إستفسار عن شركات التوظيف بالرياض؟

[المخنوق دائما]

حدثت مشاكل فى المصنع اللى بشتغل فيه وشكله كده على وشك التصفيه وتسريح الموظفين والعمال

وعشان كده بدأت أدور على شغل تانى زى اول ماجيت الرياض من 4 شهور

المهم ان فيه اكتر من واحد بينصحونى انى اقدم السى في بتاعى فى شركات توظيف وهما بيدورولى على شغل مقابل نسبه من الراتب وبيأكدولى ان الشركات دى بتوفر فرص عمل رائعه زى شركات التأمين وغيرها

يعنى مثلا لو الراتب 6000 ريال هما بياخدوا 2000 وهكذا

فياريت لو حد عنده اى فكره عن الموضوع ده يقوللى نظامه ايه؟ورأيه ايه؟

غير كده بقى لو حد يعرف ايه هى اشهر مواقع التوظيف على النت يقوللى عليها (غير المواقع المضروبه )

[jamalpody]

ربنا معاك

لكن اعتقد ان مكاتب التوظيف دي للسعوديين فقط

انت شكلك سنك صغير ......... ليه متحاولش تدور علي وظيفة مندوب مبيعات في اي شركة كبيرة بيكون مطلبهم الاساسي السن الصغير

وبيكون لك نسبة علي المبيعات في شكل عمولة وبونص وما الي ذلك

حاول تتابع الوسيلة والمبوبة وربنا ييسر لك الخير ان شاء الله

[ابو حودة]

مكاتب التوظيف المحترمة بتاخد نسبة من صاحب العمل فقط مش من الموظف

وانا اتعاملت معاهم كتير سواء هنا او في مصر بس للاسف مش معايا عناوين لكن ممكن تدخل على جوجل وتبحث عن شركات توظيف هتلاقي كتير بس ابعت السي في

وكل كام يوم تعمل تحديث حتى لو مكنتش هتضيف جديد لان طريقة البحث في الغالب بتتم بطريقة التاريخ الاحدث

كمان فيه مواقع مهنتي ، bayt ، Gulftalent

الخلاصة ما تدفعش فلوس لحد

وربنا يوفقنا جميعا ان شاء الله

[ابو حودة]

على فكرة مجرد ملاحظة

لو تقدر تغير اسمك من المخنوق دائما حيث اسمع بان لكل شخص من اسمه نصيب

وكذلك تفائلوا بالخير تجدوده

[المخنوق دائما]

شكرا للأخ جمال وللأخ أبو حوده على الرد

بالنسبه لشغلانة المندوب دى كانت قدامى اول ماجيت وكانت براتب حلو بس أهل الخبره قالولى خليك فى مهنتك (المحاسبه) أحسن عشان يبقالك سعر فى البلد فقلت خلاص خلينى محاسب لحد مانشوف!

أما عن إسمى(المخنوق دائما) فهو على سبيل الفكاهه والمرح ليس أكثر وعشان يبقى لايق على الصوره كمان

[doha]

سبحان الله نفس السؤال كان في بالي النهرده

جريده الوسيلة من وقت للتاني بيكون فيها اعلانات عن شركات توظيف بس معرفش ليه عندي شك انها للسعوديين فقط .. على كل حال ده رقم مكتب توظيف في وسيلة السبت الي فات

الافق الوطني للتوظيف

0541958575 - 4552256

جرب اتصل بيهم مش هتخسر حاجه .

وبالمناسبة الوسيلة المطبوعه على عكس وسيلة النت مليانه وظائف خاصه للمحاسبين فهل انت بتحمل نسخه مطبوعه منها من النت ولا بتكتفي بالاعلانات الي في الموقع نفسه؟ لو مش بتحمل المطبوعه انصحك تشوفها لان اعلاناتها ماشاء الله كتير خاصه للمحاسبين..

[المخنوق دائما]

فعلا جريدة الوسيله المطبوعه بيبقى فيها وظائف اكتر من الموجوده على الموقع بس مش عارف ليه أغلب الوظائف اللى بتبقى فيها بتبقى (سكه) يعنى مؤسسه تعبانه وراتب قليل ودوام طويل ونقل كفاله فورى يعنى مفيش فرصه لمعرفة المؤسسه جيدا

بصراحه الواحد عايز يدخل الشركات الكبيره بقى ويشتغل محاسب بجد مش مدخل بيانات وكلام الأونطه بتاع السعوديه ده

وعموما مشكوره يا أخت ضحى على الرد (كما هى عادتك)

وبالمناسبه كنت عايز اسألك سؤال رخم شويتين ؟؟؟

زوج حضرتك على ماأظن مهندس زراعى فكنت عايز اعرف هل اشتغل شغل كويس وفى مجاله وللا لأ عشان فيه واحد صاحبى مهندس زراعى برضه جاى قريب وعايز يعرف النظام؟

[doha]

بالعكس سؤالك مش رخم ابدا انا شخصيا بحب اسأل كل الناس الي سبقوني في وضع معين عشان تبقى الرؤيا واضحه قدامي ..

بالنسبة لزوجي فلسه مازال البحث عن عمل جاريا .. مفيش عمل لقيناه غير واحد نعرفه دلنا على عمل وقال جاهز وتبدأ الشغل من بكرا لكن كان في الباحه والراتب على 1500 ورفضنا طبعا بدون تفكير ..

اما ليه دائما ( نا ) الجمع في الحديث عن عمل زوجي حيث القرار جماعي بالقبول او الرفض فده لان وضعنا انا وزوجي خاص شويه ..

زوجي كان بيعمل في مصر في احدي الشركات وكان وضعه كويس جدا بس المشكلة كانت انه بيسافر لعمله ومش بنشوفه انا وبنتي غير ثلاث او اربع ايام كل شهر بيضيع نصفهم في المواصلات .. طبعا في البدايه كان الوضع ده عادي بس مع مرور السنين بقت الحكايه ( خنقة )

كان هدفنا الاساسي من سفر السعودية اننا نلاقي مكان يشتغل فيه زوجي بحيث نكون كلنا مع بعض في مكان واحد .. ميكونش مزرعه عشان دراسة البنت و ميكونش حته بعيده انا في مدينه وهو في مدينة ..

وبالتالي كو( نا ) ملقيناش شغل لغايه دلوقت فده لايعني ان البلد مفيهاش شغل للمهندسين الزراعيين وانما ده لان قد يكون الشغل موجود لكنه غير مناسب لظروفنا لان زي ماقلت لك احنا محتاجين حاجة تكون في نفس الرياض وعلى الجانب الاخر كمان يكون راتبها معقول لان ده شخص مسؤول عن اسره وبرضه مش لسه خريج جديد ..

وادينا بندور ودعواتك ..

بالنسبة لصاحبك الي ناوي ييجي فنصيحه زي مابيقولوا تعلم كمبيوتر وانجليزي قبل ماتيجي فانا بقولك تؤكد عليه انه ياخذ اكبر قدر ممكن من الدورات الزراعيه قبل ماييجي هنا وياريت ياخذ بيها شهادات .. فان كانت مصر بلد شهادات فالبلد دي بلد دورات بيقدسوا الشخص الي معاه شيء بعد البكالوريوس من تعليم مستمر سواء شهادات عليا وده اكيد له وضع تاني خالص او اضعف الايمان يكون مدعم نفسه بدورات في مجاله ..

ثاني حاجه لو صاحبك تنسيق حدائق ياريت لو يمارس التنسيق فعلا في اي مكان ولو ببلاش ويبقى معاه خبره خاصه في شبكات الري .. المجال ده لا تتصور مطلوب قد ايه هنا لكن المشكلة انه محتاج حد يكون خبرة جامده فيه .. ورواتبهم على مااسمع كويسه جدا

لو صاحبك بقى مفيش خبره وخريج جديد امره لله يعمل حسابه على الالف ونص الفين وييجي يقعد في اي مزرعه والسلام . هيلاقي بالكوم ..

بالنسبة بقى ليك وللوظائف في الوسيلة .. انت حط لنفسك حد معين من السعر لا تقبل باقل منه واتصل ولو قالوا لك مبلغ مش على مزاجك قولهم معطلكمش .. صدقني بتجيب نتيجة الحكايه دي وممكن تلاقيهم هم نفسهم بيتصلوا بيك ثاني وعارضين ضعف الي قالوه اولاني .. عادي الحياه هنا فصال ..

اما بالنسبة لحكايه نقل الكفالة فعادي اكيد الكل بيقولك نقل كفاله فوري قولهم ان شاء الله ووافق وروح وصدقني هم احرص منك على عدم نقل الكفاله لو انت مش مناسب .. يعني اظن اسبوع دوام في اي شركه كافي جدا لك تقرر تستمر معاهم ولا لأ .. ومتبقاش تنقل كفاله قبل اسبوع .. سهله دي مش كده؟

[المخنوق دائما]

طبعا (نـــــــــــا) الجمع فى كلامك دى بتدل على انك ذات رأى صائب وأن زوجك يشركك معه فى اتخاذ القرار لثقته برأيك وده شىء رائع

وبالنسبه لموضوع صاحبى ده المهندس الزراعى فهو لسه خريج جديد(ورور) وانا شخصيا بقيت بتخنق من اى وظيفه تطلب كمبيوتر ولغه وهى مش هتستخدمها(يعنى مهندس زراعى عايز لغه وكمبيوتر لييييييييه؟)

اما عن موضوع نقل الكفاله دى فطبعا اسبوع واحد مش كافى بالمره ده لازم على الأقل 3 أو 4 شهور

بس انا طبعا هحاول أظل على الكفاله الحره بقدر الامكان (وفيه ناس كتير كده)

[doha]

طبعا (نـــــــــــا) الجمع فى كلامك دى بتدل على انك ذات رأى صائب وأن زوجك يشركك معه فى اتخاذ القرار لثقته برأيك وده شىء رائع

وبالنسبه لموضوع صاحبى ده المهندس الزراعى فهو لسه خريج جديد(ورور) وانا شخصيا بقيت بتخنق من اى وظيفه تطلب كمبيوتر ولغه وهى مش هتستخدمها(يعنى مهندس زراعى عايز لغه وكمبيوتر لييييييييه؟)

اما عن موضوع نقل الكفاله دى فطبعا اسبوع واحد مش كافى بالمره ده لازم على الأقل 3 أو 4 شهور

بس انا طبعا هحاول أظل على الكفاله الحره بقدر الامكان (وفيه ناس كتير كده)

جزاك الله كل خير على كلامك ويارب اكون اهل ليه ..

بالنسبة لموضوع صاحبك فرغم انه مهندس زراعي الا اني انصحه وبشده يتعلم كمبيوتر وانجليزي حتى لو مش ناوي يشتغل بيهم .. اولا لان ده هيفتح له مجال شغل في الشركات الكبرى مش بس المزارع .. لو هيشتغل في مجال تنسيق الحدائق لازم كمبيوتر عشان مخططات التنسيق كلها دلوقت بالكمبيوتر زي رسومات الهندسه بالظبط .. برضه لو هيشتغل في مجال الاغذية بيحتاج كمبيوتر لو هيكون وظيفته مراقبة الجوده وماشابه .. ده من جهة

ومن جهة ثانية وده الاهم ان الخريجين النهرده نوعين .. النوع الي عارف كمبيوتر ولغه وده بيدل على ان الشخص ده ( بتاع علام ) يعني ( حرك ) وييجي منه .. والنوع الثاني الي هو نسخه من خريجين الف وتسعمائة وستين .. يادوب اخذ البكالريوس ولا عارف الالف من كوز الدره اصلا واخد شهادته بالعافيه .. النوع ده مبيتعلمش كمبيوتر ولا لغه ولا يحزنون وده آخره يمسك فاس ويعزق في الغيط ..

بالتاكيد مع الاحترام لكل من شال فاس لولاه مكانش اكلنا ولكن لو مسك فاسه بلا تعليم كان وفر علينا وعليه اكتر .. وطبعا انا مش بتكلم عن خريجي الكليات القداما انا بتكلم عن النهرده الي صعب اوي تلاقي شاب مش عارف كمبيوتر ولا لغه الا لو كان فيه ان ..

الخلاصه ..

خليه يتعلم كمبيوتر ولغه وسواقه حتى لو مش ناوي يشتغل بيهم لان الحكايه دي بالظبط زي الي بيغلف الشوكلاته بالورق وهو مش ناوي ياكله بس من غير الغلاف ده الشوكلاته مش هتنباع ..

بالنسبة لموضوع نقل الكفاله اكيد هي بتاخذ وقت بس قصدي انك تستخير وتوافق على اي شغلانه تشوف انها كويسه حتى لو طالبين نقل كفاله فوري وانت ماطل لك اسبوع ولا اثنين قبل ماتبدأ في اجراءات نقل الكفاله فعلا وفي خلال الاسبوعين دول هتكون الرؤيا اتضحت لك انك تكمل معاهم او تشوف غيرهم .

وعلى فكره بالنسبة للجماعه الموظفين الي زي حالاتنا مش الحرفيين فاحسن حاجه لهم الكفاله الي على مؤسسات مش الشغل الحر .. واكيد الاستخاره هي الاساس

لو قلبت في الي حوالك هت

[هشام عبد العزيز]

بالنسبة للاستاذ المحاسب اقترح ان تتابع اعلانات جمعية المحاسبين المصريين بالرياض في الخزان

حيث يرسل ايميل يومي للمشتركين بالجمعية ومسجلين ايمليهم بالوظائف المحاسبية المتاحة

وربنا يوفق ان شاء الله

---

مدام doha

المهندس الزراعي بالامكان المتابعة مع مهندس زراعي اسلام العوادلي وهو يعمل بشركة موفق الزراعية و له العديد من العلاقات بالشركات التى تطلب : مهندس موقع

وهو متواجد اسبوعيا بنادي المصريين بالرياض

[المخنوق دائما]

شكرا ليك يا أستاذ هشام ولكن ارجو التوضيح اكثر يعنى اروح الجمعيه دى وللا اكلمهم وللا ابعتلهم ايميل ؟؟؟

وهل تعرف حد اشتغل عن طريقها ؟وهل الوظائف اللى بتوفرها بتبقى كويسه وللا ايه؟

وبرضه بالنسبه للمهندس الزراعى اسلام العوادلى؟ كنت عايز اعرف ده مين ؟والواحد يقابله ازاى؟ وماهو نادى المصريين بالرياض؟

وأين يوجد؟

ومشكور على الرد...

[هشام عبد العزيز]

شكرا ليك يا أستاذ هشام ولكن ارجو التوضيح اكثر يعنى اروح الجمعيه دى وللا اكلمهم وللا ابعتلهم ايميل ؟؟؟

وهل تعرف حد اشتغل عن طريقها ؟وهل الوظائف اللى بتوفرها بتبقى كويسه وللا ايه؟

وبرضه بالنسبه للمهندس الزراعى اسلام العوادلى؟ كنت عايز اعرف ده مين ؟والواحد يقابله ازاى؟ وماهو نادى المصريين بالرياض؟

وأين يوجد؟

ومشكور على الرد...

هو مجهود تطوعي من القائمين علي جمعية التجاريين بالقيام بتجميع كافة الوظائف المعروضة في في الجرائد السعودية و ارسالها بالايميل للاعضاء

و الاتصال شخصي من قبل طالبي الوظائف بالشركات

ينحصر دور الجمعية في تجميع الوظائف و ارسالها

ارسلي ايميلك كى ارسله اليهم ليتمكنوا من مراسلتك

---

نادي المصريين هو نادي للمصريين يقوم بانشطة رياضية و اجتماعية وفنية و ثقافية يوم الجمعة فقط لا غير في استراحة ثابتة في السلي

يوجد ملعب كرة قدم كبير

2 حمام سباحة واحد للرجال وواحد للنساء

عدة ترابيزات تنس طاولة

بيبي فوت للابناء

ملعب كرة طائرة

مدرسة تعلم سباحة للابناء

مدرسلة كارتية

مدرسة كرة قدم

كما يوجد رحلات عمرة و المدينة و الدمام ... للاعضاء .

الاشتراك 100 في السنة

رسم دخول 20 ريال للاسرة

10 ريال للفرد

ويتم عمل مشروبات مصرية بشكل دائم مجانا في النادي

والمهندس اسلام احد اعضاء النادي المتواجدين كل اسبوع في النادي تقريبا

[alex man]

الاخ هشام

معلش انا مشترك فى الجمعية ولم ارى اى اعلان عن وظائف وعلى فكرة انا مواظب جدا فى حضور الجمعية ولم يرسل لى احد اى ايميل

ثانيا فين موقع النادى فى السلى كبير جدا

ثالثا الاخ المخنوق دائما ارسل لى السى بتاعك او اتصل على رقمى هذا 0508016890 وان شاء الله تشتغل انا عندى عاوزين محاسبين

[المخنوق دائما]

الاخ هشام أرسل لى مشكورا بعض اعلانات عن طريق الجمعيه وهى ليست للمحاسبين بس

وعموما ده رابط السى فى بتاعى

http://arabsh.com/0d4xptd07cny.html

تم تعديل 18 يونيو 2009 بواسطة المخنوق دائما

[alex man]

انت كسلان تبع السى فى

الرابط لا يشتغل ابعته على الايميل

[المخنوق دائما]

هوه انا كنت شوفت ايميل ومبعتش ؟؟؟ bv:-

خلاص بقيت كسلان؟؟؟؟ :rolleyes:

bv:-

تم تعديل 18 يونيو 2009 بواسطة المخنوق دائما

[المخنوق دائما]

[alex man]

انا ارسلتلك رسالة على البريد الخاص ياريت تكون وصلت

[المخنوق دائما]

الرساله وصلت