وظيفة في شركة الصايغ للمقاولات بالكويت

[KAhamid]

السادة الزملاء العاملين بالكويت او يعرفوا حاجة عن الاخبار هناك

في وظيفة معروضة عليا في الكويت

محاسب مشتريات

المهم ان الانترفيو الاول اتعمل والحمد لله عديت

ويوم السبت القادم المفروض اني اتفق علي العقد

فياريت حد يديني اي معلومات او نصائح عن هذا العقد المرتب في حدود كام والبدلات اخبارها ايه والشروط وهكذا

للعلم انا بكالوريوس تجارة جيد جدا 2005 ومعايا دورات كمبيوتر وتصميم نظم ودورة في اجراءات الايزو وخبرة 3 سنوات

[KAhamid]

ياريت يا جماعة المساعدة

[المخنوق دائما]

للأسف شكلك وقعت فى محاسبين كلهم شغالين فى السعوديه وأنا واحد منهم

بس على العموم دعواتنا ليك وربنا يسدد خطاك ويعطيك أكثر مما تتمنى

وابقى طمنا عليك

[HDarwish]

والله يا عزيزي أنا كنت داخل وكتبت ليك رد مفصل لكن للأسف أثناء ما بكتب جالي شوية شغل خلوني كانسلت كل اللي كتبته ..

لكن خليني اجمع شوية حاجات من اللي كنت كتبتهم

أنا مش محاسب لكن لي صديق محاسب خريج تجاره 2003 بس تقريبا قسم اقتصاد او احصاء الله أعلم ... المهم هو جيه هنا فيزا حره وبعدين دور على شغل وربنا كرمه بسهوله والحمد لله على شغل بس كان في شركات صغيرة وبراتب ضعيف بعدها حصل شغل في شركة متوسطة وكان طالب 350 وبعد فصال وخد وهات وقفت على 250 واشتغل معاهم شوية إلى أن ربنا كرمه بوظيفة محاسب في شركة من الشركات المحترمة لكن تحديدا بيعطوه كام والله ما اعرف لكن أكيد مش هيقل عن 350 دينار وأكيد طبعا بالإضافة للبدالات

كمان أنا كنت اشتغلت شوية في الإتش آر وكنت بشوف المحاسب خريج لسه جديد وبياخد حوالي 450 بس ده كان خريج تجاره انجليزي

شركة على الصايغ للمقاولات من الشركات المحترمة ولها اسمها هنا

بصفة عامة الراتب لا يقل عن 350 بالإضافة للبونس السنوي وتذكرة الطيران والتأمين الصحي إجباري عليهم بس ياريت لو فيه تأمين صحي خاص زي أليكو كده وده بيكون شامل المستشفيات الخاصة والحكومية والمواصلات طبعا عليهم وإذا مافيش مواصلات يبئا فيه بدل مواصلات

للحديث بقية

[KAhamid]

ياجماعة انا بجد شاكر جدا ليكوا

لاني ماعرفش اي حاجة عن الدنيا في الكويت

والاخ HDarwish

انا متشكر جدا

وياريت لو تديني فكرة عن متوسط الانفاق لحياة اعزب متوسطة يعن اصرف كام في الشهر

والف شكر ليك

[HDarwish]

100 دينار شهريا شاملة كل شيء .. ممكن تقل شوية إذا لم تكن تدخن .. أو تزيد شوية عشرين أو ثلاثين لو إنت قضيتها خميس وجمعه في فسح وتهييص

100 دينار عباره عن :-

30 سكن

25 أكل (مشاركة مع زمايلك في السكن)

10 شحن لتليفونك (ممكن تقلل شويه لإنهم ما عادوش بيخصموا لما حد يتصل عليك من الأرضي)

5-10 مكالمات لمصر تطمن على الأهل

15 مواصلات (إشتراك في الباص) أو 20-25 بنزين سياره وتبديل زيت

10-15 سجاير لو بتدخن أو مصاريف قهوة لو بتشيش

10-15 نثريات (طقم جديد - خرجت تغير جو .. إلخ)

يعني زي ما أنت شايف الحسبة كلها من 110 إلى 130 لو إنت بتدخن ومن 90 إلى 110 لو إنت غير مدخن

طبعا هتلاقي الحسبة دي فيها اختلافات من شخص للثاني يعني ممكن تلاقي واحد بدل ما يسكن ب ثلاثين ويتشارك مع أربعة خمسة يقولك لا أنا أسكن أنا وواحد بس يبئا في الحاله دي السكن تديله 100 دينار لوحده .. واحد تاني يقولك أنا لسه هطبخ واغسل وواجع دماغي أنا اقضيها مطاعم وغسيل وكوي في المغسلة نقوم نديها 60 دينار زياده .. واحد بدل ما يتصل كل اسبوع على مصر بيتصل كل يوم نقوم نزود كمان 30 دينار .. وهكذا ..

لكن إنت طلبت الوسط واللي أنا كتبته فوق هو ده الوسط بمعنى إن فيه ناس مقضياها بأقل من كده وناس تانية بأكثر من كده

أي أسئلة تانية إحنا في الخدمة

تيجي بالسلامة

[KAhamid]

ياباشا بجد انا موش عارف اشكرك ازاي

الصراحة انت وضحت ليا حاجات كتييييييييييير اوي انا كنت ما عرفهاش واعتقد ان ناس كتير هتستفيد من الارقام اللي انت كاتبها

وبجد الف الف شكر مرة تانية

بس كنت عايز اعرف حاجة

هو المعتاد ان السكن والانتقالات انا اللي بتحملهم ولا الشركة هي اللي بتد فعهم

[engAA]

سلام عليكم

هو الكويت بتتطلب تحلبل الفيروس؟؟؟ ايه البلاد الخليجية اللي بتطلبه؟

[MoHaMMeD EgYpT]

سلام عليكم

هو الكويت بتتطلب تحلبل الفيروس؟؟؟ ايه البلاد الخليجية اللي بتطلبه؟

ايوة الكويت بتطلب تحليل فيروس س و الكشف الطبي و لزوموه

[MoHaMMeD EgYpT]

100 دينار شهريا شاملة كل شيء .. ممكن تقل شوية إذا لم تكن تدخن .. أو تزيد شوية عشرين أو ثلاثين لو إنت قضيتها خميس وجمعه في فسح وتهييص

100 دينار عباره عن :-

30 سكن

25 أكل (مشاركة مع زمايلك في السكن)

10 شحن لتليفونك (ممكن تقلل شويه لإنهم ما عادوش بيخصموا لما حد يتصل عليك من الأرضي)

5-10 مكالمات لمصر تطمن على الأهل

15 مواصلات (إشتراك في الباص) أو 20-25 بنزين سياره وتبديل زيت

10-15 سجاير لو بتدخن أو مصاريف قهوة لو بتشيش

10-15 نثريات (طقم جديد - خرجت تغير جو .. إلخ)

يعني زي ما أنت شايف الحسبة كلها من 110 إلى 130 لو إنت بتدخن ومن 90 إلى 110 لو إنت غير مدخن

طبعا هتلاقي الحسبة دي فيها اختلافات من شخص للثاني يعني ممكن تلاقي واحد بدل ما يسكن ب ثلاثين ويتشارك مع أربعة خمسة يقولك لا أنا أسكن أنا وواحد بس يبئا في الحاله دي السكن تديله 100 دينار لوحده .. واحد تاني يقولك أنا لسه هطبخ واغسل وواجع دماغي أنا اقضيها مطاعم وغسيل وكوي في المغسلة نقوم نديها 60 دينار زياده .. واحد بدل ما يتصل كل اسبوع على مصر بيتصل كل يوم نقوم نزود كمان 30 دينار .. وهكذا ..

لكن إنت طلبت الوسط واللي أنا كتبته فوق هو ده الوسط بمعنى إن فيه ناس مقضياها بأقل من كده وناس تانية بأكثر من كده

أي أسئلة تانية إحنا في الخدمة

تيجي بالسلامة

تمام يا استاذ حسن :blush2: بس 10 دينار ايه بتوع الشحن دول هو هيكلم مين يعني في الكويت اظن ان كارت من ابو 3 دينار يكفي اما بقا لو هيتصل بمصر اسبوعيا ففعلا هو محتاجله كارت بعشرة دينار

[HDarwish]

تمام يا استاذ حسن بس 10 دينار ايه بتوع الشحن دول هو هيكلم مين يعني في الكويت اظن ان كارت من ابو 3 دينار يكفي اما بقا لو هيتصل بمصر اسبوعيا ففعلا هو محتاجله كارت بعشرة دينار

شوف يا أستاذ محمد (طالما قولت بئا أستاذ حسن) موضوع الاتصالات ده بالذات نسبي لأبعد الحدود يعني أنا عن نفسي كل يوم أو بالكثير قوي يوم ويوم تلاقيني متعود أدخل البقالة واطلب الحاجات دي (واحد صامولي + علبة عصير أو علبة لبن المراعي + علبة سجاير + دينار تحويل رصيد) يعني تلاقي التليفون ده معايا حد أدنى 15 لحد 30 دينار .. فيه ناس غيري أكثر من كده بكثير وناس تانية أقل من كده وممكن ما تشحنش خالص وتخلي التليفون استقبال بس .. خاصة بعد ما لغوا حكاية الخصم من رصيدك في حالة الاستقبال من تليفون أرضي أو من مكالمة دولية والناس بئت مقضياها من على الأرضي زي الفل بس الحكاية دي فيها عيب واحد الأول الناس كانت بتكلمك بسرعة وقوام قوام علشان الرصيد دالوقتي تلاقي الواحد بيتصل عليك بالنص ساعة والساعة وكله ضحك وتهريج ومش في كل الأوقات الواحد بيبقى فاضي وفي نفس الوقت مش عايز يحرج اللي معاه عالتليفون ويقوله ياعم خلص رغي بئا ...

على فكره إنت شكلك بئالك فترة ما رجعت الكويت لإن حتى الاتصالات لمصر بئت ميه ميه .. الدقيقة لمصر وصلت ل خمسين فلس بس شوية الصوت ما بيبئاش واضح قوي في بداية المكالمة بس بعد كده بيبئا تمام.

تحياتي

سلام عليكم

هو الكويت بتتطلب تحلبل الفيروس؟؟؟ ايه البلاد الخليجية اللي بتطلبه؟

الكويت طبعا بتطلب تحليل فيروس سي وبي .. الدول الخليجية اللي ما بتطلبش تحليل هي الإمارات (على ما أعتقد)

ياباشا بجد انا موش عارف اشكرك ازاي

الصراحة انت وضحت ليا حاجات كتييييييييييير اوي انا كنت ما عرفهاش واعتقد ان ناس كتير هتستفيد من الارقام اللي انت كاتبها

وبجد الف الف شكر مرة تانية

بس كنت عايز اعرف حاجة

هو المعتاد ان السكن والانتقالات انا اللي بتحملهم ولا الشركة هي اللي بتد فعهم

يا باشا مفيش داعي للشكر .. ربنا يوفقك

اللي أعرفه إن بعض الوزارات وبعض الشركات المحترمة هي اللي بتوفر السكن والانتقالات .. لكن في المعتاد وبنسبة كبيرة الشركة ما بتتحملش السكن وأوقات تانية كمان ما بيتحملوش الانتقالات .. بالنسبة للصايغ على ما أظن إنهم إحتمال كبير يوفرولك الانتقالات لكن السكن لأ ..

إبئا طمنا عملت إيه؟؟!

تحياتي