موهوبون فى المنتدى ‍‍‍!!! ‍‍‍

[حشيش]

مناقشة طرح الثقة في حكومة حشيش

عمى وأستاذى العزيز دارون

خليك محضر خير ومتفتحش عليا أبواب جهنم...حقك محفوظ ياباشا...حسلك لك وزارة الزراعة تعمل فيها كيف ما بدا لك...صوب.. هندسة وراثية..تقاوى مضروبة.. براحتك..وفوق ده كله حيوصلك منى عشر بواكى أول ما تسحب مناقشة طرح الثقة فى حكومتى...إتفقنا..

عمى وأستاذى العزيز محمد أبو زيد

طلباتك أوامر ياباشا...تم منذ دقائق تعيين نورا فى وظيفة (وزيرة للدفاع والإنتاج الحربى) حسب توصية سعادتك إلى جانب مهامها الأصلية كوزيرة دولة لشئون ورق العنب...

[DARWEEN]

هممممممممممم

ماشي يابا الحاج ... الزراعه والأصلاح الزراعي والأمن الغذائي والمجتمعات الجديده ....... و 25 باكو وحتة صنف من اللي قلبك يحبها

إتفقنا ياحاج حشيش ياعسل .... وآآآآآميه عالأستجواب وطرح الثقه

[nora]

دي وزارة اخر مزاج ايه رئيك في تحويل التوبيك الى قسم دعوة للأبتسام

على فكرة ياأستاذ محمد الأسماء المقترحة (باستثناء إسمى) فعلاً أسماء جديرة من وجهة نظرى لتولى الوزارات المعنية وأنا كنت بتكلم جد المرة دى...على العموم ما دام إنته قررت تنقل الموضوع إلى دعوة للإبتسام بقه فاسمح لى أن أضيف:

وزيرة دولة لشئون ورق العنب: نورا

يا دي المصيييييييييييييييييبة انا مشفتش الحتة دي لااااااااااااااااااا دا انا هبدع فيها دي لعبتي ههريكم كرنب وبتنجان وورق عنب و كوسة كله مش بس ورق العنب انا اما خليت موازين الجمال القديمة ترجع تاني مبقاش انا

لاه وفي ضريبة اهو من اولها علشان نبقى على مية بيضة

[Mohammad Abouzied]

خليكي احسن في وزارة الدفاع

على الاقل انتي في الكويت وسبق انك عيشتي في جو الحرب

يعني عندك خبرة افضل من المشير بتاعنا هنا

[impossible]

مليش دعوة عايزة وزارة

اهئ اهئ اهئ

هاتولى وزارة اى حاجو والسلام

احسن اعيطلكو هنا وقلبهاا مناحة

وزارة الفشل رابطة العواطلية

ولا اقولكم انا هكتفى بجمعية الاكتاءب والفشل الاهلية

حد يشارك

ممكن اغيرها واخليها النكد انترناشيونال

[afiona]

رئيس مجلس الوزراء: أخناتون.......

         رئيس مجلس الوزراء:حشيش.........

إرسوا علي واحد فيهم لأنى محتاج أعرف قصيدة (أنت شمس والملوك كواكب) توجه لمين..........الموضوع لا يحتمل التهريج.

وبعدين عدم اللا مؤاخدة يعني، انتم مش ناسيين منصب مهم قوي بتاع أشيك واد في روكسي؟ ولا إحنا حنسيب النظام الملكي ؟

[maksoof]

نظرا لإن الأفيون أقوى تأثيرا من الحشيش فأنا أقترح أن تتولى أختنا (أو يتولى أخونا)

أفيونة

رئاسة الوزراء إعتبارا من سعت تاريخه.

توقبع: مسطول أول بالوزارة

قصدى... مسؤول أول بالوزارة

[Mohammad Abouzied]

نظرا لإن الأفيون أقوى تأثيرا من الحشيش فأنا أقترح أن تتولى أختنا (أو يتولى أخونا)  

أفيونة

رئاسة الوزراء إعتبارا من سعت تاريخه.

توقبع: مسطول أول بالوزارة

قصدى... مسؤول أول بالوزارة

ادي ثاني تمرد عليك يا حشيش يظهر انك طيب ومتعرفش تحكم البلد دي فينك يا صلاح يا نصر

[amir]

مناقشة طرح الثقة في حكومة حشيش

عمى وأستاذى العزيز دارون

خليك محضر خير ومتفتحش عليا أبواب جهنم...حقك محفوظ ياباشا...حسلك لك وزارة الزراعة تعمل فيها كيف ما بدا لك...صوب.. هندسة وراثية..تقاوى مضروبة.. براحتك..وفوق ده كله حيوصلك منى عشر بواكى أول ما تسحب مناقشة طرح الثقة فى حكومتى...إتفقنا..

..

DARWEEN

ماشي يابا الحاج ... الزراعه والأصلاح الزراعي والأمن الغذائي والمجتمعات الجديده ....... و 25 باكو وحتة صنف من اللي قلبك يحبها  

إتفقنا ياحاج حشيش ياعسل .... وآآآآآميه عالأستجواب وطرح الثقه

هــو ده اللى بيقـولوا عليه " تكاتف قـوى الشعب العاملـه " ؟؟

[ragab2]

مافيش

وزارة لشؤون الفساد والاشراف على شؤون المحاسيب .. ؟

[achnaton]

مافيش

وزارة لشؤون الفساد والاشراف على شؤون المحاسيب  .. ؟

lما تغلاش عليك .. لكن الوزارة دى وزارة منافسة تبع " غراب الخراب "

ما تشوف الحكاية إيه يا حشيش إنت حتفضل " غايب " لأمتى ؟

[Lighthouse]

وانا فين وزارتي ياسي حشيش

من اولها كده ح تعمل فيها رئيس وزرا وتطنش محاسيبك ولا ايه

انا اقلبهالك ضلمة

اطلع بوزارة حلوة كده نأبج منها قرشين بيض ينفعوا في اليوم الاسود

[حشيش]

شوف ياعم رجب أنا عينتك فى الداخلية لحكمة ألا وهى إنك إنته وعمنا أخناتون أكتر إتنين فى المنتدى كتبوا عن قضايا الفساد والمفسدين اللى نهبوا البلد وأكلوها والعة...يعنى لو رجب مسك الداخلية وأخناتون مسك الأمن المركزى البلد حتنضف فى خلال سنة واحدة...بس الأمن المركزى المرة دى مش حيضرب فى الطلبة والعمال المضربين عن العمل لكن حيضرب فى شلة المحاسيب والهليبة وبتوع التلات ورقات...

بالمناسبة أحب أزف إليكم نبأ تعيين أختنا العزيزة لايت هاوس وزيرة للخزانة (بقول ياعم أخناتون مش حوصيك عليها...كرشها واسع قوى...عايزين الأمن المركزى يعمل واجب معاها...بس خلينى أنا بعيد عن الموضوع لحد ما ألحق أهرب كام أرنب على سويسرا وهيه لسه فى الوزارة)...

وقعت بالأمس قراراً جمهورياً بندب أخونا دارون من مصلحة السجون إلى وزارة الزراعة وإستصلاح الأراضى فى منصب وزير لحد ما أشوف له تصريفه لأنه الحقيقة مزنق عليه وبيهددنى إنه حيبلغ عنى مكتب مكافحة المخدرات....

حشيش باشا يكن

رئيس مجلس الوزراء

[mnman]

وبأغلابية ساحقة 99.999 % تم انتخاب السيد منمان لتولي منصب وزارة المواصلات والنقل تحت شعار الي مصر خالية من السكان.....

[سقراط المصري]

والنبي يا خونا شوفي لي مكان عندكم ، انا مش عايز أمسك وزاره ،دي حاجه كده على كف عفريت ، ولا حتى أكون محافظ

[DARWEEN]

وقعت بالأمس قراراً جمهورياً

أمسك عندك ..........

رئيس وزاره ... ماشي

توقع قرار جمهوري بصفتك أيه ؟؟؟؟؟؟؟؟؟؟

ماهو يا أما طموح مكبوت وطلع منك في زلة لسان

يا أما ناوي على أنقلاب

وقعت ووقعتك لون هباب الحله كده تقع مع الراس الكبيره

أما نشوف مين اللي حينتدبوه لمصلحة السجون يا(معسل)

[Lancelot]

هو لازم يعني الواحد يطلب و لا إيه ....

مش معقول كده يا أخ حشيش ....

كل الوزارات ديه و تنساني ...

طب سيب لي وزراية (تصغير وزارة) كده علي جنب ...

لا زعلان خالص .....

[Lighthouse]

بالمناسبة أحب أزف إليكم نبأ تعيين أختنا العزيزة لايت هاوس وزيرة للخزانة (بقول ياعم أخناتون مش حوصيك عليها...كرشها واسع قوى...عايزين الأمن المركزى يعمل واجب معاها...بس خلينى أنا بعيد عن الموضوع لحد ما ألحق أهرب كام أرنب على سويسرا وهيه لسه فى الوزارة)...

وقعت ولا حدش سمى عليك ياحشيش

بقى عايز تدبر لي تدبيرة امن مركزي وتعمل لي فيها شهيد التهليب وتاخد كام ارنب وتهرب وتدبسني فيها

ياحلو بانت لبتك اول مادابت قشرتك

تليفون صغنن لحبيب يطلع الكيف كله على جتتك

لا ومش بس كده كمان قال وبيعمل فيها قرارات جمهورية

مسكين حشيش

كان عنده طموح

بس طموحه وداه لفين

[mnman]

والان مع مراسلنا عيسوي عيسوي عيسوي كفر بطاطا....

اية الاخبار عندك ياعيسوي....

علي حد علمنا ان رجال الشرطة البواسل قاموا في جنح ظلام الليل بمهاجمة وكر الارهابين و تم القبض علي زعيم تنظيم FUS (فليني ينوبك ثواب) و عثر علي كثير من الادلة القاطعة علي تورط الحركة في مخطط لقلب نظام التلفزيون من بال ل سيكام وعثرت الشرطة علي :

- دستتين فنلات كت. و اخري نصف كم و عدد لابأس بة من الشرابات الرجالي والحريمي مما يفيد ويؤكد شروعهم في تنفيذ مخططهم الارهابي... و عدد من البيجامات الكستور ماركة الكساء الشعبي تعود الي ايام السلطان برقوق الاول... وعدد من ساعات اليد يعتقد انها تستخدم لظبط الوقت علي الرغم من تأكيد الحكومة الدائم علي ان الوقت هو عدو الحكومة الاول... وتوجة السيد حشيش رئيس الوزراء و معه لفيف من الوزراء لتفقد موقع الحادث والتأكد من ان النظام لسة بال مش سيكام..... وان الملتي سيستم وارد امريكا توكيلة مع الننوس الصغير وان الشعب بيستخدم بال و هو ولا علي البال.....

وتفيد بعض المصادر ان السيد حشيش اوصي بعلاوة الي كل رجال الشرطة البواسل مقدارها مئة ناقة حمراء ... ولتعذر الحكومة قام وزير المالية بأخذ قرض من البنك بضمان المضبوطات و وضع الشرابات كوديعة رسمية للدولة علي ان يدفع البنك مليون جنية شهريا لشراء حلوي و بنبوني لتحلية مياة البحر و الاستعاضة عن النيل.... و هنا كان الدور الريادي لوزير البيئة حيث تقرر الاستغناء عن النيل و استخدامة كمقبرة لقش الرز و بالعند في الفلاحين مش حيعرفوا يحقروة وهو مبلول..... واشاد السيد الرئيس بجهود السادة الوزراء ورجال الشرطة و تم اهداء سعادتة درع النصر و الفوز و الحصول علي المراكز الاولي و شهادة الثانوية العامة ...... وقرر حل الوزارة واقالة السيد حشيش من منصبة لتقصيرة في حماية الاقتصاد و الامن و عقابا لة تم تعيينة في جامعة الدول العربية.....

كان معكم عيسوي عيسوي عيسوي... قناة المحاورات للاخبار... كفر بطاطا.....

[سقراط المصري]

والنبي يا خوانا شوفوا  لي مكان عندكم ، انا مش عايز أمسك وزاره ،دي حاجه كده على كف عفريت ، ولا حتى أكون محافظ