احتفال مصر الجديدة...بامارة إيييييه!!!!!!!!

[~Heba~]

حد فيكم سمع عن الاحتفال ده اللى عاملاه السيت سوزان مبارك فى مصر الجديدة و اتقفل بسببه شارع طول اليوم و منع المرور فيه

شوفوا الصور هنا

http://www.youm7.com/News.asp?NewsID=99404

و الله فراغة عين و استهبال

قال احتفال مصر الجديدة قال

حاجة تنقط

هو فيه حد فى مصر له نفس يحتفل

و يا ترى الناس اللى فى مصر الجديدة دى اللى هاصت على الاخر حاسين بالغلب اللى فيه الناس اللى فى العشوائيات

كان يجرى ايه لو الاحتفال ده كان يضمن فى فعاليته تنظيف و اعادة بناء للمناطق العشوائية

و مواساة لاهل الدويقة و غيرهم من سكان الشعوئيات

حاجة تقرف بجد

معلش يا جماعة انا خرجت عن شعورى بس بجد بجد دمى محروق

وآدى تعليق من التعليقات على الخبر

.

نقود مهربة: 300 مليار دولار.

الفقر:44% من الشعب.

البطالة: 29% من القادرين علي العمل.

الاكتئاب: 20 مليوناً و6 ملايين أمراض أخري.

الانتحار: 3 آلاف محاولة سنوياً.

حوادث الطرق: 6 آلاف قتيل و23 ألف مصاب.

الطلاق: 28% والعنوسة: 7 ملايين عانس.

الأمية (الحالية): 26% من الشعب المصري.

7% من الأطفال لا يدخلون المدارس لفقرهم

قانون الطوارئ: 25 سنة طوارئ.

الأحوال الصحية: السرطان: تضاعف 8 مرات.

الأعلي في العالم: البلهارسيا والفشل الكلوي والتلوث.

الذبحة الصدرية:20% شباب تحت الأربعين .

السكر: 7 ملايين، 10% تقريبا من السكان.

التهاب كبدي: 13 مليوناً.. 20% من الشعب.

شلل الأطفال: في 6 دول بينها مصر.

عمالة الأطفال: نصف مليون طفل.

أطفال الشوارع: 100 ألف طفل.

المخدرات: 6 مليارات دولار سنوياً.

الهجرة: 6 ملايين طلبوا الهجرة لأمريكا عام 2005.

القضايا: 20 مليون قضية بالمحاكم.

إنجازات التعليم: دروس خصوصية، كتب خارجية، جامعات خاصة للربح فقط

مشاكل أخلاقية: رشوة.. محسوبية.. بلطجة.. توريث مهني.. عُري وتحرشات جنسية...ألفاظ بذيئة.. غش جماعي.. جريمة.. تسول.

الأحوال السياسية: فساد النخبة الحاكمة.. مراكز قوي.. تزوير انتخابات.. سجون وقمع واعتقالات.. تعذيب حتي الموت.. انتهاك لحقوق الإنسان.. إلغاء دور النقابات.. والجمعيات الأهلية.

هى مصر الجديدة دى فى مصر تانية على كوكب المريخ مثلا و إلا إيه يا جماعة

حد ينورنى

ويرجعوا يتكلموا عن فشخرة رجال الأعمال

مع الاعتذار عن اللفظ يعنى..

تم تعديل 17 مايو 2009 بواسطة عادل أبوزيد
إضافة إدراج الموضوع المشار إليه من جريدة اليوم السابع

[محمد عبدالعزيز]

عادى يعنى, ماهى التصريحات والتصرفات اللى تحرق الدم كتير, والتصريح التالى من نفس العينة:

سوزان مبارك لـ«المغربى»: لن أقبل أن تعيش أسرة مصرية فى شقة «غرفة وصالة»

مش عارف بقى الناس اللى ساكنة فى العشش يشملهم التصريح ده ولا الهانم ماتعرفش إن فى ناس ساكنة فى عشش فى مصر!!!

ولسه ياما حنشوف من بتوع مصر الجديدة

[Digital]

وحضرتك زعلانة ليه

انا مش فاهم ايه المشكلة يعني لما الناس تفرح و تنبسط شوية

و لما الاطفال ينزلوا يتفسحوا و يلعبوا، ليه الناس تعيش في غم؟

وبعدين اتكلف كام الاحتفال يعني؟

ممكن يكون في جيبي 30 درهم انزل اروح بيهم سينما و ارجع البيت معاييش فلوس

بس بستمتع باليوم و مش بحس ان انا حزين و متضايق

عكس ناس ممكن تمسك علي ال 30 درهم دول و يقعد يندب حظه و يقول معاييش غيرهم

انا فعلا مستغرب جدا اصل ده احتفال عام شارك فيه الناس كلها

لا هوا للوزرا و لا للوجهاء و رجال الدولة حتي عشان نقول الفلوس اتصرفت في كلام فاضي

ما ناس عادية جدا في الشارع باين من الصور

و اطفال !!

ايه المشكلة بجد نا مش فاهم !!!!

[taymour]

انا مش فاهم ايه المشكلة يعني لما الناس تفرح و تنبسط شوية

أنا معاك, ليه بنبص لكل حاجة بمنظار أسود؟... أنا كنت هناك بس في أخر الحفلة لمل جه عمر خيرت و كنت نازل متنكد و مهموم لوحدي.. بأفكر في الشغل و المستقبل و السفر و الفيزا و قلت أما أروح أشوف الحفلة دي و فعلا انبسطت...

اه في مشاكل وهموم بس ليه بتستكتروا الفرحة على الناس؟!

و مش معنى انهم من مصرالجديدة يعني هاي و مبيحسوش.. دول مصريين بردة.

[~Heba~]

وبعدين اتكلف كام الاحتفال يعني؟

ممكن يكون في جيبي 30 درهم انزل اروح بيهم سينما و ارجع البيت معاييش فلوس

بس بستمتع باليوم و مش بحس ان انا حزين و متضايق

عكس ناس ممكن تمسك علي ال 30 درهم دول و يقعد يندب حظه و يقول معاييش غيرهم

انا فعلا مستغرب جدا اصل ده احتفال عام شارك فيه الناس كلها

قلت أما أروح أشوف الحفلة دي و فعلا انبسطت...

اه في مشاكل وهموم بس ليه بتستكتروا الفرحة على الناس؟!

فكرتونى باللى بشوفه فى الأفلام القديمة لما البطل يروح خمارة و يبلبع فى الكاسات ورا التانى....لييييييه....عشان ينسى :blush2:

طيب ماشى احتفال و لسة فيه ناس من أهالى الدويقة نارهم لم تبرد على ذويهم الذين قضوا نحبهم

وده كله فى مدينة واحدة

عاصمتك يا مصر يا ام الدنيا

اييييييييه يالا بقى ماهو ييجى ايه الاحتفال ده بالنسبة لمظاهرات شباب مارينا لتأييد مهند و نور :big_boss:

[~Heba~]

عادى يعنى, ماهى التصريحات والتصرفات اللى تحرق الدم كتير, والتصريح التالى من نفس العينة:

سوزان مبارك لـ«المغربى»: لن أقبل أن تعيش أسرة مصرية فى شقة «غرفة وصالة»

مش عارف بقى الناس اللى ساكنة فى العشش يشملهم التصريح ده ولا الهانم ماتعرفش إن فى ناس ساكنة فى عشش فى مصر!!!

ولسه ياما حنشوف من بتوع مصر الجديدة

فكرتنى بمارى انطوانيت ملكة فرنسا قبل الثورة لما قيل لها الشعب جائع لا يجد خبزا يأكله...قالت و لماذا الخبز....ياكلوا بسكويت او جاتوه :blush2:

[الترجمـان]

اتذكر مره كنت رايح تومس كوك مع احد الأصدقاء لإستلام حوالة نقدية ..

واتفاجئنا ان الشارع اللي فيه الشركة مقفول بالحواجز الأمنية ..

طبعا اتدايقنا جدا وذلك لصعوبة انك تلاقي ركنه للعربية مع اننا كدا كدا كنا هنقف صف تاني ويمكن ثالث وذلك للإزدحام المروري الدائم لشارع الكوربه العريق..

المهم اننا اكتشفنا بعد الدخول على الأقدام اننا نشارك في الإحتفالية المئوية لحي مصر الجديدة وتحقق المثل الذي يقول رب صدفة خير من ألف ميعاد :big_boss:..

كان فيه فرق موسيقية وناس بتعرض تحف وكتب وكان الأطفال المبدعين بيرسموا على وشوشهم وعلى الأرض بالتباشير الملونة وكان هناك العديد من الأسر والشباب وسمعت وانا هناك إن ماما سوزان كانت هناك وانها لسه ماشية من نص ساعة ووزعت بومبوني على العيال وطبعا زعلت جدا لأنني لم يسعدني الحظ في تذوق البومبوني بتاع قصر الكربة بس زي مابيقولوا المتعوس هيفضل متعوس :blush2:

المهم كان هناك حالة جميلة جدا وأجواء من السعادة والإبتسامة التي لم اعتاد ان أراها على وجوه الناس منذ زمن طويل ..

فعلى الرغم انني لم انجز ما كنت في صدده من الزيارة وذلك يرجع لأن الشركة كانت قافله في اليوم ده إلا أنني كنت سعيد بأجواء المرح التي طغت على هذه الإحتفالية والتي أتمنى أن يقوم كل حي في مصر بتنظيم مثل تلك الفعاليات والمهرجانات الشعبية البسيطة والغير متكلفه في إنشاءها وتنظيمها ..

أعتقد اننا بحاجة لمثل تلك الإحتفاليات التي تبعدنا عن ضغوط الحياة ولو ليوم واحد..

[~Heba~]

أعتقد اننا بحاجة لمثل تلك الإحتفاليات التي تبعدنا عن ضغوط الحياة ولو ليوم واحد..

اه فعلا فكرة هايلة و يا سلام لو اتعملت فى منطقة عشوائية و تغنى لهم لطيفة

المصرى حبيب متنمس لو حتى بدقة يغمس

و يحلى بالبنبونى بتاع ماما سوزان

بس ياااااااا الف خوسارة مش حيلاقى مكان على الارض عشان يرسم عليه :blush2:

تم تعديل 17 مايو 2009 بواسطة ~Heba~

[محمد عبدالعزيز]

ده على اعتبار يعنى إن ماما سوزان زوجة رئيس مصر الجديدة فقط ولا إيه؟

على فكرة, البرامج الحوارية معظمها بيدور الآن حول العلاقة بين الأغنياء والفقراء, والدعوات بتتوالى لمراعاة شعور الناس وعدم استفزازهم أكتر من كده.

أنا مش ضد إن الناس تفرح وتنبسط, بس اشمعنى سكان مصر الجديدة بس يعنى, فين باقى سكان مصر - الجديدة بقى والقديمة والنص نص - مالهمش نفس يفرحوا هما كمان ولا إيه؟

بس ياريت ماحدش يقول لى يفرحوا براحتهم ماحدش منعهم.

[~Heba~]

ده على اعتبار يعنى إن ماما سوزان زوجة رئيس مصر الجديدة فقط ولا إيه؟

على فكرة, البرامج الحوارية معظمها بيدور الآن حول العلاقة بين الأغنياء والفقراء, والدعوات بتتوالى لمراعاة شعور الناس وعدم استفزازهم أكتر من كده.

و الله يا باشمهندس هى شكلها كدة فعلا

حنشوف جمهورية مصر الجديدة الراقية المتقدمة و البقية ياى مش ممكن مش من مقامهم

المشكلة التى لا يريد ان يفهمها بعض الاخوة هنا ان الاحتفال بحد ذاته لا غبار عليه

كل محافظة له يوم عيد قومى

مش بيجبوا عمر خيرت و لا يوزعوا بنبونى

المفروض ان المحافظ يفتتح مشروعات تنموية....مش بنبونى و بلالين

و الله اناكنت هحترم الشباب ده جدا لو كانوا قاموا بدورهم كشباب مصرى و تولوا فى اليوم ده رعاية و خدمة منطقة عشوائية هى فى الأول و الآخر جزء من بلدهم

غير كدة اللى انا شايفاه قدامى مش اكتر من مجرد صور اخرى من صور الإلهاء

الهاء الشعب عن مشاكل الحقيقة

و آدى اسمها سوزان مبارك شغالة و بتبسط الناس

أنا مش ضد إن الناس تفرح وتنبسط, بس اشمعنى سكان مصر الجديدة بس يعنى, فين باقى سكان مصر - الجديدة بقى والقديمة والنص نص - مالهمش نفس يفرحوا هما كمان ولا إيه؟

بس ياريت ماحدش يقول لى يفرحوا براحتهم ماحدش منعهم.

الناس دى يفرحها مكان بأربع حيطان يؤيها

يفرحها انها لما تمرض متشلش هم كشف بكام و دوا بكام

يفرحها انها تعلم اولادها كويس

يفرحها تلاقى شغلانة تاكل منها عيش

يفرحها انه مفيش ظلم و لا استبداد و لاحد ياكل حقهم

مشكلة العشوائيات انهم ناس على الهامش لا يوجد اى اهتمام بهم

وبنفس الطريقة هما كمان خلوا المجتمع على الهامش فتلاقى جريمة و انحراف

لا عجب اننا نسمع حادثة اقتحام شقة فى مصر الجديدة و مقتل اصحابها و سرقتهم

لو بحثنا وراء مرتكب الجريمة سنجده من قاطنى هذه المناطق

تم تعديل 17 مايو 2009 بواسطة ~Heba~

[newcomer]

مش عارفة يا م. هبة ....حاسة ان ردى هايزعلك

بس بصراحة مش شايفة اى حاجة فى الاحتفال ده

لا يحرق الدم و لا يغيظ

ده احتفال فى الشارع....مش فى الهيلتون

و مش مقصور على ناس معينين....اى حد عايز يشارك ...يشارك

طبعا لازم الناس تحس ببعض و تساعد بعض

بس مافيش مانع انها تتبسط

انا شفت جزء من الاحتفال فى التلفزيون امبارح

و شايفة ناس كتير من طبقات الشعب كلها فى الشارع

مش مفروض ان كل ما حضرتك تجيبى كيلو لحمة و لا دستة جاتو فى البيت

يجى حد يقولك حرام عليكى ده تمنهم يجيب 10 كيلو فول

يأكل كام عيلة !!!!

منطق مش مريح شوية يا باشمهندسة

بعدين الاحتفال ده حسب مانا فاهمه اللى بيعمله

جمعية اهلية......مش الحكومة يعنى!!!

و ياريت حضرتك تقولى منين جبتى

الأقتباس اللى حضرتك حاطاه فى اول مشاركة

يعنى ده احصاء رسمى ....و لا احصائيات الجرايد و الفضائيات

اللى بتبشرنا كل يوم ان مافييييييييش فايدة .....الدنيا سودة !!!

"

[ابو حودة]

نيو كمر

فكرتيني بونيس ( محمد صبحي ) لما كان بيقول لولاده " لكم اخوة في الصومال "

وعلى فكرة مرتب مانويل جوزيه 670 الف جنيه شهريا ومحدش من الاهلوية وانا منهم زعلان بل بالعكس فرحانيين لانه بيفرحنا

[~Heba~]

ما هو عشان الاحتفال فى الشارع ده اللى يحرق الدم بجد

و بعدين يا نيو كمر يا عزيزتى اذا كان الاعياد العادية و الاحتفالات الروتينية اصبحت تمر على قطااااااااااااااااع كبير من المصريين و هم فى هم وضنك و تمر ثقيلة بدون ادنى بهجة و سرور يا حبيبتى دول ناس شبعانين الواحد من الشباب الهاى كلاس اللى انت شايفاه متعلم فى جامعة امريكية و ابوه ضامنله وظيفة فى الشركة بتاعته عشان يستكمل نهب خيرات البلد

خلى بقى سوزان مبارك كل يوم تعملنا احتفال من ده شكل و تجيب هيفاء وهبى تغنى زى ما بتعمل نوادى الروتارى و الليونز اللى بترأسها و ادى اسمها شغالة و بتهتم بالشعب المصرى اللى مبسوط على الاخر

نيو كمر لا اتفق معك فى المثال الذى ذكرتيه عن كيلو اللحمة

اولا الفرق ان التكافل الاجتماعى د واجب حسب الشرع و الدينن الاسلامى الذى يدين به اغلب المصريين

و حتى لو ده كمان مش عايزينه و يتنصلوا منه بطرق شتى بس بلاش يستفزوا الناس الغلبانة باحتفالات لا داعى لها كل يوم و التانى تصور البلد على انها جنة الله فى ارض و فيه كتير ناس طفشانة و هربانة و ناس مريضة تعانى و ناس قهرهم الغلاء و ضنك العيشة

[~Heba~]

نيو كمر

فكرتيني بونيس ( محمد صبحي ) لما كان بيقول لولاده " لكم اخوة في الصومال "

وعلى فكرة مرتب مانويل جوزيه 670 الف جنيه شهريا ومحدش من الاهلوية وانا منهم زعلان بل بالعكس فرحانيين لانه بيفرحنا

ما احنا كمان فرحانين عشان بناخد كأس افريقيا

ما هى المعادلة كالتالى:

إلهاء + إلهاء + إلهاء .....= شعب سلبى + انانية + فوضى + حال البلد مايل

تم تعديل 17 مايو 2009 بواسطة ~Heba~

[ابو حودة]

احنا مش لازم نعيش في نتنكد كلنا علشان في ناس ظروفها كده سواء بسبب هذه الحكومة او غيرها من الاسباب

وعايز اعرف ايه اللي اتغير بعد حرقة الدم دي الحكومة بتاعتنا ماشية بنظام قولوا اللي انتم عاوزينه وانا هاعمل اللي انا عاوزاه

واعتقد ان الناس اللي في الدويقة مش هيستفيدوا من كلمتين مكتوبين على منتدى ولا هيتضرروا من فرحة بعض الناس العادية في الشارع

[طه بدر]

انا عايز اكتب تعليق ليس له اى علاقة بالموضوع

فانا لم اتابع الخبر وبالتالى لااستطيع الحكم عليه

لكنى تذكرت وانا اقرا الموضوع ان هتلر اثناء الحرب العالمية كان عقله يعمل دائما ويراجع ويدقق كل صغيرة وكبيرة

بينما كان تشرشل فى نهاية اليوم وبعد انتهى العمل واثناء قصف لندن بالقنابل يدخل مكتبه ليشاهد افلام كارتون

والله قرايت كده

افلام كارتون وكانت ضحكات الرجل واصحابه هى ما تعطيهم الامل والقوة للمقاومة و لاستمرار الحرب رغم ان كل العوامل كانت ضده

فى النهاية انتحر هتلر وانتصر تشرشل - خلى على جنب ان الامريكان هم اللى حاربوا-

مش عارف ايه علاقة ده بالموضوع بس حبيت اشارك معاكم

مع تحياتى

تم تعديل 17 مايو 2009 بواسطة طه بدر

[~Heba~]

احنا مش لازم نعيش في نتنكد كلنا علشان في ناس ظروفها كده سواء بسبب هذه الحكومة او غيرها من الاسباب

مفيش حد عايز عيشة نكد بل عيشة عمل دى اللى احنا محتاجينها

مصر اللى عاملة كل يوم و التانى اجازة بعضها رسمية و بعضها اجازة اسبوعية لزوم التنشنة و راحة البال هل ستحقق ما حققته اليابان الذى يقدس شعبها العمل و الانتاج

ايه بقى العمل و الانجاز فى احتفالات كل يوم و التانى

صح افتكرت حفلات ليالى التلفزيون و اضواء المدينة و حفلات شرم الشيخ و مدينة الانتاج الاعلامى

فى عز ما الاسعار بتغلى و الدخل بيقل و شبابنا بيغرق عايزين الناس تفرح و تهيص...آدى المنطق و الا بلاش

صحيح قدروا يحسبوها

وعايز اعرف ايه اللي اتغير بعد حرقة الدم دي الحكومة بتاعتنا ماشية بنظام قولوا اللي انتم عاوزينه وانا هاعمل اللي انا عاوزاه

صح هو كدة طالما اغلب الاعضاء اللى تفضلوا بالرد هنا لم يجدوا غضاضة فى هذا الاحتفال

سبحان الله رغم انه ثلاثة ارباع الاعضاء فى المنتدى هنا مغتربين شايفين الويل فى الهجرة

وطبعا يتمنوا يشوفوا البلد جميلة و سعيدة و فيها احتفالات و فرحة بس بجد مش على طريقة اخفاء الاخفاقات و المصائب التى يبتلى بها الشعب باحتفالات تافهه

واعتقد ان الناس اللي في الدويقة مش هيستفيدوا من كلمتين مكتوبين على منتدى ولا هيتضرروا من فرحة بعض الناس العادية في الشارع

لا طبعا تضرروا بمزيد من التغييب و التجاهل لشانهم بحفلات هايفة لا يوجد اى طائل من وراها

بيقولك شوية كتب و بلالين و بنبونى و حفلة لعمر خيرت يبقى استفادوا ايه هما من فرحة ناس بايدها كتير عشان تغير حالهم

وبايدهم هما اكتر من حد تانى على اعتبار ان الست سوزان هانم دى السيدة الاولى فى مصر لما فكرت تعمل جمعية اهليه بقت كل الايدين ممدوة لها و يوجد عدة وزارات امكانياتها مسخرة لها زى التعليم و الصحة السكان

حضرتك شمفتش الخبر بتدى تعليمات لوزير السكان السابق بخصوص القصر اللى عايزة كل مصرى يعيش فيه

اما الكلمتين اللى مكتوبين فى منتدى مش حيفيدوهم صح عندك حق انا بس بنفس عن مشاعر الغضب و الاحباط و اهو بالمرة نعطى الفرصة للناس الفرحانة ينفسوا عن مشاعر الفرح و السعادة بمثل هذه الاحتفالات

[~Heba~]

بينما كان تشرشل فى نهاية اليوم وبعد انتهى العمل واثناء قصف لندن بالقنابل يدخل مكتبه ليشاهد افلام كارتون

والله قرايت كده

اعتقد ان هذا هو ما يفعله الرئيس طوال 27 عاما والنتيجة مصر بخير و كله تمام :lol: على رأى شاعرنا التونسى

[newcomer]

ما هو عشان الاحتفال فى الشارع ده اللى يحرق الدم بجد

و بعدين يا نيو كمر يا عزيزتى اذا كان الاعياد العادية و الاحتفالات الروتينية اصبحت تمر على قطااااااااااااااااع كبير من المصريين و هم فى هم وضنك و تمر ثقيلة بدون ادنى بهجة و سرور يا حبيبتى دول ناس شبعانين الواحد من الشباب الهاى كلاس اللى انت شايفاه متعلم فى جامعة امريكية و ابوه ضامنله وظيفة فى الشركة بتاعته عشان يستكمل نهب خيرات البلدخلى بقى سوزان مبارك كل يوم تعملنا احتفال من ده شكل و تجيب هيفاء وهبى تغنى زى ما بتعمل نوادى الروتارى و الليونز اللى بترأسها و ادى اسمها شغالة و بتهتم بالشعب المصرى اللى مبسوط على الاخر

نيو كمر لا اتفق معك فى المثال الذى ذكرتيه عن كيلو اللحمة

اولا الفرق ان التكافل الاجتماعى د واجب حسب الشرع و الدينن الاسلامى الذى يدين به اغلب المصريين

و حتى لو ده كمان مش عايزينه و يتنصلوا منه بطرق شتى بس بلاش يستفزوا الناس الغلبانة باحتفالات لا داعى لها كل يوم و التانى تصور البلد على انها جنة الله فى ارض و فيه كتير ناس طفشانة و هربانة و ناس مريضة تعانى و ناس قهرهم الغلاء و ضنك العيشة

برضة ما اقدرتش اوصل لأيه اللى يحرق الدم

يا باشمهندسة : الرزق ده من عند ربنا ..هو اللى بيقسم الأرزاق

يعنى مش معقول احنا نعاقب واحد ربنا رزقة وو سع عليه

بيدفع زكاته و بيخرج صدقات و بيساعد على قد ما يقدر

( و دول ناس كتير ...على فكرة)

مش معقول ان نقوله لأ اانت لازم تشيل اخطاء البشر ية كلها

يعنى هو حضرتك ما بتشتريش فستان جديد و لا جزمة جديدة

اضافة للى عندك؟؟؟ و لا بتاكلى حتة تورتة .؟؟؟ و لا بتبيضى بيتك؟؟

و لا بتعزمى اقاربك و صحابك على شاى و ساندويتشيين و حتتين جاتو؟؟

و لا حضرتك بتقولى .....لازم اتضامن مع ضحايا الدويقة و العبارة

( مع كل التقدير فى مصابهم و احزانهم....ربنا يصبرهم و يعوضهم خير)

ليه حضرتك بتكررى استهزائك بخريجى الجامعة الامريكية و اعضاء الروتارى

هم بيعملوا ( اللى بيعمل فيهم) اللى شايفين انه هايساعد اللى محتاج مساعدة

من وجهه نظرهم .....( حكمنا بقى غلط او صح ) لكن هو ده اللى عينيهم شايفاه

مش كل واحد هاى كلاس ( زى ما حضرتك بتوصفى ) لازم بيكون حرامى

و بينهب البلد و طالعله انياب بتمص دم الغلابة

ربنا يوسع رزق الناس كلها الأغنياء و الفقراء

[~Heba~]

الروتارى و الليونز منظمات صهيونية و كل نشاطها مشبوه و مشارككتها فى الاعال الخيرية ليست الا غطاء لحاجات تانية

نييجى بقى للى حارق دمى ان الناس دى مبتحسش

و زى ما قلت عشان هما شبعانين و ضامنين مستقبل مرفه فى ظل بلد ماسكينها فاسدين و بيحتفلوا و فى داهية بقى البلد ايكش تولع

و اللى يحرق الدم بجد ان الست سوزان هى راعية الحفل و ترجع تتكلم عن المواطن المصرى و زوجها يصدعنا باسطوانة محدودى الدخل المشروخة

اللى يفقع المرارة بجد الخبر اللى قريته انهارده عن العلاوة قال ايه الرئيس وقف مع محدودى الدخل كعااااااااااااااااااااااااادته....يا دين النبى و ربى انا هنفجر

كنت بحسب المرتب هيبقى كام بالعلاوة دى لقيته هيزيد عشرين جنيه لموظف على الدرجة التانية

يا سلام لأ و بيعملوا احتفلات بهذه الانجازات العظيمة

انجازات مبارك الثالث عشر و حرمه المصون قاطنى درب مصر الجديدة النحاس

بالله مش دى حاجة تفقع المرارة

اذا كنتى شايفاها عادى انتى حرة و ده رأيك لكن انا لا انظر للموضوع نظرة ضيقة و اسقطه على فرد واحد و انه متضامن مع اهل الدويقة و مع ذلك بينبسط و بياكل جاتوه إلى آخر المثل الذى سردتيه

انا انظر لحال البلد ككل و شايفة الناس معدومى الاحساس اللى فى الصور دول ليسوا الا جزء من البلد جزء واخد حقه و البقية مهمشين

انا مش بكلم على البقية اللى على المليون متر مربع (مساحة مصر) بكلم على البقية اللى على بعد كيلو من هذه المصر الجديدة

تم تعديل 17 مايو 2009 بواسطة ~Heba~