استفسار عن شركة بالرياض

[sayed]

ان شاء الله ان معروض على شغل فى الرياض فى مصنع الومنيوم

شركة اسمها مصنع اسمكو للالومنيوم

تقريبا والله اعلم فى النسيم ( لان العقد مش مكتوب فيه ونسيت اسئل )

هم بيقولوا انها شركة كبيره قوى

وانا حسيت ده من عرضهم ( المرتب )

بس حبيت اعرف لو فى حد سمع عنها او يعرفها يقولى علشان اطمئن

وجزاكم الله خيرا

[se_ Elsyed]

أخي الكريم

سواء حد سمع ولا لأ .. دي بتبقى أراء شخصية .. خصوصاً لو مش حاجه مشهورة زي بن لادن مثلاً ولا أرامكو ..

وبالتالي إبعد عن الأراء الشخصية وتمسك بشروط عقد مرضيه لك أولاً ... لإن في النهاية اللي بينك وبينهم عقد وعلاقة قانونية ..

فالواحد مش هايفرح إنهم يقولوا لك دي شركة بنت حلال ... ويبقى عقد منيل ..

لكن العكس ممكن يحصل ..

ممكن تكون شركة منيلة بنيلة وانا طالع على عقد كويس .. ولي مرتبي وامتيازاتي تعوضني عن قرف غربتي ... وماليش دعوى بالباقي ..

عارف إن ممكن رأيي لا يعجب الكثيرين ..

لكن تعرف سر نجاح اللبنانيين والفلطسينيين والأدرنيين بالذات هنا هو إيه ؟

غالباً لا تجدهم على كفالة الشركات التي يعملون بها ... ونحن نشبهمم بالنحلة اللي كل يوم تقف على زهرة تمتص رحيقها وبعدين تسيبها ... وهم أكثر الجنسيات في معدل الدوران بين الشركات .. وأكثرهم ربحيه لإن لو جه في شركة منيلة وبمميزات ممتازة ... اللي هايعمله فيها في سنة ... ممكن يعمله في شركة أخرى مستقرة في 5 سنوات ...

أرجو إنك تكون فهمت وجهة النظر ...

بالمناسبة : دائماً ما تتمسك إدارات معظم الشركات بالأشخاص ذوي المواقف التفاوضية القوية وساعتها بيحسوا إن الشخص ده مهم وإنه يعرف كيف يبحث عن حقه وأهم حاجه غنه واثق من نفسه ومن قدراته .. أعلم تماماً إن ظروفنا جميعاً تختلف وممكن واحد يكون ظروفه صعبه ويقبل بدون نقاش عرض هو مش راضي عنه ... لكن الواحد بيعمل اللي عليه على قدر المستطاع .. واهم حاجه تلعب صح وتعرف تفكير الناس اللي قدامك وتعرف إنك لو قبلت وانت ضعيف بعشرة مثلاً ممكن تيجي تلاقيهم ستة ده غير القرف ..

هاقولك موقف بسيط ...

أخويا معايا هنا في شركة أخرى وهو لسه صغير وبقى له هنا 4 أو 5 سنين ولسه خبرته قليلة في مجال المبيعات بالكمبيوتر لإنه كان بيعمل في مجال أخر ..

وأنا مفهمه إن أي شروط تعاقدية لا يتكلم فيها بالرفض أو الإيجاب يسمع بس ويقول هارد عليكم .. وييجي يقول لي وأنا اقوله يعمل إيه لإني بقيت حافظهم بفضل الله عن ظهر قلب ..

المهم أشتغل في عمل جديد من حوالي سنة .. وأثبت جدارته ... وهو على وشك الترقية لمنصب نائب مدير معرض للكمبيوتر ..

فجه الولد صغير بقى وهايبقى مدير ومنظر ومنصب .. فقلت له أرفض من غير تردد .... وتمسك برفضك ..

لأن الواحد بخبرته هنا الدكاترة بقوا يمنعوه من أكل الأونطة ..

بمعنى ... ييجي صاحب العمل يرقيك وينفخك ويعمل بريستيج ويقولك .. بإذن الله الوظيفة دي مستقبلها كويس ومرتبك هايزيد بعد كده .. يعني يشياني مسئولية الأول وأبقى في وش المدفع .. لكن ساعة الفلوس ... نتكلم بعدين ...

فالواحد من خبرته .. بقى يفضل نتكلم عن الفلوس الأول وبعدين المنصب ... يعني لا مؤخذه شغلني أعمل شاي وقهوة ونسكافية بمرتب أرضاه ... وما تنفخش فيه والمدير راح والمدير جه .. والمدير بيشيل الطين طبعاً في حالة وقوع اي مصيبة .. وبعدين تقولي نبقى نتكلم في المرتب لما تُثبت جدارتك ..

والحمد لله قد كان .. قاعد يرفض لمدة أسبوعين وإجتماعات وحركات .. لدرجة إن الراجل يعرفني طبعاً .. فقال له .. انا عارف إن مش إنت اللي بتتكلم ... لكن ده اخوك س س هو اللي متخن دماغك ....

وكده احسن ... منصب بدون مسئولية والواحد باله مرتاح

احسن من مسئولية بدون مقابل وتعب أعصاب ..

يعني أبقى من الرعية وعامة الشعب ومستورة

أفضل من إني أبقى راعي واللي جاي واللي رايح يطلش فيه .. ومافيش مقابل للتلطيش ده ..

[Emadkamal]

ربنا يوفقك

[sayed]

اشكرك اخى الكريم سى السيد

لقد فهمت قصدك جيدا

ممكن ابعتلك على الخاص