للرجال فقط : هل انت سي السيد في بيتك .. ولا شخص مهاود ومتعاون ؟

[se_ Elsyed]

يعني مبدئياً عشان دايماً بيشبهوا الراجل القاسي بسي السيد احمد عبد الجواد بتاع الثلاثية ...

فهل أنت أيها الرجل من النوع اللي بيساعد زوجته في اعمال المنزل البسيطة .... ولا بتستهبل وتاخدك العزة بالأثم وتقول : انا راجل والحاجات دي شغل الستات ؟

قال أنضف وأروق معاها الشقة قال ..... أهو ده اللي كان ناقص ..

سبب إثارتي لهذا الموضوع إن إمبارح كان عندنا إستشارة لطبيب الجلدية .. حيث إن زوجتي عندها إكزيما أو حساسية في إيدها من المنظفات الصناعية والكلور والحاجات دي .. وده شيء اعتقد منتشر كتير عند ربات البيوت اللي طول اليوم إيدهم في المياه والمنظفات ... وبالرغم من إنها حريصة وبتستخدم جوانتيات خاصة .. إلا إن الجوانتي عامل زي الكمامة بتاعت الأنف .. مش طول اليوم الواحد هايبقى رايح جاي بالكمامة . كذلك هي لما تيجي تتوضا مثلاً عشان الصلاة فمش هاتلبس جوانتي !!!

فالمهم لقيت الدكتور بيقول لي : إحنا هانمشي على علاج فعال لمدة إسبوعين وبعدها نواظب على المرطبات وتجفيف اليدين بشكل جيد بعد المياه ... وبالرغم من إنها السنوات الماضية كانت بتستخدم أنواع شهيرة من تلك المرطبات الطبية الي تثعتبر علاج للإكزيما

مش بيسموها باين

housewife Eczema يعني الإكزيما بتاعت ربات البيوت ..

ومن ضمن تلك الوصفات " ديبروساليك ... وإلكسال "

لكن الدكتور إقترح علينا مرهم مرطب لسه نازل جديد ... بس حراق قوي " علبه مرهم عادية من الحجم المتوسط ثمنها 230 ريال " لكن الحمد لله متغطية بالتأمين الطبي ... وقال عليها إنها فعالة جداً ومافيهاش كورتيزون .. وبتستخدم مرة واحده في الإسبوع ... كده معقول ... :D

المهم لقيت الدكتور بيقول لي : لكن مع العلاج ده .. حضرتك هاتضطر أسفاً تغسل المواعين على الأقل لمدة إسبوعين !!!

يا عم قول لا إله إلا الله وعيب كده .... أنا قلت في سري يعني ..

لكن والله من قبل ما يقول الدكتور ... يعني الواحد في قلبه رحمه برضوا ... وشايف الزوجة بتتعب قد إيه ... حتى تعبنا نحن معشر الرجال في العمل أهو بتلاقي فيه اللي يخدمك ويساعدك ويجيب لك الشاي والقهوة وينضف لك المكتب وناقص يغني لك ماما زمانها جايه ..

انا شخصياً أضع المجهود الذي تبذله زوجتي في مذاكرة الأولاد ومتابعة دروسهم في كفه ... وجميع الاعباء المنزلية الأخرى في كفه ... وأهم لسه في المرحلة الإبتدائية لكنها بتجلس معاهم ما لايقل عن 4 ساعات يومية متواصلة لكي يكونوا متفوقين والحمد لله على هذا ... وأنا باجيب جاز لما بأقعد مع الولد ربع ساعة اذاكر له فرنساوي مره كل كوارتر ..

وبالتالي لا أرى على الأطلاق إنتقاصاً من كرامة اي رجل إنه على الأقل يُبدي جانب رحمه أو مساعدة لزوجته في اي حاجه من أعمال المنزل ...

والزوج والزوجة بيبقوا عارفين إن حتى الحاجات البسيطة دي عمرها ما هاتستمر لإنشغال الرجل أو لتطنيشه خلينا نقول في كثير من الأوقات ... يعني لو غسل مواعين في مره فحليني لما يعملها تاني خلال إسبوع مثلاً ...

وأعرف رجال إنتزعت الرحمة من قلوبهم ويجاهروا بهذا ويقولون : وأنا مالي ده شغل ستات ..

أخويا الصغير نفسه لم يكن إستقدم زوجته فجت السيرة قدامه في العيد الماضي وبأقوله عاوز أخد السجاجيد المغسلة وأقوم أنزل الستاير من على الحيطان واعمل أي منظر أساعد به المدام اللي بيحلاش لها ولا للستات قلب الشقة رأساً على عقب إلا قبل العيد بيومين وكإن العيد بييجي فجأة وما بنكونش عارفين ميعاده ..

فلقيته بيبص لي ويقول لي : إنت ؟ إنت تعمل الحاجات دي وتروق وتنضف البيت ؟

فبصيت له كده وكان هاين عليه أضربه ... وقلت له بكره تتزوج بحق وحقيقي وزوجتك تبقى معاك ونشوفك كده وهي مرهقة وتعبناه ونازلة تنفيض وتنضيف في البيت .. وسعادتك قاعد تحتسي فنجان القهوة مع جريدة الصباح ياللي ماعندكش دم ..

لكن ارجع واقول إن هناك أعمال منزلية .. انا شايف إنها عيب ... يعني مرات قليلة جداً ألاقي راجل مثلاً واقف في بلكونه - في مصر يعني - بينشر غسيل على الحبال أو ماسك منفضة ونازل تعذيب في السجادة او في بير السلم وينزل التراب والزبالة على الجيران اللي تحت ... لأ كده أوفر قوي وبقت تهزيق وقلة قيمة بصراحة ...

فاللي عايز اقول له إن الرحمه حلوه برضوا وإرحموا من في الأرض يرحمكم من في السماء .. وإن الرسول الكريم نفسه كان في خدمة أهله ويرتق ثوبه ويخيط نعاله بالرغم من إنه كان مسئول عن البشرية كلها ومستقبلها ...

والعلاقة الزوجية ليست علاقة عبد بسيد أو تابع بمتبوع أو شخص بيقوم بخدمة الأخر من الألف إلى الياء ..

لكنها في المقام الأول علاقة رحمه متبادلة وتعاون في تسيير مركب الحياة الزوجية

وعايز اسمع سقفه جامده واللي يحبنا يصلي عالنبي ..

[icehearted girl]

عليه افضل الصلاة والسلام :D

سجل يازمان

سي السيد 2009 يساعد زوجته في اعمال المنزل

اه لو شافك السيد احمد عبد الجواد :blink:

لو لم أكن مصرية لتمنيت ان اكون انجليزية عشان ارفع لحضرتك القبعة احتراما دلوقتي ^_^

يمكن حضرتك اتحطيت في موقف صعبت عليك زوجتك عشان كدا شفت الموضوع دا طبيعي

امال امتي الناس تحس ان داللي المفروض يحصل اصلا

زي مجضرتك قلت يا س س افضل الخلق اجمعين كان بيساعد زوجته في البيت

هاتلي حد افضل مننه عشان يتكبر علي حاجة زي كدا

هقلك علي مثال يدل علي التناقض برده

لي اخ بيساعد ماما في احيان كتير

سواء مواعين او توضيب اوضته او غسيل سجاجيد

بس كل ما حد يسأله هل هيعمل كدا في بيته

يقلهم لا طبعا بلا قلة قيمة :happy:

امال انا هتجوزها ليه

[HDarwish]

على ما أظن يا سي السيد إنك كاتب في عنوان الموضوع للرجال فقط .. مش كده ولا إيه؟؟!!

طب ده انت كنت داخل اكتب واقول أشعار وشوية كلام زي الفل .. لكن طالما القعده فيها ستات .. يبقى أحب أقولك إني سي السيد ونص .. ناقص كمان تقوللي أبئا أعلق هدومي عالشماعه ولا أدخل كوباية الشاي بعد ما اشربها للمطبخ .. أبداً.

يلا تصبحوا على خير

[icehearted girl]

. ناقص كمان تقوللي أبئا أعلق هدومي عالشماعه ولا أدخل كوباية الشاي بعد ما اشربها للمطبخ .. أبداً.

شهقة عميقة :D :happy: :blink:

[Alrefaey]

هلا وغلا ابو عمر

شوف يا ابو الاسيان شحصيا انا بقوم بالمساعدة اذا كانت المدام لا تقدر على القيام بها بمعنى لو شىء ثقيل لا تقدر على حملة او اى عمل بيتطلب مشاركتى معها

احيانا بحب اعمل الشاى معاها وهى بتجهز الاكل ارتب الاطباق ولو فى رمضان واخوك واقع من الجوع اتسلى فى السلطة وعمل العصائر والتمر

بس كلة كوم وغسيل الاطباق بالذات كوم تانى ممكن اساعد بس الغسيل مليش فيه

بس فى حالتك دى ومعتش هنديك بسى السيد بأءة خلاص واجب عليك تقوم بهذا الدور الهمام

بالنسبة

housewife Eczema يعني الإكزيما بتاعت ربات البيوت ..

ومن ضمن تلك الوصفات " ديبروساليك ... وإلكسال "

كويس انه غيرلها الكورتيزونات دى لأنهم بيحتوى على كورتيزون + حمض السلسيلك ومع انهم بيجيبوا نتائج سريعة لكنها بتكون مؤقتة وبتسبب مشاكل للجلد فيما بعد

بينما الكريمات الغالية دى واللى بتجتوى على مرطبات وفيتامينات تأثيرها العلاجى افضل ومتلائمة مع الجلد ومع جو الرياض الفزيع المثير بطبيعته للجفاف والتحسس

[HDarwish]

Iceheart ,,,

عارفه أخوكي الصغير ده أنا كنت زيه بالظبط ويمكن ما حدش كان بيساعد أمه زي في الدنيا كلها .. أنا وحيد على ثلاث بنات ورغم ذلك كنت أنا اللي بقوم بشغل البيت لما تكون أمي تعبانه وساعات كانت تمثل علي التعب خاصة اليومين اللي قبل العيد علشان عارفه إن ما حدش بيشتغل بإخلاص زيي .. من غسيل سجاد وكنس ومسح بلاط وشبابيك حتى الكنب كنت أطلعه على السطح لدرجة السلم .. ويا سلام بئا لو مزاجي حلو وضحكت علي وخلتني أغسلها المطبخ .. ده بئا لعبتي أنا أفضي المطبخ كله وأغسله كله حتى المواعين والكلام ده والبوتاجاز والشفاط كل حاجه .. بصراحه بخليه مرايه .. شوفتي بئا ده كله لكن تعالي قوليلي أعمل في بيتي حاجه حتى إني أغسل كوباية شاي بصراحه ما بعملش حاجه من دي خالص .. مش موضوع سي السيد والكلام ده لكن حقيقي المدام عندي مش مديانه فرصه قايمه بالواجب كله وبدون ما تشتكي وصدقيني لو في يوم لقيتها تعبت أو ملت شوية مش هتردد لحظه واحده إني أساعدها ..

تحياتي للجميع .. ولنا عوده

[icehearted girl]

ايوا قول كدا مالاول :D

بس نصيحة

مش لازم تتعب عشان تحسسها انك خايف عليها

جرب كدا مرة مثلا تحضر العشا

ولا تنشر الغسيل

والله هتفرق معاها اوي

انا افتكر ان والدي هواللي علم والدتي كل حاجة ولا حتي كانت بتعرف تسلق بيض

بالرغم من انه كان ديما مسافر

بس الايام اللي كان بيجيها كان هواللي بيعمل معظم الحاجات

لدرجة ان الموضوع دا كان بيضايق ماما

ستات بتتبتر عالنعمة :happy:

[Ahmed Unknown]

هقلك علي مثال يدل علي التناقض برده

لي اخ بيساعد ماما في احيان كتير

سواء مواعين او توضيب اوضته او غسيل سجاجيد

بس كل ما حد يسأله هل هيعمل كدا في بيته

يقلهم لا طبعا بلا قلة قيمة :happy:

امال انا هتجوزها ليه

التناقض بقى اللى فى الموضوع ان الولد هو اللى كان بيساعد والدته فى شغل البيت (و طبعا البنات عاملة مش واخده بالها) :D

[icehearted girl]

:D

[MZohairy]

بالرغم من اني مخاصم الراجل اللي فاتح الموضوع ده عشان مدخلش هناني في موضوع عيد ميلادي

الا اني حدلي بدلوي

نعم انا سي السيد في البيت :closedeyes:

[بركة]

يعمل من نفسة ايوة لكن لو أنا طلبت بيبصلي شظرا ويقلي هو أنا فاضي :closedeyes:

[doudy]

ازيكم انا زوجى الحمد لله اما بيكون فاضى بيساعدنى يعنى يوم الجمعة مثلا

يعمل السلطة معايا اكون بطبخ يقف معايا و يغسل الاطباق حاجات زى كدة لكن انا ما ارضاش انه ينفض السجاد او ينشر بصراحة

و الحقيقة ظهر دوره البارز فى مساعدتى اما عملت من حوالى شهرين و نصف عملية المرارة بالمنظار

كان فعلا نعم الزوج المتعاون

دودى

[se_ Elsyed]

يعمل من نفسة ايوة لكن لو أنا طلبت بيبصلي شظرا ويقلي هو أنا فاضي :closedeyes:

كلنا هذا الرجل .... تخيلي ؟---------------

مزاهيري .. ماتقدرش تزعل مني عشا احنا حبايب من ايام المنفوحه .. ومهما روحت بعيد وبيت عمدة مونتريال .. او شيخ غفر فانكوفر ... برضوا الدم بيحن ... واللي يشرب من ميه المنفوحة لازم يرجع لها تاني ...

بس شكلك هاترجع بقى متسر ام زاهيري الخبير النووي يا معلم

[moheltohamy]

أنا ما عنديش اي مشاكل في أي حاجة في الحياة...

يعني عادي جداً تلاقيني باطبخ ، أغسل ، أنشر الهدوم ، أشطب كام طبق في الحوض!

معظم الأيام كنا بنتغدى بره البيت ، وبالتالي وفرنا وقت الطبيخ وغسيل المواعين (خصوصاً إن المخفية غسالة الطباق اللي جبتها كانت الميني ، زي قلّتها! مالهاش في الحلل ، وساعات كتير تلاقي الأطباق طالعة فيها آثار صلصة ومكرونة وكده ، خصوصاً لو ما غسلتهاش بعد الأكل على طول!) ، وبالتالي كان فعلاً غسيل المواعين هوه الملل اللي بجد!

وبالنسب للهدوم ، فأنا أرفض مبدأ النشير في البلكونة ، المنشر البورتابُل في الريسيبشن ، والسُترة حلوة! ما كنتش باحب منظر الست اللي ملطوعة في البلكونة تنشر الهدوم أدام كل الشارع! وبالتاي عادي إني أنشر أو هيّه تنشر! من نافلة القول طبعاً إني أقول إن الموضوع ده أيّام مصر... هنا في كندا ، مفيش حد بينشر الهدوم

وبالنسبة لتنضيف البيت ، ما كانش ليّا فيه الصراحة... هند موسوسة نضافة أصلاً ، وبلتالي باكون شايف البيت زي الفل ، وهيّه ماسكالي المهفّة وعمالة تلف ع الشقة!

وكل شهر بتيجي هيّه ومامتها و واحدة ست بتنضف معاهم الشقة ديب كلينينج ، قبل ما أرجع. طبعاً دي أيّام مصر لما كنت ف بريمة بترول أسبوعين شغل وأسبوعين أجازة. وبرضه الشقة ما كناش بنفتحها ، لاشباك ولا بلكونة بتتفتح أصلاً غير يمكن في الويك إند. وبالتالي ما كنتش بالحق ألمح تراباية!

لكن بصفة عامة... ما عنديش أنا قصة سي السيد دي خالص! أنا راجل بتاع إيكواليتي ، ومساواة في أي وكل تفتوفة من نواحي الحياة. :closedeyes:

[لولا]

كنت عايزه اشارك بس الموضوع للرجال فقط :rolleyes:

فوتكو بعافيه بقا :lol:

لولا

[زعلان]

عادي يا سي السيد انا عارف انت عايز تطمن نفسك انك لسه سي السيد و تشوف مين بشاركك اهتمامتك المنزلية مش عايز تحس ان لوحدك يا ضنايا ما تقلقش يا سي السيد بس خللي بالك و انت بتغسل المواعين اوعى تكسر الكوبيات

وسلمات لمدام سي السيد

[زعلان]

حاجة غريبة بتاعت عدم نشر الغسيل ده خوفا من الفضايح مش مستوعبها فيها ايه يعني لما تنشروا الغسيل وفي حد ينشر الغسيل في الرسيبشن

الي مش عايز ينشر الغسيل و في عنده مساحة في المطبخ يجيب دراير بدل الحجج الفارغه بتاعتكوا قال مكسوفين تنشروا الغسيل و قال ايه الستات تخليه اجوازها تعمل كل حاجة في البيت و تسيق و تنظف و تمسح و تغير لعيال بس ما تنشرش الغسيل علشان البرستيج يا عيني عليك يا زوهيري قلبي معاك انا شفت بعيني محدش قلي

يا ريت يا زهيري تفضي بريدك

تم تعديل 14 مايو 2009 بواسطة زعلان

[elfakhrany]

واللهى يابو عبد الرحمن أنا لسه متجوزتش بس انا لما كنت فى مصر كنت متعاون جدا فى البيت مع والدتى وبنشر الغسيل عادى مع ان ليا 3 اخوات واخت بنت وكنت بشوف انها حاجة عادية وزى مابيقولو (مش عارف مين اللى بيقولو دول بس ماعلينا) اللى مش عاجبه.. يشد فى حواجبة

أما بعد الزواج ان شاء الله اكيد هيكون فى مشاركة مع زوجتى لأن بصراحة أنا بشوفهم بيتعبوا جدا وربنا يكون فى عونهم

[eng ahmed]

اولا شكرا لسى السيد عشان كل واحد يتكلم بطبيعته ويشوف الموضوع نظامه ايه

انا عن نفسى مش متجوز ولى اختين بنات وواحدة فيهم متزوجة كثير جدا كنت انظف وانشر واغسل المواعين وامسج السجاجيد

بس لما اكون المود مش رايق مش بطيق اعمل اى شى يعنى الموضوع مزاجى عن اغلبية الرجالة مش موضوع لازم اساعد

بس بصراحة الحياة تعاون يعنى مش ينفع تشوف مراتيك طالع عينها وانتا بتتفرج على الماتش ولا بتعلب جيمس لا خليك عادى ساعدها

عشان الحياة فعلا شراكة بس الحقيقة انا اعرف ستات مبتحبيش حد يساعدها واتمنا اتجوز واحدة زيها ههههههههههههه :angry: :lol: :lol:

[se_ Elsyed]

حاجة غريبة بتاعت عدم نشر الغسيل ده خوفا من الفضايح مش مستوعبها فيها ايه يعني لما تنشروا الغسيل وفي حد ينشر الغسيل في الرسيبشن

الي مش عايز ينشر الغسيل و في عنده مساحة في المطبخ يجيب دراير بدل الحجج الفارغه بتاعتكوا قال مكسوفين تنشروا الغسيل و قال ايه الستات تخليه اجوازها تعمل كل حاجة في البيت و تسيق و تنظف و تمسح و تغير لعيال بس ما تنشرش الغسيل علشان البرستيج يا عيني عليك يا زوهيري قلبي معاك انا شفت بعيني محدش قلي

يا ريت يا زهيري تفضي بريدك

يا نهارك يا زهيري

ده زعلان سيح لك سياح ما حصلش ..

يا ترى زهيري ملك أعالي البحار هايسكت ؟