أونتاريو ترحب بـ سوسو

[dcfarouk]

انا ليه راي في موضوع نجع حمادي

في واحد اغتصب واحد وبالصدفه انه كان مسيحي وبالصدفه هي كانت مسلمه

فكان من الطبيعي في الصعيد اهل البنت اللي همه مسلمين واللي ده كان مبني علي صدفه ان البنت مسلمه يخدوا بطارهم وده اي حد هنا كان هيفكر فيه سواء هندي او مسلم او مسيحي وطبعا اللي هيفكرا يقتلوه هو الولد اللي قلنا من الاول انه صدفه مسيحي فطبعا حاولوا همه ينتقموا منه

ولكن قسم الشرطه اللي همه مسلمين خبوه جوه عشان ميتاذاش وكمان الولد اتحجز عشان الجريمه ومنعوا الاهالي توصله فكان الناس اللي فلي البلد هتاكل وش اسره البنت اللي قلنا انه كانوا مسلمين بناء علي صدفه اغتصاب مسيحي للبنت المسلمه فاول حاجه فكروا في التار وانهم ياخدوا حد من عيله الولد ده وكان العيد قرب (بس ده عرض بنت في الصعيد يعني قفلت مش فارقه عيد من غير عيد) خلاص نصطاد كام واحد من عيله الواد ونطخهم اللي زي ما قلت بالصدفه ان الواد كان مسيحي

الصوره الخارجيه الغير حقيقيه مسلمين ومسيحين

الصوره الحقيقيه شاب منحرف اخلاقيا و ناس صعاديه دماغها قفلت بتاخد بالتار

وطبعا نتيجه النفخ الاعلامي الغبي وسرعه الحكم ممكن يكون شحنت ناس بتحب دينها علي الطرفين قالك بس الحرب ابتدت وكل الموضوع اصلا مش طائفي كبدايه

اقول لحضرتك يا مدام سوسوراني لو واحد جه يوذئ اي بنت مسيحيه وانا واقف انا هدافع عنها ولو كان مسلم او اي دين

انا اسف مش محتاج اقول كده بس انا حسيت انك اتهزيتي وثقتك فينا اتهزت

الرسول صلي الله عليه وسلم اوصانا خير باهل الكتاب

وقال (من آذى ذميًّا فأنا خصمه، ومن كنت خصمه خاصمته يوم القيامة"..

"ذميا جايه من اهل الزمه واهل الزمه هم النصاري واليهود (اليهود مش الصهاينه)

اظن حديث الرسول صليي الله عليه وسلم كفايه للرد عن اي حد بيروج لفتنه

وعلي فكره احب ألفت النظر ان في ناس كتير اولها الحكومه من مصلحتها النفخ في الفتنه في الوقت ده بالذات عشان تقلل رصيد الاخوان كجماعه اسلاميه في الانتخابات الجايه

من خلال تعاطف الشعب من مسلمين ومسيحين مع القضيه وده قريته في كلام اللواء سيف اليزل مع عمرو اديب وتلميحاته اثناء حديث عن موضوع شريان الحياه وجه الخبر بتاع نجع حمادي فابتدي يلمح زي ما قلت

انا مش بقول نشجع الاخوان ولا لا

انا بقول ديه بجد مكيده وفي ناس بتنفخ فيها

ياريت نكون علي الوعي الكافي

وياريت نسمع خير عنك يا مدام سوسوراني

انا كنت مستني النتيجه معاكي ونجحت معاكي وكنت قلقان الولاد يقعدوا فين وانتي بتمتحني

احنا عشنا معاكي قصتك

انا وصلت صفحه 45 في القرايه وبجد مستمتع

تم تعديل 8 يناير 2010 بواسطة dcfarouk

[saeedo]

الاخت الكريمة سوسو رانى تحية طيبة وعيدا مجيدا سعيدا عليكى انت واسرتك وكل من تحبون

طيب ماتبصى للموضوع من زاوية اخرى هل تعتقدى ان متابعى مواضيعك هم فقط الاخوة الاعضاء الذين يقومون بالرد عليكى اوحتى المشتركين فى المنتدى عموما ......لا" ابيسو لوتولى" :blush2: فى ناس كتير من برة الممتدى ده بتابع حضرتك وبامانة وبدون مبالغة بيحترموكى جدا وبيقدروكى كمان وفوق ده منهم من يتمنالك الخير ومنهم من يدعيلك

وانا من هذا المزنق احيى سيادتك واطالب ان حضرتك توفرى حل من اتنين ياتبنلهم بيوت ياتوفرلهم الكلة :blink:

اما بالنسبة لما حدث فى بلدنا الغربة

فلا تعليق يمكن ان يوضح مدى سوء ما يجرى

ومع احترامى الشديد لجميع الاراء عن الذكريات مع اصحابهم المسلمين او المسيحين ولكن لو كل واحد جاب موس وعور نفسه هايكتشف حاجة غريبة جدا جدا يا ترى ايه هي ........ممكن حد يفكر كده ؟ ايه هي ؟

اقول انا .... ان كل واحد فينا لما يتعور بينزل دم ...... والله ....لا ......مش معقول ...دم .....اه صحيح ده دم ........طب معنى كده ايه

المعنى ........................... عليك ان تصل بنفسك للاجابة

رجاء دى لا فذلكة ولا فلسفة ................دى انسانية

[moheltohamy]

الزملاء الأفاضل...

أستأذن حضراتكم نخلّي كلامنا في صميم الموضوع ، ومفيش أي مجال نحكي حواديت عن أحداث نجع حمادي وفرشوط وخلافه!

أنا لما سمعت الخبر إتضايقت وحسيت إن فيه ناس من بلدي ، يعني أهلي ، إتقتلوا في يوم العيد ، وما حسيتش أبداً إن الناس دول مش تبعي ، دول تبع سوسوراني!

وبالتالي يبقى كل الكلام ده لا محل له من الإعراب ، وإلاّ فسأنتظر الناس تتفضل تعزيني أنا كمان في التوبيك بتاعي! :blush2:

نرجع لمحور التوبيك يا حضرات بعد إذنكم...

[EmanRasmy]

أولا .... سلاااااااااااام كبير قوي للدكتوره سوسو ... و كل سنه وانتي و عيلتك بخير و سعاده... و ياريت المناسبه الحلوه دي تفتح نفسك للكتابه تاني...

ثانيا .... للأخ حسااااااااااااااام اللي شاف واحد سايحه و نايحه ومش عارف إيه و عمل موقف جدعنه ... الموقف حلو و كل حاجه زي مواقف كتير بنحب إحنا المصريين نوريها للأجانب عشان يعرفوا إننا كويسين قد إيه.... بس أنا نفسي واحد يقول عن موقف حلو زي ده عمله مع واحد أو واحده مصريه .. و يا سلام لو كانت فلاحه غلبانه أو موظف بسيط غلبان من الناس اللي ماليه الشارع .. أو حتى أي راجل عادي (مش بيه و لا باشا) ... و يا سلام أكتر لو الموقف ده في غربه و بالذات في الخليج.....نفسي أشوف الإنسان المصري الخارق ده...

مش عارف ان كان كلام حضرتك يحمل السخرية ولا لأ

لكن والله العبدلله كنت فى جدة 69يوم بحالهم

وفى يوم من الأيام القليلة دي

كان ليه موقف الحمدلله كويس وساعدت واحد مصري كان فعلا تعبان جدا

والحمدلله رب العالمين

كان واحد

مش سايحة أو نايحة

وشكرا على التعليق والمرور

لا و الله ... انا مين عشان أسخر من أي حد .. سوري لو كنت حسيت كده ف كلامي ... انا بحب كل الناس اللي بتعمل مواقف حلوه و بالذات اللي بيعملوا مواقف من دي مع أهل بلدهم و الغلابه منهم ... و لأن موقفك ده جميل جدا .. خلاني أسرح شويه و أتخيل أني شايفه حد بيعمل كده مع أي واحد مصري في السعوديه ... لأن للأسف المصريين هنا وحشيين أوي مع بعض على عكس كل الجنسيات التانيه ... مش عارفه ليه ؟؟ يمكن عشان ظروف بلدنا!!... أنا بالذات اتقرصت كتير في ال3 سنين اللي فاتوا من ساعة ما جيت السعوديه من مصريين ... مع اني كنت بحاول أكون معاهم زي ما انا شايفه السودانيين مثلا مع بعض .... تخيل يا أستاذ حسام ... انا أخصائية تخدير و عنايه مركزه ... و ف شغلي قابلت مرضى كتير من كل الجنسيات .. و احلى ناس مع بعض هما السودانيين فعلا... تخيل لو واحد سوداني دخل العنايه ... بتبقى فعلا كارثه... حالة طوارئ ... و طول ما هو ف العنايه بيفضل عندي صداع من كتر الناس اللي بتسأل عليه بالزياره او التليفون ... و قبل معاد الزياره بساعه بتلاقي الممر المؤدي للعنايه مسدود من الناس و ممكن ما اعرفش أخرج من المستشفى بسبب الزحمه... و تيجي تسأل بعض الناس عن درجة قرابتهم للمريض ... تخيل يقولولك أول مره نشوفه !! بس سمعنا إن فيه واحد سوداني ف العنايه قلنا نيجي نزوره ...حاجه جميله أوي ... المصريين بقى مش عايزه أقولك ... ممكن يبدأوا معاك كويس.. و فجأه تكتشف إن مثلا اللي غن اللي انت مصاحبه و واثق فيه هو اللي بينقل عنك حاجات أو بيحاول يئذيك ... مش كل الناس طبعا ... بس للأسف كتير كده ...

عموما سوري مره تانيه و معلش لو كنت طولت عليك.... بالمناسبه ... أنا بافكر أهاجر السودان ... أهي برضه قريبه و لو نسيت حاجه ف مصر .. فركة كعب أجيبها و ارجع

[حسام يوسف]

الأخت الزميلة د.ايمان رسمي

معلش

يمكن أنا خدت الكلام بسخرية

احنا فى المنتديات بنستخدم 7%بس من أدوات التواصل الانساني وهي الكلمات

وده اللى بيسبب سوء الفهم

وبأكد على كلام حضرتك بخصوص السودانيين

انا بشتغل فى شركة سودانية دلوقتى لسة بتبدأ شغلها فى مصر

وحقيقي ناس محترمين

وبخصوص الهجرة للسودان

حضرتك مش محتاجة لهجرة

تركبى الباخرة من اسوان عندنا لوادي حلفا

او طيران مباشر قاهرة-خرطوم

واحنا لينا كمصريين الحقوق الاربع

الاقامة العمل الامتلاك

وحاجة رابعة مش فاكرها

تحياتى لحضرتك

[norbakrahmed]

سوسوراااااااااااني - معلش متتضايقيش من الناس الغريبه دي - للاسف هما كتروا اووووووووووووي اووووووووووووووووويو هما بيتبعوا طريقه بيحبوها اوي :

1- اللف و الدوران

2- السم في العسل

للاسف انا عانيت كتير من الناس دي لاني و الله اللي في قلبي على لساني و بتعامل مع كل الناس بحسن نيه حتى و لو ثبت العكس

و بحاول اتغير بس لسه زي ما انا :big_boss: - يللا بقه ربنا يهدي الجميع و المهم الثواب عند ربنا

من الاخر هقولك be cool اخرررررررر تلات اربع حاجات و لا يهمك

و مرسيييييييي على نصايحك الحلوه بخصوص الحجاب :roseop:

[اسكندرانيةكنداوية]

الله ينور يا د/ سوسو هو دة الكلام :closedeyes:

يارب ما يحرمناش منك ولا من مداخلاتك المفيدة يا زعيمة :lol:

حقيقى شكرا على النصايح الهايلة :lol:

[ehabtaher]

يعنى الجاكيت اللى زى ده نلاقيه فى السعوديه .. ماعتقدش يكون ثيرمال

طيب البنطلون بيبقى ثيرمال برضه

هلى فيه مواقع ممكن نشترى من النت قبل ما نسافر والا الواحد لازم يعمل لاندنج فى الصيف

[dcfarouk]

يعنى الجاكيت اللى زى ده نلاقيه فى السعوديه .. ماعتقدش يكون ثيرمال

طيب البنطلون بيبقى ثيرمال برضه

هلى فيه مواقع ممكن نشترى من النت قبل ما نسافر والا الواحد لازم يعمل لاندنج فى الصيف

انا مش عارف بصراحه موضوع ثيرمال ده في اسكندريه فين

انا روحت محل وسالت علي البوت يكون مقاوم ل30 تحت الصفر الناس ضحكت

ربنا يسهل بجد والواحد يعرف ينزل علي الصيف هتكون فرصه كويسه وشيل اخف خصوصا بعد تقليل وزن الشنط في الطياره ل 20 كيلو وشطنه واحده

انا كتبي بس 30 كيلو مش عارف اعمل ايه

هو الكيلو الزياده بكام؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انا بفكر البس كل اللبس فوق بعضه واخللي الشنط للكتب بس

:lol:

فكره صح

[dcfarouk]

بجد والله حاجه تزعل غياب مدام سوسوراني

يا جماعه حد يطمنا عليها

انا خايف تكون زعلانه مننا

حد يتصل بيها ولا اي حاجه متسيبوهاش كده ديه لوحدها في الغربه وممكن زعلانه مننا

بجد شعور صعب

[dcfarouk]

علي فكره يا دكتور ايهاب الجاكت ده ضيق عليك ومش مظبوط من الكتاف

[اسكندرانيةكنداوية]

يعنى الجاكيت اللى زى ده نلاقيه فى السعوديه .. ماعتقدش يكون ثيرمال

طيب البنطلون بيبقى ثيرمال برضه

هلى فيه مواقع ممكن نشترى من النت قبل ما نسافر والا الواحد لازم يعمل لاندنج فى الصيف

لو بتسأل بجد يا د/إيهاب أنا أشتريت مش ثيرمال لكن شديد من عند ديبنهامز بالرياض اللى فى غرناطة مول عند تشكيلة كبيرة الأسعار تبدأ من 400 ريال بس ما عجبناش أشكال و ألوان الكوفيات و الكابات

متهيأ لى د/ صفاء ممكن تفيدنا أكتر لأنها بتستعد يعنى ممكن تكون لفت معظم المولات الله يعينها و يوفقها يارب

أو إذا فى حد بدأ التسوق ممكن يساعد بالمعلومات حقيقى يكون مشكور

[SoSo R]

مساء الخير يا جماعة..

لو تسمحولى أصبروا شوية على موضوع الجاكيتات عشان بس ما أفقدش تسلسل الأفكار..

بس لو مستعجلين ممكن تبصوا فى إتش آند أم

أو سيرز..

زى ما أتفقنا الكلام الجاى على الجوانتيات...

تصبحوا على خير لأن الساعة 1.30 صباحا

تحياتى

[مراد أنور]

و إنت من أهله

[dcfarouk]

اهلا مدام سوسوراني

طمنينا عليكي

ياريت تكوني بخير

[wnam]

حمد الله على السلامة يا سوسو

معلش جت متأخرة بس اللابتوب مات مرة واحدة وجبنا واحد تانى لكن الكيبورد مكنش عليها عربى فمقدرتش اكتب اى حاجة بسلاسة

دايما استنى تعليقاتك اللذيذة واقعد اضحك

رجوعا حميدا انشاء الله...... بجد وحشتينا .....

[norbakrahmed]

براحتك يا سوسو مستنييييييين

[اسكندرانيةكنداوية]

نوك نوك نوك tot:: أية يا د/ سوسو

إنت راحت عليكى نومة وألا أية yaw:

يلا فوقى كدة وإشربيلك واحدة هوت سموزى فانتى سيز :blink:

القهوة مليانة زباين :) دة غير إن ورانا شوية شوبينج قبل التخفيضات و البضايع ما تخلص

طمنينا عليكى يارب تكونى إنت و البنات بخير :)

[norbakrahmed]

نوك نوك نوك yaw: أية يا د/ سوسو

إنت راحت عليكى نومة وألا أية yaw:

يلا فوقى كدة وإشربيلك واحدة هوت سموزى فانتى سيز :blink:

القهوة مليانة زباين :) دة غير إن ورانا شوية شوبينج قبل التخفيضات و البضايع ما تخلص

طمنينا عليكى يارب تكونى إنت و البنات بخير :)

ايه رأيك نرغي احنا شويه عقبال سوسو ما تيجي؟؟؟؟؟ انتي ازيك؟؟؟؟ مبتجيش ليه؟؟؟؟؟ مش تبقي تيجي؟؟؟؟ tot::

[SoSo R]

مساء الخير..

عدنا لنواصل الأرسال...بقالى مدة ماشربتش هوت سموزى ولا عتبت تيم هورتونز أصلا...

الجوانتيات..أو الميتنز

الميتنز هيا اللى بيبقى الأربع صوابع كلهم مع بعض والأبهام لوحده..

ودى منتشرة للأطفال أكتر من بتاعة الكبار

عشان نختار جوانتى صح..نحط فى بالنا...

يكون بيدفى كويس أوى وعازل للحرارة

يكون سمكه قليل مش تخين عشان نعرف نستخدم إيدينا من غير ما نقلعه..

يكون متين ما يتقطعش

الجوانتيات من أكتر الحاجات اللى محيرانى لحد دلوقتى لأنى أشتريت أكتر من واحد ومش نافعين..ودى غالبا حاجة هتتجاب من هنا لأنها مش موجودة فى الميدل إيست بالمواصفات دى..

أنواعها لا تعد ولا تحصى ..المشكلة إن الأنواع اللى تنطبق عليها المواصفات المطلوبة بتكون غالية قوى...

واحدة نصحتنى وقالت لى هاتى لك واحد ب 100 دولار وأشترى دماغك أنا أشتريت كتير وأتركنوا..وجبت الغالى

بس أنا أستكترت المبلغ بس شكلى خلاص هاستسلم..

المشكلة إن بعد الخصومات وحتى البوكسينج داى..يعنى مية تخفيض برضه أنا مستغلياه..وصل حوالى 40 دولار :lol:

الأنواع...

صوف عادى..

صوف متبطن بقماش وليه غطا يحوله لميتنز

جلد مع تريكو

تريكو من خيط عامل زى القطيفة..

جلد متبطن ودة أغلاهم وهو اللى ليه لازمة

جلد ليه حرف فرو كنوع من الشياكة..

خامة كدة سبه الشموازيه بس ما بتتبلش

نوع ووتر بروف زى السويترات ودة بيبقى تخين جدا..بس عازل من التلج مفيد لو بتشوفل السنو او بتشيل السنو من على العربية...لأنه ما بيتبلش ومابيسربش بس عيبه سمكه..صعب تسوق بيه مثلا

غير كدة هو عامل زى بتوع حراس المرمى بالضبط

الأطفال وبلا نقاش ماينفعش معاهم غير الميتنز الوتر بروف أو بتاع حراس المرمى..عشان تقيل وعشان لما يلعبوا بالتلج الجوانتى ما يتبلش

كدة الجوانتيات غطيناها..

المرة الجاية الجاكيتات

تحياتى