مصرية الهوى نازلة مصر ومحتاجه رأيكم !!

[مصرية الهوى]

احم احم يا أهل الله ياللي هنا :winner: ...

وحشتوووووووني .... بعدد الأيام التي غبت فيها عن هذا المنتدى الرائع .. الذي أحمل له في قلبي حباً جماً :wub: ....

كانت أيام .....

نخش في الموضوع

من فترة خططنا أنا وزوجي ننزل مصر اسبوعين كده نتفسح ونستعيد ذكريات الهوني مون ....

وكنا مخططين نسافر على نهاية مايو .. بس يالهوي ظهرت حكاية انفلونزا الخنازير وخفت الصراحة وخصوصا إن ابني عمره سنة و3 شهور هأخذه معانا .... السؤال بجد بجد الحكاية مستاهلة وتخوف نلغي السفر ؟؟ مع اني متشوووووووقة جدا لمصر ؟؟؟؟

ثاني حاجه : بقالي فترة بلف وادور ادور عن أماكن تستحق الزيارة في القاهرة والاسكندرية .. وبما إن أهل مكة أدرى بشعابها قلت مليش غير أهل المحاورات الطيبين يدلوني ... قولوا لي على كل حاجة ... مولات وحدايق ومناطق شعبية ومناطق راقية ومطاعم وكافيهات وكلللللللللل حاجه تستحق التجربة في مصر ........

حاجة تانية في الاسكندرية تقريبا هنحجز في هلنان فلسطين .... بس عندي سؤال ممكن نلاقي شاليه نسكن فيه يكون فيه حمام سباحة خاص ؟؟

وفي القاهرة كلمت اليوم واحد قال لي ان عنده شقة على النيل في منطقة الدبلوماسيين قريبة من الفور سيزون ؟؟ مارأيكم بالمنطقة والموقع ؟؟؟

لكم مني كل الاحترام ...

( جيجي أم عبد الرحمن باشا )

[MZohairy]

لقد قصدتي خبيرا :winner:

طبعا لازم نشرفك قدام الباشمهندس ابو عبد الرحمن و نوريله مصر الحديثه العظيمه الرائده المودرن الشيك

شوفي يا ستي :wub:

انتو وقعتوا من السما وانا استلقتكم

شوفي

بالنسبه للسكن فمفيش احلى من منطقة الدراسه في القاهره (واضح من اسمها العلم و الدراسه في شتى بقاعها)

خديلك هناك شاليه شيك كده مفروش على كورنيش النيل و حتتبسطوا كتير و ممكن يخطفوا عبد الرحمن منكوا من كتر ما بيحبوا الاطفال و بيعطفوا عليهم

و زي ما نصحتك قبل كده القاهره فيها اكتر من مكان جميل للزياره و التمتع بالذكريات بعد كده :closedeyes:

زي قلعة الكبش في السيده و هي عباره عن قلعه عصماء فوق جبل كبير و تجري فيها الأكباش ليل نهار

و زي بولاق الدكرور و اللي ممكن تعملي فيها تزحلق على الجليد في شارع ناهيا بعد الترعه

و زي دار السلام و دي منطقه كما يظهر من اسمها عباره عن سلام و هناء و محبه و كل اللي فيها بيحبوا بعض و بيحبوا الناس كلها :wub:

و طبعا فيه الشرابيه و الناصريه و فم الخليج و منشية ناصر و ارض اللواء (قطعة ارض عملاقه للواء سابق من البوليس) مليانه زراعات من نباتات نادره

عموما حتتبسطوا قوي و يمكن مترجعوش السعوديه تاني :unsure:

اي حاجه لا تترددي في السؤال

[SoSo R]

ربنا يسعدك يا أستاذ زهيرى خليت شكلى بأه كدة :winner:

أنت متأكد إنك من الزمالك...اللى مكتوبة عندك...ولا إيه النظام عشان أبقى فاهمة :closedeyes:

بس كدة أى معلومة هتقولها لى عن كندا مش هاصدقها...حتى لو قلت لى إن الشمس بتطلع الصبح...والناس بتشرب لما بتعطش

علطول دماغى هتروح للعكس :wub:

وبعدين دة برضة الواجب اللى تعمله مع أم عبد الرحمن....بدل ما تقولها هابعت لك طبق فراخ بالكسكسى بالدى إتش إل عشان سلامة الوصول :wub:

ماشى يا أستاذ زهيرى :unsure:

المهم عشان نساعد أختنا مصرية الهوى...

فى عندك مجموعة مولات ظريفة فى مصر الجديدة و مدينة نصر

أكبرها و أفخمها...سيتى ستارز...فيه كل حاجة و مطاعم و سينمات

عندك بعد كدة ...جنينة مول حبى الأول

فى بأة شارع عباس العقاد...شارع تجارى و زحمة ما يفوتكيش

مكرم عبيد فيه كام مول بس صغيرين

ممكن تروحى مساكن شيراتون فيها مول محندق أسمه فلوريدا

عندك شارع الأهرام وروكسى...مليان محلات و الحرية مول...وتاكلوا أيس كريم من سلطان اللى فى الكوربة

هافتكر لك حاجات تانى و أرجعلك

تحياتى

سوسورانى

[أحمد سيف]

يا جماعه الأخت نازله من السعودية اللي أماكن التسلية الوحيدة فيها تقريبا هي المولات على مصر علشان تعمل حاجه ثانيه غير الشوبينج ... وانتوا جايين توصفولها في أماكن مولات في القاهرة

أختي الفاضلة وسائل التسلية في القاهرة هي المراكب النيلية وحديقة الحيوان والأماكن الأثرية مثل الأهرامات والقلعة وخان الخليلي والمتحف ... ممكن برضه تروحوا مدينة الإنتاج الإعلامي أو تتمشوا شويه بالليل في الأمامن المأمونة مثل نص البلد القديمة وعباس العقاد وشارع جامعة الدول العربية

في الإسكندرية عندك طبعا البحر والمنتزه و التمشية في نص البلد ورشدي ... وأنا شخصيا بحب طبيعة الحياة في الاسكندرية عن القاهرة

غير كده عندك خيارات كثييييييييييييير زي الغردقة وشرم الشيخ وقرى الساحل الشمالي ومطروح ودي كلها أماكن استجمام للمصريين والأجانب

هناك أيضا رحلات المراكب النيلية من القاهرة للأقصر وزيارة الآثار هناك ... وطبعا عندك أسوان وأكثر من يفيدك عنها هو أخي الدكتور حسام

أتمنى لك أجازة سعيده

[SoSo R]

إيه بس يا أستاذ أحمد...ما هى طلبت برضه مولات

يبقى لازم تجرب المولات المصرى ...أكيد مختلفة عن السعودى

بالنسبة للمراكب النيلية ممتازة...أفضلهم فرعون النيل

بيطلع دورة ظهرا مع وجبة غداء

وليلا دورتين مع وجبة عشاء و باند شرقى....دورتين يعنى ميعادين ورا بعض

فيه عندك لو باشا دة مركب نيلى بس ثابت ما بيتحركش

لو عايزة حتت شعبية ...خان الخليلى و الحسين...أكثر من رائع و خصوصا لشراء التذكارات

ممكن تاكلى فتة ولحمة راس لو ليكى فى الأكلات الشعبية فى الدهان

و بعدين تقعدوا فى قهوة الفيشاوى...أشهر قهوة هناك

وكدة تعيشى جو تاريخى مصرى أصيل

بالنسبة للأنفلونزا لحد دلوقت ما فيش حاجة و ممكن تاخدى الأحتياطات العادية من أدوار البرد

لو عايزة أمان زيادة خدى جرعة تاميفلو دة دوا مضاد للفيروسات وروحى لدكتور يضبط لك جرعة أبنك حسب وزنه....دة لو عايزة حرص زيادة عن اللزوم

تحياتى

سوسورانى

[MZohairy]

سيبك يا ام عبد الرحمن من سوسو راني و احمد سيف دول عايزين يودوكي اماكن بيئه و مش من مستواكم :closedeyes:

خليكي معايا تكسبي :winner:

شوفي بقى

نيجي للمطاعم :wub:

مطعم الجحش في السيده زينب

ده بيقدم مينيو خرافه من افخر الوجبات الشرقيه و الغربيه و المنوفيه في كباين مكيفه فوق النيل و الأرضيه زجاج شفاف مقوى يخليكي تشوفي السمك و هو بيبلط تحتيكو وانتو بتاكلوا

مطعم كبداكي في الدويقه لجميع انواع كبد البط و الحيوانات النادره و ده المحل الوحيد في مصر اللي بيدبح الحيوان قصادك و يهبش الكبده بتاعته صاحيه و يشويهالك قدام عنيكي طازه مجمده

مطعم ماكدونالدز عبد الرسول ماكدونالدز في الترب و ده متخصص في الساندوتشات السريعه (الفاست فول) يعني لما تكونوا مستعجلين

عموما دي كانت لمحه سريعه و اي خدمه يا حاجه جيجي و وحياة عبد الرحمن ما تتكسفي يا شيخه لو احتجتي اي مشوره :unsure:

[SoSo R]

يا عم زهيرى أحب على دماغك ....سيب الست فى حالها

أنت شكلك كدة عميل ...و عايز تبوظ سمعة السياحة :winner:

أنت ناقص تقولها روحى مطعم فواكه بحة...عارفه؟؟

اللى فى مجرى العيون

أو أبو رامى...بتاع الكبدة و السجق اللى فى الحى السادس

و بعدين ما انا قلتلها الدهان...شيعبى و إبن حلال

ولا لآزم تجيلهم دوسنتاريا يكماوا بيها الصيف كله!!!

ولا قلهم على مكان عبده تلوث

أوعى تكتب تانى يا زهيرى فى الحتة دى...روح شوف النافيجتور بتاعك أحسن :wub:

تحياتى

سوسورانى

[se_ Elsyed]

ولو إني زعلان منك يا جيجي على طول فترة إنقطاعك . لكن عذرك عشان العيال وقرفهم ... بالمناسبة .. إبقي إبعتي عبد الرحمن باشا مشوار لحد الملز ... لعبد الرحمن بك إبني عشان يظبطهولك ... عبد الحرمن بتاعنا عنده 10 شهور بالظبط دلوقت إنما مجنن أهلنا ومطلع علينا القديم والجديد وكإننا ما خلفناش عيال قبل كده .

- اللي أقدر أقوله لكي دلوقت إنكم نازلين في وقت قاتل في مصر وهاتحسي إن الناس كلها ماشية في الشوارع مدروخه لإن إمتحانات أخر السنة بدأت الأسبوع ده لبعض المراحل .. فماحدش فاضي يخرج ولا يتنيل .. وبالتالي هاتلاقوا الدنيا ربيع والجو بديع .. مش زي الرياض بنتشوي فيها دلوقت والصيف داخل هاجم من بدري ...

- أنفلونزا الخنازير وما يثار حولها هو إجراءات وقائية لا أكثر ولا اقل .. والحمد مصر من الدول اللي بدأت إجراءات وقائية مبكره منعاً لوصول المرض لها ... بالمناسبة الموضوع ليس له علاقة بوجود خنازير من عدمه ... لإن المرض دلوقت بينتقل عن طريق البشر والخنازير ما هي إلا وسيط لتحوير المرض الموجود أساساً من غيرها ...

- معلومية أخرى يا جماعة خطيرة ... عقار التاميفلو لا يؤخذ إلا بإشراف طبي .. للأشخاص المصابين بالمرض والعياذ بالله .. ولو حد سليم أخده عشان يأمن نفسه فهو كده ضيع نفسه لإن هايعمل عنده أجسام مضادة وهو ما عندوش حاجه ولو لا قدر الله أُصيب بعد كده فمش هايبقى عنده مناعة .

- عايزة نصيحتي ... حاولوا تتفقوا مع واحد سواق تاكسي إبن حلال يكون معاكم طول اليوم في القاهرة والاسكندرية هايوفر عليكم كتير كتير كتير وهايوديكو اماكن ما كنتوش تحلموا بيها ...

ونصيحة غالية من أب حنون - ده أنا اللي مربيكي يا جيجي خليكي فاكره أيام ما كنا سوا في مدرسة بريدة الأعدادية المشتركة - إوعي تسمعي كلام زهيري وتروحي منشية ناصر او بولاق الدكرور لإن الطُرق التي تؤدي إلى روما قصدي إلى تلك الأماكن هي ون واي ... يعني سكة اللي يروح ما يرجعش ..

وخدي اللينك ده ذاكريه كويس وهاجي أسألك فيه كمان 3 أيام ..

ده منتدى المسافرون العرب .. المنتدى الفرعي الخاص بمصر اللي أنا شخصياً بأدخله من وقت لأخر عشان أعيط حنينياً إلى مصر وكمان عشان بيثبت لي إن أنا ما شوفتش في مصر إلا محل عصير القصب اللي على أول شارعنا

www.travel.maktoob.com/vb/travelarab12

[لولا]

زهيرى باشا .... صباحك زى الفل :winner:

موتنى من الضحك كده من على الصبح

بصراحة من بعد نصايحك مش حنقدر نزود حاجه خلاص .. كفيت ووفيت .. مخلتش حته راقيه فيك يا قاهرة الا ذكرتها :wub:

ان شاء الله جيجى تتبسط وتدعيلك :closedeyes:

امبارح كنت بقلب فى التراث المحاوراتى يا زهيرى واتخبطت كده بموضوع لمهيب فى شكل قصه اسمه اظن "عمليات فى المحاورات"

وكان اول تعليق فيه لجيجى وانت بعدها الظاهر ..

جيجى الأصيله راحت داخله عازمه عليك خصوصى خصوصى انت وبقيه المحاوريين تتقابلو عند الدائرى مخرج 15 فى الرياض

وانت كنت بتجهز الحنطور عشان تلم الأخوه المصريين وتطلع للقاء العمالقه عند الدائرى :unsure: ... يوووووووووووووه دى كانت اياااام يا راجل :wub:

لولا

[~Heba~]

جيجى....مش ممكن :winner:

حمدا لله على السلامة منورة المحاورات من تانى....يا ترى فاكرانى :closedeyes:

شوفى يا ستى انا مش هقدر افيدك لانى من اسوان و مبروحش اتفسح فى الاماكن الوحشة دى اللى اسمها القاهره و اسكندرية :unsure:

بس ادعوكى للتفكير فى زيارة الاقصر و اسوان و عمل رحلة نيلية من اسوان لأبو سمبل....فى الشتا طبعا :wub:

[سهل جدا]

أستاذ زوهيري

أحيي فيك روح الوطنية وحب مصر وتشجيع السياحة و..... :wub:

بس انت نسيت تذكر منطقة جذابة جدا ...

أقصد (الدويقة) .. دا كلام يا راجل

دي بعد الانهيارات الصخرية بقت حاجة تحفة..

بالنسبة لأم عبد الرحمن صاحبة الموضوع, فأنصحها بالبعد عن القاهرة نظرا للزحام الشديد فيها

والذهاب إلى الأسكندرية والساحل الشمالي خاصة قبل ما تتزحم في شهر 6 وشهر 7 ميلاديا

[pink rose]

السلام عليكم

الاخت الفاضلة مصرية الهوى هاتنوري مصر ان شاء الله و يا رب تكون اجازة سعيدة

بصي يا ستى بالنسبة لاسكندرية انتي قولتي هاتقعدي في هلنان فلسطين رائع طبعا دا في المنتزة على البحر مباشرة فندق جميل و ان شاء الله في الوقت دا يكون هادئ لان الوقت اللي هاتنزلي فيه وقت امتحانات

و هاتلاقي اسكندرية كلها هادية و لطيفة قبل ما يهجم الناس عليها في الصيف اه من الصيف و بلاويه و اللي بيجرى فيه

المهم فيه كمان في المنتزة قصر المنتزة و قصر السلامليك غير طبعا حدائق المنتزة الجميلة

و عندك المعمورة منطقة جميلة كمان و هاتلاقي التمشية فيها تحفة بجد

الفسح في اسكندرية اهمها طبعا التمشية على البحر وقت الغروب يا سلام يا سلام منظر رائع خصوصا لما تكوني على الشط من تحت مش من فوق الكورنيش المشي على الرملة دا حاجه تانية

في كمان عندك جرين بلازا مكان ترفيهي فيه محلات كتير لبس و دهب و اكل و كافيتيريات كتير و قهاوي لو رحتي هناك كلي من عند صابر رز بلبن بالايس كريم و الله يخليكي كلي واحد زيادة عشاني انا

جرين بلازا كمان فيها سينما

لو عاوزة تزوري اماكن بقى ليها علاقة بالتاريخ شوية هاتلاقي عندك قلعة قيتباي و هناك هاتلاقي برضة الاحياء المائية دول في منطقة بحري

طبعا الطريق المؤدي اللي القلعة هو طريق الكورنيش و انتي معدية هناك هاتلاقي على الناحية التانية من شارع البحر محل اسمه عزة دا بتاع ايس كريم من اشهر محلات الايس كريم في اسكندرية ابقى جربيه

في كمان عندنا في اسكندرية قصر المجوهرات دا قصر فيه جزء من مجوهرات اسرة محمد على باشا موقعه في جليم

في كمان الفورسيزون على البحر في منطقة استانلي دا فندق و مول كبير التمشية فيه لذيذة و طبعا مولات مصر بتختلف كليا عن مولات السعودية الدنيا عندنا هيصة كده و جميلة

في بقى منطقة وسط البلد اللي هي محطة الرمل دي منطقة كلها محلات زي روكسي في القاهرة كده و فيها سينمات كتير

دي الحاجات اللي جاية على بالي دلوقتي لو افتكرت حاجه تانية هاقولك عليها ان شاء الله

اما بالنسبة للساحل الشمالي دا هاتلاقيه فاااااااااااااااااااضي جدا دلوقتي لان السيزون بيبدأ نص شهر 6 كده لما الامتحانات تخلص و يبدأ الصيف اللي بجد بقى

و هناك هو المكان اللي هاتلاقي فيه طلبك بالنسبة لشالية خاص و حمام سباحة فيه بس في الوقت دا من السنة مش هاتتبسطي هناك لو نزلتوا في الصيف شوية الوضع هايختلف في الساحل الشمالي

مرسى مطروح خفيفة كده و لذيذة و البحر هناك تحفة بجد احلى بحر في الساحل الشمالي كله لون المايا مش قادرة اوصفلك لونه فيروز كده و تشوفي الرملة و انتي جوة البحر من نظافة المايا

مرسى طروح العشق التاني ليا بعد اسكندرية

المهم طولت عليكي بس لو رحتي ما تنسيش طبق الرز بلبن بالايس كريم بتاعي

و ربنا يسعدك و تقضي اجازة لطيفة و عبدالرحمن باشا يتبسط في مصر و يحبها زيك كده

تم تعديل 10 مايو 2009 بواسطة remo

[ssmaly]

الأخت مصرية الهوى

انا من اسكندرية ولما حبيت اعمل سائح فى القاهرة سألت ناس كتيرة من القاهرة واستقر المطاف بى انى اشترك مع رحلة الى القاهرة

ذهبت القاهرة بسيارتى و حجزت فى الفندق بتاع الرحلة السياحية وعلشان ماسوقش فى القاهرة (لان السواقة فى القاهرة لأبناء المدن الاخرى كغزال برىء ساذج حب يتمشى فى الغابة اللى بها الاسود والنمور و الافيلة وكل وحوش الغابة)

وسبت نفسى ليهم

رحنا القرية الفروعونية كانت جميلة جدا

و حديقة حيوان الجيزة

ورحلة نيلية مساءا جميلة جدا عشاء مع فرقةوغناء و راقص نسيت بيسمه ايه اللى بيلبس جوب ملون ويقعد يلف بيها لغلية مانتى تدوخى وهو لأ ( ايوه افتكرت اسمه راقص التنورة)

وكان فيه رقص شرقى شرقى اوى يعنى خلى بالك على ابو عبد الرحمن وخديه ساعتها اتفرجوا على النيل من الدور اللى فوق (زى ما مراتى عملت معايا)

طبعا كمان روحنا دريم بارك علشان الاطفال وكمان ممكن الكبار اذل كنت بتحبى الالعاب الخطرة

والمول الغير طبيعى سيتى ستار تقدرى تعملى حسابك على يوم كامل فيه

وخان الخليلى تشرى تذكارات لكى وللأصدقاء

اذا كنتى بتحبى الاثار الفرعونية يبقى لازم اهرمات الجيزة والمتحف المصرى فى التحرير

طبعا ده كان فى ثلاث ايام يعنى مش ممكن انا لوحدى كنت اعرف اشوف كل الأماكن دى فى الوقت القياسى ده

وكمان رحت مدينة الرحاب وأتغديت هناك مكان مريح للاعصاب (رحت هناك اتفقد الشقة اللى مش عارف اعيش فيها)

دى من وجهة نظر واحد اسكندرانى

[ssmaly]

الموقع بتاع سى السيد رائع بجد انصحك انك تشوفيه

وده الفرق بين الهواه والمحترفين زى سين سين

[مصرية الهوى]

الله عليك يا زهيري جبت المفيد .. طب تصدق بالله رحنا بولاق والسيدة عيشة وحتت زي كده بس كنت مستمتعة جدا جدا لاني دي مصر اللي كنت عايزه اشوفها ...

والجحش ده بجد نفسي اجربه مع ان زوجي هيرفض لانه من النوع الغير مغامر ابدا ....

مدام انك مبلبط في الزمالك ما تشوف لنا شقة على النيل والله نفسي اسكن في الزمالك عايزة اشوف الزمالك اللي مدوخة المصريين ...

ميرسي اوي يا سوسو ربنا يخليكي .... تقريبا رحت اغلب المولات رحت سيتي ستارز وجنينه مول والعقاد مول ... ورحنا كرداسة سوق شعبي كان ظريف جدا ..

وفيه جلابيات روعة ... هأبقى أروح إنشاء الله الأماكن اللي قلتيها ...

نفسي تقولوا لي عن بوتيكات راقية تكون بضاعتها أوروبية وحبذا لو ملابس أطفال ......

أحمد سيف متشكرة اوي ... سؤال مدينة الانتاج الاعلامي وين تقع ؟؟ إن شاء الله ناويين نروح لها ....

هأقولكو الحتت اللي رحتها عشان تقولوا حاجه تانية

رحت القلعة وحديقة الأزهر ومتاحف عابدين المتحف المصري ومتحف احمد شوقي ودريم بارك ..

وتمشينا في وسط البلد وركبنا مركب في النيل .. ورحنا الحسين وخان الخليلي والأزهر

رحنا حديقة الحيوان بس كانت مش ولابد الصراحة ..

قولوا اماكن ثانية .. انا مخططة نروح جزر في النيل نفسي اشوف جزيرة الوراق والقناطر ...

مخططة كمان نروح المكان اللي فيه جامع عمرو بن العاص وكنائس مدري وش اسمه ؟

ونفسي اروح المقطم .. جنينة الاسماك ... مدينة الانتاج ..

وفي الاسكندرية قلعة قايتباي ومكتبة الاسكندرية قصر المنتزة .. زنقة الستات

وايه تاني ؟؟؟

س س .. معليش والله الدنيا تلاهي .. بسم الله ماشاء الله ده عبد الرحمن اللي عندي موريني النجوم في عز الظهر .. ربنا يهديهم ....

ميرسي ما انا مذاكره اللينك ده اوي وحافظاه هات الامتحان

والله يا س س لو تعرف سواق ابن حلال ياريت تديني نمرته ؟؟؟

أهلا بيكي يا لولا .. ماتقولي حاجه كده اروح لها إن شاء الله محل عصير القصب اللي ع الناصية :wub:

والله يا سهل جدا بأحس مصر القاهرة والقاهرة هي مصر .. منفسيش خااالص اروح شرم والغردقة مش عارفة لم اشعر بأي انجذاب نحوها ...

الله عليكي يا ريمو كفيتي ووفيتي ميرسي هأسجل كل حاجه عندي إن شاء الله .. طب سؤاال كم تبعد مرسى مطروح عن الاسكندرية ؟؟؟

ssmaly شكرا جزيلا ..بس بلاش حكاية الرقص الشرقي يا عم ماشي :D

طب مقولتوليش ايه رأيكم في منطقة الدبلوماسيين ؟؟؟؟

وهل صحيح لو حجزت في الفندق عن طريق شركة سياحية بيكون أرخص ؟؟؟؟

حد يساعدني ياجماعة انا فاكرة موضوع عن دهاليز القاهرة قدييييم جدا مش عارفة الاقيه !!!

[MZohairy]

زمالك ايه بس !

ده انا في ابعد مكان في الأرض عن الزمالك دلوقتي :D

حوالي 13 الف كيلو متر

كانت اياااااااام

[MZohairy]

صحيح نسيت اقولك

بجد مش هزار

نزلت الزمالك في الشتاء اللي فات

لقيتها حاجه تانيه

السيد جمال مبارك اتجوز و سكن في الزمالك

كل الشوارع غيروا اتجاهاتها و المرور بقى غريب جدا و الشوارع اللي هو مش فيها اتزحمت

باختصار مابقتش الزمالك بتاعة زمان ولا فيها اي حاجه تبسط

ممكن نسميها حاليا........ الزبالك

يا خساره ....يعني مش كان جمال يروح يسكن في القلعه ولا الموسكي؟؟؟؟

اوعي تسمعي كلامي اللي فوق ده

كله يودي في داهيه من النوع الكبير

تمنياتي بقضاء اجازه ممتعه و سلميلي على عبد الرحمن و ابوه

[أحمد سيف]

الله عليك يا زهيري جبت المفيد .. طب تصدق بالله رحنا بولاق والسيدة عيشة وحتت زي كده بس كنت مستمتعة جدا جدا لاني دي مصر اللي كنت عايزه اشوفها ...

والجحش ده بجد نفسي اجربه مع ان زوجي هيرفض لانه من النوع الغير مغامر ابدا ....

مدام انك مبلبط في الزمالك ما تشوف لنا شقة على النيل والله نفسي اسكن في الزمالك عايزة اشوف الزمالك اللي مدوخة المصريين ...

ميرسي اوي يا سوسو ربنا يخليكي .... تقريبا رحت اغلب المولات رحت سيتي ستارز وجنينه مول والعقاد مول ... ورحنا كرداسة سوق شعبي كان ظريف جدا ..

وفيه جلابيات روعة ... هأبقى أروح إنشاء الله الأماكن اللي قلتيها ...

نفسي تقولوا لي عن بوتيكات راقية تكون بضاعتها أوروبية وحبذا لو ملابس أطفال ......

أحمد سيف متشكرة اوي ... سؤال مدينة الانتاج الاعلامي وين تقع ؟؟ إن شاء الله ناويين نروح لها ....

هأقولكو الحتت اللي رحتها عشان تقولوا حاجه تانية

رحت القلعة وحديقة الأزهر ومتاحف عابدين المتحف المصري ومتحف احمد شوقي ودريم بارك ..

وتمشينا في وسط البلد وركبنا مركب في النيل .. ورحنا الحسين وخان الخليلي والأزهر

رحنا حديقة الحيوان بس كانت مش ولابد الصراحة ..

قولوا اماكن ثانية .. انا مخططة نروح جزر في النيل نفسي اشوف جزيرة الوراق والقناطر ...

مخططة كمان نروح المكان اللي فيه جامع عمرو بن العاص وكنائس مدري وش اسمه ؟

ونفسي اروح المقطم .. جنينة الاسماك ... مدينة الانتاج ..

وفي الاسكندرية قلعة قايتباي ومكتبة الاسكندرية قصر المنتزة .. زنقة الستات

وايه تاني ؟؟؟

س س .. معليش والله الدنيا تلاهي .. بسم الله ماشاء الله ده عبد الرحمن اللي عندي موريني النجوم في عز الظهر .. ربنا يهديهم ....

ميرسي ما انا مذاكره اللينك ده اوي وحافظاه هات الامتحان

والله يا س س لو تعرف سواق ابن حلال ياريت تديني نمرته ؟؟؟

أهلا بيكي يا لولا .. ماتقولي حاجه كده اروح لها إن شاء الله محل عصير القصب اللي ع الناصية :wub:

والله يا سهل جدا بأحس مصر القاهرة والقاهرة هي مصر .. منفسيش خااالص اروح شرم والغردقة مش عارفة لم اشعر بأي انجذاب نحوها ...

الله عليكي يا ريمو كفيتي ووفيتي ميرسي هأسجل كل حاجه عندي إن شاء الله .. طب سؤاال كم تبعد مرسى مطروح عن الاسكندرية ؟؟؟

ssmaly شكرا جزيلا ..بس بلاش حكاية الرقص الشرقي يا عم ماشي :D

طب مقولتوليش ايه رأيكم في منطقة الدبلوماسيين ؟؟؟؟

وهل صحيح لو حجزت في الفندق عن طريق شركة سياحية بيكون أرخص ؟؟؟؟

حد يساعدني ياجماعة انا فاكرة موضوع عن دهاليز القاهرة قدييييم جدا مش عارفة الاقيه !!!

ما شاء الله عليكي يا أم عبد الرحمن ... وجايه تسألينا أروح فين ... أحنا اللي المفروض نسألك نروح فين لما ننزل مصر لإن نص الأماكن اللي قلتي عليها أنا شخصيا عمري ما عتبتها ومتأكد إن كثيييييييير قوي من المصريين ما يعرفوش مكانها

مدينة الإنتاج الإعلامي جنب دريم بارك في 6 أكتوبر ومش وهم ولا حاجه بس ممكن تشوفي الممثلين وهما بيصوروا مسلسلات رمضان لو بتحبي الحكاية دي (أنا شخصيا مش مغرم بيها)

أجازه سعيدة وأهلا بيكي في بلدك مصر

[واحد تاني]

الخريطة الخفية لمدينة الإسكندرية

[alsaher]

القاهرة في الأيام دي جميلة

الفور سيزون في واحد في جاردن سيتي وواحد في الجيزة جنب حديقة الحيوان

المنطقتين حلوين عموما

بجانب فور سيزون الجيزة ، شارع الكورنيش يوجد مطاعم وكافيهات حلوة زي فرايديز وغيره

بالنسبة لي بأفضل كازينو في أول شارع الكورنيش عنهم كلهم ،خاصة الجلوس في الأسفل أقرب على مياه النيل متعه بالنسبة لي ، هو في نفس الشارع قبل فرايديز بحوالي نص كيلو

أغلب الأيام اللي بأخرج فيها بأروح هناك

بالنسبة لمطروح من إسكندرية حوالي 400 كيلو يعني من 3 إلى 4 ساعات

لكن يمكن الإستغناء عن المشوار في أي قرية من قرى الساحل الشمالي

وممكن تروحه يوم العين السخنه ، فهي قريبه جدا من القاهرة ساعة تقريبا ، ممكن تقضه يوم وترجعو بنفس اليوم أو صباح اليوم التاني كرحلة سريعه

لو حضرتك بجد عايزة عربية بسائق ، لي أكثر من شخص أتعامل معهم ، تابعين لشركات سياحه وأمينين بصراحه

ممكن أرسل لحضرتك رقم حد فيهم