موقف غريب

[عنبو]

انا الشركه اللى انا شغال فيها مافيهاش مصرى الا انا والباقى كله اما فلسطنين او اردنينين من اصل فلسطينى

من يومين كده جه واحد مهندس جديد اردنى برضه من اصل فلسطينى معانا المكتب والولاد اللى معايا مش عارفينه لانه هو من عمان لكن هما من منطقه اسمها اربيد يعنى مثلا محافظه غير المحافظه وعمرهم ما شافوا بعض الا هنا فى جده لقيت الكل بيرحب بيه ترحيب كبير والكل بيسال عليه وبيعرض عليه خدمات وبعدين اتفقوا مع بعض انهم يرحوا له على الفندق اللى الشركه حاجزه له فيه علشان ياخدوه ويطلعوا يتفسحوا وكل يوم واحد فيهم بيوصلوه بعربيته لحد الفندق ويطلعوا معاه علشان مش يحس بالغربه ومش يحس انه لوحده

سبحان الله نفس اللى حصل معايا بالظبط اول لما جيت !!!!!!!!!!!!!!!!!!!!!!!!! يلا لينا عند ربنا

[Ahmed Unknown]

حضرتك مذكرتش اللى حصل معاك بالظبط !!!

انا شايف اللى حصل مع زميلك الاردنى ده عادى جدا و بنعمله مع كل زمايلنا و اصدقاءنا المصريين و حتى اللى منعرفهمش قبل كده

يمكن حضرتك محدش اهتم بيك و عمل معاك كده عشان زى ما قلت انك المصرى الوحيد و طبعا محدش بيهتم اوى بواحد ميعرفوش و مش من بلده

اما بقى لو كان ليك اصحاب او معارف مصريين و محدش فيهم عبرك ف هيه دى بقى المشكلة

عموما لو ده حصل يبقى العيب فيهم

و اتأكد ان زى ما فى ناس وحشه فى ناس اكتر منها كويسة

انا عن نفسى شايف ان الناس الحلوة هيه الحسنه الوحيده فى مصر

و موضوع عمل الواجب و الجدعنه الناس التانية اتعلمت الحاجات دى مننا

[جيمي]

الموضوع ده قتل بحثا وتمحيصا .............سواء المصرين وحشين فى الغربه ولا حلوين .....يا جماعه كل واحد يعمل باصله وخلاص

[عنبو]

انا الحمد لله لما جيت جيت على اقاربى وهما بجد ناس تمام اقوى والحمد لله قاموا بالواجب وذياده وانا مكنتش مستغرب ده لان اساسا علاقتنا ببعض مافيهاش حاجه اسمها واجب عادى خالص كلنا بنعامل بعض على اننا واحد

لكن لما رحت استقريت فى الشغل فاخدت سكن مع ناس مصريين هو ده اللى انا بتكلم عليه وكلهم بيقولوا احنا اول لما جينا هنا حصل معانا كذا وكذا هو انت لسه شفت حاجه هنا المصريين وحشين ده كلامهم طبعا اساسا انا الحمد لله مش عاوز حاجه من حد ومش لازميلى حد علشان اقاربى اساسا مش مقصريين !!!! بس انا بتكلم كمشكله عامه يعنى لو فيه واحد محتاج ظروفه وحشه ؟؟ كان هيعمل ايه ؟؟ بس

وبعدين انا اول لما جيت الشركه دى ومع انى المصرى الوحيد برضه الناس رحبوا بى جامد ومش قصروا في اى حاجه وبعدين فيه شركه اللى فى الدور التانى لينا برضه تتبع المجموعه وكلها مصريين كنت اطلعت عندهم سلمت عليهم واقالولى هنبقى ننزل ومنزلوشى لحد دلوقتى الكلام ده يمكن من شهرين ؟؟ على العموم انا اساسا مش لازملى حد الحمد لله بعرف اتعامل يعنى بس انا بتكلم هو ليه احنا كده بس !!!!!!!!!!

[عنبو]

على فكره انا طبعا مش اقصد كل المصريين فهذا المنتدى مليىء بشخصيات ترفع لها القبعه ولذالك انا مش عاوزكم تاخدوا كلامى بمحل التعميم وشكرا انا بتكلم عن مواقف شخصيه بس طبعا زى لما فيه شخصيات حلوه فيه شخصيات وحشه لكن انا اللى اقصدته من كلامى ان ممكن الدنيا تلهينا عن بعض فكلامى للتذكره !!

[mffaswan]

من كان في معية الله .. سيّر الله له في طريقه اناس طيبون .. عامل تعامل !

ده بأختصار ..

أنا في شغلي فيه مصريين و فيه اردنيين و فيه عراقيين و أجانب و صوماليين و سعوديين .. و مع ذلك الحمد لله أجد كل الترحاب و المودة منهم جميعاً .. و كلهم بيعرضوا عليا خدماتهم .. على اختلاف جنسياتهم ..

بأختصار

كن مع الله .. يكن الله معك

[عندى أمل]

بالإضافة للأدعية اللى الأخوة و الأخوات ذكروها و كمان الصلاة و باقى الأفكار التانية للخروج من حالة الحزن و الضيق فيه كمان حاجة تانية مهمة جدا

الإستغفار

دى طريقة عرفتها من بعض الأخوة و الأخوات الأفاضل

لما أحس بحزن أو ضيق بأستغفر الله سبحانه و تعالى على الأقل مائة مرة أو افضل أستغفر لحد ما احساس الحزن و الضيق يروح

و الحمد لله بأحس بسكينة و إطمئنان بعدها و عشان كده كل يوم بأستغفر الله سبحانه و تعالى مئات المرات حتى قبل ما أحس بأى حزن أو ضيق و الحمد لله إحساس الحزن و الضيق راح

[ghnammar]

يا أخى احمد ربنا انه ليس معك مصريين دى نعمه كبيرة اوى ده هما عاملين فى الغربه زى الوحوش بياكلوا فى بعض وانا ومعى كتير من الزملاء تعاملنا مع كل الجنسيات فى الغربة وكلهم كويسين مع بعض الا المصريين وتلاقى دلوقتى كل واحد سعودى جايب اتنين تلاته مصرييين عاملهم مديرين وكل همهم اذية المصريين اللى زيهم وعدم اعطاؤهم المشتحقات بتاعتهم علشان كده انا دايما بسأل عن رئيس القسم لو جالى عقد عمل لو لقيته مصرى برفض العقد مع اعتذارى لبعض الاخوة الافاضل فى المنتدى اللى هيزعلوا بس احنا لازم ندور عن ايه سبب الموضوع ده ونبطل ندفن رؤسنا فى الرمل

[se_ Elsyed]

يا أخى احمد ربنا انه ليس معك مصريين دى نعمه كبيرة اوى ده هما عاملين فى الغربه زى الوحوش بياكلوا فى بعض وانا ومعى كتير من الزملاء تعاملنا مع كل الجنسيات فى الغربة وكلهم كويسين مع بعض الا المصريين وتلاقى دلوقتى كل واحد سعودى جايب اتنين تلاته مصرييين عاملهم مديرين وكل همهم اذية المصريين اللى زيهم وعدم اعطاؤهم المشتحقات بتاعتهم علشان كده انا دايما بسأل عن رئيس القسم لو جالى عقد عمل لو لقيته مصرى برفض العقد مع اعتذارى لبعض الاخوة الافاضل فى المنتدى اللى هيزعلوا بس احنا لازم ندور عن ايه سبب الموضوع ده ونبطل ندفن رؤسنا فى الرمل

طب بما ان حضرتك مصري ... فهل تُصنف نفسك وحش من ضمن المصريين الوحوش الكاسرة ... ام انت دائماً ضحية ؟

وتلاقى دلوقتى كل واحد سعودى جايب اتنين تلاته مصرييين عاملهم مديرين وكل همهم اذية المصريين اللى زيهم وعدم اعطاؤهم المشتحقات بتاعتهم علشان كده انا دايما بسأل عن رئيس القسم لو جالى عقد عمل لو لقيته مصرى برفض العقد مع اعتذارى

طب هل فكرت مره بالعقل هل هناك شروط معينة توضع في الانترفيو لهؤلاء المديرين حينما يتم اختيارهم كأن يكون الشخص ذو سوابق او قتال قُتله او له انياب ؟ عشان يتأكد صاحب العمل انه ظالم ويأكل حقوق الناس ؟

ويا ترى مالقيتش مدير تاني بياكل حقوق الناس ... ولا كلهم بيأكلوا الناس في بؤهم ويدوهم حقهم تالت ومتلت ؟

وعشان كده تلاقي مكتب العمل مليان شكاوى بالالاف .... ضد المديرين المصريين ... تتفق معايا على كده ؟ :lol:

------------

فيه شركه اللى فى الدور التانى لينا برضه تتبع المجموعه وكلها مصريين كنت اطلعت عندهم سلمت عليهم واقالولى هنبقى ننزل ومنزلوشى لحد دلوقتى الكلام ده يمكن من شهرين ؟؟

طب لماذا لم تبادر انت بالسؤال عنهم ؟

ايوه يعني ليه دايماً نحب نعيش في دور الضحيه وان الناس هما اللي لازم ياخدونا يفسحونا ويعزمونا ويشممونا الهوا ؟

اقسم بالله والله على ما اقول شهيد انني عندما اتيت لهذا البلد كانت شركتنا فيها 80 % مصريين وسكن العزاب لوحده كان لا يقل عن 8 شقق كل شقة فيها ما بين 4 الى 6 اشخاص وكلنا في دور واحد للمصريين وكانوا جميعاً في منتهى الرجولة

وطبعاً لا كان معايا انا والمجموعة المستجدة - 35 واحد من مصر بس - اللي جايه لا كان معانا عربيه ولا نعرف منين يودي على فين

بالمناسبة اللي ما يعرفش السعودية ممكن نقوله ان مش كل المساجد هنا بيتصلى فيها الجمعة .. وبالتالي ممكن تلاقي المسجد الجامع على بُعد 3 كم ...

وكان زمايلنا دول متكفيلن انهم يودونا المسجد ويجيبونا ويودونا المطعم نجيب اكل لان المطعم كان بعيد وكل ده بمنتهى المبادرة

بالاضافة الى تعليمنا في الشغل طبعاً

تفتكروا دي صدفه مصادفة صدوفه ولا دول مصريين ياباني واللي انتو بتشوفوهم جميعهم وحوش كاسرة هما تقفيل تايواني ؟

[doha]

عادي جدا ان يكون في الغربة مصريين اندال مع اننا كمصريين مش كده وبرضه عادي جدا ان يكون في مصريين جدعان اوي مع اننا برضه كلنا مش كده ..

اقولك بقى اللخبطة جايه منين ..

ببساطة لأننا في مصر فئات وطبقات او بمصطلح اوضح.. احنا في مصر بيئات .. والبيئات دي مكشوفه لنا لما بنكون هناك بدون تغطية وبدون رتوش ..

لما بتكون في مصر عارف ان فلان ده مش كويس لانه من المنطقة الفلانيه الي اهلها مشهورين بكذا او العكس .. انا مش بقول مثلا ده بحراوي يبقى كذا وده طنطاوي يبقى كيت وكيت .. لاه .. لكن كلنا مثلا في طنطا عارفين ان سكان منطقة كذا صفاتهم كذا فمبنستغربش ابدا تصرفات الندالة من البعض والاهم مبننتظرش احسان من غير اهل الاحسان ..

حتى لو مش عارف فلان ده عايش فين ولا جاي منين يكفي انك تشوف لبسه او لهجته في الكلام عشان تعرف تحطه في تصنيفه المظبوط وتلقائيا هتلاقي نفسك اما متوقع منه خير او ( غاسل ايدك منه ) ..

صحيح القاعده دي مش ثابته دائما وياما الهدوم بتخبي زي مابيقولوا لكن هي اجمالا تصلح للتطبيق اكثر من استحقاقها للتجاهل ..

مشكلة الغربة بقى ان كله سايح على بعضه .. انت ممكن تكون من القاهرة مثلا وتقابل واحد من المنصورة او تكون من الصعيد وتقابل واحد من الاسكندرية .. للاسف انت متعرفش عن فلان ده غير انه مصري بس لكن معندكش فكرة المنطقة دي في ( بلدهم ) اهلها شكلهم ايه ..

كلهم هنا لابسين زي بعض وبيتكلموا زي بعض وصعب انك تفرق غير لما تحتك احتكاك مباشر بالي معاك ..

وبناء عليه توقع جدا انك تلاقي ندالة منقطعه النظير من البعض لان هو ده خلقته كده وبيئته وتربيته كده .. هيختلف عنهم ليه ؟

وبرضه توقع الشهامه وجدعنه ولاد البلد من فلان لانه هو عاش في مصر كده وهيعيش هنا كده وهيموت برضه كده .. سلو بلدهم كده ..

وعلى فكره نفس سبب اختلاط الامكان والاشخاص ده هو الي بيخلي بعض المصريين هنا بيوفروا موت وبعضهم بيبذر موت .. السبب مش اننا مصريين وبنعيش بنمط ( مصري ) وانما لان كل واحد بيعيش هنا بامتداد معيشته السابقة في مصر .. سواء بيعيش في نفس المستوى او قريب منه او حتى بيحاول يتسلق ويطلع مستوى تاني كان محروم منه وجات له الفرصة الي حلم بيها عشان يلحق بالمستوى ده ..

عادي ( تيك ات ايزي )

وبالمناسبة مرة قريت في النت في احد المنتديات السورية شكوى من واحد سوري لواحد سوري تاني بيكلمه وبيقوله ان الكفيل مطلع عينهم وان الي مصعب عليه الموقف اكتر هو المدير ( السوري ) الي بيجامل الكفيل على حساب ابناء بلده .. يعني كلنا في الهم عرب احنا بس الي واخدين بالنا من نفسنا وغاويين جلد للذات ..

[عبير يونس]

من كان في معية الله .. سيّر الله له في طريقه اناس طيبون .. عامل تعامل !

ده بأختصار ..

أنا في شغلي فيه مصريين و فيه اردنيين و فيه عراقيين و أجانب و صوماليين و سعوديين .. و مع ذلك الحمد لله أجد كل الترحاب و المودة منهم جميعاً .. و كلهم بيعرضوا عليا خدماتهم .. على اختلاف جنسياتهم ..

بأختصار

كن مع الله .. يكن الله معك

كلام حصرتك صح 100%

و دعوة أمهات زمان مكدبتش لما كانوا يدعو لنا

ربنا يوقف لك ولاد الحلال

فعلا و الله ربنا سبحانه و تعالى هو اللي بيرزقنا بناس تساعدنا

و هو أيضا اللي بيكفينا شر الحاقدين

و على فكرة عن تجربة جامدة و حيث انني كنت في الغربة مع والدي و والدتي رحمهما الله

قبل ما أكون فيها مع زوجي و أولادي

بصراحة

كل الجنسيات فيها اللي بيؤذوا بعضهم و بيعملوا في بعض مقالب شنيعة و اسافين بالهبل

بس ما بيبنوش للي حواليهم و كله من تحت لتحت

و لا يمكن يوضحو لك ده الا إذا كنت قريب منهم اوي و ارتاحوا لك خاصة لو كنت من النوع اللي في حاله و مالكش دعوة بقالو وقلنا

مشكلتنا احنا سببها حاجة من اتنين

اما ان احنا فضحيين زيادة عن اللزوم

أو صرحاء فوق العادة يعني مبننافقش حد و مبنضحكش في وش اللي مزعلنا و بناخد منه موقف واضح

و أنا اعتقاد ان الأغلبية من النوع الثاني

و ده ميزة مش عيب

هو بس بيتاخد علينا بره مصر و بيقولوا ما بيحبوش بعض

الانسان المصري من أكثر الشعوب صراحة و وضوح

و صراحته أحيانا بتصل لحد الوقاحة

مبيعرفش يداري مشاعره

أو يمكن مش شايف داعي انه يخبيها

بالإضافة لنزعة العصبية القبلية ( بلدياتي)

و دي بتبقى واضحة جدا في الغربة

فعلى سبيل المثال لا الحصر

بتوع المنصورة ( أجدع ناس) بيحبوا يخدموا بعض اوي اوي اوي

و بصراحة كمان بيخدموا غيرهم كمان

بس بلدياتهم رقم واحد

الموضوع ده في الغربة كتير مبيفهموهوش و على طول بيعتبرونا وحشين مع بعض

انا دائمة التوضيح بشأن هذا الموضوع

و مرة أفحمت جماعة باكستانيين كانوا بيستغربوا من مشاكل مجموعة من المصريين مع بعض

و قلتلهم

انتو في نظرنا باكستانيين على هنود على بنجالة كلكم شعب واحد

لكن الواقع غير كده

انتوا بتميلوا للناس اللي من نفس البلد اللي انتوا منها

احنا كمان من 26 محافظة في مصر

و كمان بلديات نفس المحافظة بيميلوا لبعض و بيخدموا بعض

طبعا كلامي ده مجرد تقرير حقيقة

و ده مش معناه أبدا موافقتي على العصبية القبلية دي

و كل مصري بالنسبة لي مصري

و لا عمري افرق بين بلدياتي و غير بلدياتي خصوصا لو حد عايز مساعدتي

هي الفكرة بس ان الناس بتنسجم مع الناس اللي من نفس المكان و بيبقى بينهم حاجات مشتركة و بيفهموا بعض أكتر

و الواحد لو فهم طبيعة اللي قدامه بيحصل انسجام و بتقل فرص حدوث سوء التفاهم

يعني حاتكلم على تجربتي كعائلة فروعها في الشرقية و طنطا

و عن نسايبنا و منهم زوجي العزيز :rolleyes: من المنوفية

طبيعة الشراقوة مختلفة عن المنايفة

و أكتر سوء تفاهم بيحصل

ان المنوفي اللي في قلبه على لسانه و مبيزوقش الكلام

و الشرقاوي بيطلب توضيح لكل عبارة قلتهالو و على لسانه فورا : قصدك ايه؟

عشان كده سهل جدا ياخدوا موقف من بعض

و بتبقى على حاجات هايفة جدا

و اسألوني انا

ايام و ليالي على بال ما وجدنا وسيلة للتفاهم هههههههههه

المهم

في موضوع المصريين في الغربة

بلاش نكبر المواضيع اوي

و خلينا ايجابيين

كل واحد بيختلف عن التاني

انا لقيت ناس كتير اوي من مصر و محترمين جدا جدا فوق الوصف و خدموني خدمات يمكن اهلي ميعملوهاش

و كمان في ناس تانية للأسف ربنا يهديهم و يهدينا معاهم

و دول عمرهم ما نعتبرهم قاعدة

همة بيبانو لأن الوحش دايما هو اللي بيبان

و ده معناه ان القاعدة العريضة خير

لأن لو الشر هو الطبيعي مكنتش الجرايد باعت و لا كسبت من أخبار الحوادث و الجرايم

تحياتي

تم تعديل 12 مايو 2009 بواسطة مصرية متغربة

[عنبو]

يا أخى احمد ربنا انه ليس معك مصريين دى نعمه كبيرة اوى ده هما عاملين فى الغربه زى الوحوش بياكلوا فى بعض وانا ومعى كتير من الزملاء تعاملنا مع كل الجنسيات فى الغربة وكلهم كويسين مع بعض الا المصريين وتلاقى دلوقتى كل واحد سعودى جايب اتنين تلاته مصرييين عاملهم مديرين وكل همهم اذية المصريين اللى زيهم وعدم اعطاؤهم المشتحقات بتاعتهم علشان كده انا دايما بسأل عن رئيس القسم لو جالى عقد عمل لو لقيته مصرى برفض العقد مع اعتذارى لبعض الاخوة الافاضل فى المنتدى اللى هيزعلوا بس احنا لازم ندور عن ايه سبب الموضوع ده ونبطل ندفن رؤسنا فى الرمل

طب بما ان حضرتك مصري ... فهل تُصنف نفسك وحش من ضمن المصريين الوحوش الكاسرة ... ام انت دائماً ضحية ؟

وتلاقى دلوقتى كل واحد سعودى جايب اتنين تلاته مصرييين عاملهم مديرين وكل همهم اذية المصريين اللى زيهم وعدم اعطاؤهم المشتحقات بتاعتهم علشان كده انا دايما بسأل عن رئيس القسم لو جالى عقد عمل لو لقيته مصرى برفض العقد مع اعتذارى

طب هل فكرت مره بالعقل هل هناك شروط معينة توضع في الانترفيو لهؤلاء المديرين حينما يتم اختيارهم كأن يكون الشخص ذو سوابق او قتال قُتله او له انياب ؟ عشان يتأكد صاحب العمل انه ظالم ويأكل حقوق الناس ؟

ويا ترى مالقيتش مدير تاني بياكل حقوق الناس ... ولا كلهم بيأكلوا الناس في بؤهم ويدوهم حقهم تالت ومتلت ؟

وعشان كده تلاقي مكتب العمل مليان شكاوى بالالاف .... ضد المديرين المصريين ... تتفق معايا على كده ؟ :lol:

------------

فيه شركه اللى فى الدور التانى لينا برضه تتبع المجموعه وكلها مصريين كنت اطلعت عندهم سلمت عليهم واقالولى هنبقى ننزل ومنزلوشى لحد دلوقتى الكلام ده يمكن من شهرين ؟؟

طب لماذا لم تبادر انت بالسؤال عنهم ؟

مهو انا بادرت واطلعت ليهم وسالت عنهم وبعدين هو مين المفروض يسال على مين الغريب اللى ميعرفش حد واللى اللى بقاله سنين فى البلد وبعدين انا والله مش زعلان منهم واقولت فى نفسى يمكن مشغولين

ايوه يعني ليه دايماً نحب نعيش في دور الضحيه وان الناس هما اللي لازم ياخدونا يفسحونا ويعزمونا ويشممونا الهوا ؟

هو مين اللى هيفسح مين وبعدين انا مش عاوز اتفسح علشان اساسا اقاربى مش مقصرين بس انا بتكلم عموما

اقسم بالله والله على ما اقول شهيد انني عندما اتيت لهذا البلد كانت شركتنا فيها 80 % مصريين وسكن العزاب لوحده كان لا يقل عن 8 شقق كل شقة فيها ما بين 4 الى 6 اشخاص وكلنا في دور واحد للمصريين وكانوا جميعاً في منتهى الرجولة

وطبعاً لا كان معايا انا والمجموعة المستجدة - 35 واحد من مصر بس - اللي جايه لا كان معانا عربيه ولا نعرف منين يودي على فين

بالمناسبة اللي ما يعرفش السعودية ممكن نقوله ان مش كل المساجد هنا بيتصلى فيها الجمعة .. وبالتالي ممكن تلاقي المسجد الجامع على بُعد 3 كم ...

وكان زمايلنا دول متكفيلن انهم يودونا المسجد ويجيبونا ويودونا المطعم نجيب اكل لان المطعم كان بعيد وكل ده بمنتهى المبادرة

بالاضافة الى تعليمنا في الشغل طبعاً

تفتكروا دي صدفه مصادفة صدوفه ولا دول مصريين ياباني واللي انتو بتشوفوهم جميعهم وحوش كاسرة هما تقفيل تايواني ؟

لا مش صدفه وانا مقلتش ان كل المصريين وحشين بالعكس وبعدين انا دائما بيقول احنا 80 مليون اذا كان فيه مليون وحش فعندنا 70 مليون حلو وزى الفل مش ده اللى انا بتكلم فيه انا بتكلم لو ممكن نعمل حاجه للناس اللى جايه جديد ؟؟ بس يعنى انا مثلا ولله الحمد اقاربى هنا يعنى انا ليا اقارب فى السعوديه تقريبا زى اللى فى مصر بس انا بتكلم لو واحد جاى بطوله كان هيعمل ايه لما يلاقى الناس كلها منفضه وكله عامل نفسه فى حاله بس هى دى الفكره انا مش داخل اقول ان المصريين كلهم وحشين لا انا مصرى وبعتز انى مصرى وبحب المصرين كلهم والوطن العربى كله بس انا اقصد احنا ممكن نعمل ايه للناس اللى جايين جدد بس !!!!!

وبعدين انا الغرض من ذكر الموضوع ده التذكير والتنبيه لان احنا ممكن الدنيا تاخدنا وننسى الواجب المفروض علينا كاولاد نفس البلد

[elfakhrany]

الغربة زى الجيش بتقابل فيها ناس كتير وأشكال وألوان والحلو والوحش والنصيحة هى .... عامل الناس كما تحب أن يعاملوك

وزى الأستاذ شريف مابيقول ..خلص الكلام :D