة فى النظام فى المملكة و لو ان مكاتب العمل بيتعطى كل ذى حق حقه عند الشكوى و فعلا اصحاب العمل بيخشوها

و لذا بيحاولوا يأمنوا نفسهم فى العقود

يا جماعة آليات العصر لابد ان تفرض نفسها

نظام الكفالة وضع فى العام الذى الغيت فيه العبودية فى المملكة يعنى بديل فى صورة مخففة

و لو على المملكة فهى الان تشهد طفرة فى القوانين و منها منع زواج القاصرات الذى اصدر توا

[Abu Reem]

بالنسبة للخبر ، أتمنى أنه يطبق في دول الخليج الأخرى ، ولكن بالنسبة للسعودية أعتقد أنها أخر دولة ممكن توافق على الموضوع ده لأسباب كثير،،

وكنت أتمنى من العضو ، كفاية بقى ، يدخل يعتذر على الأقل أو يدافع عن نفسه ، بدلا من أن ندافع عنه أحنا ، ولكن يبدو أنه غير مصري

فعلاً ،

[abohaya]

اعتقد انه يوجد مشكلة كبيرة زى الكفالة و هى بطء اجراءات التقاضى و الشكوى فى مكتب العمل و هو ما يعتمد علية الكفيل للضغط على الشاكى و صاحب الحق

[عبير يونس]

بالنسبة للخبر ، أتمنى أنه يطبق في دول الخليج الأخرى ، ولكن بالنسبة للسعودية أعتقد أنها أخر دولة ممكن توافق على الموضوع ده لأسباب كثير،،

أوافقك الرأي تماما

فالسعودية فيها الكثيرون ممن يترزقون من موضوع الكفالة

يتركون العامل على كفالتهم و هو يشوف حاله بالطريقة اللي تعجبه

والمهم ما يجيبلوش مشاكل و يديه الإتاوة المتفق عليها

أعرف واحدة سعودية جايبة واحد على كفالتها بالطريقة دي و كل شهر بتخليه يوقع انه استلم كل مستحقاته عشان تضمن انه ميشتكيهاش في مكتب العمل

و في كتير بيطمعوا أكتر من المتفق عليه

و بتتحول العملية إلى ابتزاز

و فيه ناس بيدوك اسمهم تعمل بيه مشروع و يشاركوك في الفلوس لمجرد انك واخد اسمهم

و أحيانا كتير بيطمعوا في المشروع كله و يحطوك في السجن كمان

و يبقى منتهى أملك انك تترحل

عشان مبقاش ظالمة

فيه ناس كتير بيسيبوا الناس على كفالتهم من غير فلوس و لا حاجة و لا لهم دعوة بما يكسبه المكفول

بس دول عملة نادرة و تلاقيهم ببركة دعا الوالدين

وكنت أتمنى من العضو ، كفاية بقى ، يدخل يعتذر على الأقل أو يدافع عن نفسه ، بدلا من أن ندافع عنه أحنا ، ولكن يبدو أنه غير مصري

فعلاً ،

لا عادي ممكن يكون مصري

مفيش مشاكل

اتعودنا كتير على الناس اللي بتدوس فوقنا عشان تتقرب من الكفيل

أو أي حد سعودي ممكن يعملهم أي مصلحة

و طبعا السعوديين مش أغبياء و فاهمين ده كويس و بيعايرونا ان احنا مبنحبش بعض و بناكل في بعض

و طبعا الاحتقار بيعم على الكل

طبعا يا أخي كفاية بقى أنا باتكلم بشكل عام

و لا أقصدك أنت

أنا بس بأرد على الأخ أبو ريم

لأنه مش متوقع أن الإساءة لنا ممكن تصدر من شخص مصري

و أعتقد ان حضرتك أكيد مش منهم

[سهل جدا]

خبر لسه طالع اليوم أهو, بعنوان:

أصحاب الأعمال في البحرين ينتقدون قرار تحرير سوق العمل

تعليق:

ما هو طبعا لازم يعترضوا, بدل ما كان الموظف تحت رحمته يستعبدوا زي ما هو عايز ويعطيه مرتب متدني.. أصبح حر طليق ممكن يتركوا في أي وقت إذا لم يعطيه المرتب الذي يستحقه ..

بالسنبة للسعودية أعتقد إن إلغاء نظام الكفالة هايكون في مصلحة السعوديين قبل ما يكون في مصلحة الأجانب (أكره هذه الكلمة جدا)

لأن السعودي التاجر أو صاحب الشركة بيفضل يشغّل الأجنبي عنده, لأنه بيكون تحت كفالته, يعني مش هايعرف يسيبوا ولا يفلفص من تحت إيد الكفيل

بينما لو اشتغل عنده السعودي ممكن يسيبو في أي وقت

وفي حالة إلغاء نظام الكفالة هايكون الأمر عند أصحاب العمل سيّان

هايشغّل السعودي والأجنبي وهايضطر يعاملهم كويس عشان ما حدش يسيب الشغل ويدوّر على شغل تاني

[doha]

بعض المداخلات ادتني انطباع ان في فهم مختلط شويه عند البعض بخصوص موضوع الكفالة ..

هم لغوا نظام الكفالة ايوه لكن ده لايعني انهم لغوا التاشيرة المطلوب الحصول عليها للدخول في البلد .. يعني حتى برغم عدم وجود كفيل فهذا لايعني ان البحرين بقت ( سداح مداح ) لاي مصري او غيره انه يسافر ويشتغل هناك بدون مايكون في عقد عمل فعلا او يكون هناك صاحب عمل محتاج لمجهوده .. الحكايه كده هتبقى زي اوروبا الشغل فيها على قفا من يشيل بس الشطارة مين يعرف يدخل هناك قانوني ..

ده من جهة ومن جهة تانيه فالاخ الي بيقول شكرا لامريكا مش عارفه طاوعته نفسه ازاي يقول كده .. على كل حال لو كانت امريكا ورا الموضوع يبقى ثقوا تماما ان في مصيبة فيه اما لو اثبتت الايام انه خير فاكيد امريكا ملهاش فيه لايد ولا رجل .. وبالمناسبة كتير من دول الخليج بتطلع كده من وقت للتاني بقوانين فجائية فيها اصلاحات جذرية لحاجات كتير عندهم ومبيكونش السبب ضغط او خلافه .. كل ماهنالك ان هي بلاد متطورة في نواحي كتير جدا فبتحاول تكون متطورة كمان في بقية النواحي حتى لو المحاولات قاصرة او غير شاملة او بدت لنا غريبة الا انها على الاقل جهود ( مشكورة ) كتر خيرهم الي فكروا فيها .. مش عاوزه اكون ملكية اكتر من الملك لكن واجب انوه الى انه شيء لايخصنا من قريب او بعيد ان كانت امريكا وراها ولا مش وراها خاصة والبحرين مش بلدنا عشان نفكر كمان مين الي ورا دوافع اتخاذ القرار فيها ..

وعلى فكرة انا من راي الاخوة الي قالوا بان كفاية بقى مكانش قصده اللفظ الحرفي .. عن نفسي فهمته بيمدح في المصريين لاني حسيت من كلامه اننا ( قوة لا يستهان بها ) وان مبيحوقش فينا قوانين واننا ( مبيهمناش ) واخدينها بالدراع ..

على كل حال لا اظن ان رايه هو الاساءة او التودد للكفيل لان اكيد الكفيل مبيقراش الي احنا بنكتبه لاسباب كتير على راسها ان اللهجة المصرية بين المصريين صعب تقرأ من غيرهم .. على كل .. من وجهة نظري البحته فكفايه بقى مشكلته الوحيده ان ( السكينة سرقاه ) او بعباره غير متمصرة فهو بيعاني من اثار ( الصدمة الحضارية ) فيما بين السعوديه ومصر .. عارفه ان في ناس كتير هتقول ان مفيش هنا مايستدعي الصدمة دي لكن قدروا ياجماعه اي حد جاي من مصر طازه ومستقبلاه السعوديه بالاحضان .. مشافش في مصر غير تعب ومشافش هنا غير الي كان ناقصة في مصر.. بعد فترة من البقاء هيبدأ يتعود على رفاهية هنا وهتبقى بالنسبة له شيء عادي وبعد فترة تانيه هيبدأ ينخنق ( خنقة السعوديه ) ويحن ( لخنقة مصر ) .. هو ده سر مصر يارجاله .. احنا فيها مش شايفين غير عيوبها ببساطه لاننا مرتاحين ( ومرحرحين ) وعندنا وقت نفكر في الي ناقصنا .. لما نطلع برا هنشوف الشغل على اصوله والطحن على اصول اصوله فنبدأ نفتكر ايام العز والرحرحه ونقول ولايوم من ايامك يامصر .. عادي جدا .. اتركوه .. هو من نفسه هيعرف ان الله حق .. مسألة وقت..

وعلى هذا فرجاء محدش يلومه نهائيا بصراحه انا مش شايفه انه غلطان في حواره هنا نهائيا وحتى كلمه بنت الاجاويد الي قالها على مصر دي وان كانت شديده جدا وغير مقبوله الا اني متاكده بحسن نيته لما قالها من زياده المعزه .. عادي ياجماعه فوتوا كفايه الي هو فيه الله يعينه ويعين كل مصري برا بلده ..

نرجع بقى لموضوعنا الي كنت بدأت انساه وهو الغاء نظام الكفيل في بقية دول الخليج ..

عاوزين الصراحه في رايي نظام الكفيل مش وحش اوي بالدرجه يعني يخلوه مش مشكلة بس لو سفارتنا تهتم بينا شويه وتهتم بكل واحد يقدم شكوى في مكتب العمل وتروح تطلع له محامي من صف محاميين يكونوا متعينين عندها مهمتهم بس قضايا مكاتب العمل وياسلام بقى لو تتولى هي القضية وتسفره على بلدنا معزز مكرم وتبقى تبعت له لما يكسب التعويض ومفيش مانع ابدا لو اخذت لها نسبه ان شاله تاخذ النص بس على الاقل نحس ان ورانا ظهر بدال مابطننا انهرت من الضرب ..

طبعا دي كلها احلام بس مين عارف يمكن يجي يوم وتتحقق وبما اننا بنحلم ولا قيود على الحلم فياسلام بقى بدال مايلغلوا نظام الكفاله يخلوه زي ماهو شغال حلاوة بس يلغوا لنا المصاريف الي قطمت وسطنا دي اشي الفين ريال استخراج اقامه مع تامين صحي ثم الف وشويه كل سنة تجديد اقامه ثم الفين ريال لما الراجل يحب يعيش في الحلال ويجيب مراته معاه ثم الفين تانيين لو انهف في عقله وفكر يخلف حتت عيل برا البلد عشان يوفر العشرة ولا العشرين الف مصاريف الولاده والحضانات هنا .. يوووه موال .. اما بس لو يشيلوا من علينا الرسوم دي كلها كانت تبقى الحياه حلوة بشكل .. بس خير الهم اجعله خير هبطل اكل تقيل قبل مانام عشان ماسرحش اوي كده في الحلم تاني ..

[أحمد سيف]

كلمة حقّ لازم تنقال ... حتى قبل إلغاء نظام الكفالة كانت البحرين أفضل دول الخليج في أنظمة الإقامة والعمل ... يكفي أنها تسمح للمصريين بالحصول على تأشيرة دخول في المطار زي ما بتعمل مع الأوروبيين والأمريكان ... يمكن ده لإن الجالية المصرية في البحرين حتى وقت قريب كان يطلق عليها "جالية العقول" لكون أغلبيتها من أصحاب المؤهلات والمهن العليا

في البحرين أيضا لا يوجد تمييز تقريبا بين المواطن والأجنبي في الحقوق والواجبات ... والشرطة والنظام القضائي يتمتعان بالنزاهة والعدالة دون تمييز كما هو الحال في بعض دول الخليج ... وأبناء الجاليات العربية يدخلون أبناءهم المدارس الحكومية والأجانب يعالجون في مستشفيات الحكومة مقابل رسوم رمزية (كان العلاج حتى وقت قريب بالمجان للجميع) ... حتى عندما كان يتم توزيع هبات مالية وزيادات في الرواتب كان الأجنبي المقيم يحصل على نصيبه منها تماما كما المواطن في كثير من الأحيان ... طوال مدة عملي في البحرين كان جواز سفري في جيبي ولم يكن صاحب العمل يطلبه سوى لإضافة التأشيرات والإقامات

الفرق الوحيد الذي سيحدثه هذا القرار هو حرية تنقل العمالة دون الحاجة لموافقة صاحب العمل السابق ... ولكن حتى في هذه كانت غالبا الممانعة من صاحب العمل تكون في المهن الدنيا بسبب التكلفة المرتفعة التي تحملها في الاستقدام مقارنة بالفائدة التي يجنيها من وراء العمل... أما في المهن العليا فإن الانتقال كان يتم بسهولة ويسر (في حالتي حدث مرتين بدون اي مشاكل)

يا ريت باقي دول الخليج تتعلم من هذه التجربة الرائدة لهذه الدولة الصغيرة مساحة وسكانا ولكن الكبيرة بنظامها وانسانيتها

[عبير يونس]

خبر لسه طالع اليوم أهو, بعنوان:

أصحاب الأعمال في البحرين ينتقدون قرار تحرير سوق العمل

تعليق:

ما هو طبعا لازم يعترضوا, بدل ما كان الموظف تحت رحمته يستعبدوا زي ما هو عايز ويعطيه مرتب متدني.. أصبح حر طليق ممكن يتركوا في أي وقت إذا لم يعطيه المرتب الذي يستحقه ..

بالسنبة للسعودية أعتقد إن إلغاء نظام الكفالة هايكون في مصلحة السعوديين قبل ما يكون في مصلحة الأجانب (أكره هذه الكلمة جدا)

لأن السعودي التاجر أو صاحب الشركة بيفضل يشغّل الأجنبي عنده, لأنه بيكون تحت كفالته, يعني مش هايعرف يسيبوا ولا يفلفص من تحت إيد الكفيل

بينما لو اشتغل عنده السعودي ممكن يسيبو في أي وقت

وفي حالة إلغاء نظام الكفالة هايكون الأمر عند أصحاب العمل سيّان

هايشغّل السعودي والأجنبي وهايضطر يعاملهم كويس عشان ما حدش يسيب الشغل ويدوّر على شغل تاني

الموضوع مش بالسهولة دي

أصحاب الأعمال

اتعودوا ان الأجنبي بيشتغل بنفرين او ثلاثة و بياخد أقل أجر و رقبته في ايديه

و في نفس الوقت معندهمش ثقة في أبناء البلد انهم حيقدروا يمشوا الشغل مظبوط حتى لو رواتبهم كبيرة

عشان كده عمرهم ما حيلغوا نظام الكفالة

أو على أقل تقدير حيكونوا آخر ناس يعملوها و مغصوبين عليها

[خالد شحاته]

السلام عليكم ورحمة الله وبركاته

اخواني الاعزاء الكفاله عمرها ما تتلغي من السعوديه لانها فتحه بيوت ناس كتيره جداااااااااااااااااااااا من اهل البلد الانسان بيكون ظروفه زفت يروح يطلع كم عامل ويتفق يخد في الشهر نسبه كدا يعني دخل شهري من الاجنبي يمكن الا شغال رسمي في المملكه تقدر بي 60% والباقي للاسف كله شغال مش عند كفيله

[alaa elshafiey]

أولا وقبل أى شئ

السلام عليكم ورحمه الله على أخوانى

موضوع البحرين والغاء الكفالة

فعلا انا يوم فتحت الجريدة كنت مش مصدق عينى بصراحة وفتحت صفحات الانترنت لحد ما صدقت الاهم من ذلك

اجعلونا واقعيين مش أكتر ولا اقل

نظام الكفالة موجود ولن يلغى ونحن نعلم ذلك ولكن مطالبنا وعن رأى انا الشخصى وان كنت ارى هناك اشخاص يتفقون معى فى ذلك

نريد عدة نقاط

1- أن يكون العقد محدد المدة بينى وبين الشركة وبعد المدة المحددة يحق لى الانتقال منها الى ى شركة أخرى مع عدم وجود اى

مانع او شروط ولكن يمكن ان أجدد عقدى مع شركتى التى اعمل بيها ان وفرت لى ما أطلب وفى حدود المعقول وهذا كلة يكون

مكتوب فى العقد المبرم بينا .

2- ورق للاستخراج الرخصة و فتح حساب البنك وشراء سيارة ( هذا كلة يلغى لانى وبكل بساطة انسان عاقل ويمكنى ان اكفل نفسى )

3- أن اخلت الشركة فى اى بند من بنود العقد المبرم بينا وعندما يمكننى ان اثبت ذلك ان اترك الشركة قبل نهاية عقدى وهذا يكون عن طريق جهة مختصة بذلك .

4- مسألة استقدام الزوجة وهذة الاشياء يكون الحاكم فيها الوحيد هى الحكومة والمفروض ما يسمى كفليى ليس لة الحق ان يقف

ويعوق هذة المسألة نهائيا .

5- ان تلتزم الشركات بتحويل جميع الرواتب على البنوك وهذا يكون شرط اساسى فى العقود الجديدة وتلزم الشركات ومن يخالف

يدخل القائمة السوداء بأذن الله لعدة اسباب وانها اصحاب العمل بيستغلوا اشياء كثيرة ويتعاملون برواتب الاشخاص التى لديها

ويفكرون انها دورة النقود فى شهرين او ثلاثة افضل من اعطائهم للاشخاص ونحن الافراد ليس بيدك اى شئ غير الانتظار . ( مظبوط ولا لا)

6- وقت العمل لاى شركة يكون كما هو منصوص علية فى العقد ( معظم الشركات تجعلنا نعمل اكثر من الوقت المحدد بكثير )

7- ان يكون يوم الخميس نص دوام كما هو معمول فى شركات كثيرة ( او تعود هذة النقطة للعقد ايضا )

هناك من يسأل الان وصاحب العمل ماذا يستفيد بعد ذلك وهو الان مغلوب على أمرة كما يهيأ للبعض

ياسيدى العزيز هذا هو الطبيعى ولكن ما نحن فيه هو ليس الطبيعى ابدا نحن اشخاص لنا كيننا الاعتبارى والانسانى والعقلى

ويجب احترامهم

وفى كل هذة النقاط لم اتجنى على صاحب العمل فى اى شئ

ونعود للنقطة رقم ( واحد ) انه شرط قبل ان اترك العمل ان يكون هناك اخطار لصاحب العمل لكى يقدر توفير البديل

ولكن السؤال لما اترك العمل واانا مرتاح فية لذلك نرجوا من اصحاب الاعمال ورجال الاعمال

انة يجيبواااااا على هذه النقطة بالاخص

ومن يرى انى اخطت فى اى شئ من فضلة وبكل صراحة ان يقول وشكرا للسادة الكرام اتاحة الفرصة لى

لعرض وجهى نظرى الشخصية

علاء

تم تعديل 7 مايو 2009 بواسطة alaa elshafiey