هل تكفى 100 الف جنية لقرار العودة لمصر

[amrkhaled]

السلام عليكم ورحمة اللة وبركاتة

اخوانى واخواتى اعضاء المنتدى الكرام

انا فى حيرة شديدة من امرى انا اعمل بالسعودية من حوالى 8 سنوات

وكل تحويشة عمرى هية 100 الف جنية وانا مش مرتاح فى السعودية

رغم ان عملى كويس اوى ومستقر الى حد ما لاكن انا مش عارف مش قادر

اعد اكتر من كدة التفكير فى النزول اصبح لا يغادر مخى وانا نايم وانا صاحى

وانا فى الشغل فى كل الاوقات لدرجة انى تعبت انا وزوجتى الموجودة معايا

من التفكير فى هذا الامر من ناحية نقول نصبر علشان المبلغ اللى حوشناة

صغير ولا يكفى لشراء شقة و احيانا اخرى نقول لاة ننزل ورزق هنا رزق هناك

والمبلغ اللى معانا نشغلة ونكون نفسنا فى مصر واحنا داخل هذة الحلقة

المفرغة من التفكير لغاية الواحد خلاص معدش عارف يفكر وعلشان كدة انا

بستشيركم فى الموضوع دة انا اعمل اية

1- هل انزل مصر واعمل مشروع بالمبلغ اللى معايا ولو دة الحل يبقى اية المشروع اللى ممكن اعملة

2- هل ابقى بالسعودية رغم الضغوط الشديدة الموجودة علما بانى خلاص اصبحت عصبى وذاد وزنى

الى 120 كيلو من استخدام السيارات وعدم المشى ومن التفكير وحمل الهم

اعمل اية

اعمل اية....

مستنى ردودكم

السلام عليكم ورحمة الله وبركاتة

[سهل جدا]

أولا استخير ربنا سبحانه وتعالى وفوض أمرك ليه.

ثانياً: إياك أن تأخذ قرار وأنت في حالة نفسية سيئة (كما يبدو من كلامك)

ثالثاً: التوقيت ده بالذات صعب تعمل مشروع في مصر أوي.. الأزمة العالمية المالية مأثرة على مصر جدا, وشركات كبيرة بتقفل في مصر وفيه تسريح عمالة..

رابعاً: خذ أجازة شهر انت والأولاد في الصيف ده إن شاء الله وخذ قرارك من هناك (من مصر) .

وربنا يوفقك ويقدر لك الخير حيث كان

على فكرة أنا بمر بنفس ظروفك .. أقصد إني أرجع مصر

ولكن لأسباب تانية خالص

نسأل الله أن يقدر لنا ولك الخير حيث كان

آمين يا رب العالمين

[سهل جدا]

نسيت أقول

ال 100 ألف جنيه في مصر, معقولين لو عندك الأساسيات

أقصد يعني عندك شقتك وعفشك وعربيتك والحاجات ديه , بحيث ما تحتاجش تصرف منهم شيء إلا في المشروع التجاري اللي انت ممكن تعمله في حالة لو اتخذت قرار فعلا بالرجوع ..

[doha]

المشكلة ان الامور متتحسبش كده ..

يعني مينفعش نقول ان كانت المية الف تكفي يبقى سافر وان مكفتش يبقى اقعد ..

انت اقعد مع نفسك ومع زوجتك وقيموا الموضوع من جميع جوانبه يعني ايه سلبيات العوده وايه مزاياها .. ايه سلبيات انك تفضل قاعد هنا وايه مزاياها برضه ..

يعني قول انا لما بقعد في السعوديه بحوش مبلغ كذا .. بس خسران في المقابل كذا وكذا..

وبرضه لو رجعت مصر اعمل حسابك انك مش هتحوش حاجه ولا تعمل مشروع ( جدلا ) لكن في مميزات كذا وكذا تانيه ..

واكيد متنساش وانت بتقيم الوضع انك تكتب السلبيات التانيه الغير مرأية .. يعني فاكر زمان من 8 سنين ايه طلعك من مصر اصلا هل كان البحث عن الفلوس بس ؟ ولا كان في مشاكل مثلا مع وضع معين .. طيب هل الوضع ده تغير ولا هل المشاكل دي انحلت ؟ كل الامور دي لازم تكون في حسبانك وانت بتفاضل بين الوضعين ..

حاجه برضه مهمه جدا انك متحملش الامور اكثر مما تحتمل .. يعني ايه دخل انك بقيت 120 كيلو في ان السعوديه هي السبب .. مهو في ناس في مصر ووصلت الوزن ده واكتر كمان .. ربطك بين الامرين يدل ان عندك رغبه داخليه او ( هوى ) انك ترجع مصر .. على فكرة ده مش عيب .. حطه في اعتبارك برضه وانت بتقيم الوضع ان الميل النفسي لمصر مش للسعوديه .

بعد ماتحط كل الامور في اعتبارك اختار حاجه وحده بس او اثنين يكون لها الاولويه وتكون هي الباعث وراء قرارك النهائي ..

حط في بالك ان محدش بياخذ كل حاجه وصعب جدا انك تجمع كل شيء في وقت واحد .. فانت قرر صحيح ممكن السعوديه فلوسها اكتر بس يمكن الامان النفسي عندك اهم من الفلوس يبقى في الحاله دي مصر تكسب .. ويمكن العكس .. اللمه والاهل مهمين اوي بس في وضعك ممكن تكون الفلوس اهم يبقى السعوديه هي القرار وهكذا .

حط لنفسك فترة زمنيه معينة تاخذ بعدها قرارك .. يعني قول مثلا انا مش هفكر ولا هتخذ قرار غير في اجازه الصيف .. كده انت بتدي نفسك فرصة من هنا للاجازه انك تريح اعصابك وتبطل التوتر الي حطيت نفسك فيه بتفكيرك المستمر في فكرة العوده .. كده ممكن تاخذ قرارك بهدوء وبعيد عن الضغوط الي ممكن ميكونش لها وجود اساسا وتكون انت الي اختلقتها بطول الحاح الفكرة عليك ..

واكيد طبعا هتستخير دلوقت وتنسى الموضوع لغايه موعد الاجازه او الوقت الي قررت تاخذ قرارك فيه .. هترجع تستخير تاني طبعا وقتها وباذن الله من هنا لغايه مايجي الوقت ده هتكون الامور اتضحت امامك بشكل اوسع وتقدر تاخذ قرارك بثقة اكبر .

تم تعديل 14 مايو 2009 بواسطة doha

[نهله عادل نور]

السلام عليكم

اخي الكريم اولا انت عندك كم سنه وده المهم وعايش في اي منطقه وقيم حالتك لو رجعت مصر هتشتغل ايه ومشروع ايه اللي هتعمله وانت عايز ايه وقارن بين يوم ما قررت السفر كنت محتاج ايه وحققته الان ولا لاء كل هذه امور لا بد ان تاخذها في الحسبان وبالفعل متخدش قرار وانت هناك زي ماقال احد الاخوه ارجع مصر اجازه شهر وفكر وخد القرار من مصر

[التونسى]

ال100 الف يدوب تجيب بجزء منهم تاكسى على الزيرو .. مش عارف هل ممكن مدينتك يكون مشروع التاكس مربح فيها والا لا ... وهل العمل كسائق ممكن لا يناسب منزلتك او بريستيجك بين اهللك

التاكس عاى العموم يبقى بتاعك وتشتغل عليه براحتك ..ومحدش ريس عليك.. وبرده تدور على عمل خاص بمهنتك الاصليه .. والتاكس تخليه 4 ساعات فى اليوم يعنى ..

بقية الفلوس تخليها للظروف .. لا تضع البيض كله فى سله واحده

دى فكرتى وربنا يوفقك لما فيه الخير لك ولاسرتك

[amrkhaled]

السلام عليكم ورحمة الله وبركاتة

اشكركم جميعا للاهتمام والرد عليا بهذة السرعة علما باننى اقدر ذلك جدا جدا

بالنسبة للأخ ( سهل جدا )

انا اشكرك كثيرا على نصيحتك لاكن انا عندى رأى مخالف قليلا لك وهو ان الازمة العالمية هى الان فى مصلحتنا نحن وذلك لنزول اسعار الكثير من مستلزمات الانتاج والايجارات مع استمرار نمط الاستهلاك الذى لم يتغير لذا انت الان تستطيع ان تؤسس مشروع بثلثى القيمة السابقة وعل هذا قيس الكثير من الامور

اما بالنسبة للاستخارة فأكيد سنستمر فى الاستخارة بالتوازى مع التفكير علما بان انا فكرت كثيرا فى موضوع تأجيل القرار لاتخاذة من مصر اثناء الاجازة لاكن انا فكرت كتير الاجازة كل سنة بتاخد منى حدود 15 الف جنية مصاريف من تذاكر لية انا والاسرة وهدايا ومصاريف اثناء الاجازة يعنى يكون حرام ان انا انزل واصرف المبلغ دة وبعدين اجى اقرر النزول نهائى يكون انا خسرت كبير كمان الوضع فى مصر مبيسمحش للواحد انة يفكر كويس لان على العكس مصر فيها ضغوط كثيرة ولا يوجد وقت كافى فالاجازة مدتها شهر واحد كل سنة والناس فى مصر متشائميين جدا فلو سألت اى حد اية رأيك يقولك خليك عندك دة الوضع هنا وحش جدا وانا لاقيت انة من الاحسن متسألش اللى فى مصر لانهم واقعيين تحت ضغط نفسى اكبر من اللى عندنا احنا ورايهم دايما رايح فى اتجاة خليك فى المضمون السعودية احسن من مصر والحاجات دى اللى هية فى رأيى مش مظبوطة مصر معدلات الاستهلاك فيها كبيرة جدا وتكلفة انشاء المشاريع فيها معقولة ولاكنها تحتاج للمغامرة والمحاولة كثيرا وعدم الاستسلام امحاولات الاحباط واليأس

كما اشكر كل من الأخت نهلة و doha

على المشاركة والنصيحة الغالية كما احب ان اعلق على المشاركة بتوضيح ان انا عندى 33 سنة واعمل بوظيفة مندوب مبيعات مما يجعلنى موضوع تحت الضغط المستمر لتحقيق التارجيت الخاص بالبيع والتحصيل حتى اصبح الموضوع ممل جدا بالنسبة لى كما ان المسؤلية الملقاة عليا كبيرة جدا تحملتها طيلة هذة السنين لاكن الصبر قارب على النفاذ وانا فعلا حاولت اقارن بين النزول والاستمرار فى السعودية بكافة المقايس

بالمقياس المادى... لقيت ان الامور غير متضحة من ناحية مصر انا هنا فى السعودية ادخر سنويا الان فى حدود 40 الف جنية لاكن لما بفكر فى مصر مش عارف هل استطيع بالمبلغ المتوفر معى ان افتح مشروع يدر عليا دخل حتى ولو نصف هذا المبلغ ولا لاة مش عارف رغم انى على دراية تامة بالمشاريع والادارة والخبرة الواسعة

وبالمقياس النفسى ... ايضا مضطرب لان وضعى النفسى فى السعودية مش كويس انا بحب التجديد والخروج والناس والحياة والاهل والسعودية حرمانى من دة كلة

اما بالنسبة لمصر فتتوفر فيها كل اهوائى بس المشكلة ان انا ما زالت عندى رواسب نفسية من الحالة النفسيى اللى كانت عندى قبل السفر للسعودية وطبعا مع مشاهدة برامج التوك شو واحمد المسلمانى يصورون لنا ان مصر كل شىء فيها وحش المية والاكل والهوا والفساد والبلطجة وعدم الامان وان افكر فى هذا كثيرا

ومن هذا كلة يتضح لكم كم الحيرة والتضارب الموجود فى تفكيرى.... ماذا افعل

والسلام عليكم ورحمة الله وبركاتة

[se_ Elsyed]

الـ 100 الف جنيه ولا يعملوا حاجه في مصر الان

واتفق مع ضحى في ان الامور لا تُقاس هكذا

فلو عندك فكره لمشروع معين او عايز ترجع على وظيفة محددة موجودة يبقى اتوكل على الله

لكن تنزل كده بقرار انفعالي ... هاتبقى عملت زي اللي موجود في مصر وساب عمل كويس مرتاح فيه عشان اسباب نفسية شخصية وقعد في البيت يدور تاني على شغل بالرغم من ان كان عنده فرصة انه مش مضطر يسيب الشغل الا اما تكون في فرصة في ايده

الحل الوحيد انك تقعد مع نفسك وتحلل الامور انت وزوجتك او انت بس عشان ما يبقاش عليك ضغوط وتشوف اسباب التعب النفسي ده ايه وتحاول وضع حلول لها ومنها على فكرة تغيير الجو .. يعني روح ماليزيا مثلاً او اي دولة فيها طبيعة خضراء كويسه يمكن في مصر فيها ضغوط برضوا

لكن تقول 100 الف او نص مليون فده مش مقياس تبني عليه قرار

على فكرة يا اخ عمرو ... ممكن ناس تاخد قرار العودة في توقيت سليم ومايكونش معاها ولا مليم وتنجح .. لإن تأسيس اي مشروع مش شرط يقوم على توافر رأس المال ... كلام مش معقول مش كده ؟

طب خد عندك .. لي اصدقاء اوفياء معاهم راس المال ومحتاسين يعملوا ايه وبيعرضوا عليه نتشارك في مشروع انا ابقى صاحب فكرته وندرسة كويس وننفذة وانا ابقى شريك بالادارة ؟

شوفت بقى ان راس المال مش مشكلة

وممكن يكون معاك مليون جنيه وتحطهم في مشروع كتاكيت او حمام - اخضر بقى او احمر - وتيجي الفرا تاخده وتقعد تغني ظلموه

اكثر موقف اثر في في عملي حدث من 5 سنين كده ... لقيت واحد مصري عنده ييجي 60 سنة جاي يقدم على شغل .. فاستغربت واقعدت اتكلم معاه واتعرفت عليه .. وسألته عفواً يا عمو يعني : ازاي ؟

فوراني شهادات خبرة عنده وانه اشتغل لفترة طويلة سكرتير في سفارة الامارات وكان مرتبه كويس جداً ونزل مصر عمل مشروع وكان ولاده كبروا والمشروع فشل فشل ذريع لانها صناعة حساسة جداً وهي صناعة تربية الدواجن فخسر تحويشة عمره واولاده كل واحد عنده عربتيه وفي الجامعة وواخد على مستوى معين زهقوا منه وهو خسران فأشترى تاشيرة بمهنة تعبانه وجه يدور على شغل من اول السطر

تخيل بقى انه لا كان يعرف انجليزي ولا كمبيوتر وان شغل السكرتارية اللي كان بيشتغله كان يدوي بحت ..... شي غريب !!!!!!!

[amrkhaled]

السلام عليكم ورحمة الله وبركاتة

اشكرك كثيرا يا اخى سى السيد على ردك المتميز ورأيك الحكيم

ولاكن انا لاحظت شىء فى كلامك انا مش قادر افهمه هل انت تتجاهل

اهمية العامل النفسى فى التأثير على القرارات لو انك تقصد ذلك فانا

اقول لك انى اقع تحت ضغط هائل من الظروف التى تجعلنى افكر فى

كلا الاتجاهين فالاتجاة الأول وهو (الاستمرار فى السعودية) يدعمة الحاجة

المادية والحياة الكريمة والمرفهة لى وللاسرة و يقف ضدة الحياة المملة

الموجودة فى السعودية الخالية من الروح والمخاطر الناتجة عن المسؤليات

الكثيرة فى العمل فالسهو مثلا ممكن يؤدى لمشكلة كبيرة جدا وكمان البعد

عن الاهل فأنا امى الان تعيش بمفردها فاخى يعمل فى دبى وانا بالسعودية

والاتجاة الاخر ( النزول مصر نهائى ) يدعمة اننى سأكون بجانب امى ارعاها

واخذ بيدها كما اننى سأكون فى البيئة التى احبها والتى احب ان ينشأ فيها

ابنى كما اننى احب العمل الخاص واحب ان اخوض التجربة علما باننى مسلح

بالخبرة والافكار التى اثق انها على قدر كبير من الفاعلية ويقف ضد هذة الفكرة

الخوف من الفشل وعدم القدرة على العيش بنفس المستوى اللى احنا

متعودين علية

معادلة صعبة جدا جدا .... ياريت تساعدونى فى حلها

[se_ Elsyed]

يا عمر العامل النفسي لما يكون مساعد او محايد في اتخاذ القرار يبقى مرحباً به

انما لما يكون عامل ضاغط يشوش التفكير ويعمي العين عن اتخاذ القرار الصحيح ..

يبقى شيء مش محبب وممكن يؤدي الى الندم

اي حد هاينصحك حتى لو اخواتكم ... عمرهم ما هايحسوا بيك مثلما تحس انت بنفسك .اذاً فنحن نتكلم بشكل عام وبرؤيا مغيرة لرؤيتك

[mama nona]

السلام عليكم

يا اخى الفاضل

كتير اوى الواحد بيمر بنفس المرحلة ال حضرتك فيها الان من ضغط نفسى وده طبيعى لاننا بعيد عن الاهل وضغوط العمل هنا صعبة وكمان طبيعة الحياة الجافة فالبلد هنا

وكتير اوى بنفكر نرجع مصر ونقول كفاية بقى

بس اتخاذ القرار فالحالة ال حضرتك فيها ده اكبر غلط

حضرتك تنزل مصر اجازتك وبلاش موضوع الهدايا ده طالما امكانياتك لا تسمح

وشوف الناس عايشة ازاى وخطط لمشروع من الان وادرسه كويس وانت فمصر وشوف ال هيكون ؟

لو حسيت انه هترتاح وتعيش عيشة كريمة انت واسرتك ارجع استقيل وانزل مصر

مع العلم ان الناس ال فمصر كلهم عايشين وكويسين وفيه ناس كتير اوى عايشين احسن مننا احنا ال فالغربه ومرتاحين وعال العال

اذا كان طبيعة عملك فيها ضغط نفسى عليك ممكن تدور ع وظيفة اخرى تناسب مؤهلاتك وميكنش فيها ضغط

اذا كانت طبيعة البلد الجافة هى ال وصلتك للحالة دى تقدر تدور ع فيزا لمكان تانى وتبدأ هناك

ال 100 ألف دول ميجبوش شقة

والامور فمصر غامضة الان ولا اسعار نزلت ولاحاجة كل حاجة زى ما هى

اجل اتخاذ القرار فالوقت الحالى

وربنا يكرمك ان شاء الله وتتحسن امورك

[amrkhaled]

السلام عليكم ورحمة الله وبركاتة

اشكرك جزيل الشكر يا ( mama nona ) على الرد والاهتمام

وانا سعيد جدا جدا ان انا الاقى ناس بهذة الاخلاق الجميلة و

انا اقصد جميع الاخوة اللى شاركوا فى الموضوع بجد انتو ناس

كويسين جدا جدا وربنا يجعل ذلك فى ميزان حسناتكم لان انا

حسيت انكم شاركتونى اللى انا فية شوية وبالطبع انا استفدت

كتير من الكلام وهحاول اعمل بية ان شاء الله

والسلام عليكم ورحمة الله وبركاتة

[موكا]

السلام عليكم اخى عمرو:

1- اولا متقطعش رزقك بايدك لان الشغل مش سهل دلوقتى مع وجود الازمة المالية و تسريح العمالة.

2- ثانيا قرار الرجوع ماينفعش يكون بالعواطف او الميول بمعنى اذا كنت ميال انك ترجع الاول انزل اجازة و دور على شغل كويس كانك نزلت نهائى فعلا و لما تلاقى و تطمن لانه فايدك ارجع صفى حالك و مالك و ارجع اقعد مع والدتك و اكيد مادام نيتك تكون معاها اكيد ربنا هايكرمك

3- بالنسبة لل100000 جنيه مش عارفة بس كل الخبراء الماليين اللى طلعوا مع عمرو اديب فالقاهرة اليوم بيقولوا الكاش هو الحل يعنى خليهم فوديعة فالبنك و سيبهم فحالهم للزمن و اكتفى بمرتبك

4- اما انا فراييى الشخصى انك تجيب بيهم شقة للاستثمار و اقول للاستثمار يعنى مش لازم تكون فحتة حلوة اوى يعنى مانت مش هاتسكن فيها و لا لازم تكون كبيرة و اعتقد شقة او محل بالمواصفات دى هاتبقى مش غالية اوى يعنى فحدود 90الف او 100000

و طبعا استخير ربنا و ماتتسرعش فاتخاذ القرار يمكن تترقى فوظيفتك فالسعودية ووقتها تقدر تجيب والدتك تعيش معاك

[ziad]

السلام عليكم يا عمرو باشا

أحنا قريبين فى السن وإحنا الأتنين بنحب الأنتخه واللمه و قعدت القهوه ووقفة الناصيه

أحنا الأتنين متغربين ولا عيله ولا أصحاب بس أنا عندى إنفتاح وأنت عندك إنغلاق,أنا عندى معاصى ومفيش ولاد بلدى ولا لغتى وأنت عندك لغتك وتلاقى ناس من بلدك وكمان فيه نوع من التدين ومحاولة البعد عن المعاصى

أحنا الأتنين قرفانين من الغربه وأيامها وكل منروح الشغل نبقى بنعد الساعات عشان نمشى وبعدين نعد الأيام عشان ننزل

يا أخى فى الله الغربه صعبه لكنه إستثمار ليك جزئيا لكن لأولادك كليا,هل فى مصر فى مشروع يسمحلك بفائض 40 ألف جندى؟؟؟؟ طبعا فيه لكن أكيد رأس ماله أكتر من 100 ألف الى عندك,فعلا الأزمه الأقتصاديه أثرت على الناس فى مصر بالأيجاب,التضخم بقى 11 % بعد مكان 22 فى شهر أغسطس بس بصراحه كده الأقتصاد بدء يتعافى وفيه مؤشرات كتير على كده,فى خلال سنتين الأسعار هترجع فوق,ده معناه أن دلوقتى فى فرصه طبعا بس لأصحاب الكاش العالى والخبره الواضحه,إنما لو هتنزل ترمى كل ما تملك وكمان لسه مفيش خبره أنصحك بالتريث

نصيحه كمان,أوعى تحط فلوسك تحت البلاطه أو فى بنك ومش هقلك عشان الناحيه الشرعيه عشان الحوار ده قتل بحثا وكل واحد عارف الحلال من الربا لكن هقولك كده لسبب التانى,الفلوس بتفقد قيمتها الشرائيه مع الوقت ال 9 % ربا سنوى الى هتاخدهم ربا من البنك,التضخم هيأكل قيمتهم الشرائيه فى 3 شهور,عايز إستثمار يحافظ على قمته فى مقابل التضخم عند العقار,شقه 60 ,70 متر فى الزهراء ولا قباء ولا السلام,تتأجر وتجيب دخل وتحافظ على فلوسك من التضخم أو دهب وتعينه معاك أو فى خزنه فى أى بنك,

نصيحتى ليك أركب الطيران الرخيص الى بيطلع أسكندريه من الرياض,متاخودش هدايا كتيره وأشرح للناس إنها ظروف صعبه,شوف سوبر ماركت موقعه مظبوط,عليك وعلى الصندوق الأجتماعى,أعمل المشروع ده,سبيه فى إيد أمينه وأرجع السعوديه ,كسب ومشى أو بيغطى مصاريفه وفى بوادر نجاح,أنزل محصلش على فتره بين 6 شهور وسنه يبقى أنت مخسرتش وأديك حاولت

[وهيج الجبيل]

هم الاخوانا ما قصرو معك فى الرد ولانصيحة وربنا يهديك للطريق الصحيح

بس انا لى تعقيب صغير

نصيحتى ليك أركب الطيران الرخيص الى بيطلع أسكندريه من الرياض,متاخودش هدايا كتيره وأشرح للناس إنها ظروف صعبه,شوف سوبر ماركت موقعه مظبوط,عليك وعلى الصندوق الأجتماعى,أعمل المشروع ده,سبيه فى إيد أمينه وأرجع السعوديه ,كسب ومشى أو بيغطى مصاريفه وفى بوادر نجاح,أنزل محصلش على فتره بين 6 شهور وسنه يبقى أنت مخسرتش وأديك حاولت

بلاش نصيحة لوجة الله اخوك قولت كدة برضة ونزلت وعملت مشروع وقولت ارجع على السعودية ونشوف اية نظامة كسب ومشى حالة برجع وكانت النتيجة انى خسرت 70000 الف جنية لو نويت تعمل مشروع لازم تكون موجود فية وانت اللى تشرف علية ((( اماااااااااااان ))) غير كدة لا

[حماده عبده]

أخويا يا حبيبي بجد مصر حالها صعب جدا شيل فكرة النزول النهائي دي من دماغك نهائي لأني أنا متأكد أنك هاتندم أقسملك أني في ناس مش لاقيه تاكل في مصر ياعم دي الناس بتنزل من بيوتها عشان يستفزو بعض وأي حد مش طايق لحد كلام ياعم دنا كنت راكب تاكسي وجت سياره أمامنا وقفلت علينا طبعا سائق التاكسي ياعيني من الخضة راح يكلكس ويديله نور لأنه حتي مأعتزرش تخيل أنه يطلع ضابط صغنون شكله لسه متخرج يعمل أيه أخونا الضابط يطلع الطبنجة من جانبه ويطلع أيده من شباك السياره ويشاور لسائق التاكسي الغلبان بيده الفيها الطبنجة ويقوله أطلع ياكلب ياأبن ..........ويابن وأنت تقولي أرجع مصر ياعم ده لولا الملامه كانو أصدرو قرار جمهوري بأعدام الفقراء من مصر ده الخارج منها مولود والداخل مفقود بص ماتخلنيش أتفتح في الكلام خليك عندك من الأخر وأبقي تعالي أجازه

[waaaf]

أنا مش هاقولك نصايح ولا مواعظ لكن خذ عندك إللي حصلي وقرر بعدها :

بعد سنوات من الغربة هنا في السعودية قررت زيك كدة أرجع مصر وأعيش زي باقي خلق الله بين أهلي وأصحابي وكان معاي 96 ألف جنيه بالظبط . وكنت قبل مانزل براسل

( أفاضل القوم ) من ذوي الخبرات والإستعداد للمشاركة منهم دكتور في كلية الزراعة جامعة الأزهر لكن من أول لقاء في مصر كل واحد منهم ( عمل قطة ) ولحس كل كلامه معايا أيام ماكنت في السعودية وكل واحد كانت له حجة شكل أو شروط شكل مثل أن المشروع يكون بإسمه هو بس وطبعاً أنا في ( الباي باي ) . المهم إشتريت عربية ملاكي وقررت أستغل خبرتي التجارية وروحت لمصانع البلاستيك الكبيرة في العاشر من رمضان وغيرها وإتفقت مع بعضهم أشتري منهم مخلفات البلاستيك الطن بـ 2000 جنيه وقبلها لفيت على مصانع البلاستيك الصغيرة إللي في شبرا الخيمة وغيرها وإتفقت على بيع الخامة ليهم بـ 2300 إلى 2500 جنيه للطن وإشتغلت كويس لكن وعلشان مكنش عندي مخزن أو عربية نقل بتوعي السواقين عرفوا منين بجيب ولفين باودي وباعوني في لحظة مع أصحاب المصانع في الإتجاهين . المهم الشغلانة باظت . وحاولت غيرها وغيرها لكن في الآخر إنتهى بيه المطاف إني رجعت تاني السعودية في وظيفة أقل من إللي كنت فيها ورصيدي يادوب يكفي أعمل شقة وإستقدام جديد وبأبدأ من تاني . لكن برضه أنا عندي أمل إني أعمل رصيد كويس وأرجع مصر وربنا يوفقني فيها ( أصل هي بلدنا ومانعرفش نعيش غير فيها ) لكن بعد تأني شديد ودراسة متأنية لأي فكرة مشروع ومش أي واحد يقولي تعالى نعمل المشروع الفلاني أجري وراه ........

آسف للإطالة وإستخدام عبارات ركيكة لكن حبيت أعرض تجربتي يمكن تفيد

[amrkhaled]

السلام عليكم ورحمة الله وبركاتة

بالنسبة للاخت ( موكا) اشكرك جزيل الشكر على النصيحة لاكن انا عاوز اقولك ان انا مبفكرش بالعواطف ولا حاجة

بس ممكن كلامى يوحى بكدة علشان انا كتبت الموضوع وانا فى غاية الانفعال بس فى الحقيقة انا عقلانى جدا

ومبخدش قرار الا واكون حسبتة كويس يعنى مثلا انا قولت ان انا بحوش فى السنة 40 الف جنية فى سؤال مهم جدا هل انا مقدرش اعمل المبلغ دة وانا فى مصر وفكرت كتير ولاقيت ايوة ان انا ممكن اعملة ان شاء الله ولو سألتينى اية اللى هعملة اقولك كتير ومنها بعض المشاريع السهلة جدا كمشروع تاكسى اجرة مثلا انا من مدينة المنصورة والتاكسى عندنا ممكن يجيب فى حدود 2000 جنية بعد اجرة السائق+ اصلاحات التاكسى وخلافة

وكمان لان التاكسى سيكون لة سائق يعنى انا كمان ممكن اشتغل جنب التاكسى وعلى فكرة الموضوع دة ناس كتير مجرباة يعنى اللى قاصدى اقولة ان المشاريع فى مصر كتيرة وانا والحمد لله خبرة كبيرة جدا وان شاء الله فى مواضيع قادمة سأتكلم معكم عنها للاستفادة ولاكن المشكلة الحقيقية تكمن فى عدم الثقة فى النفس وفى الاوضاع المتغيرة للاسوأ فى مصر

وبالنسبة للأخ (ziad ) اشكرك على الاهتمام والمشاركة وكمان على التشابه اللى انتة شايفة بينى وبينك انا يا أخ zaid اتفق معك تماما ان انا بحب مصر ومبحبش العيشة فى السعودية بس مش علشان انا بحب الانتخة بالعكس لان اللى بيحب العيشة فى مصر يبقة بيحب الكفاح والعرق والبهدلة والمرمطة هية المشكلة ان احيانا الواحد بيفكر مع نفسة ويقول الى متى سنستمر فى هذة الطاحونة متى سنستطيع العمل والعيش معا وليس العمل فقط وكل سنة نقول نفس الكلام احنا اللى عملناة لسة ميكفيش نعمل بية حاجة الى متى مش عارف

وبالنسبة للاخ( حمادة عبدة) انا طبعا بشكرك جدا على الرد وعاوز اقولك حاجة انك حطيت اديك على الوتر الحساس اللى عندى . الاسباب اللى انتة ذكرتها تمثل حوالى 90% من اسباب بقائى فى السعودية بس انا هسألك سؤال هل عندك امل ان الحاجات دى تتغير فى المستقبل القريب طبعا هتقولى لاة اذن يبقى مفيش فايدة من تأجيل مواجهة الواقع الا اذا كنت عايزنى اعيش فى السعودية علطول ودة طبعا مستحيل وكمان الامور اللى انتة ذكرتها معرض ليها الغنى والفقير البلد كلها فيها حالة من الفوضى الاخلاقية والدينية

بالنسبة للاخ ( waaaf ) اشكرك على ردك و على عرض تجربتك اللى هية اكيد فادتنى كتير بس انا عاوز أقولك حاجة انا دخلت حدود اربع مشاريع تجارية وصناعية مختلفة وكان مصيرها الفشل اما لعدم توفر رأس المال او لنوعية المشاركة او لعدم الخبرة ومش معنى ان الواحد فشل يبقى نستسلم انا اعرف ناس كتير بمبالغ اقل كثيرا من المبلغ المتوفر معى و نجحوا نجاحات باهرة تستحق الدراسة بس هية المشكلة فى الحقيقة وخلينا نعترف جميعا بها اننا كلنا عندنا عفريت اسمة مصر دائما يوسوس لنا بالفشل لاننا جميعا اتينا السعودية بعد قصص من المحاولات الفاشلة كما اننا جميعا وجدنا ضالتنا المنشودة فى السعودية من رفاهية العيش وسهولة الرزق مما ادى الى اننا اصبحنا لا نحب ان نتحدث عن العودة وكمان اللى بيقولك خليك فى السعودية علشان 100 الف قليلة كلمة لما يبقوا 200 هيقولك بردة دول ميجيبوش عربية ولما تقابلة لما يبقوا 300 هيقولك الاسعار دلواقتى زادت والشقة بقت غالية والحياة اصعب وهكذا حتى تستيقظ صباح يوم تجد نفسك وقد وصلت لسن الخمسين وتقول ان اولادك يحتاجون لشقة همة كمان يعنى دايرة مش هتخلص انا بقالى حوالى 8 سنوات ومروا بدون ما احس وكذلك اللى جاى يعنى لازم نقف وقفة مع نفسنا ونقول هل احنا فى الدنيا للعمل فقط وهل لو كان العمل فقط هو المطلوب الا نستطيع ان نعمل فى بيئة حلوة نحبها ونكون وسط اهلنا ونحاول فى الايام اللى احنا فيها نفتح مشروع يكبر مع الايام حتى لو كان صغير او صغير جدا دى الايام اللى جاية صعبة جدا جدا احنا انهاردة فية بعض الافكار اللى ممكن تعملها ولاكن فى المستقبل القريب لن يجد الشاب حتى ولو امتلك المال ان ينشأ مشروعة لان البلد لن تحتمل المزيد مستقبلا كما ان حيتان البلد هتكون اخدت وكوشت على كل حاجة دلواقتى ممكن تيجيبلك حتة ارض وتزرعها لاكن مستقبلا لن تجد متر ارض لانها ستباع دلواقتى ممكن تعمل مصنع ينتج الملابس ويشتغل لاكن فى المستقبل ستغذو الصين والدول العملاقة والكيانات الكبيرة نحن فى هذة الفترة اخى الكريم فى الفترة التى تسبق العاصفة اما انك تنشىء شىء تستطيع الاعتماد علية مستقبلا واما لا فائدة من تراكم رأس المال الذى سيستهلك كلة فى السكن والفرش والعربية وترجع تدور على مجال للعمل فلا تجد

والسلام عليكم ورحمة الله وبركاتة

[abohaya]

تحياتى لكل اعضاء المنتدى واللة يا عمرو انت جيت على الجرح لانى بقالى 8 سنين فى السعودية و مندوب مبيعات فى مجال الادوية وعمرى 34 سنة والتفكير دة بيسيطر علينا خاصة مندوبى المبيعات وخاصةالى ماخدش الفرصة للترقية زى حالتى بس المشكلة ان مدير المبيعات و مدير الفرع لازم عندنا صيدلى و فى السن دة الكل يبدأ يركز معاك و انت تحاول اثبات ان وصولك للسن دة ما يفرقش فى كفاءتك فى الشغل و تحقيق الارقام و دة بيسبب للواحد حالة من الضغط المستمر واحاول افيدك بتجارب ناس اعرفهم هنا (و فى المستقبل ربنا يكرمنى و اعمل زيهم لانى غير متحمس نهائيا لنزول مصر ) ممكن بخبرتك و علاقاتك تستثمر المبلغ دة هنا و تشوف واحد ابن حلال تنقل كفالة علية و تشتغل لحسابك ووقتها حيخف الضغط عليك من التارجيت و المديرين و خلافة و ان شاء اللة الدخل بيتحسن كتير ووقتها تقدر تنزل مصر اكثر من مرة فى السنة او ممكن تجيب الوالدة تعيش معاك لانه فى طبيب ساكن معايا فى العمارة جايب والدتة و قاعدة معاه قانونى يعنى مش زيارة و لا عمرة ولو قررت النزول بالتوفيق ان شاء اللة ودى ارزاق لانى شفت ناس فشلت هنا فى السعودية و ربنا كرمهم و العكس وزى ما قلتلك دى ارزاق و اهم شىء ما تخدش قرار و انت منفعل لانه بعد ما تسيطر عليك الفكرة دى لو مديرك كشر فى وشك الصبح حترمى الاستقالة فى وشه و ربنا يوفقك ان شاء اللة

[elfakhrany]

اخى الفاضل عمر

نصائحى الشخصية لك كالأتى :-

1- فى حالة الرجوع الى مصر والدخول فى اى مشروع لابد أن يكون معك مبلغ كافى من السيولة لتأمين مشروعك فى البداية ويكون على الأقل 30 % من قيمة المشروع ( اذا بدأت مشروعك براس مال 100 ألف احتفظ ب 30 ألف اخرى للتأمين )

2- عند نزولك الأجازة هذا العام أستثمرها فى الفحص والتدقيق عن المشروعات الممكن البداية بها وايضا معرفة الايجارات و النمط الاستهلاكى سواء اذا كنت تود العمل فى مجال السلع الاستهلاكية او مجال الخدمات ؟

3- ابدأ بعمل دراسة جدوى عن مشروعاتك المقترحة وقم بتقييم التكاليف بعدها قم بحساب الارباح المتوقعة وايضا المصروفات المتوقعة من واقع الأشخاص اللذين قاموا

بنفس المشروع قبلك :blink:

4- ابدأ بعمل مقارنة بين المشروعات المقترحة من حيث نسبة الربحية و أيضا مستوى المخاطرة ( وكما درست بأدارة الأعمال كلما زادت نسبة المخاطرة كلما زاد معدل الربحية)

5- التخطيط المستقبلى لمشروعك ووضع أهدافك فى حالة نجاح المشروع أو الخطط البديلة فى حالة فشل المشروع لاقدر الله :lol:

6- معرفة ما هى الالتزامات المطلوبة منك فى مصر ( مصاريف - ايجارات - مدارس أولاد - طعام وشراب ) وهل ارباح مشروعك تغطى هذة الالتزامات أم لأ :unsure:

أظن عند اتباع هذه النصائح ستكون انشاء الله قادر على اتخاذ القرار السليم فاذا اخترت الرجوع الى السعودية ستعود بعد الأجازة وانت على قناعة أنا السعودية الأفضل لك أما اذا اخترت البقاء فى مصر ستكون بادرت بالتخطيط الجيد لتقليل المخاطر و لن تحتاج للعودة مرة أخرى للخروج النهائى ( كما أعلم ان مندوبين المبيعات يقومون بتصفية المديونية كاملة قبل النزول لأى اجازة )... وشكرا جزيلا

تم تعديل 16 مايو 2009 بواسطة elfakhrany