مصرية الهوى نازلة مصر ومحتاجه رأيكم !!

[Folana]

السلام عليكم ورحمة الله...

ج.ج بنت بنت بنتىىىىىى....وحشانى كتير قوى خالص...وكل مرة أشوفك فيها أبقى نفسى آآآ....أقولك حمدلله على السلامة بس بالاقيك بتختفى بعدها على طول...وانت عارفة انى ست كبيرة ووهن العظم منى واشتعل الرأس شيبا...ومش بالحق اجرى وراك...

ماينفعش تنزلى مصر من غير ماتزورى أهم أثر من الاثار الفرعونية العريقة......ابقى تعالى زورينى بس وانا اقولك هو ايه... :lol:

الاخوة ماجصروا والله...ومش عارفة اقولك على اماكن تانية...دول بدأوا معاك من الصفر يعنى :wub:

بس اللى انا بجد مندهشة له اشد اندهاش...مداخلة امرؤ الزهيرى....

الجحش...والدويقة....وما اعرف ايه!!

امال زمالك ايه بس اللى بنسمع عنها...وعين اعيان ايه....وثرى أثرياء ايه....وكندا ايه...

ماعلينا...ماعلينا...

لو نزلتى مصر...لزمن نشوفك بجى...انت وحفيدى عبد الرحمن والهدايا...هه...ماتنسيش بقى..

:D

[~Heba~]

و الله صح باين عليكى مش فاكرانى

ما علينا..اصل انا غيرت اسمى

المهم الحمد لله ان الزملاء افادوكى و ان شاء اله تقضى إجازة سعيدة

و زى ما قال احمد سيف انتى المفروض تدلينا على اماكن لان كل اللى روحتيه انا مرحتوش هو اصلا القاهره الواحد راحها 3 مرات و الاسكندرية مرة و رجع مخنوق و مش طايق نفسه(من الزحمة)

اطلع برة التوبيك بقى قبل ما ييجى حد يموتنى :D

و انت يا زوهيرى اول مرة اعرف انك بتنزل مصر انا فاكرة انك نسيتها يا شيخ و معادتش قد المقام :wub:

[MZohairy]

هو فيه احلى ولا اطعم ولا الذ من مصر يابنتي؟

[pink rose]

ما شاء الله عليكي انتي كمان عارفه زنقة الستات لالالالالا دا احنا لازم نتعرف ببعض

اصل اختك واخدة الدكتوراة في زنقة الستات اكتر مكان رحته في اسكندرية هي الزنقة بس بلاش تاخدي ابو عبدالرحمن هناك بجد لانها زنقة زنقة يعني :D :wub:

[الباشمهندس ياسر]

مسبتوش لينا حاجة نعرف نقولها يا جماعة الخير

عموما

ام عبد الرحمن ... تنورى بلادك

زوهيرى .... اول مرة اعرف انك بتحب ام عبد الرحمن كده

اخيرا

ابقى اطلعى المقطم بالليل ... منظر جامد جدا و الهواء هناك ملوش حل

كمان حديقة الازهر .. اعتقد هتبقى مناسبة جدا

اضيف بقى اضافة صغيرة ... نزلة السمان و تركبوا خيل بعد يوم شاق فى الاهرام

[محمد افندى]

هتشرفى مصر ان شاء اللة يا ام عبد الرحمن ان اول ما اشتركت فى المنتدى الرائع قريت بعض مشاركاتك وسعيد جدا بحبك لمصر

طبعا الاخوة الزملاء ما قصروا فى شى او بلهجتكم السعودية ما جصروا فى شى وعموما ما تنسيش تروحى السندباد وبانوراما حرب اكتوبر ودريم بارك وكوكى بارك وطبعا شارع جامعة الدول العربية ويا ريت تشربى عصير قصب من عند فرغلى ومتنسيش تدعى لى وزيارة موفقة ان شاء الله وطبعا اكيد هاتمرى على سينمات وسط البلد وبقترح تشوفى فيلم عمرو وسلمى واضح انه فيلم كوميدى وربنا معاكى وخلى بالك من عبد الرحمن اوعى يتخطف منك ونمثل مسلسل اين قلبى

[عطر الجنة]

تنورى مصر

كده يا جماعة تنسوا قلعة محمد على ومنطقة المساجد مثل جامع عمرو بن العاص و كرداسة عشان الجلاليب

و فى اسكندرية رحلات المراكب فى ميامى و سيتى بلازا و امامه التاون داون

و المتحف الرومانى و التمشية على كوبرى ستانلى و الكم لسان بحرى اللى قبله

الجو اليومين دول رائع فى اسكندرية لكن هاتى ملابس تقيلة لعبد الرحمن عشان بالليل الجو بيبرد شوى

مصر البيت بيتك

[mohamedadel]

السلام عليكم

الاخت الفاضلة مصرية الهوى هاتنوري مصر ان شاء الله و يا رب تكون اجازة سعيدة

بصي يا ستى بالنسبة لاسكندرية انتي قولتي هاتقعدي في هلنان فلسطين رائع طبعا دا في المنتزة على البحر مباشرة فندق جميل و ان شاء الله في الوقت دا يكون هادئ لان الوقت اللي هاتنزلي فيه وقت امتحانات

و هاتلاقي اسكندرية كلها هادية و لطيفة قبل ما يهجم الناس عليها في الصيف اه من الصيف و بلاويه و اللي بيجرى فيه

المهم فيه كمان في المنتزة قصر المنتزة و قصر السلامليك غير طبعا حدائق المنتزة الجميلة

و عندك المعمورة منطقة جميلة كمان و هاتلاقي التمشية فيها تحفة بجد

الفسح في اسكندرية اهمها طبعا التمشية على البحر وقت الغروب يا سلام يا سلام منظر رائع خصوصا لما تكوني على الشط من تحت مش من فوق الكورنيش المشي على الرملة دا حاجه تانية

في كمان عندك جرين بلازا مكان ترفيهي فيه محلات كتير لبس و دهب و اكل و كافيتيريات كتير و قهاوي لو رحتي هناك كلي من عند صابر رز بلبن بالايس كريم و الله يخليكي كلي واحد زيادة عشاني انا

جرين بلازا كمان فيها سينما

لو عاوزة تزوري اماكن بقى ليها علاقة بالتاريخ شوية هاتلاقي عندك قلعة قيتباي و هناك هاتلاقي برضة الاحياء المائية دول في منطقة بحري

طبعا الطريق المؤدي اللي القلعة هو طريق الكورنيش و انتي معدية هناك هاتلاقي على الناحية التانية من شارع البحر محل اسمه عزة دا بتاع ايس كريم من اشهر محلات الايس كريم في اسكندرية ابقى جربيه

في كمان عندنا في اسكندرية قصر المجوهرات دا قصر فيه جزء من مجوهرات اسرة محمد على باشا موقعه في جليم

في كمان الفورسيزون على البحر في منطقة استانلي دا فندق و مول كبير التمشية فيه لذيذة و طبعا مولات مصر بتختلف كليا عن مولات السعودية الدنيا عندنا هيصة كده و جميلة

في بقى منطقة وسط البلد اللي هي محطة الرمل دي منطقة كلها محلات زي روكسي في القاهرة كده و فيها سينمات كتير

دي الحاجات اللي جاية على بالي دلوقتي لو افتكرت حاجه تانية هاقولك عليها ان شاء الله

اما بالنسبة للساحل الشمالي دا هاتلاقيه فاااااااااااااااااااضي جدا دلوقتي لان السيزون بيبدأ نص شهر 6 كده لما الامتحانات تخلص و يبدأ الصيف اللي بجد بقى

و هناك هو المكان اللي هاتلاقي فيه طلبك بالنسبة لشالية خاص و حمام سباحة فيه بس في الوقت دا من السنة مش هاتتبسطي هناك لو نزلتوا في الصيف شوية الوضع هايختلف في الساحل الشمالي

مرسى مطروح خفيفة كده و لذيذة و البحر هناك تحفة بجد احلى بحر في الساحل الشمالي كله لون المايا مش قادرة اوصفلك لونه فيروز كده و تشوفي الرملة و انتي جوة البحر من نظافة المايا

مرسى طروح العشق التاني ليا بعد اسكندرية

المهم طولت عليكي بس لو رحتي ما تنسيش طبق الرز بلبن بالايس كريم بتاعي

و ربنا يسعدك و تقضي اجازة لطيفة و عبدالرحمن باشا يتبسط في مصر و يحبها زيك كده

بصراحة فكرتوني بمعشوقتي الأسكندريه

انا بس عايز اذكر بعض المطاعم زي بلبع بتاع المشويات في الدون تاون .. راااااهيب

سمك من عند راكودا et:( "الشاطبي على البحر"

ايس كريم عزه .. مكرم wst:: "بحري على البحر"

بيتزا وفطاير من عند دهب " سبورتينج على الترام "

أما انته يا أستاذ زوهيري نصيحك ملهاش حل عموما انا اول اجازه ليه حسمع كلامك وروح الحتت الجميله دي :amb: :lol:

وان شاء الله اجازه سعيدة

تم تعديل 10 مايو 2009 بواسطة mohamedadel

[مصرية الهوى]

واحد تاني ..ميرسي اوي ع اللينك هواللي كنت بدور عليه ..........

الساهر .. ميرسي .. انا كنت بسأل على منطقة الدبلوماسيين قريبة من الفورسيزون .. تقريبا لقينا شقة في عمارة هناك ؟؟وعايزاكو تقولولي عن المنطقة هناك .. والاماكن السياحيةالقريبة منها .....

ياريت والله تبعت الارقام اكون لك شاكرة .......

تيته فولااااااااااااااانة وحشاااااااااااااااااااااااااااااااااااني يا تيته والله .. بجد بجدبجد عايزة اشوفك لما ننزل وتبقى تشوفى حفيدك مش بيقولوا اغلى من الولد ولد الولد

طب قوليلي يا تيته على اماكن حلوة كنتي بتروحيها انتي وجدو ايام التلاتينات :lol: عشان نعيد الذكريات بقى ...

هبه ياحبيبتي معليش والله مخدتش بالي فاكراكي حتى بالأمارة كنتي بتسألي عن عملية الليزك واختفيتي بعدها :lol: يارب متكونش الذاكرة خانتني

الباشمهندس ياسر شكرا حديقةالازهروالمقطم من ضمن الجدول ان شاء الله .......

محمدافندي شكرا كثيرا .......

عطر الجنةميرسي والله فكرتني عشان اعمل حساب لوالجو برد .....

[مصرية الهوى]

محمد عادل ميرسي هابقى ابلبع من بلبع :lol:

أنا زعلانة منكو انا حاسه انكو ( مطفتوش ناري وبردتوا تاري )

[SoSo R]

صباحك فل يا جيجى....زعلانة ليه بس يا جميل ؟!

ما نقدرش على زعلك....أبدااااااا

بصى يا ستى إفتكرت لك شوية حاجات على الله تبرد تارك و تطفى نارك :happy:

فيه فى إسكندرية ...قرية عبد الوهاب للمشويات بصراحة رائعة و ديكورها زى الكهف...موجودة فى ميدان مش فاكرة أسمه!!!

فيه مطعم عروس البحر أكلات بحرية فى المرسى أبو العباس...رائع برضه

فيه حودة جندل...أسماك

عناب كلية الطب...إسكندرية برضه

فيه بقى إقتراح الداى يوز...باقترح عليكى فى فندق الواحة...نظامه شاليهات...موجود فى الهرم...وفيه بسين للأطفال...عشان الأستاذ عبد الرحمن يبلبط

لو ليكى فى الفطير المشلتت ...فى مكانين حلوين جدا

برج المنوفية

واحة عمر و دى جنب الريست هاوس...طريق مصر إسكندرية الصحراوى

ما تنسيش الكشرى....كشرى الحجاز فى ميدان الحجاز و عنده فطير شرقى بالسجق رائع...لو ليكى فى الرمرمة يعنى!!!

فيه بأة إقتراح أروع...جه فى بالى دلوقت

أبعتى لى تذكرة لمصر....و أنا آجى أفسحكم بنفسى

أصلك الصراحة شوقتينى للأماكن دى :wub:

كدة برضه يا جيجى!!!

تحياتى

سوسورانى

[shahd]

كده يا جيجي ما تفكريش تنزلي مصر غير لما ارجع انا :happy:

عموما يا ستي رحلة سعيدة ان شاء الله :D

[عبير يونس]

محمد عادل ميرسي هابقى ابلبع من بلبع :lol:

أنا زعلانة منكو انا حاسه انكو ( مطفتوش ناري وبردتوا تاري :rolleyes: )

ايش بك يا جيجي؟

كل هدا و ماهو مكفي؟

يا الله عليكي

شكلك مررررررررررررة طماعة هههههههههههه

دي الأماكن اللي الولك عليها عايزة سنة بحالها عشان تزوريها

و الحقيقة تلات أرباعها ما شفتهوش لأني اتربيت عندكو طول عمري لحد الجامعة

فلما كنت بأنزل مصر في الأجازات كانت الاجازة كلها بتروح في عزومات الأهل في القاهرة و برضه مع الأهل في المصيف و كان طبعا اسكندرية اللي عمري ما ارضى ببديل لها

و لا ساحل شمالي و لا غيره

اسكندرية مارية و ترابها زعفران

احلى مصيف في الدنيا

و طبعا الاجازة كانت بتخلص بسرعة

يعني هو بابا الله يرحمه ما كان بيقصر كانا بيفسحنا كتير برضه

بس على النمط السعودي مطاعم و مولات

يعني الفسح المكلفة

لكن الفسح المصرية الأصيلة مشفتهاش كتير

تعرفي أحلى حاجة في مصر ايه؟؟

ان المصريين بيعرفوا ينبسطوا حتى لو معهمش فلوس

يعني ياما ناس انبسطت بدرة مشوية و صميت على النيل

اذكر خالتي الله يرحمها و يحسن اليها

كانت عايشة في طنطا

و كان مستواها المادي متوسط

لكن لما كنا بنزورها في الصيف في بيتها

كانت بتبقى أحلى أيام

و كنت بانبسط اوي اوي عندهم

برغم ان بيتهم كان بسيط

و فسحهم شوية تمشية في شوارع طنطا ( و كان التاكسي لأي حتة بجنيه )

و ترمس و درة مشوية

و الشاي في البلكونة و ما ادراكي ما البلكونة مع النسمات العليلة ساعة العصاري اللي احلى من المكيف السبليت مية مرة

و السهرة على ما لذ و طاب من اصناف اللب و السوداني و الحمص الشهير مع التلفزيون

أو نقعد كل بنات العيلة نحكي مع بعض حتى الفجر

دي كانت أحلى أيام حياتي

و الذكريات دي هي اللي بأعيش عليها عشان اتحمل الغربة

السعادة دي لا يمكن نوصل لها مهما كان معانا فلوس و رحنا مطاعم و مولات

هيا دي مصر يا عبلة

هههههههه قصدي يا مصرية الهوى

اتمنا لك تنبسطي في مصر بجد

و ترجعي بذكريات ما تنسيهاش

تحياتي

تم تعديل 13 مايو 2009 بواسطة مصرية متغربة

[MZohairy]

لو ربنا كتبلكم السلامه و النجاه بعد ما تروحوا المشاوير اللي قلتلكوا عليها ابقي قوليلي و انا اديكي حتت تانيه :rolleyes:

[حسام يوسف]

انا عندي أوبشن أو اقتراح لحضرتك

يمكن الجو يكون بقى حر

لكنه برضة حل ظريف

وشاعرى ويناسب الهنى مون

وذكريات حلوة جميلة

كروز بين اسوان والاقصر

3ايام

و4ليالي

اقامتك فى السفينة

النيل حواليكي من كل حتة

ونيل نقى ومحترم ونضيف مش زي وجه بحرى

جبال

ونخيل

وأماكن اثرية

ومعابد

وأماكن تصوير أفلام

الحقيقة العارية

ومافيا

وعن العشق والهوى

وغيرها م الافلام

تصحي مع شروق الشمس

والفجر بشقشق

والنور لسه ضعيف محمر على برتقانى

و الغروب اللى كله معانى وشجن

وجزيرة النباتات وتحسي انك فى بلد استوائية م اللى بتشوفيهم فى الافلام

وتاريخ

واثار

وحفلات سمر كل يوم ع المركب

من كل الجنسيات

ناس جاية من كل حتة

عشان تفرح وتنبسط

وتغسل هموم وعمل سنة كاملة فى حياتهم

لو اللى بقوله ده يناسب حضرتك

انا تحت أمرك

وممكن أحجزلك كروز وبسعر خاص من اصدقاءنا هنا

وصدقيني هيبقوا 4 ايام ما يتنسوش

تم تعديل 14 مايو 2009 بواسطة حسام يوسف

[هشام عباس]

ياريت استاذ حسام تدينا فكره عن الأسعار بجد احسن الواحد بقاله سنتين منزلش اجازه

وعاوزين حقيقي نغير موضوع اسكندريه والساحل في كل نزوله

وانا فعلا مزرتش صعيد مصر الا مره واحده في حياتي وانا لسه في اعدادي بس لا رحت اسوان ولا الأقصر

انا رحت قنا وكان مشوار عزا

بس الكلام الي قلته سيادتك فتح نفسي اوي على الأجازه

ياريت تفاصيل اكتر ازاي نحجز ومنين وبكام

بالتفصيل لو سمحت

ولك تحياتي

[Falcon Crest]

[

أنا زعلانة منكو انا حاسه انكو ( مطفتوش ناري وبردتوا تاري :blink: )

بصي حضرتك انا جمعت لحضرتك كل الي الاعضاء قالو عن القاهره لاني زيك معلوماتي شويه ضعيفه مع الاعتذار للاخت كليو و بافي الاعضاء

شارع قصر النيل

------محل "بوردا" ولو انه غالى حبتين بس أقمشته هايلة وشيك جدا...

قبل ما توصل ميدان مصطفى كامل على ايدك الشمال هتلاقى محل أحمد عطية ممكن تدخل تضرب طبق بسبوسة بالقشطة ويمكن تشوف الفنان رأفت فهيم هناك لأنه زبون المحل ده

شارع شريف، فيه هناك محل اسمه "فيليه" بيعمل وجبات مش بطاله والمحل نفسه نظيف جدا من الداخل. المحل ده وانت قاعد فيه تقدر تشوف يافطة عيادة الدكتور "عادل صادق" الله يرحمه

لو عملت ريفيرس بقى بضهرك لحد شارع 26 يوليو وبصيت على الناصية التانية هالتاقي في ضهرها مُجمع مطاعم وقهاوي وحتة كده لها طابع مُميز للمشاة فقط .... وكُل براحتك .. ليك في الفتة ولحمة الراس والحاجت دي .. هاتلاقي ... عايز فراخ مشوية وكبدة بانيه برضوا هاتلاقي .. ولو كنت مُدمن حواوشي زي حالاتي يبقى عليك وعلى " شلبي " اللي متخصص في الحواوشي فقط وتاكل رغيفبـ 3 جنيه مع واحد " سبورت " أموت وأعرف هو مقاطع المنتجات التانية دي ليه ؟ وجنبه برضوا محل كشري لو عايز تنام خفيف ... ولو مالكش في ده كله يبقى هاتلاقي هناك فول وفلافل " أخر ساعه " برضوا هاتضرب ساندوتشات على الواقف من الزحمه الجامدة اللي هناك ...

لو انت جاى وسط البلد من الشرق (مصر الجديدة ومدينة نصر) أفضل وأسرع طريق هو عن طريق نفق الأزهر اللى ياخدك من أول الدراسة من عند مشيخة الأزهر تفضل ماشى فى الأنبوبة المتعرجة ذات الضوء الاصطناعى المنخفض.. لحد ما يبتدى نستوى الأرض فى الارتفاح وتلاقى نور مبهر بيزغلل عينيك وفجأة تلاقى نفسك فى ميدان الأوبرا...

ميدان واسع جدا وأول حاجة هيقع عليها نظظرك المبنى القديم المتهالك لفندق الانتركونتننتال التاريخى (القديم مش سميراميس اللى على الكورنيش). لو بصيت على يمينك هتلاقى تمثال عظيم فى وسط حديقة مستديرة لإبراهيم باشا وهو راكب حصانه وبيشاور بصباعه (عشان كدة الناس سمت التمثال ده إبراهيم باشا أبو أصبع).. لو بصيت كويس على مكان ما بيشاور ابراهيم باشا هتلاقيه بيشاور على شارع عدلى.. طبعا مش هتقدر تكسر كلام الباشا وهتدخل فى شارع عدلى (او انت لسة فى مطلع النفق يبقى كل اللى عليك انك تمشى طوالى تلاقيك فى شارع عدلى)

شارع عدلى من أنظف شوارع وسط القاهرة وأكثرها نظاما (طبعا الركنة هناك لعنة فأحسنلك بعد ما تطلع من النفق تلف الصينية وتدخل تسيب عربيتك فى جراج الأوبرا وتقضيها كعابى بعد كدة ).

تمشى شوية هتلاقى على ايدك اليمين ممر الكونتننتال لو دخلته هتلاقى محلات الاكسسوارات الحريمى واكسسوارات الخياطة ومحلات ملابس حريمى و أحذية وحلوانى وفى منتصف الممر ده (هو عبارة عن ساحة مش ممر طويل) هتلاقى تمثال ذهبى لرأس جمال عبد الناصر (غالبا هتلاقى الناس رامية عليه قمامة ومخلفات ورق وكأنهم فى رمى الجمرات )

أخر الممر ده يوصلك على شارع 26 يوليو (شارع فؤاد سابقا) ولو كملت شمال توصل لحد دار القضاء العالى وتقرا الفاتحة للقضاة المصريين بص.. شارع 26 يوليو على قد ما كله محلات ملابس سعرها اقتصادى جدا جدا، على قد ماهو خنيق... تعالى نرجع شارع عدلى تانى...

رجعت شارع عدلى امشى يمين هتلاقى مبنى قديم عليه نخلتين ونجمة داوود ده واحد من أشهر المعابد اليهودية فى القاهرة وبيجوله الحجاج اليهود من اسرائيل وممكن تشوفم بملابسهم السوداء وذقونهم وضفايرهم .

بعد المشوار السخن ده تعالى ندخل "لا تشيزا" واحد من فروع سلسلة المطاعم السويسرية (شانتييه ولو شاتو ولو شاليه..إلخ) ده كافيه ومطعم سويسرى بيقدم مشروبات وأكلات من المطبخ السويسرى و الفرنساوى والإيطالى بس جميل جدا (لو دخل عليك وقت الغدا جرب واحد فيتوتشينى وادعيلى )

لو مستغلى لا تشيزا شوية كمل كمان على نفس الرصيف لحد أخر الشارع عند تقاطع عدلى مع طلعت حرب (سليمان باشا سابقا) أييييوة.. أول ما تلاقى سينما ميامى قدامك بس أوعى تدخل سينما ميامى هتلاقى أكسلسيور ممكن تدخل تاخد شاى وجاتوه أو سندوتش لسان

الحقيقة وسط البلد بالنسبة لي من الأماكن ذات النكهه الخاصة بمبانيها و جوها الخاص و اللي مجرد التمشية فيها له سحر خاص لا يقاوم ... و طالما إحنا في وسط البلد في حصة غدا ... فإسمحي لي أضيف " أبو طارق " الأشهر علي الإطلاق في الكشري و اللي بيعتبر بجد تجربة مستقلة بذاتها في مجال الأكل الشيعبي ... و يا سلام لو تضرب لك سلطانية من أم خمسة جنيه بس في الدول التحتاني ... طعم تاني للكشري لم يختبر من قبل .

أما بقي لو رحت شانتييه حسب أوامر كليو ... فطبعاً بعد ما تطلع منه مش ح يتبقي في جيبك غير إتنين جنيه و ربع و بالتالي لازم تخطط كويس للحركة القادمة تفادياً لغسل الصحون ... و وقتها ما فيش أحلي و لا أحمل من القعاد علي النيل في أكثر أماكنه تميزاً أمام النيل هيلتون - في وسط البلد برضه - و تضرب لك واحد حمص الشام او كوز درة مشوي أصلي .... و يا سلام لو ليك في المغامرات تاخد لك فلوكة أو مركب شراعي ساعة العصاري لتري من ناحية النيل قاهرة أخري غير التي تعرفها .

في وسط البلد برضه هناك بعض الزيارات الإعتبارية العبقية ... و منها قهوة ريش الشهيرة ملتقي كثير من أهل الأدب و هي في شارع سليمان باشا ( سابقاً طبعاً علشان كليو ما تزعلش ) بس بلاش تروحوها بالليل قوي أحسن بتقلب أنس و دانس خالص .

لو جعتوا تاني ... عندك منطقة باب اللوق و دي فيها خيارات كثيرة و منها الحاتي ( إسمه كده ) و هو الأصل طبعاً بس ( نوت إني مور ) و لكنه مازال محتمل بالإضافة إلي مجموعة من مطاعم الكبدة و المخ و جميع الأكلات الأخري .

و من المعالم المهمة التي تستحق الزيارة بالفعل هي المتحف المصري في ميدان التحرير ... فقد لا تتحمس للفكرة في الأول متخيلاً إنك مشبع بالمعلومات الفرعونية ... و لكن بالتأكيد بعد الزيارة ح تغير رأيك تماماً بعد حالة الإبهار ( التي ستعتريك ) .

يتبع...

Hussein

طبعا لو رحت الحسين مايفوتكش الحمام المحشى بتاع فرحات

و لو حضرتك من هواه الكوارع و الفشه و الكرشه و خلافه عليك و ع العهد الجديد

هواه الساندوتشات برضه لهم مكان ف مصر القديمه بس مش ف الحسين

انما ف الحسينيه عند بوابه الفتوح حيث زيزو النتن - على فكره هوه اسمه كده - و بابا عبده

عشاق الكباب و الكفته و المشويات

انما فيه حتة بحبها وحابة احكيها بعد اذنك يعنى انا اسكندرنية بس الحسين عشقى

بعد ما تطلعى الكبرى وتوصلى للحسن تنزلى من النفق وتروح على الفشاوى

تقعدى جنب حد بيشرب شيشا وتشمى هواء شيشا التفاحة وصوتها المنتظم الرتيب

والقهوجية بتجرى حواليك تسالك وفى ايد صنية والتانية كرسى بيودية لزبون

انا شخصيا بحب السحلب والحلبة الحصا والشاى الاخضر بالنعناع

والبياعين تعدى عليك الى معاه محافظ والى معاه مناديل وزمان كان فية ست مكحلة عنيها جامد وعجوزة اوى قاعدة على الكنبة الخشب الى جنب ممر صغير على اخر الفشاوى تديها فلوس تدعيلك وتديك بمبونى

وبعد ما تلخص تمشى يمين فى الشوارع الضيقة تتفرج على الذهب والاحجار التى تصاغ بمهرة عالية جدا

وبعدين خلى الشارع هو الى يمشيك وانت ماشى على طول يحود يمين ادخل يحود شمال مش مشكلة حتشوف الى بيعملوا الاطباق النحاس بالزميل وحتعدى على قهوة نجيب محفوظ وجنبها بتوع الحلى تقليد للفرعونى وللكردان الفلاحى وحتلاقى الى بيبيعوا مخلفات القصور من ابواب وتماثيل وصناديق

وتمشى لحد ما يقابلك الشارع الى فية محلات الذهب العادية او سوق الذهب

من نقطة خروجك حتلاقى امامك محلين للفضة القديمة الى بتيجى من الوحات فى اشولة

انا بادخل المحل واقلب لحد ما الاقى شوية حاجات تعمل لها نص كيلو ولا حاجة واجبها مع ان بيبقى نفسى اخد المحل كلة لو انت زبون ليك فى الفضة اوى يطلعك فوق وتدعبس برحتك

تدخل يمين وانت فى شارع الدهب الرئيسى توصل للدرب الاصفر وتدخل بيت السحيمى

كانك فى دنيا تانيا

مفيش صوت الشارع حابقى اوصف لكم البيت بتوضيح اكبر

كفاية دة النهاردة

Gameet Eldowl

و اذا ذهبت الى جامعه مايفوتكش تضرب عصير من فرغلى

[حسام يوسف]

ياريت استاذ حسام تدينا فكره عن الأسعار بجد احسن الواحد بقاله سنتين منزلش اجازه

وعاوزين حقيقي نغير موضوع اسكندريه والساحل في كل نزوله

وانا فعلا مزرتش صعيد مصر الا مره واحده في حياتي وانا لسه في اعدادي بس لا رحت اسوان ولا الأقصر

انا رحت قنا وكان مشوار عزا

بس الكلام الي قلته سيادتك فتح نفسي اوي على الأجازه

ياريت تفاصيل اكتر ازاي نحجز ومنين وبكام

بالتفصيل لو سمحت

ولك تحياتي

انا تحت أمر حضرتك

بس فيه نقطة للتوضيح

الكروز 3 أو 4 ايام بس

مش اجازة طويلة يعنى

الحاجة التانية الجو برضة حر لأننا دخلنا فى الصيف

لكن طبعا السفينة مكيفة

الجولات هتبقى حر شوية طبعا

وبخصوص تفاصيل الحجز

انا تحت أمر حضرتك

قوللى حضرتك عايز الموضوع امتى

ولكام فرد

وانا تحت أمرك وراسلني ع الخاص بالتفاصيل

وان شاء الله الاصدقاء يجيبولك أحسن الاسعار :lol: