خداع ام واقع؟

[بنت شعنونة]

من يومين صديقة لي اتصلت بيا وهيا في قمة النرفزة

وعرفت منها في النهاة انه جاليها عريس

وكعادة الأهل طلبوا منها انها "تتأنك" وتتشيك عشان لما العريس يشوفها لآول مرة

المشكلة انها فتاة عادية جدا في الملبس والشكل والتصرفات وهيا بتحب تبقى كدا

وفي رايها ان "الأنتكة" دي في اول لقاء ليست تزين ولا تجمل وانما خداع وغش

وبيني وبينكم انا كمان رايي من رايها

يعني ايييييييييييه البنت تلبس وتتشيك وتحط مكياج وبتاع في اول لقاء عشان تعجبه وهيا اصلا طبيعتها مابتحطش مكياج ولا بتلبس بالطريقة دي مثلا؟؟

ليه ما تبقاش على طبيعتها

المهم وهيا بتكلمني مامتها قالتلي

خليها تعمل كدا اول مررررة وبعد كدا تبقى على طبيعتها

الأنطباع الاول مهم يا بنتي

وبعدين لما الراجل "يتدبس" بعد اللقاء الأول تبقى تعمل اللي عاوزاه وتلبس على طريقتها

؟؟؟؟؟؟؟؟

طب وليه كدا؟؟؟؟؟

هل فعلا الرجال بحبوا كدا؟

وهل العريس لو شافها امووورة اول مرة وبعد كدا شافها بكوتشي و بنطلون ها يطفش؟؟

وايه الفرق؟؟ ماهيا هيا نفس الأنسانة؟

مين الصح فينا

البنت والا اهلها؟؟؟

[Mohammad Abouzied]

طبقا لقواعد علم النفس ان اول لقاء واخر لقاء له تأثير خمسون في المائة عن تكوين الانطباع عن الشخص ذاته وليس الميكياج هو من يصنع انسانه

لانه يوجد عوامل كثيرة غيرة مثل طريقة الكلام والثقافة والتعليم والقبول العام لدى الاخر يعني مثلا لو كان راجل متأنتك مثلا وملمع جزمته كويس ولابس كرفته حلوة وماشي على الارض انهدي ما عليكي ادي لازم يدور على واحدة متأنتكه زيه وحطة حمسه كيلو مكياج على وشها ولابسه من على الحبل

انا من رئي انها لو انسانه بسيطة يجب ان تقابل العريس المنتظر بنفس الشخصية واذا كان عاجبه هو حد لاقي عرايس بالشكل دا دلوقتي

[maksoof]

مين الصح فينا

البنت والا اهلها؟؟؟

طبعا البنت هى اللى صح

و بصراحة كلمة "يتدبس" دى ما تطمنش

و بعدين مين قال إن المكياج حيزود جاذبيتها؟ يعنى لو كان العريس زى حالاتى عنده حساسية لمستحضرات التجميل يبقى مش حتشوفه تانى. و ساعتها حيقولوا جه يكحلها عماها

مش كدة والا إيه؟

[SANAA]

انا شيفه ان الام متقصدش المعنى اللي قلته بالنص

معظم البنات والسيدات الان وانا اولهم بنحب الكچول وبنستسهله

لكن هو لما بيكون فيه مناسبه حلوه عيد ميلاد او فرح او مقابله مهمه مش بيكون فيه تعديل بعض الشئ ده حتى الناس لما بتروح تزور ناس مشفتاهش من مده بتلبس لبس خاص بهذه المناسبه

وبعدين هو معني انه شفها وهي لبسه كده انه خلاص ادبس؛؛؛ لا دا بس عشان ميفهمش أنها لا تعتني بوجوده وبعد كده لما تعجبه او هو يعجبها هما الاثنين سوف يختار هو او هي الشكل اللي يعجبه ويقنع به الآخر

اللبس والمكياچ مش سبب لجواز ولكن النظره الأولي او الإنطباع الأول عليه عامل طالما ان هي مش حتلبس بروكه ولا تضع كنتاك وتغير لون عنيها مفيش مانع ؛؛وبعدين مش هي لما تتجوز حتلبس وتضع مكياچ في البيت؛؛ يبقي فين التدبيس؟؟؟

[متفائل]

أنا رأيي أنها متتخلاش عن طبيعتها

بس .....

برده لازم تهتم شوية في أول مقابلة يعني تكون بلبس شوية مميز ومكياج خفيف خالص لان ده برده حدث خاص مش زي متكون الوحده نازلة شغلها أو نزلة تشتري حاجة

وأعتقد ان الي رايح يخطب هو كمان مش بيقي رايح بأي هدوم عنده أكيد بيكون لابس كويس شوية

وده من باب الأهتمام أن الواحد في أول مقابلة لازم يشعر الطرف الأخر أنه مهتم بالمقابلة دي وانها مش حدث عابر

وده مش من باب التدليس ولا الخداع

[Handicraft]

ممكن اقول رأيى المتواضع

مين قال ان البنت لو لبست لبس مناسب للموقف تبقى مش على طبيعتها.

طيب سؤال هلى فى كل المناسابات بنلبس نفس اللبس وبنتصرف بنفس الطريقه ؟؟؟

الموقف بيفرض نفسه يعنى انا من جهى نظرى إن العين بتعشق قبل القلب يعنى لو شفت انسان وتقبلت مظهره ، أسلوب التعامل معاه حيختلف كليا عن لو أول انطباع كان مش كويس.

وفيه ناس بتقفل عند أول مقابله لم الإنطباع كان سلبى.

أنا رأيى الأم عندها كل الحق هيا عايزه بنتها تاخد الفرصة التانية لما تبدأ تتكلم مع العريس مش عايزاه يقفل من ناحيتها من أول ما يشوفها وبكده دور البنت يجى لاحقا انها تقنعه بشخصيتها.

الأنسان بيعيش طبيعته بتصرفاته وكلامه بالرغم من لبسه ويا ما فيه آنسات فى ثياب رومانسية وشخصيات مهترئة وأخريات فى ثياب متواضعه وشخصيات وتصرفات تجبر من يتعامل معها على احترامها وتقبلها بكل حنو.

[فــيــروز]

انا بردو من راى مدام سناء و الاخ متفائل

الاهتمام بالمظهر لا يعنى ابدا الخداع

بل انه يعنى ان الانسان يحترم من يقابلهم و يهتم بمظهره من اجلهم ومن اجل نفسه قبل اى حد تانى طبعا

مش لازم تحط ماكياج لو هى مش مرتاحه او ده مش شئ هى معتاده عليه لكن اللى اكيد لازم هو ان تعتنى بمظهرها بصوره تريحها وفى نفس الوقت تشعر الآخرين انها تهتم بمظهرها بدون مبالغه

والانسان فى المقابله الاولى مش بيكون قصاده غير المظهر لانها فى الغالب غير كافيه للتعرف على الجوهر بصوره متعمقه وبالتالى هو يحتاج ان يهتم بمظهره فى هذه المره مش من باب الخداع و انما لانه فى هذه المره تحديدا الآخرين لا يرون سوى مظهره يبقى مفترض يكون جيد بصوره تترك انطباع جيد لدى الآخرين

وطبعا مفيش لا تدبيس ولا دياولو لان قرار الزواج فى الغالب لا يتحدد على المقابله الاولى اصلا .. و فى النهايه كل تدبيس نصيب :-)

[بنت شعنونة]

يا جماعا انا معاكم والله في كلامكم عن "شوية" اهتمام

مافيش مشاكل

وهي كمان كان في بالها كدا انها تتشيك "سنة" زيادة بس

يعني بدل زنوبة الشغل بتعتنا دي ها تلبس شوز مناسب وكدا

لكن اسمعوا بقى كلام اهلها ليها

انا بكتبلكم اللي بتقوله اهو...

( يرضيكم ان ماما تقعد تقولي حطي مكياج وروج وحاجات كتير على وشي مع اني بكره المكياج ولو حطيت بحط حاجا لا تكاد ترى بالعين المجردة‍‍

وهيا مش عاوزا كدا عاوزة ميك اب واضح صحيح مش صارخ لكن واضح وانا بكرهه

دا غير اها عاوزاني اغير شكل الحجاب لانها بتقول انه بيخوف الناس عشان هوا حجاب مقفول على وشي مش زي الحجاب العادي وهيا عاوزة حجاب عادي بالطرح الملونة الصغننة دي وانا مش برتاح في طرحة صغننة اوي كدا

والمصيبة عاوزاني البس كعب وانا مش بعرف امشي فيه اصلا

طب ايه المشكلة لما ابقى زي ما انا من غير كعب وطرحتي زي ما هيا؟

بتقولي الناس مش ها تفهم طرحتك وها يفتكروكي "محروقة" وعاملاها كدا عشان تداري الحرق؟؟؟؟‍‍؟؟

هيا سمعت عن العريس كتير وواضح انه عجبها اوي الكلام عنه ومش عاوزة تفوته

وانا مش عاوزة اعمل كل دا

هوا جاي يتجوز والا يشتري فوتيه؟؟

اكيد مش ها البس كوتشي

اما عاوزا ابقى انا هيا انا

مش انا ريحا فرح‍؟؟ )

انا كتبت كلامها كله اهو

ردو عليها عشان انا بصراحا مش عارفا اساعد خااالص "وش محتار"

[Salwa]

شانا ياحبيبتى ...

لو صاحبتك انسانة مريحة ومتدينة ....اكيد السماحة والبراءة حاتبان على وجهها بدون رتوش صناعية ..

ممكن تعمل مكياج بسيط ...لو كانت معتادة عليه ...

مسألة اظهارها بشكل مبالغ فيه ....غلط ...

ويأتى بنتيجة عكسية .

ثم يعنى ...هل الطرف الآخر ..........ساذج للدرجة دى ؟

ولى رأى ....

كثرة البهرجة ....ممكن تخوف العريس ....ده مجرد رأى ...

الجمال فى البساطة .....دى قاعدة ليس لها استثناء .

زى ما بنقول الصحة تعطى جمال .

ايضا البساطة تعطى جمال . خليها على طبيعتها وربنا يوفق .

سلامى.

[بنت شعنونة]

طب في حاجا تانية غريبة

تبقى البنت بتعرف تطبخ وكل حاجا

لكن "ما اتعودددددتتتش " انها تقف في المطبخ عشان عندها على طول دادا او مامتها عندها دادا او مش معودها انها تشتغل

لكن فعليا هيا بتعرف تطبخ

وطبعا لما العريس يسال بتعرفي تطبخي يكون االرد ايوا

انما وقت الجد لو اتجوزوا لو ماجابش دادا ليها عشان تنضف وتطبخ لها تبقى ليلة سودا

مش عشان حاجا وانما عشان هيا عاشت عمرها كله ما اتعودتش تقف في المطبخ او تنضف البيت

"حاجا تحير"

[SANAA]

فى حالة انها مبتعرفش تطبخ فيش داعي للكذب ومعتقدش ان فى اول مقابله حد بيسأل عن الطبيخ

بعد كده تفهمه انها مش بتعرف تطبخ وده مش معناه ان لازم يجيب داده لانه بعد ميعرف واستمر معناها انه عنده استعداد للتجارب واعتقد ان بنات كثير بتكتسب الخبره في المطبخ بعد الزواج وعلي فكره من مصلحة البنت انها ماتخبيش عشان يكون علي نور من الاول

اما بالنسبه للمكياچ واللبس فده موضوع تاني وخيره الوسط ميكنش مكياچ وكثير وزياده عن اللزوم ولا كاچول خالص وكانها رايحه الشغل مثلا

[DARWEEN]

عزيزتي شعنونه ...

البنت لما بتكون رايحه فرح واحجه قريبتها أو واحده صاحبتها بتتشيك وتلبس اللي على الحبل دا بفرض أنها مانزلتش أصلا تشتري لبس جديد مخصوص للفرح ... فمابالك بأول لقاء بعريسها اللي مفترض أنها ماتعرفوش قبل كده ..... مافيهاش أي مشكله أنها تهتم بمظهرها ولو شويه صغيره ... الموضوع عادي وليس فيه غش ولا خداع ولا كلام كبير من دا خالص ... يعني أفترضي أنها رايحه إنترفيو لأي وظيفه جديده حتروح لابسه جينز وكاجوال ؟؟؟

وبعدين لا أعتقد أن العريس من أول يوم أو من أول مقابله ممكن يتدبس بالشكل الساذج ده

وعقبالك

[حشيش]

لا بأس من أن تهتم الفتاة قليلا بمظهرها...وشكرا