هل تكفى 100 الف جنية لقرار العودة لمصر

[alex man]

صديقى عمرو

قبل اتخاذ مثل هذا القرار يجب دارسة اولا المشروع دارسة جيدة

ثانيا لاتضع راس مالك كله فى المشروع ضع نسبة 50% من راس المال

ثالثا اى مشروع لايجنى ارباح قبل مرور سنة (بمعنى ادق لاتستعجل الربح)

رابعا والاهم يجب ان تحمى نفسك من غدر الزمان لانه ليس له امان واحب انا اعلمك شىء مهم جدا وانا هناك 80 مليون مصرى عايش فى البلد (ومادابة على الارض الا وعلى الله رزاقها) نقول يوجد 20 مليون خارج الوطن و10 مليون معهم فلوس وعايشين كويس يبقى من الحسبة 50 مليون كيف عايشين اجب على هذا السوال انت :lol:

[alaa elshafiey]

يأةةةةةةةةةةةةةةةةةةةةةة

أخى عمرو :-

انا مش عارف بجد موضوعك جة فى وقت صعب على كل الى فى المنتدى بجد وانا واثق من كدة كلة بيفكر تفكيرك ونفسة يعمل زايك بالظبط

ولكن الاكثيرة لا يريدون ان يظهروا انهم يحبذون هذا القرار قرار صعب جدا وانا مثللك بالظبط والله ويمكن اكتر منك بصراحة قرفان من المكان الى شغال فية بس

المشكلة فين

كلة يقوللك انزل مصر أجازة وأحنا بنقوللك اهووووووووو انت الى هترجع وتأخد قرار الرجوع لوحدك عشان الحياة فى مصر صعبة جدا واصبحت أكثر قساوة من قبل بالفعل

صديقى العزيز وانا أكتب هذا الكلام لك الان افكر ان انزل مصر بلا رجوع لان الغربة بالفعل شئ ليس جيد

ولكن فكرت ماذا عن العمل هناك ماذا عن المصاريف التى سوف تلحقك من كل مكان

وصدقنى الموضوع صعب ولكن يمكن ان نفكر مع بعض بطريقة اكثر عقلانية

وهى انك تعود الى مصر ان شاء الله ترى بعينك وتدرس كم من المشاريع وبعدها كرر وانت هنا فى السعودية يمكنك ان تشارك

أحد اقرب المقربين لك من اصدقائك ولكن النصيحة هى ان تشارك صديق يكون لدية مشروع قائم بالفعل ويكون شغال

وانت تأخذ منة مثل الربح حتى قبل نزولك ان شاء الله تطلب مبلغلك بالكامل ان كان لا يريدك ان تكون شريك لة

لا أعلم تفكير صح ام خطأ ولكن نحن نتناقش ويمكن ان يكون خير

أخيرا صديقى اشكرك على موضوعك لان التفكير سوف يقتلنى بالفعل

اخوك علاء

[عادل أبوزيد]

مسألة العودة إلى مصر مسألة حيوية و تستحق أن يفرد موضوعات عدة و ليست موضوعا واحدا . و أظن أن هناك العشرات من التعقيبات على هذا الموضوع ما زالت فى صدور أصحابها.

ما سبق كان إستهلالا لابد منه

لا أنوى تكرار ما سبق قوله و لكنى سآخذ منعطفا آخر فى التعقيب ، لابد أنك تلقيت و تتلقى كل يوم مئات النصائح بأن تصرف نظر عن العودة و قد تزيد حماسة هؤلاء الناصحين إلى محاولة التأثير عليك بكل قوة ممكنة و يتحدثون معك كما لو كنت مقدما على الإنتحار و العياذ بالله.

الخلاصة أنك تتعرض لضغط كبير من المحيطين بك للعدول عن فكرتك.

من جانبى أقول لك من حقك و من الطبيعى أن ترغب فى العودة و هى رغبة طبيعية بل لعلها أكثر طبيعية من فكرة البقاء بعيدا عن مصر.

هناك الكثيرين الذين خرجوا و يعملون خارج الوطن فى ظروف متفاوتة و هناك شبه شعور عام فى مصر و فى أوساط معينة بالذات أن الخروج من مصر بمثابة ميلاد جديد و يغذى هذا الشعور كم و شكل الهدايا التى يعود بها العاملون فى الخارج فى أجازاتهم.

هذا يخلق نوع من الضغط الإجتماعى سواء من أجل الخروج أو من أجل عدم إنهاء فترة العمل بالخارج.

أردت فقط أن أطمئنك أن شعورك بالرغبة فى العودة شعور طبيعى و إنسانى و منطقى ، و لو طبقت مبادئ الحساب البسيط فأنت الرابح و خاصة لو إحتسبت عمر أبنائك و ما يفقدوه كل يوم من قدرات على الإندماج فى الوطن بعد العودة.

و من ناحية المشروعات طالما أنك إنسان طبيعى و طموحاتك طبيعية أى أنك لا تحلم أنك تعمل مشروع يضعك فى مصاف علية القوم بين يوم و ليلة فأنا متأكد أنك ستنجح و ستنجح نجاحا باهرا

قم بزيارة لتجار السبتية ووكالة البلح و الحمزاوى و الصندوق الإجتماعى و بالتأكيد ستجد فكرة ناجحة و خاصة أنك من الأقاليم حيث يمكنك الإستفادة من الفارق السعرى و الكيفى بين القاهرة و الأقاليم.

[ajdyc]

انا طبعا دي اول مشاركه ليا ف المنتدى الرائع اللي بيحيطه الجو الأسري ده

و انا شايف من معظم الردود بتاعة الناس انك متتخدش قرار ف لحظه ولا نتيجة اي ضغوط

و ده كلام سليم

بس انا كان عندي ملاحظتين

اياً كان المشروع الي هتعمله ف مصر ف 100 الف دول ولا حاجه يا راجل

و انت بتقول كمعنتدكش شقه و عندك اكيد عيال عاوز تربيهم و تصرف عليهم

و دلوقتي محدش بيجوز نفسهيا معلم و لازم تبص للمستقبل برضه

و اكيد انت عايس بمستوى معين و مش هتقدر تنزل عنه لما تروح

النقطه التانيه

انت بتقول بقالك 8 سنين ف المملكه و بتححوش تقريبا 40 الف ف السنه

طب ازاي 100 الف ؟

يا راجل دنتا ول بتحوش 10 الاف كل سنه كان هيبقى معاك 80 الف

اكيد فيحاجه غلط

انا شايف ان مبلغ زي كده شويه بالنسبه ل 8 سنين

و لو هتفضل بالمعدل ده يبقى مش مستاهله غربه

على فكره انا مهندس مدني خريج 2008

بس شغال مهندس مبيعات ف الرياض

و برضه ليا تارجيت و نسبه و كده

\وبتمنى التوفيق للجميع

[amrkhaled]

السلام عليكم ورحمة الله وبركاتة

الاخوة ( abohaya ) و ( elfakhrany ) و ( alex man ) اشكركم جميعا جزيل الشكر وجزاكم الله خيرا على النصائح الغالية اللى انا استفدت منها كثيرا بل انها تزيدنى ثقة بأن هناك من يدعمنى ويهتم لامرى

اما بالنسبة للاخ ( علاء ) فأنا بالطبع اشكرك واشكرك شكرا خاصا على دعوتك لى بكلمة صديقى التى كان لها تأثير بالغ عليا فأنا يشرفنى ان نكون اصدقاء ونتواصل فى الامور اللى تهمنا

اما بالنسبة للاستاذ / عادل الموقر

فأشكرك على اهتمامك بأخ صغير لك ومشاركتى بخبراتك التى يبدو لى انها ماشاء الله ممتازة كما اشكرك على دعمك النفسى لى ولموقفى بالرغم من ان كل المشاركات السابقة كانت تدفعنى للاتجاة المعاكس لاكن والحمد لله بعد مشاركتك رجعتلى كتير من الثقة فى النفس وزاد عندى الحماس

فجزاك الله خيرا ولا تنقطع عنا بالمشاركة فأنا سأكون دائما منتظر لمشاركاتك

وعلى فكرة انا اسمى خالد مش عمرو (عمرو دة اسم ابنى )

والسلام عليكم ورحمة الله وبركاتة

[ajdyc]

طب و أنا فين :blink:

[amrkhaled]

السلام عليكم ورحمة الله وبركاتة

الاخ ( ajadyc) اشكرك طبعا على رأيك ومشاركتك وانتة بتسألنى انتة فين ؟

انتة طبعا فوق راسى من فوق

ومرة تانية جزالك الله خير ونتواصل

[KAhamid]

بيتهيالي بالنسبة لمشروعك انت ممكن تروح الصندوق الاجتماعي للتنمية وهما هيظبطوك بجد

انا روحت ليهم وعندهم كل الخدمات اللي ممكن تتوقعها

[محمد عيسى]

رأيي هو العوده في هذا السن بعد التخطيط السليم لهذه العوده و ذلك حتى تلحق (تسمتع بالحياة) و خاصة ان هذا الحساس يفتقد تدريجيا مع التقدم في السن و زيادة الاعباء الأسرية.

بالنسبة لرأيي الشخصي .. وظيفة مندوب المبيعات مطلوبة جدا في مصر و مجزية جدا كذلك للمتميزين .. بعد ما تنزل مصر أجل مشروعك شويه و استنضف حته اشتغل فيها مندوب مبيعات برضه و عيش على مرتبك، اهو منها عودت نفسك على حياة أقل تحسبا لتقلبات الزمن، و منها مقربتش من تحويشتك، اشتغل في حدود سنة .. اعرف السوق و دهاليزة و ناسه .. و اتوكل على الله في الوقت اللي تشوفه مناسب و افتح مشروعك

موضوع المستوى المعيشي ده نسبي و تقبل نفسي .. و تذكر ((و ما من دابة في الأرض إلا على الله رزقها))

[KAhamid]

الاخ عمرو

انت ممكن كمان تعمل مشروع كويس ومربح بما انك من المنصورة

انك تعمل مشروع مضرب ارز وتصدر للخارج انا ليا صديق شغال في المشروع ده وما شاء الله بيدر عائد اكثر من ممتاذ خصوصا التصدير للخارج

يعني هو حاليا بيصدر الطن بحوالي 800 الي 820 دولار امريكي

يعني حوالي =800*5.5 = 4400 ج

تكلفتة عليه كالاتي

2200 ارز

1000 رسوم تصدير

يعني في هامش حوالي من 1000 الي 1200 ج بيلعب فيهم حسب الاسعار والكميات

انت ممكن تظبط علاقات في السعودية مع مستوردين بحكم شغلك كمندوب وحجم علاقتك المفروض انه كويس

اما عن تكلفة المشروع نفسة

انت هتحتاج مساحة مصنع تقريا 100 متر ممكن تاجرها

محتاج خط انتاج وده في حاجات كتير حسب دولة الصنع يعني في تركي وصيني وتيواني وهندي والماني ... والخ

وانا علي حد علمي ان خط كامل بدء من الفرز وازالة الطمي وحتي التبييض والتعبئة تقريبا هيكلفك حوالي 110 الف ج في المتوسط ممكن اقل وممكن اكتر

وهتحتاج م جارية علي حسب انتاجك

طن الارز الشعير انا ما اعرفش الصراحة هو بكام دلوتي بس اعرف انه في متوسط من 1200 الي 1500 ج

الطن بيديك ارز درجة اولي كسر 3 % حوالي 65 %

واي معلومة انا تحت امرك

[elfakhrany]

الاخ عمرو

انت ممكن كمان تعمل مشروع كويس ومربح بما انك من المنصورة

انك تعمل مشروع مضرب ارز وتصدر للخارج انا ليا صديق شغال في المشروع ده وما شاء الله بيدر عائد اكثر من ممتاذ خصوصا التصدير للخارج

يعني هو حاليا بيصدر الطن بحوالي 800 الي 820 دولار امريكي

يعني حوالي =800*5.5 = 4400 ج

تكلفتة عليه كالاتي

2200 ارز

1000 رسوم تصدير

يعني في هامش حوالي من 1000 الي 1200 ج بيلعب فيهم حسب الاسعار والكميات

انت ممكن تظبط علاقات في السعودية مع مستوردين بحكم شغلك كمندوب وحجم علاقتك المفروض انه كويس

اما عن تكلفة المشروع نفسة

انت هتحتاج مساحة مصنع تقريا 100 متر ممكن تاجرها

محتاج خط انتاج وده في حاجات كتير حسب دولة الصنع يعني في تركي وصيني وتيواني وهندي والماني ... والخ

وانا علي حد علمي ان خط كامل بدء من الفرز وازالة الطمي وحتي التبييض والتعبئة تقريبا هيكلفك حوالي 110 الف ج في المتوسط ممكن اقل وممكن اكتر

وهتحتاج م جارية علي حسب انتاجك

طن الارز الشعير انا ما اعرفش الصراحة هو بكام دلوتي بس اعرف انه في متوسط من 1200 الي 1500 ج

الطن بيديك ارز درجة اولي كسر 3 % حوالي 65 %

واي معلومة انا تحت امرك

بس فى نقطة مهمة جــــدا أن مصر بتتحكم فى التصدير أنا كان ليا صديق فى السعودية بيستورد أرز مصرى وطبعا هو مشروع مربح جدا بس قبل شهرين أخبرنى أنهم أوقفوا تصدير الأرز المصرى من مصر لفترة ولا أعلم اذا كانو فتحوا التصدير مرة تانية ولا لأ ووقتها فعلا (من شهرين ) أنا كنت فى كارفور ملقتش ولا كيس أرز مصرى لاقيت بس أرز كان مكتوب عليه أرز مصرى ولما دورت على بلد المنشأ لاقيتها الولايات المتحدة الأمريكية وتقريبا كان اسمه صنوايت

[كرم احمد]

مبلغ ماينفعش ترجع بية مصر وخصوصا فى التوقيت دة

شوف التجربة دى

كان معانا محاسب زميل فى الشركة جى فى 97 وتقريبا فى 2004 قال انا هنزل كفاية كدة الناس حاولت تفهمو ان مرتبك كبر ومصر من اسوء الى اسوء واستنى لان فى تغيير جى فى مصر لا محالة الراجل صمم وقال انا عملت اللى يكفينى وزيادة ونزل مصر !!!!!!!!

قبل ماتلف السنة اتصل على زميل اخر لينا تتوقع بيقولو اية................... بيقول لة انا ادامى فيزة كويسة مع واحد بس ممعاييش فلوس ممكن تسلفنى تمنها وسسدهولك لما اجى السعودية !!!!!!!!!! طيب ياعم فين الفلوس اللى كانت هتكفيك بقيت العمر .....خلاص فنيتو يا خبيبى يعنى هييجى بفيزة ويدور على شغل لسة وفى عمرة ما هيحصل نص الراتب اللى كان بيخدة بالاضافة للشركة اللى كان فيها مش سهل يلاقى زيها

وشوف التجربة دى

واحد تانى شغال من 20سنة فى الشركة معانا فى شهر 7 اللى فات قال هنزل نهائى الناس تقول لة العملية بيظة فى مصر قال لا انا نهاية الخدمة بتعتى بس تعيشنى ملك شمال يمين مافيش فايدة طب بص للى قبلك قال انا ظروفى تختلف المهم علشان الادارة عارفة انو مافيش حد بيقدر يعيش فى مصر فى الظروف دى عطولو اجازة 6 شهور وجميع مستحقاتة وقالولو لو حبيت ترجع ارجع وهما كمان محتاجينة ودة حظو حلو شوى المهم الراجل نزل شهرين بس ورجع جرى فى التالت اية ياعم قالك البلد دى مايتعش فيها الا اجازات بس وقصيرة كمان لان لو اجازة كبيرة هتشحت

[عبير يونس]

أخي الفاضل

انا عارفة الاحساس ده كويس

و مع رأي الإخوة و الأخوات الكرام في اللي قالوه

رأيي انك متاخدش قرار تحت الضغط

بلاش تنزل مصر في الاجازة دي و اطلع اجازة في اي حتة تانية منه تغير جو و واكيد تكاليفها حتبقى أقل

ترتاح نفسيا و تقدر تفكر بهدوء

و الوالدة الغالية اعملها زيارة تقعد معاك شوية هنا

و بعدين أحب الفت نظر حضرتك لحاجة مهمة

ان حضرتك لو اخدت تأشيرة خروج و عودة وما رجعتش حتنحرم من دخول السعودية لمدة سنتين

ده غير حاجتك هنا و عربيتك و عفشك و الايجار لو العقد لسه مانتهاش او فواتير دي كلها حاجات لازم تسويها و في وقت كافي عشان متبيعهاش بتراب الفلوس

يعني ما ينفعش تاخد القرار من مصر

اذا كنت عايز تنزل نهائي يبقى لازم تمشي سليم و تأخد خروج نهائي و عدم ممانعة

عشان لاقدر الله لو ما ارتحتش في مصر و حبيت ترجع ميبقاش في مشاكل

و بعدين حضرتك لسه سنك صغير

ليه ما تجربش بلد تانية مثلا ؟؟

نصيحتي لحضرتك

ما تخليش العواطف تؤثر في قرارك

طبعا الوالدة و الأهل مهمين

بس الوالدة نفسها ربنا يباركلك فيها مش حتبقى مبسوطة اذا رجعت مصر و مبقتش مبسوط و بتعاني قدامها

و طبعا لازم ما تبطلش استخارة لحد ما ربنا ييسر لك الخير

مهم جدا تعمل الاستخارة و انت سايب الأمور لله وحده بدون ميل قلبي لأمر عن الآخر

يعني لازم تبقى محتار بجد

مش واخد قرار و عايز تأييد

ربنا يوفقك

تم تعديل 18 مايو 2009 بواسطة مصرية متغربة

[المر]

اخى الفاضل

اولا : صلى صلاة استخارة و ربنا يهديك للقرار السليم انشاء الله.

ثانيا : انصحك بان لا تعمل مشروع فى مصر و ان تتركه لاى شخص يديره لك و ترجع انت تانى السعودية لانه لا يحرص على المال الا صاحبه.

ربنا يوفقك.

[المر]

اخى الفاضل

انا فهمت من كلامك انك معندكش شقة فى مصر . انا عندى حلين لحضرتك :

شوف يا سيدى انت أول ما تنزل تأجر شقة قانون جديد لمدة 3 سنوات و تفرشها فرش معقول و تدخل مشروع بحدود 60 ألف جنيه و

تخلى حوالى 20 ألف جنيه على جنب و خلال فترق ال 3 سنوات يكون ربنا كرمك فى مشروعك الجديد انشاء الله.

او تشترى تاكسى و تشغل عليه سواق واحد وممكن يجبلك حوالى 2000 جنيه صافى انشاء الله ده جنب شغلتك كمندوب مبيعات.

بالتوفيق انشاء الله

[KAhamid]

الاخ elfakhrany

مصر بتتحكم في تصدير الارز بانها بترفع رسوم الصادرات

يعني كانت 100 ج علي الطن

دلوقتي خلوها 1000 ج علي الطن

بس في كل الاحوال المصدر بيحمل الرسوم دي علي المستورد

[KAhamid]

وساعات كمان بتوقف التصدير نهائي

بس ده بيكون موقت ومحصلش غير السنة اللي فاتت لما وصل السعر للكيلوا في مصر 4.5 ج !!!!!!!!!!!!!!!

وبيكون مؤقت ومحدد مدة ايقافة

[amrkhaled]

السلام عليكم ورحمة الله وبركاتة

اشكركم جميعا على الردود وجزاكم الله خيرا

بس خلونا نناقش الموضوع من جوانب تانية كمان

يعنى اللى عندة مشروع فى حدود المبلغ اللى اتكلمنا عنة 100 الف جنية

وعندة دراسة جدوى عنة ياريت يشاركنا فية كمان اللى عندة قصص مشاريع

ناجحة ياريت يشاركنا فيها كمان علشان نشيل الصورة السلبية عن مناخ الاستثمار فى مصر

والسلام عليكم ورحمة الله وبركاتة

[ابو حودة]

السلام عليكم

واضح تماما انك اخدت القرار بالعودة وده حاجة كويسة قوي انك تكون مقتنع بالقرار اللي انت اخدته

انا ظروفي احسن الحمد لله من ظروفك شوية يعني عندي شغلي في مصر ودخلي منه الحمد لله مش وحش لكن لسة مش قادر اخد القرار بتاعك ده ومن فترة كنت قلت ان

انا مباراة اعتزالي في السعودية هتكون في صيف 2011

وربنا يقدرني واقدر انهي فعلا في صيف 2011 يعني بعد سنتين

بس بخصوص دراسات الجدوى تقدر تدخل على جوجل وتكتب " دراسات جدوى " هتلاقي كتير جدا من المواقع اللي فيها دراسات جدوى متكاملة وكمان هتلاقي طريقة توثيق

المشروعات من الناحية القانونية

في الاول والاخر رب هنا رب هناك والرزق يطارد الانسان كما يطارد الانسان الموت عندما يحين اجله

ربنا يوفقك

[amrkhaled]

السلام عليكم ورحمة الله وبركاتة

انتو فين يا جماعة انا مستنى ردودكم