احتفال مصر الجديدة...بامارة إيييييه!!!!!!!!

[skyed]

سلام عليكم

احتفال الكوربة عادي مفيش مشكلة عليه ....تقدر تسميه كرنفال او اي حاجة ..... و علي فكره الحكومة مش بتعمل ده بس لسكان مصر الجديدة و بس

يا استاذة هبة في الصيف و كل عام بيتعمل مهرجان احلي 1000 مره من بتاع الكوربة ده و لمدة 10 اياااااااااام اسمه مهرجان محكة القلعة داخل قلعة صلاح الدين و محمد علي ... مهرجان مفتوح مجانا او بتذكرة رمزية تعزف فيه كل انواع الموسيقي و كمان بيغني فيه فنانين كبار زي علي الحجار و محمد الحلو و محمد منير و كل ده ببلاش !!!!! و بيحضروا سكان السيدة عائشة و محمد علي و سكان المقابر المحيطة و كل المصريين الحلوين و من كل المستويات و ده عم تجربة شخصية انا روحت المهرجان ده اكثر من مره و فعلا قمة قمة في الجمال و تحفة و رهيب فعلا صاحب الفكرة عبقري ياريت يا استاذة هبة تروحي السنة ديه انشاء الله المهرجان و انتي حتشوفي بنفسك ابناء الاحياء الشعبية المحيطة وهما هناك و في قمة الاستمتاع منهم سكان الدويقة و منشية ناصر علي فكرة !!!!!!

و ده رابط في اخبار المهرجان الاخير http://www.youm7.com/News.asp?NewsID=36342...&IssueID=41

و كمان فيه واحد زيه في الاسكندراية في قلعة قايتباي و كله ببلاش و فيه كبار المطربين و حاجة كده تفرح القلب و للناس الغلابة برضوة

يعني مهرجان الكوربة ده تافه بجانب مهرجانات القلعة !!!! و هي تحت رعاية دار الاوبرا المصرية !!

اتمني ان سوء التفاهم يكون انتهي ! و كمان اتمني انك تروحي مهرجانات القلعة السنة ديه !! والله شيء زي الاحلام !

شكرا

[اسماعيل امين]

الاخت المحترمه الفاضله Heba معظمنا يتابع ما تكتب من اشياء ممتازه منذ فتره ولا تتأخر بالمساعده بصدق وامانه ومداخلاتها دليل علي ذلك .عبرت عن مشاعرها ووجهه نظرها بمنتهي الصدق الذي يعبر عن مشاعر الغالبيه خاصه المطحونه .تدخل الزملاء بتعديل وجه نظرها .منها تدخلات منطقيه وبعضها شديد القسوه .

تعرضت لهذا الموقف سابقا تدخل اثنين من الزملاء .احداهما منطقي والاخر قاسي في رده .شلتها في نفسي واحاول اصطياد اي خطأ له

انا اري المداخله في تعديل وجه نظر الزملاء بطريقه قاسيه تذهب بروح الصدق في الكتابه والتعبير عما بداخلنا .

الاخت المحترمه الفاضله مره اخري الف شكر علي شرح طريقه ادراج الصور علي المحاورات .

وهذه الصوره اهداء لاعضاء المحاورات

يارب الرسله (اقصد الصوره تكون وصلت)

[~Heba~]

وصلت يا استاذ اسماعيل....و من يد ما نعدمها :closedeyes:

انا نفست عن كل مشاعر الغضب و الاحباط المكنونة هنا و لكن لسة بقايا اليأس متملكة منى

لعمرك ما ضاقت بلاد بأهلها....ولكن احلام الرجال تضيق

و خلقهم كمان...!!

اشكر تفهمك استاذى العزيز :unsure:

[Scorpion]

الموضوع ده استفزنى، مش الإحتفال نفسه لكن بعض النقاط حوله، ليه بقى

أولا: الحفل تم فى شارع عام يستخدمه كل المصريين وليس حكراً على أبناء مصر الجديدة، يعنى مش من حقهم يقفلوه علشان يحتفلوا، وطبعاً إللى ليه مصالح فى اليوم ده إتعطلت، ثم إن شوارعنا أى شارع يتعطل فكل الشوارع حواليه بتتعاطف معه وتتعطل. وكان من السهل والمنطقى أن يتم الإحتفال فى نادى من نوادى مصر الجديدة.

وأتسائل، لو أن شباب شبرا حبوا يقلدو شباب مصر الجديدة ويحتفلوا ويقفلوا شارع شبرا علشان يرسموا على الأسفلت إيه هاتكون النتيجة، طبعاً معروفة محاضر إشغال طريق لمن يتم القبض عليه وشوية قنابل مسيلة للدموع لزوم تفريق التجمعات إللى معطلة المرور.

ثانياً: الحفل لو كان تحت رعاية رئيس حي مصر الجديدة أو عضو مجلس شعب كنا قلنا أهو الراجل عاوز يبسط أهل حيه وياريت كل رئيس حى يعمل يوم كده يقابل فيه أهل حيه ولا لوم عليه طالما حالل مشاكل أهل حيه كلهم وخلاص ضميره مستريح وهو مجمعهم ومبسوط. هو غير مسؤول عن الناس إللى بيناموا وتحتهم المجارى فى المناطق المظلومة المظلمة من مصر-أما أن يكون راعية الحفل -بحكم مناصبها- مسؤولة عن 80 مليون شخص وتغض الطرف عن مشاكل ناس وتشارك ناس تانية أفراحهم، فهذا ليس عدل، وإلا فالحل الوحيد أن تنظم حفل للأحياء المطحونة مثل الدويقة أو سكان مقابر الغفير مثلاً علشان يفرحوا وينبسطوا ويرسموا على الأرض.

ثالثاً: فى قانون المرور فيه مخالفة إسمها إشغال طريق، فهل ما حدث هذا ليس مخالفة، المفروض لو أن مصر بلد تحترم القانون فأى واحد إتضرر –زى أخونا إللى ما عرفش يستلم الحوالة بتاعته- ممكن يروح يعمل محضر للناس دى ويكملوا الحفلة فى قسم مصر الجديدة لحين العرض على النيابة، مش ده القانون ولا إيه؟ لكن طبعاً لو نوى بس يروح ناحية قسم مصر الجديدة فها يكون مصيره مش معروف.

الموضوع مش مستفزنى أوى فهو مجرد نتيجة للفساد والمحسوبية الذى تعيش فيه البلد والذى سيتفيد فيه البعض بكل شيء سواء مع القانون أو ضد القانون ويحرم الباقى من حاجاته الأساسية.

يا عزيزي msayed .. خلينا نبص للنقطة اللي حضرتك اثرتها دي من زاوية تانية ...

المهرجان فعلآ .. قفل شارع كامل .. و أكيد عطل ناس عن مشاوير كانوا في نيتهم يعملوها .... لكن اهو كان حاجة فرايحي و بطريقة او بأخري اشاع البهجة في نفوس ناس كتيرة تانية ...

بس ما كانش حكر علي حد ... يعني ما كانش مهرجان خصوصي ...

نيجي بقي لشبرا اللي حضرتك ذكرتها كمثال ... كام مرة حضرتك رايح تزور واحد معرفة او قريب .. او حتي مروح بيتك ... و هوووووب تلاقي نفسك وصلت لمنطقة سد و لازم تلف طريق راس الرجاء الصالح علشان توصل لهدفك .... و عربيات تتكربس ورا بعضها مش عارفة تروح لا شمال و لايمين و لا ترجع ورا ...و السبب مش مهرجان معروف ميعاده ...

و لكن السبب صوان جنازة .. او صوان فرح اتنصب كده بمنتهي البجاحة في نص الشارع و قفله من الرصيف للرصيف ... و عالرصيف نفسه نصبة القهوة لزوم التعزية ...او جرادل الشربات و البيرة لزوم الفرح .. بميكروفوناته اللي متوجهة للأربع اركان ... و خد عندك لنص الليل و انت طالع .....

يعني مش بس اشغال طريق و اضرب راسك في اكبرها حيطة فيكي يا مصر .... تعدي ما تعديش مش مشكلتي .. لأ و دي جي درجة رابعة علي خبط و رزع .... لحد الصبح ...

ده حضرتك تسميه ايه ...

روح حضرتك بقي لقسم روض الفرج علشان تعمل بلاغ ... ايه اللي حيجري ؟؟؟