احتفال مصر الجديدة...بامارة إيييييه!!!!!!!!

[اسماعيل امين]

انا عايز اكتب تعليق ليس له اى علاقة بالموضوع

فانا لم اتابع الخبر وبالتالى لااستطيع الحكم عليه

لكنى تذكرت وانا اقرا الموضوع ان هتلر اثناء الحرب العالمية كان عقله يعمل دائما ويراجع ويدقق كل صغيرة وكبيرة

بينما كان تشرشل فى نهاية اليوم وبعد انتهى العمل واثناء قصف لندن بالقنابل يدخل مكتبه ليشاهد افلام كارتون

والله قرايت كده

افلام كارتون وكانت ضحكات الرجل واصحابه هى ما تعطيهم الامل والقوة للمقاومة و لاستمرار الحرب رغم ان كل العوامل كانت ضده

فى النهاية انتحر هتلر وانتصر تشرشل - خلى على جنب ان الامريكان هم اللى حاربوا-

مش عارف ايه علاقة ده بالموضوع بس حبيت اشارك معاكم

مع تحياتى

-------------------

تعليق اخر ليس له علاقه بالموضوع ربما يصلح لتقريب وجهات النظر بين المختلفين .

في اواخر السبعينيات كان الاستاذ احمد فؤاد والمرحوم الشيخ امام يقيما حفل في احدي الاحياء الشعبيه الفقيره .

اجتمع عدد كبير من الناس من عشاقهم .استمر الحفل بنجاح .

ثار بعض اهالي الحفل بزعامه رجل بسيط خاصه لرؤيتهم سيارات ملاكي خاصه ببعض الضيوف .وصاح الرجل قائلا :-

بتتكلموا علي الفقر والفقراء وكل واحد راكب عربيه بالشيئ الفلاني ...حد فيكم نام من غير عشا ....ولا من غير غطا ...وهكذا

---------------

انا اراي ان حاله الخلل التي نعيشها وتطحن عظام الغالبيه (خوف من اليوم او الغد ....وانعدام الامل)تجعلنا لا نري الاشياء الجميله التي تمر حولنا.

1- حفله وندوه الاستاذ احمد فؤاد نجم والمرحوم الشيخ امام وما يرددون من كلمات واغاني لصالح الفقراء شئ صح جميل وتعبير صادق

الضيوف لم يراعوا اقامته في الحفل او الندوه في حي فقير (سيارات ملاكي ).

2- زعيم الفقراء مستواه ووعيه لم يصلا به ان هناك اغنياء شرفاء

الخوف مستقبلا علي المحروسه من زياده المسافه والبعد بين :-

من هو فقير ومن هو غني

من هو متعلم ومن هو جاهل (يطحنه الفقر )

الحاكم والمحكوم .

------------

اكيد فيه شئ جميل يمكن تنفيذه في الاحياء البسيطه (خاصه في الاجازه الصيفيه لو صدقت النيه )

اجمل صوره اعجبتني الشخص الذي يرسم علي الارض وبجانبه طفله صغيره .وحضور الفنان الرائع عمر خيرت الذي احب موسيقاه الجميله .

[~Heba~]

تعليق اخر ليس له علاقه بالموضوع ربما يصلح لتقريب وجهات النظر بين المختلفين .

في اواخر السبعينيات كان الاستاذ احمد فؤاد والمرحوم الشيخ امام يقيما حفل في احدي الاحياء الشعبيه الفقيره .

اجتمع عدد كبير من الناس من عشاقهم .استمر الحفل بنجاح .

ثار بعض اهالي الحفل بزعامه رجل بسيط خاصه لرؤيتهم سيارات ملاكي خاصه ببعض الضيوف .وصاح الرجل قائلا :-

بتتكلموا علي الفقر والفقراء وكل واحد راكب عربيه بالشيئ الفلاني ...حد فيكم نام من غير عشا ....ولا من غير غطا ...وهكذا

---------------

انا اراي ان حاله الخلل التي نعيشها وتطحن عظام الغالبيه (خوف من اليوم او الغد ....وانعدام الامل)تجعلنا لا نري الاشياء الجميله التي تمر حولنا.

انا لا ارى اى جمال فى الحفل

الحفل ده تقيمه دولة معدلات الفقر فيها طبيعية

دولة متقدمة و ارتاحت و لا تمر بأزمات

للاسف السيدة سوزان مبارك عندك خلل فى فهم شئ اسمه الاولويات

عملت مهرجان اسمه القراءة للجميع استمر سنوات طويلة تشكر عليه

الآن على العاقل ان يحكم اطفال مصر لا يجدون لقمة العيش و هى تستمر فى عمل مهرجانات القراءة لهم

لو كانت الكتب تشبع و تجعل الطفل منهم يبت قرير العين كنت وافقتها و حطيتها على رأى لكن الحال بيتغير و فيها حاجة اسمها اولويات لازم تراعيها

1- حفله وندوه الاستاذ احمد فؤاد نجم والمرحوم الشيخ امام وما يرددون من كلمات واغاني لصالح الفقراء شئ صح جميل وتعبير صادق

الضيوف لم يراعوا اقامته في الحفل او الندوه في حي فقير (سيارات ملاكي ).

2- زعيم الفقراء مستواه ووعيه لم يصلا به ان هناك اغنياء شرفاء

الخوف مستقبلا علي المحروسه من زياده المسافه والبعد بين :-

من هو فقير ومن هو غني

من هو متعلم ومن هو جاهل (يطحنه الفقر )

الحاكم والمحكوم .

والله يا استاذ اسماعيل الناس بتتكلم عن الفقر و الفقرا من عقود طويلة و الحال زى ماهو بيتغير

يبقى اكيد فيه مشكلة

المشكلة انه الواحد فاكر نفسه لما اتكلم و قال كلمتين او زى حالاتى كدة كتبهم فى منتدى يبقى خلاص ضميره ارتاح و ادى اللى عليه

------------

اكيد فيه شئ جميل يمكن تنفيذه في الاحياء البسيطه (خاصه في الاجازه الصيفيه لو صدقت النيه )

اجمل صوره اعجبتني الشخص الذي يرسم علي الارض وبجانبه طفله صغيره .وحضور الفنان الرائع عمر خيرت الذي احب موسيقاه الجميله .

انا كنت اتخيل هذا الحفل كالتالى

دعوة لشباب مصر الجديدة للمساهمة فى تطوير العشوائيات

دعوة للعمل الخيرى

دعوة لرسم بسمة على شفاة اطفال الشوارع

انما طبعا الواحد من الشباب الهاى كلاس اللى فى الصورة ممكن يقرف اساسا ان رجله تخطى عتبه مكان عشوائى من اللى هما بيعتبروهم بيئة

ويمكن الواحد من دول عنده شغالة و سواق من سكان العشوائيات دى و مش ممكن ينزلوا بمستواهم لمساعدتهم

هى الناس حتبقى زى بعض و الا اييييييه لا طبعا مستحيل

على الأقل مش فى زمن مبارك و سوزان مبارك

[newcomer]

الروتارى و الليونز منظمات صهيونية و كل نشاطها مشبوه و مشارككتها فى الاعال الخيرية ليست الا غطاء لحاجات تانية

هما شبعانين

و فى داهية بقى البلد ايكش تولع

بالله مش دى حاجة تفقع المرارة

اذا كنتى شايفاها عادى انتى حرة و ده رأيك

شايفة الناس معدومى الاحساس اللى فى الصور دول ليسوا الا جزء من البلد جزء واخد حقه و البقية مهمشين

باشمهندسة هبة......واضح ان احنا مش هانلتقى فى نقطة مع بعض

لعدة اسباب منها انه ما بيقنعنيش و ما عارفش اناقش

احكام و رؤى سابقة التجهيز .....و لا انى اردد اتهامات ما عنديش عليها دليل

و لا انى اتفرع فى مواضيع تانيه و اتوه !!

ما ينفعش كمان اتهم ناس بعدم الأحساس لأنهم ساكنين فى منطقة معينة

يعنى ايه حضرتك منظمات صهيونية....؟؟؟؟ لتغطية اعمال مشبوهه؟؟

يعنى ايه جزء من البلد واخد حقه؟؟؟؟ عرفتى منين حضرتك انه واخد حقه و لا لأ

انا ملاحظة ان حضرتك بتاخدى احكامك مدفوعة بالمظاهر

( زى موضوع كوبرى استانلى ......)

حضرتك مصرة على نفس الكلام و ما بترديش على الاسئلة اللى بتتكتب الك

غير ان ( انا اسفة ) لغة الحوار ( باللون الاحمر) دى مش مريحة ....بالنسبة لى.

باعتذر مقدما اذا كان كلامى فىه حاجة ضايقتك

ملحوظة: انا مش ساكنة فى مصر الجديدة.....انا من اسكندرية!!

[~Heba~]

باشمهندسة هبة......واضح ان احنا مش هانلتقى فى نقطة مع بعض

لعدة اسباب منها انه ما بيقنعنيش و ما عارفش اناقش

احكام و رؤى سابقة التجهيز .....و لا انى اردد اتهامات ما عنديش عليها دليل

يا فندم مش مهم نتفق

انا كتبت المضوع و انا عارفة انه محدش حيوافقنى فى الرأى و خصوصا اللى ساكنين فى مصر الجديدة

وكمان بعض الزملاء اللى حضروا الحفل و انبسطوا

المهم انى قلت رأيى و فى المهزلة اللى اسمها احتفال مصر الجديدة

و ستكرر كل عام وستزداد العشوائيات و يزداد الفقراء و المصايب هى هى فى البلد و الناس فى الأحياء الراقية مازلوا يحتفلون مثل هذه الفتاة التى هيئت نفسها للكاميرا كما لو كانت ستؤدى بروفة امام خالد يوسف

بصراحة المنظر لم يختلف كثير عن شباب مارينا اللى تظاهروا تأيدا لمهند و نور

و يمكن هما نفسهم بس لسة مصيفوش لاننا لسة فى شهر 5 wst::

و لا انى اتفرع فى مواضيع تانيه و اتوه !!

!!

هذا فراق بينى و بينك

انا لم اتعامل مع القضية بشكل شخصى

انا واخدة صورة كاملة للوطن و هذه الشرذمة فى حى من أرقى الأحياء فى عاصمة مصر لديهم الوقت و الروح و الماااااااااااااااال للاحتفال بحياتهم المترفة بينما لا تكاد صور انهيارات الدويقة و مناظر اخرى تفارق ذهنى

فين بقى التوهان

ألا ترى ان الأمور مرتبطة ببعضها

كما هو واضح جمعية مصر الجديدة جمعية اهلية

و الجمعيات الأهلية مهمتها مساعدة المجتمع للتخلص من مشاكله

و هؤلاء اقصى مشاكلهم انهم لا يحتفلون كما ينبغى

صح بقالهم كتير منفخوش بلالين و لا اكلوا بنبونى

يا حراااااااام

ما ينفعش كمان اتهم ناس بعدم الأحساس لأنهم ساكنين فى منطقة معينة

انا حكمت عليهم من خلال تصرفهم

بصراحة الأحتفال ده لوكان لابد منه كان المفروض يبقى فيه انشطة مفيدةاكتر مش عمر خيرت و مش عارف ايه

هما مش عندهم الاوبرا

هى مش مكفية و الا ايه

و الا حبوا يخلوها مجانية و جابوا الاوبرا فى الشارع بعدما قفلوه

نيوكمر عزيزتى انظرى للصورة كاملة

بلد فيها كل المشاكل دى الناس ليها نفس تحتفل دى حتى الاعياد العادية بقت تمر تقيلة على ناس اثقلت الهموم

يعنى ايه حضرتك منظمات صهيونية....؟؟؟؟ لتغطية اعمال مشبوهه؟؟

حضرتك اقرأى عن الماسونية ستجدى ان اسم هذه النوادى يتكرر اكتر من مرة

ومعروف ان هذه النوادى لا يشترك فيها الا عليه القوم و بشروط معينة تضمن انهم يكونوا واصلين لمراكز صنع القرار

وكما قلت النشاط الخيرى ليس إلا واجهة

انا الحقيقة لم اقرأ عن اى نشاط خيرى فعلى اللهم حفلات المطربات اللبنانيات التى يقال ان عائدها يذهب لصالح العمل الخير!!!!!!!!!!

يعنى ايه جزء من البلد واخد حقه؟؟؟؟ عرفتى منين حضرتك انه واخد حقه و لا لأ

عامل احتفالات :D

بجد مش عارفة اقول ايه

لا واضح انه واخد حقه الحقيقة

مش معقول تكون مصر الجديدة و فيها زبالة مثلا....وآدينا شايفين عمال نظافة فى الصورة :blink:

و معتقدش انهم بيعانوا من ازمة عيش مثلا بل معتقدش انهم بياكلوا العيش بتاعنا المدعوم من الحكومة

طيب انتى هتعملى لى زى فيروز و تقوليلى فيه مدارس حكومية فى مصر الجديدة تعانى زى المدرسة اللى جبت صورها

حرام عليكم احترموا عقلى شوية :)

انا ملاحظة ان حضرتك بتاخدى احكامك مدفوعة بالمظاهر

( زى موضوع كوبرى استانلى ......)

هنا فيه مغالطة كبيرة....ممكن اعرف هو فين الحكم اللى حكمته على اهل اسكندرية فى الموضوع الآخر؟

طيب حضرتك انا قلت هناك ان ده شئ لا يمثل اهل اسكندرية

اظن انا مش محتاجة تأكيدات اخرى انى احترم اهل الاسكندرية خصوصا انى اعرف العديد منهم

واعتقد انى ذكرت هذا اكثر من مرة هناك

فهل انا اخطأت بكتابة الموضوع؟

حضرتك مصرة على نفس الكلام و ما بترديش على الاسئلة اللى بتتكتب الك

اى اسئلة يافندم

انا ارد على مداخلاتك ككتلة واحدة و هذه المرة اضطررت لتفصيل الرد

غير ان ( انا اسفة ) لغة الحوار ( باللون الاحمر) دى مش مريحة ....بالنسبة لى.

ده كلام واحد محروق دمه :)

هو انا مش باين عليا انى متغاظة و إلا ايه

امممم طب ممكن اعبر بطريقة شيك اكتر و اقول زى فاروق جويدة

يا ساقى الحزن لا تعجب ففى وطنى

نهر من الحزن يجرى فى مآقينا

!!!!

باعتذر مقدما اذا كان كلامى فىه حاجة ضايقتك

لا انا اللى بشكرك

ملحوظة: انا مش ساكنة فى مصر الجديدة.....انا من اسكندرية

اجدع ناس :happy: :happy: :happy:

تم تعديل 17 مايو 2009 بواسطة ~Heba~

[عادل أبوزيد]

لم أستوعب جيدا أسباب الإعتراض على ما أطلق عليه "إحتفالية مصر الجديدة" و فى ظنى أن سبب الإعتراض ربما يرجع للإصطلاحات التى أستخدمت فى وصف هذه الإحتفالية.

ما سبق كان إستهلالا لابد منه

فى العالم كله سواء فى البلاد الفقيرة أو الغنية تنتشر مثل هذه الإحتفاليات و تسمى "كرنفالات" و تكون فرصة لبعض الأنشطة الإقتصادية البسيطة مثل تلك التى تواجدت فى الكوربة أمس أو أول أمس.

و نفس هذه الإحتفالية تتكرر فى طول مصر و عرضها و لكن لا يطلق عليها اللفظ الأجنبى "كرنفال" و لكن فى بلادنا يطلق عليه ال "مولد" و لكى تتصوروا ما يحدث فى المولد فقط إستعيدوا من الذاكرة مجموعة إسكتشات الليلة الكبيرة لصلاح جاهين و سيد مكاوى.

و إذا عن لنا أن نقارن بين كرنفال الكوربة و أى مولد فى أى من قرى مصر ستجد أن الإستعدادات و المكونات الخاصة بأى مولد أكبر و أوسع من كرنفال الكوربة بمراحل حيث تجدون المراجيح بأنواعها و لاعبى النشان و لعبة المدفع بالأثقال لعلكم رأيتم كل هذا فى الأفلام العربى القديمة الأبيض و الأسود.

نقطة أخرى فى بلدنا و قرانا فى طول مصر و عرضها تحدث الكوارث على كل المستويات و لا تتعطل الموالد

فى بيتى الشغالة عمرها تقريبا ستة عشر سنة و هى من إحدى قرى الفيوم و فى موعد المولد الخاص بقريتهم تأخذ ثلاثة أيام أجازة تقضيها فى قريتها و تستمع بالمولد.

ربما سبب الإعتراض - تصورى - أننا فى مصر لم نتعود أو نتقبل أن يكون هناك نشاط عام لحرم رئيس الجمهورية ما زلنا الصورة المقبولة هى صورة السيدة تحية حرم الرئيس جمال عبد الناصر.

[MZohairy]

انا موافقك نسبيا يا هبه

و ححكيلك موقف

رحت مكتب حكومي علشان اترجم الرخصه بتاعة القياده بتاعتي

المهم الست قالتلي الرسوم 35 دولار

قلتلها حاضر و جاي ادفع....

قالتلي انت جاي البلد جديد ؟

قلتلها أيوه

قالتلي بتشتغل؟

قلتلها لسه

قالتلي يبقى تستحق التخفيض

قلتلها بس انا معايا الحمد لله

قالتلي خليهم معاك احسن

و خفضتلي الرسوم 50% عشان انا جديد و مبشتغلش

الناس فعلا لازم تحس ببعضها

ولو قليلا

[~Heba~]

يعنى هو مولد يا استاذ عادل

مولد شيك شوية يليق بالناس الكلاس دى

طيب تفتكر يا استاذ عادل انه فيه علاقة بين الاحتفال ده و موضوع افنديات مصر كلنا مسؤلين

اكيد فيه علاقة من جهة ما

مشكلة الاحتفال انه جاء فى وقت الناس مش طايقة نفسها و كل يوم مصيبة جديدة

هو مش فيه اتفاق جنتلمان ان الاحتفالات تتلغى فى وقت الشدائد

و احنا فى مصر واضح اننا فى شدة انا بصراحة محستش بيها الا من يوم ما بطلت اكل جبنة رومى

انا محرومة من الجبنة الرومى :happy:

<<<<انا بهزر طبعا على حس الاحتفال اللذيذ ده

[~Heba~]

انا موافقك نسبيا يا هبه

و ححكيلك موقف

معقول

انت آخر توقعته يوافقنى

انت اكيد تقصد العكس

وشكلك مصدع مش عايز تدخل معايا فى جدال

تم تعديل 17 مايو 2009 بواسطة ~Heba~

[عادل أبوزيد]

لم أحضر تلك الإحتفالية و لم يكن لدى تصور عن حجمها اللهم إلا أن زوجتى لم تتمكن من دخول الكوربة لإغلاق الشارع.

ما سبق كان إستهلالا لابد منه

تصفحت موقع جريدة "اليوم السابع" الذى أوردته الفاضلة هبة فى مقدمة الموضوع و رأيت أن سفارات دول أجنبية و جهات ثقافية مصرية شاركت فيها ، و هذا بالتأكيد غير شكل المولد التقليدى الموجود فى ثقافتنا.

المولد كما نعرفه قد يكون أكبر بمراحل من كرنفال الكوربة (مولد سيدنا الحسين أو مولد مارجرجس) و لكن بالنسبة للمولد هناك بعد دينى - إسلامى أو مسيحى - و هذا يميزه عن الكرنفال حيث لا يمكن وقف الإحتفال بالمولد لأى ظروف كارثية.

فى حالتنا هذه مستوى الإحتفالية كان أكبر من إحتفالية لأحد أحياء القاهرة.

[لولا]

و بعدين يا نيو كمر يا عزيزتى اذا كان الاعياد العادية و الاحتفالات الروتينية اصبحت تمر على قطااااااااااااااااع كبير من المصريين و هم فى هم وضنك و تمر ثقيلة بدون ادنى بهجة و سرور يا حبيبتى دول ناس شبعانين الواحد من الشباب الهاى كلاس اللى انت شايفاه متعلم فى جامعة امريكية و ابوه ضامنله وظيفة فى الشركة بتاعته عشان يستكمل نهب خيرات البلد

الحقيقه يا هبه مش قادره استوعب حجم التهم والهجوم اللى فى كلامك على ناس كانت جريمتها انهم من سكان مصر الجديده وان حضور كرنفال مقام فى مصر الجديده برعايه حرم الرئيس هو شيء طبيعى جدا !!

واستغرب الجزم القاطع منك ان اقامه اى احتفال لغرض الإحتفال هو امر مشين فى ظل ظروف البلد ..

هبه مجرد سؤال هل كل من ولد ووجد نفسه فى مستوى مادى واجتماعى جيد يفترض انه متهم بتهم شرف ونهب وعدم اداء حق الوطن ؟!!

هل كل من ولد فى مصر الجديده هو شخص عديم الإحساس بسكان العشوائيات ؟!

هل كل من دخل جامعه خاصه وتكاليفها عاليه اهله عفوا "حراميه " ومضمون له وظيفه عن طريق اهله ليستكمل "نهب البلد !!"

هبه .. فكرى لو سمحتى فيما تقولين بشكل اكثر هدوء وعقلانيه بعيدا عن تعصبك الشديد من حفل مصر الجديده لأن دائرة كلامك اتسعت من مجرد

رغبه فى اقامه فعاليات مشابهه لخدمه قضايا وهموم يعيشها فقراء مصر - وهو شيء جيد لا غبار عليه - الى اتهامات شديده اللهجه لسكان مصر الجديده .

الكرنفال وما تم فيه من بازارات للبيع وترفيه لعدد كبير جدا من الناس من مستويات مختلفه ومن احياء اخرى حضرو للإستمتاع بيوم ظريف كان من الأشياء الجميلة

تماما كما افتح التلفزيون نهار الخميس يوم اجازتى فأشاهد اخبار مصر فى "او تى فى " بشكل يجعلنى اشعر اننى ارى جانب جميل من مصر ومن بهائها

ارى جانب من مصر احتاج جدا ان اراه دون ان احقد او انفعل او استهجن ان هناك جوانب لمصر واهلها لا تنحصر فقط فى العشوائيات والفقر الشديد والمشكلات

التى اتابعها كل يوم فى العاشره مساء وتسعين دقيقه و48 ساعه وكل البرامج الإخباريه ..

عموما من سوء الحظ لست من سكان مصر الجديده ولم اتواجد فى القاهره ساعتها لحضوره ..

قد انتظر ان يقام كرنفال ما فى المهندسين حيث بيتنا لأحضره واتمنى ان لا تطال شباب المهندسين اتهامات مشابهه لشباب مصر الجديده لو اقاموا كرنفال "ترفيهى".

لولا

[~Heba~]

فى حالتنا هذه مستوى الإحتفالية كان أكبر من إحتفالية لأحد أحياء القاهرة.

طبعا ده شئ يرجع لدور السيدة سوزان مبارك و دورها فى الدعوة للاحتفالية...ست رايقة بقى

انا كنت بحترمها جدا و طول عمرى كنت معجبة بمشروع القراءة للجميع و اللى يرجع له الفضل فى وجود شئ اسمه مكتبة فى كل مدرسة مش شرط ان العيال يقروا - يمكن لزوم التصوير فقط - بس على الأقل فيه مكتبة

و طبعا يلاحظ ان الاحتفال له بعد ثقافى كبير كما هو ملحوظ مشاركة السفارات و ده يرجع لان السيدة سوزان مبارك لما تدعى لاى شئ تجد بعض الوزارت "تقف على رجل واحدة"

ملقتش تعبير ابلغ الحقيقة

هى كدة تقف على رجل واحدة و تلبى لها كل رغباتها فى صورة من احكام السيطرة التام و كلماتها اوامر

حتى افتكر مجرد ماراثون نسائى كانت هى صاحبة الدعوة

والماراثون كان له تنظيم كبير و اتعمل فى الاستاد مش عارفة ده كله ازاى بس انا اشعر احيانا انها بلد لوحدها

و بحاول اتخيل حملات التطعيم لومكنتش تحت رعايتها يمكن كان يبقى تطعيم صورى و ليس ما نراه من دخول التطعيم فى كل بيت..!!!

[~Heba~]

هبه .. فكرى لو سمحتى فيما تقولين بشكل اكثر هدوء وعقلانيه بعيدا عن تعصبك الشديد من حفل مصر الجديده لأن دائرة كلامك اتسعت من مجرد

رغبه فى اقامه فعاليات مشابهه لخدمه قضايا وهموم يعيشها فقراء مصر - وهو شيء جيد لا غبار عليه - الى اتهامات شديده اللهجه لسكان مصر الجديده .

و الله مابتفرق معى

مصر الجديدة او المهندسين

انا لم اتعامل معها على انها مكان معيشة شخص معين

و انت يا لولا كما ذكرت انك موجوعة لحال بلدك

توقعت ان لاتهاجمينى على الأقل و تستنكرى رأيى

أليس هذا نوع من الوجع

اننا نجد شباب مرفهين ملهيين بإحتفالات و كلام فارغ

ليس لدى معنى مناظر هو بالفعل كلام فارغ

كأننا ناقصين احتفالات

من عيد لعيد و قريبا كان شم النسيم و دلوقتى عيد سنوى جديد و إلهاء جديد

و كل إلهاء و انتم طيبين و آدينا موجوعين عليكى يا بلدى

[~Heba~]

اعتذر عن استمرارى فى مناقشة الموضوع و اعتذارى لكل من آذاهم رأيى و رغم ذلك انا لا اتنازل عنه ولا اى كلمة قلتها ولو حتى ما قلته على سبيل السخرية

هذا الأحتفال لم يكن له داعى على الأقل بهذه الطريقة

و انسحب حتى لا يتحول الأمر لخلاف شخصى مع بعض الزملاء يتردد صداه فى موضوعات اخرى و هو كله مجرد اختلاف فى الراى و نظرتنا للامور

شكرا لكم جميعا

:happy:

تم تعديل 17 مايو 2009 بواسطة ~Heba~

[لولا]

ويفترض لكل شخص موجوع على بلده يمتنع منعا باتا عن حضور الكرنفالات او المشاركه فيها ؟!

ويفترض ان يمتنع ربما عن الذهاب للمصيف ..

وعن السفر لأى مكان لأنه موجوع ..

وهل يفترض ايضا تقديم كشف تفصيلى منشور فى جهه رسميه موثق ومختوم ليثبت مايقوم به من اعمال ايجابيه

تجاه وطنه تتناسب مع مقدرته وحالته !!

.

لك كامل الحريه كما هى لمن خالفك ان يحتفظ بوجه نظره ولكن دون اتهامات شرف ونهب وعدم احساس كما نوهتى وخصصتى لسكان حى راق لحضورهم ومشاركتهم احتفال مقام فى حيهم اثق ان له جوانب ايجابيه تغيب عنك وكان يمكن نقاشها لو كان للحوار اسلوب آخر .

تحياتى

لولا

[اسماعيل امين]

هبه .. فكرى لو سمحتى فيما تقولين بشكل اكثر هدوء وعقلانيه بعيدا عن تعصبك الشديد من حفل مصر الجديده لأن دائرة كلامك اتسعت من مجرد

رغبه فى اقامه فعاليات مشابهه لخدمه قضايا وهموم يعيشها فقراء مصر - وهو شيء جيد لا غبار عليه - الى اتهامات شديده اللهجه لسكان مصر الجديده .

و الله مابتفرق معى

مصر الجديدة او المهندسين

انا لم اتعامل معها على انها مكان معيشة شخص معين

و انت يا لولا كما ذكرت انك موجوعة لحال بلدك

توقعت ان لاتهاجمينى على الأقل و تستنكرى رأيى

أليس هذا نوع من الوجع

اننا نجد شباب مرفهين ملهيين بإحتفالات و كلام فارغ

ليس لدى معنى مناظر هو بالفعل كلام فارغ

كأننا ناقصين احتفالات

من عيد لعيد و قريبا كان شم النسيم و دلوقتى عيد سنوى جديد و إلهاء جديد

و كل إلهاء و انتم طيبين و آدينا موجوعين عليكى يا بلدى

--------------------

الاخت العزيزه الفاضله Heba

انا عن نفسي اقدر مشاعرك وصدق كلماتك .يوما شعرت بمرض في القلب ذهبت الي الطبيب .اخطرني انني اعاني من توتر عصبي

اجبت ليه يادكتور انا احب اضحك كتير وماشي بطريقه عمار يامخ خراب يادنيا .رد قائلا مما تراه في الشارع من فوضي وسلوكيات وتسرفات من الناس واقربهم اليك .

ترددت كثيرا في ارسال هذه الصوره .خوفا ان تتهميني بالنفاق ومسح الجوخ او انني من المنتفعين من الوضع الحالي .سوف ادرجها

لعلك تفهمين ما اقصد

انظري الي عيونهم جيدا ....تجدي انها ليست عيون لصوص ....هذا عيون اسره استسلمت لقدرها وهناك اجنده تملي علي الحكومه المصريه بضغط من الخارج وقوه المنتفعين من الداخل .هناك شئ مفقود بين شرفاء الحكومه المصريه والشعب المصري يزيد هذه الفجوه ما ينتشر بيننا من فساد ومنتفعين .

مخالفه هذه الاجنده يضيع بسببها 80 مليون مصري كما ضاع العراق الواعد بسبب وطنيه مزيفه واندفاع متهور .نحن ليس بعيدين عن قوي الشر .

لا نريد ان نندفع كما اندفع شعب العراق ترحيبا بالغزو .

نعم يوجد فساد ورشوه ومحسوبه وجهل وتخلف ولن تهدي المعبد علي من فيه .

قلت ليكم زمان ليس لكم سوي تكوين اسراب الحمام المصريه سخرتوا مني واعتبرتوني معتوه .

اكررها مره ثانيه ليس امامكم سوي طريق واحد ومخرج واحد .

------------------

كتبت هذا الجزء منذ ايام وترددت في كتابته .ارجو ان يتسع صدرك لفهم ما اقصد .

منذ شهرين كنت حزين لبعض المواقف الشخصيه مني ومن زملائي .لاحظ زميل ذلك .عزمني علي مشوار فسحه .ذهبت معه

ماذا شاهدت :-

1- احلي ولاد واحلي بنات في مصر المحروسه (ليس من حيث الجمال والمظهر بل من حيث العلم والنظام ).

2- سرح بي الخيال ....بعيد ....بعيد ....بعيد .........كدت اصرخ مثل علي بابا ....دهب ....يقوت ....مرجان .... ........ ....احمدك يارب ...

عيني لقطت فرد حمام كبير.....بدون حراسه ...يمشي منفرد .....لا تستطيع الاقترب منه اكثر من 10 امتار رغم عدم وجود ما يمنعك

3- تخيلت نداء يخرج من فمه ....لجميع ابناء المحروسه بالتضحيه بكل ما يملكون في سبيل جيل الشباب القادم ...في تلك اللحظه

كنت علي استعداد لتبرع بكل ما املك (مافيش مانع امشي حتي بالبوص والناس تقول عليا مجنون في سبيل جيل شباب المحروسه .

ارجو ان تسمح لي بتسميه ما رأيت.... سرب حمام الزمن القادم .اعتقد ان هذا شعور الغالبيه العظمي للمصريين

(الرغبه في حلم مصري كبير نعيش من اجله نضحي فيه بكل ما نملك من اجل الجيل والاجيال القادمه ).

لو وهبنا الله سبحانه وتعالي هذا القائد سوف تتخلص من قوي الشر الداخليه والخارجيه .

مثــــــــــــــــــــــــــــــــــــــــال

رئيسك في العمل لو شعرت مجموعه المنتفعين وقوي الشر برغبته في التطهير وتنظيم العمل الجاد لاتحدوا عليه

واطاحوا به .

نحن في حاجه لقيادات (بالعشرات او المئات) .....لاسراب الحمام المصريه ....وليس قائد واحد (انتهي زمن القائد الملهم ).يتم تجهيز هذه الاسراب قبل اعلان هدفه وحلمه الكبير .

هذا الشئ يتم ولكن لاهداف محدوده ؟؟؟؟؟؟؟؟؟(كل شئ واضح )

لا ......ولم .............ولن ..................................تستطيعوا اعلان بدء هذا الحلم الكبير بدون اتمام تجهيز اسراب الحمام المصريه داخل .....الحكومه ........الداخليه .......الجيش ..........الجامعات ........المصانع والاتجاه المسيحي والاتجاه الاسلامي (يحمل بذور العلم وليس بذور التخلف والتعصب ).........والكتله الصامته.

في النهايه ولا الف رئيس او زعيم فردي يستطيع تقديم شئ جيد للمحروسه (اسخروا كما تشاءون؟؟؟؟؟؟؟؟).

[اسماعيل امين]

تابع الجزء السابق :-

1- اسف لعدم ذكر اسم من اقتبست منه الصوره السابقه (لم اتذكره اسمه جيدا من المحاورات ).

2- اسف لخروجي من الموضوع الاساسي

[metwallly]

اعتذر عن استمرارى فى مناقشة الموضوع و اعتذارى لكل من آذاهم رأيى و رغم ذلك انا لا اتنازل عنه ولا اى كلمة قلتها ولو حتى ما قلته على سبيل السخرية

هذا الأحتفال لم يكن له داعى على الأقل بهذه الطريقة

و انسحب حتى لا يتحول الأمر لخلاف شخصى مع بعض الزملاء يتردد صداه فى موضوعات اخرى و هو كله مجرد اختلاف فى الراى و نظرتنا للامور

شكرا لكم جميعا

:closedeyes: :unsure:

مش من حق حضرتك تنسحبى من الموضوع وطالما بتؤمنى بشىء لازم تستمرى فيه!!!!!

ياريت الجماعة اللى مش عاجبهم كلام الأخت هبه يشوفوا برنامج واحد من الناس اللى بيجى

على دريم يوم الجمعة والخميس وهما هيعرفوا تكلفة حفلة تافهه زى دى كانت ممكن تعالجع كام طفل

أو توفر أكل لكام اسرة مش لاقيه تأكل وكان نفسى تشوف الحلقة اللى فاتت بتاعت المعهد القومى للأورام

وكمية الأطفال اللى عندهم أورام سرطانية خبيثة فى مصر وقد إيهم هما محتاجين لكل قرش

ومش بس كده لا دى حتى مش لاقين صفائح دموية للأطفال دول فيها إيه لو الشباب دول كانوا راحوا

إتبرعوا بدم للإطفال دى وعلى فكرة أكتر الفقرة فى مصر مش فى الريف ومش فى الصعيد

اكتر الفقرة فى المدن الكبيرة وفى القاهرة بالذات لأن الريف لسه فيه تكافل على الأقل فى توفير لقمة العيش

((ومحمود سعد فى البيت بيتك من يومين لما كان بيتكلم عن تطوير عشوائيات زنهم قال ياريت السيدة

سوزان مبارك تزور المناطق العشوائية والمستشفيات أو على الاقل تعلنى إنها هتزورها وشوفوا إيه

اللى هيحصل فى الأمكان دى))

تخيلوا المكان اللى هتعلن إنها هتزوره هيحصل فيه إيه !!!!!!!!!!!!!!!!!!!!!!!!!!!!!

ولا أملك إلا أن أقول لك الله يا مصر وحسبنا الله ونعم الوكيل

[الترجمـان]

اختنا الحبيبه هبه...

أنا اتعمدت إني انقلك صورة هذا الإحتفال أو البازار الذي نجحت في تسميته بدقة الفاضله لولا وهو بالمناسبه نشاط إحتفالي ترفيهي أعترف انه دخيل على ثقافتنا المصرية )..ولكني عزفت عن الرد لأنني لمست حالة العصبية الشديدة التي أثـّرت بشكل أو بآخر على طريقة التعاطي الطبيعي لأي موضوع مهما كان ومهما اختلفت وجهات النظر ...

كما انني التمس لك العذر فأنت لا تعرفين الفوائد الطبية لبومبوني قصر القبه الذي وزع على الأطفال في الإحتفال السابق ويمكن عمنا العزيز سي السيد يقدر يستفيض في الموضوع داه بشكل افضل :P

فاضل بس عملية واحده تصحيحية للأسباب التي جعلتك تغضبين بهذا الشكل ولطبيعة هذا النوع من الإحتفال ...

1-يوم الإحتفال ليس أجازه رسمية

2- الدعوة عامه لكل المصريين

3-الدخول مجاني

4-الخروج مجاني ( أوعي تزعلي ) :lol:

5- قلبك أبيض :)

شكرا

[اسماعيل امين]

اعتذر عن استمرارى فى مناقشة الموضوع و اعتذارى لكل من آذاهم رأيى و رغم ذلك انا لا اتنازل عنه ولا اى كلمة قلتها ولو حتى ما قلته على سبيل السخرية

هذا الأحتفال لم يكن له داعى على الأقل بهذه الطريقة

و انسحب حتى لا يتحول الأمر لخلاف شخصى مع بعض الزملاء يتردد صداه فى موضوعات اخرى و هو كله مجرد اختلاف فى الراى و نظرتنا للامور

شكرا لكم جميعا

:) :P

-------------------------

كلماتك وتعليقاتك السابقه كلها تعبر بمنتهي الصدق عن مشاعر الغالبيه المطحونه .

محصله تعليقاتك وتعليقات زملاؤك علي المحاورات تصب في اتجاه :-

الاحتفالات تكون بعيده عن استفزاز اي شريحه من المجتمه المصري وتحوي برامج واعمال هادفه يستفيد منها الكبير ةالصغير.

الاخت الفاضله المحترمه هل تتذكري اواخر الستينات بعد النكسه

كانت الجبهه المصريه مشتعله كل يوم شهداء وضحايا وبيانات عسكريه والناس مشدوده اعصابها .طلب بعض الناس تخفيف الضغط العصبي من خلال البرامج الاذاعيه الخفيفه ثار البعض الاخر علي ذلك (كيف يحدث ذلك والبلد في حاله حرب ؟؟؟).

الطرفين يعبر كل منهم بصدق عن مشاعره .

في النهايه اتذكر لك هذه الجمله

خليك زي ابوك لا يقولوا منين جبوك ويمسخوا الكلام .

نحن اعضاء المحاورات نتحدث الي فتاه مصريه من جنوب الوادي ولا الف خلاف يهزوها .

[msayed]

الموضوع ده استفزنى، مش الإحتفال نفسه لكن بعض النقاط حوله، ليه بقى

أولا: الحفل تم فى شارع عام يستخدمه كل المصريين وليس حكراً على أبناء مصر الجديدة، يعنى مش من حقهم يقفلوه علشان يحتفلوا، وطبعاً إللى ليه مصالح فى اليوم ده إتعطلت، ثم إن شوارعنا أى شارع يتعطل فكل الشوارع حواليه بتتعاطف معه وتتعطل. وكان من السهل والمنطقى أن يتم الإحتفال فى نادى من نوادى مصر الجديدة.

وأتسائل، لو أن شباب شبرا حبوا يقلدو شباب مصر الجديدة ويحتفلوا ويقفلوا شارع شبرا علشان يرسموا على الأسفلت إيه هاتكون النتيجة، طبعاً معروفة محاضر إشغال طريق لمن يتم القبض عليه وشوية قنابل مسيلة للدموع لزوم تفريق التجمعات إللى معطلة المرور.

ثانياً: الحفل لو كان تحت رعاية رئيس حي مصر الجديدة أو عضو مجلس شعب كنا قلنا أهو الراجل عاوز يبسط أهل حيه وياريت كل رئيس حى يعمل يوم كده يقابل فيه أهل حيه ولا لوم عليه طالما حالل مشاكل أهل حيه كلهم وخلاص ضميره مستريح وهو مجمعهم ومبسوط. هو غير مسؤول عن الناس إللى بيناموا وتحتهم المجارى فى المناطق المظلومة المظلمة من مصر-أما أن يكون راعية الحفل -بحكم مناصبها- مسؤولة عن 80 مليون شخص وتغض الطرف عن مشاكل ناس وتشارك ناس تانية أفراحهم، فهذا ليس عدل، وإلا فالحل الوحيد أن تنظم حفل للأحياء المطحونة مثل الدويقة أو سكان مقابر الغفير مثلاً علشان يفرحوا وينبسطوا ويرسموا على الأرض.

ثالثاً: فى قانون المرور فيه مخالفة إسمها إشغال طريق، فهل ما حدث هذا ليس مخالفة، المفروض لو أن مصر بلد تحترم القانون فأى واحد إتضرر –زى أخونا إللى ما عرفش يستلم الحوالة بتاعته- ممكن يروح يعمل محضر للناس دى ويكملوا الحفلة فى قسم مصر الجديدة لحين العرض على النيابة، مش ده القانون ولا إيه؟ لكن طبعاً لو نوى بس يروح ناحية قسم مصر الجديدة فها يكون مصيره مش معروف.

الموضوع مش مستفزنى أوى فهو مجرد نتيجة للفساد والمحسوبية الذى تعيش فيه البلد والذى سيتفيد فيه البعض بكل شيء سواء مع القانون أو ضد القانون ويحرم الباقى من حاجاته الأساسية.