أونتاريو ترحب بـ سوسو

[طبيبة مصرية]

دكتورة سوسو رانى

الف سلامة عليكى وان شاء الله تكونى اتحسنتى دلوقتى وترجعى تنورى التوبيك بتاعك بحكاياتك المشوقة واسلوبك اللطيف ...........

هارد لك لمنتخبنا

قدر الله وما شاء فعل.........

تم تعديل 18 نوفمبر 2009 بواسطة طبيبة مصرية

[SoSo R]

الف سلامة يا سوسو لية كدة بس !!!!!!!!!

خدى بالك من نفسك ...........وياريت تكونى نزلتى المستشفى وعملتى اللازم

ربنا معاكى ويحافظ عليكى

ميرسى يا جيسيكا قوى...مانزلتش مستشفى ولا نيلة..هاحكى دلوقتى على التفاصيل

الف سلامه علي صباعين سعادتك

بتوفري حتي في الاصابات وتكسري الصوابع بالجمله

يارب يقومو بالسلامه بسرعه

احسن مطلوب منك ردود كتير

مسيو نصار...أخيرا شرفتنى بالزيارة..

مش بوفر فى الأصابات ...هى بتيجى معايا كدة

إدعيلى ربنا يتم الشفاء

وبالراحة عليا فى موضوع الردود

الف سلامه عليكى يا سوسو وربنا يشفيكى بسرعه

الله يسلمك يا عنبى..متشكرة لذوقك

الف الف سلامه علكى يا سوسو

ايه يا بنتى مالك كده من نقره لدحديره

صوابعك ده ايه الى كسرها وقعت يعنى ولا ايه؟؟؟؟؟؟؟؟؟؟؟؟؟؟؟؟؟؟؟؟

خلى بالك من نفسك شويه علشانك انت والاولاد لوحدكم

ربنا معاكى وتخفى علطول ان شاء الله

تحياتى

بولا يا حبيبتى...أنتى بجد نعم الأخت بسؤالك المستمر عليا...ربنا يخليكى

ماتسيبك من كيبيك وتيجى تورنتو يا حبى bv:-

سلامتك سوسو

كدة سى تى اس وصوابعين مكسورين اية حكاية ايديكى يا بنتى :(

يالا ربنا يشفيكى ان شاء الله

نوجة ...حمدالله ع السلامة

أنا متمرطة يا بنتى ...أصبرى و أنتى هتشوفى بقية الأحداث

انا أستويت خلاص

الف سلامة عليكى يا دكتورة و ربنا يتم شفاءك قريب

المهم انت خلى بالك من نفسك و ما تستعجليش ع الكتابة

غير لما تخفى خالص

تحياتى

ميرسى يا شهاب قوى

بس إيه الوقار دة كله...مش متعودة منك على العقل دة bv:-

يعنى لازم يكون فى بطحة ...زلطة

بس بجد كلك ذوق

:) الف سلامة عليكى يا مدام سوسورانى

ميرسى يا فندم..الله يسلمك

تحياتى

سوسورانى

[SoSo R]

الف سلامه عليكى يا سوسورانى

ايه حكاية الحادثة دى

هو فى ميكروباس بيعدى عند البيت بتاعكوا ولا اية

انتى ساكن فى شارع احمد حلمى كندا ؟؟؟؟؟؟

حضرتك الحادثة جوه البيت مش بره..

وبعدين ما فيش ميكروباصات فى كندا :)

بس ألف شكر على ذوق حضرتك

انتي شغالة في شفخانه ؟؟؟ bv:-

مرة صباع رجل ومرة صباع ايد

الف سلامة عليكي

المفروض تتمنعي رسميا من دخول المطبخ

take care

صباع رجل إيه بس؟؟ bv:-

دة كان هزار من دكتور بركناديان...والمرة دى مش فى المطبخ خالص

أنت جيت كندا صحيح ولا لسه؟؟

الف سلااااااامه يا سوسوراني وترجعي تكتبلنا باديكي الاتنين

الله يسلمك يا دكتور...أدينا بنحاول...بس لسه ماخفتش 100%

سلامتك يا سوسو

لازم تخلي بالك من نفسك

انتي في الغربه مفيش حد ممكن يساعدك

قلبي معاكي bv:-

منورة يا مدام سعاد...وخدى راحتك مع جيسيكا بيتكم يا فندم

البهدلة بقى وأنا لوحدى مع البنات ومافيش مساعدة...كانت إكسترا الصراحة

سلامتك يا سوسو.....خدي بالك المرة الجاية

اخبار النتيجة ايه؟؟؟ عايزين نفرح شوية :roseop:

تسلمى يا سمسمة...

النتيجة تتبعت بالبريد يوم 17 ديسمبر يعنى هتوصل فى العشرينات من الشهر...ربك يسترها..

لحسن أنا مش ناقصة

الف سلامة دكتورة سوسو

الله يسلمك يا دكتور قناوى

Dra Soso

I wish u r ok now....however, it is not an excuse to stop writing...u still have 8 fingers working... :egyflag:

Get well soon....I wish u the best of health and happiness

Elshamy from London, Ontario

دكتور الشامى ميرسى لذوقك بجد...أدينى شغالة ببقية الصوابع...

بس مش راضيين يخفوا..مش عارفة ليه؟!!

سلامات دكتوره سوسو والله زعالنالك كتير شكلك محسوده يا دكتوره ارقي نفسك وديري علي حالك كتير

هاتحسد على إيه يا حسرة :egyflag:

متشكرة لدعواتك يا دكتورنا العزيز

الف الف حمدلله على سلامتك ياسوسو ..

ربنا يقرب الشفا ...ونحمد ربنا ان باقى لك ثمانية تانيين ..

مش برضه وضعوا لك جبيرة كندى ؟؟هههههه...بس بنضحك معاكى ياسوسو باشا .

تعيشى وتاخدى غيرها .

انتى بتتحججى علشان مش عايزة تكتبى كتيررر.

الف سلامة ياعسل ..

خللى بالك من البرد لان هو السبب فى سهولة كسر الاصابع ...تقوليش صوابع طباشير ؟؟ والا هى صوابع حلاوة ..

سلامتك مرة تانية .

ماما سلوى حبيبتى...

شفتى اللى جرالى!!!

البرد خلى الألم يزيد عليا قوى

انا أستويت يا ماما خلاص

سوسو راني حبيبتي الف سلامة على صوابعك

خدي بالك من نفسك وديري بالك على الباقيين

احنا مستين النتيجة عشان نبارك

أنت فين يا بنتى؟؟؟

مبروك على الفيزا ولو إنها متأخرة...بس معلهش غصبا عنى

[SoSo R]

مش عارف يا بنتي ليه إنتي دايماً الدنيا ملطشة معاكي كده بضمير! bv:-

يا رب يهوّنها عليكي بقى ، عشان كده إنتي بقت عيشتك مرة أوي! ولولا إني لا أؤمن بالحسدكنت قلتلك إنك محسودة! تكونش صاحبتك بتاعة الكويت دي نفسها تهاجر ، ومش عارفة؟! :hang:

بصي بقى... إحنا مش عاوزين نشوف لك أي مشاركات هنا خالص ، ممكن؟!

والشيطان عمّال يلعب في دماغي أنتشك إنذار على منع من المشاركة لمدة شهر ونص ، على ما صوابعك تلتئم

إيه رأيكوا يا اخواننا؟! موافقة؟! wst::

أنت عارف يا دكتور...

لأ طبعا ماتعرفش...... الدنيا لطشت لأى مرحلة

النتيجة الطبيعية للحاجة الساقعة إن السى تى إس أشتغل هو كمان...عشان يكمل عليا...

طبعا لأنى باعمل كل حاجة بإيد واحدة وبارهقها

ودة بأه ألمه أنيل من الصوابع...

يعنى الصراحة...حاجة زى الفل !!!

لأ أستنى...

ماخلصتش على كدة...

تتخيل إيه كمان...عشان فيلم البؤساء اللى أنا عايشاه يكمل؟؟

هه...تخيلت

لأ ...تخيل كمان

غولب حمارك؟!!!!

حضرتك...جالى سواين فلو ...بلا فخر

أنا بصراحة مش مصدقة إن كل دة ييجى مع بعضه فى أسبوع واحد!!!!

كأن مافيش حد فى البلد دى غيرى

وبكدة تكون أنشطتى من ساعة ماجيت البلد...

باذاكر و أمتحن و أعيا

يعنى عايزينها تبقى قاعده لوحدها فى كندا وصوابعها مكسره وكمان مش عايزينها تفضفض

لا بقى

انا مش موافق

تكتب حتى لو تكتب بالقلم المحشور فى الجبس اللى مغطى الصباعين bv:-

بس لو صوابعها واجعاها تبقى تاخد ادول

أدووووووووووول

وجاى على نفسك ليه يا دكتور إيهاب...

دة أنا بابلبع فى الفولتارين اللى جايباه معايا...وما فيش فايدة...

شكلها محتاجة ترامال

اصلا أنا عدت عليا ليالى كتيير مش بانام من الألم

حاجة غلب :egyflag:

ربنا معاكى ياسوسو ..والله ياحبيبتى انا حاسه بيكى وعارفه كويس المسئوليه الكبيره اللى على اكتافك وابو اولادك اللى بعيد عنكم ومكان جديد لا اهل ولا اصدقاء ..وعارفه فعلا انك عايشه ومش عايشه ..قلبى معاكى انا مش عارفه بيحسدوكى على ايه :)

المهم اجمدى بكره فرحة النجاح ح تهون عليكى شويه وتقرب البعيد ومين عارف يمكن مدام سميه ومدام ناويه وصفاء يبقوا جيرانك قريبا ..يارب ان شاء الله ح اجيبهم واجيلك

ا :egyflag:

صافى...أنا لسه باتعالج من دور الأنفلونزا وباخد تاميفلو...

مش عارفة هييجيلى إيه تانى bv:-

فألحقوا تعالوا بسرعة عشان ألحق أقابلكم...

قبل ما أودع

بيحسودونى على إيه ...مش عارفة؟؟

بس فيه ناس محترفة...تطلع حاجة تنؤ عليها

حتى لو بتخلصى قدامهم

تحياتى

سوسورانى

[SoSo R]

سلامتك يا دكتوره... يا رب تخفي بسرعه و ترجعي تنوري المنتدى أكتر من الأول...و ربنا معاكي في طلبات الولاد ... أصلي مجربه و عارفه إن أوحش حاجه إنو لما بتعب شويه ولادي بيتشردوا...ربنا يحفظكوا كلكوا :happy:

الله يخليكى يا فندم...

أنا مش عارفة أروح أعمل الأشعة عشان الأنفلونزا

فالولاد كدة ولا كدة متشردين

عادى يعنى

تكونش صاحبتك بتاعة الكويت دي نفسها تهاجر ، ومش عارفة؟! wst::

طبعا انت متقصدش توقع بينهم ولا حاجه :lol:

ما تقلقش يا مسيو نصار...شيرى حاسة بالغربة وهى فى الكويت ...وعايزة ترجع

بس اللى مانعها إنها شافت ناس رجعت ...وشاربين المر

كندا ...أو الهجرة مش فى خطتها نوهائى

وماتعرفش حاجة عن اللى حصلى...لأنها فى الحج حاليا

بعتت لى رسالة وهيا فى الباص بتاع الحملة

الف سلامة عليكى يا مدام سوسو

شدة و تزول ان شاء الله و ترجعيلنا بالسلامة

الله يسلمك يا فندم

اخيرا خلصت قراءه موضوعك كله من اول صفحه لاخر صفحه

الف سلامه ليكي يا سوسو وربنا يشفيكي ان شاء الله

عندي سؤال لما تقومي بالسلامه مستنيه ردك عليه

انا عايزه اعرف انطباعك بشكل عام عن الجو في كندا بالنسبه للعرب وخاصه لما تكون ست لوحدها مع بناتها

لاني في نفس موقفك وناويه اعمل زيك قريب

وقلقانه جدا من الخطوه دي لاني هضطر اروح اقعد شهور ويمكن سنين لوحدي مع البنات

والموضوع ده بحلم بيه احلام مرعبه

وشكرا جزيلا لكي علي موضوعك الجميل واسلوبك الفريد والممتع

ولا كوابيس ولا حاجة...

أنتظرى التفاصيل الجاية...

عشان تطمنى

وميرسى على الأطراء

دكتورة سوسو رانى

الف سلامة عليكى وان شاء الله تكونى اتحسنتى دلوقتى وترجعى تنورى التوبيك بتاعك بحكاياتك المشوقة واسلوبك اللطيف ...........

هارد لك لمنتخبنا

قدر الله وما شاء فعل.........

الله يسلمك يا فندم...

من ذوق حضرتك

تحياتى

سوسورانى

[SoSo R]

مساء الخير...

أنا هاحكى بالتفصيل اللى حصل وكل الأحداث بتاعة الفترة اللى فاتت بدون أى إضافة أو مبالغة ...مش بس إستكمالا لموضوع الأيام اللى بعيشها...ولكن هعتبره رد موجز ومختصر ..أو دفعة أمل وتشجيع لكل من:

اللى لسه بيعافر مع الأيلتس

اللى لسه بيشاور عقله يهاجر ولا لأ؟!!

كل السيدات اللى بيسألونى عن مدى الأمان لو هيقعدوا مع ولادهم فترة لوحدهم فى كندا

وتعليقى أنا هاقوله فى نهاية حكايتى....

بدأ الموضوع يوم الجمعة 13 نوفمبر سمعت إن الجمعة لما بييجى 13 بيكون نحس wst::

دة هو يوم الغسيل عندى ..المهم كنت شايلة حاجات كتير قوى و طالعة ع السلم لأن حجرة الغسيل مش جوة البيت...فاتنشكلت ووقعت...وسندت على إيدى ..صباعين بس رجعوا لورا قوى...المهم لقيت صباعى ورم بسرعة قوى ولونه اتغير...حطيته تحت المياه الساقعة...حسيت بألم فظيع...والدنيا إسودت وغبت عن الوعى لدقايق

ودة نتيجة الشوك اللى حصل من شدة الألم

طبعا إتحاملت على نفسى جدا ...لأنى بنتى الصغيرة معايا لوحدنا فى البيت...وما كنتش عارفة أتصرف ...خصوصا إن ميعاد رجوع مرمر من المدرسة كان قرب

المهم رحت أجيب مرمر من المدرسة وماقدرتش أحط جوانتى ...ودة زاد الطين بلة

عقبال ما وصلنا البيت ...كنت حاسة إن روحى بتتسحب منى...ألم فظيع...غير محتمل

وأبتدى تنفسى ما ينتظمش.....ودايخة ومش مضبوطة دخلت على السرير...

المهم إن جوزى إتصل ف مرمر بتقوله ماما تعبانة قوى...هو طبعا إتخض جدا وقالى طيب روحى على المستشفى ..طيب إتصلى بحد يوديكى...ما تسكتيش على نفسك...

المهم حوارات طويلة وأنا بابكى من شدة الألم...وهو عارف إن دماغى جزمة قديمة ومش هاعمل حاجة...لأن مبدأى دلوقتى هابقى كويسة...وهتخف لوحدها والكلام الخيبان دة

أصلى بصراحة دعاية سيئة جدا للمجال الطبى ولا بحب الدكاترة ولا أروحلهم ولا المستشفيات :happy: ...وغالبا بروح وانا بموت وباطلع فى الروح غير كدة لأ

طبعا هو كان هيتجنن منى ...وخصوصا إنى لوحدى مع البنات...فراح قالى كلمى 911

قلتله هاكلمهم عشان صباع...

هيعملولك إيه؟؟؟هيسجنوكى مثلا؟!!

ما أنتى معاكى أطفال...وماينفعش تسوقى و أنتى بالحالة دى..عايزة تعملى حادثة؟؟

برضه مناقشات وحوارات....طويلة لحد ماقال لى جملة مافتحتش بقى بعدها

قال لى أنتى ليه مش عايزة تحسى بالنعمة اللى أنتى فيها...عيشى مزايا البلد...اومال إحنا عاملين كل دة ليه؟؟ وكل واحد فينا قاعد فى حتة؟!!

بطل تفكرى بفكر الشرق الأوسط!!

إتصلت فعلا ب911...رد واحد..إسعاف ولا مطافى؟؟؟

حكيت له بإختصار...رد عليا يعنى إسعاف..هيجولك بعد شوية

أنا قلت إيه الكروتة دى!!!

بعد كدة إتصلت بيا واحدة من رقم لوكال بتتأكد من العنوان و إذا كنت طلبت الأسعاف..قلتلها أنا مش عارفة إذا كانت الحالة خطيرة ولا لأ؟؟ بس أنا حاسة إنى هافقد الوعى ومعايا طفلتين و أنا لوحدى...قعدت تسألنى شوية أسئلة عن الحالة و التنفس والألم ...وقالت لى هيجيلك الأسعاف دلوقتى ما تقلقيش...إستريحى و إسترخى..فى خلال 5 دقايق من أول مكالمة بدون مبالغة كانوا وصلوا...لقيت اتنين زى القوات الخاصة كدة وشايلين شنطتين كبار قوى...ولابسين جوانتيات وبيكشفوا عليا بالسماعة ..عشان التنفس...وبعدين قاسوا الضغط طلع 140\100 هو بيقولى طبيعى...بس بالنسبة لى..دة عالى قوى...انا الطبيعى بتاعى...80\60...مرة دكتور قالى ايه ضغط الأموات اللى انتى ماشية بيه دة؟؟ وسبب علو الضغط طبعا كمية الأدرينالين المهولة اللى طلعت بسبب الألم

بعد كدة عملى رسم قلب فى جهاز معاه وطلع الورقة فى ساعتها طلع طبيعى...كشف على صباعى قالى الأصابة فى المفصل...وهما بيكشفوا كان البوليس وصل وبيكلمهم على اللاسلكى...بيقولهم نيجى...قاله مش محتاجينكم دلوقتى انتظروا برة...ايوة بس دى معاها اطفال..

هنشوف الأول حالتها ونبلغكم...

قالى عندك حد تسيبى معاه الأولاد...قلت له لأ

قالى لو هتيجى معانا المستشفى عشان تعملى اشعة...يا تسيبى الولاد مع حد يا إما البوليس هياخدهم...قلتله لأ خلاص

المهم قالى فى كل الأحوال لازم يتثبتوا على دعامة ومادام الصباع وما أتعوجش أو خرج من مكانه يبقى مش محتاج جراحة...وقالى على شوية حاجات لو حصلت...لازم اروح على المستشفى اعمل الأشعة..

كل الجو المشحون دة وهما بيلاعبوا البنت الصغيرة وبيهزروا والأبتسامة مافارقتهمش...واحد منهم قالى بصى أنا كسرت كل صوابعى قبل كدة...عادى يعنى :lol:

وبعدين إستأذوننى فى شوية بيبر ورك زى تاريخ الميلاد وتاريخى المرضى وتوقيعى إنى مارضيتش أروح المستشفى بإختيارى...وأنا بقوله تاريخ ميلادى...المسعف التانى بيقولى أنا نفس الشهر ونفس السنة بس أصغر منك بيومين :P

طبعا ما أخدوش فلوس وما سألوش على أى حاجة ولا حتى الهيلث كارد بتاعى...سألونى بس إنتى لانديد إميجرانت ولا إيه...وما طلبوش حتى إثبات!!

ومشيوا...وأنا فى حالة من الذهول...

تعليقى...

البشر هنا أهم حاجة فى الدنيا...الأنسان ليه تمن...وتمن كبير

بصراحة أنا حسيت أد إيه البلد دى عظيمة...من الموقف دة ...مجى البوليس عشان يأمنوا الأطفال فى حالة لو عندى حاجة خطيرة....حاجة تفرح بجد

وبيستأذنوا قبل ما يدخلوا...عشان مايعملوش قلق

يعنى حسيت فعلا إن البلد دى تستاهل التعب...

تستاهل بهدلة البدايات..

مادام التعامل كدة....

فى إنتظار تعليقاتكم عقبال ما أحضرلكم الموقف التانى

تحياتى

سوسورانى

[precanadian]

ردي الوحيد اننا فعلا لابد ان نخجل من انفسنا ومن تعاملتنا مع بعض .

في السعوديه مرسوم ملكي بمنع علاج الاجانب في مستشفيات حكوميه

وفي مصر العلاج للاغنياء ولو اتعالجت فى مكان حكومي محترم دائما يعامل المريض كانه شئ وليس انسان يجب ان تحترم مشاعره ومشاعر اهله

اتعجب من بلاد هي مصدر ومنبع الاديان يصل بها الحال الي هذا

ربنا يشفيكي يا دكتوره سوسو .

بعت لك مع المهندس زناتي هديه ( اقراص كالسيوم جبس ) :happy: :lol: .

[مازن أطرش]

والله ..ده كلام ..يخلي الواحد..ينبسط ..عشان قرار الهجرة .ويزعل كمان ..بس ليه ..اعتقد كلكم عارفين ..

[moheltohamy]

تعرفي يا بنتي إني باستمخ دايماً من كلامك وحكاياتك عن الحياة والمعيشة في المجتمع الكندي ، لدرجة إنك حببتيني في كندا من قبل ما أوصلها wst::

وكلامك على فكره بيؤكد فكرتي وانطباعاتي الأولى اللي شفتها في المجتمع ده على مدار أكتر من سنتين دخلت كندا فيهم على فترات. الناس دي ناس نقية ، وبتتعامل بالفطرة السليمة ، ولسّه ما تلوثوش إلى حد كبير ، وإن كان منّا - كمهاجرين من دول رجعية والعالم التالت - من يعملون جاهدين على إفسادها والتلاعب بأنظمتها :P

وألف سلامة عليكي من دور البرد الغبي إياه... إنتي باقيلك كام مصيبة كمان ، وتحققي الريكورد في التلطيش ، وتجيبي الكاس للمنتدى wst::

بس على فكرة... أخوكي خده قبلك ، يعني لي بكل فخر السبق في موضوع الـ Swine Flu ده! مدير بقى وكدهوت!

في مايو اللي فات ، وأثناء تواجدي في كالجاري عشان كورس الـ EMR إيّاه اللي اتكلّمت عنه ، جاني دور برد غير طبيعي... في المعتاد دور البرد آخره معايا شوية زكام ، و... مناخيري تحمر :happy:

المرة دي بقى دور البرد جاني بصورة عمري ما شفتها في حياتي... بخلاف الزكام ، هدة حيل رهيبة ، وسخونة ، وتكسير في جسمي كله ، والصبح بلغم فوسفوري ، وعطس متكرر ، ومع العطس كنت باحس بألم فظيع كما لو أن فيه سيخ حامي بيخترق رئتيّ ويخرج من أكتافي! كل ده وانا باخد زيثروماكس ، وعلاج للبرد قوي المفعول ، وبضعف الجرعة المطلوبة!

وألاقي بعدها بكام يوم... وفي جريدة Calgary Sun كانوا كاتبين ع الصفحة الأولى ، وبالبُنط العريض (It's here) ، ومن ضمن المقال كاتبين إن الـ Swine Flu ظهر في كالجاري لأول مرة ، واكتشاف حالتين مصابين بيه! طبعاً كنت أنا الجندي التالت ، بس المجهول... اللي دخل المعركة واجتازها ، ومحدّش حس بيه!

في خلال فترة العيا دي صعبت عليّا نفسي أوي... وخصوصاً إحساسي إني متفرّدٌ بصبابتي ، متفرّدٌ بكآبتي ، متفرّدٌ بعنائي! :cry:

مش موضوعنا حالياً... هييييييييييه... دنيا wst::

المهم... كلها كام يوم ويعدّوا ، وكده ولاّ كده... هوّه دور برد! أتمنى بس محدش من البنات يلقطه منك ، وربنا يحفظهم.

وطمنينا عليكي من وقت للتاني.

تحياتي :lol:

[حسام يوسف]

الف الف سلامة يا دكتور سوسوراني

معلش لو متاخرة

وان شاء الله خير وتقوميلنا بكل سلامة يا سفيرتنا فى كندا

[jessika]

مستنية مننا تعليقات..........بلذمة تعليقات اية اللى تتكتب فى كلامك دة يا سوسو

دة انا حسيت اننا مش هنهاجر من بلد لبلد لالالا دة هايحصلنا حالة تحول من لاشىء الى بنى ادمين

يعنى كاننا بنسمع بس عن انسان وانسانية واحنا فصيلة تانى خالص

بس نكشر ربنا اننا اخيرا ممكن نحس يعنى اية انسان ونجرب قبل ما نموت

ربنا يفرحك يا اختى على كلامك وبجد اول مرة احس بيكى كدة وكنت فكراكى بردو قوية بس الواحد فعلا مهما كان قوى فى لحظات بيبقى زى البيبى ...........بس انتى بجد قوية وجدعة وانا بصراحة مقصرة معاكى فى السؤال

اوعى تخافى ربنا معاكى وحارسك انتى وبناتك .........واحنا معاكى بجد وبنحبك

ربنا معاكى يا قمر ويحافظ عليكى

اة على فكرة انا حسيت اد اية اللغة مهمة بجد قبل السفر موقف زى دة محتاج الوزاحد يتعامل ويتكلم شجعتينى اذاكر

براحة بقى على نفسك ومتستعجليش فى الكتابة خالص

[أكسيلانس]

ألف سلامه عليك يا دكتوره

و علي فكره يجب ان ـؤمني بموضوع الحسد ,, و المحسود هنا مش أنت ,, المحسود هنا هو زوجك, لان ما تقومي به من تحمل مسؤليه يستحق الاشاده من نحن معشر رجال الشرق الاوسط هو ما يحسد عليه وجك من المحيطين به الذين لا يستطيع العنتر فيهم أن يتأخر في الحمام أكتر من خمس دقائق , ألآ ,,,,, أنا الحقيقه مقدر جدا ما تقومي به لان وجتي تقريبا في ظروف مشابه,, و لكن في النهايه أعتقد أننا جميعا نفعل ما نفعل من أجل أولادنا الذين نحاول قدر المستطاع أن نجنبهم ما مررنا به من صعاب و لو كانت هذه التضحيات لاي شئ أخر ما أستمرت أبدا,,

أدعوا الله لك بسرعة الشفاء و لا تنسي أن كثرة الابتلاء ترفع من الذنوب و تقرب العبد الي ربه ,, و الصبر عليها يرفع الدرجات,, أكثري من التسبيح و الاسغفار 100 مره في اليوم ,, صدقيني بسيطه و لكنها تخفف البلاء و عليكي بصلاة الضحي لانها تخفف من ألام الجسم ( و هذا حسب ما جاء في رأي الفقهاء )

و بالله التوفيق

[safaalabana]

سلامتك ياسوسو...كلاكيت عاشر مره والله ياسوسو ..انا ملاحظه ان كل مداخلاتى ليكى بقت بتبتدى بنفس الجمله ...ياربى كل ده !!!!!!!

اللهم لا اعتراض ...عموما كل اللى مكتوبلك شوفتيه والحمد لله انك متماسكه ...وخدى باللك من نفسك ومن البنات خلى المسافه بينك وبينهم مترين على الاقل واللى مناعتها فيهم ضعيفه ممكن تبدأى لها تاميفلو ...وربنا يطمنا عليكم

وان شاء الله نيجى ونلاقيك زى الفل وتكون دى اخر الاحزان ...يا سوسويا بنت رانى امين :unsure:

[jessika]

انا بختلف معاك استاذ محمد هى مش مفروض تصدق موضوع الحسد دة اساسا لانة غير صحيح بالمرة

واصلا نتيجة الحسد تعود على اللى بيحسد على فكرة مش على المحسود

لان ربنا عمرة ما هايسمح يعنى لولادة يتضروا علشان عين وحشة ولا دعوة وحشة لالالا

بس احيانا الظروف وتصرفاتنا هى السبب ومش بناخد بالنا دة كل الموضوع

اتكلى على الله يا سوسو ومتركزيش فى الموضوع وتعدى تشكى فى اللى حوليكى وتتوترى

ربنا معاكى

[bent misr]

الف سلامه عليكي يا سوسو

و الله يا بنتي أنا زعلت بجد بس معلش

ان شاء الله تخفي و تبقي كويسه بس أهم حاجه

تبعدي عن البنات و أكيد همه نبهوكي لكده

بس ما فيش عزل ولا حاجه زي الي عندنا هنا

ده هنا أخر جنان في موضوع swine flu ده

و سلامة صوابعك طبعا ده وقف حال لوحده اسأليني أنا

عن اصابات الايدين :happy:

و بجد الي حكيتيه ده شئ لا يصدقه عقل

هوه في ناس بالجمال ده :lol:

الناس دي يجب أن تحترم بجد :lol:

[precanadian]

وكمان swin flu

براحه شويه علي فلوس البلد

علي منيجي مش هنلاقي ميزانيه نتعالج بيها :lol:

ربنا يستر علي زناتي :lol:

[عنبو]

الواحد نفسه يخرج من الحاله الى هو فيها دى وبعدين قعدت افكر وافكر واقعدت لحد لما وصلت لحاجه

قولت يااااااض يا محمد الى بيدلعوك ب احمد محمد عبدالسميع لازم تغير المووووووووود وتغير يومك

انا المفروض كل يوم بالليل بقعد اذاكر شويه وفى الاخر انام وهكذا

قولت انهارده لا لازم اغير تروح فين يامحمد تروح فين يا أحمد وبعدين قولت خلاص مافيش غير السفاره الكنديه

اخدت بعضى الاول واطلعت على البيك جبت واحد نيجتس 10 قطع سبايسى ده ليا وجبت واحد نيجتس 7 قطع عادى ده للسفير وطبعاً جبت ب 2 ريال خبز وجبت كمان 1 باربيكان 1 سفن دايت للسفير

واخدت الاكل واطلعت على السفاره وسألت على السفير لقيته موجود بس كان بيصلى المغرب اقولت طيب انزل اصلى معاه تحت الغريبه انه لقيته مبصليش وقاعد بيولع سيجاره قولته طيب انت ليه مش فاتح طالما مش بتصلى قلى تاخد سيجاره قولته هى بنى ...............

على العموم بعد الصلاه طلعنا فوووق ودار بينا الحوار كالاتى

انا :: خد بالك انت الطبق بتاعك سبع قطع بس اوعى تكون بدلت الاطباق

هو :: لا سبع قطع ليه هو انت جايب ليك كام قطعه ؟؟

انا :: تاخد عيش

هو :: امال ايه سبب العزومه دى دانت عمرك ما علمتها ؟؟

انا :: بص من الاخر كده الرجاله بتوعك عملوا اعلى واجب مع بنتنا سوسو رانى فى كندا وانا قولت واجب عليا كابن بلد ان اعزمك على واجبة بيك

هو :: هو انت تعرف سوسو رانى ؟؟

انا :: م ت ش "" حركه صوتيه "" ايه الى اعرفها دانا اعرفها من ايام لما كان اسمها سو بس بس الحمد لله كبرت دلوقتى وصار اسمها سوسو

هو :: انت مش نااااااااوى تهاجر

انا :: حضرتك انا كنت ناااااااوى بس لما لقيت سوسو كل شويه لاما عيانه لاما بتعمل قلقاس وانا طبعاً مبحبش القلقاس خااااااااالص حتى لو كان فيه فوائد الدنيا بحس انه بطاطس وبيستعبط

وبعدين حضرتك انا كنت نااااااوى اهاجر كعالم كيمياء بس هى قالت ليا حضرتك لاما تيجى كعالم لاما تيجى كيمياء

هو : وانت بقى نااااااااوى على ايه

انا :: ان شاء الله ناااااااااااوى اتجوز السنه الى جايه ؟

هو :: مبرووك مبرووك ولقيت العروسه

انا :: مهو انا جيالك اساساً علشان كده

هو :: ينظر ليا باستغراب رافعه حاجبه الايمين قائلاً انت مكنتش بتقول ان انت جاى علشان توجب معايا علشان خاطر سوسو

انا :: طبعاً جاى علشان خاطر بنتنا سوسو بس وانا طالع على السلم شفت بنت حضرتك

هو :: اه انت عاوز تتجوز بنتى

انا :: ادينى فرصه افكر هفكر وارد عليك ماااااااااشى

هو :: تفكر فى ايه يابنى

انا :: مش انت قولت تتجوز بنتى ؟؟ وانا قولت هفكر ولا خلاص مستعجل قوى قولك خلاص انا موافق ياعم بينى وبين نفسى قائلاً كله يهوووون علشان الجنسيه الكنديه

اكمل ولا خلاص انا شايف الاغلبيه بتقول خلاص ؟؟

يلا ياسوسو عوووووودى بسرعه

محمد اونبوووووو عنبوووووو بس بالكندى يعنى ؟؟

[enjisultan]

كنت فاكرة اننا لوحدنا اللى حققنا الريكورد فى الاحداث العجيبة فى الاونة الاخيرة بس بصراحة تستهالى الكأس بجدارة واستحقاق

بس احلى حاجة باسطيطنى بجد انك حسيتى بالامان

عارفة الحاجة فعلا اللى تفرق مع الواحد هو انة يكون مطمن على نفسة وبناتة وبصراحة الامان حاجة مش بتتحقق فى اى بلد وكمان حاجة ما تشتريهاش بفلوس

فالحمد لله بجد على الامان اللى ربنا حاوطك بيه انتى وبناتك فى الازمة دى وسلامتك تلاتاشر مليون مرة(مش عارفة لية تلاتاشراللى جة فى ايدى)

bv:- :) :blink:

[جيمي]

كلاكيت عشرتاشر مره .... الف سلامه على حضرتك يا مدام سوسوراني .... بجد ربنا يكون فى عون حضرتك ويقويكي ويصبرك .... وبجد كمان انتي عندك قدره كبيره على تحمل المسؤليه .... وروحك كمان حلوه حتي فى الازمات والعيه والمصايب ... ومن واقعي متابعتي لكتابات حضرتك فانا عارف ومتاكد ان حضرتك مش بتاعة كلام شعارات .... يعني الكلام اللى حضرتك بتحكيه كانه مشهد متصور وانا بشوفه ... وبنبهر بيه .. وبتحسر على حالنا .. وان كنت بحمد ربنا طبعاا على كل حال ... كملي بارك الله فيكي ..كلام حضرتك دفعه للامام bv:-

[ehabtaher]

الف سلامه يا مدام سوسورانى انا اسف اذا كان ال ادول مش مكفى وده معناه ان الالم شديد بس انا كان قصدى بس انك تكونى جامده خصوصا انك لوحدك هناك ولازم تعرفى ان كل المشاكل دى تزيد الشخص صلابه وعايز اسألك سؤال واحد بس مش عارف ده شخصى والا عادى يعنى

انت ليه لم تبحثى عن عمل حتى الان حتى لو متطوعه ( مش ده يفيدك بعد كده ) والا الاولاد لاخمينيك وانا مقدر طبعا وجود اطفال صغار

ممكن تفيدينا فى الموضوع ده لان زوجتى ممكن تبقى فى نفس الظروف وعايز اعرف هل الشغل او التطوع فى وجود اطفال يبقى متعب يعنى والا الحضانات غاليه