نكسة كروية في الموقعة الجزائرية لفرقتنا المهلبية

[التونسى]

بسم الله الرحمن الرحيم

عذرا أخي سي السيد ... وكل المسؤولين هنا ... أعلم أنكم تكرهون مثل هذه المواضيع ... لكن لابد أن يعلم الجميع كيف وصل الحال داخل هذه المدينة التي كنت أحبها قديما جدا ... والتي تسكن بها شقيقتي للأسف ( أقولها وكلي حسرة أنني أصبحت أتاسف لأن أختي تسكن في مدينة مصرية ) .. هي مدينة الإسماعيلية ...

تابعوا هذا التوبيك ... علما بأن هذا الموقع هو أقل مواقع الإسماعيلي تعصبا ... ولكن تابعوا لكي تعلموا إلى أي مدى وصل سكان هذه المدينة ... هؤلاء الذين أفقدتهم الكرة صوابهم ...

انظروا إلى ما يكتبه سكان جمهورية الإسماعيلية المتحدة ... ويسكت عليه القائمون على منتدياتهم ..

http://www.ismailyonline.com/invision2/ind...mp;#entry523372

ويعلم الله أنني لا أريد الوقيعة ... ولكنني وبحق أقولها ... أن مشجعي هذا الفريق بحاجة إلى وقفة جادة من جانب أجهزة الدولة ... لأن الأمور تعدت وفاضت ... وإذا كانوا قد رفعوا أعلام تونس من قبل وأعلام المكسيك عندما كانت فرق هذه البلاد تواجه الأهلي ... فها هو ذا التطور الطبيعي للحاجة الساقعة ... وهام هم الآن يباركون الجزائر على فوزها على منتخب مصر ...

وأعتذر للأخ المشرف ... ولكنني وبحق لا استطيع السكوت ... ولا استطيع دفن رأسي في الرمال أمام هذا الخطر القادم.

والسلام عليكم ورحمة الله وبركاته

مع احترامى .. بس فعلا شئ يجن وعلامة استفهام كبيره.. الوصيف واللى كان الاقرب للدورى لولا ريشه .. مفبش ولا لاعب منه يصلح للمنتخب .. انت كان حيبقى شعورك ابه لو الاهلى مفيش ولا لاعب منه لعب امبارح

مبروك للجزائر فعلا واول مره احترم الناس دى لانهم لعبوا وكسبوا بشرف واستحقاق

وبرده لسه الامل الغبى موجود

[زعلان]

بس في فرق يا تونسي انك بتكون بتشجع الجزائر وبتدعي انه يفوز وان مصر تهزم علشان خسرت الدوري او حتى علشان مدرب المنتخب ما اخترش لاعب من فيق انت بتشجعه بون شاسع بين هذه و تلك وحيبقى خلط للأمور

طبعاو لا يبرر فرحة الاسماعلية و الزملكاوية بهزيمة منتخب مصر

[أسد]

منتخب مصر ..

مهلبيه من زماااااااااااااااااااااااااااااااااااااااان

طول عمرهم بيحرقوا دمنا ..

أنا من سنوات طويلة بطلت أتابع المباريات ..

وكنت سعيد الحظ في إصراري على عدم المتابعة .. فمعظم المباريات بتييجي في أوقات باكون فيها في الشغل ..

لكن ماتش إمبارح .. مكانش لي حجة ..

بالليل متأخر .. وخلصت شغل وقاعد قدام التليفزيون ..

حرقوا لي دمي كما تعودت منهم ...

واضح إننا ملناش في الكورة ..

أو مابنعرفش ناخد موضوع بجد ..

في النهاية ..

إضطرت لأخذ حبة الطوارئ المخصصة لتنظيم ضغط الدم ...

الله المستعان ..

حتى في اللعب .. مش عارفين نفرح

[adrianocrespo]

في كاس إفريقيا اللي فاتت اطلقوا على منتخبنا اسم منتخب الساجدين... نظرا لسجود اللاعبين الجماعي عقب كل هدف ...

سألت نفسي ... كيف يمكن لحارس مرمى يحمل على صدره إعلانا للخمور أن يوفقه الله عز وجل في مباراة كهذه ...

ايه العلاقه بس يا استاذ شرف الدين

ميدو و حسام غالي و محمد شوقي و زيدان لبسوا قبل كده فانلات لانديه عليها اعلانات لشركات قمار و مراهنات في اوروبا

اشمعني الحضري اللي بتحاسبوه علي الاعلان

ليس دفاعا عن الحضري ......... الحارس يتحمل مسئوليه الهدف الثاني و جزء من الاول

و المنتخب كله كان وحش

و احنا استهترنا بالجزائر

و رأيي ان الفريق يمتلك مجموعه جيده من اللاعبين محترفين في انديه الوسط في الدوريات الاوروبيه و يلعبون بصفه اساسيه

بلحاج نذير (بورتسموث)

كريم زياني(مارسيليا)

يحيي عنتر(بوخوم الالماني)

عبد الفادر غزال(سيينا الايطالي)

و اري ان مدربهم رابح سعدان ضعيف نسبيا و من الممكن ان يصنع منتخب افضل من المجموعه التي معه

علي العموم الجزائر تستحق الفوز

و احنا بنجد صعوبه حقيقيه في التصفيات علي عكس بطولات افريقيا لان اللاعب المصري بيفقد تركيزه علي المدي الطويل

[adrianocrespo]

منتخب مصر ..

مهلبيه من زماااااااااااااااااااااااااااااااااااااااان

طول عمرهم بيحرقوا دمنا ..

واضح إننا ملناش في الكورة ..

ازاي بس يا استاذ اسد

ده احنا ابطال افريقيا 2006 و 2008

و الكاميرون و المغرب بعد ماتشين برده ليهم نقطه واحده

ده مباراه لعبنا فيها وحش

مش معني كده اننا ملناش فيها خالص

[elfakhrany]

لا تعليـــق

[se_ Elsyed]

كنت داخل أكتب تعليق يبرد ناري

لكن إتكعبلت في تصريحات الفريق الركن المهيب حسن شخاته بعد المباراة اللي قال " الهزيمة من الجزائر على أرضها منطقية "

لووووووووووووووووولي ... زغرطي يا إنعام

الجزائر اللي من اضعف فرق القارة الأفريقية واللي لها 20 سنة يمكن ما بتوصلش كأس الأمم الأفريقية

الجزاير اللي كانت نازلة الشوط الاولاني مهزومة معنوياً مسبقاً ..

الجزاير اللي كان أي واحد من الجماهير في الشوط التاني بيحدف طوبة كانت بتعدي من دفاعنا وتدخل في المصفى ( عصام الحضري )

الجزاير اللي حسن بيه نازل قدامهم بتشكيل هُلامي .. على طريقة " على بركة الله يا رجالة "

مين بيقول لسه في أمل ؟

أمل يــــــــــــــا عُمـــــــــــــــــــر

هات الكره ... خذا الكرة ..

الكرة ذهبت إلى حازم

ده أول درس كنا بناخده في أولى ابتدائي ...

هههههههههههه

والله العظيم لو كنا وضعنا بأيدينا الطاهرة مجموعة ضعيفة ما كانت هاتبقى زي دي

زامبيا ... في البطيخ

الجزاير .... أضعف فرق شمال افريقيا

رواندا ... رواند تشيك رواندا تشيك

وسلم لي على إتحاد الكباب والكفته

[الباشمهندس ياسر]

انا لا بتاع كورة و لا شفت الماتش و لا ف دماغى الموضوع اصلا

لسه بشيك ع الايميل و الاقى اصحابى الجزايرليه .. مش ناقص غير ينطوا فى وشى و يرقصوا

دمى اتحرق ع الصبح

[م الغزالى]

من سنين طويلة ونحن نخرج من التصفيات المؤهلة لكاس العالم على أيدى فرق المفرب العربى ولم يقم أحد بدراسة الموضوع من الناحية العلمية !!!

يمكن لاننا بصفة عامة تنقصنا الجدية فى كل شئ ومنها المجال الرياضى بصفة عامة والكروى بصفة خاصة !

والدليل أن دولة بها 77 مليون مواطن تخفق إخفاق ذريع فى كل دورة اوليمبية !!!!

نفس الكلام من سنين طويلة نسمعه ونراه وإرجعوا لجريدة الأهرام فى أعدادها القديمة و نفس الأخطاء العبيطة وكلام المستكاوى رخمه الله عن اللاعبين ال بينطوا لتحت بدل فوق !!!

إذا عرفنا لماذا يفشل كل محترفونا فى رحلتهم الإحترافية بالخارج رغم توافر الإمكانيات و العائد المادى يمكن أن نضع أيدينا على السبب !

إدرسوا كيف أصبحت تونس ذى ال 9 ملايين مواطن ضيف دائم على كاس العالم !

الكرة أصبحت علم وإدارة مثلها مثل باقى الألعاب والا بالله عليكم مافائدة كليات التربية الرياضية فى بلادنا ؟

بالجدية والروح الفتالية تنتصر الفرق حتى ولو كانت أقل فنياً وهذا ماينقصنا والله أعلم

نقضيها بقى فرجة زى كل مرة !!!

[doha]

البركه ف المعلم اللى حاطط جل ف شنبه

مع احترامي لاحزانكم بس معليش امبارح مقدرتش امسك نفسي من الضحك على التعليق ده .. ماعلينا ..

الحمد لله انا مليش في الكورة ولولا الصورة المستفزه بتاعت حسن شحاته على علبة البيبسي مكنتش عرفته .. انا حتى معرفش ماتش ايه الي اتلعب ده بس فهمت من كلامكم كده انه تأهيل لكأس العالم . . بقولكم مليش في البتاعه دي .. نيالي على راي فيروز

ومع ذلك بقولكم ريحوا بالكم ياجماعه .. اول وآخر ماتش شفته في حياتي كان مصر مع هولندا فاكرينه؟ من الفين سنه كده ايام الجوهري ..

وسبحان الله من يومها الى يومنا هذا والخطة هي هي نروح نلعب وناخذ على ( قفاهم ) ونرجع وكفايه علينا التمثيل المشرف .. وكل كاس وكل تاهيل نقول معليش الماتش ده هارد لك بس الجاي هنوريهم واحنا محوشين اللعب الابيض لليوم الاسود وكما العاده بيخلص الفيلم على نهايته المعروفه ويتضح انه قصة مش مناظر ..

ياجماعه اشتروا دماغكم من الكورة وسنين الكوره حرقة دم على الفاضي .. في كؤوس افريقيا بتكسب عشان في قنوات بتدفع زي الـ ART الي كان لها شغل جامد اوي في تحميس الناس على مظاهر احتفالات الفوز الاخير وزعت اعلام واجرت عربيات ونزلت كاميرات تصور .. مهو اكل عيشها بقى .. لكن في مباريات هامة زي كأس العالم او تصفياته مين هيدفع للبشوات عشان تلعب حلو ؟ بل ومين يضمن ان الماتش مش متباع اساسا .. انا مشفتش الماتش ولا اعرف اللعيبه لعبت ازاي لكن طالما الهزيمه ساحقة اوي كده زي ماسمعت منكم فحاجة م الاثنين اما الناس دي مبتعرفش تلعب اساسا بس فازت قبل كده ازاي؟ او انها عارفه بس بتستهبل طيب لمصلحة مين؟

وعشان كده بقولكم بلاش توجعوا راسكم بالكورة وسنين الكوره واشتروا دماغكم زيي كده

ايوه انا كنت داخله هنا ليه صحيح؟

افتكرت

زوجي بيسلم عليكم وبيسأل لو سمحتم يااخوانا الماتش الجاي هيبقى امتى والساعه كام عشان يروح يسنتر في كافيه مصريين بيعرضه عشان مشافش الماتش ده :P

[شرف الدين]

بسم الله الرحمن الرحيم

د / هشام إبراهيم

مصر محتاجة حارس مرمى وخط دفاع كامل واتنين جداد في نص الملعب بالإضافة إلى راس حربة جديد ...

الأخ / التونسي

بس فعلا شئ يجن وعلامة استفهام كبيره.. الوصيف واللى كان الاقرب للدورى لولا ريشه

هذا الكلام عندما يصدر من المثقفين هو اللي يجن ... ( لولا ريشة ) هذا الكلام هو الذي يسكب البنزين على النار ... الهدف الثاني أمس لاعب الجزاير دفع هاني سعيد ... زي كورة أبو تريكة في الطلائع تماما ... والحكم محسبش حاجة ...

مفبش ولا لاعب منه يصلح للمنتخب

مش شغلنا ... ده شغل المدرب ... انما انا بشجع المنتخب ... أيا كان قوامه .. زي ما بشجع الأهلي أيا كان قوامه.

انت كان حيبقى شعورك ابه لو الاهلى مفيش ولا لاعب منه لعب امبارح

كنت هبقى زعلان على مستوى لعيبة الأهلي الوحش اللي ميخليش ولا واحد فيهم يلعب لمنتخب مصر ... مش هزعل من مدرب منتخب مصر ( وبالتالي هكون ناقم على منتخب مصر ) عشان ملعبش واحد منهم ..

وبعدين حضرتك فاكر ماتش الجزاير في القاهرة اللي انتهى 5/2

الماتش ده ما كانش فيه ولا لعيب من الأهلي .. يمكن حتى أول ما شفت التشكيل كنت بتفرج مع واحد زميلي وقلت له ساعتها ... الماتش ده هيدخل التاريخ .. لأول مرة في تاريخ منتخب مصر تقريبا .. ميبقاش في ولا لعيب من الأهلي .. وكلنا شجعنا المنتخب ساعتها وفرحنا لما المنتخب فاز ...

الأخ / adrianocrespo

ايه العلاقه بس يا استاذ شرف الدين

ميدو و حسام غالي و محمد شوقي و زيدان لبسوا قبل كده فانلات لانديه عليها اعلانات لشركات قمار و مراهنات في اوروبا

اشمعني الحضري اللي بتحاسبوه علي الاعلان

أولا أنا لا أحاسب الحضري ... والله العظيم كنت أتمنى إن ربنا يوفقه امبارح ... لكن بالمنطق كده ... حضرتك ذكرت أسماء ميدو وحسام غالي ومحمد شوقي وزيدان ...

مين في دول له تاريخ مع المنتخب ؟؟!! زيدان حتى لم نعرفه مع المنتخب إلا في بطولة أمم إفريقيا اللي فاتت ...

وبعدين حضرتك فاكر مشهد الحضري لما كان بيسجد بعد كل هدف لمنتخب مصر .. تفتكر هو بيسجد ليه ... للشو بس ... ولا شكر لربنا بجد .. لو شكر لربنا .. يبقى أنا أشكر ربنا من جهة ... واعلق إعلان خمور من جهة تانية ...

ومش دي بس كانت النقطة اللي مخوفاني من الحضري ... إنما كان مخوفني بصورة أكبر جملة " هلعب لمنتخب مصر غصب عن عين التخين " لما حارس مرمى أو لاعب يقول الكلام ده ومحدش حتى يقوله كده غلط عيب ... يبقى سيادتك متوقع ايه ..

ده اللي كان مخوفني .. وده اللي حسسني إننا ممكن نخسر ... وأنا قبل الماتش اتكلمت مع واحد زميلي وقلت انا خايف ربنا يستر من الحضري عشان الجملة دي.

الحارس يتحمل مسئوليه الهدف الثاني و جزء من الاول

الحضري يتحمل 50% من مسؤولية الهدف الأول ... و90% من مسؤولية الهدف الثاني .. وكذا 90% من مسؤولية الهدف الثالث...

في ماتش الأهلي والزمالك ... الموسم قبل الماضي الدور الأول لما الأهلي كسب بهدف محمد أبو تريكة ( لما رقص عبد المنصف تانجو على رأي المستكاوي ) .. في الماتش ده في الشوط الثاني جمال حمزة شاط على الحضري كورة تشبه تماما كورة الهدف الأول .. بس كانت أصعب لأنها كانت عالية في زاوية .. وساعتها الحضري صدها ... وعلاء صادق اتكلم عنها في هنا القاهرة باعتبارها واحدة من أحسن إنقاذات الموسم .. وطبعا حلل الجون .. لو تشوف ساعتها حركة الحضري مع حركة جمال حمزة من قبل ما يشوط الكورة اصلا .. تعرف إن حركة حارس المرمى هي بنسبة كبيرة اللي بتمكنه من صد الكور اللي بتتشاط عليه ... تقدر تقولي فين حركة عصام امبارح في الكورة .. فضل واقف في مكانه لحد ما الكورة اتشاطت عليه .. ده حتى مفروض ان الحارس في الكور البعيدة دي بيكون خارج مرماه على خد الستة عشان يقابل الكورة بدري ... قبل ما تبعد في زاوية من الزوايا .. ولا حاجة من الكلام ده ... فضل الحضري واقف في مكانه لحد ما الكورة اتشاطت عليه ..

فاكر كده جون باتشوكا التاني في مرمى أمير عبد الحميد ... كلنا قلنا أمير غلطان .. مع أن الكورة ثابتة وسريعة وملعوبة في أقصى الزاوية .. بس قلنا إنه غلطان لأن حركته جوه المرمى مكنتش سريعة ...

أما بخصوص الجون التاني ... فانطباعي الوحيد عن الجون ده اني حسيت انه ضربة جزاء والحضري نشن على زاوية واترمى فيها .. والاعب حط الكورة في الزاوية التانية ... لحد دلوقتي مش قادر افهم .. الحضري ليه اترمى يمين. هي دي ضربة جزاء بنروح لها بالتوقع .. قارن بين الحضري ده والحضري اللي صد ضربة الرأس بتاعة دروجبا ... تعرف الفارق.

أما الجون التالت ... الحضري فضل واقف وده تصرف ممتاز .. لأن طول ما هو واقف وخصوصا لو المهاجم جاي من أقصى الجنب .. بيفضل قافل عليه الزاوية .. استنى لحد ما اللعيب قرب منه .. وبعدين رمى نفسه على الأرض قبل الكورة تتلعب أصلا ... ففتح المرمى للمهاجم ... وكأنه بيقوله اتفضل حط جون. عشان كده لعيب الجزاير لم يجد أي صعوبة في وضع الكورة في المرمى ...

قارن كده بين وضع الحضري في الجون ده ... ووضع محمد صبحي في تعامله مع انفراد احمد فتحي في ماتش نهائي الدوري ... مع إنه في حالة صبحي كانت اصعب لأن أحمد فتحي جاي في وشه .. صبحي فضل واقف قافل على فتحي زاوية اللعب ... لحد ما فتحي شاط ساعتها صبحي اترمى عشان كده صدها برجليه ... هو ده التصرف السليم.

ده غير إن الحضري هو كمان مسؤول بنسبة كبيرة عن هدف مباراة زامبيا.

في الآخر بخصوص وضع الفريق ...

أنا دائما لا أفقد الأمل إطلاقا ... حتى آخر فانية ... وفي ماتش الأهلي والطلائع لم أفقد الأمل لحظة واحدة ... وفي هذه التصفيات لن أفقد الأمل أيضا ...

فقط يجب على المعلم ... أن يعلم جيدا .. أن

1- عصام الحضري لازم يكون له بديل .. ساعتها ممكن يرجع لمستواه .. وكلنا نتذكر إن عصام لم يتطور مستواه بالشكل الهايل ده الا بعد ما الأهلي جاب نادر السيد .. ساعتها الحضري حس بالخطر ... ولازم الحضري يحس إن مكانه في مرمى المنتخب مش حكر عليه ... وإنه ممكن يخرج .

2- خط الدفاع .. وائل جمعة كبر خلاص وبجد كفاية عليه كده سواء في الأهلي أو المنتخب . اعتقد شريف عبد الفضيل مع بعض الثقة والاهتمام ممكن يكون احسن منه. وكذا هاني سعيد محتاج إعادة تركيز شوية ... باختصار خط دفاع جديد كامل.

3- بلاش تدليع في الحرس القديم ... ايه لازمة شوقي انه يلعب امبارح وهو من حوالي شهرين لم يلمس الكرة في فريقه الهابط اصلا. وكذا عمرو زكي.

على العموم منتخبنا محتاج يكسب المباريات القادمة كلها .. مع ضرورة الفوز على الجزاير فارق 3 أهداف على الأقل أو 2 صفر ... ومين عالم يمكن جون أبو تريكة الشرفي ده .. يكون السبب ( بعد توفيق ربنا طبعا ) في دخولنا كاس العالم.

والسلام عليكم ورحمة الله وبركاته

[dawn walker]

ضيعنا منتخبنا بالحوارات الفاشلة عن الاهلى والزمالك والاسماعيلى والدورى العقيم اللى بيضحكوا عليه بينا

وقنوات رياضية مضيعه وقتها على الزمالك ومرتضى والخرف بتاع الالتراس وناسيين المنتخب

[mandoo]

مش قادر أتكلم :P

مش قادر أعلق -_-

مش قادر أوصف :P

مش قادر أتذكر md2:

مش شايف حاجة :P

إنت فين يا سين سين :P

[mandoo]

ليلة سودا

عمو عمو مافيش ألوان تانية :P

[سكر]

الحقيقة يا جماعة انخفاض مستوى النادى الاهلى هو السبب الرئيسى فى الى بيحصل دة

وشحاتة مع بعض المجهود كان بقطف زهرة جوزية

لما كنا بنكسب فى 2006 و2008 كان النادى الاهلى فى قمة اللياقة

دة مش تحيذ للنادى الاهلى لكن حقيقة يجب الاعتراف بها

وكنت بقول لما المنتخب حلو كدة عشان الاهلى كويس امال

لو الزمالك والاسماعيلى شدوا حيلهم وبطلوا لعب العيال المنتخب هيكون شكله اية

ملاحظه:الاهلى خرج من بطولتبن فى اقل من شهر

مش مهم عندى الاهلى هو دعامة المنتخب او الزمالك هو دعامة المنتخب

المهم ان الناس تعرف ان المنتخب هو الشكل النهائى الدولى للعب المحلى

احتراف المصرريين فى الخارج خطاء فنى كبير تقع فيه كل الاندية

لان الاحتراف مش توقيع قعد وقبض فلوس واقعد على دكة الاحتياطى

انت تلعب فى نادى درجة تالتة احسن من درجة اولى على الاحتياطى

محمد شوقى & حسنى عبد الربه&وائل جمعة&عصام الحضرى&عمر زكى

لاعيبة احترفت على الورق ولم يضيف الاحتراف للمنتخب اى جديد و لهم غير الفلوس

وكل لاعيب بيكون له اهداف فى حياتة زى اى حد

ولو طالبت من انسان مجهود فى نقطة خلاص هو شبع منها يبقى انتى بتنفخ فى قربه مقطوعة

لازم المنافسة ترجع فى المنتخب وكل احد يعرف ان المنتخب مش بالحجز

[شرف الدين]

بسم الله الرحمن الرحيم

الأخ / ataamer

وشحاتة مع بعض المجهود كان بقطف زهرة جوزية

خايف والله اقول كده يتهموني بالتعصب.

هو كان جوزيه مظبط لعيبة الأهلي ... وهما عماد المنتخب الرئيسي ... مع كمان اتنين او تلاتة متميزين من الفرق التانية مع بعض المحترفين ... ومع إخلاص واجتهاد حسن شحاته ... وهو فعلا مخلص ومجتهد ... وعشان كده ربنا كان بيوفقه ... كانت الانتصارات اللي فاتت دي كلها.

والنهاردة على الفضائية المذيع سأل علاء نبيل ... هل في علاقة ما بين ثلاثية سانتوس وثلاثية الجزائر ؟؟

على العموم الأمور لم تنته بعد ... لكن حسن شحاته لازم يغير في الفريق

فين محمد حمص في نص الملعب ... على الأقل بيشوط كويس ... وبيرفع اوفر كويس

فين محمد صبحي ... والله احسن من الحضري ..

المشكلة الكبيرة في نقص المهاجمين ... الأهلي مفيش عنده مهاجمين ... ومحمد طلعت لسه مستواه مظهرش عشان نقول أنه يصلح للمنتخب ...

الزمالك شرحه ... معندوش مهاجمين اصلا

الإسماعيلي شرحه ... ابو جريشة مستواه مش لعيب دولي ...

الوحيد اللي فيه الرمق هو احمد عبد الغني بتاع الحرس .. بيلعب فاولات كويس وجسمه قوي وطويل وضربات رأس كويسة ... باختصار مهاجم متكامل.

وللأسف بسبب غباء جهاز منتخبنا جاله تسمم امبارح.

امبارح ادركت بجد ومن غير والله العظيم أي تحيز ... إن إدارة الأهلي هي فعلا أعظم إدارة في مصر ...

الأهلي لما بيسافر أي بلد في مباراة مهمة بياخد أكله كله معاه ... وبياخد معاه طباخ كمان

انما منتخبنا رايح ياكل كسكسي.

والسلام

[الحازم حسن]

على فكرة الجزائر برده مش هتصعد

اصل ده فيلم عربي قديم حنفضل نخبط في بعض وزامبيا هيه اللي حتضحك في الآخر

حسابياً وليس منطقياً لسه فيه أمل بشرط انك تكسب زامبيا في زامبيا

[Abu Reem]

أولاً :

أحيي الأخ شرف الدين لأنه بدأ يتحدث في أشياء مهمة وبطريقة منظمة تجعل من الممكن أن يكون هناك فائدة من هذا النقاش.

ثانياً : أحب ان أقول رغم كل اعتراضنا على أن اللاعب الفلاني لعب ليه أو اللاعب العلاني ملعبش ليه أحب ألفت النظر إلى مسألة مهمة وهي أنه رغم وجود لاعبين لا يجب أن يكونوا في المنتخب إلا أننا لابد أن نسأل سؤال مهم

( لماذا أدينا شوط أول جيد جدا بهؤلاء اللاعبين مقارنة بلقاءات لنا عديدة خارج أرضنا لم نؤدي فيها بهذا التوازن ولم تكن هناك أي فرصة حقيقة للجزائر طوال هذا الشوط بل كانت الهجمات الخطرة والسريعة من نصيب فريقنا وخصوصا هجمات أبو تريكة وزيدان؟؟؟

إذن لابد أن نجاوب على هذا السؤال فلد لعبنا شوط لم نجعل فيه الجزائر تمتلك الكرة أو تهدد المرمى رغم وجود اللاعبين الذين أعترضنا على مستواهم ( مثل هاني سعيد ، وشوقي ، والحضري ، وزكي )

إذن رغم اللاعبين الذين وصفناهم بأنهم خارج المستوى إلا أننا تلاعبنا بالجزائر وامتلكنا الكرة وحققنا هجمات مرتدة خطيرة ببعض التوفيق كان من الممكن أن نخرج متقدمين .....إذن المسألة مش مسألة عدم صلاحية بعض اللاعبين.

- النقطة الثانية:

- نفس اللاعبين بدأوا الشوط الثاني ، وبصراحة لم يكن أمام شحاته بدائل لكي يغير من التشكيل الذي حاز على رضانا في الشوط الأول وكان من المنطقي أن يبدأ به الشوط الثاني على أساس أنه من الممكن في الشوط الثاني ومع اندفاع الجزائر وهدوء أعصابنا بسبب مرور الوقت الذي يؤثر على الجزائر أن نستطيع في خطف هدف أو على الأقل خروج المباراة بالتعادل.

إذن التغير لم يكن وارد ولا منطقي في بداية الشوط الثاني ، إذن ماذا حدث؟؟؟؟

- ( الإجاية في وجهة نظري ) اننا دائما عندما نشعر بان المباراة أصبحت سهلة وفي متناول إيدينا أن نتراخى ونلعب بدون حمية ولا قوة ونكتفي بلعب ( المعلمة والكبتنة وشغل الأرنات ) ولذلك لا تجد إشتراك قوي ولا زحلقة لقطع الكرة ، ولا حماس ...

----هذا ما تسبب في خسارتنا بالدرجة الأولى ----

- من سيقول مثل بعض الصحفيين قلة اللياقة البدنية أقول له : أنظر إلى قوة الأداء في الدقائق الخمس الأخيرة والقوة في الالتحام والقدرة على استخلاص ومتابعة كل كرة سيعرف أن اللياقة كانت متوافرة بدليل هذا الأداء القوي والسرعة في أخر 10 دقائق.

- السبب الذي أراه أيضا أهم الأسباب دائما وأبدا في خسائرنا المفاجأة هو

( ضعف المهارات الأساسية للاعبين )

- راجعوا المباراة أو أي مباراة لمنتخب مصر ولاحظ الأتي

1- كم مرة نستطيع أن نرفع كرة صح سواء من الجانبين أو من الضربات الركنية ( ولا رفعة واحدة تصل على رأس لاعب مصري ) وشوفوا كم مرة زيدان يرفع الضربات الركنية وكلها في الأرض ، وفتحي ومعوض أما الرفعة بعيدة جدا أو في الأرض يعني لازم اللاعب ينط لها لتحت )

2- كم تسديدة بين الثلاث خشبات ( ولا واحدة باستثناء واحدة لأبو تريكة ) كل التسديدات خاصة من الفذ محمد شوقي إللي مش عارف احترف بامارة أيه بيشوط شوطة تضحك ناحية راية الكورنر. وحسني به عبد ربه كل تسديداته فوق العارض ( مبيعرفش يشوط لتحت ) الغريب أن هذه الأشياء بتكرر كل مباراة وعمرنا ما شوفنا الجهاز الفني بيدربهم على المهارات دي ( ليه لأنهم كباتن كبار )

- الملاحظة الأخطر أنه ولا مرة أترفعت كرة علينا من الاجناب واستطاع الدفاع ان يخرجها برأسه ( أنا لاحظت مباراة عمان وهذه المباراة بالذات ) ولا رفعة من الجانبين من المنافس نط عليها مدافع وطلعها ، والهدف الثاني كان بسبب هذه الغلطة وأيضا هدف زامبيا في المباراة الأولى.كفاية كده الأن عسى أن يقرأ هذا الكلام من يهمه الأمر ، ويحاولوا تصحيح هذه الأخطاء واستبعاد بعض اللاعبين الذين طالت أخطاؤهم وقل مستواهم،

اما الحضري وزكي رغم أخطاؤهم الفادحة لكن يشفع لهم أنها المرة الاولى ومن الممكن عودتهم لمستواهم

- اما هاني سعيد إللي لثاني مرة يتسبب في أخطاء فادحة خاصة في مباريات الجزائر ، ومحمد شوقي ، وحسني عبد ربه ، فاظن كفاية عليهم كده.

[الحازم حسن]

تماسكوا

[مصري أصيل]

طبعاً المبارة كانت صادمة للجميع و أعتقد أن جميع اللاعبين لم يؤدوا الواجب المطلوب منهم و لم أري لاعبي المنتخب المصري بهذا التراخي و في مباراة حساسة كهذه المبارة من قبل ... جميع اللاعبين كانوا سيئين الي أقصي درجة .. فلم أري الحضري بهذا السؤ من قبل و أيضاً زيدان و عمرو زكي و جميع خط الدفاع و شوقي الذي كان يلعب و كانه في مبارة كرة خماسية و حتي حسني عبد ربه و الذي كنت أري أن مستواه ثابت دائماً كان في غاية السؤ و خصوصاً في الشوط الثاني .

أنا أري أن الشحن المعنوي للاعبين في هذه الفترة ليس بالحجم الكافي و هو من العوامل الهامة التي كنا نتميز بها في مباريات سابقة و لم نعد نلعب بالروح القتالية التي كنا نلعب بها في مباريات كأس الأمم الأخيرة علي سبيل المثال .

أري أيضاً أن الفترة التي يتجمع فيها اللاعبين و المعسكرات المغلقة لا تكون بالقوة الكافية لتأهيل اللاعبين و إنسجامهم و زيادة لياقة اللاعبين و يكفي أن نعلم أن المنتخب الجزائري قام بعمل معسكر مغلق لمدة شهر في مرسيليا بفرنسا. و أعتقد أن هذه المعسكرات مهمة جداً بالنسبة للاعبين علي أن تكون معسكرات حقيقة.

لم يلعب المنتخب أي مباريات ودية مع فرق قوية و لا تعتبر المبارة الوحيدة التي لعبها منتخبنا مع الإمارات مجدية بل يجب أن يتم ترتيب مباريات قوية مع فرق أفريقية نستطيع فيها أن نجرب اللاعبين الجدد علي المنتخب و إختيار من يستطيع أن يتجانس مع لاعبي المنتخب القدامي و الا نجعل أول تجربة للاعب الجديد في مباراة لا تحتمل التجربة .

و أخيراً أنا لا أري أن الأمور قد خرجت من يد المنتخب المصري و علي العكس تماماً فأنا أري أن حظوظ منتخبنا تكاد تكون متساوية مع منتخب الجزائر و زامبيا و أننا قد بالغنا في التشاؤم الي حد كبير .

فالمنتخب المصري سيلعب المبارتين القادمتين علي أرضه و خارج أرضه مع رواندا و لا أظن أنه من الصعب علي المنتخب الفوز في كلتا المبارتين و هذا ما يجب أن يتم إن شاء الله. لأنه إن لم يوفقنا الله بالفوز في كلتا المبارتين فنحن خارج التصفيات.

أما المبارتين القادمتين للجزائر و زامبيا فسيستضيف كلاً منها الفريق الأخر أي أن نتيجة المبارتين ستحدد و بشكل كبير جداً ترتيب الفرق في المجموعة و ستكشف لمنتخب مصر ما سيفعله في الجولتين الأخيرتين مع زامبيا و الجزائر علي الترتيب .

أي أننا لو فزنا في مبارتي رواندا و تعادلت مثلاً الجزائر و زامبيا كلاً في ملعب الأخر فسيكون نصيب مصر من النقاط 7 و نصيب كلاً من الجزائر و زامبيا 6 نقاط و هذه هي النتيجة الأفضل بالنسبة لنا . و أيضاً إذا فاز كلاً منهم علي الفريق الأخر في أرضه و هذا وارد و منطقي أيضاً فستتساوي الثلاث فرق في النقاط أيضاً و في الحالتين السابقتين سيكفي مصر التعادل مع زامبيا في زامبيا و الفوز علي الجزائر في مصر .

أما في حالة فوز الجزائر علي زامبيا في الجزائر و تعادلها معها في زامبيا ففي هذه الحالة ستتساوي الجزائر مع مصر في النقاط و لا أدري ما هو القانون في هذه الحالة فهل سيكون الإحتكام لمجموع نتيجة المبارتين أولاً أم نسبة الأهداف أولاً .

أما أذا فازت زامبيا علي الجزائر في زامبيا وتعادلت معها في الجزائر فلا بديل غير الفوز علي زامبيا و الجزائر لضمان الـتأهل.

أما في حالة فوز الجزائر علي زامبيا في كلا المبارتين و هذا أعتقد أنه صعب جداً أو فوز زامبيا علي الجزائر في المبارتين و هذا أيضاً صعب جداً فلن يكون أمام المنتخب المصري الا الفوز في المبارتين الأخيرتين علي زامبيا و الجزائر.

و من هذا نري أن ترتيب المباريات في صالحناً و من خلال نتيجة المبارتين المتتاليتين للجزائر و زامبيا و أولهم يوم 20 الجاري ستكشف لمنتخب مصر ما يستطيع عمله خلال المبارتين التاليتين.

كنت أتمني أن يكون تأهلنا بأقدام لاعبينا و ليس إنتظار ما ستسفر عنه نتائج الفرق الأخري و الدخول في حزبة بيرما و لكن قدر الله و ما شاء فعل .

أنا لم أستطع أن أذكر من من اللاعبين خارج تشكيل المنتخب أفضل من اللاعبين الموجودين حالياً لأنني غير متابع للدوري المصري فقد أعتزلت الفرجة المحلية منذ فترة طويلة و عقبال ما أعتزل الفرجة الدولية أيضأ لأن الواحد كان هيجيلة سكتة دماغية من مباراة الأمس.

تقبلوا تحياتي

أبو كريم

تم تعديل 8 يونيو 2009 بواسطة مصري أصيل