إزاى أعمل محضر إثبات حالة فى السعودية

[msayed]

تعرضت لمشكلة فى الدمام وكنت محتار أعمل إيه

أنا ها احكى المشكلة بالتفصيل لأنها ظريفة

إستأجرت سيارة فى الدمام من مكتب للتأجير فى محطة القطار.

يوم العودة للرياض كان موعد القطار الساعة تسعة ونصف صباحاً.

ذهبت الساعة الثامنة ونصف لم أجد موظفين فى مكتب التأجير.

اتصلت بالأخ الموظف إللى أجر لى على موبايله، صحى من النوم وقال لى أبشر وطبعاً انا عارف إن أبشر دى زحلقة.

إتصلت بالشركة وحكيت له الموضوع قال لى إدينى رقم تليفونك وها أدق عليك.

المهم اتصالات منى وطناش منهم حتى لم يبق على موعد القطار إلا ثلث ساعة

قلت خلاص أنا أعمل محضر إثبات حالة فى غرفة الشرطة وآخذ مفاتيح السيارة وأركب القطار وإللى ليه حق يدور عليه.

دخلت غرفة الشرطة وكان فيها إثنين أمناء فحكيتلهم الموضوع وقلتلهم عاوز أعمل تقرير يثبت إنى رجعت السيارة وأن المفاتيح معى أو يستلموها هم أو أى حل.

قال لى الأمين: دق عليه وصيح فيه.

- يا عم دقيت عليه.

- دق عليه تانى وقول له الشرطة الحين عندها علم.

- طب مش ممكن نعمل تقرير رسمى علشان أمشى يثبت حقى.

- أبشر يا أخى طالما الشرطة عرفت ما فيش مشاكل، ولو تبى تترك المفاتيح نعطيها ليهم اتركها.

طبعا حسيت أنى بأذن (أو بأصيح) فى مالطا.

المهم إنى خرجت ومش عارف ممكن أعمل إيه

والحمد لله الموظف أتى قبل موعد القطار بحوالة خمس دقائق وسلمته السيارة.

فلو فيه حد عنده خبرة إزاى أتعامل مع المكتب فى هذه الحالة ياريت يفيدنى لأنى أتوقع أن يتكرر الموقف فى المستقبل كثيراً..

تم تعديل 11 مايو 2009 بواسطة msayed

[msayed]

لو ما حدش رد على ها أعمل لكم محضر إثبات حالة ومش ها ادفع ثمن الإشتراك فى المنتدى ..... وأبشروا.

[se_ Elsyed]

المحاضر وجع دماغ وهايتنفض لك ..

إنت تعرف إسم المكتب ممكن تروح أي فرع له وتسلم السيارة ..

إنما عشان تعمل محضر ممكن تتلطع ساعتين ولا حاجه ويكون الطفطف فاتك وتروح مشي ...

وأبشر وأنا أخوك ...

[msayed]

المحاضر وجع دماغ وهايتنفض لك ..

إنت تعرف إسم المكتب ممكن تروح أي فرع له وتسلم السيارة ..

إنما عشان تعمل محضر ممكن تتلطع ساعتين ولا حاجه ويكون الطفطف فاتك وتروح مشي ...

وأبشر وأنا أخوك ...

شكراً يا سى السيد بك على المشاركة فى التفكير.

والله الحل ده هو السهل الممتنع، صحيح أروح بدرى شوية لأى فرع وأسلم السيارة وأخلص منها.

بس بينى وبينك ممكن الشيطان بقى هو إللى بيوزنى أعمل مشاكل علشان الكسل واللامبالاة يتتعب نفسيتى جداً جداً.

وأشكرك مرة ثانية.

[Grendizer]

في الحالات إلي ذي دي لازم نستغل التكنولجي

صور فيديو ساعة محطة القطار الكبيرة بالموبايل و اتمشى لحد المكتب و صور إن مفيش حد موجود و ياسلام كمان لو تصور بتوع الشرطة

ممكن كمان تعمل أبلود للفيديو على يوتيوب في ساعتها لو عندك 3g و-account فيسبوك .

إثبات حالة ميخرش المياه

بس ربنا معاك لو إتمسكت!!

و ماتقولش grendizer قالي ...

أنا علعموم عملتها مرة في سجل مدني في القاهرة عشان كان الموظفين ماشيين بدري ساعة و مش عايزين يخلصوا الطلب بتاعي.. كلو خاف و نظام تحت أمرك يا بيه ، طب نتعرف، إنت تليفزيون؟

أنا سوقت فيها لحد أما أخذت حقي بالتمام و خلتهم يخلصوا كمان شغل مواطنين معرفهاش كانوا معايا...

قصة حقيقية! بس فيها مخاطرة

[se_ Elsyed]

ايه الحاجات دي يا عم جرنديزر ؟

الراجل في السعودية يا عم وانت عمال تقول له اعمل موقع عالبيك فوس وصورة ساعة المحطاة والكمسري والقطر وهو بيقول تووووت وبعدين ادمج ده كله في فيلم فيديو ومنتجه وروح للمكتب قول لهم عايز اسلم السيارة بدل ما افضحكم

لأ يا عم .. دي يروح يشتري سيارة بالتقسيط اسهل

ما تسمعش كلامه يا ميم سيد ....

واديك شوفت اسراء حصل لها ايه عشان فتحت مره البيس فوك وعملت اضراب ... البنت من ساعتها مش نافعه لا طبله ولا طار

[doha]

من وجهة نظري فاسلم حل مستقبلا عشان الموضوع ميتكررش انك تحاول تخلي سفرك في وسط النهار يعني في موعد تكون واثق ان قبله بساعه ولا اثنين على الاقل الموظفين ( مسنترين ) على مكاتبهم ..

وبصراحه كتر خير الموظف جدا انه صحي من النوم مخصوص وراح استلم منك السيارة قبل ماتطلع تسافر ..

[Grendizer]

ايه الحاجات دي يا عم جرنديزر ؟

يا جماعة طبعا ده هزار... اوعى حد يعمل كدة!!

انا صحيح عملتها مره و نفعت بجدارة انما مش دى القاعدة و الظروف كانت مختلفة كمان.

[msayed]

لا يا عم كله إلا التصوير ده

ده أنا صورت مرة يافطة مطار ينبع من برة للذكرى يعنى وعينك ما تشوف إلا النور كنت زبون الليلة لغاية ما صدقوا إنى أهبل ومش بأقصد حاجة غلط من الصورة.

مرة بقى كنت فى ألمانيا صورت كل ملى متر مربع فى مطار فرانكفورت وصورت ألمانيا كلها من فوق من السماء، ولما الطيارة وصلت مصر قمت فاتح الكاميرا ومصور الأهرام لقيت المضيفة الألمانية جت لى جرى وقالتلى فوتوز نوت ألاود، أنا استغربت هى عرفت الإكسبريشن ده إزاى وبعدين هى مالها دى بلدى، قلت لها هواى؟ قالت يو ويل فال إن ترابلز ويز إيجيبتيان سيكيوريتى. فبكل شجاعة رحت قافل الكاميرا وخبيتها فى الجاكيت.

تم تعديل 11 مايو 2009 بواسطة msayed

[msayed]

بس ربنا معاك لو إتمسكت!!

و ماتقولش grendizer قالي ...

هو انت فاكرنى ها استنى لما اتمكسك؟ ده انا هابلغ الرجلين بتوع الأمن دول أول ما أنزل الدمام، ده انت عاوز تودينى ورا الشمس فى عز الحر ده. أبشر

[elfakhrany]

أبشــــــــــــــــــــــــــــــر طـــال عمــــــــــــــــرك :lol: