الذهب الصيني يغزو الاسواق المصرية

[ابو حودة]

الذهب الصيني يغزو الاسواق المصرية

هل هو حل فعلا للزيجات الحديثة بدلا من تأخير الزواج لفترات طويلة ام انه نوع من الكدب على الغير والنفس ويجب ان نغير من انفسنا ويكون عندنا الشجاعة التي تحمينا من لاسير خلف تلك المورثات التي لم يعد لها مكان بيننا في تلك الظروف التي يمر بها الشباب المقبلين على الزواج

ما رأيكم دام فضلكم

[مغتربة]

يعنى ايه ذهب صينى

هوه فيه ذهب صينى و ذهب المانى

ما هو العيار هوه العيار فى كل الدنيا

ارجو التوضيح

[jessika]

ايوة فى يا مغتربة

دهب صينى ال بس فى النهاية اكسسوار

مقتنعش باى شىء يشبة الدهب

جوزى جاب منة بصراحة وانا رميتة من وراة قلتلة الناس هاتتخدع فية وممكن يحاولوا يسرقوك تروح فى داهية علشان دهب مزيف

[jessika]

وبعدين يا استاذ ابو جودة حضرتك بتهرج ازاى يتجاب هدية للعروسة لية هى عروسة هبلة ولا عروسة حلاوة

هتقارن دهب اكسسوار بدهب حقيقى ولا الماظ مثلا

ضحكتنى بصراحة

[لولا]

عفوا مازلت لم افهم معنى كلمه دهب صينى ؟؟

هل المقصود اكسسوار مطلى بالذهب ؟؟

لو كان كذلك فهو لا يسمى دهب لكن يقال للتوضيح اكسسوار مطلى بالدهب وهو ليس جديد

لكن الجديد ان يتم اعتماده كشبكه فى حالة الزواج ... هل فهمى صحيح ؟؟!!

تحياتى

لولا

[سهل جدا]

هل في فرق بين الذهب الصيني وما يسمى قشر الذهب ولا مش عارف اسمه قشرة الجمل

يار يت حد ينوّرنا

[ramyayash]

الذهب الصيني هو ذهب عيار 12

نسبه النحاس فيه اعلي من العادي

ونسبه الذهب فيه مجرد 12%

ثمن الجرام منه حوالي 30 جنيه

لا يتفق عائلتين علي شراؤه الا لو كانو ناويين انهم يتمنظرو علي المعازيم

يعني يجيب نص كيلو دهب ب15 الف جنيه

وهو ذهب فعلا ولكن يتغير لونه بمرور الزمن بنسبه اعلي من الطبيعي

لكنه مش قشره ذهب ولا اكسسوار

[Falcon Crest]

الذهب الصيني هو ذهب عيار 12

نسبه النحاس فيه اعلي من العادي

ونسبه الذهب فيه مجرد 12%

ثمن الجرام منه حوالي 30 جنيه

وهو ذهب فعلا ولكن يتغير لونه بمرور الزمن بنسبه اعلي من الطبيعي

لكنه مش قشره ذهب ولا اكسسوار

الله ينور عليك سبقتني بالرد بتاعك

[rewsha]

السلام عليكم .هوه فعلا كلام الاخ رامي عياش صح فالذهب الصيني هوه ذهب عيار 12 والجرام فيه ب30 جنيه .وانا شايفه انه ماينفعش يحل ازمة الشبكه (الغاليه)لان الناس في مصر ما بتعترفش غير بذهب عيار 21 وبالعافيه بيجيبوا عيار18 فما بالكم لو قلنا لهم بقه ان في عيار 12 .لكن في نظري برضه انه ممكن يحل ازمة الشبكه للناس اللي مش في مقدرتهم انهم يجيبوا شبكه (غوايش)سلسله)نظرا لضعف الحاله الاقتصايه.ودايما بتكون العروسه حاسه انها اقل من غيرها لان الشبكه بتاعتها مثلا دبله وخاتم .لكن حاليا يقدر العريس يجيب للعروسه بتمن الدبله والخاتم (4 غويشه وسلسله وعليقه وخاتمين ودبله)وقدام الناس يبقى زيه زي غيره والعروسه مش اقل من (بنت عمها فلانه)اللي جالها كذا وكذا .يعني باختصار هوه اصبح له رواج بين افراد الطبقه الفقيره .يعني الواحده تفرح انها ملبسه بنتها حلق ذهب بدل ما تلبسها فالصو وبدل ما تحط لها حتة خيط في ودنها علشان فتحة ودنها ما تلمش لان ماعندهاش حلق تلبسه .يعني من الاخر خللي الفقير يفرح شويه وينبسط.اشمعنى هوه .لكن العيب اللي في النوع ده من الذهب انه مش بتباع بعد كده يعني مالوش سوق للمستعمل يعني ماتقدرش تروح للصايغ تبيعه وتجيب غيره زي عيار 21 _ 18 وانا عن نفسي شفته بعيني ناس لابساه (من الطبقه الفقيره)وشكله مايفرقش عن الذهب العادي خالص وفرحانين بيه جدا .لدرجة اني لما شوفت الشخصيه دي لابسه منه 4 غوايش استغربت وقلت امال بتشتكي ليه من قله الفلوس .(كنت لسه ماعرفهوش)وما فرقتش بينه وبين الذهب العادي .المهم قلت والله لاساْلها علشان ماتشتكيش بعد كده .ولما ساْلتها كانت المفاجاْه ............ان الغوايش دي صيني وان سعرها رخيص جدا .

[بركة]

سمعت امبارح ريبورتاج عنه غالبا في برنامج الحياة اليوم وقالوا أن هذا النوع

مدة صلاحية بريقة سنة إلى اتنين . والله كانوا جايبينه على الشاشة في الفتارين بتاعة المحلات

شكلة هو هو الدهب ال18 الايطالي بالظبط انسيالات وخواتم وكله وشغلة حلو جدا

ولسه الصين ياما هتعمل وتعمل واحنا قاعدين وياريت الحرفيين في مصر

بيسعوا للإتقان بل بالعكس إخطف واجري و أهو زبون ضحكت عليه ولبسته في أي حاجه

إلا من رحم ربي منهم ......

[se_ Elsyed]

الاغرب من ذلك دلوقت انتشر في مصر تقليد غريب ... واحد زميلي لسه جاي من اجازة الاسبوع الماضي وشاف الموضوع ده وهو

تأجير الشبكة من عند الصايغ

وتخلص الليلة وترجع العروسة قرعه ومما معهاش الا دبلة ومحبس وساعات من غير محبس .. وخلصت الليلة

بكام المشوار ده بقى ؟

بـ 1000 جنيه مقفولين وطبعاً تلاي النفر من دول بيمضي وصلات امانه لما يقول يا بس

اهم حاجه ننتمنظر قدام الناس

انا خايف من موضوع الدهب الصيني ده

ومتوقع السنة دي انزل الاقي عرايس صيني في شارع عبعزيز

يعني تنزل الشارع تلاقي في الفتارين بنات صيني لابسين فستان ابيض وطرحه توللي .. تدخل تخلص وتشيل عالعربيات الهوندا الصغيرة اللي بتبقى واقفه هناك دي .... وتبقى اتجوزت جوازه صيني يا معلم في السريع

لا حما تقرفك

ولا ابو عروسه يقولك قايمة عفش وتعالى نشتري من دمياط و3 اوض نوم واتنين صالون واربع سُفر

ولا عروسة تاكل دماغك وتقول لك اسكن في منشية ناصر يا بلاش وانا مش اقل من ولاد خالتي

وبعدين ممكن تاخدها من المحل بضمان .. 3 سنين وترميها وتجيب غيرها

[ابو محمود]

اعزائى المحاورين سلام اللة عليكم ورحمتة

نتكلم اليوم عن انتشار الذهب الصينى فى مصر ؟

انة ليس ذهبآ بل طلاء بطريقة الية تعطى منظر لعدة عيارات ...

اعزائى سأشرح لكم ما هو الذهب كى تريحو انفسكم عناء التفكير فى شيء اسمة الذهب الصينى

عرف عن بعض المستوردين انهم يكسبون فى دول مثل دولنا بطرق غير مشروعة بمساعدة الدولة لانها لا يوجد بها رقابة على الاقتصاد ودى بصراحة مصيبة .

الذهب يتكون من عيار ثابت وهو فى حالة الخام (بندقى ) يعرف فى مصر بهذا الأسم

العيار 21 والعيار 18 والعيار 14 والعيار 12 ويتم التعامل مع هذة الأعيرة فى مصلحة الدمغة ومعترف بها

ويتكون العيار 24(الخام البندقى .. من 999.9 سهم

والعيار 21 قيراط من عدد 875 سهم والعيار 18 قيراط من 750سهم والعيار 14 من 485 سهم تقريبآ والعيار 12من 360سهم تقريبآ اذآ لو لا حظنا الفارق بين العيار كلآ من 21الى ال18 سنجدهم 125 سهم وال14 من ال 18 سيكون اكبر لان الفارق بين العيار 21والعيار 18 هو ثلاثة اما العيار 14 من العيار 18 فهو اربع اجزاء وهذا الفارق صحيح وهذة طريقة مبسطة للتعريف وشرح الفوارق بين العيارات

لانكم فى حل من شرحها بطريقة حرفية لانها لا تهمكم حاليآ

العيار يحدد مدى او كمية الذهب الموجودة داخل القطعة المشغولة من المعدن بمعنى ان كانت هناك اسورة تبلغ من الوزن 50 جرام عيار 21 واخرة مثلها فى الوزن عيار 18 لا يصح ان يكون ثمنهما متساوى

كيف نحسبها ...

الذهب العيار 21 الان يساوى 145 ج مصرى اذآ .. 50 ×145 = 7250

الذهب عيار ال 18 الان يساوى 124.25 جمصرى تقريبى بسعر اليوم .. 50×124.25=6212.5

الفارق بينهما واضح .. هكذا نجد ان الفارق بين العيارات يشكل نسبة الشوائب الموجودة به

فلو اعتقدنا كما ينسب للذهب الصينى بأنة عيار ال12 يعنى بيكون الذهب فى الجرام هو 360 سهم اذآ

اسورة 50 جرام عيار 12 يتم تحويلها الى العيار 21 تصبح بها 20.57 جرام عيار 21بمعنى انها تساوى 2982ج مصرى .. اذآ نقوم بمعالجتها حسابيآ فتصبح ... 2982 ÷50جرام =59.64 جنية سعرآ للجرام بدون اضافة اى اجر او تصنيع على الأسورة اذآ هذا الذهب ليس العيار 12 بل هو اقل بكثير بمعنى انة ليس الا طلاء فقط ولا يتم استرجاعة مرة اخرة فى حالة سبكة او صهرة فى معامل الصياغ اذآ انبه على كل من يقرأ هذا الموضوع ان الذهب الصينى ما هو الا معدن من النحاس الابيض المعالج (يتم تحيفة ) بطرق حديثة بعدة معادن تميل الى الاصفرار وتتحمل بعضآ من التأثيرات ومتغيرات الجو والطبيعة نوعآ ما ولأزمنة بسيطة

ولاتحمل من الذهب الا القشور الرقيقة كالساعات المطلية بالذهب وهناك ماركات تدوم بها الطلاء لزمن كلآ حسب سعرة لكنها لا ترتقى الى الذهب وما هو الا خدعة للبسطاء والمحتاجين للمنظر فقط فأنى احذر من يشاهد هذة المشغولات الا ينساق الى كلام البائع لانها لا طائل من ورائها الا الخسارة وهذة نصيحة خالصة والحسابات اكدت لكم واللة الموفق

ويمكن ان يتم السؤال عن اى شيءيخص العيار او الكثافة او اللون او الشكل وكيفية التعرف على الذهب

واكون تحت امركم فى الشرح واستبيان الحقيقة لكم ...

وانى اجد فى انتشار المصوغات المطلية بالذهب (الصينى ) خدمة لزمن تم فية ارتفاع ثمنة واصبحت الناس تخشى الخروج بة خوفآ من الهجوم عليهم من ذوى الأجرام ..

بان جعل اللة رزق الناس بالمصوغات المقلدة التى تشبة الذهب بأن جعلت سارقى الذهب لا يفرقون بين الحقيقى والتقليد فأصبحت الناس ترتدى كميات من الذهب ولا يعرف الا صاحب الخبرة والوعى انة تقليد او حقيقى وهذة خدمة قدمها القدر لمن تحب ان ترتدى فى يدها كميات من الذهب الحقيقى بأن لا يطمع فيها سارق لانة سيشك انة ليس الا ذهب صينى فمصائب قوم عند قوم منافع ,سبحان الرازق

فليحمى اللة الجميع من كل شر والسلام عليكم ..

[mizo]

ايه ياجماعه

الدهب الصينى عيار 24

سعر الجرام 252 يوان تقسم على 8"6 يديك دولار حوالى 37 دولار الجرام

ماشفتش فى محلات الدهب فى الصين غير العيار ده وبيكون صب يعنى سلسله وعليقه صغيره كانوا 37 جم

[Advisor]

الموضوع موجود فى باب حماية المستهلك و هو التبويب الصحيح ، و يبدو فعلا أن هناك الكثير من الأفكار الغير صحيحة سائدة عما يعرف بالذهب الصينى.

ما سبق كان إستهلالا لابد منه

قرأت من أيام تحقيقا صحفيا عن الذهب الصينى فى أحدى الصحف المصرية و منه عرفت مدى التضارب و التناقض السائد حول هذا المسمى و المغالطة التى ذكرتها الجريدة أن سعره هو 13 جنيه للجرام و الحقيقة التى ذكرتها أنه ليس ذهبا و لا يجوز عرضه فى محلات الصاغة و لو تم ضبطه بأحد محلات المجوهرات سيتم إغلاق المحل.

الحقيقة أنه نوع من ال "إكسسوارات" شأنه شأن ال "كورو" لمن يذكره هو معدن لا يمت للذهب بصله ووزنه خفيف و لونه مثل الذهب الأصلى و لا يباع بالوزن و لكن يباع بالقطعة و يأخذ شكل المصوغات الذهبية الحقيقية السائدة فى مصر أو الخليج فبعضها يحاكى تماما المصوغات الذهبية إيطالية الصنع أو المصوغات الذهبية هندية الصنع.

و قد رأيته - أو أظننى رأيته - فى سوق أقامته إحدى الجمعيات الخيرية فى فندق هيلتون رمسيس بالقاهرة منذ عدة أسابيع فقد لفت نظرى مجموعة من الحلى التى تشبه المصوغات الذهبية الحقيقية تشبه الذهب البندقى و كان هناك عقدا كله حبات مستديرة فى حجم الزيتونة الصغيرة و ثمنه أظن ثلاثون جنيها و كان متقن الصناعة.

و سألت الشغالة التى تعمل لدى و هى من إحدى قرى الفيوم فعرفت أنهم يعرفونه هناك و يشترونه بغرض أن تبدو الشبكة ذات حجم كبير إذ أن العادة هناك عرض الشبكة على صينية أمام الأهل و الأقارب و لكن الجميع هناك يعرفون هذه الحيلة.

و فى ظنى أن إستخدام هذا النوع من الحلى من قبل الطبقة المتوسطة سيكون إستعمالا جماليا و لن يكون بغرض ال "فشخرة" لأن الجميع يعرف الحقيقة و سيكون التنافس على الذوق فى الإختيار "لإننا دافنينه سوا"

تم تعديل 14 مايو 2009 بواسطة Advisor