مواقف في غير مواقف..

[دكتور عادل الليثي]

زمان كنا ساكنين في طنطا

وكان الأستاذ عبد العزيز- طويل و اسمراني ...وبنضارة كعب كباية ....وشعر أبيض منكوش - ساكن في الدور الأرضي

وصاحب البيت ساكن في الدور الأول....... وهو في نفس الوقت صاحب القهوة التي في آخر الشارع

وكان صاحب البيت عامل سقاطة لباب البيت ..... بحيث يمكن فتح الباب من فوق

وفي ليلة من ذات الليالي .................

وصل الأستاذ عبد العزيز لشقته

وبدأ ينزع ملابسه واحدة .... واحدة .......

وأثناء هذه العملية بدأ ابن صاحب البيت في طرق الباب حتى تفتح له أمه بالسقاطة المنوه عنها أعلاه

وكلما كان الأستاذ عبد العزيز يخلع قطعة من ملابسه .............. تزداد طرقات الباب دون أي رد فعل من قبل الست الوالدة .......... إظاهر كانت نايمة

وعندما خلع الأستاذ عبد العزيز البنطلون ........ ولم يتبقى غير القميص ..........

قرر أن يقوم هو بفتح الباب ............ خدمة للطارق الذي هو بالتأكيد من عائلة صاحب البيت

وعندما وصل الأستاذ عبد العزيز إلى منتصف بير السلم المظلم .......... جذبت الأم السقاطة فانفتح الباب

ودخل الولد ..... و إذ به يجد في الظلام شبحا طويلا.... أسود ...لابس أبيض في ابيض .... وعيناه تبرقان ......

وبسرعة البرق يستدير الولد ويطلق لساقيه العنان ..... ويصرخ في هيستيريا ..... عفريت يامه .... عفريت يامه

وبسرعة يفكر الأستاذ عبد العزيز .... في أن هذه المفاجأة ربما تكون القشة التي تقسم ظهر البعير في علاقته الغير مستقرة مع صاحب البيت .......... فبدأ يجري وراء الولد و يصيح ......... أنا عمك عبد العزيز ياواد ..... أنا عمك عبد العزيز ياواد

ولكن هذه المحاولات كانت تذهب هباء ....و كانت تزيد الولد فزعا وهرولة ...... إلى أن وصلا إلى القهوة

ويتنبه أخيرا الأستاذ عبد العزيز على قهقهات وصياح زبائن القهوة إلى أنه بدون بنطلون .........

[night prayer]

السلام عليكم و رحمة الله و بركاته..

أنا حصل معايا شوية مواقف مش عارفة هي طريفة و لا محرجة و لا مالها بالظبط!!

موقف نمرة 1:

زماااااان لما كنت في اعدادي هندسة.. كان في عندنا مادة اسمها تاريخ هندسي.. و انا ماكنتش باحضرها أصلاً.. و بعدين الدكتور عمل مقابلة للدفعة كلها في مكتبه.. و قعد يسأل العيال عن المخترعين و الحضارات و الكلام دة.. و بعدين جه دوري.. فسألني كام سؤال جاوبتهم على قدر ذاكرتي من ايام ابتدائي الاختراعات و المخترعين و كدة.. المهم ماعرفش جاوبت صح و لا لأ أديني بقول و خلاص :P و كمان اول مرة كنت أشوف فيهاالدكتور كانت في مكتبه.. مانا ماباحضرش بقى :P المهم الدكتور سألني جيمس وات عمل ايه؟ جاوبت

اديسون عمل ايه؟ جاوبت برضه

مين اللي اختر الرادار.. برضه جاوبت..

سألني.. طيب آلن ماركوس عمل ايه؟؟ ابتسمت و قلت له دة مات من زمان يا دكتور!! mc:

قالي طيب.. اتفضلي..

المهمزز روحت للعيال و سألتهم هو مين آلن ماركوس دة؟؟

كلهم بصولي كدة.. :rolleyes: :blink: mfb: mc:

وقالوا ان الراجل الطيب اللي كان عاملي انترفيو هو آلن ماركوس.! :P

موقف نمرة2:

مرة كنت محتاجة حاجة ضروري جداً من دكتور مادة من المواد.. وماكنتش فاكرة اسمه كويس.. مش عارفة ايه اللي خلاني أعتقد ان اسمه حسن أصلا!!

المهم دخلت مكتب دكتور اسمه حسن.. هو مكتوب كدة على الباب!!

و بعدين وقفت قدام الراجل مدة.. فاستغرب و سألني أي خدمة يا باشمهندسة؟؟

قمت بصيت له mc: و قلت : لأ لأ انتالدكتور حسن؟ و فكرت بصوت عالي و قلت.. لأ مش هو دة اللي كان في المحاضرة.. و مشيت.. الراجل طلع من مكتبه و قعد يقول.. انت يا بنت.. انت يا بنت!!اما الطلبة دول بيطلع منهم حاجات غريبة!!

و بس.. B)

سلامي

تم تعديل 15 مارس 2004 بواسطة night prayer

[afiona]

زماااااان لما كنت في اعدادي هندسة.. كان في عندنا مادة اسمها تاريخ هندسي.. و انا ماكنتش باحضرها أصلاً

حضرتك كنت فى المهندس خانة بالجيزة ولا فى معتقل المغول بعين شمس ولا فى صحراء حلوان....?

على أيامنا فى المهندس خانة كان فيه مادة إسمه إنسانيات و معرفش هى بتتكلم عن إيه بالضبط بس تقريبا عن إن كلنا نكون إيد واحدة و كلام على أعلى مستوى من الهجص الدى لا يمت للهندسة بصلة....

وعلى رأى زميل عزيز (أونون- بضم النون) الموضوع كله ضديات و حبيات فى الهندسة.....

[night prayer]

لا و الله حضرتك انا كنت في مقبرة العظماء.. جامعة قناة السويس.. !!:P

[afiona]

لا و الله حضرتك انا كنت في مقبرة العظماء.. جامعة قناة السويس.. !!:P

تحية كبيرة لشعب السويس ومدن القناة الباسلة(غصب عن عين الأهلوية) ولشباب الهندسة الصاعد...

أفيونة

نقيب المهندسين

[بنت شعنونة]

دخلنا انا واخويا مطعم من كام يوم

كان شكله غالي اوووووووووي

وفااااااااضضضضضضضضضضضضيييييييييييي

قلتله يالا ننفد بجلدنا؟

دا فاضي؟

شكله اكله وحش

قالي خلالالالالالاص بقى ما تحرجيناش

دخلنا وخلاص بقى

:blink:

المهم طلبنا الأوردر

انا طلبت اسكالوب وهوا طلب ستيك

المهم انا حبيت اعرف الأسكالوب فيه ايه

فطلبت الجرسون اساله

- لو سمحت..هوا الأسكالوب معاه ايه؟؟

قالي..

ششششففف شششفففف

:angry:

والله سمعتها كدا بالحرف اناواخويا!!

قلتله نعم؟؟

قالي

شششففف شششففف معاااااااااااااه!!! ;)

قلتله

انا فاهما انه معاه

انما ميييييييييييين ششففف شششففففف دي؟؟؟؟

قالي بوم فريييييييييييييييتتتتتتتتتت :blink:

ااااااااااااااااااااه

طيب!!

لو سمحت

في شربة طماطم؟

لا..بس فيه شوربة فراخ

- بالكريمة؟؟

راحل قالي وهوا بيقلب ايده في الهوا كدا

كوبليييييييي كوبلالالالالالالاه

:ph34r: " يادي النيلة عليا"

مين ؟

كوبلية كوبلاه!

يعني ايييييييييييييييييييه

بالكريييييييييييييييييييييييييمة

ااااااااااااااااااه :angry:

طييييييييييييب هات واحدا

شوية كدا الراجل رجعلنا وسال اخويا

حضرتك عاوز الستيك بالبوم فريت والا بالخضار السوتية؟

اخويا قعد يفكر بعمق

لا..خضار سوتية

الراجل مشي من هنا

واخويا راح سألني.........

هوا ايه البوم فريت دا؟؟؟؟؟؟؟؟؟؟ :blink:

mfb: mfb:

[METALLICA]

مرة ركبت ميني باص . . طلعت و دفعت و دخلت وقفت ، والحمد لله كان فاضي . . وكنا في رمضان السنة اللي فاتت أو اللي قبلها ، كان لسة تالت يوم رمضان . . شوية ولاقيت الناس بيناولو بعض باقي فلوس و تذكرة من عند السواق لغاية ما جتلي اومت مديها للي بعدي . .

- سألني : لمين ديه ؟

* استغربت اشمعنى أنا اللي سألو . . ماهو كلهم بيناولوها لبعض من غير سؤال . . رديت : معرفش والله أكيد فيه واحد دفع وليه الباقي ده والتذكرة

قام الراجل مديها للي واراه .. لغاية لما وصلت لآخر واحد . . استغرب و قام مرجعها للي أدامه و رجعتلي تااني . . قمت معلي صوتي على الآخر بما أني الوحيد اللي واقف وأكيد الكل هيسمعني :

يا جماعة مييين اللي دفع جنيه وليه 50 قرش و تذكرة ؟؟

محدش رد !! والناس قعدت تبص حواليها ولبعضها !!

أنا زهقت أمت رايح للسواق و مديهاله وقلت له : ما فيش حد ديه بتاعته . .

استغرب السواق و قعد يقوول يا جماعة مين اللي ركب من الميدان و اداني جنيه و ده الباقي و التذكرة . . .

وفجأة وسط همهمات الإستغراب والحيرة بين الناس . . لقيت نفسي بقول الميدان . . مين اللي ركب من الميدااان . . . .

الله . . . و بصوت عالي صحت . . . .

ده أنا . . . . .

ورحت خدت الباقي والتذكرة و انا مش قادر اقف من الضحك و الناس كلها بتضحك . . . . <_<

تم تعديل 21 نوفمبر 2004 بواسطة METALLICA

[ragab2]

حفظ الأرقام عندى مشكلة

ولذا أحاول حفظ الأرقام الكبيرة مثل التليفونات وأرقام السيارة بدلائل مثلا ثلاثة ثم ستة ضعفها ثم تسعة قدها مرة ونصف وهكذا

وفى مرة كنت فى حفلة وراكن السيارة معشقة أمام المكان وخلف أحد السيارات والتى ظل صاحبها ينادى على صاحب السيارة رقم كذا

وظللت أسأل معه مين صاحب هذه السيارة .. يااخوانا اللى ليه عربية بالرقم دة يروح يشوفها ويحركها

الى أن انتهت الحفل وخرجت وجدت الرجل يقف بجوار سيارته التى حجزتها له بسيارتى وهو فى غاية الضيق وبدأ فى لومى وتقريظى وكيف لم اسمع ما أذاعه فى الميكروفون

فاعتذرت له وأننى لم أتوقع أنها سيارتى لأنى لا أحفظ رقمها

ومن يومها لا أحاول الوقوف خلف حد

[disappointed]

أوّل مرّة أأخذ بالى من الموضوع ده مع إنه لذيذ جدّا

أيّام الخطوبة رحت فى يوم عيد الحب أخذت خطيبتى سابقا (مراتى حاليا) و أختها للأوبرا ( كانت بتعرض القرصان الأحمر)... المهم..... وقفت تاكسى و ركبنا ( أنا قدّام و همّه الإثنين فى الخلف).... من ساعة ما دخلت التاكسى و أنا تأكّدت إن السوّاق مختلف شويّة عن سواقين التاكسى المعتادين... العربيّة نظيفة جدّا من برّة و من جوّه..... إكسسورات التابلوه فى منتهى الرقىّ و الشياكة..... الكاسيت شغّال على مزيّكة كلاسيك..... السوّاق لابس قميص بيير كاردان محترم و شيك جدا..... أول سؤال سأله لمّا قلت ليه دار الأوبرا كان عن الباب اللى عايز أنزل عنده و بعدين لقيته بيقول لى : القرصان الأحمر ظريفة جدا و الجماعة الأسبان اللى جايبينهم يعملوها ممتازين

ما علينا......

أنا من هواياتى تجاذب أطراف الحديث مع سواقين التاكسى... والمشوار كان طويل من مصر الجديدة للأوبرا... و انا مستظرف الراجل , فنكشته... فحكى........ طلع إنه إبن ناس كويسين و محاسب و إشتغل فى مركز كويس قوى فى هيلتون النيل و بعدين إتعرّف على واحدة نمساويّة و حبّوا بعض و سافر معاها النمسا و قعد معاها هناك 6 سنين و بعدين إنفصلوا نتيجة إختلاف الطباع رغم إنه و هوه بيحكى كان مبسوط قوى من مشاعر الحب الرقيقة اللى كانت بينهم , ورجع مصر إتجوّز بنت خاله و خلّف منها ولد و بنت.... و إبتدى بقى يلبّخ ...... فى الجواز....... و الستات..... و العيشة ..... و اللى عايشينها...........و......جواز إيه يا راجل بلا قرف....... الأكل بيترمى لك زى الحيوان فى القفص و تيجى تكلّمها تلاقيها نافشه ليك كدشها و ريحتها بصل من المطبخ و تقول لك أعمل ليك إيه مش بآخذ بالى من عيالك (زى ما يكونوا عيالك إنت لوحدك).... مشاعر مافيش.. رقة و عذوبة مافيش..... بص يا أستاذ..... المصريات و الشرقيات ما ينفعوش للجواز و لا بفهموا يعنى إيه حب و مشاعر...دول مربّيات.... حاضنات...... حاجه كده

<_< :angry:

أنا طبعا سامع كلامه ده و باصص بطرف عينى على خطيبتى و أختها فى الكرسى الخلفى...... ما فيش أى رد فعل على الوجوه و كل واحدة عاملة نفسها بتبص من شبّاكها

المهم.....

نزلنا..... و أنا بأدفع الفلوس للراجل لقيته بيغمز لى و بيقول لى بصوت واطى : زمانهم مولّعين....ههههههه....ههههه.... خلّيهم يعيدوا حساباتهم من الأوّل

ماعلينا......

رجعت ليهم و أنا مبتسم و لسّه حأقول ليهم السوّاق ده ظريف قوى , و بأقول :

السوّاق ده.....

لقيتهم فى نفس واحد :

قليل الذوق..... والاّ إنت رأيك زيّه فى الجواز؟؟؟

قلت ليهم: لا.... طبعا...ده أنا كنت لسّه عايز أقول إنه قليل الذوق

:blink:

بس الغريبه إنهم فضلوا لاويين بوزهم طول الخروجه لغاية ما روّحنا زى ما أكون أنا اللى قلت الكلام اللى قاله سواق التاكسى... و......و....... فى النهاية طبعا العبد للّه واجه تهمة التآمر و التعاطف مع ما قاله سوّاق التاكسى و تهمة الترويج لأفكاره الهدّامه عن الستات و الزواج ... و..و...

أمّال يعنى كنت منشكح قوى و عمّال تكهكه معاه طول السكّة ليه؟؟؟

من يومها......

و أنا إشتريت عربيّة

ksh:: ;)

[disappointed]

لسّه من يومين حاصل لى موقف لذيذ قوى

كنّا فى الملاهى بنفسّح البنت..... و كنت حاطط عمر أفندى على البوسيت بتاعه و بأزقه... وبعدين الولد زهق و عيّط علشان عايز مامته تشيله... رحت مدّيه ليها و حاطط شنطة إيدها على البوسيت و زقيت البوسيت و أنا ماشى..... و بعد شويّة واحدة ماشيه مع أولادها فالأولاد بيتشاقوا راحو زاقين البوسيت و هيّه كمان راحت خابطة البوسيت وهيّه بتجرى وراهم....فبأقول لها : بالراحة كنت حتعوّرى الولد

فــ... بصّت فى البوسيت و راحت باصّه ليّا بإستغراب و قالت لى : إنت حاطط الولد فى شنطة إيد المدام والاّ حاجه؟؟؟

(طبعا....إكتشفت....إنى... كنت ناسى إن الولد مش فى البوسيت و إن شنطة إيد المدام هيّه اللى محطوطة فيه)

مش عارف ليه إفتكرت محمد صبحى فى مسرحيّة الجوكر :

هوّه فين الظابط؟؟

<_< :angry:

تم تعديل 21 نوفمبر 2004 بواسطة disappointed

[disappointed]

زماااااان

أيام ثانوى.....كنت أنا و أصحابى مدمنين إستيميشن و بريدج... و بعد ليله ساهرة طويلة من اللعب رحنا على وش الفجر نأكل عند شبراوى , و لمّا جينا ندفع الحساب صاحبنا اللى كان حيدفع قال للراجل بتلقائية و عفوية شديدة :

هوّه الإسكور كام؟؟؟

<_< :angry:

تم تعديل 21 نوفمبر 2004 بواسطة disappointed

[disappointed]

الموقف ده من بطولة واحد صاحبى كان لاسع بجد

أوّل ما إتخرّجت إشتغلت فى مستشفى إستثمارى (مش حأقول إسمه أحسن سى السيّد يقول بأعمل دعايه و يوقف عضويتى - تلاكيك أهلاويّة بقى :lol: -)..... و فى ليلة شتاء مطيرة مليانه زعابيب كنت نوبتجى من 10 مساءا لغاية الصبح..... لقيت التليفون بيضرب الساعة 3 الفجر و بتوع الريسبشن بيقولوا لى : فيه واحد معرفتك عايزك ضروى

إتخضيت طبعا...قلت أكيد فيه مصيبه....... رحت قايل ليهم خلّوه يطلع لى

خرجت فى اللوبى بتاع الدور اللى كانت غرفتى فيه لقيت الأسانسير بيتفتح و صاحبى ده داخل و شايل فى إيده كيس نايلون

خير؟؟؟ فيه إيه يا إبنى؟؟؟

لقيته بيقول لى : معلش... أنا عارف إنى قلقتك

و راح فاتح الكيس النايلون..... و مطلّع منّه برطمان صغيّر... وقال لى :

الواد إبنى عنده إسهال شديد قوى و أنا جبت ليك عيّنه علشان نحلّلها

f((:

قلت له : حرااااام عليك..... عايزنى أقوّم زميلى بتاع المعمل و أعمل ليه "كول" طوارئ الساعة 3 الفجر علشان ينزل المعمل يعمل تحليل براز؟؟؟

<_<

قال لى : معلش بقى.... عشم

قلت له طيب

المهم....

قوّمت زميلى بتاع المعمل , و نزلت مع صاحبى للمعمل و انا فى غاية الإحراج.... و بالفعل تم عمل التحليل و زميلى طبع التقرير بتاعه و سلّمه ليّا..... فخرجت من المعمل لصاحبى اللى كان مستنينى فى الطرقه اللى قصاده , وقلت له : لا .... بسيطه... شويّة أميبا و حأكتب ليك علاج

المعجزة فى اللسعان بقى كانت و أنا و صاحبى بنتأهّب لركوب الأسانسير.....لأنى لقيت صاحبى راح شاددنى من إيدى فجأة زى ما يكون إفتكر حاجة مهمة جدا ... و راح قايل لى :

هوّه زميلك بتاع المعمل ضَرَب على البرطمان و مش حيرجّعه ليّا؟؟؟

stnd:: stnd::

مش عايز بقى أقول لكم كمّية الضحك و السخسخة اللى كنّا فيها فى الأسانسير ... و كمّية الضحك اللى كانت بتنتابنى لمدة أسبوع كل ما أستحضر صورة صاحبى و هوّه بيقول لى الكلام ده و هوّه متصنّع الجدّية الشدية و القلق على ضياع البرطمان

lo:: lo::

[بنت شعنونة]

ههههههههههههههههههههههههه

مش ممكن مواقف تحححححححححفففففففف والله

دا انتوا مشاااااااااااااااااااااااااااكل :rolleyes:

د.محبط

انا كن ها اموووووووووووووت من موضوع البرطمااااااان داااااااااااااا :o mf(

[بنت شعنونة]

ابن عمتى راح يعزي في خال واحد صاحبه هوا و مجموعة من زمايله

المهم راح معاهم واحد زميلهم كمان لكن الولد دا بيشرب حشيش

ولما يشرب بيبقى مش شايف ف بيضطر يرفع راسه لفوق ويضيق عنيه عشان يبين انه مركز ومش مسطول

المهم الولاد دخلوا على قريب الولد اللي واقف ع الصوان يسلموا عليه ويعزوه

فدخل الأولاني وعزاه

ودخل التاني سلم وعزاه

التالت كان الولد المسطول

راح مسلم على الراجل وقاله.....

البقاء للأفــــــــضــــــــــل. :) !!!

بدل البقاء لله :o jmb-)

[G.G]

زماااااان

أيام ثانوى.....كنت أنا و أصحابى مدمنين إستيميشن و بريدج... و بعد ليله ساهرة طويلة من اللعب رحنا على وش الفجر نأكل عند شبراوى , و لمّا جينا ندفع الحساب صاحبنا اللى كان حيدفع قال للراجل بتلقائية و عفوية شديدة :

هوّه الإسكور كام؟؟؟

:) :o

تم تعديل 31 مايو 2005 بواسطة G.G

[بنت شعنونة]

موقف مششششششكلة حصل ليا ايام الخطوبة

واحدا قريبتي عزمتني على فرحها

وهيا ماشاء الله جوزها طوله حوالي مترين تلاتا كدا وعريض المنكبين شلولخ :angry:

بجد شكله مرعب واللي ما يعرفوش يخاف منه جدااااااا

وبصراحا كلنا خفنا منه :angry2:

المهم رحنا انا و بابا واخواتي وخطيبي سابقا اللي هوا جوزي حاليا..

الفرح كان تحففففففففففة وهاي ستايل جداااااااااا وكل حاجا على سنجة عشرة

المهم قلنا نسلم ع العرسان ونباركلهم وهما في الكوشة

ف اخواتي وجوزي و وابن عمي سبقونا عشان كانوا اقرب للكوشة

ابن عمي .. الف مبروك انا فلان ابن فلان..وسلم ع العريس ثم العروسة

اخويا.. مبروك.. انا فلان اخو شانا " عشان العريس عارفني من قبل كدا".... وسلم ع العريس ثم العروسة

اخويا التاني.. مبروك.. انا اخو شانا بردوا.... وسلم ع العريس و ع العروسة

جه الدور على زوجي

وهوا طالع ع الكوشة اتكعبل في المفرش الستان بتاع الطرابيزة اللي جنبهم

راح الشربات مدلوووووووووووووق ع العريس اللي فز نط قبل ما يغرق شربات

ف كل الشربات وقع ع الكنبة مكان العريس و الحمدلله ما فيش حاجا ع البدلة...

طبعا جوزي اتدربك خااااااااالص ومن دربكتة قال

مبروك.. انا فلان اخـــــــــــــــــو شانا برضضضضضضضضضضضضضه :blink: -_-

المهم ان العريس قعد طووووووووول الفرح ماااااااااااااااايل ع العروسة وقعدته غريبة جداااااااا

كل دا عشان يقعد بعيد عن الشربات المدلوق :angry2: -_-

[محمود الشاعر]

شانا الشعنونة

انا معرفش اسمك كدة صح ولا لا لاني لقيت ناس كتير مسمياك شانا

المهم برافوا عليك الموضوع الهايل ده

فى يوم جوازي حصلت حاجات غريبة جدا

1- الفرح كان عند بيت العروسة عملين سرادق كبير المهم واحدة من المعازيم كان معاها بنتها الصغيرة ويظهر انها ماكنتش لبسة بامبرز ومصممة اني اشيل البنوتة واتصور بيها المهم حصل والبنت ما صدقت راحت مديها من العيار التقيل ويظهر والله اعلم انها كانت شاربة ملوخية وكانت ليلة ياعمدة تقوليش ماسورة وانكسرت خدني اخوة العروسة اللي هي مراتي دلوقتي وام عيالي على فوق علشان نصلح اللي ما يتصلحش دخلني أوضة وخد البنطلون وحطه فى الحمام وسبني عرفت بعد كده ان جماعة اصحابه جم فاعد معاهم المهم فضلت كده شوية وسمعت الباب بيتفتح وصوت شوية ستات داخلين قمت جريت واستخبيت ورا الستارة ودخلوا فعلا شوية من البلد مع حماتي سبتهم ودخلت تجيب اكل او حاجة معرفش المهم انا لقيت نفسي واقف واعد اضحك واضحك بصوت عالي وسبت الستارة وعينك ما تشوف الا النور صويت وضرب ميكلهوش حمار فى مطلع راح الرجالة طلعة على فوق اصلهم مسكوا حرامي اللي هو انا ولقيت واحد طويل طويل طويل عرفت كدة انه طويل قوي من ايه لما كان بياخدني من الارض ويرفعني للسما كنت بخبط فى السقف المهم بعد كدة يجي عشرميت سنة دخلت حماتي وقالت لهم ده محمود العريس وكانت فضيحة طبعا حلفت ما انا نازل وجابوا العربية لحد الباب ورحت متظفلط وناطط فيها من كسوفي

2- كنت فى السينما انا وخطبتي اللي بقت مراتي وفى نص الفيلم قمت دخلت الحمام وانا راجع الحمام منور والصالة ضلمة فمش شايف حاجة لقيت الكرسي بتاعي بصعوبة اعدت ورحت ماسك ايد خطبتي ورحت بستها خطبتي بقي ووحشتني الخمس دقايق دول وفجأة لقيت حتة قلم نازل على وشي وشتيمة ويا قليل الادب وطبعا انت عارفة شهامة المصريين المهم فى الاخر طلعت خطبتي بس مش شايفة علشان هي مش لبسة النظارة واتكسفت تجبها معاها وانا طبعا دفعت التمن على فكرة كل الى فات ده حقيقي فعلا وحصل ولسه اللي جاي اكتر ونشوفك الحلقة القادمة وشكرا على الموضوع

[nancy]

شانا موضوع الفرح والعزا دول موتونى من الضحك

وانت يا محمود موضوع السنيما دة فظيع

انا حصل معايا موقف زمان ايام الخطوبة

كنا فى المنتزه ووقت عصر والدنيا هديا والجو رومانسى

فطلع فى دمغنا نجرى ونتسابق فوانا باجرى طرت فى الهوا ودرب على الارض

البية خطيبى وحبيبي بدل ما يمد ايدة يقومنى مات على نفسة من الضحك

وكل ما يفتكر الموضوع دة ونكون فى المنتزة يحكية للبنات ويقلوهم ماما طارت هنا وطبت ويضحك هو هما :angry2:

[زعلان]

2- النهاردة الصبح جيت برضوا المكتب وأدور على نضارة النظر يمين شمال مش لاقيها أبداً وأخيراً أقنعت نفسي إني نسيتها في البيت ودورت على السواق أديلوا مفاتيح الشقة يروح يجبهالي مالقتوش .. المهم فضلت في العذاب ده وعيني عماله تدمع ومش عارف أشتغل لحد وقت الغداء وجيت ماشي وبألبس جاكت البدله لقيتها في الجيب اللي جنب إيدي اليمين وإللى فتشت البدله اكتر من مره الصبح وبرضوا مالقتهاش .

عادةما أبحث عن النظارة وأنا مرتديها

وأعود للشقة لأبحث عن التلفون بينما أتحدث فيه لأنه مش في جيبي وممكن أقول للمعايا على الخط اصلي بدورعلى الموبايل مش لاقيه لحد ما أفتكر اني باتكلم فيه :blush:

[Sherief AbdelWahab]

لما يكون ليك قريب ما تعرفوش. حاول تخلي نفسك على طول عامل إنك عارفه من قديم الأزل..وهوة دة اللي حاولت عدة مرات أعمله ، وطبعاً فشلت فشل ذريع!

خلص الكلام