ياكلوا حلاوه ياكلوا جاتوه

[فــيــروز]

بداية ينبغى ان اقر و اعترف انى لا اعرف سعر كيلو اللحم هذه الايام

الا انى اعرف ان هناك كثيرون فى مصر لا ياكلون اللحم سوى فى العيد او فى رمضان

لهذا كان غيظى كبيرا وانا اتابع برنامج حديث المدينه بالامس و المذيع يحاور احد البسطاء قائلا :

اذا لم نكن نستطيع شراء اللحم فلنستغن عنه

ولان الرجل من البسطاء فقد ظن ان المذيع ينصحه بالبديل فما كان منه الا ان رد قائلا:

ولكن الفراخ غاليه !! و كذلك السمك !!

فاضطر المذيع ان يشرح الموضوع على بلاطه و ينصح المواطن انه .. بلاش خالص !!

ليس هذا فقط ولكنه قال بكل بساطه : اذا كان الفرد منا يشرب فى اليوم عشرة اكواب من الشاى فليقللها الى اربعه فقط !!

ولا ادرى هل هذا المذيع من بلدنا ولا منين !! فى الماضى حين كنت ابدى تعجبى من ان كثيرين من اهل ابى من الصعيد يشربون الشاى بكثره كانت امى تقول : ان كثيرين من هؤلاء يعد كوب الشاى بالنسبة لهم هو ما يحلون به بعد تناول الاكل .. فليس متاح لهم طبق فاكهه وليس لديهم سوى كوب الشاى !! واعتقد ان الحال هو الحال ان لم يكن قد تغير الى الاسوا .. ومن الظلم البين ان نطالب المواطنين بالتقشف و الاستغناء و الحكومه تضرب اروع الامثال فى السفه و التبذير .. خاصة اذا علمنا ان ما يتناوله المواطن الافريقى او الآسيوى من سعرات حراريه يقل كثيرا عما يتناوله نظيره الاوربى ..

وفى الحقيقه حلقة الامس من حديث المدينه لم تخل من كثير من الطرائف

فاحد المواطنين يذكر اسمه بالكامل و عنوانه وحين يمزح معه مفيد فوزى قائلا : انا مش هاعمل لك رقم قومى يا حاج

يرد الحاج باسما : عشان لو قلت كلمه غلط تعرفوا "......."

الحقيقه انا انفجرت فى الضحك من رد الفعل التلقائى السريع :-)

وحين تحدث مفيد مع الحاج عن رغيف العيش وكيف ان كثيرين يرمونه للبط و الفراخ !! اجابه الحاج بكل بساطه :

اذا كان الرغيف الذى دفعنا ثمنه من جيوبنا لا يصلح للبنى آدمين فلا اقل من القائه للفراخ حتى نستفيد به !! هل نرجعه للمخبز و نسترد نقودنا؟ فما كان من الاعلامى الحر الا ان قطع الحوار عند هذا الحد !!

وحيث انى لم استطع ان اتحمل اكثر خاصة حين بدات وصلة النفاق المعتاده بمناسبة عيد الجلوس على العرش قلبت على قناة النايل تى فى : لاجد برنامج يتحدث عن هجرة النوابغ المصريين للخارج .. و كيف ان احد شباب المهاجرين حين خرج عن الخط المتوقع -البرنامج كان على الهواء- اجابه المذيع المثقف : رايك لا يمثل الاغلبيه !! بينما انبسطت اساريره بعد اتصال هاتفى من شاب آخر يقول انه لا يستطيع ان يترك مصر لارتباطه العاطفى بها !! طيب من قال ان هذا هو راى الاغلبيه يا سيادة البيه المذيع؟

وكان الصادم ان المذيع الذى يتحدث لغات قال لاحدى السيدات التى تدرس بالجامعه الامريكيه :

محدش فى مصر بيبات من غير عشا !!

وضعت يدى على قلبى خوفا من ان تؤمن السيده على كلامه الا انها ضحكت قائله :

لا يا سيدى هناك فقر و فقر متزايد .. نحن دائما ما نقول هذه الجمله ولكن هناك فقر كبير

وصفقت قائله تحيا امريكا وتسقط الطبطبه وشغل المصاطب .. هى دى جمله تتقال فى برنامج جاد يا جدعان !!

[wa7d]

محدش فى مصر بيبات من غير عشا !!

هو قصده ماحدش فى مصر بيبات من غير صلاة العشا . ويدعى على الحراميه والظلمه .

لو المذيع لم يفعل ذلك التهريج سوف يفصل ويدخل هو أيضا مع الذين لايباتون من غير صلاة العشا .

على العموم اللحمة ثبت أنها مضرة وبها أمراض كثيره أقلها Mad cow .

شيفه بأه الحكومه بتحب الشعب إزاى . أصل بفكر أرجع مصر فبدرب نفسى :wub:

[Salwa]

ياست فيروز هانم.

على بختى اللى يعلم بيه ربنا..بالذات مع الفضائية المصرية..

شفت البيه المذيع اللوذعى.ـ . مش بيقولوا كدة برضه.؟ والا الجهبذ؟

فضل يتكلم على الحرية والديمقراطية..وايه رأيك؟؟انت بقى من جيل

عبد الناصر..خلاص انت كدة قلت كل حاجة..

ويقول له..قول متخافش؟؟ فيه حرية رأى.

ولما يقول له مفيش مياه جارية فى قرية كذا وكذا وكذا.

يرد عليه..شفت اهو انت قلت رأيك..والوزير معرفش مين سليمان..سامع

وبعدين؟؟ يروح يقابل واحد تانى..ـ. ماسح جو خ ـ. يقول له لألأ فيه

كل حاجة وكله تمام..

يقول له..هم اولادك حايروحوا مدارس ؟؟ الرجل يقول طبعا على الأقل

يتعلموا اللى انا متعلمتهوش...يرد يقول له..لالا..طيب وليه ميطلعوش فلاحين زيك..

انا كنت بكلم نفسى بكل اللغات..الحية ..والميتة.

حد عمره سمع صوت لغة ميتة؟؟؟ اهو انا امبارح..بين اللى قرأته وبين

اللى شفته.

بقيت ادعى عليهم..بالعربى..واللاتينى..والهيروغليفى.

دول مصممين..يعطوا الشعب ...كبسولات منع الفهم.

ايه ده؟

هى الناس دى مش بتتعب من الضحكة الصفراء.

انا كنت حاسة...انه بيطلع لنا لسانه...وبيقول.ان مكنتش افرسكم؟

وفعلا..فرسنى.

وقفلت التلفزيون.

سلامى.

[فــيــروز]

لو المذيع لم يفعل ذلك التهريج سوف يفصل ويدخل هو أيضا مع الذين لايباتون من غير صلاة العشا .

على العموم اللحمة ثبت أنها مضرة وبها أمراض كثيره أقلها Mad cow .

شيفه بأه الحكومه بتحب الشعب إزاى . أصل بفكر أرجع مصر فبدرب نفسى

جايز بردو

لكن القاسم المشترك بين البرنامجين هو استسهال اعطاء نصائح او آراء غير علميه او منطقيه بالمره

فالشعب فقير و جائع ويعانى سوء تغذيه اصلا و ليس من العدل ان نجرده تدريجيا مما ياكل بدعوى الاستغناء

حتى الفول المدمس ارتفعت اسعاره لياتى من يقول ببساطه : بلاش تاكلوا !! وحتى حين اشار احد المتحاورين وكان من قرية ما الى ان مسئولية الظروف الاقتصاديه الصعبه التى نعيشها مقسمه بين الشعب و الحكومه طلب مفيد ان يسمع فقط دور الشعب !! ده اسمه استهبال ولا ايه ده !!

والتانى اللى بيذيع على قناه مفترض انها دوليه يقول لاستاذه فى الدراسات الاجتماعيه على ما اذكر "محدش بيبات من غير عشا" سابوا ايه بقى للنسوان فى الحاره !! لامؤاخذه يعنى

:wub: :wub:

[فــيــروز]

والله يا مدام سلوى انا فعلا مش باتحمل اتفرج عليه

بس من قلة بقى هنعمل ايه ماكانش فيه حاجه غيره ساعتها ممكن اتفرج عليها

ولا الراجل اللى كان بيتكلم عن الشيشه و التدخين و يقارن بين اضرار كلا منهما

اللى فاتح فى لاظوغلى ده

كان ماشى كويس جدا و عال العال وفجاه ابتدا ينافق و يهلل و يقول الريس تعبان الريس هلكان !! طيب يا سيدنا ما اللى تعبان من حاجه يسيبها ده غلب ايه ده بس يا ربى !!

وبعدين السيد مفيد فوزى يطالب بترشيد شرب الشاى و الامتناع عن اكل البروتين الحيوانى لم لم يطالب الحكومه بوقف تصنيع السجائر و المعسل؟ ولا هو فالح بس يروح يتنطط على القهوجى !!

فعلا انا كمان اتفرست ..

[se_ Elsyed]

كنت ناوي أكتب عن البرنامج بتاع أمبارح في توبيك " مفيديات " في باب الإعلام ..

فكما تعلمون يا سادة إن مفيد فوزي هو بلا فخر أحد رموز النفاق في البلد وصورة بالكربون من سموره العجيب... وقد شاهدت بضع لقاءات من برنامجه أمس علشان حبوب الضغط ماكنتش كفاية عندي والذي كان الهدف منه أن يبين أن ما يحدث الان في مصر هو منا نحن يعني بالبلدي زي ماقولت في احدى مداخلاتي قبل ذلك " إحنا ناس مش عارفه تتحكم " نجبلكوا حكومة منين يا رعاع تعبتونا معاكوا يالا إنكشحوا وسيبوا البلد خلوا البهوات اللي في الحكومة يعرفوا يعيشوا جتكوا القرف .

وقد ظل المستفيد فوزي ينصح كل من يشكو له من غلاء الأسعار بأن يترك اكل اللحمه والسمك والفراخ والعيش بس نسي يقولهم كلوا زلط ... وطبعاً كنت هاتصل به وأقول له ..... ما هو حتى توكيل الزلط اخدوا الباشا الكبير يا مفيد .....

[Cleo]

.....  ما هو حتى توكيل الزلط اخدوا الباشا الكبير يا مفيد .....

جوة الجون يا س س ....

(وش سنانه اتطرمت من مضغ الزلط)

[حشيش]

مفيد فوزى أحد أعمدة الفساد الإعلامى فى مصر شأنه فى ذلك شأن صفوت الشريف...يعنى سمير رجب فى الجمهورية ومفيد فوزى فى التليفزيون....الفضائية المصرية بدون مبالغة أصبحت أفقر فضائية عربية على الإطلاق من حيث نوعية وسخافة برامجها ومذيعيها وإمكانياتها التقنية......