مين بيحب العربيات ؟

[Mercedes]

السلام عليكم و رحمة الله و بركاته

رينو لوجان ؟؟؟؟؟؟ :blush2:

ليه سيادتك بتعملى فى نفسك كده !!!!!!

أولا, الرينو لوجان دى انتاج مغربى مش فرنساوى و بتخش مصر بجمارك مخفضة نظرا لوجود اتفاقية تجارية بين مصر و المغرب !!!( الطيور على أشكالها تقع )

ثانيا, أنا رأيى أنك تدورى على حاجة يابانى و بلاش الرينو لوجان دى, دى لا شكل و لا منظر و لا طعم و لا ريحة و بعدين لازم تعملى حساب ال Resell يعنى لما تحبى تبيعيها تبيعيها بسهولة و تلاقيلها زبون بسرعة و تبعيها بسعر كويس و ما تخسريش فيها كتييير

و زى ما أنت عارفة, الرينو سمعتها فى السوق المصرى , ايه , زباااااااااااااااااااااالة .

أنا شايف أن , ياريت سيادتك تتأنى فى الموضوع ده و تفكرى تاااااااانى .

و ربنا يوفقك و يكرمك و يهديكى للخير ان شاءالله

MERCEDES S430

[nizza la bella]

الرينو سمعتها فى السوق المصرى , ايه , زباااااااااااااااااااااالة .

لية :lol:

[icehearted girl]

اتاني اكتر من كدا؟ :blink:

دنا بقالي شهور بفحص وامحص وادعبس

وبالنسبة لسعرها مقارنة بموواصفاتها...كويسة جدا

وعلي فكرة بالنسبة للريسيل لوجان دلوقتي سوقها ماشي جاااااااااا :lol:

وبعدين الياباني هيكون غالي علي حبتين تلاتة اربعه خمسة :blush2:

[Mercedes]

السلام عليكم و رحمة الله و بركاته :lol:

ماهو أدام حضرك ناوية على الرينو, فهتكونى شايفة كل مميزاتها و مش شايفة عنها أى عيوب خالص و طبعا بالنسبة لل Resell العربية الرينو سوقا مش ماشى خااااااااااااااااالص :blush2: :blink:

و بعدين قطع غيارها غالية بالمقارنة بالعربية .

MERCEDES S430

[icehearted girl]

قطع غيارها مش كلها غالية علي فكرة

في وفي

وبعدين موتورها كويس

وبنزينها علي ادها

وصالونها واسع ودا مهم جدا عندي

وكمان عاليه اترحم شوية من خنادق ومطبات مصر

[icehearted girl]

لوححضرتك صحيح عاوزها فحدود 50 الف يوزد يادوب ممكن تشتري الفيات اللي معايا

هخسر فيها بس مش مشكلة

احم احم

[nizza la bella]

فيات

ياساتر يا رب

[shiko]

اسمعى النصيحة ...

بلااااااااااااااااااااش لوجان

ياباتعة ارجعى عن اللى فى دماغك ..........بلاااااااااااااش

احسن لك .........انا بنصحك نصيحة اخت وقعت فى عربية برضه وماسمعتش كلا الناس واشتريت افيو .....

والنتيجة بعيط وبضرب نفسى....بلاش ...هاتعيطى ...

وبعدين المبلغ اللى هاتدفعيه ده موش قليل برضه ...اكيد يستاهل منك انك تفكرى كويس ...كل اللى انتى قولتيه ده مايخليش الواحد ياخد قرار شرا عربية زى دى

فى حاجات تانية كتير ....روحى التوكيل ...واسمعى من الناس اللى واقفة بالطوابير هناك ...

[Mercedes]

السلام عليكم و رحمة الله و بركاته

دا من غير ما تروح التوكيل ولا حاجة, العربية أصلا لما تبصيلها, حاجة كدة, أستغفر الله العظيم , الواحد بس مش عاوز يتكلم !!! :) :lol:

MERCEDES S430

[icehearted girl]

ياجماعة ادوني كلام واقعي

رحت التوكيل

وشفت الشكاوي

وسالت ناس معاهم بقالها سنة واتنين

انا بدعبس بقالي شهور

حتي معدل الشكاوي بتاعها مش كتير مقارنة ببقيت التوكيلات

بلعكس يعتبر من احسن التوكيلات فمصر هو وتويوتا

وعيوبها لحد دلوقتي حاجات بسيطة بخلاف اسعار قطع الغيار احيانا..مش كلها يعني

تم تعديل 23 مارس 2010 بواسطة icehearted girl

[فــيــروز]

معلش أنا عارفه إنّى باغطس كتير و أقب فجأه ..

بس قلت زى ما دوشتكم معايا فى مرحلة الاختيار أقول لكم على النتيجه

الحمد لله اشتريت العربيه "نيسان تيدا" هاتشباك و بصراحه أنا مبسوطه بيها جدّا جدّا الحمد لله ..

و شكرا جزيلا لكم جميعا و لدكتور "هشام" بشكل إضافى على الاهتمام و النُصح .. و ربنا يوفّق كل باحث عن سياره لاختيار يسعده

[د هشام ابراهيم]

فيروز باشا ...ألف مبروك يا سيدتي الفاضلة و ربنا يديلك خيرها و يكفيكي شرها و شر الطريق و يا رب دايما راضية بيها

دكترة آيس هارت ......بصي سعادتك ...مفروغ منه إن كل حاجة ليها مميزات و عيوب بما فيها العربيات و ما فيش عربية (و لا أي حاجة تانية ) كاملة

اللوجان علي قد سعرها في مصر إختيار جيد .......العربيات في مصر كلها من الالف للياء لا تساوي ثمنها فاللوجان مش أستثناء .....مميزاتها سعرها المناسب نسبيا .....توكيلها الافضل في مصر .....تكنولوجيا بسيطة .... ١٦٠٠ سي سي و عالية علي الأرض و سيدان (المزاج المصري حاليا سيدان مش عارف ليه مع إن الهاتشباك زي الفل ...ما علينا )

العيوب ..لوجان مش رينو أصلا ... داتشيا و حطين عليها بادج رينو علشان التسويق و التسعير .....و لم تجرب في الشارع المصري مدة كافية

ربنا يوفقك يا دكترة

[Mercedes]

:sad: السلام عليكم و رحمة الله و بركاته :sad:

ألا أنا كان عندى استفسار عن موتور العربية.

يا ترى يا هل ترى, ايه السبب أن زيت الموتور بينقص رغم أن العربية :

لا بتنقط زيت ولا بتدخن من ورا .

و أداء العربية صحيح مش ممتاز لكن ممكن نقول جيد جدا.

العربية هى بيجو 505 مو 1980

سمعت من بعض الناس أن المكنة خفيفة و انها محتاجة طقم شنبر, هل الكلام ده صحيح؟؟؟

شكرا و جزاكم الله كل خير

MERCEDES S430

[icehearted girl]

:lol:

انا فعلا بقيت افكر جديا في شاهين :blink:

[shiko]

:lol:

انا فعلا بقيت افكر جديا في شاهين :blink:

وليه؟؟؟

ايه اللى حصل ...

يعنى من لوجان لشاهين ياقلبى لا ...تركب ولا تسوق ...

طب شوفتى الديهاتسو سيريون؟؟؟ ...ماتنفعشى..؟؟

[icehearted girl]

اغلي شوية ياشيكو

وبعدين انا مبدورش علكماليات اد معيزة عربية معمرة

[الباشمهندس ياسر]

:D :blush2:

انا فعلا بقيت افكر جديا في شاهين :D

هتعملك عضلات ف ايديكي ... بجد مش هزار

بخلاف انها بتوجع الضهر مع شوارعنا الجميلة

بس من ناحية معمرة .. اكيد معمرة

[Mercedes]

:lol: السلام عليكم و رحمة الله و بركاته :lol:

اسمحيلى أن أنا أقف و أرفع القبعة احتراما ليكى على رأيك الممتاز ده :lol:

فعلا الشاهين هى العربية المصرية الوحيدة الملائمة للناس اللى فى الشوارع بتاع مصر و السواقين اللى فى الشوارع بتاع مصر و الأسفلت بتاع الشوارع بتاع مصر :lol: .

و من ناحية العضلات, أنا ما أعتقدش لأن احنا عندنا واحدة بتاع والدت, و أخواتى البنات بيسوقوها من زمان و ما حصلهمش حاجة, بس هى و الله عربية ممتازة و ملائمة جدا للشوارع المكسرة اللى عندنا, و كمان قطع غيارها تلاقيها عند البقالين و برخص التراااااااااااااااااااب و أى صنايعى فى أى مكان يقدر يصلحها و على شرط كمان بتاعتنا ماكناش شاريينها زيرو ولا حاجة, دى كانت مستعملة, هى كانت موديل 1997 و كنا شاريينها فى 1-2002 من السوق بتاع مدينة نصر.و ما شاء الله. لحد دلوقتى فورررررررررررررررررريرة.

ربنا يكرمك و تقعى على واحدة حلوة و بالنسبة للكماليات, انا شايف أنك لة لقيتى شاهين فيها تكييف و قومتى أنتى بعد ما تشتريها مغيرة القزاز بدل ماهو مانيوال يبقى كهربا, يبقى أنتى كده فى الأوكى و مش عايزة حاجة تانية من الدنيا و سوقى و دوسى و لا يهمك ;) ;) .

MERCEDES S430 :lol:

[icehearted girl]

ياسيدي وميهمنيش التكيف كمان :blink: انا هركب مروحة سقف

وممكن فعلا اظبطها انا لما اخدها ان شاء الله

المشكلة فعلا ان خلاص مفيش منها 2010 كله خلص والموجود 2009 وشكلي هستني لما ينزلوا 2011 دا ان نزل

وبالنسبة للعضلات عادي يعني مهي موجودة موجودة انا اول جامعة العاب قوي وذراعين بنات :closedeyes:

واستغنيت عن التمرين بجهاز الضغط اللي عندي فلبيت :( اللي قرب يكسرلي صوابعيني

[Mercedes]

السلام عليكم و رحمة الله و بركاته

انا كان عندى سؤال و أرجو أن يتسع صدركم لى :

العربية البيجو ال 505 مو 1980 بتاعتنا , الزيت بينقص من الموتور بمقدار نص لتر لكل غيار/ كل 1000 كم يعنى .

المشكلة أن أنا لاحظت فى خلال السنة الأخيرة دى أن العربية بتسخن و على فكرة الموضوع ده جديد عليها تماما لأن أنا متعود أن العربية دى لو ماشى فى ميدان التحرير فى شهر أغسطس الساعة 2 الظهر و المرور واقف, مستحيل تسخن, يعنى المؤشر بيكون على الأزرق , آه و الله العظيم, ماهى عربيتنا من حوالى 30 سنة بقه و أنا عارفها, لحد ما لقيتها فى الفترة الأخيرة اللى هى الصيف ده و اللى فات بدأت تسخن, نظفت الرادياتير و اتأكدت أن الميه مابتنقص و أن الرادياتير مش مخروم و أن طلمبة الميه شغالة و بتقلب كويس و كله تمام وكمان غيرت المروحة و جبت واحدة أكبر و بعد كل ده بتسخن برضه.

لدرجة أن أنا كنت هسمع كلام بتاع الرادياتيرات و أغير الرايدياتير بواحد أطول شويه .

بس و أنا واقف مرة مع واحد بتاع دوكو اللى أنا بتعامل معاه و قولتله أن العربية بتاكل زيت و ان العربية بتسخن, يعنى المؤشر بتاع الحرارة ممكن يوصل لنص المسافة بين الأزرق و الأحمر رغم أن العادى أنه طول عمره بيكون على الأزرق و عمره ما يعلى عن كده الا ادا كان فى عيب فى دورة التبريد, قام بتاع الدوكو قاللى حاجة أنا مش عارف ادا كانت صح ولا لأ, هى أن أدام المكنة خفيفة و بتاكل زيت, فالعادى أنها تسخن و تمسك حرارة, فأنا عاوز أعرف, ده صحيح؟؟؟ , عشان لو كان صحيح , أروح للميكانيكى عشان يحل المكنة و يشوف هى بتاكل زيت ليه, على أساس أن يمكن لما أعالج موضوع الزيت اللى بينقص ده, تقوم مشكلة الحرارة تتحل و خصوصا أن أنا عندى احساس داخلى أن موضوع المكنة ده لو اتصلح, السخونية دى هتروح, يمكن يكون الكلام ده مجرد احساس و ممكن يكون بجد, بس ده اللى أنا حاسس بيه لأنها عربيتنا و أنا عارفها كويس و العربية هى نفس العربية و الرادياتير هو نفسه, بس موضوع السخونيه دى اللى جديد.

أنا بصراحة المشكلة عندى مش فى الزيت اللى بينقص لأن مش مشكله عندى أن أنا أزودها نص و لا حتى كيلو زيت كل غيار 1000 كم , بس المشكلة اللى بتتعبنى بالدات لو مسافر مشوار طويل و بالدات فى الصيف يعنى, هى الحرارة.

فأرجو من الأخوة الأفاضل اللى فى المنتدى هنا أنهم يشاركونى الرأى و يدلونى على الخير ان شاء الله

شكرا و جزاكم الله كل خير

MERCEDES S430