قلة ذوق و إستخفاف ...

[Lancelot]

أنا عارف إن الموضوع مش بالحجم ده و لا بالأهمية ديه لكني فعلا غضبان ... غضبان لأن الواحد لم يصبح له أدني إعتبار في البلد ديه ...

تخيل و إنت قاعد بتتفرج علي التليفزيون و مندمج علي الأخر في الفيلم ... اللي إستمر لمدة تقريبا ساعتين و فاضل فيه حوالي تلت ساعة ... تلاقي الفيلم إتقطع و بعدين فاصل و بعدين برامج عادية خالص .. زي ما يكون مفيش ناس بتتفرج مثلا ...

و الله العظيم حصل .... الأربعاء 15 أكتوبر علي قناة النيل الدولية (نايل تي في) ...

أنا بقيت هأتجنن ... مش ممكن الإستخفاف بالناس وصل للدرجه ديه .. خلاص ملناش أي إعتبار ....

يا جدعان حد يقول حاجة ..........ز

[Lighthouse]

ح نقول ايه بس

دي مش قلة ذوق بس

دي حاجة تانية

حاجة تقرف

[فــيــروز]

حاجه :-(

انا كنت متابعه الفيلم بتركيز شديد عشان اتعلم فيه نقد سينمائى :-)

والاقى النقط الجميله فيه عشان اعلق عليه زى بتوع نادى السينما

وفجاه ببمنتهى قلة الذوق الفيلم توقف ليذاع برنامج عن الموضه كان يمكن تاجيله ربع ساعه بس هى الباقيه من زمن الفيلم

لم اتوقع هذا من قناة النيل الدوليه التى تحترم مشاهديها و تحترم مواعيدها و توقعت اى اعتذار من اى شخص و استئناف الفيلم لكن للاسف لم يحدث .. ولا اعرف هل لم يعرف المسئولون عن العرض ان زمن الفيلم اكثر قليلا من ساعتين !! يعنى اعتقد ان هذا حدث لتجاوز العرض ساعتين رغم وجود اعلانات و موجزين للانباء يعنى لو كانت المشكله فى زمن العرض كانوا وفروهم و عرضوا الفيلم كاملا .. حاجه تقرف .. حتى المتع البسيطه تاتى الينا منقوصه .. حسبنا الله ونعم الوكيل :-(

[Lighthouse]

انا مش فاهمة يعني هم مش بيحسبوا وقت الاعلانات اللى بيقرفونا بيها كوقت مستقطع من المدة المحددة

ولا حتى دي بياكلوها علينا

حاجة عكننة

[Lancelot]

فعلا كان ناقص حوالي ربع ساعة أو تلت ساعة .... و لو كانت المشكلة إنهم مش عارفين مدة الفيلم تبقي ديه مصيبة مصيبة مصيبة .... أكتر من قطع الفيلم ...

و الحاجة التانية إنهم عرضوا النسخة الكاملة بتاعة الفيلم ... Uncut يعني ... و فيه حوالي خمس أو ستة مشاهد عرضوا لم يتم عرضهم من قبل عند عرض الفيلم علي القناة التانية ... طبعا قناة النيل لا تعرض الأفلام كاملة .. لكن النسخة المعروضة كانت كاملة ... المشاهد المعروضة لم تكن فاضحة أوي لكننا لم نتعود مشاهدتها علي شاشة التليفزيون ....

[Farah]

الفضول حيموتني

ما هو اسم الفيلم؟؟؟؟؟؟؟؟

[فــيــروز]

آه فعلا

لاحظت ان دايما نسخ الافلام التى تعرض على النايل تى فى تكون مختلفه عن النسخ التى نراها على القناه التانيه وبتكون تقريبا بدون حذف !! لدرجة انى حسيت بما يشبه الصدمه بالامس وانا باتفرج على الفيلم !!

يا فرح .. بعد الشر عليكى يا ستى الفيلم كان فيلم فورست جامب

[se_ Elsyed]

يا أخواني هذه هي حالة التليفزيون المصري بجميع فنواته الذي يتعامل مع المشاهد من منطلق " عاجبك ولا مش عاجبك " ولو رديت وقولت مش عاجبني هاتلاقي مذيع يطلع ويقولك " إشرب من البحر "

فاكرين مسلسل أم كلثوم ، المشهد موتها ، الوليه يا حبة عيني بتطلع في الروح والمشاهدين عمالين يعيطوا ومتأثرين وفجأة يقطعوا المشهد بمنتهى قلة الذوق والجليطة علشان يجيب إعلان لشركة محمول ... وقيس على ذلك ماتشات الكورة تلاقي الماتش باديء بقى له ربع ساهة وعما شغالين إعلانات وبعد الإعلانات يجيبوا أسامي كل اللي معدي جنب الإستاد وشارك بانفاسه في نقل المباريات .

بلإضافة إلى التفنن في عدم إحترام إذاعة البرامج في موعدها وبرضوا اللي مش عاجبه يشرف من الحنفية اللي بقى فيها تلوث اكتر من البحر.

س س ناقض سينيماوي .

[متفائل]

أن كان الفيلم فورست جمب

يبقوا قلالات الزوق فعلا

الفيلم رائع جدا وبيرسخ لمبدء العمل وان الانسان لما بيعمل بأخلاص بيلاقي نتيجة عمله

بس خلينا حسني الظن بيهم برده لان النهاية مؤثرة شوية

أحكيهلكو علشان متزعلوش يا لنس وفيروز

مراته ماتت وبعدين هو وصل أبنه لباص المدرسة وخلص الفلم على كده

بس خلاص

طبعا المسؤلين مرضوش يزعلو الجمهور فأكيد أطعو الفلم عند لحته دي

وأكيد الناقد السنماوي س س هو الي ألهم يعملو كده وبعدين يروح ينقدهم في كل حته ويشنع عليهم

[Salwa]

ياجماعة انتم عاملين دوشة ليه بس؟؟؟..فلوسهم وهم احرار فيها..

لو عاوزين تشوفوا النسخة الأصلية من أى فيلم ممكن تنزلوه من الانترنت..وبلاش تتعبوا قلبكم.

انا بقى مليش بخت مع الفضائية..

كل ما يبقى عندى وقت وآجى اشوف فيها حاجة...الاقى افتتاحات.؟؟؟

استقبالات ؟؟؟اعلانات غريبة عن..ـ.الغطرة.ـ.؟؟؟وهذه افضل يا اخى ؟

هم المصريين دلوقت هم كمان بيلبسوا غطرة ؟؟

كرهت القنوات العربية...وان حصل ورأيت مسلسل...هم..5 دقائق.

واتنرفز واحس ان الناس دى خلاص..بتعاملنا كأننا لسة فى الحضانة ..

بيوجهونا لطريق الصواب.

هو مسلسل رمضان..حديث الصباح والمساء..اللى عجبنى..وباقى برامج

المنوعات عاوزة تتولع فيها.

بس يوم الجمعة اللى اشوف الصلاة...

وربنا يسامحنى بقى..مرة قفلت التلفزيون...ساعة خطبة الجمعة..من كمية النفاق والدعاء للحاكم ..وفضلت اضرب كف على كف..بدل ما اكسر التلفزيون...ولا عنده خشوع ولاحاجة..وكل شوية يبين الساعة الرولكس وحاجة تجنن.

هو

احسن واحد دكتور عمارة فى حديث الجمعة والباقى......انسوهم.

سلامى.

[فــيــروز]

شكرا للناقض السينماوى س.س. على تشريفه للبرنامج

نفس موضوع الاعلانات حصل فى اثناء عرض فيلم ايام السادات

ده حتى نشرة الاخبار بقى فيها اعلانات !! تخيلوا !!

وكمان يا متفائل احنا عارفين نهاية الفيلم

ماهو جه سبعتلاف مره

بس فعلا اداء توم هانكس فيه عبقرى عبقرى عبقرى

وكمان النهايه بتاعة الفيلم زيها زى كل الفيلم عاليه جدا

خصوصا وهو بيشوف ابنه لاول مره و بيسال زوجته عنه اذا كان طبيعى ولا لا !! واكتشافه ان الطفل مش بس طبيعى ولكنه ذكى ايضا

يعنى رغم انه طول الفيلم بيتصرف و كأن ليس به اى شئ غير طبيعى على الاطلاق الا انه فى قرارة نفسه يشعر بالالم لنظرة الآخرين له على انه مش طبيعى

على العموم لو الموضوع فيه مصلحه لشغل س.س. احنا بردو نفرحوله

[فــيــروز]

لو عاوزين تشوفوا النسخة الأصلية من أى فيلم ممكن تنزلوه من الانترنت..وبلاش تتعبوا قلبكم.

يا لهوىىىىىىىىىىىىى

ننزله من على النت !!

حضرتك عارفه ده ياخد وقت اد ايه !!

النت فى مصر بطييييييييييييييييئه جدا

وعشان الواحد ينزل فيلم من على النت يبقى يروح ينتحر احسن

[optimistic]

اما اولاد اشقياء صحيح معقول لسة بتتفرجو على التليفزيون المصري

[Mohammad Abouzied]

كل القنوات المصرية الفضائية كدا وتفوقهم القناة الاولى والتي ممكن تبدأ الفيلم من نصفه تقريبا وبعد الاخبار تجيبه من الاول

وبعدين دا تدريب على حرق الاعصاب لتقبل نصايب الحكومة بصدر رحب

والله يخلي الحكومة الي بتدربنا على حرق الاعصاب ويخلي لينا صفوت الشريف

[محمود تركى]

كيف تطلبون البسبوسة ممن ليس لديهم سوى الكوسة؟

التعيين فى الفضائيات يتم من بين أهل الثقة, و ليس من بين أهل الخبرة.......أذا كان عاجبنا

[se_ Elsyed]

معليش عندي خبر كده بره الموضوع ...

يوم الخميس اللي فات اعنلوا خبر وفاة المذيعة ناريمان أبو الخير .. وبصراحة الست دي كانت كويسة ومن المذيعات اللي مش بطالين ... المهم في الخبر إنها كانت تبان انها صغيرة في السن وتصوروا طلع عندها 54 سنة ... انا قولت يا نهار تكني كولور .. اومال الأشاوس اللي أحنا عمالين نشوفهم من ساعة ماتولدنا .. زي أمنا نجوى وسهير شلبي وأحلام شلبي وفريدة الزمر وحمدية حمدي وسلالة عائلات الإتربي .. دول على كده عدوا السبعين بقى .... إيشي خيال يا ناس !!!!!

[sos]

انا قرأتها يااخى 45 سنة بس مش 54 عامة انت ادرى ياعم

[MuslimaEgyptian]

كل القنوات المصرية الفضائية كدا وتفوقهم القناة الاولى والتي ممكن تبدأ الفيلم من نصفه تقريبا وبعد الاخبار تجيبه من الاول 

سبحان الله...لسه كنت هقولها...

بحب أتفرج على بعض أفلام الأبيض والأسود اللى بتعرضها المصريه...ودايما تتقطع علشان موجز الأخبار..ويا ريت أخبار مهمه...يعنى مثلا يوم مظاهره غلاء الأسعار وترحيل حكومه عبيد..ولا حس ولا خبر...فقط شجب وتنديد ومقابلات ومؤتمرات..ما علينا...بعد الأخبار، الفيلم جه تقريبا من أوله !!!!! ومعنديش وقت أصلا أتفرج على التلفزيون...يوم ما بتحصل بيخلونى أندم ندم شديد...ده طبعا غير مذيعات (هاى تامر ...يلا باى)...والفيديو كليبس الغريبه على مجتماعتنا...أنا بسأل الناس فى مصر...هى الأغانى المصوره دى بتيجى عادى كده على التلفزيون فى مصر؟؟ بيقولولى نعم !!!

الصبر يا رب...

ولكن ليه نصبر...ليه نجبر على قبول نظام صفوت الغير شريف...ده حتى شكله إستغفر الله العظيم وشعره المصبوغ لا يطاق..فعلا "يعرفونهم بسيماهم"...

طالما محدش بيشتكى غير فى سره أو على القهوه، مفيش حاجه هتتغير (ولا أستثنى نفسى من المسئوليه) وهناك طرق إيجابيه كثيره للتغيير...

-------------------------------------

إوعى حد يسأل الفيلم كان إيه

[se_ Elsyed]

انا قرأتها يااخى 45 سنة بس مش 54 عامة انت ادرى ياعم

خد يا عم سوس ... أحنا أخبارنا دايماً طازة ومن مصادر مشكوك فيها ، قصدي موثوق فيها

جريدة الجمهورية بتاريخ 16/10/2003 م الساعة 10 الصبح

وفاة المذيعة التليفزيونية ناريمان أبوالخير.. فجأة!!

توفيت أمس مذيعة التليفزيونية ناريمان أبوالخير إثر إصابتها بهبوط وصدمة عصبية مفاجئة أثناء تواجدها بمنزلها بالسبع عمارات بمصر الجديدة عن عمر يناهز 54 عاماً.

المذيعة الراحلة خريجة كلية الآداب قسم فلسفة وعلم نفس التحقت بالعمل في التليفزيون عام 1984 وحصلت علي عدة دورات تدريبية وشهادات في اللغة العربية والإلقاء بمعهد التدريب الإذاعي وأكاديمية السادات في العلوم الإدارية وكان برنامج "طبيبك الخاص" أشهر برامجها علي شاشة القناة الثانية وعملت كمذيعة ربط وحصلت عام 1997 علي لقب أفضل مذيعة ربط حتي تولت رئاسة قناتي "نفرتيتي وحورس".

زوجة المحامي مصباح غازي ولم تنجب أولادا.

دفنت المذيعة الراحلة بمدافن الأسرة بالسيدة عائشة بعد صلاة العصر.. والعزاء غداً الجمعة بجامع الحامدية الشاذلية

[sos]

اعتذر يا د/س س

انت عارف السن واحكامه

استشارة كده على الماشى بصفتكم المهنية(الطبية) ما فيش علاج لضعف الذاكرة غير عصير البرسيم