هو احنا هنعيش امتى!!!؟؟

[fatfouta]

عاوزة اخد رايكوا فى موضوع

ليه كلنا فى الغربة او معلظمنا لما ييجى يعيش يقول لا لا خلينا لما نرجع مصر

يعنى بمعنى انى لما اجى اشترى حاجة للشقة مثلا ذى اجهزة او اى حاجة اقول ايه لا اشترى مثلا الماركة الرخيصة شوية دى للبيت اللى هنا لكن لما اجى اشترى نفس الجهاز للشقة فى مصر اقول لجيب بقى احسن حاجة ده جهاز العمر ومش عارف ايه

ولما اكون عاوزة اجهز اللى هنا باى حاجة مثلا الاقى حاجة من جوايا تقولى هو انتى هتجيبى ليه هنا يعنى هى شقتك ماهى مش حاجتنا ومسيرنا نمشى ونسيبها

اول ما جيت الرياض اتعرفت على واحدة كانت جارتى فى البيت كنا واخدين شقة وهى كانت ساكنة فى الملحق ... وبقت تيجى تزورنى وانا اطلع عندها وبعدين لما اخدنا على بعض لقيتها فى يوم بتقولى هقولك حاجة وماتزعليش منى قلتلها قولى لا مش هزعل .... راحت ردت وقالت

انتوا عايشين فى الدور كده ليه انتى وجوزك بلاحظ عليكوا انكوا بتجيبوا حاجات مالهاش لزمة وكده هو احنا يابنتى فى بلدنا هنا لا لا انا مش معاكى وكمان جوزك ليه يكلف نفسه ويروح الشغل ببدلة وجذمة (سورى فى الكلمة) ياستى مايلبس اى حاجة ماهو كله مرمطة ....... وقعدت تعدلى فى اللى انا بجيبه ومالوش لزمة وتقولى وبتجيبى لابنك لبس كتير ليه يا ستى هو حد بيشوفه هنا ماحنا هنا قاعدين لا اهالينا بيشوفونا ولا اى حاجة يعنى لبسيه اى حاجة وسيبى الحاجات دى لما تنزلى مصر

وكمان قاعدين فى شقة كبيرة ليه ماتقعدوا فى ملحق اوضة وصاله وتوفروا

قلتلها لا هو مش كده كون جوزى بيلبس بدله ده طيبعة شغله واذا كنت انا لبس ابنى عشان مش عاوزة احرمه من حاجة والمهم رديت عليها بس من جوايا لقيت نفسى بقول فى حاجة فى كلامك صح والله العظيم بقيت بعد كده اعمل ذيها واحاول آجى على نفسى ال ايه عشان نعرف نعيش فى مصر وفضلت على كده سنين وكلامها يرن فى ودنى ايوه ماقلدتهاش اوى بس كنت أئنب نفسى لما اجيب حاجة جديدة

وبعد سنين وكل واحدة فينا راحت لحالها انا نقلت من البيت ده وخلاص مابقاش ليا علاقة بيها ...... ولقيت الغربة بتطول واحنا مش بنشوف مصر غير كل فين وفين قعدت افكر واقول هو ايه الهبل ده اللى انا بعمله وقلت لا لازم ارمى كلامها ده ورا ظهرى ماينفعش نفضل محرومين من حاجات كتير على امل اننا فى يوم هنعيش فى بلدنا مرتاحين

وفى يوم كنت باخد راى احد اصدقائى فى الموضوع ده قام قاللى .....

اوعى تعملى كده ماتعرفيش انتى هتقضى عمرك فين هو مش يمكن ماتعرفيش تتمتعى بالحاجات دى فى مصر وييجى عليكى اليوم اللى تندمى انك ماعرفتيش تعيشى وقعدتى تخزنى ولا عيشتى هنا ولا هنا

الكلام اللى قالوا ده على اد مازعلنى جدااااااااااااا بس لما قعدت مع نفسى وفكرت قلت عنده حق هو ليه احنا بنعمل كده طب واحنا ضمنين نقعد هنا اد ايه مش يمكن نقعد طول عمرنا واهو بلدنا مش بنشوفها غير كل فين وفين وممكن كمان شهر فى السنة وباقى السنه كلها بنقعدها فى الغربة

وبجد اتغير تفكيرى فى الموضوع ده وقولت لا لازم اعرف اذاى اعيش انا وولادى

انتوا بقى رايكوا ايه؟ بتعملوا ذى جارتى القديمة ولا الصديق اللى نصحنى

يعنى انتوا مع اى رأى فيهم ؟

فتفوته

تم تعديل 9 مايو 2009 بواسطة fatfouta

[أحمد سيف]

من تجارب مرت أمام عيني ... غالبا اللي بيبقى حارم نفسه من كل حاجه في الغربه علشان لما يرجع مصر يعيش كويس ما بيلحقش يتهنّا بالفلوس اللي حوشها يا إما واحد ابن حرام بينصب عليه في مشروع أو بيعه يا إما بيصرفها على العلاج من الأمراض اللي جاتله بسبب الضغط العصبي اللي عاش طول حياته فيه ... وفي أحسن الأحوال هايصرفها دون أن يستمتع بها لأن نوعية الحياة في مصر لا تسمح للإنسان بالتمتع بما كسبه

خير الأمور الوسط ... الواحد لا يصرف بدون حساب كل ما يكسبه في الغربة ولكن أيضا لا يحرم نفسه من الحياة الجيدة حسب مقدرته

تم تعديل 9 مايو 2009 بواسطة أحمد سيف

[mama nona]

اهلا فتفوته والله انتى فتحتى موضوع مهم جدا

انا طبعا مع رأى الصديق لانه فعلا انتى مش عارفة انتى هتنزلى امتى وهتفضلى هنا على عفش مكسر وعيشة ملهاش لازمة بالرغم من عفشك الجديد ال فمصر وال اتردم تراب وال يدوب مبتلحقش عينيكى تشوفه فالاجازة الفصيرة .

انما للاسف منطق جارتك ده ال لقيت كل المصريين تحديدا بيعملوه هنا فالغربة .يعنى بالمقارنه بالجنسيات الاخرى هتلاقى انه ال فنفس مستواكى الاجتماعى والوظيفى معيش نفسه فمستوى ال هو يقدر يعيش بيه فبلده ولا بيحرم نفسه من حاجة .

انما ميمنعش انى لو عندى ارتباطات مثلا زى ديون او اقساط انى اتحكم فنفسى لفترة محددة لما اخلص فيها ارتباطاتى يعنى مثلا ميكنش على دين واروح اشترى كل يوم لبس واقول انا لاوزم اعيش فيه اولويا ت وده عن تجربة شخصية انى اول ماجيت البلد كان على اقساط فمصر وكنت بفرش بيت هنا اخدت شقة صغيرة بإيجار بسيط وفرشتها فرش بسيط ع الاحتياج المطلوب فقط وبعد ما انتهيت من اقساطى بدأت اشتر كل ال كان ناقصنى وجددت البيت وعشت والحمد لله فنفس المستوى ال كنت فيه فمصر ويمكن احسن كمان .

يعنى خير الامور الوسط

[سهل جدا]

الموضوع ده يفرق من واحد لآخر

والتخطيط للحياة هو اللي بيحدد إيه القرار الصح

لو واحد مخطط إن الغربة دي بالنسبة له محطة (بضع سنوات) ثم يرجع إلى بلده , فتكون الحكمة إنه يقضيها في الغربة بأقل التكاليف, ويضحي ببعض ما يشتهيه من أجل الادخار..

ولو الواحد مخطط إن يستقر في الغربة إلى أجل غير محدد؛ فالأفضل إنه يشتري كل ما يريده ولا يحرم نفسه من شيء..

ولكن في كلتا الحالتين .. ((خير الأمور الوسط))

يعني الواحد ما يحرمش نفسه من كل حاجة أوي برده في حالة لو قرر إن الغربة بالنسبة له محطة في حياته

وفي نفس الوقت ما يصرفش كل اللي معاه في حالة لو قرر إن يستقر في الغربة علطول ..

وأهو القرش الأبيض ينفع في اليوم ال....

إن شاء الله ربنا يجعل أيامك كلها بيضا يا مدام فتفوتة

[rewsha]

والله يا فتفوته ما فيش كلام اقوله بعد اللي اتقال كلامهم كله صح الصح1- بتفرق من واحد لواحد.2- بتفرق الواحد ده كان عايش ازاي في مصر.3- هايفضل في الغربه كام سنه وله هايفضل علطول.بس لازم يا خد باله ان الغربه مش دايمه ولا قدر الله الاعمار بيد الله فلو اتعود انه يعيش في مستوي حلو قوي في الغربه ممكن الظروف تحكم عليه انه يرجع في اي وقت اولاقدر الله اسرته ترجع في اي وقت فلازم يكون عامل حسابه بس برضه مايحرمش نفسه من حاجه في حدود الوسط. يعني كان ليه واحده اعرفها قالت لي كلمه حكمه .(جوزهاكان بيشتغل بمرتب ثابت ومعقول وبعدين فاتح عياده بالليل طبعا دخل العياده كان اضعاف المرتب .فهيه قالت انا اعيش كويس بس في حدود الدخل الثابت(الحكومي)ودخل العياده للفسح والتوفير.لان ممكن في اي لحظه مايبقاش في عياده.وسبحان الله زي مايكون قلبها حاسس .بعد الشلر عن السامعين .جوزها توفى بعد 5 سنوات من الكلام ده .فلو كانت متعوده على مصاريف دخل العياده مع المرتب كان هايحصل لها نقله كبيره .بعد ما راح دخل العياده .وبالظبط كده دخل الغربه مؤقت .وخير لالامور الوسط وماتحرميش نفسك من حاجه بس عودي نفسك وعودي اولادك ان في اه وفيه لا مش علطول اه

[herohero]

ده الفرق بينا وبين اللبناني اننا بنقول الغربه ده محطه ولاسف بنبقى بقالنا 25 سنة ونقول محطة، نعيش يومنا في حدود امكناياتنا وبصراحه اللي سافروا الخليج مش بتوعم مشاريع الخليج للموظفين بيقبض مرتبه كل شهر وحسب التساهيل اللي نزل مصر ياخسر يا اضحك عليه لانه اصلا مش بتاع مشاريع محاسب ولا مهندس ولادكتور ولا مدرس هيعمل مشروع ايه ف مصر

وهيحوش كم عشان يقدر يعمل مشروع الفكره ده انتهت من زمان من ايام خليج السبعينات الخليج راحت عليه خلاص ولاده بيشتكو ومش عارفين يعيشوا الخليج عشان تعيش مرتاح بعيد عن الزحمه وكويس لما يفيض معاك قرش انما اي حد يقول فتره ومرحلة انتقاليه مش عارف ما اظنش ان الخليج مناسب له هينزل مصر هيتعب اللي بينزل بينزل غصب عنه

وف راي احنا مش هنعيش لا هنا ولا ف مصر هنا مفيش وقت نعيش نفسنا وياسلام لو انت ف السعوديه عليك وع المولات هي ده العيشة وهتنزل مصر بمتلازمة الضغط والسكر ده ع اقل تقدير تجوز عيالك وتقعد ع القرشين اللي معاك تاكل وتشرب منهم وتكون غير متكيف مع البلد وتجيب لك عربيه تركبها

وبرده مش هتعيش لان ساعتها هيكون مفيكش صحه تعيش

وهنا مفيش وقت نعيش ف الجنه ان شاء الله بس ياك الكفيل يوافق ما تلاقيش الكفيل وراك وراك

[msayed]

الموضوع فعلاً جميل

لم أشعر بمعنى حديث الرسول صلى الله عليه وسلم إلا بعد ما سبت مصر

الحديث هو وصيته لعمر بن الخطاب رضى الله عنه: كن في الدنيا كأنك غريب أو عابر سبيل. فالرسول يوصينا ان نكون ك الغرباء وتكون أعيننا دائماً على بيتنا الأصلى فى الآخرة.

بالفعل من أول الواحد ما بقى غريب وهو ما بيشتريش إلا أقل القليل وعينه على يوم رجوعه بيته الأصلى.

طبعاً التوفير سبب مهم جداً ولكن هناك سبب آخر قوى جداً وهو الإحساس بالغربة وعدم الإستقرار وإن الواحد فى لحظة ممكن يأخذ قرار العودة لبلده أو حتى الإنتقال لمكان غربة آخر، فلازم يكون خفيف خفيف.

وأكثر ما يسترخص الواحد فيه هو أثاث المنزل لأنه مش ها يأخذه معاه إلا نادراً، وغالباً مش محتاجه لأن عنده أثاث فى مصر .

وفيه أسباب أخرى كثير.

فالواحد هنا عاش حياة رفاهية ليست موجودة فى القاهرة، قد تكون موجودة فى مدن أخرى فى مصر. مثل إنسياب المرور وإنك تكون فى العمل فى خمس دقائق، وسهولة وسرعة شراء مستلزماتك، سهولة الحصول على كثير من الخدمات، وحاجات ثانية كثير، فبصراحة لا أريد أطفالى أن يتعودوا على الرفاهية اكثر من اللازم حتى لا أدفع ضريبة ذلك عند العودة إلى مصر، وطبعا مش كل الرفاهية حاجة حلوة بل أن معظمها يقتل فى الإنسان ملكات كثيرة.

ومن الأسباب الأخرى أنى تغربت عن بلدى وأهلى لهدف معين وكلما كنت حازما فى الوصول للهدف سأصل إليه أسرع وإن نسيت الهدف فسوف أقضى عمرى كله فى الغربة.

لكن أهم شيء أن هناك أشياء لا يمكن لى أن أتهاون فيها وأضعها على بند التوفير مثل تعليم الأولاد مثلاً، فلا ينبغى أبداً أن يكون من يدفع ثمن غربتى هم اولادى. لا ينبغى أن يكون على بند التوفير صلة رحمى بأهلى فى مصر بحجة توفير المكالمات، فلايكون قطع علاقاتى بأهلى وأصدقائى فى مصر هو ثمن غربتى وكذلك صلة زوجتى بأهلها.

قد أوفر فى إمكانيات الأجهزة الكهربائية، فى أصناف الأكل برغم أنه مهما غلى لا يغنى عن مأكولاتنا المصرية.

قد أوفر فى الفسح والنزه.

فيه نقطة مهمة جداً جداً جداً وأظنها ممكن تكون محل نقاش

فى مصر نسبة المنظرة والتباهى بتكون عالية جداً، فبمجرد إن زيد إشترى موبايل آخر موديل تلاقى كل إللى حوله عاوزين يشتروا برضه موبايل حديث وتدخل فى التنافس اللانهائى. أما فى الغربة تلاقى زيد نفسه شارى موبايل كل إمكانياته أنه بيرن وبيبقى على قلبه زى العسل وتلاقى إللى بيشترى حاجة غالية جموع المغتربين بينظروا له على إنه مستهتر ومش عارف مصلحته.

فأظن النظرة العامة دى بتأثر برضه على مستوى الشراء.

[doudy]

شوفى يا فتفوتة

انابقالى 11 سنة فى الغربة و مش عارفة لسة هتخلص امتى

اول ما سافرت كنت بقول كدة كل حاجة اجيبها عشان اجهز شقتى فى اسكندرية

لكن بعد كام سنة خلصت شقتى و الحمد لله بدات اقول الواحد بقى يستمتع خلاص الشقة خلصت

هوة احنا ضامنين عمرنا كل بامر الله طبعافلازم نعيش حياتنا كويس و كمان ما نحرمش ولادنا من حاجة

هوة احنا بنتعب و نتغرب ليه يعنى عشان نعيشهم كويس اكيدمش عشان نحوش و نضيقها عليهم

و الكلام دة فعلا مش صح ان الواحد كل همه فى الدنيا انه يشيل الفلوس لبكرة و بس

انت ضامن انك تعيش لبكرة

و هقولكم مثال كان عندى جارتى و جوزها من سوهاج و عندهم 3 اطفال

بس بصراحة كانوا ايوة بيشيلوا فلوس بس الحق يتقال عايشين كويس جدا

و مش حارمين ولادهم امن حاجة و قعدوا كام سنة و نزلوا و رضوا باللى ربنا قسمهولهم

و هما اللى طلبوا ينزلوا و الحمد لله نزلوا و اشتروا بيت و محل وكانوا عايشين كويس و مفيش سنة بدا يظهر على زوجها

مرض السرطان فى مناطق كتييرة فى جسمه و قعد يتعالج حوالى سنة و بعدين توفى

و نسيت اقولكم انهم بعد ما نزلوا ربنا رزقهم بالطفلة الرابعة و صاحبتى هية اللى شايلة مسؤلية الولاد لوحدها

اللى عايزة اقوله ان الاعمار بيد الله سبحانه و تعالى فلازم كل واحد يعيش حياته و ما ياجلهاش

هيعيش امتى يعنى هو حد يضمن هيعيش اد ايه

عيشوا حياتكم و عيشوا ولادكم كويس عشان يذكروكم بالخير فى حالة وفاتكم عندما يحين الميعاد

دودى

[الجدار]

الموضوع جميل يا فتفوته وكنت بفكر فيه بجد من تلات ايام تقريباً

اقولك كل اللي حيردوا في الموضوع هنا أعتقد انهم من اللي شغالين في الخليج

كلنا طبعاً هنا عارفين التعامل مع الخليجيين شكله عامل ايه

والقانون هنا اللي بيفرق بين الأجنبي وأبن البلد

والتحكمات اللي بيفرضها الخليجي على الأجنبي على أساس انه مالك رزقة (سبحان الله عما يصفون)

فمعظمنا هنا بالأمانه مش حاسس بالأمان

وبيحاول بكل ما يقدر انه يبقى خفيف

بس حقولك ده مش على حساب لا لبسة ومظهرة أدام الناس (لأن دي صورة بلدك) يشهد ربنا اني بحاول اتعامل مع الناس كويس وبلبس كويس جداً علشان ابقى صورة لبلدي

وكذلك مش على حساب حالتك النفسية

انا برضو مش حشوفها من ناحية الناس المتجوزة ومخلفة لأني لسه ماجربتش اكون متجوز ومتغرب

على عكس الحال الناس اللي شغالين برا الخليج

بيبقوا الى حد ما حاسين بالإستقرار لأن القانون بيمشي على أبن البلد قبل الأجنبي

فبيحس أنها زي بلده وبيظبط نفسه وبيته وعربيته وهكذا

انا شايف المشكله هي مشكلة إحساس بالأمان

أعتقد اننا طول ماحنا في الخليج مش حنحس أننا عايشين من الأساس

[لولا]

فتفوفه الطيوبه ..

تعرفى لما بيقرب الصيف بحس انى سرحانه جدا فى مصر .. فى الذكريات..فى الأهل .. وفى ايام حلوه

المهم .. اول ما سجلت هنا فى المحاورات كتبت موضوع شبه دوت لأنه كان حقيقى شاغل تفكيرى

وكان اسمه " تعيش حياتك وتوفر ااقل ..ولا تحرم نفسك وتوفر أكتر ؟"

http://www.egyptiantalks.org/invb/?showtopic=60840

كنت عايزه زيك اسمع رأى ناس كتير رغم انى كنت محدده مسبقا الإجابة اللى تناسبنى وتناسب ظروفى وحياتى كلها

لكن ساعات برضه بنحتاج نسمع من بعض ..

ساعات ممكن نكون بنبص لتحت رجلينا بس ..

وساعات بنعيش على وهم الآمان والمستقبل ونفقد الحاضر والمستقبل !!

هى مسألة احتياجات نفسيه ممكن يقدر حد يستغنى عنها وحد تانى لأ..

بتحكمها كمان الظروف اللى كانت قبل كده يعنى ممكن حد يشد على نفسه شويه وبشوف ناس كده

لكن صعب يغير من حياته 180 درجه ويقول انا فى غربه واحنا مش جايين هنا نعيش !!

لأ معليش عمرى ما اقدر استوعب الكلمه دى .. اعتقد احنا بنعيش مره وحده..

ممكن نختار الوسطيه بلا افراط ولا تفريط وياما شفت نماذج حرمت نفسها من اساسيات الحياه

وبعض الترفيه اللى تشعر بيه ان الحياة فيها الوان غير الرمادى والأسود وفى الآخر للأسف

حصل مالم يكن فى البال .. ضاع العمر لأننا مش ضامنين عمرنا عشان نموت النهارده ونقول هنبقى نعيش .. بس بكره !

حرفقلك مداخله كتبتها فى موضوع التوفير تلخص اللى عايزه اقوله وموقف آثر فيا جدا

تعيش حياتك وتوفر ااقل.. ولا تحرم نفسك وتوفر أكتر ؟

سؤال أكيد كلنا سألناه لنفسنا فى يوم من الأيام سواء للمغتربين او

حتى اللى عايشين فى مصر ميسورين الحال.

وسواء كان إختيارك إجابته فى الجزء الأول من السؤال او التانى فأكيد

لكل واحد مننا سبب ولكل واحد مننا ظروف تحكمه.

بس يمكن نكون محتاجين نفضفض لبعض عشان نعرف هل ممكن

تختار تعيش بطريقة من الطرقتين وبعدين بعد العمر ما يعدى تكتشف

انك كنت غلطان :sad: ياترى ممكن الحاجة دى تحصل ؟ wst::

انا عن نفسي حكون اول وحده اجاوب على السؤال ده.

انا وحده من الاف المصريين الى فتحوا عينهم على الدنيا لقوا نفسهم

فى بلد غريبه.. عالم جوه عالم فى البيت لهجة..وفى المدرسه

والشارع لهجه تانيه :blink: .. فى البيت طبيخ وعند الجيران طبيخ تانى :blink:

وفين وفين لما فهمت معنى اننا فى غربه.. معنى اننا من مصر..بس مصر بعيده قوى

أهلى من اول يوم اتغربوا فيه إختاروا الإختيار الأول وهو انهم يوفرا بس فى نفس الوقت

يعيشونا مرفهين وكانت النتيجة ان سنين الغربه طالت لما راح عمرهم كله فى الغربه ;)

وبعدين انا كبرت.. ودخلت الجامعة واتخطبت واتجوزت وبعد شهر العسل على طول سافرت تانى

للغربه مع جوزى واشتغلنا هناك.

وبدأت اسأل نفسي ياترى نعيش كويس ونلبس ونخرج ونتفسح ونوفر ااقل ولا نشد على نفسنا

ونوفر أكتر عشان مكملش حياتى كلها غربه فى غربه :unsure:

وفى وسط الحيره اللى كنت فيها جالى خبر من مصر غير موازيين حياتى كلها00

أعز صحباتى من اولى اعدادى لثانوى وبنت الجيران اللى كنا عايشين معاهم فى العماره

لما كنت مع اهلى فى الغربه ماتت :sad:

ماتت وهى لسه ورده مغمضه.. ماتت قبل ماتستعمل كل الحاجات الكهربائية والسجاد

والصينى والتحف اللى أهلها كانوا بيجهزوهالها طول السنين اللى عيشوها فيها فى غربه

وكانوا حرمنها حتى تشترى هدوم وتلبس زى بقيه صاحبتها عشان يقدروا يفرولها أكتر

وأكتر. ماتت وسابت كل حاجة :sad:

صاحبتى دى كانت ظروفها زى ظروفى تقريبا.. بس باباها كان مشاء الله شغال فى شركة

كبيره وراتبه كان كبير قوى.

وبعد سماع الخبر ده عشت فتره شهر مش قادره اركز فى حاجة.. ولا قادره انسى كل ذكريات

طفولتنا مع بعض.. ولا نظرات عينيها المكسوفه اللى كانت بتبان لما اخبط عليها فى العيد

عشان اعيد عليها وتبقى لابسه لبس مش حلو ورخيص... كانت ديما تشاركنى احلامها

وتقوللى انها لما تنزل مصر حتلبس وتتفسح وتعمل كل حاجة اتحرمت منها.

ومره زرتها فى بيتها فى مصر ..دخلتنى اوضه كبيره مليانه كراتين كتير قوى..وقالتلى

كل الحاجات دى بتاعتى ماما وبابا اشتروهالى عشان لما اتجوز :sad:

وبس.

قررت اعيش واعيش واعيش .. واكيد حوفر.. بس التوفير عندى مبقاش أهم من انى أعيش :lol:

ياترى انا صح ولا غلط ؟

[fatfouta]

من تجارب مرت أمام عيني ... غالبا اللي بيبقى حارم نفسه من كل حاجه في الغربه علشان لما يرجع مصر يعيش كويس ما بيلحقش يتهنّا بالفلوس اللي حوشها يا إما واحد ابن حرام بينصب عليه في مشروع أو بيعه يا إما بيصرفها على العلاج من الأمراض اللي جاتله بسبب الضغط العصبي اللي عاش طول حياته فيه ... وفي أحسن الأحوال هايصرفها دون أن يستمتع بها لأن نوعية الحياة في مصر لا تسمح للإنسان بالتمتع بما كسبه

خير الأمور الوسط ... الواحد لا يصرف بدون حساب كل ما يكسبه في الغربة ولكن أيضا لا يحرم نفسه من الحياة الجيدة حسب مقدرته

عندك حق يا احمد والله انا شوفت ده ادام عينى وكان بابا الله يرحمه مثال على كده

فضل طول عمره فى الغربة الاول كان معار فى اليمن وبعد كام سنه راح السعودية وقعد فى القصيم

وساعو حرب الخليج بقوا ينزلوا المصريين ويستقصدوهم جدااااا وبعدين لما نزل ايوه كان عمل قرشين بس عارف والله الفلوس مانفعتنا خالص لانه ذى ماتقول زعل على اللى حصله والغدر اللى شافوا منهم

وجاله بقى المرض وابتدا بالسكر وحاجات تانية كتير والله كان يقعد يقول قبل مايموت انا لو رجع بيا الزمن تانى كنت اقعد معاكوا هنا ولا ان عمرى يضيع وانا مش وسطكوا والكلام ده كان بيأثر فيا جداااا لدرجة انى لما اتجوزت وسافرت دايما بفكر فى كلامه الله يرحمه

بس فعلا خير الامور الوسط

شكرا ليك يا احمد

[esocial]

فعلا مادمتى فى الغربة والمفروض انك بترتبى نفسك على العودة لمصر وتستقرى هناك لازم تكونى اقتصادية لكن مش فى كل حاجة لا لكن مثلا بدل ما تعيشوا فى شقة 3 غرف وممكن الشقة اللى 2 غرفة تكفيكم ما دامت فى منطقة نظيفة مفيش مشكلة خير الأمور الوسط لكن اللبس لا يدخل فى هذه القاعدة انا بعمل الكلام ده وكمان الواحد ميحرمش نفسه من الأشياء الضرورية فى الحياة الأكل الشرب واللبس لازم يبعدوا عن القاعدة

الأدوات المنزلية ماركات لو كان الأستخدام واحد بكل المقاييس يبقى هاتى أردىء ماركة مفيش مشكلة مادام الحكاية مفيهاش تفاخر وكمان فى النهاية هتترمى و لو فى عزومات يبقى الأطباق والأشياء اللى هتتقدم وتظهر لازم تكون غالية لكن ان الواحد يضيقها على نفسه فى كل النواحى ده اكبر غلط وميبقاش عايش خالص لأننا مش فى معسكر عمل زى ما بيقولوا لازم الواحد يستمتع بالحياة ويحبها زى ما لازم يستمتع بالعمل ويحبه لكى ينتج .يعنى فى النهاية خير الأمور الوسط ولو حسبناها فى النهاية هنلاقيها مش هتفرق كتير

[pink rose]

وَلاَ تَجْعَلْ يَدَكَ مَغْلُولَةً إِلَى عُنُقِكَ وَلاَ تَبْسُطْهَا كُلَّ الْبَسْطِ فَتَقْعُدَ مَلُوماً مَّحْسُوراً(29) إِنَّ رَبَّكَ يَبْسُطُ الرِّزْقَ لِمَن يَشَاءُ وَيَقْدِرُ إِنَّهُ كَانَ بِعِبَادِهِ خَبِيراً بَصِيراً(30) سورة الاسراء

هو دا المنهج الرباني اللي امرنا به الله عز و جل يعني لا نبخل على نفسنا و لا نصرف بتبذير

لقول الله تعالى: وَآتِ ذَا الْقُرْبَى حَقَّهُ وَالْمِسْكِينَ وَابْنَ السَّبِيلِ وَلاَ تُبَذِّرْ تَبْذِيراً(26) إِنَّ الْمُبَذِّرِينَ كَانُواْ إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُوراً(27) سورة الاسراء

[Ahmed Unknown]

و الله انا عن نفسى و معظم اصدقائى المصريين هنا فى الرياض و المعظم منهم عزاب كله عايش حياه كويسة و يمكن احسن من اللى عايشينها فى مصر

من ناحية السكن ساكنين واحد او اتنين بالكتير فى الشقة و فى ارقى احياء الرياض (العليا و السليمانية و غيره)

و من ناحية الاكل معظم الاكل فى مطاعم يعنى محدش بيبخل على نفسة او يقول اما اطبخ فى البيت عشان اوفر

و طبعا اللبس ارخص و احسن من مصر فبتبقى فرصة نجيب اللبس من هنا

طبعا كل الناس حسبتها و شافوا الفرق بين الحياة الكويسة و الحياة الناشفة

انا ليا واحد صاحبى ساكن فى البطحة (اسوأ مكان فى الرياض) بيدفع 10 الاف ريال فى السنه فى الشقة

انا ساكن فى حى المحمدية بشمال الرياض فى منطقة نضيفة و بدفع 13 الف فى السنه يعنى هو الفرق ال 250 ريال فى الشهر دول هما اللى هيفرقوا عشان اسكن فى مكان مقرف؟

و طبعا لو سكنت مع حد هيبقى الفرق 125 ريال فى الشهر يعنى مش مستاهلة

ولو طبقنا نفس المثال على الاكل و الشرب و اللبس هنلاقى الفروق مش كبيرة و العملية مش مستاهلة خنقة و تضييق الواحد مش هيعيش 100 مرة

[fatfouta]

اهلا فتفوته والله انتى فتحتى موضوع مهم جدا

انا طبعا مع رأى الصديق لانه فعلا انتى مش عارفة انتى هتنزلى امتى وهتفضلى هنا على عفش مكسر وعيشة ملهاش لازمة بالرغم من عفشك الجديد ال فمصر وال اتردم تراب وال يدوب مبتلحقش عينيكى تشوفه فالاجازة الفصيرة .

انما للاسف منطق جارتك ده ال لقيت كل المصريين تحديدا بيعملوه هنا فالغربة .يعنى بالمقارنه بالجنسيات الاخرى هتلاقى انه ال فنفس مستواكى الاجتماعى والوظيفى معيش نفسه فمستوى ال هو يقدر يعيش بيه فبلده ولا بيحرم نفسه من حاجة .

انما ميمنعش انى لو عندى ارتباطات مثلا زى ديون او اقساط انى اتحكم فنفسى لفترة محددة لما اخلص فيها ارتباطاتى يعنى مثلا ميكنش على دين واروح اشترى كل يوم لبس واقول انا لاوزم اعيش فيه اولويا ت وده عن تجربة شخصية انى اول ماجيت البلد كان على اقساط فمصر وكنت بفرش بيت هنا اخدت شقة صغيرة بإيجار بسيط وفرشتها فرش بسيط ع الاحتياج المطلوب فقط وبعد ما انتهيت من اقساطى بدأت اشتر كل ال كان ناقصنى وجددت البيت وعشت والحمد لله فنفس المستوى ال كنت فيه فمصر ويمكن احسن كمان .

يعنى خير الامور الوسط

يعنى انتى معايا انه فعلا ماحدش بيمل كده غيرنا احنا المصريين وهتلاقى فعلا الجنسيات التانية بتصرف فلوسها وتيش ولا بيهمها انها راجعة ولا مش راجعة بلدها

كان عندى فى نفس البيت القديم ده واحدة جارتى سورية ومش هقولك انها كانت مبسوطلة لا دى كانت بتشتغل فى مشغل وجوزها ماكانش لقى شغل لسه و

والله العظيم كانت كل يومين لازم الاكل فى مطعم برا وكانت تقولى انا نازله انا والولاد اخرجهم واكلهم برا وولادها دول كانت تجيبلهم اللبس من المازر كير وادامز .... كنت اقول فى نفسى يا سهير وفرى ده انتى اللى بتصرفى ومرة قلتلى انا مش بيعجبنى مبدأ بسمه خالص (بسمه اللى هى جارتى المصرية اللى حكيت عنها) وراحت قايلا لى اهو انا اللى عم بشتغل مش جوزى بس مافى يوم هحرم ولادى ولا نفسى من شى خالص

واوعى انتى كمان تعملى كده يا امى مانعرف هنعيش اد ايه

كنت اقول دى عشان سوريه ودول مش هاممهم يرجعوا بلدهم ولا يكون عندهم شقة فى بلدهم ولا لا

لكن بعدين فهمت والله انه لازم الواحد يعيش ومايبصش لانه هايرجع دلوقتى ولا بعدين

وهو فعلا احنا بس المصريين للاسف اللى بنحسبها كده او مش كلنا فيه ناس مننا

[fatfouta]

الموضوع ده يفرق من واحد لآخر

والتخطيط للحياة هو اللي بيحدد إيه القرار الصح

لو واحد مخطط إن الغربة دي بالنسبة له محطة (بضع سنوات) ثم يرجع إلى بلده , فتكون الحكمة إنه يقضيها في الغربة بأقل التكاليف, ويضحي ببعض ما يشتهيه من أجل الادخار..

ولو الواحد مخطط إن يستقر في الغربة إلى أجل غير محدد؛ فالأفضل إنه يشتري كل ما يريده ولا يحرم نفسه من شيء..

ولكن في كلتا الحالتين .. ((خير الأمور الوسط))

يعني الواحد ما يحرمش نفسه من كل حاجة أوي برده في حالة لو قرر إن الغربة بالنسبة له محطة في حياته

وفي نفس الوقت ما يصرفش كل اللي معاه في حالة لو قرر إن يستقر في الغربة علطول ..

وأهو القرش الأبيض ينفع في اليوم ال.... ;)

إن شاء الله ربنا يجعل أيامك كلها بيضا يا مدام فتفوتة :lol:

اعتقد ان التخطيط مش بينفع اوى يا استاذ سهل

لاننا اول ماجينا هنا كان ادامنا هدف وقولنا هنقعد سنتين تلاته وخلاص وفجاه لقينا نفسنا داخلين فى السنه السادسة ومصر بنشوفها كل فين وفين

ولو مهما خططنا مانعرفش هننزل امتى ولا هنستقر امتى

يبقى نعيش بقى

وربنا يحققلك امنياتك وتعمل اللى فى بالك يا رب

[ذهبية]

اختى فتفوتة موضوعك جميل جدا هاديك مثلين من اللى شوفتهم وعشرتهم وانت تستنتجى عايزة اقولك اية

ابى طول عمرة فى الغربة و امى كانت بتروح لة تقعدمعاة فترة و ترجع تقعد معانا علشان تعليمنا كل مرة تروح و ترجع منها تجيب خيرات كتيرة جدااااا و تحوشها و تقول دة لبنتى لما تتجوز و عرايس ولادى

ترجع تسارف تانى و نفس الشنط اللى تتكوم فوق الدولاب و تحت السرير ونفس الردود علشان مراة ابنى ابقى اديها هدايا واوفر لابنى

علشانك انتى يا بنتى الوحيدة بس انا هاديها لك بمناسبة مش كلة مرة واحدة بمبدا اقتصادى ناجح وكانت دايما تفرح وتقول عمرى ما هتزنق ابدا و احتار فى هدايا عندى من كل نوع و لون و شكل

توالت سنين السفر و توالت الشنط لدرجة ان الشقة نفسها ضاقت باللى فيها ودينا شنط للشقة الجديدة

و هكذا حتى حانت لحظة الرجوع من السفر و الغربة لكن للاسف القدر لم يمهلها للاستمتاع بالشنط التى لم اعرف ما بداخلها فمرضت امى و توفت وهى ضغيرة فى السن

جاء وقت فتح الشنط لان ابى اراد ان يتزوج لا استطيع ان اصف لك شعورى وانا افتح تلك الشنط بكيت بكاء حاراااااااوانا اردد نفس الكلمات تركتيها لمن يا امى

تركتيها لمن للتراب و العتة تاكل فيها تعرفى يا فتفوتة اين انتهت تلك الشنط اخذ ابى معظمها لزوجتةالجديدة

بحجة انها بفلوسة و تعبة ومن حقة بدل ما يشترى هدايا لزوجتة و الباقى طبعا اصبح موضة قديمة

وانا تبرعت بالباقى الى بعض من اهلها و الجمعيات الخيرية

القصة الثانية لعمتى الضغرى منذ ان تفتحت عينى و اعرف انها فى الامارت حتى وصل عدد السنين الى ما يتعدى 25 سنة انجبت حوالى خمس اولاد كانت تشتغل مركز مرموق جدااااااو بمرتب خيالى

لكن كانت تصرف ببذخ رهيب على اولادها و زوجها كل ما لذ و طاب الكرتونة و من المستورد كل ما تتخيلية من فسح و ترفية الكل كان متخيل ان عمتى هذة هترجع مليونيرة لكن بنتجة تلك العيشة والمصاريف

لو قولت لك انها قاعدة الان فى شقة مؤجرة بعد ان باعت الشقتين الملك لها لان اولادها ما اتعودوا الا على

الرفاهية

وكل يوم تبيع ممتلكاتها حتى اصبحت علىالحديدة ولديها تلات بنات لا تعرف كيف تجهز لهم

يا فتوفتة هاترك لك تتلخصى الحكمة من القصتين من واقع الحياة

لك كل تحياتى اختك ذهبية

[عنبو]

بجد موضوع غايه فى الاهميه وبما انى لسه فى بداية الغربه يعنى مكملتش لسه الخمس شهور بس الواحد كتير ما بفكر فى الكلام ده بس انا لسه متجوزتش وانا قرايبى كلهم مسافرين بس عايشين عيشه اخر ابهه بس هما اقالولى انهم فى الاول ماكنوش كده لحد لما الوضع اتظبط والمرتبات ارتفعت برضه ظبطوا نفسهم بس انا راى ان الواحد يمكن يوفر بس فيه حاجات اساسيه مينفعش الواحد يوفر فيها لانها بتيجى على الصحه والصحه مش تتعوض ولا بكنوز الدنيا كلها وهما برضه اقالوا ليا كده يعنى السكن فى الاول مش شرط يكون فخم اساسا كده كده هتنام بس الاكل والشرب واللبس مينفعش تقصر فيهم بس برضه فى حدود المعقول يعنى بلاش التوفير اللى هيجى على الصحه واصل مافيش بعد الصحه اى شىء

انا شفت ناس فى الغربه ممكن تقضى يومها كله ب سنتدوتش وتقضى باقى اليوم نوم طبعا ده عذاب وهو كده مش بوفر له لا ده بيتشغل علشان لما ينزل مصر يبقى يصرف ده عند الدكاتره

يعنى من الاخر الواحد مسافر علشان يعيش فى مستوى اقتصادى احسن من اللى كان فيه فى مصر يعنى لو حب يوفر يبقى يعيش فى نفس المستوى اللى كان عايش فيه فى مصر لكن اقل منه يبقى انا معرفش هو ليه متغرب ؟؟

وبعدين مافيش حد عارف هيموت امتى لو الشيطان خلاص مننا بالدنيا

[fatfouta]

والله يا فتفوته ما فيش كلام اقوله بعد اللي اتقال كلامهم كله صح الصح1- بتفرق من واحد لواحد.2- بتفرق الواحد ده كان عايش ازاي في مصر.3- هايفضل في الغربه كام سنه وله هايفضل علطول.بس لازم يا خد باله ان الغربه مش دايمه ولا قدر الله الاعمار بيد الله فلو اتعود انه يعيش في مستوي حلو قوي في الغربه ممكن الظروف تحكم عليه انه يرجع في اي وقت اولاقدر الله اسرته ترجع في اي وقت فلازم يكون عامل حسابه بس برضه مايحرمش نفسه من حاجه في حدود الوسط. يعني كان ليه واحده اعرفها قالت لي كلمه حكمه .(جوزهاكان بيشتغل بمرتب ثابت ومعقول وبعدين فاتح عياده بالليل طبعا دخل العياده كان اضعاف المرتب .فهيه قالت انا اعيش كويس بس في حدود الدخل الثابت(الحكومي)ودخل العياده للفسح والتوفير.لان ممكن في اي لحظه مايبقاش في عياده.وسبحان الله زي مايكون قلبها حاسس .بعد الشلر عن السامعين .جوزها توفى بعد 5 سنوات من الكلام ده .فلو كانت متعوده على مصاريف دخل العياده مع المرتب كان هايحصل لها نقله كبيره .بعد ما راح دخل العياده .وبالظبط كده دخل الغربه مؤقت .وخير لالامور الوسط وماتحرميش نفسك من حاجه بس عودي نفسك وعودي اولادك ان في اه وفيه لا مش علطول اه

المثال اللى انتى ذكرتيه بتاع الدكتور وزوجته ده فعلا مؤثر والله ويعلم الواحد انه لا يبعزق ولا يبخل اوى عشان مايتعبش

وهى فعلا فى الاول والاخر بتكون احتياجات نفسية لكل شخص وعلى اساس هو كان عايش اذاى فى مصر ومايقدرش يتنازل لما ييجى يعيش هنا لان ده بيجيب امراض نفسيه والله يا روشة وانا مجربه ده

شكرا لمشاركتك العزيزة

[سهل جدا]

ما شاء الله

المشاركات قيمة جدا

الحقيقة الواحد استفاد كثير منها

بارك الله فيكم جميعا

بس حبيت أتكلم في نقطة هامة أشار إليها بعض الأعضاء وهي:

إن الواحد لما يحوّش لا يضمن عمره, ولعله لا يتمتع بما يدخره

وممكن بعد ما يدخر ويحرم نفسه من بعض المتع يأتي إليه الموت

ما تم اقتباسه كان ملخصا لكلام بعض المشاركين

ولكن عدم معرفة وقت الموت لا يمنع الإنسان أن يدّخر في الغربة ويضحي ببعض المتع لعله ينتفع ببعض ما ادخره عندما يرجع لموطنه

باختصار أنا دخلت عشان أقول:

" اعمل لدنياك كأنك تعيش أبدا ، و اعمل لآخرتك كأنك تموت غدا "

ملحوظة: هذا ليس حديثا عن رسول الله صلى الله عليه وسلم كما اشتهر عند كثير من الناس, ولكنها مقولة طيبة تحث على العمل فيما ينفع في الدنيا والآخرة.