فيزا عامل والمهنه محاسب

[KAhamid]

والله يا مصرية ده اللي احنا عمالين نقولوا من زمان

ياريت نحترم وظائفنا ومؤهلاتنا

ومنرميش نفسنا كدا باي حاجة وخلاص

[ابو حودة]

بص يا سيدي واضح انك واخد القرار وطبعا دي حاجة ترجع لك

لكن من خلال القراءة فهمت اكثر من نقطة تجعل هذا الموضوع غير طبيعي

* والدك استاذ جامعي ( على مستوى الشكل فهي غير مقبولة )

* زوجتك او خطيبتك لها عمل هنا وهو ما يعني امكانية مجيئك معها كمرافق للزوجة ( محرم ) وهنا تستطيع ان تبحث عن عمل براتب ( بشكل ) مناسب

* الكفيل لا يمكن ان يرحلك ( واضح انه على علاقة بالاسرة ) اذا لماذا لا يرسل لك الفيزة مع عدم اشتراط عملك لديه وبذلك يكون قدم خدمة للاسرة ( طبقا للعلاقات الطيبة ) وكذلك اعفاك من هذا الوضع الغير لائق بمكانه والدك

الخلاصة ان كان ابوها راضي وانا راضي مالك انت يا قاضي

وشكرا

[ramyayash]

الاخ ابو جوده الكفيل ما يجبرني اعمل لديه

ولكن انا ما احب انني اشتغل مخالف يعني الفيزا عامل واشتغل عنده ومتثبت افضل من انني اشتغل عند واحد اخر وبراتب اعلي بس ممكن يخليني فجاه بدون عمل

ثانيا لو حضرت كمحرم فمش من حقي اشتغل وبرضو هضطر اقبل بفيزا عامل وساعتها مش هكون استفدت بشئ

تعقيب اخر الوضع والمظهر العام ما له علاقه بالمسمي في الفيزا انا بشتغل محاسب ووظيفتي محاسب ولكن هو اختار فيزا عامل نظافه لكي لا يضطر وقت سعوده بعض المهن الي التسريح وساعتها بخسر وظيفتي يعني لو مجرد اسم المهنه في الفيزا هيخليني اشتغل براحتي في السعوديه بدون اي اضطرار للرجوع اعتقد ان كده افضل من انني اكون بفيزا محاسب واضطر امشي من الشغل

[doha]

زي ماكتير قبلي قالوا واضح جدا انك عاقد العزم خلاص ومسافر مسافر بس يمكن عاوز حد يؤيد قرارك او يقولك كلمتين يشد بيهم على ايدك فيما عقدت العزم عليه ..

على كل حال مش هقولك اكتر من انك تستخير وبعدها خذ قرارك المريح لك بس حط في اعتبارك التالي :

اولا تقديرك مقبول وانت ادرى بمؤهلاتك التانيه يعني درجة اتقانك للانجليزي ودرجة اتقانك للحاسب والاهم درجة تحملك للمسؤولية في اي شغل تقوم بيه واعتقد هي النقطة بالذات الي خلت والدك يوافق على الراتب ده .. فالخلاصة مع التقدير ده ولو انت تص نص في الحاجات التانية اعتقد الراتب ده مناسب الى حد ما طالما هتسكن مع والدك وطالما زوجتك هتشتغل ..

لو انت حرك وبتاع شغل ومستعد تموت نفسك في شغلك وسبق كان لك مواقف تؤيد الاحساس ده يبقى اعتقد والله اعلم الفرصة دي مش مناسبة ليك .. ولكن زي ماقلت لك انت ووالدك ادرى الناس بالوضع واذا حاسين انها فرصة لاتعوض مش عشان هي ممتازه ولكن لانك لن تستطيع الحصول على افضل منها يبقى توكل على الله واقبلها .. ده اولا ..

ثانيا انت قلت في بدل سكن فبرضه قسمه على الراتب وشوف يطلع كام يمكن يكون بدل سكن كبير شويه ويعوض تدني الراتب ..

ثالثا : طالما هتعمل حسابك على عمل زوجتك فخلي في بالك ان الرواتب في مدارس الثانوي هتكون في حدود 2000 - 3000 طبعا ثلاثه دي للي خبرة بجد مش لسه متخرجة وطبعا يكون مؤهلها اصلا تربوي . واعمل حسابك برضه ان ثلاث شهور الصيف مفيش شغل ..

رابعا : اعمل حسابك لو زوجتك حملت فاحتمال تركها للشغل 50 في المية ولو ولدت فاحتمال تركها للشغل 100 % لمده تيرم واحد على الاقل ان لم يكن لمالانهاية .

خامسا: لو زوجتك شاطرة ومتمكنه ممكن تشتغل في مجال الدروس الخصوصيه واهو ده يعوض شويه تدني الراتب لكن لو هي متمكنه اوي يعني مدرسه والسلام ومفيهاش دماغ للشقى فمتعملش حسابك على البند ده .

سادساً : خلي بالك من موضوع التامين الطبي وتاكد منه قبل ماتطلع لان الحمل والولاده هنا بالذات خراب بيوت ومستعجل كمان يعني ممكن لو معندكش تامين او جهة العمل مش هتصرف عليك يبقى هتدفع في ولاده وحده الي حوشته في سنتين تلاته ..

سابعا وده آخر شيء العرض اجمالا مش خدمه من صاحب العرض ليك بقدر ماهو خدمه لنفسه يعني هو هيوفر لنفسه محاسب وببلاش كمان راتب اقل مايكون وفوق كده مش تعبان في الفيزا وعلى فكره هو جايبك فيزا عامل مش عشان السعوده ومش السعوده وانما لانها مش هتكلفه شيء يقدر انه يطلع كذا وحده زيها لكن الفيز التانيه بتبقى محدوده ومش اي حد يقدر يطلعها .. يعني من الآخر هو بيخدمك قيراط لكن خادم نفسه اربعه وعشرين .. وده مش عيب طالما الكل مستفيد لكن بقولك عشان بس تبقى عارف مين له في رقبتك دين ومين ساعد واخذ مقابل مساعدته ..

وربنا يعينك وتاخذ القرار الصحيح . .

[kingsabry]

يا أستاذ رامي

أنا خريج 2007 وجامعة المنصورة ومقبول برده ....

يعني كنا زملاء ..

اول شئ كلنا هنا المهن بتاعتنا يا محاسب يا أخصائي تسويق يا مهندس يا مهنة عادية ويغيرها بعد كده ...

وكلنا والحمدلله شغالين وميه ميه .. وما حدش بيفكر في حكاية السعوده والكلام ده .. لأن الارزاق بيد الله . وما بتحصلش ان يقولوا لشركه انت عندك محاسب وهيا مسعوده يبقى مشيه .. ما بتحصلش أبدا أبدا ..

تاني حاجه انت هتيجي هنا هتشوف الرواتب فوق 2500 للشخص الجديد وهتزعل على الوضع اللي انت هتبقى فيه ..

أحسن حاجه ليك سيبك من العقد ده وما تقولش أجرب لأن الايام هتسرقك هنا وهتعدي سنه وره سنه وانت واقف مكانك .

خلي والدك يجيب فيزا حره وتدور على شغل هنا ... ودي الخلاصة ..

ونبقى نقابلك هنا على خير .. ان شاء الله

[ramyayash]

صبري اعتقد انك لو 2007 وجامعه المنصوره تبقي تعرفني واعرفك وتقريبا كده طلعنا مع بعض رحله شرم الشيخ 2005

عموما سواء كنت انت صديقي صبري او زميلي صبري في منتدي المحاورات فانا بالفعل لدي كثير الاصدقاء في السعوديه ومنهم بتقدير جيد وما سمعتش عن احد بدايته 2500 ريال خلينا واقعيين هيعطوني 2500 ريال يعني حوالي 4000 جنيه مصري مقابل انني لسه موظف جديد بدون خبره وعلي اساس ان السعوديين نفسهم متوفر لديهم العمل؟؟

اعتقد ان 1500 ريال كبدايه منطقيه والدليل العديد من اصدقائي راتبهم 1500 ومنهم يعمل ب1200

لاتنسي ان المعيشه في القصيم او المدن الصغيره ارخص بكثير من الرياض وجده والدمام فالسكن في القصيم لا يتعدي في العام الواحد مبلغ 5000 ريال في حين ان اقل سكن في الرياض يتخطي 15 الف ريال

كما اعتقد ايضا ان مستوي اسعار الغذاء والبنزين في المملكه ارخص بكثييير من مصر

كذلك السيارات ومصاريف الحياه مثل الموبايل او وسائل الترفيه العامه

بمنتهي البساطه لو حسبنا ان 1500 ريال تعني 2250 جنيه مصري

وبافتراض حصولي عليها في مصر

فاعتقد ان 1500 ريال تكفي شخصين في السعوديه

اما 2250 جنيه مصري لا يكفو شخصين في مصر في ظل اسعار الماكل والملبس والبنزين وكافه مجالات الحياه

واذا اراد عضو ما وضع مقارنه في كل شئ بدايه من زجاجه المياه المعدنيه وصوووولا الي السياره الهمر ومقارنه الاسعار بين مصر والسعوديه فمرحبا به وانا علي استعداد تام لاثبات ان مصاريف الحياه كااافه في السعوديه ارخص من مصر

[kingsabry]

يا باشا هيا دي متوسط اسعار الرواتب هنا للشخص الجديد فعلا ..

وعلى فكره انا راتبي في الحدود دي .. وعاوز أغير الشركة اللي انا فيها واروح عرض جديد بـ 3500 وصدقني ده حقيقي بجد ..

بس انت بتشتغل في شركة ونظام للرواتب مش بيبص على انت بتاخد كام ولا حاجه لان المتوسط في السوق كده فعلا ..

طيب هقولك حاجه تعمل ايه لو عرفت ان فيه ناس رواتبها هنا ومحاسبين بتدخل في 12000 وال 15000 ومن غير cma ولا حاجه بس مع الوقت بيزيدوا .. ودي بتوصلنا لحاجه ان انت لازم تتفق على الزياده السنويه ما تقلش عن 10 % من الراتب

وعلي اساس ان السعوديين نفسهم متوفر لديهم العمل؟؟

السعوديين مش بتوع شغل الا من رحم ربي

وربنا يوفقك

تم تعديل 29 مايو 2009 بواسطة kingsabry

[alex man]

الاخ صبرى

فعلا انت اسديت النصحية لوجه الله تعالى تلك هى متوسط الرواتب بالنسبة للموظفين الجدد تعرف انا فى شركنى محاسبين 2007 بدوا براتب 2500 لمدة 3 شهور بالاضافة الى جميع الامتيازات الاخرة 3 شهور بدل سكن +10% انتقالات لمدة 3 شهور وبعد 1ذلك يوجد تقيم ولكن من الواضح ان صاحبك متخذى قراره وسوف يندم بعد ذلك يوم لاينفع ندم

[ابو حودة]

زي ما قلت قبل كده انت عاقد العزم وواخد قرارك اذن ما الفائدة من فتح الموضوع اساسا

الا اذا كنت ترغب في سماع ما يريحك واعتقد الناس هنا مش هتقول الكلام ده

ومسألة ان المغتربين مش عاوزين حد يجي اللي البعض ممكن بيقول عليها هنا اكيد في حالتك مش صح لان انت والدك هنا وشايف الحال

[زعلان]

رامي يا جماعة بيحاول يقنعكم بالعرض و كأن العرض مقدم لينا احنا مش ليه هو ربنا يوفقك يا رامي

طيب ممكن استفسار والدك استاذ بالجامعه تقريبا يعني متوسط دخل استاذ الجامعه الي زيه يتراوح من كام لكام

[محمد افندى]

واضح فعلا انك واخد القرار بس صدقنى لو ابتديت فى السعودية فى العرض دة بعد ما تيجى وتشوف الوضع هتحس فعلا انه ضعيف حدا جدا وبعدين ما تحسبشى ان 1500 ريال تساوى 2250 لان انت هنا بتنسى الجنية خالص وبتصرف بالريال لو وافقت على العرض حط فى اعتبارك انك مش هتحوش حاجة خالص

شوف والدك يشترى لك تاشيرة حرة وتيجى تشتغل فى جدة او الدمام او الراض برواتب تبدأ من 3000 ريال

[ramyayash]

زعلان باشا

انا مش بحاول اقنعكم انا بقول رايي وبس وموضوع التنفيذ او عدمه ده في ايدين ربنا

بالنسبه لدخل والدي فوالدي الحمد لله دخله مرتفع ولكن والدي في السعوديه من سنه 1984 حتي الان يعني ايام ما جه السعوديه اول مره دخله كان كويس في حدود 4000 ريال اي ما يعادل 1000 جنيه والان دخله الثابت في حدود 6 الاف جنيه او 7 بالاضافه للعلاوات والبدلات والذي منه يعني طبعا الوضع ممتاز

وشكرا للجميع علي التواصل

[زعلان]

ربنا يوفقك يا رامي و تحقق الي انت عايزه و ابقى طمنا عليك - الرضا و القناعة نعمة بس لا تغفل الطموح و بالتوفيق

[geemoo]

الحمد لله رب العالمين جائتني فرصه عمل كمحاسب وهذه هي الشروط

1/ المهنه محاسب

2/ الدوام من الساعه 7 الي الساعه 2 ظهرا ومن المغرب الي العشاء

3/ الراتب 1500 ريال

4/ الفيزا بمهنه عامل نظافه لحين السماح بتغيير المهنه مرة اخري من قبل السطات

5/ السكن مؤقتا مع الوالد لحين الزواج هاخد بدل سكن

6/ عمل الزوجه مضمون في مدرسه ثانوي

7/ الفيزا مجانا فقط مجرد 2500 ريال تمن استخراجها ومصاريف المكتب في القاهره

8/ اذا لما احب دفع 2500 ريال يتم خصمهم من الراتب علي 3 او 4 شهور

9/ السفر طيران سما عليهم

10/ لا يوجد سياره او اي مزايا عينيه من صاحب العمل

11/ لا يوجد سنين خبره ولا يوجد اي عمل محاسبي سابقا كما انني خريج 2007 جامعه المنصوره بتقدير مقبول

حتي الان لا اعرف اقبل او ارفض ولكن.... وظيفتين مضمونتين بدون دفع ثمن للفيزا شئ جيد وفرصه جيده

كما ان العمل الاضافي مقبول بالنسبه لي

ارجو معرفه رايكم يا اخواني

بص يا باشا انا رأى بصراحة اوعى تسافر عشان سبين اولهم واخطرهم ان الفيزا عامل نظافة وعاوز اقولك نصيحة اوعى تقبل مهنة غير مهنتك حتى لو قعدت فى مصر عمرك كله عشان لو رخصت نفسك من الأول هاتفضل طول عمرك رخيص

والسبب التانى ان العقد ب 1500 ريال مايكفوش مصاريفك فى الشهر وحتى لو الراتب انت وفرت منه 500 ريال ما تستهلش غربتك وبعدين انت لسة خريج 2007 يعنى خبرتك مش كتير فى مجال الحسابات انا رأى يا باشا انك تاخد دورات وتنى نفسك وتشتغل فى مصر سنة وسنتين وصدقنى هاتجيلك عروض كتير وانتالى هاتختار افضلها

تانى اكرر يا باشا اوعى تسافر بالعرض ده ودى نصيحتى ليك وعلى الله التوفيق

وارجو تحديد خطوات تغيير مهنة البطاقه والجواز لان صاحب العمل قالي انه ارسل رقم الجواز واسمي لمكتب بالسعوديه وسيتم التفويض خلال الاسبوع الحالي

كلمت المكتب قالي غير المهنه في البطاقه والجواز

وانا حابب الساده الافاضل يضعو لينكات المواضيع اللي توضحلي الخطوات من الالف الي الياء

وادعولي بالتوفيق