#@#@# عـمـار يا كـنـدا #@#@#

[وليد نور]

الاخ ايهاب سالم اعلم تماما وعلى الملأ أنى أحبك وأتمنى أن تكون هذة المحبه فى الله

تحياتى للاخ زناتى لمداخلتة الممتازة

[المعلم عتريس]

المسألة ببساطة

انا رايح عشان استفيد انا او على الاقل يستفيد اولادي

بالنسبة للاولاد

لا اظن انها حاجه يختلف عليها اثنين

تعليم وصحه وبيئة نظيفه لن تجدها من المحيط الى الخليج

الاختلاف بيكون هل انا شخصيا مستفيد من الهجرة والا لا??

ماديا دراسيا مهنيا وحتى نفسيا :lol:

المادة صعب الكلام فيها لان الجايين هنا من طبقات اقتصادية مختلفه

في اللي كان ساكن في الزمالك وفي اللي كان ساكن في امبابة (مش انا :blush2: )

لو هتدرس الشهادة الكندية لها قيمتها وهتفتحلك ابواب كثير في اي حته بعد كده

نفس الشئ للخبرة الكندية اللي ممكن تاخدها هتزيد من سعرك في اي بلد تروحها

انما لو واحد جاي مثلا

مش ناوي يدرس او يعادل حتى

ولا ليه في البزنس

ومش فارق معاه موضوع اولاد ومستقبل

يبقى بصراحه جيته مالهاش لازمة

بعدين احنا بنسرق لمين يا اخوانا

مش عشان مستقبل افضل لاولادنا

[ehabtaher]

بالنسبه لى شخصيا

انا سنى شويه كبير مش شباب زى ابو العتاريس

لكن

انا من زمان عايز اهاجر لاسباب ان الواحد متكتفه ايديه فى مصر مش عارف يعمل مشروع وينجح ومتكتفه فى الخليج مابيسمحوش انك تشتغل غير شغلتك اللى انت جاى عليها

لكن كندا من اللى بيتقال

بلد فيه امان غذائى من الارض الزراعيه الهائله

امان فى الطاقه (فيها بترول )

وامان صحى (مش متأكد ) بس على الاقل احسن من مصر

وتعليم كويس ليك وللاولاد

طيب ايه المشكله انك تعرف تعيش هناك (تشتغل وتصرف على اولادك )

طيب واحد بادىء فى الهجره وعنده الامكانيات الماديه للدراسه يبقى لازم يدرس ويشوف اى مجال مطلوب فى السوق وهو يحبه وممكن يدرس فيه ويدرس فيه واكيد مش حايندم

الباسبور الكندى مش وحش انه يكون هدف

يعنى مثلا انا لو معايا باسبور كندى وشهاده من كندا يبقى ممكن اشتغل فى اى مكان فى العالم ومش حيبقى فيه حدود لمكان عملى

امريكا استراليا نيوزيلاندا انجلترا ماليزيا الخليج

بس باسبورك حيبقى فى جيبك والمعامله حتختلف

وبعدين انتم بتتكلمو عن الهجره كانها قطع رقبه

ممكن يبقى صحيح لو جنسيتك المصريه بتستغنى عنها عند الحصول على الجنسيه الكنديه

لكن ده مش بيحصل

بدليل جمال مبارك معاه جنسيه تانيه ونظيف معاه جنسيه تانيه و ابوالعنين الخ الخ الخ

واللى قدر يستقر هناك كان بها كندا بلد جميله ومافيهاش عيب غير البرد فى الشتاء وووو

بسيطه زيها زى الخليج

مافيهوش عيب غير الحر فى الصيف ووووو

الفكره ان الواحد عايز مكان يبقى عنده فيه حريه ايديه ماتبقاش مربوطه

انا عايز انى تبقى جنسيتى هى الكره الارضيه وليس بلد معين

عايز اعرف الف العالم كله لو قدرت

ولو ما قدرتش

مش عايز يكون السبب هو الباسبور

لكن عايز السبب يكون

انى مش عايز

بس ببساطه

[znaty]

ايهاب يا طاهر ..دايما هاتجنني :)

هو انا يا عم قلت ان الهجرة قطع رقبه ؟؟ mfb:

بتجيب بس منين الكلام دة؟

في سطرين اتنين

السن الصغير ...اتكل على الله بس بشرط ..تفضل مصري ..ماتنساش بلدك وتعيش عيشتهم وتخلع جلدك

السن الكبير ..احسبها الاول قبل ما ترمي تقلك كله هناك ..ولادك موش هايستفيدوا اوي لو انت اتشحططت هناك وماعرفتش تشتغل شغلانة تناسب سنك ووضعك ابدا..يعني واحد 50 سنة يا ناس..وكان مهندس والا دكتور ..ممكن ينفع يشتغل في تيم هوروتنز مثلا ب 9.75 د\ولار في الساعة ؟؟دة لو فرضنا انهم اصلا هايقبلوه ..رضينا بالهم اصل

ااقلها موش هاتعرف تدخلهم جامعه هناك وهاترجعهم تاااااااااااااني مصر بعد الجنسية

اذا كان التعليم لثانوي مجاني ..فالجامعه هناك قسم وسط وخصوصا لو عددكم كبير..هاتجيب منين يا ريس ؟والا برده قروض وديون وقرف ؟ قروض بيت وتعليم وعربية وانت شغال كاجوال ؟؟

اومال الدكتور الشامي مثلا ..ماستقرش هناك ليه ؟؟ راجل حاسبها صح وعارف بيعمل ايه ؟؟

والله مشيت معاك حلاوة ..يبقي توكل على الله ..

ااقولك ..انت لسة بتتكلم وانت هنا ..سافر ودور ..وبعدين نتكلم تاني

[حسام يوسف]

أنا شايف الدكتور الشامي

عميد المهاجرين

وبنتظر بشغف رأيه -لو لم يكن هذا تطفلا منى -

[حسام يوسف]

أعرف ناس مرتاحين جدا جدا ماليا ماشاء الله فى مصر

وأقبلوا برضة ع الهجرة الى كندا

أنا مش مع كلمة ان لو معاك فلوس

هتعيش تمام

[ELSHAMY]

أنا شايف الدكتور الشامي

عميد المهاجرين

وبنتظر بشغف رأيه -لو لم يكن هذا تطفلا منى -

أخى الفاضل حسام...

اخوانى.....أخواتى

لو بقى هذا المنتدى أبد الدهر لبقى الاختلاف حول جدوى الهجرة أبد الدهر أيضا..

أعود و أكرر..

الهجرة أمر شخصى بحت....تفصيل يعنى...مش جاهز ...

كل واحد له حسابات خاصة به...و منها على سبيل المثال لا الحصر:

1 استعداده الشخصى للهجره

2 رأى زوجته و قدرتها على التحمل

3 عمره و أعمار أولاده

4 طبيعة عمله و الفرص المتاحة

5 قدرته المادية

6 دراسته و التمكن من اللغة

...هنا أنا ذكرت فقط 6 مقاييس لحسابات نجاح الهجرة من عدمها و هناك عشرات من المقاييس الأخرى....و يندرج تحت كل مقياس عشرات الاحتمالات...

فتكون النتيجة مئات بل ألاف الأمثلة التى يستحيل أن يشبه بعضها بعضا.... و هى ببساطة تفوق أعداد قراء هذا الموضوع بصفة خاصة...و جميع المهتمين بالهجرة بصفة عامة...

أذا نخلص الى ان كل منا نسيج وحده...حالة خاصة...يستفيد كل منا من تجربة الأخر...يأخذ منها ما يحب و يدع ما لا يناسبه...

و نصيحتى لا يبنى أحد خططه بناء على تجربة منفردة لأحد الناجحين...و أيضا لا يهد أماله بناءا على قدر لم يبتسم لأحد الفاشلين...

أنا شخصيا لم أكتب كلمة فى هذا المنتدى الا بعد أن قرأت مئات المداخلات و حاولت من خلال كل ذلك أن أبنى لنفسى ما يناسبنى من خلال المتاح لى....

و لا أزعم أن ما حققت من نجاح الا بفضل ما يسره الله لى بعد أن أخذت بكافة الأسباب المؤهلة لى....

و فى هذا الصدد فأنا من أنصار عدم هدم الجسور و حرق السفن بعد الهجرة...فقد علمتنا الحياة الأ نأمن لغدراتها.... فالصورة الوردية طالما حملت خلفيات مؤلمة...

و على نفس القدر فأنا من أنصار التمادى فى ارساء الجذور فى أرض المهجر طالما ان الحياة هناك تبتسم ...

وبين هذا و ذاك....فهناك ضرائب دفعت و مازالت و قد تستمر ...من الأرق و عدم الاستقرار و المشاكل الطارئة الأسرية منها و المادية...

و نحن فى النهاية سطور قصيرة فى كتاب الدنيا الكبير...و حياة سريعا ما تنتهى....و لا يبقى منها غير العمل الصالح....

قيموا الأمور......احسبوا الحسابات.....خذوا بالأسباب......و اتركوا الباقى على علام الغيوب....

و ليكن دعاء كل منا فى كل وقت: " اللهم دبر لى فإنى لا أحسن التدبير "

الشامى

[ايهاب سالم]

مستر زناتي

أنا سعيد إن كتير من المهاجرين بيسيبوا كندا بعد الجنسيه و ده لأنهم مش هيعيشوا على الإعانات الحكوميه اللي مموله من ضرايبنا

قوللي انت كام واحد تعرفه ..من المنتدي او من غيره ..خد جنسية واستقر هناك من سنين طويلة ومش عاوز يرجع ..انا اعرف اتنين بس من وسط عشرات

أقولك على مين و ألا مين يا زناتي

من شلة الكليه بس في 4 .. غيري طبعا

من الأصدقاء اللي تعرفت عليهم هنا 6

من زملاء العمل حدث و لا حرج ... الشركه معظمها مهاجرين من أسيا و أفريقيا و أوروبا الشرقيه ... شغالين و ناجحين و زي الفل و مش هسيبوا كندا و لا بالطبل البلدي

القطار اللي بأركبه الصبح معظمه مهاجرين ... عايشين في بيوتهم اللي يملكوها في الضواحي و بيروحوا شغلهم (اللي مش كاجوال) كل يوم في الداون تاون

جيراني ... أغلبيه من المهاجرين ....

صلاة العيد اللي فات .. المكان مكانش مكفي من كتر الناس رغم إقامة 3 صلوات متعاقبه .. هتقولي و ده أيه علاقته .. هأقولك مش هيروح مهاجر يشتري بيت في ميلتون و هو مش لاقي ياكل و الزحمه دي كلها مهاجرين عايشين في ميلتون ... المسلمين بس

ياراجل دة انا شفت مدير ادارة مصري ..شغال في قهوة مصري في الويك ايند بس علشان مافيش غير كدة ..بيرص فحم على المعسل ياريس ؟؟

كويس قوي عليه يا زناتي ... هو كان فاكر نفسه هيشتغل مدير إداره في كندا ... هنا مش حكومه و مناصب و منظره يا زيكو

بتعرف تشتغل أيه يا حبيبي .. عندك مهارات في أيه .. هنا مجتمع إقتصادي صحي .. قائم على المنافسه و العمل ... مش مجتمع بيروقراطي قائم على الواسطه و المحسوبيه و الشهادات التي لا يفهم أصحابها فيها شئ

أنا بأكتب لك دلوقتي و أنا داخل على كمبيوتر الشغل من البيت الساعه 8 بالليل و شغال .... معاك مهاره و بتعرف تشتغل هتعيش ... نظام شهادات يبقى معطلكش

مجتمع ديناميكي يا زيكو ... مفيهوش كيانات عائليه زي الجيش و الشرطه و البترول و التليفزيون و القضاء و مصر للطيران

هجرة للصغير لم اعترض عليها ابدا ..بس اعترضت على نسيان بلدك ووطنك في المقابل ..ودة رايي الشخصي ..ولا احاسب عليه

مين نسي بلده يا زناتي ... امال إحنا هنا بنعمل أيه

فلتنسني يميني إذا نسيتك يا مصر (أيه الكلام الكبير ده)

زي ما قلت لك يا زناني لما كنا في العربيه مع هشام و إنت بتفرفر من مزيكا رزع الحلل ... إحنا عيانين بمصر ... بس المشكله إني مش هأسمح للعيا ده إني يعيشني في تعاسه أنا و أولادي طول عمري ... هتقولي العيشه في مصر تعاسه .. هأقول لك نعم ... عين التعاسه .... و مش مشكلة فلوس خالص ... لو كسبت اللوتري بكره و بقى معايا ملايين مش هأرجع مصر برضه

هأعيشها من بعيد زي ما انا عامل كده ... ساعتين بالليل ع المنتديات و مواقع الإنترنت و التليفزيون و الأفلام و دمتم

أنا عايش في مصر أكتر من اللي عايشين فيها ... بس عيشه على رواقه من غير ما أضطر أعيش الهم اللي هناك

وشوش الناس يا اخي في الشوارع تحس فيها بالشقي والكد وصعوبة الحفاظ على العمل

إنت كنت ماشي فين في كندا يا زناتي

ما دي مشكلتكم تسكنوا في الداون تاون و تشتكوا ... يا عم الداون تاون ده مأوى ال ....... بلاش أتكلم عشان محدش يزعل

يا زناتي يا حبيبي الناس المزبطين بيسكنوا في الضواحي بعيد .... روح هناك هتلاقي وشوش الناس مورده و جميله

تعالى عندنا ميلتون يا عم و ألا إركب معايا القطر الصبح .. هتلاقي الناس أخر شياكه و ألاجه و مشرئبة الاعناق شلولخ

عايز تعرف الفرق بين الداون تاون و الضواحي ... شوف الفرق بين ركاب الصب واي و الجو تراين

الأولانين مشردين و شباب بناطيلهم واقعه و شعرهم طويل و حلقان في الودان ... كل المناظر المقرفه ....

التانيين الناس البروفيشنالز .... اللي بعدوا بمزاجهم عن اللبش عشان يعيشوا على نضافه

المره الجايه إسكن في الضواحي .... بس مش في سكاربرو أو برامبتون

اللي اعلى من مقبول جيد يا ريس ..يعني بتاع 70 % نجاح ..بالله عليك ..دي نسبة عادلة في وسط اللي هاجروا كندا في سننا برده

انا شايف انها مور ذان فاير كمان يا لورد

يا زيزو بأقولك 80 % من شركتنا مهاجرين ... هتخليني أنزل لك صور حفلة الكريسماس ... دول واخدين إمتياز يا ريس تقولي مقبول و على فكره فيهم ناس جايين كندا فوق الأربعين ... بس عندهم مهارات سوق العمل محتاجها و لغه مضبوطه

مش تقولي مدير إداره ... مدير إداره دي تنفعه هناك ... مش هنا

أنا لو املك مقومات الحياة الكريمة في مصر ...( وقلت انها تختلف من واحد لواحد ) اكيد هاعيش في مصر

برضه الفلوس ... يا زناتي الفلوس مش كل حاجه ... مش كلام و الله ... انا حقيقي لو هبطت على ثروه مش راجع مصر تاني و لو كان هدفي الفلوس مكنتش تركت قطر

الفلوس هتعمل لك أيه لو ضابط شرطه إعتقلك بقانون الطوارئ ... هتشتري حريتك بالفلوس ... بئس العيشه يا اخي

الفلوس هتعمل لك أيه و إنت بتشم سحابه سودا أو بتاكل أغذيه مسرطنه ... هتتعالج بيها و ألا هتجيب لك عربيه مريحه عشان تستحمل خنقة المرور

لكن اللي انا شايف من الكلام هنا ..ان كندا بنتكلم عنها ..وكانها هيا افضل بلد في العالم

متصدقش كلامي و لا كلامهم ... شوف تقرير التنميه البشريه بيقول أيه .... تنميه بشريه يعني كل ما يساهم في رقي و سعادة البشر

تعليم ..صحه .. بيئه .. إلخ  

قوللي بقي ..ايه هناك كان حلو ..وانا ( على رايك ) وحشته بعدم حيادية

دي حاجات تحسها بعد ما تعيشها يا زناتي ما تتحكيش

وممكن متحسهاش

أذواق و دماغات

مفيش صح مطلق و غلط مطلق

كل واحد ينام ع البلد اللي يريحه

[د هشام ابراهيم]

أنا شفت الكلام ده فين قبل كده ....فين يا واد يا دكتور يا هشام فين ...مصر و لا كندا ...كندا و لا مصر mfb:

Z كل كلامك ممكن أتفهمه ...مش مقتنع بيه بس متفهمه ما عدا حكاية إن لو فيه فلوس يبقى نقعد في مصر .....خالص يا Z ....لا فلوس و لا كارير و لا مناصب و لا معارف و كوسة تضمن عيشة كريمة أو آمنة في المحروسة ......حتقولي يعني التمانين مليون عايشين ازاي حاقولك ببركة ربنا ..... انما كل واحد فيهم معرض لكارثة في أي وقت بسبب و من غير سبب ...... مرور اهمال طبي فساد كوارث و بلاوي متلتلة و الكلام ده فرصته أعلي من بلاد تانية كتير (يمكن مش الصومال ) .......و نسبته بتزيد كل يوم طول ما عصر الاضمحلال اللي احنا فيه ده مكمل

كندا ؟ لا هي جنة و لا هي ما فيهاش مشاكل و لا هي تنفع لكل الناس .....فيه ناس لا كندا تنفع لهم و لا هما ينفعوا لكندا ....و قلت الكلام ده ميت مرة قبل كده ...نفسي أعرف مين اللي مصور كندا في صورة وردي و لا بمبا مسخسخ علي عينه .......مين اللي كل شوية يطلع حد يقول أصل أنتم مصورين كندا مش عارف إيه ؟ علي العموم الفرصة حتجيلك قريب شكل الاشراف نازل قصقصة في المواضيع و مش بعيد موضوعي يبقى خماشر صفحة بعد التعديل أبقي اقراه و قولي :)

[goodfaith]

يلا اكتئاب باكتئاب بقى

المدير اللي رضي انه يرص معسل على الشيشة هو رضي لنفسه كده وللعلم مش عشان سنه كبير مش لاقي شغل بالعكس هنا بتلاقي ناس كبيرة في السن وبتغير الكارير بتاعها عشان سنها مبقاش يساعد انها تفضل في شغلها الاولاني بس على راي اخونا صعيدي الانسان ده كانت الدراسة في حياته مرحلة وانتهت

بالنسبة لكندا انا باعتبرها استثمار في الاولاد يعني تخيل اولادك بعد 20 سنة في كندا ومصر والسعودية وهنفترض وظيفة تخيلية في اي مكان في العالم - طبعا مكان محترم ووظيفة محترمة - ولو ابنك قدم على الوظيفة دي وهو مصري كندي ومتعلم في كندا او مصري من مواليد السعودية وعايش فيها عمره كله او متعلم في مصر ومتخرج من جامعاتها

مش معنى اننا في كندا واننا بنطمح لمستقبل احسن لاولادنا يبقى احنا بنكره مصر او مصر وحشة ومش عشان بنحب مصر يبقى مش هنشوف الشقى والكد اللي على وشوش الناس هناك ويا ريت فيه عائد يساوي تعب الناس هناك هنا على الاقل اللي بيفقد وظيفته فيه تأمين بيغطيه كام شهر لحد ما يرجع تاني يشتغل لكن في مصر اللي بيترفد من شغله ملوش ديه وطبعا مش هاتكلم على الخصخصة والمعاش المبكر عشان بس جبتوا سيرة السن في الموضوع لان في مصر الموظف فوق الاربعين غير مرغوب فيه

وانا اتفق مع باشمهندس ايهاب في اغلب رده بخصوص المادة والحياة براحة يعني مش الفلوس اللي هتخليك سعيد في اي مكان لكن الحياة الكريمة واحترام آدميتك ده اللي يخليك تحس براحة وامان انا محستش بيهم الا في كندا

من فترة كان فيه موضوع في المنتدى عن تكاليف الزواج كتبت رد طويل وبعدين قررت اني مبعتوش لاني مكنتش عايزة ادخل في جدال بس كان مختصر ردي ان الطلبات المادية للعروسة واهلها عشان مفيش امان ولا ضمان لاي شيء فهيا يا عيني بتضمن حياة كريمة بشقة في مكان كويس و قايمة تضمن حقها وشبكة وعريس جاهز لان في مصر الحب وحده لا يكفي لبدء حياة كريمة فقط وفقط بالاساسيات

أنا سعيد إن كتير من المهاجرين بيسيبوا كندا بعد الجنسيه و ده لأنهم مش هيعيشوا على الإعانات الحكوميه اللي مموله من ضرايبنا

انا الحاجة اللي بجد فاقعة مرارتي من حكاية الضرايب دي مش الاعانات المقدمة للمهاجرين بس الاعانات المقدمة للناس المدمنين واللي اختاروا بارادتهم يكونوا هومليس والعمليات الجراحية اللي بتتعمل بالوف الالوف لناس مدمنة كحول عشان نقل كبد او عمليات في الرئة بسبب التدخين في حين ان اساسيات الاسنان والعيون مش متغطية بالتامين الصحي

انا مرة قلت لواحدة زوجها مدخن المفروض التغطية الصحية للشخص المدخن او اللي بيشرب كحول تكون تغطية جزئية تشمل تحديد الحالة مثلا والاقامة في المستشفى لكن لو احتاج اي عملية بسبب التدخين او الكحول هو يتحمل تمنها .. الست زعلت مني

معلش يمكن افكاري ملخبطة شوية بس اتمنى تكون وصلت

[ehabtaher]

ناس كتير بتشوف ان الهجره قله قيمه ( زى مدير الاداره صاحبك اللى اشتغل فى تيم هورتونز)

لكن

واحد تانى كان استاذ فى الجامعه وراح اشتغل نايب فى مستشفى

بالنسبه له نايب فى مستشفى احسن من استاذ فى الجامعه للاعتبارات الاخرى اللى دفعتنا اساسا للهجره واللى كلنا عارفينها ومش عايزين نكررها

الموضوع مش وردى

والا مكناش نعيش القلق ده كل يوم ونقعد كل يوم نسال ونقرأ وندخل المنتدى

وندور على دراسه هنا بس تنفع هناك

او نعمل معادله او نفكر فى مشروع

لان احنا عارفين انها مش ورديه

لكن اللى عنده النيه ينجح اكيد حينجح

مذاكره

اه لازم يذاكر ويفتح الكتب تانى

دراسه

اه لازم يدرس ويبقى تلميذ من تانى

لكن تعمل ايه

اللى رماك على مش عارف ايه اللى مش عارف ايه اللى اكتر منه

مكانش واحد رايح بطوله كمال اجسام فى ايطاليا يهرب من البعثه ويشتغل شيال فى مصنع ويبقى هربان من بتوع الهجره

ليه

شايف ان شيال فى ايطاليه ب 70 يورو فى اليوم

احسن ما يشيل حديد فى مصر ببلاش وفى النهايه مش حيعمل قرش او يأمن مستقبل بس فى النهايه حيقولو عليه البطل العالمى

كلنا بنهاجر علشان شايفين ظلام وسواد قدام على بعيد كده فى مصر

متقوليش يا زيزو ان مصر حا ترجع

ايوه طبعا حاترجع احسن من الاول

بس لما نمشى منها

علشان احنا اللى ناحسينها

[ناوية ع الهجرة]

واللى قدر يستقر هناك كان بها كندا بلد جميله ومافيهاش عيب غير البرد فى الشتاء وووو

بسيطه زيها زى الخليج

مافيهوش عيب غير الحر فى الصيف ووووو

mfb: :)

معلهش انا مش قادرة ما اردش على الجملة دي

يعني هو مشكلة حضرتك الحر اللي في الخليج ..........بس؟؟؟؟

الاخ الفاضل زناتي

الموضوع مالوش علاقة بالفلوس لاني ممكن اقعد كام سنه في الخليج في تقشف واعملي قرشين حلوين وارجع بعدها اعيش في مصر

واحب اشكر الاخت الفاضلة goodfaith

لان فعلا أرائها بتعجبني واحنا عايزين نهاجر كندا علشان عايزين اولادنا ياكلوا اكل نظيف بعيد عن الكيماويات ويعيشوا في جو صحي

ويتعلموا تعليم صح ونشعر بأدميتنا

[ehabtaher]

واللى قدر يستقر هناك كان بها كندا بلد جميله ومافيهاش عيب غير البرد فى الشتاء وووو

بسيطه زيها زى الخليج

مافيهوش عيب غير الحر فى الصيف ووووو

mfb: :)

معلهش انا مش قادرة ما اردش على الجملة دي

يعني هو مشكلة حضرتك الحر اللي في الخليج ..........بس؟؟؟؟

الاخ الفاضل زناتي

الموضوع مالوش علاقة بالفلوس لاني ممكن اقعد كام سنه في الخليج في تقشف واعملي قرشين حلوين وارجع بعدها اعيش في مصر

واحب اشكر الاخت الفاضلة goodfaith

لان فعلا أرائها بتعجبني واحنا عايزين نهاجر كندا علشان عايزين اولادنا ياكلوا اكل نظيف بعيد عن الكيماويات ويعيشوا في جو صحي

ويتعلموا تعليم صح ونشعر بأدميتنا

طيب وال ووووووووووووووو

مرديتيش عليها ليه

يا اختى المعنى فى بطن الشاعر

احنا هنا مش علشان نقول عيوب الخليج وعيوب كندا

والزناتى عارف عيوب الخليج بس علشان قلقان من موضوع الشغل هناك فهو مش عارف مزايا كندا (بيتهيالى كده متسلطش عليا العمال بتوعك بقى لحسن انا جبت بودى جارد)

ربنا لما خلق سيدنا ادم

قال انى جاعل فى الارض خليفه

كله سواء يعنى هنا هناك فى الخليج فى القطب

المهم الانسان اللى هنا او هناك يخلف بضم اللام ربنا صح

برضه بقولها يعنى لو نسيت مصر وافتكرت مثلا كندا وعشت فيها كويس واولادى عاشو كويس ومنسيوش هويتهم الدينيه قبل المصريه

خلاص يبقى ده هو المطلوب

لان فى النهايه الواحد حيموت ويقابل رب كريم يسأله انت ايه دينك ايه

مش حيسأله انت مصرى والا باكستانى

ومش حيسأله عملت ايه لمصر

لكن حيسأله عملت ايه فى خلافتك لي فى الارض (الارض) وليست مصر او الهند او كندا

انا عايز جنسيتى تبقى ارضى وليست مصرى او كندى

وشايف ان الباسبور الكندى بيسمح بكده لكن المصرى لا

[أحمد سيف]

متقوليش يا زيزو ان مصر حا ترجع

ايوه طبعا حاترجع احسن من الاول

بس لما نمشى منها

علشان احنا اللى ناحسينها

عجبتني أوي الحته دي يا دكتور ايهاب ... عندك حقّ الظاهر احنا اللي ناحسينها ومرجعينها لوره ... وعلى رأي عادل إمام البلد دي مش عايزه مهندسين .... البلد دي عايزه صيّع.

[arabi]

أنا شايف الدكتور الشامي

عميد المهاجرين

وبنتظر بشغف رأيه -لو لم يكن هذا تطفلا منى -

أخى الفاضل حسام...

اخوانى.....أخواتى

لو بقى هذا المنتدى أبد الدهر لبقى الاختلاف حول جدوى الهجرة أبد الدهر أيضا..

............................................................. "

الشامى

الله يرضى عليك يا كبير

عظمة على عظمة على عظمة على عظمة على عظمة

أوجزت فأوعظت

[arabi]

تعلالي من خلال النافذة يا بوب يا ملك الحركات :)

بس الاول انا عاوزك موش بس تقرا الكلام ..لا عايزك تحس بيه فعلا وكانك سامعني وتحس باللي انا حسيت بيه

ارد على نقطة نقطة....................

mfb:

ألله عليك يا زناتي

تحية مخلصة مني ..... فنعم الرجل أنت

و الله إني أحبك في الله و أتمنى لك النجاح من كل قلبي..... حواراتك راقية و يملأها الود

ربنا يوفقك

[المعلم عتريس]

المسألة عرض وطلب

انت شايف نفسك ناجح في كندا هتقعد وتستقر

الامور مش عاجباك تاخد بعضك وتمشي

ودي تختلف من شخص الى شخص

عندك مثلا الصينيين بييجو ياخدو الباسبور ويمشو

(كتير منهم)

ليه

لانه عنده فرص في بلده افضل بكثير من كندا

لكن ما تقوليش واحد جاي من بلد منكوبة يسيب كندا

http://www.thestar.com/article/238305

[طارق الشاطر]

اخي ايهاب سالم

السلام عليك ورحمة الله وبركاته

لا اريد ان اطيل عليك اخي الكريم عملت لاندنج في ابريل 2008 فانكوفر لدي ظروف خاصة تمنعني من الذهاب الى كندا الى بعد خمسة سنوات اي قبل نهاية كرت الاقامة هل لهذا تاثير على تجديد كرت الاقامة لخمسة سنوات اخر ى او يمنعني من الدخول الى كندا اتمنى ان اجد اجابة جزاءك الله خير

[المعلم عتريس]

اخي ايهاب سالم

السلام عليك ورحمة الله وبركاته

لا اريد ان اطيل عليك اخي الكريم عملت لاندنج في ابريل 2008 فانكوفر لدي ظروف خاصة تمنعني من الذهاب الى كندا الى بعد خمسة سنوات اي قبل نهاية كرت الاقامة هل لهذا تاثير على تجديد كرت الاقامة لخمسة سنوات اخر ى او يمنعني من الدخول الى كندا اتمنى ان اجد اجابة جزاءك الله خير

واضح ان حضرتك مش متابع القوانين

لو كنت عملت لاندنج ورجعت على طول في ابريل ٢٠٠٨

يبقى ضروري تدخل كندا قبل ابريل ٢٠١١

مسموحلك تقعد بره كندا ٣ سنين بس مش ٥

لو ما رجعتش قبل ٣ سنين الاقامة بتروح عليك

[Bustami]

يعني واحد عمل لاندينج في 1/1/2010 ومقيم في كندا على طول

لازم يقعد في كندا 3 سنوات ثم يقدم على الجنسية

اذن لو واحد قعد سنه 2010 وسنة 2012 وسنة 2014 لا يستطيع ان يقدم على الجنسية لانه ال 3 سنوات دول غير واقعين في ال 4 سنوات قبل التقديم الي هما 2011- 2012 - 2013 - 2014

اذن عليه التواجد في كندا لسنتين متواصلتين من الاربع سنوات

تم تعديل 18 فبراير 2010 بواسطة albostamy