ايه اسعد لحظات حياتك

[zamalkawy]

اكيد كل واحد منا فيه لحظات سعادة في حياته لحظات مش حاسة و ممكن يشاركنا بيها

لحظات نجاحات مواقف و معظم اعضاء المنتدى من اصحاب الخبرات و اصحاب العقول المتفتحة و اكيد اللحظات التي هيتم مشاركتها هتفيد ناس كتير في مقتبل العمر زيي و زي ناس كتير لانها لحظات ناتجة عن خبارت طويلة

[فــيــروز]

يوووووه ماتعدش

حياتى كلها لحظات من النوع ده :-) وش مياس جدا :-)

لا فى الحقيقه الحمد لله الواحد مايقدرش ينكر ان ربنا انعم عليه بلحظات سعاده كتيره لا تنكر

ساعة ما نجحت فى الثانويه العامه مثلا .. ياااااه كانت لحظه فظيعه .. عشان كان نجاح كبير فى ظروف اسريه صعبه شويه و حسيت انه هيفرح ماما جدا بعد هذه الظروف :-)

اما اخدت البكالوريوس بردو حسيت بسعاده كبيره بردو بس مش زى يوم نجاحى فى ثانوى رغم ان الدراسه اصعب :-) بس حسيت باحساس لذيذ بالتحرر :-) وده كان وهم طبعا :-(

امتى تانى يا سيدى .. طبعا اما الواحد يلتحق بشغل من غير واسطه او كوسه بيحس بردو بفخر كده :-) وكمان كل الشغلات اللى اشتغلتها ربنا بعتهالى زى ما بيقولوا فى الدقيقه 45 من الشوط التانى .. يعنى يكونوا مغلسين عليا فى الشغل و فجاه ربنا يفرجها بشغل احسن و امشى وسط ذهووووووووول الجماهير الغفيره :-)

من اسعد لحظات حياتى انى اقعد على النيل اشرب شاى واتفرج على شمس الاصيل :-) ده بجد والله مش هزار يعنى

وكمان اما اتصل بحد من اصحابى فى التليفون على غير توقع و احس انها كانت مفاجاه حلوه :-)

كفايه عليكو كده مش عاوزين نعقدكم :-)

[White heart]

فــيــروز كتبت:

لا فى الحقيقه الحمد لله الواحد مايقدرش ينكر ان ربنا انعم عليه بلحظات سعاده كتيره لا تنكر

فعلا ... صدقت...

الحمدلله على كل شئ.....

أنا أسعد و أول شئ حصللى منذ أن هاجرت ... هو أن الله قد وفقنى فى العثور على شريكة حياتي.

على فكرة الموضوع دة بيفكرني بموضوع العزيزة "nora" ....

ممكن تقولنا اية الي فرحك ، فرحنا معاك!!!!!

[بنت شعنونة]

يوم تخرجي كان يوم اسطوووووووري

وم خطوبة اخويا الصغير برضه كان يوم تحححححفة

يوم افتتاح مكتب اخويا يوم هايل

يم ما اخدت ترخيص مزاولة مهنة الطب ودا كان يوم السبت والحمدلله كان يوم فعلا ربنا مسهل فيه كللللل حاجا

يوم ما اعمل حاجا كويسة لآي حد غيري

يوم السبت الجاي

ولو ربنا راضي عني وكاتبلي خير احتمال يبقى بكرا برضه يوم سعيييييد

قولوا يارب " غمزة"

[فــيــروز]

فيه لحظه مهمه جدا جدا جدا نسيت اقولها

يوم ما سلمنا مشروع التخرج فى الكليه

الشهر الاخير من الدراسه كان كله مخصص للمشروع و كان الباحث المشرف علينا حاطط نقره من نقرى و مصعب عليا المسائل جدا

كل ما اساله عن حاجه يقول لى اقرى ال manual لدرجة انى بقيت اقول الكلمه دى زى البغبغان من الغيظ ورغم انى كنت باساله فى اللى قريته فعلا

وكل ما نروح نتغدى من الضيق و الغيظ و القلق ماقدرش آكل و لو كلت ارجع اللى آكله .. انا باقول كل المقدمه دى عشان بس ابين هى ليه كانت لحظه مهمه

الاسبوع الاخير كان معظمه شغل فى ال documentation وكالعاده ده اصعب و اغلس جزء ووصلنا الليله الاخيره و احنا لسه ماخلصناش فقررنا نجتمع فى بيت خالتى لان ماكانش عندى كمبيوتر و باشتغل عندها على الجهاز و كان معايا زميله و زميل فى المشروع

فضلنا نشتغل اليوم ده من اول النهار لحد ما الليل دخل .. وبردو لسه ماخلصناش .. وقررنا اننا مش هننام لحد ما يخلص الشغل .. حتى اسرة خالتى كلها كانت شغاله معانا :-) دخلت صديقتى البلكونه فى بيت خالتى فى استراحه قصيره بعد منتصف الليل ودخلت وراها لقيتها بتعيط !! قلت لها فيه ايه !! قالت لى انها مفتقده اسرتها جدا لانها كانت عايشه فى المدينه الجامعيه و احساسها بالغربه زاد اوى فى الليله دى

المهم طبعا انا ماتوصاش بقى فى التشجيع و شحذ الهمم :-) ورفعت معنوياتها تمام و دخلنا ننام الساعه 6 صباحا بينما زميلنا مرمى زى الجثه بره مع زوج خالتى من التعب :-) كانت قلتها احسن النومه دى لان الاستيقاظ كان بعد ساعه :-(

ماكانش فاضل غير تصوير نسخ المشروع .. مش قادره اقول لكم بقى كان المشروع مكتوب بطريقه اد ايييييييه جميله و وتجنن .. واحنا عند بتاع التصوير التصوير فى بين السرايات الساعه 8 صباحا كان لازم انا بقى اللى اعيط :-) انا عيطت عياط ساعتها وانا باشوف المشروع خلصان خلاص وبيتطبع :-( حتى الناس اتخضوا ساعتها و صديقتى بقت هى اللى بتواسينى و تطبطب عليا

بس ساعتها كنت حاسه ان خمس سنين من العمر متوقفين على شوية الورق دول .. كانت لحظه فعلا لا تنسى

ووصلنا الكليه :-) ده كان يوم التسليم و اليوم التالى يوم المناقشه .. ساعتها كان فيه باحث تانى بيشرف على مشاريع اخرى بس كان متعاطف معانا وهو اللى استلم منا المشروع :-) و مش هانسى انه طلبنا يومها شاى بالنعناع كان طعمه بالنسبه لى اروع ما يكون :-) معلش طولت عليكم اوى اوى اوى ..

[moody00x]

بالنسبة لى يوم نتيجة الثانوية العامة ودخولى الهندسة..ويوم التخرج ...ويوم تعارفى على شريكة حياتى....ويوم زواجى...ويوم ميلاد ابنى أحمد

[se_ Elsyed]

كل لحظة تمر بالإنسان وهو يتمتع بالصحة والستر تعتبر لحظات سعيده ... ( كنت لازم أقول البؤين دول في الأول )

- بالنسبة لـ س س فأسعد لحظات حياته هو يوم ما نجح في الثانوية العامية ، ومع إني كنت متفوق - شوية نرجسية - لكن من الرعب المحيط بيك بيبقى الواحد مرعوب وكلوا عمال يقولك إوعى القطر إوعى القطر حتى لو مافيش قطر ...

هاحكلكوا على موقف ظريف قوي .. إمتحان الفرنساوي بتاع الثانوي كان خزعبلي وصعب جداً فالمهم بعد الامتحان روحت أشوف نفسي انا وأصحابي ورجعت البيت متاخر لقيت ماما واخواتي عاملين مناحة وعمالين يعيطوا وانا داخل منشكح ومش في دماغي فقولتيلها أيه يا ستي في أيه قالتلي إنها شافت كذا برنامج في التليفزيون وجايبيبن عيال مغمى عليهم وناس إنتحرت وحركات وكل ده علشان الإمتحان كان صعب فخوفت عليك .... هو الامتحان كان صعب ؟ قولتلها والله مش فاكر بس شكله كان صعب وروحت معيط انا كمان - كله بالأيحاء - طبعاً اعقب ذلك شوية طبطبه وكلام تصبير زي يا كبد امك ياخويا وربنا يقويك وانت املنا في كأس العالم وحاجات من دي ..

المهم تطلع النتيجة والاقي نفسي جايب 36 /40 ... بيني وبينكم صعبوا عليه شوية الدموع اللي أنا سحتهم وأفتكرت في هذه اللحظة مسلسل " دموع في عيون وقحه "

- تيجي بقى بعد كده لحظات زي الزواج واول طفل ربنا يرزقنا بيه وأول عربية إشتريتها - الله يرحمك يا زوبة في الذكرى الربع سنوية بتاعتك - ،

أما اللحظة اللي هاتطغي على ده كله يوم مايجيلي خبر اللي بالي بالكم ساعتها بقى هاعمل اللي ماتعملش وهاتبقى ليلة ...

[Sysanalyst]

أسعد لحظات حياتى وأنا أحصل على تأشيرة عمرة.

وكان جاء على بوما وقيل لى فاضل يوم واحد و معندكش غيره وساعتها ماكانش عندى ولا باسبور ولا كارنيه نقابة ولا اثبات مهنة فى البطاقة وبكيت يومها بمرارة لأن فرصة زى دى ما تتعوضش, وقال لى واحد ساعتها قال إذا كنت عايز تقابل ربك فعلا إنوى ولا يهمك الناس, ففعلت ذلك ويومها رأيت معجزات لم أرها فى حياتى فويمها غيرت بيانات البطاقة وعملت ورق النقابة اللى أخدته بعد كده وعملت البسبور وسلمته للرجل ليعمل التأشيره كل ده فى يوم واحد !!!! وأنا أكاد لا أصدق وأحسست أننى أحلم وفقت من الغيبوبة لأجد التأشيرة فى يدى !

[Mohd Hafez]

أسعد ثلاث لحظات في حياتي على الإطلاق.

1- لحظة خلع ضرس العقل الأول في مايو 1984

2- لحظة خلع ضرس العقل الثاني في أغسطس 1992

3- لحظة خلع ضرس العقل الثالث في يناير 1997

[Salwa]

لحظات كتيرررررررررررررر.

فى عام 79 ......نزولى مصر بعد 4 سنين وشوية غربة .....قلبى كان حاينط ويجرى لوحده خارج جسدى حتى يسبقنى .

ايام ميلاد اولادى .

ايضا اول مرة اروح ..عمرة ....وكيف انتهت الاوراق بالنسبة لى ايضا فى وقت قياسى.3 أيام.

ذهابى للحج ...وفى عام ذهابى لم يكن من المتوقع ابدا ان أذهب .

وكنت فى المطبخ اطبخ واعمل الغداء ..وكنت استمع للقرآن الكريم ..وكان باقى عشرة ايام على يوم عرفة ..

ووجدت نفسى ابكى وابكى واتعلق بزوجى واقول له اريد ان احج هذا العام حتى لو بعدها اموت .

فى نفس اليوم اخذنا التذاكر وتانى يوم اخذنا التأشيرة ..وشهادة التطعيم وثالث يوم كنا فى جدة .

يوم زواج ابنتى ......كانت ومازالت اجمل وارق ملاك على الارض.

يوم قيام زوجى من ...وعكة صحية ..المت به ...ده بقى كان اسعد يوم فى عمرى كله ..كنت لا اريد حتى ان اتخيل حياتى بدونه ...وكنت بعدها اشعر انى فعلا وولدت من جديد ...واصبحت لا افارقه اغلب الاوقات ..

ايه كمان ؟؟؟

يوم دخولى الجامعة .....

ويوم تركت الجامعة ........لأنى سوف اذهب لزوجى !!!!!!!...صح؟؟

يوم لما اولادى الاثنين الكبار خلصوا الجامعة ....

يوم لما اولادى كانوا ياخدوا بطولات على مستوى المقاطعة او مستوى المملكة.

يوم نزولى مصر .....

يوم زواجى .....طبعا ....وخصوصا انى سعدنى الحظ وزوجى كأنه مخصوص .....// كان تصميم خاص //...لأجلى ..

وكفاية كدة ...

سلامى.

[zamalkawy]

أسعد ثلاث لحظات في حياتي على الإطلاق.

1- لحظة خلع ضرس العقل الأول في مايو 1984

2- لحظة خلع ضرس العقل الثاني في أغسطس 1992

3- لحظة خلع ضرس العقل الثالث في يناير 1997

ناقصلك ضرس عقل كمان هما اربع ضروس :)

الحمد لله اعتقد ان في لحظات كتيرة في حياتي بس هقولك على اخر اللحظات و لو اني رجع متعكنن من الشغل لسة واخد زونبة ترد الروح بس بجد انا مبخت كل ما حد يجي يزنبقني في الشغل يلبس هو العملية في الأخر الحمد لله

احلى حاجة في الدنيا لما تتعب في حاجة و تلقي تعبك مرحش هدر يعني من المواقف المؤثرة و اللي بجد بحس معها بسعادة غير طبيعي لما بدخل اي موقع مكنتش دخلت قبل كدة و معرفش حد هناك و الاقي اي حاجة انا عملتها و تعبت فيها موجودة في الموقع ده بجد حاجة كدة تخلي الأنسان طاير من الفرحة يعني انا من الحاجات اللي بقدمها في مواقع ملفات الفيديو ( اهداف الزمالك المنتخب الأهداف اللي بتخش في الأهلي ( وش واحد زمالكوي ) فيديو كليب اجوان ملف مصر في تنظيم كاس العالم .... الخ الخ الخ )

ملف مصر في تنظيم كاس العالم فرحات لما لقيته في مواقع كتير جدا جدا و كمان كان في ملف عمله عبارة عن صورة متحركة هدف انبي في الأهلي الصورة دي منتشرة بشكل غير طبيعي بالرغم من قله جودتها لانها كانت اول مرة احول من فيديو لانمشمن جف :)

من الواضح اني هتبهدل من الأهلوية :)

من المواقف التانية اللي بكون مبسوط فيها و انا بلاعب بنت اختي الصغيرة اول مرة ابقى خال رسمي يعني حد من اخواتي يجيلو ابن

و خاجات كتيرة كفاية كدة بقى

[nora]

الصراحة اللحظات السعيده في حياتي الحمد لله ليست قليله بس اهو ممكن اذكر منها الآتي :

1- لما رحت العمرة واد اية انا سعدت بها جدا لاني في هذة الفترة كنت بمر بحالة نفسية سيأة ووجدت عمي يتصل بي وبيقولي تحبي تيجي معايا نعمل عمرة يمها مصدقتش نفسي وجالي حاله من السكينه العجيبة وفرح شعور لا يوصف وقلت له اه والغريبة ان كان معايا البسبور على الرغم اني مش متعوده اني اشيل البسبور معايا وكانت الصور متوفرة وقالي انا جي دلوقتي هاخدهم منك وكنت في الشغل الجديد وفعلا مر واخدهم مني وكل ده وانا مأخدتش راي بابا ولا حتى جوزي واتصلت بيهم وبلغتهم وكلهم قالوا ليه على بركة الله

2- يوم مناقشت مشروع التخرج وكان يوم صعب جدا من توتر الاعصاب و عمل الكتاب وتجهيز المشروع على سي دي والمناقشة و كان جت مناقشت المشروع بتاعي بعد خطوبتي مباشرة بأيام معدوده ولما ناقشت المشروع وعرفت النتيجة

3- يوم خطوبتي وزواجي كانوا بالنسبة لي حلم لانني اعتبر زوجي افضل شيء اخترته في حياتي وبمحض ارادتي على الرغم من المفارقات العجيبة التي حصلت في هذا اليوم فقد تقدم لي 3 في نفس اليوم عندما علموا بخطوبتي وكان ليله التي تسبق الخطوبة المنزل فين عريس غير زوجي والدنيا كانت مقلوبة علشان ارفض العريسي واخد العريس ده بس بابا وماما كانوا معايا والحمد لله نفذت اختياري

4- يوم تعيني في وظيفتي الحالية والتي عانيت الامرين لكي اعين فيها من صعوبات المقابلات وقبلوني بعد 12 مقابلة و بعد مرور 8 شهور من اول مقالة

5- يوم لما بلتقي بزوجي بعد كل سفر وعوده الي مصر و لما بلتقي بأخي داركر من بعد طول غياب بيكونوا اسعد لحظات في حياتي

6- يوم ما زوجي مضى عقد الشقة بتاعتنا لان عرفت ان الطريق قصر شوية ليلتم الشملنا بعد خطوبة دامت 4 سنوات

7- يوم زواج اختي و انجابها يوسف و بقيت خاله

بس وجعت دماغكم

[se_ Elsyed]

3- يوم خطوبتي وزواجي كانوا بالنسبة لي حلم

نورا انا صاحيلك ... خليكي دقيقة إسمها يوم خطوبتي وكتب كتابي لأن الزواج يختلف عن كتب الكتاب

( وش واقف لنورا على الواحده )

[nora]

3- يوم خطوبتي وزواجي كانوا بالنسبة لي حلم

نورا انا صاحيلك ... خليكي دقيقة إسمها يوم خطوبتي وكتب كتابي لأن الزواج يختلف عن كتب الكتاب

( وش واقف لنورا على الواحده )

ده مش واقفلي ده زي ميكون مستني بس تعرف اني قلت حاجة كده وتكسر مقديفي طب خليني احلم يا شيخخخخخخخخخخخخخخ

[disappointed]

ايه اسعد لحظات حياتك

الأسعد على الاطلاق: يوم ولادة ابنتى