منظفات منزلية طبيعية 100%

[se_ Elsyed]

وبما إن مدام بركه بدأت الحرب ..

إذا .. مرحباً بالحرب المفتوحة ..

بأحب قوي أقرأ صفحة الإرشادات المنزلية في أي جريدة من اللي بتقدم أفكار مفتكسة للبيت حتى لو لم أطبقها .

وجريدة الشروق بتقدم كل عدد يوم الجمعة إن لم تخونني الذاكرة صفحة مليانة حاجات من دي ..

على سبيل المثال

- للتخلص من أثار المواد اللاصقة على المصنوعات البلاستيكية .. إمسحيها بورق نشاف مبلل بغاز الولاعات ( يا إفتكاساتك يا معلم ) ...

- إذا إمتنع إبنك العفريت الصغير عن بلع الدوا - كالمعتاد يعني - دعيه يمتص قطعة من الثلج لمدة 10 ثواني .. والتي تقوم بتخدير مناطق التذوق في اللسان . وبالتالي لن يشعر بمرارة الهزيمة وسيحس بحلاوة الإنتصار

- لو عندك برطمانات مكانها عسل وعايزة توفري لجوزك وتستخدمي البرطمانات دي في حاجه تانية وفي بواقي عسل مش راضي يطلع من البرطمان .. قومي بسكب بعض من الحليب الساخن فيها ثم رجيها .. فالعسل هايدوب في الحليب وبالهنا والشفا

- لو عندك طماطم ناشفه خالص وعايزه تحوليها لطماطم طريه ... قومي بوضعها في كيس بلاستيكي مع تفحايه وأثقبي الكيس ثقب بسيط وأتركيها يومين تلاتة ... هاتلاقي الطامطم بقت طريه وحلوه وكلها حنيه وما حدش يسألني ومصير التفاحة إيه ...

- إقومي بدعك يديكي بالجلسرين والليمون ثم أرتدي قفازات قطنية قبل الذهاب إلى النوم وسيقوم ذلك بالقضاء على تأثير المواد الكمايوة الضارة التي تتعرضين لها طول اليوم من غسيل المواعين والحركات .. وادعي للحاجه بركه ..

- لتحسين رائحة الغسيل .. أضيفي لمحسوق الغسيل معلقتين من مسحوق بيكربونات الصودا ... ( أنا بأستخدم البتاع ده في تلميع ميدالياتي الفضة أو دبلة خاتم الخطوبة عقبالنا كلنا اللي مخزنها في الصندرة من 10 سنين .. مع دعكه بفص ليمون بيخلي الفضة تبرق )

- لتنظيف طاسة التحمير من الزيت .. قومي بوضع عدة نقط من صابون الغسيل على نص بطاطساية نية وإدعكي بها الطاسة ...... ( بأحب اللعبة الحلوه ... بجد )

- إوعى من قدامي ... لعمل قرص بيض أومليت فيري فيري سبيسيال .. أخفقي البيض جيداً ثم ضعي قليلاً من المياة الغازية عليه قبل وضعه في الطاسة .... حد يفتكس بقى ويحط بيبسي إسود فيطلع الأومليت لونها مش ظريف .. يبقى هو حر ... يعني بالبلدي نحط شوية سفن آب ...

- إذا كان لديكي حذاء قد جف جلده .. قومي بطلائة بطبقة من الفازلين ثم أتركيه لمدة يوم .. فيعود الجلد طرياً .. وحلو وكدهوت .. يا إما أرحمي الجزمة وأمريها أحسن نشفت وأشتكت وما بقاش فيها حته تتخيط ...

- أول مره اسمع دي بالذات .. للنااس اللي اعوذ بالله بيكووا هدومهم في البيت .. للحصول على ملابس مفرودة جيداً .. قومي ببخها بماء مُثلج ثم أتركيها قليلاً قبل كويها ..

- في حالة وجود بقع عصير فواكه على الملابس .. قومي بشطفها بماء ساخن ... ثم غطي البقعة بالعسل الأبيض وأتركيها ساعة ثم أغسليها بالطريقة المعتادة ..

- الوصفة بتاعت الجينز دي شديدة .. قبل إرتداء المنطلون الجينز أول مره .. إغسليه بالماء الساخن مع وضع 50 جرام ملح خشن في الماء .. بعدها سيصبح القماش اكثر ليونه عند أرتداء المنطلون ( خلو بالكم منطلون مش بنطلون )

وأي خدمة يا رجالة

[بركة]

حرب ايه بس ياس س كل الموضوع ان عندي معلومات حبيت أشارك أخواتي فيها بس

ولا كنت عايزة أعمل نفسي شكّايه ولا مدام نظيفة ولا حاجه

بس لو حد زعل حقكوا عليا والله :blink:

[se_ Elsyed]

حرب ايه بس ياس س كل الموضوع ان عندي معلومات حبيت أشارك أخواتي فيها بس

ولا كنت عايزة أعمل نفسي شكّايه ولا مدام نظيفة ولا حاجه

بس لو حد زعل حقكوا عليا والله

زعل ايه بس

ده انا بأستفز حضرتك عشان تكتب اكتر في الموضوع ده

انتي شكلك ما تعرفيش اسلوبي

[بركة]

الحمد لله .

حصل خير ,

يللا استعنا على الشقى بالله :

للتخلص من آثار القلم الجاف على أي مصنوعات جلدية تستعمل المناديل المعطرة بتاعة البيبي

اللي منها بامبرز أو جونسون وما الى ذلك..

كمان المناديل دي بتعمل مفعول السحر لتنظيف الكمبيوتر والكي بورد وعدة التليفون والتليفزيون

حيث التراب مع حرارة الاجهزة بتخلي شكلها مش حلو زي ماكانت جديدة ..

لتلميع الزجاج نعبي البخاخ ماء وخل بنسبة التلتين ماء والتلت خل ..

[بركة]

لتنظيف الجلد الطبيعي

فوطة بها ماء وصابون وجه فقط المهم يبقى الجلد طبيعي

يصلح للشنط الحريمي والاحذية بيضاء اللون ..

لتسليك البالوعة

كربونات الصوديوم ( كربوناتو ) + ملح + خل ثم يصب عليهم ماء ساخن جدا

لتلميع فصوص الخواتم

معجون أسنان فرشاة أسنان ثم يشطف في ماء مخلوط بخل ...

لتلميع الخشب المتشقق

ننظف التراب أولا ثم يوضع كريم يدين خاص بالبشرة الجافة ..

لتنظيف شابوة الأباجورة القماش

كربونان الصوديوم مع ماء قليل جدا جدا ويمسح الشابوة بقماش مغموسة في هذا الخليط ..

[بركة]

لتنظيف جسم الثلاجة الداخلي و الخارجي

كربونات الصوديوم مع الماء ..لا يخدش الثلاجة ابدا ينظف ويزيل الروائح منها ..

لتلميع كريستال النجفة بسهولة

جورب قطني نبلله في ماء ممزوج بخل ونلمع به ..

لإزالة الصدأ من السكاكين والأواني

البصل .......نتقطع بصل بالسكينة سيزول الصدأ ..

[بركة]

ايه الاخبار اللي جربت حاجه من الوصفات تدخل تقولنا عملت ايه :closedeyes:

[لولا]

العزيزه مدام بركه .. بعد التحيه والسلامات .. وخدى دى

بصى يا ست الكل .. كنت بقلى بطاطس فى حلة يعنى مش فى طاسه القلى وبعدين الزيت الظاهر مع ارتفاع درجه الحراره عمل آثر اصفر دهبى شويه

من جوه الحله .. ولما غسلت الحله مرضيش يروح .. معرفتش اعمل ايه الحقيقه ..

وانا نايمه وباكل رز مع الملايكه لقيت عقلى الباطن بيقولى عليكى وعلى مدام بركه عدل :) .. عندها الحل اكيد لمشكلتك العويصه :lol:

اعمل ايه بقى للتخلص من بقعه الزيت فى الحله :wub: :)

لولا

[بركة]

شكرا على الثقة الغالية

عليكي وعلى الملح والخل معا على الليفة من غير صابون خالص

ولو فيه سلك استانلس معاها يبقى تمام

ولو عندك جف المعجون ممكن برده

تحياتي وطمنينا :blink:

تم تعديل 24 مايو 2009 بواسطة بركة

[Folana]

السلام عليكم ورحمة الله...

موضوع رائع....جزاكم الله خيرا جميعا...

وطالما الغالية لولا فتحت لنا باب الاسئلة...يبقى أتشجع وأسأل....

وعلى سيرة الشربات هنا:

لتلميع كريستال النجفة بسهولة

جورب قطني نبلله في ماء ممزوج بخل ونلمع به ..

مافيش حل لفردة شراب حمرا دايما...دايما...دايما...بالاقيها فى وسط الغسيل الابيض؟؟؟ bv:- :blink:

او لو ممكن اى حل للغسيل الابيض اللى دايما دايما الاقى فردة الشراب الحمرا معاه ؟

وشكرا على المعلومات الهايلة دى يا اخت بركة...تسلمى لنا يارب

jdw::

[بركة]

أهلا بيكي يا أستاذه فولانه

نورتي موضوعي وربنا يبيض غسيلنا جميعا

بجد مشكلتك مالهاش حل لازم ناخد رأي حد معانا :blink:

[لولا]

شكرا على الثقة الغالية

عليكي وعلى الملح والخل معا على الليفة من غير صابون خالص

ولو فيه سلك استانلس معاها يبقى تمام

ولو عندك جف المعجون ممكن برده

تحياتي وطمنينا :lol:

الحمد الله العمليه نجحت بس بعد نقع ونقع ودعك ودعك ودعك يليه فرك وفرك وفرك ... عمليه سهله خاااااااااااااااالص

بجد ميرسي يا مدام بركه ... :yahoo:

ادامك الله ذخرا لكل ست محتاسه فى المحاورات :D

بالنسبة لطريقة تنظيف النجف الكريستال ..

هقولكم طريقتى ..

انا مسمياها طريقه المرأة العامله فى تنظيف النجفه wst::

تعمل ايه بقى الست العامله اللى راجعه مهلوكه تجيب شويه متظف قزاز وتزود عليه ميه فى بخاخ ..

تجيب ورق جرنال قديم "خليه بتاع اعلانات عشان ميكونش فيه قرآن ولا حاجه " وتروح تفرشه تحت النجفه

ع الأرض .. تطلع على السلم تبدأ ترش الكريستال بحرص بكميه وافره من السائل ..

السائل هياخد التراب وينقط على الجرنال وتلاقى الكريستال بيبرق :lol:

بس خلاص ..

ولا دعك ولا مسح ونضيع ساعه واحنا بنمسح كريستاله كريستاله .. اضربى بقى فى نجفتين تلاته مش هنخلص :D

دى بقى طريقه ظريفه ومعتمد لكل وحده مش فاضيه تدعك فى النجف ..

مش بتاخد غير تلات دقايق بس ونتايجها حلوه :D :D

ميرسي تانى على كل موضوعك الجميل يا مدام بركه :tease:

لولا

[بركة]

لا شكر على واجب يا لولايا يا حبيبيتنا

وطريقتك جميلة جدا

شكرا ليكي وما تقليش في حلة تاني :lol: :lol:

[بركة]

لبياض ناصع و منع الكرمشة في الستائر عند الغسيل:

اضافة قليلا من النشادر الى ماء غسل الستائر والاقطان يحميها من الكرمشة ويضفى عليها بياضا شاهق ،

مع الحرص على عدم عصر الستائر لأن عصرها يشوه جمالها ويؤثر على نسيجها .

لتنظيف مكواة البخار من الترسبات التي تسد فتحاتها :

لفتح مسام مكواة البخار الانسداد الذى يحدث فى فتحات مكواة البخار يمكن علاجه وذلك بملىء خزانها بالخل

وهى ساخنة ( بعد نزع الفيشة ) ثم شطفها ويتم تعبئتها بالماء مرة أخرى .

للحفاظ على نباتات الزينة :

افضل الطرق لرى نباتات الزينة هى ملىء الاناء بالماء وتركه 24 ساعة قبل سقى النبات حتى

يتخلص الماء من الكلور الموجود به لأن زيادة الكلور فى الماء تضر بأوراق النبات وتغيـر لـون أوراقه الخضراء .

للبقع الدهنية على الملابس:

البقع الدهنية التى تظهر على الملابس نتيجة تناثر بعض الطعام ، يمكن التخلص منها بنثر

كمية من بودرة " التلك " مكان البقعة .

لتغذية نباتات الزينة:

ماء سلق البيض بعدما يبرد يسقى به النبات فهو مفيد جدا جدا .

تم تعديل 29 مايو 2009 بواسطة بركة

[بركة]

لعلاج بلل الأحذية من المطر :

لعلاج بلل الاحذية اذا ماتعرضت الاحذية للبلل نتيجة انغماسها فى ماء الامطار ، يتم حشوها

بورق الجرائد ( الخالى من الايات القرآنية ) حتى تمتص الرطوبة وايضا للحفاظ على الشكل الطبيعى للحذاء .

لتنظيف أكتر للسجاد :

لنظافة الموكيت والسجاد قبل تشغيل المكنسة ينثر بعضا من بيكربونات الصودا ويتم تركها لمدة ربع ساعة .

لطرد الحشرات من المنزل :

تعتبر مادة النشادر من افضل المواد الطاردة للحشرات المنزلية ، ويمكن الاستعانه بها بنثرها

فى ارجاء المطبخ وحول صندوق القمامة.

[بركة]

للتخلص من رائحة السمك :

للتخلص من روائح السمك فى أوانى الطهى تغسل جيدا بالماء البارد وليس الساخن وأستخدام

بقايا القهوة فى الدعك ، وتغسل الايدى بالخل أو الليمون المخلوط بالملح .

عند انسكاب الدهون في الفرن اثناء الطهي :

عند انسكاب الصلصة أو الدهون بفرن البوتاجاز أو الميكرويف ، مما قد يؤدى الى انبعاث الدخان من الفرن ،

يتم غلق الشعلة وتسكب كمية من الملح على المكان الذى سقطت عليه الصلصة أو الدهون مع مراعاة

أن يكون الفرن مازال محتفظا بحرارته ، وبعد دقيقة واحدة يزال الملح بقطعة قماش أو أسفنجة نظيفة .

طريقة أخرى :

يمكن وضع اناء به كوب من الماء المغلى وتركه يستكمل عملية الغلى فى الفرن وذلك لعدة دقائق ،

اذ ان البخار المتصاعد يساهم فى اذابة بقايا الطعام الملتصق ، ثم تستكمل عملية التنظيف

بأستخدام قطعة قماش مغموسة فى الخل .

[بركة]

لتنظيف بقع الشيكولاتة :

يتم نقعها فى الماء المضاف اليه ( صابون غسل الصحون المستخدم فى المطبخ ) الى الصباح ثم تشطف وتغسل.

للتخلص من رائحة البهارات من المطحنة :

طحن قليلا من الخبز المحمص بها يخلصها من جميع الروائح حتى روائح البصل والثوم .

للحفاظ على الشنط والأحذية من التشققات والجفاف :

يتـم دهنها بقليلا من الفازلين ، ثم يتم مسحها بقطعة قماش نظيفة ، سيمنع تشققها

ويحافظ عليها لتبدو كالجديدة .

[عبير يونس]

صباح الخير ياجماعة الخير ..

موضوع جميل بس عاوز له صفحات وصفحات لكنى سوف اختصر ان شاء الله..

مسألة بقع الحبر...........افضل طريقة عن تجربة (( خصوصا ان اولادى ماشاء الله عليهم يعنى غلبونى بمعنى غلبونى فى مسألة بقع الحبر دى ))..

الحليب ...

يعنى تنقعوا مكان البقعة فى شوية حليب لمدة ساعة وبعدين تتغسل شوية شوية ..

مسألة المنظفات ...!!.....ليه احنا بنكسل دايما و مش بنستعمل جوانتى وقت غسيل الاطباق او تنظيف المطبخ والحمام؟؟ هى مسألة كسل وكأننا حانكون اسرع كدة...والنتيجة ؟؟ ..ايدين جافة ومتاهات..

وفيه حاجة كمان...

بس دى مش تريقة ...خصوصا للجماعة المغتربين فى الخليج ...!!

بجد يعنى هى طريقة عملية جدا جدااا......ومش كماليات..

ليه ماتستخدموش غسالات الاطباق ...!!...اسعارها رخيصة جدا جدااااا فى السعودية وكل دول الخليج...

يعنى انا شفت حاجات فى حدود الفين جنيه مصرى ..فيه طبعااا اكتر كتير ..

بس لو حسبتوها حاتطلع افضل ...

وبس عاوزة اعرف..

لو فيه اسرة عايشة فى الخليج لمدة عشر سنين .......................ليه يحرموا نفسهم بطريقة قاسية ؟؟

ف كل شئ ؟؟

مسألة غسالة الاطباق...هى طريقة عملية ...وطريقة ذكية لتوفير الوقت والجهد وحتى ....المياه...!!..وحتى المنظفات ..

ساعات بيتهيألنا على حاجات كتير انها حاجات ترفيهية ...وفى الحقيقة هى حاجات ضرورية ..

يعنى دى توفر ...انكم مثلا تحتاجوا اى حد يساعدكم حتى فى غسيل اطباق كل يوم خصوصا لو اسرة معاها اكثر من طفل ..

مجرد رأى ..

طبعا مافيش شك ان غسالة الأطباق ضرورية جدا بس مش لما اللي هيشتري قصدي الزوج يقتنع

انها مهمة ما هو أصله ما بيغسلش ويقف على الحوض لما ايديه يبوظوا

د غسالة الملابس الاوتوماتيك بالنسبة للي في الخليج تعتبر كماليات الكماليات لحد دلوقتي

وتقعدي تعددي في مزاياها لما نفسك يتقطع ولا حياة لمن تنادي

ربنا يهدي والله ويارب زوجي أنا كمان يقتنع بموضوع غسالة الأطباق ده قريب :unsure:

آمين يا بركة يا حبيبتي

أنا مشكلتي هي كثرة التنقل مبقعدش في بيت أكتر من سنة سنة و نص بالكتير و بنخرج منها

اللي انا فيها دلوقتي بقالي فيها 3 سنين جبت فيها بوتجاز جديد السنة اللي فاتت و غسالة اتوماتيك

بعد ما الشغالة أصرت ان لازم غسالة جديدة لأن بسلامتها مش عايزة تتعب مع غسالة عادية و عصارتها بايظة قعدت اغسل بيها لما طلع عيني و أنا حامل و معايا أطفال

طبعا الشغالة مشيت بس الفكرة رنت في دماغي

بدال مصاريف الشغالة و ده طبعا لما كنت بأشتغل

طب ما اجيب غسالة كويسة توفر الوقت و الجهد

و الحمد لله خططت لها و ربنا أراد و اشتريتها ما شاء الله جديدة

طبعا ما أقولكمش ع الفرق

غسالة الأطباق ضرزرية و جوزي ما شاء الله مقتنع

بس انا اللي بأجل و أقول في أولويات تانية

ده غير اني لسه مش مستقرة في الشقة

و طبعا نفسنا نطلع م البلد خالص

يعني لو فتحت الباب للي محتاجينه مش حيتقفل

الله المستعان

بس أكيد في الخطة الجاية ربنا يأذن و نجيبها

دعواتكم معايا يا بنات :unsure:

[عبير يونس]

طبعا لازم اشكر مدام بركة الله يكرمها ع الموضوع الحلو ده اللي طبعا يعتبر مرجع

ربنا يكتبهولك في ميزان حسناتك يارب

:unsure:

[بركة]

طبعا لازم اشكر مدام بركة الله يكرمها ع الموضوع الحلو ده اللي طبعا يعتبر مرجع

ربنا يكتبهولك في ميزان حسناتك يارب

:rolleyes:

شكرا مصرية متغربة على كلماتك الجميلة ودعائك

ياريت نهتم بصحتنا ونستغنى عن المنظفات الصناعية التي تؤثر على الصحة والجهاز التنفسي